1, 2. Бис јажынар јерди кайдаҥ таап алар аргалу?

СЛЕР тышкары јӱреригерде јоткон баштала берген деп сананып ийзеер. Теҥери бӱрӱҥкӱйлеп, јалкын јалкындап, кӱкӱрт кӱркӱрейт. Удабай ла јааш уруп ийер. Слер јажынатан јер бедиреп јадыгар. Мындый јерди таап алала, санаагар јарый берет.

² Бӱгӱн бис мындый јотконго тӱҥей ӧйдӧ јададыс. Телекейдеги айалга кӱнӱҥ сайын там ла катуланып барат. Је бисте јажынатан јер бар. Бу кандый јер болбогой? Сарнаачы мынайып бичиген: «Мен Иеговага: „Сен мениҥ јажынар јерим, шибеем, иженип турган мениҥ Кудайым“ — деерим» (Сарын 91:2). Иегованы чыннаҥ ла бистиҥ јажынатан јерис деп айдарга јараар, нениҥ учун дезе ол биске кӱчтеристи ӧдӧргӧ болужып, келер ӧйгӧ сӱрекей јакшы ижемји берет.

3. Иегова бистиҥ јажынар јерис болзын деп, нени эдер керек?

³ Јӱрӱмисте болуп турган кандый ла кӱчтерди ӧдӱп чыгарга, Иегова биске ийде-кӱч берер. Ол бистиҥ ончо ӧштӱлеристеҥ канча катапка кӱчтӱ. Керек дезе, бисле кандый бир јаан тӱбек те болуп калза, келер ӧйдӧ Иегова оныҥ каршузын јоголтып салар деп, бир де алаҥзыбас керек. Агару Бичик бистерди: «Бойыгарды Кудайдыҥ сӱӱжинде чеберлегер» — деп кӱӱнзедет (Иуда 21). Иегованаҥ ыраабагар, не дезе, ыраай берзегер, оныҥ болужын алып болбозыгар.

4, 5. Иегованыҥ бистерди сӱӱп турганы недеҥ кӧрӱнет?

⁴ Иеговала најылыгысты јылыйтпаска, ол бистерди тыҥ сӱӱп турган деп ундыбас керек. Оныҥ бистерге берген сыйларын сананып ийзегер де. Ол бойыныҥ сӱӱжин јӱзӱн-јӱӱр ӧзӱмдерлӱ ле тындуларлу сӱреен јараш Јер јайап бергениле кӧргӱскен. Анайда ок ол сӱреен кӧп амтанду курсак-тамак ла ару суу берген. Иегова Агару Бичик ажыра бистерге бойыныҥ адын ла сӱреен јакшы кылык-јаҥын ачкан. Је эҥ баалу сый — бойыныҥ Уулын, Иисус Христосты бис учун јӱрӱмин берзин деп јердӧӧн ийгени (Иоанн 3:16). Иисустыҥ тайылгазы бистерге келер ӧйгӧ ижемји берет.

⁵ Иегова теҥериде бастыра јаманды јоголтотон Мессиан Каандык тургузып салган. Каандык башкарып баштаза, бастыра јер рай болуп калар. Анда улус ӱргӱлјиге ырысту ла амыр-энчӱ јадар (Сарын 37:29). Анайда ок Иегованыҥ сӱӱжи кажыбысты ла таҥынаҥ кичееп турганынаҥ кӧрӱнет. Ол бистерге јӱрӱмниҥ эҥ јакшы јолын кӧргӱзип, мӱргӱӱлдеристи јаантайын угар деп сӧзин берет.

6. Иегованыҥ сӱӱжин баалап турганысты канайып кӧргӱзерге јараар?

