1, 2. ¿Chew ellkawafuiñ reke famülke mu?

RAKIDUAMNGE tüfa: petu trekayawülmi rüpü mew. Fey tromürumetule ti kallfü wenu, wilüfrumey ti llüfkeñ, trününi ti tralkan, fey wüllwülli mawün. Fey kintuaymi chew tami ellkawam. Feymu pefilmi kiñe küme chellkomtuwe (chükütuwe), ¡müna ayüwaymi!

² Ka femngechi famülke mu, doyelküley ti dungu Mapu mew. Feymu ramtuwafuymi: “¿Iney ingkayafenew?”. Ngüneduamnge ñi feypin kiñe wentru wirintukulu Biblia mu: “Feypiafiñ ta Jewba: ‘Eymi iñche tañi ellkawpeyüm ka tañi newentukeetew, tañi Ngünechen, eymi mew maneluwküleken’” (Salmo 91:⁠2). ¡Feley llemay! Rupaliyiñ wedake dungu mu, iñchiñ ellkawafuiñ reke Jewba mu, kidu ingkakeeiñmu ka elukeeiñmu maneluwün taiñ kümelkaleal küpalechi antü mu.

3. Taiñ kelluaetew Jewba, ¿chem duamfali taiñ femal?

³ ¿Chumngechi ingkakeeiñmu Chaw Jewba? Rupaliyiñ wedake dungu mu, kidu kelluaeiñmu, fey taiñ kimal chem femal. Kafey kiñeke che küpa wedalkaeliyiñmu, Jewba doy newen-ngey. Ka wedake dungu mu rupamekeliyiñ rume, kidu küme elkünutuafi küpalechi antü mu. Biblia feypieiñmu taiñ chumal: “Rumel mülemün ta Ngünechen ñi piwkeyechen mew” (Juda 21). Feymu, taiñ kelluaetew Jewba, duamfali taiñ doy küme weniyeafiel. ¿Chumngechi femafuiñ tüfa? Inaduamaiñ.

4. Fente taiñ piwkeyeetew Chaw Jewba, ¿chem elueiñmu?

⁴ Taiñ doy küme weniyeafiel ta Chaw Jewba, rakiduameluwaiñ fente taiñ piwkeyeetew. Iñchiñ taiñ duam mu femi fentren dungu. Rakiduamnge: elueiñmu ti Mapu, tüfa müna küme adi ka niey fentren anümka ka fillke kulliñ. Kafey elueiñmu kümeke iyael ka fentren ko. Biblia mu kimeltueiñmu ñi üy ka ñi chumngen. Doyelchi may pengeli taiñ piwkeyeetew werkülu ñi Fotüm Mapu mu, fey ñi layal taiñ montulaetew (Juan 3:⁠16). Femün mu tüfa, nieiñ küme maneluwün.

5. Chaw Jewba, ¿chumngechi pengelkey taiñ piwkeyeetew?

⁵ Kafey, fente taiñ piwkeyeetew Chaw Jewba, kidu elkünuy ñi gobierno wenu mu. Tüfa pichin antü mu apümafi wedake dungu, küme mülewe künutuafi ti Mapu. Fey aflayay taiñ mongen, kümelkaleaiñ ka ayüwküleaiñ (Salmo 37:⁠29). Kafey Chaw Ngünechen kimeltueiñmu rüf küme yenieal taiñ mongen. Ka mangelkeeiñmu taiñ llellipuafiel, ka kidu eluwküley taiñ allkütuaetew. Kimfali taiñ rume piwkeyeetew Jewba, ¿felelay am?

6. Fente tami piwkeyeetew Jewba, ¿chumngechi pengelaymi tami mañumniefiel?

⁶ Fente tami piwkeyeetew Jewba, ¿chumngechi pengelaymi tami mañumkefiel? Falintufinge kom ñi femün Jewba tami kümelkayaetew. Welu küdawngeafuy femal tüfa. Famülke mu pu che mañumkelay. Jesus ñi antü mu, ka femngechi femkefuy ti che. Kiñe rupa tremoltufi mari wentru lepra kutran-ngelu, welu kiñe müten mañumtueyew (Luka 17:⁠12-17). Iñchiñ küpa inayentukefiyiñ feyti mañumlu. Feymu rumel mañumniekeafiyiñ ta Jewba.

