1, 2. Jije wa ma ná wesa he ngɛ mwɔnɛ ɔ?

NGƆƆ lɛ kaa o ngɛ nyɛɛe ngɛ gbɛjegbɛ ko nɔ ligbi ko nɛ kɔɔhiɔ ngɛ fiae wawɛɛ. Je ɔ mi pee tuu, oslabai ngɛ gbae, hiɔwe ngɛ sie, nɛ hiɔmi bɔni nɛmi wawɛɛ. Kɛkɛ nɛ o hla he ko nɛ o laa o he ngɛ. Hyɛ bɔ nɛ o bua maa jɔ ha kaa o na he ko nɛ ngɛ slɔkee nɛ o be pɔe!

² Mwɔnɛ ɔ hu ɔ, wa ngɛ si fɔfɔɛ kaa kikɛ mi. Je ɔ mi ngɛ wae daa ligbi. O ma bi ke, ‘Jije ma ná he piɛ pomi ngɛ?’ Mawu sɔmɔlɔ ko ngma ke: “Ma de Yehowa ke: ‘Mo ji ye wesa he, kɛ ye he bulɔ. Mo ji ye Mawu; i ngɔ ye hɛ kɛ fɔ o nɔ.’” (La 91:2) Niinɛ, mwɔnɛ ɔ hu ɔ, Yehowa ma nyɛ ma je wɔ kɛ je wa haomihi a mi, nɛ e haa wɔ hɛ nɔ kami kaa wa ma ná si himi kpakpa hwɔɔ se.

3. Mɛni blɔ nɔ wa ma nyɛ maa ngɔ Yehowa kɛ pee wa wesa he?

³ Mɛni blɔ nɔ Yehowa maa gu kɛ po wa he piɛ? Ke waa kɛ nyagba ko kpe ɔ, e ma nyɛ maa ye bua wɔ, ejakaa e ngɛ he wami pe nihi nɛ a suɔ kaa a maa ye wɔ awi ɔ. Ke nɔ́ yaya ko ba wa nɔ mwɔnɛ ɔ po ɔ, wa ngɛ nɔ mi mami kaa Yehowa ma tsu nyagba a he ní hwɔɔ se. Baiblo ɔ wo wɔ ga ke: ‘Waa hyɛ wa he nɔ saminya. Kɛkɛ ɔ, suɔmi nɛ Mawu ngɛ kɛ ha wɔ ɔ maa hi si daa.’ (Yuda 21) E sa nɛ waa hɛ wɔ kɛ su Yehowa he haa, konɛ e ye bua wɔ ngɛ haomi behi a mi. Se mɛni blɔ nɔ wa maa gu kɛ pee jã?

4, 5. Mɛni blɔhi a nɔ Yehowa je suɔmi kpo kɛ tsɔɔ wɔ ngɛ?

⁴ Ke wa yɔse bɔ nɛ Yehowa suɔ wɔ ha a, e maa ye bua  wɔ nɛ wa maa hi e kasa nya daa. Moo lɛɛ mo susu níhi tsuo nɛ Yehowa pee ha wɔ ɔ he nɛ o hyɛ. E bɔ zugba nɛ ngɛ fɛu kɛ ha wɔ, nɛ e bɔ tsohi kɛ lohwe slɔɔtoslɔɔtohi ngɛ nɔ. Jehanɛ hu ɔ, e haa wɔ niye ní kpakpa kɛ nyu nɛ wa maa nu. Yehowa tsɔɔ wɔ e biɛ kɛ e suhi ngɛ Baiblo ɔ mi. Nɔ́ nɛ pe kulaa ji kaa, e tsɔ lɛ nitsɛ e suɔmi Bi nɛ ji Yesu kɛ ba zugba a nɔ, nɛ e ba gbo kɛ ha wɔ. (Yohane 3:16) Kɛ gu Yesu kpɔmi afɔle sami ɔ nɔ ɔ, wa ná hɛ nɔ kami kaa wa ma ná si himi kpakpa hwɔɔ se.