⁶ Иегованыҥ сӱӱжин баалап турганысты канайып кӧргӱзерге јараар? Кудайдыҥ берген ончо сыйлары учун быйанду болыгар. Је бӱгӱнги кӱнде кӧп улус быйанзак эмес. Андый улус Иисус Христостыҥ ӧйинде база болгон. Бир катап, Иисус капкаш балулу он кижини јазып ийерде, быйанын айдарга јӱк ле бирӱзи кайра келген (Лука 17:12—17). Иеговага быйанысты айдарга качан да ундыбактар!

7. Иегованы канайып сӱӱр керек?

⁷ Кудай бисти сӱӱп турарда, биске де оны сӱӱр керек. Иисус ӱренчиктерине Иегованы бастыра јӱрегиле, бас тыра бойыла, бастыра санаазыла сӱӱзин деп айткан. (Матфей 22:37 кычырыгар.) Бу нени темдектейт?

8, 9. Иеговага сӱӱжисти канайып кӧргӱзерге јараар?

⁸ «Мен Иегованы сӱӱп јадым» — деп айтканы једер бе? Јок. Иегованы бастыра јӱрегисле, бастыра бойысла, бастыра санаасла сӱӱп турганыс бистиҥ керектеристеҥ кӧрӱнер учурлу (Матфей 7:16—20). Агару Бичикте, бис Кудайды сӱӱп турган болзоос, оныҥ јакылталарына уккур болорыс деп јарт айдылган. «Оныҥ јакылталары уур эмес» учун мыны эдерге кӱч эмес. (1 Иоанн 5:3 кычырыгар.)

⁹ Иеговага сӧсуккур болзоос, јӱрӱмис ырысту болор (Исаия 48:17, 18). Је Иеговала најылыгысты јылыйтпаска бистерге не болужарын билип алактар.

10. Иегова керегинде билгирлерди нениҥ учун оноҥ ло ары кӧптӧдип турар керек?

¹⁰ Иеговала канайып најылажып баштаганаар санаагарга кирет пе? Слер Агару Бичикти ӱренип баштаганыгар, оноҥ Кудай керегинде кӧптӧдӧ билип алганыгардаҥ улам, оныла најылажар кӱӱнеер келген. Кудайла најылажарын — отты ӧчӱрбеске, ого јаантайын одын салып турганына тӱҥейлеерге јараар. «Одыгар» ӧчпӧзин деп турган болзогор, Иегова керегинде билгирлерди оноҥ ло ары кӧптӧдип турыгар (Укаа сӧстӧр 2:1—5).

11. Агару Бичиктеги чындыктарды билип турзагар, слерде кандый сезимдер болор?

¹¹ Агару Бичиктеги чындыктарды билип турзагар, слердиҥ јӱрегер томулар. Бир катап Иисус бойы керегинде библиялык судурларды јартап турарда, оныҥ эки ӱренчигинде андый ла сезимдер болгон. Ӱренчиктер: «Јолдо Ол бисле эрмектежип, Агару Бичикти  јартаарда, кӧксибисте јӱректерис кӱйбеген беди?» — деп айдышкандар (Лука 24:32).

12, 13. а) Кудайга сӱӱжис канайып калардаҥ айабас? б) Кудайга сӱӱжисти јылыйтпаска не болужар?

¹² Иисустыҥ ӱренчиктериниҥ јӱректерин не томулткан болбогой? Агару Бичиктиҥ кезик ӱлгерлерин оҥдоп алганы. Слер де Агару Бичикти оҥдоп баштайла, јаан сӱӱнчи алган болбойыгар. Бу слерди Иеговала јуук таныжып, оны сӱӱрге кӱӱнзеткен. Је Кудайга сӱӱжис сооп калардаҥ айабас. Оныҥ учун нени эдер керек? (Матфей 24:12).

¹³ Слер Кудайдыҥ најызы да болуп калган болзогор, колбулараарды оноҥ ло ары тыҥыдар керек. Кудай ла Иисус Христос керегинде билгирлереерди кӧптӧдип, билип алганыгарды шӱӱп сананыгар. Бу билгирлерди јӱрӱмигерде тузаланып турыгар (Иоанн 17:3). Агару Бичикти ӱренип эмезе кычырып тура, бойыгардаҥ сура гар: «Мен Иегова керегинде нени билип алдым? Мен Кудайды нениҥ учун бастыра јӱрегимле, бастыра бойымла сӱӱр учурлу?» (1 Тимофейге 4:15).