7. ¿Chumngechi piwkeyeafiyiñ ta Jewba?

⁷ Kafey pengelafiyiñ taiñ piwkeyefiel ta Jewba. Jesus  feypifi tañi pu inanieetew ñi piwkeyeafiel ta Chaw Jewba kom tañi piwke mew, kom tañi mongen mew, ka kom tañi kimün mew (papeltunge Matew 22:⁠37). ¿Chumngechi femafuiñ tüfa?

8, 9. ¿Chumngechi pengelkeiñ taiñ piwkeyefiel ta Chaw Dios?

⁸ ¿Piwkeyeafiyiñ ta Jewba taiñ feypin mew müten? Femlay. Piwkeyefiliyiñ ta Jewba kom taiñ piwke mu, taiñ mongen ka taiñ kimün mew, pengelaiñ tüfa taiñ femken mu (Matew 7:⁠16-20). Biblia küme pengeli piwkeyefiliyiñ ta Chaw Dios, inayaiñ ñi feypin. ¿Rume küdawngey femal tüfa? Femlay. Jewba “tañi werkün dungu afeluwünngelay”, küdawngelay llemay (papeltunge 1 Juan 5:⁠3).

⁹ Feyentufiliyiñ taiñ Wenu Chaw, küme mongen nieaiñ ka rüf ayüwküleaiñ (Isaías 48:⁠17, 18). Feymu, ¿chem kelluaeiñmu taiñ doy küme weniyeafiel ta Jewba? Inaduamaiñ.

10. ¿Chumngelu duamfali tami doy küme kimafiel ta Jewba?

¹⁰ Eymi dew weniyefimi ta Jewba. ¿Chumngechi femürpuymi tüfa? Chillkatuymi Biblia, femngechi doy küme kimfimi ta Jewba, fey weniyefimi. Welu tami weniyefiel ta Jewba trürümngeafuy kiñe kütral mu. Tukulelfilmi mamüll tati kütral, tüfa doy üyküleay. Ka femngechi, doy kimfilmi ta Jewba, doy küme weniyeafimi (Proverbios 2:⁠1-5).

11. Doy chillkatufilmi Biblia, ¿chem duamküleaymi?

¹¹ Doy chillkatulmi Biblia, fillke kümeke dungu kimaymi, fey tüfa puway tami piwke mu. Kiñe rupa Jesus kimeltulelfi ta epu disipulu ñi chem pin kiñeke dungu Biblia mu. Ngüneduamnge chem duamnagingu. Feypingu: “¿Feyngelay ama ñi rume ayüwkülepen tayu piwke petu nütramkalen küpalepeiñ nga tati rüpü mew,  ka kimeltupeyumew tati wirikonkülechi dungu ti Wirin Chillka mew?” (Luka 24:⁠32).

12. Kuñiwtukuwnolmi, ¿chem rupayafuy?

¹² Jesus ñi kimeltufiel tüfachi epu disipulu tañi piwke mu puwi. Eymi ka femngechi duampelaymi we eluwlu tami kimafiel Biblia. Femün mu tüfa, kimürpufimi ta Jewba ka piwkeyerpufimi. Welu kuñiwtukuwnolmi, ñochikechi piwkeyewelayafimi. Ayülayafuymi ñi femngechi rupayal (Matew 24:⁠12).

13. Tami doy küme weniyeafiel ta Jewba, ¿chem duamfali tami femal?

¹³ Tami weniyefiel mu ta Jewba, fewla yafüluwaymi tami doy küme weniyeafiel. Feymu duamfali doy küme kimafiel ta Jewba ka Jesus. Longkontukunge chem tami kimürpuel ka rakiduamnge chumngechi inayafiel tami mongen mu (Juan 17:⁠3). Feymu chillkatufilmi Biblia, ramtuwnge: “Tüfa, ¿chem kimeltuenew Jewba mu? ¿Chumngechi kellukeenew ñi doy piwkeyeafiel ta Jewba?” (1 Timotew 4:⁠15).