⁵ Yehowa to hiɔwe Matsɛ Yemi ko sisi konɛ e po nɔ́ nami tsuo se. Matsɛ Yemi nɛ ɔ maa pee zugba a tsuo paradeiso, nɛ nɔ fɛɛ nɔ maa hi si ngɛ bua jɔmi kɛ tue mi jɔmi mi kɛ ya neneene. (La 37:29) Blɔ kpa ko hu nɛ Yehowa gu nɔ kɛ je suɔmi kpo kɛ tsɔɔ wɔ ji kaa e tsɔɔ wɔ bɔ nɛ wa maa hi si ha konɛ e hi ha wɔ. E ha wɔ he blɔ hu kaa waa kɛ lɛ nɛ tu munyu ngɛ sɔlemi mi, nɛ e maa bu wɔ tue. Niinɛ, Yehowa je suɔmi kpo kɛ tsɔɔ wa ti nɔ tsuaa nɔ.

6. Mɛni e sa nɛ o pee ngɛ suɔmi nɛ Yehowa je kpo kɛ tsɔɔ mo ɔ he?

⁶ Mɛni o ma nyɛ maa pee ngɛ suɔmi nɛ Mawu je kpo kɛ tsɔɔ mo ɔ he? E sa nɛ o pee nɔ́ ko kɛ tsɔɔ kaa o bua jɔ níhi nɛ Mawu pee ha mo ɔ he. Se aywilɛho sane ji kaa, mwɔnɛ ɔ, nihi fuu li sina. Benɛ Yesu ngɛ zugba a nɔ ɔ, jã nɔuu nɛ nihi pee a ní. Be ko ɔ, Yesu tsa kpititsɛmɛ nyɔngma, se a kpɛti nɔ kake pɛ lɛ ba na Yesu si. (Luka 17:12-17) Se wa suɔ nɛ waa pee wa ní kaa nyumu ɔ nɛ ya na Yesu si ɔ. Wa suɔ nɛ waa na Yehowa si be tsuaa be.

7. Kɛ e sa nɛ waa suɔ Yehowa ha kɛɛ?

⁷ E sa nɛ wɔ hu waa suɔ Yehowa. Yesu de e kaseli ɔmɛ kaa e sa nɛ a suɔ Yehowa kɛ a tsui tsuo, a klaa tsuo, kɛ a juɛmi tsuo. (Kane Mateo 22:37.) Mɛni enɛ ɔ tsɔɔ?

8, 9. Mɛni wa maa pee kɛ tsɔɔ kaa wa suɔ Yehowa?

 ⁸ Anɛ wa nya kɛkɛ waa kɛ ma de ke wa suɔ Yehowa lo? Dɛbi. Wa ní peepee nɛ waa kɛ maa tsɔɔ kaa wa suɔ Yehowa kɛ wa tsui tsuo, wa klaa tsuo, kɛ wa juɛmi tsuo. (Mateo 7:16-20) Baiblo ɔ tsɔɔ heii kaa ke wa suɔ Mawu ɔ, wa maa ye e mlaa amɛ a nɔ. Anɛ Mawu mlaa amɛ a nɔ yemi wa lo? Dɛbi, Yehowa ‘mlaa amɛ a nɔ yemi wɛ kulaa.’​​—Kane 1 Yohane 5:3.

⁹ Ke wa bu Yehowa tue ɔ, wa bua maa jɔ nɛ wa ma ná si himi kpakpa. (Yesaya 48:17, 18) Se mɛni maa ye bua wɔ konɛ waa hɛ wɔ kɛ su Yehowa he? Ha nɛ waa hyɛ.

10. Mɛni he je nɛ e sa nɛ o ya nɔ nɛ o kase Yehowa he ní ɔ?

¹⁰ Mɛni blɔ nɔ o gu kɛ ba pee Yehowa huɛ? Baiblo ɔ nɛ o kase ɔ ha nɛ o ba le Yehowa saminya, nɛ huɛ bɔmi kpakpa ngɛ o kɛ lɛ nyɛ kpɛti. Huɛ bɔmi nɛ ɔ ngɛ kaa la ko nɛ o suɔ kaa e hi tsoe. Ke o sume nɛ la a nɛ gbo ɔ, o maa ngɔ lɛ́ kɛ hi la a mi woe, jã nɔuu nɛ Yehowa he ní nɛ o maa ya nɔ maa kase ɔ ma ha nɛ huɛ bɔmi nɛ ngɛ o kɛ lɛ nyɛ kpɛti ɔ mi maa hi wae.​​—Abɛ 2:1-5.