14. Иеговага сӱӱжисти тыҥыдарга, мӱргӱӱл канайып болужат?

¹⁴ Јуук најылар кӧп куучындажып турза, олордыҥ колбулары тыҥып јат. Анайып ла Иеговала јаантайын куучындажып турзаас, бистиҥ колбуларыс тыҥыыр. (1 Фессалоникадагыларга 5:17 кычырыгар.) Мӱргӱӱл — теҥеридеги Адабыстыҥ сӱрекей јакшы сыйы. Бистиҥ мӱргӱӱлдерис акту јӱректеҥ болор учурлу (Сарын 62:8). Мӱргӱӱлди эске ӱренип, такып-такып айтпагар; акту јӱректеҥ мӱргӱгер. Анайдарда, Иеговага сӱӱжигер тыҥызын деп, оноҥ ло ары Агару Бичикти ӱренип, акту јӱректеҥ мӱргӱгер.

15, 16. Јарлаар ишке слердиҥ кӧрӱмигер кандый?

¹⁵ Иеговала најылыгыс уйадай бербезин деп, улуска Иегова керегинде куучындаар керек. Бу биске јаан кӱндӱ болот (Лука 1:74, ЈТ). Анайда ок бу јакылтаны Христос ӱренчиктерине јакыган. Кудайдыҥ Каандыгы керегинде сӱӱнчилӱ јарды бис бастырабыс јарлаар учурлу. Слер бу јакаруны бӱдӱрип турганаар ба? (Матфей 24:14; 28:19, 20).

¹⁶ Элчи Павел јарлаар ишке туружарын тыҥ баалаган. Бу иш ого «эрјине» болгон (2 Коринфтегилерге 4:7). Бӱгӱнги кӱнде Иегова ла оныҥ амадузы керегинде куучындаарынаҥ учурлу иш јок. Бу иш Иеговага бажыратан аргалардыҥ бирӱзи болот. Ол слердиҥ албаданганыгарды сӱреен баалап јат (Еврейлерге 6:10). Јарлаар ишке турушканыгар јаҥыс слерге эмес, је слерди угуп тургандарга да тузалу болот: олор слер ле чилеп Иеговага јууктап, ӱргӱлји јӱрӱм алар.  (1 Коринфтегилерге 15:58 кычырыгар.) Чыннаҥ ла, Каандык керегинде јарлаары — эҥ артык иш!

17. Јарлаар ишти нениҥ учун удатпас керек?

¹⁷ Бис Кудайдыҥ јетирӱзин «удатпай» јарлаар учурлу (2 Тимофейге 4:2, ЈТ). Улуска Кудайдыҥ Каандыгы керегинде јарды капшай айдар керек. Агару Бичикте мынайып айдылган: «Иегованыҥ улу кӱни јуук. Бу кӱн тӱрген јууктап келип јат»; ол «оройтыбас» (Софония 1:14; Аввакум 2:3). Удабас ла Иегова Сатананыҥ калју телекейин јоголтып салар. Оныҥ учун улуста Иеговага иштеерин талдап алатан арга болзын деп, олорго бу керегинде озолондыра айдар керек.

18. Иегова нениҥ учун бистерди бойыныҥ чындык христиандарыла кожо бажырзын деп кӱӱнзейт?