14. Llellipun, ¿chumngechi kellukeeiñmu taiñ doy küme weniyeafiel ta Jewba?

 ¹⁴ Eymi nütramkakefimi tami küme weni, ¿felelay am? Feymu doy küme weniyewkeymu. Ka femngechi wimtuleliyiñ taiñ ngillatuafiel taiñ Wenu Chaw, doy küme piwkeyeafiyiñ (papeltunge 1 Tesalonisense 5:⁠17). Llellipun, fey ta kiñe falin yewün (regalo) Chaw Ngünechen mu küpalu. Feymu eluwküleaiñ taiñ llellipuafiel piwke mu (Salmo 62:⁠8). Mufü rupa feypikelayaiñ taiñ llellipun, doy may llellipuaiñ chem taiñ rüf rakiduamkeel. Feymu llemay, chillkatuniefilmi Biblia ka piwke mu tripale tami llellipun, fey doy küme weniyeafimi ta Chaw Jewba.

15, 16. ¿Chumngentukefimi ti amuldungun?

¹⁵ Tami doy küme weniyeafiel ta Jewba, ka duamfali nütramkalelafiel ta che chem tami kimel Biblia mu. Kimeltuafiel pu che Jewba mu, fey ta kiñe falin küdaw taiñ nieel. Jesus werküfi kom tañi pu inanieetew ñi amuldungual. Feymu kom iñchiñ wüldunguaiñ Chaw Dios tañi gobierno mu. Eymi, ¿femkeymi kay? (Matew 24:⁠14; 28:⁠19, 20).

¹⁶ Apostol Pablo rume falintukefi ti amuldungun, feymu feypi: “Rume fütra küme felen reke feley” (2 Korintio 4:⁠7). Nütramkayafiel pu che Jewba mu ka chem ñi ayükeel, tüfa tati doy falin küdaw tami femafel. Amuldungun mu, poyekefimi ta Chaw Jewba. Fey kidu müna falintukey tami femken (Ebrew 6:⁠10). Tami amuldungun mu, kellukefimi pu che ñi weniyeafiel ta Chaw Dios ka nierpual rumel mongen. Ti amuldungun ka kellukeeymu ta eymi tami femal tüfa (papeltunge 1 Korintio 15:⁠58). Ngelay kangelu küdaw tami doy ayüwülkeetew.

17. ¿Chumngelu fente falin-ngey taiñ doyümafiel ti amuldungun fewla?

 ¹⁷ Rume falin-ngey taiñ doyümafiel ti amuldungun fewla. Biblia feypieiñmew: “Wewpifinge tati werken dungu, ka afeluwkilnge” (2 Timotew 4:⁠2). Pu che duamniey ñi allkütual tüfachi kümeke dungu Chaw Dios tañi gobierno mu. Kafey Biblia feypiley: “¡Jewba ñi fütra antü fülküley! ¡Fülkülepay llemay ka wirafkülen küpaley!”. Feley, tüfachi antü tardeñmalayay (Sofonías 1:⁠14; Habacuc 2:⁠3). Pichilewey Jewba ñi apümafiel Weküfü ñi wedake dungu. Feymu, petu ñi rupanon tüfa, duamfali taiñ ngüfetuafiel pu che. Femngechi dulliafuyngün poyeafiel kam poyenoafiel ta Chaw Jewba.

18. Taiñ poyeafiel ta Jewba, ¿chumngelu trawüluwaiñ?

¹⁸ Jewba ayükey taiñ trawüluwal, femngechi taiñ poyeafiel. Biblia feypiley: “Kintuaiñ chumngechi taiñ welukonke kelluwael ka taiñ doy piwkeyewael ka taiñ femael kümeke dungu. Ka femkünuwlayaiñ taiñ trawüluwael, taiñ pu peñi ka lamngen iñchiñ [...], welu may, taiñ welukonke yafültukuwael, doyelchi may, kimfal-lu ñi fülpan ta Ñidol ñi wiñometuael” (Ebrew 10:⁠24, 25). Feymu yafüluwaiñ taiñ rumel trawüluwal. Trawün mu welukonke yafültukuwkeiñ.