11. Kɛ Baiblo tsɔɔmihi ma nyɛ ma ná o nɔ he wami ha kɛɛ?

¹¹ Ke o kpa we Baiblo ɔ kasemi ɔ, o maa kase ní komɛ nɛ maa ta o tsui he wawɛɛ. Benɛ Yesu ngɛ e kaseli enyɔ komɛ Baiblo gbami komɛ a sisi tsɔɔe ɔ, mo kadi bɔ nɛ munyu ɔ ta a tsui he ha. A de ke: “Benɛ wa ngɛ blɔ ɔ nɔ kɛ ma nɛ e ngɛ wɔ ngmami ɔmɛ a sisi tsɔɔe ɔ, hyɛ bɔ nɛ wa nɔ gbagba te ha?”​​—Luka 24:32.

12, 13. (a) Mɛni ma nyɛ maa ba suɔmi nɛ wa ngɛ kɛ ha Mawu ɔ nɔ? (b) Mɛni wa ma nyɛ maa pee konɛ suɔmi nɛ wa ngɛ kɛ ha Yehowa a he ko jɔ?

¹² Kaa bɔ nɛ Yesu kaseli ɔmɛ nu ngmami ɔmɛ a sisi nɛ a nɔ gbagba te ɔ, jã nɔuu nɛ eko ɔ, e pee mo benɛ  mo hu o bɔni Baiblo ɔ kasemi ɔ. Enɛ ɔ ye bua mo nɛ o ba le Yehowa nɛ o suɔ lɛ wawɛɛ, nɛ o be suɔe kaa o suɔmi ɔ he nɛ jɔ.​​—Mateo 24:12.

¹³ Amlɔ nɛ ɔ nɛ o ba pee Mawu huɛ ɔ, e sa nɛ o mia o hɛ mi konɛ huɛ bɔmi nɛ ngɛ nyɛ kpɛti ɔ mi nɛ wa wawɛɛ. E sa nɛ o ya nɔ nɛ o kase Yehowa kɛ Yesu he ní, nɛ o susu níhi nɛ o ngɛ kasee ɔ he konɛ o ngɔ kɛ tsu ní ngɛ o si himi mi. (Yohane 17:3) Ke o ngɛ Baiblo ɔ kanee ɔ, mo bi o he ke: ‘Mɛni enɛ ɔ tsɔɔ mi ngɛ Yehowa he? Mɛni he je nɛ e sa kaa ma ja lɛ kɛ ye tsui tsuo kɛ ye klaa tsuo ɔ?’​​—1 Timoteo 4:15.

14. Mɛni blɔ nɔ sɔlemi ma nyɛ maa ye bua wɔ konɛ suɔmi nɛ wa ngɛ kɛ ha Yehowa a mi nɛ wa?

¹⁴ Ke o ngɛ huɛ kpakpa ko ɔ, o kɛ lɛ sɛɛɔ ní be fɛɛ be, nɛ enɛ ɔ haa nɛ nyɛ huɛ bɔmi ɔ mi waa. Jã nɔuu nɛ ke wa sɔleɔ daa a, e ma ha nɛ suɔmi nɛ wa ngɛ kɛ ha  Yehowa a mi maa wa. (Kane 1 Tesalonika Bi 5:17.) Sɔlemi ji nike ní nɛ he jua wa nɛ wa hiɔwe Tsɛ ɔ kɛ ha wɔ. E sa nɛ waa je wa tsui mi faa nɛ waa kɛ Yehowa nɛ tu munyu. (La 62:8) E sɛ nɛ waa kase sɔlemi pɔtɛɛ ko nɛ waa hi lɔ ɔ pɛ dee daa, mohu ɔ, e sa nɛ wa de níhi nɛ ngɛ wa tsui mi. Niinɛ, ke wa ya nɔ nɛ wa kase Baiblo ɔ nɛ wa sɔle kɛ je wa tsui mi ɔ, suɔmi nɛ wa ngɛ kɛ ha Yehowa a mi maa wa.

15, 16. Kɛ o naa fiɛɛmi ní tsumi ɔ ha kɛɛ?

¹⁵ Ke o suɔ nɛ o ya nɔ nɛ o pee Yehowa huɛ ɔ, lɛɛ e sa nɛ o tu Yehowa he munyu kɛ tsɔɔ nihi hulɔ. E ji he blɔ nɛ wa ná kaa waa kɛ nihi maa sɛɛ Yehowa he ní. (Luka 1:74) Lɔ ɔ ji ní tsumi nɛ Yesu kɛ wo anɔkuale Kristofohi tsuo a dɛ. E sa kaa wa ti nɔ tsuaa nɔ nɛ fiɛɛ Mawu Matsɛ Yemi ɔ he sane kpakpa a. Anɛ o ngɛ jã pee lo?​​—Mateo 24:14; 28:19, 20.