¹⁸ Иегова бистерди бойыныҥ чындык христиандарыла кожо бажырзын деп кӱӱнзейт. Агару Бичикте мынайып айдылат: «Сӱӱрге ле јакшы керектер эдерге кӧкӱдижип, бой-бойыбыска ајарыҥкай бололы. Јуундарыста јок болуп калбай туралы, кезик улуста андый темигӱ бар. Оныҥ ордына Кайраканныҥ кӱни јууктап келеткенин кӧрӱп, бой-бойыбысты мынаҥ артык сергидектер» (Еврейлерге 10:24, 25, ЈК 2003). Јуунныҥ туштажуларын божотпоско албаданар керек, нениҥ учун дезе бис анда бой-бойыстыҥ кӱӱнисти кӧдӱрип, бой-бойысты тыҥыдар аргалу.

19. Ака-эјелерди сӱӱрге, бистерге не болужар?

¹⁹ Јуундарда бис Иеговага јууктаарга болужатан јакшы најылар таап аларыс. Анда, Иеговага слер ле чилеп акту јӱректеҥ иштеп турган башка-башка ака-эјелерле таныжып аларыгар. Је олор толо кемдӱ эмес учун јастырып јадылар. Оныҥ учун олордыҥ јаманын таштаарга белен болыгар. (Ефестегилерге 4:32 кычырыгар.) Ака-эје лердиҥ јастыраларын эмес, је јакшы кылык-јаҥдарын кӧрӧргӧ албаданыгар. Ол тушта слерге олорды сӱӱрге јеҥил болор, анайып, слер Иеговага јууктаарыгар.

20, 21. «Чын јӱрӱм» ол не?

²⁰ Иегова бастыра најыларын ырысту болзын деп кӱӱнзейт. Агару Бичик келер ӧйдӧги јӱрӱм бӱгӱнги јӱрӱмнеҥ чек башка болор деп ӱредет.

²¹ Бистиҥ јӱрӱмис јӱк ле 70—80 јаш эмес, је ӱргӱлјиге болор. Бис сӱреен јараш райда јадарыс, сӱреен јакшы су-кадыкту болорыс ла кемнеҥ де коркыбазыс. Бис чыннаҥ ла ырысту болорыс! Шак мындый јӱрӱмди Агару Бичик «чын јӱрӱм» деп адайт. Иегова биске мындый јӱрӱмди сыйлаар деп сӧзин берет, је биске чын јӱрӱмнеҥ тыҥ тудунып алар керек (1 Тимофейге 6:12, 19, ЈК 2003).

22. а) «Чын јӱрӱмнеҥ тыҥ тудунып ал» дегени нени темдектейт? б) Ӱргӱлји јӱрӱмди иштеп аларга јараар ба? Јартап беригер.

²² «Чын јӱрӱмнеҥ тыҥ тудунып ал» дегени нени темдектейт? Бу дезе, «јакшыны этсин, быйанду керектерле байызын» дегени (1 Тимофейге 6:18). Ӧскӧртӧ айтса, Агару Бичиктеҥ билип алганысты јӱрӱмде тузаланар керек. Је чын јӱрӱмди, ол эмезе ӱргӱлји јӱрӱмди, иштеп болбозыс. Бу Иегова Кудайдыҥ сыйы, оны Кудай кайрал эдип эмес, сый эдип тегин берип јат (Ефестегилерге 2:8). Теҥеридеги Адабыс чындык ишчилерине ӱргӱлји јӱрӱм сыйлаарга тыҥ кӱӱнзеп јат деп алаҥзыбагар.

23. Слерге кандый талдаш эдер керек? Јартап беригер.

²³ «Мен Кудайга јараар эдип бажырып тургам ба?» — деп, бойыгардаҥ сурагар. Бойыгардыҥ јӱрӱмигерде нени де солыыр керек деп билип турган болзогор, эмди ле солыгар. Иегова слерге јӱк ле оныҥ сӧзин угуп, ого бӱдӱп турзагар, коруучы болор. Сатананыҥ калју  телекейиниҥ калганчы кӱндеринде Иегова бойыныҥ чындык ишчилерин корулаар ла берген сӧзи аайынча райда јадатан ӱргӱлји јӱрӱм сыйлаар. Эйе, слер эмди ле чын талдаш этсегер, чын јӱрӱм алараар!