19. Tami piwkeyeafiel pu peñi ka pu lamngen, ¿chumaymi?

¹⁹ Trawün mu eymi peaymi kümeke weni. Kidu engün kelluaeymu tami küme poyeafiel tami Wenu Chaw. Kimpuaymi fillke peñi ka lamngen, kakerumey ñi chumngen ka ñi tuwün. Kidu engün ka yafüluwkeyngün ñi serfiafiel ta Chaw Ngünechen. Welu eymi reke, kulpafengeyngün ka welulkawkeyngün. Feymu welulkawle engün, eluwkülenge tami wiñoduamtuafiel, perdonayafiel (papeltunge Kolosense 3:⁠13). Feymu longkontukuniefinge ñi küme femken pu peñi ka pu lamngen. Femngechi femülmi, piwkeyeafimi engün ka doy küme weniyeafimi ta Jewba.

20, 21. ¿Chem am “tati rüfngechi mongen”?

²⁰ Chaw Jewba ayükey kom tañi pu weni ñi nieal tati doy küme mongen. Küpalechi antü mu, taiñ mongen trürümfalngewelayay taiñ nieelchi mongen famülke mew. Femngechi kimeltukey Biblia.

²¹ Famülke mu pu che puwülkey 70 kam 80 tripantu müten. Welu küpalechi antü mu aflayay taiñ mongen, nieaiñ “rumel mongen”. Fey kutranwelayaiñ, küme feleaiñ ka ayüwküleaiñ. Ti Mapu küme adkületuay, küme mülewe ngetuay. Tüfa “tati rüfngechi mongen”, chumngechi ñi feypin Biblia. Jewba feypikünuy taiñ eluaetew. Welu taiñ llowafiel, duamfali taiñ yafüluwal (1 Timotew 6:⁠12, 19).

22. 1) Taiñ llowal “tati rüfngechi mongen”, ¿chumafuiñ? 2) ¿Chumngelu “wewkelaiñ ti rumel mongen” piafuiñ?

²² Taiñ llowal “tati rüfngechi mongen”, ¿chumafuiñ? Yafüluwaiñ ‘kümeke dungu taiñ femal’ (1 Timotew 6:⁠18). Feymu inanieaiñ chem taiñ kimürpuel Biblia mew. Welu llowlayaiñ rumel mongen iñchiñ taiñ yafüluwün mu müten. Kidu taiñ newen mu wewkelaiñ llemay taiñ llowafiel. Welu may, “Ngünechen ñi fürenechen” mu iñchiñ llowaiñ feychi mongen (Romanu 5:⁠15). Tüfa kiñe falin yewün Jewba ñi elukefiel tañi pu poyekeetew. Taiñ Fütra Chaw küpa elukefi tüfachi yewün tañi pu weni.

23. ¿Chumngelu duamfali küme dullial tami chumal fewla?

²³ Ramtuwnge: “Iñche kay, ¿poyekefiñ ta Jewba chumngechi ayükey kidu?”. Fey duamfalngele küme elkünutuafiel tami femken, matuke femnge llemay. Maneluwülmi Jewba mu ka yafüluwülmi tami allkütuafiel, kidu tami ellkawpeyüm reke feleay. Pichilewey ñi afal Weküfü ñi ngünenieel, feymu ruparupangey wedake dungu. Welu Chaw Jewba ingkaniefi tañi pu che. Fey küme mülewe elkünungetule ti Mapu, Jewba eluaeiñmu rumel  mongen. Femtripayay Jewba ñi feypikünuel. Feymu küme dullinge tami chumal fewla. Femülmi, llowaymi tati rüfngechi mongen.