¹⁶ Bɔfo Paulo bu fiɛɛmi ní tsumi ɔ kaa nɔ́ ko nɛ he jua wa; nɛ e tsɛ lɛ ke “juetli.” (2 Korinto Bi 4:7) Yehowa Mawu kɛ e yi mi tomi he ní nɛ o maa tsɔɔ nihi ɔ ji ní tsumi nɛ e he hia pe kulaa. E ji blɔ nɛ o ma nyɛ maa gu nɔ kɛ sɔmɔ Yehowa, nɛ e hɛ be nɔ jee kɔkɔɔkɔ. (Hebri Bi 6:10) Fiɛɛmi nɛ o maa fiɛɛ ɔ maa ye bua mo kɛ nihi nɛ a maa bu mo tue ɔ, ejakaa lɔ ɔ maa hɛ nyɛ kɛ su Yehowa he, nɛ nyɛ ma ná neneene wami hulɔ. (Kane 1 Korinto Bi 15:58.) Anɛ ní tsumi kpa ko ngɛ nɛ ma nyɛ ma ha nɛ o tsui maa nɔ o mi pe ní tsumi nɛ ɔ lo?

17. Mɛni he je nɛ e sa nɛ waa kɛ oya yemi nɛ fiɛɛ ɔ?

¹⁷ E biɔ nɛ waa kɛ oya yemi nɛ fiɛɛ. E sa nɛ waa “fiɛɛ sɛ gbi ɔ,” nɛ ‘wa ko kpa.’ (2 Timoteo 4:2) E sa nɛ nihi nɛ  a nu Mawu Matsɛ Yemi ɔ he sane kpakpa a. Baiblo ɔ de ke: ‘Yehowa ligbi ngua a ma kɛ fo; e su si ta!’ “E be kɛe” nɛ nyagbe ɔ maa ba. (Zefania 1:14; Habakuk 2:3) Niinɛ, e be kɛe kulaa nɛ Yehowa ma kpata Satan je yaya nɛ ɔ hɛ mi. Se loko hɛ mi kpatami ɔ maa ba a, e sa nɛ waa bɔ nihi kɔkɔ konɛ a mwɔ a yi mi kpɔ kaa a ma ja Yehowa loo a be lɛ jae.

18. Mɛni he je nɛ e sa nɛ waa piɛɛ anɔkuale Kristofohi a he kɛ ja Yehowa a?

¹⁸ Yehowa suɔ kaa waa kɛ anɔkuale Kristofohi nɛ pee kake kɛ ja lɛ. Baiblo ɔ de ke: “Nyɛ ha nɛ waa kɛ hɛdɔ nɛ susu he bɔ nɛ sa, nɛ waa suɔ wa sibi, nɛ waa pee wa sibi kpakpa. Nyɛ ko ha nɛ waa jɔɔ wa he nya buami kaa bɔ nɛ ni komɛ hlaa peemi ɔ. Mohu ɔ, nyɛ ha nɛ waa ya nɔ nɛ waa wo wa sibi he wami wawɛɛ, titli ɔ, akɛnɛ nyɛ le kaa Nyɔmtsɛ ɔ bami be ɔ su ta a.” (Hebri Bi 10:24, 25) E sa nɛ waa bɔ mɔde nɛ waa ya asafo mi kpehi tsuo. Ke wa ya asafo mi kpehi ɔ, wa ma ná he blɔ kɛ wo ni kpahi he wami, nɛ mɛ hu a maa wo wɔ he wami.

19. Mɛni maa ye bua wɔ konɛ waa suɔ wa nyɛmimɛ Kristofohi?

¹⁹ Ke o ya wa kpe ɔmɛ ɔ, o ma ná huɛmɛ kpakpahi nɛ maa ye bua mo konɛ o ja Yehowa. O maa na nyɛmimɛ nyumuhi kɛ yihi nɛ mɛ hu a ngɛ mɔde bɔe kaa a ma ja Yehowa. A ngɛ kaa mo nɔuu, a yi mluku nɛ a tɔ̃ɔ. Ke a tɔ̃ o nɔ ɔ, moo bɔ mɔde nɛ o kɛ pa mɛ. (Kane Kolose Bi 3:13.) Moo ngɔ o juɛmi kɛ ma su kpakpahi nɛ o nyɛmimɛ Kristofo nɛ ɔmɛ ngɛ ɔ nɔ, nɛ enɛ ɔ maa ha nɛ o maa suɔ mɛ, nɛ o maa hɛ mo kɛ su Yehowa he.

20, 21. Mɛni ji “wami nɛ ngɛ kɛ yaa neneene ɔ”?

²⁰ Yehowa suɔ kaa e huɛmɛ tsuo nɛ a ná si himi kpakpa.  Baiblo ɔ tsɔɔ kaa wami nɛ wa ma ná hwɔɔ se ɔ maa pee slɔɔto kulaa ngɛ wami nɛ wa ngɛ mwɔnɛ ɔ he.

²¹ Hwɔɔ se ɔ, wa maa hi si kɛ maa ya neneene ngɛ paradeiso mi. Pi jeha 70 loo jeha 80 nɛ waa kɛ maa hi si. Wa ma ná “neneene wami.” Wa ma ná nɔmlɔ tso mi he wami kpakpa, kɛ tue mi jɔmi, kɛ bua jɔmi daa. Enɛ ɔ ji nɔ́ nɛ Baiblo ɔ tsɛɛ ke “wami nɛ ngɛ kɛ yaa neneene ɔ nɛ.” Yehowa wo si kaa e kɛ wami nitsɛnitsɛ nɛ ɔ ma ha wɔ, se e sa nɛ waa pee nɔ́ tsuaa nɔ́ nɛ wa ma nyɛ konɛ wa ‘nine nɛ su nɔ.’​​—1 Timoteo 6:12, 19.

22. (a) Kɛ wa maa pee kɛɛ nɛ wa “nine maa su wami nɛ ngɛ kɛ yaa neneene ɔ nɔ”? (b) Mɛni he je nɛ wa be nyɛe ma he neneene wami ɔ?

²² Kɛ wa maa pee kɛɛ konɛ wa nine nɛ su “wami nɛ ngɛ kɛ yaa neneene ɔ nɔ”? E sa nɛ waa ‘bɔ mɔde ngɛ nɔ́ kpakpa peemi he.’ (1 Timoteo 6:18) Enɛ ɔ tsɔɔ kaa e sa nɛ waa kɛ nɔ́ nɛ wa kase ngɛ Baiblo ɔ mi ɔ nɛ tsu ní. Se ngɛ anɔkuale mi ɔ, pi wa mɔde bɔmi nɛ ma ha nɛ wa nine maa su neneene wami ɔ nɔ. Pi nɔ́ ko nɛ wa ma nyɛ ma he. E ji nɔ́ ko nɛ Yehowa kɛ maa ke e sɔmɔli aloo e kɛ maa “dloo” mɛ. (Roma Bi 5:15) Wa hiɔwe Tsɛ ɔ suɔ nɛ e maa ngɔ nike ní nɛ ɔ kɛ ha nihi nɛ a kɛ anɔkuale yemi sɔmɔɔ lɛ ɔ.

23. Mɛni he je nɛ e sa nɛ o mwɔ yi mi kpɔ nɛ da amlɔ nɛ ɔ?

²³ Mo bi o he ke, ‘Anɛ i ngɛ Mawu jae kaa bɔ nɛ e tsɔɔ ngɛ Baiblo ɔ mi kaa a ja lɛ ɔ lo?’ Ke o na kaa e sa nɛ o tsake blɔ nɔ nɛ o guɔ kɛ jaa Mawu ɔ, lɛɛ moo pee tsakemi amlɔ nɔuu. Ke waa kɛ wa hɛ fɔ Yehowa nɔ nɛ wa bu lɛ tue ngɛ nɔ́ tsuaa nɔ́ mi ɔ, e maa bu wa he. E maa baa e we bi nɛ a yeɔ lɛ anɔkuale ɔ a yi ngɛ Satan je yaya nɛ ɔ nyagbe ɔ mi. Lɔ ɔ se ɔ, Yehowa ma ha nɛ  wa maa hi si ngɛ Paradeiso ɔ mi kɛ maa ya neneene kaa bɔ nɛ e wo si ɔ. Niinɛ, ke o mwɔ yi mi kpɔ nɛ da amlɔ nɛ ɔ, o nine maa su wami nɛ ngɛ kɛ yaa neneene ɔ nɔ!