1, 2. Hee di nla nléba lisolbene i len ini?

NOODE hoñol le u yé hiôm i kel mbuk mbebi a nhôñ. Jiibe li nkôp i ngii, nwegnwek a nwek, yak mbambat i mbam. Mbus, nop a bôdôl no ni ngui kiyaga. U yé yéñ homa inyu solop. Kinje maséé u ga bana ngéda w’a léba homa lisolbene nu a yé loñge!

² I len ini, di yé kiki bôt ba ba niñil i kel mbuk mbebi. Mam ma nkoñ isi ma mbep ndigi, bep ni bep. U yé le u badba le, ‘Hee ma nla léba homa lisolbene?’ Ntôp tjémbi wada nu Bibel a bi tila le: “U yé lisolbene jem ni hikôya hiem; Nyambe wem, nu me mbôdôl ñem.” (Tjémbi 91:2) Ñ, Yéhôva a nla toi ti bés hogbe ngéda di yé ikété mandutu i len ini. A nti ki bés botñem i nlôôha ba lam inyu dilo di nlo.

3. Lelaa di nla yilha Yéhôva lisolbene jés?

³ Lelaa Yéhôva a ntat bés? A nla hôla bés i hônba to imbe ndutu di gwé, a gwé ki ngui iloo bôt bobasôna ba ba nla noode boñ bés béba. To ibale béba jam i nkwél bés i len ini, di nla ba nkwoog nkaa le Yéhôva a ga mélés bikuu bi, i dilo di nlo. Bibel i nti bés makénd ngéda i nkal le: “Ni téédaga bébomede ikété gwéha Nyambe.” (Yuda 21) Di nlama yén bebee ni Yéhôva inyu kôhna mahôla mé ngéda di yé ikété mandutu. Lelaa di nla boñ hala?

4, 5. Lelaa Yéhôva a ñunda gwéha yé inyu yés?

⁴ Inyu yén bebee ni Yéhôva, di nlama yi letee ni limbe likala a ngwés bés. Hoñol ki mam momasôna Yéhôva a ma boñ inyu yés. A heg hisi hi yé hilam, a ti bés hio, a yônôs ki hio ni biloñge bi bie ni binuga. A ti ki bés bijek bi ne ni malép ma mpôp. Ni njel Bibel, Yéhôva a niiga bés jôl jé ni bilem gwé bilam. Ndi iloo mam mana momasôna, a bi unda le a ngwés bés ngéda a bi ep Yésu, Man wé nu gwéha, hana isi le a wo inyu yés. (Yôhanes 3:16) Inyu sesema i nyen di gwé botñem i niñ i boga mu dilo di nlo.

⁵ Yéhôva a bi kôôba Ane Mésia, tole énél i ngii, le ndék ngéda i mélés mandutu momasôna. Ini Ane i ga yilha hisi paradis, ni boñ le hiki mut a niñ ikété nsañ ni maséé i boga ni boga. (Tjémbi 37:29) Njel ipe Yéhôva a ngwélél inyu unda gwéha yé, i yé le a niiga bés i niñ i nya i nlôôha loñge i len ini. A nti ki bés kunde i soohe nye, a yé ki bebee i emble masoohe més hiki ngéda. Yéhôva a ntibil toi unda le a ngwés hiki wada wés.

6. Lelaa u nlama unda le u nti mayéga inyu gwéha i Yéhôva?

⁶ Lelaa u nlama unda le u nti mayéga inyu gwéha i Yéhôva? Unda nye le u nhôya bé mam momasôna a mboñ inyu yoñ. Ndi, hala a yé ngoo le i len ini, ngandak i nyi bé ti mayéga. Hala a bé nlélém jam yak i ngéda Yésu a bé hana isi. Kel yada Yésu a bi mélés jôm li bôt ba lô, ndi wada ndigi nyen a bi ti nye mayéga. (Lukas 17:12-17) Di nyéñ kôna mut nu a bi ti Yésu mayéga. Niñ yés yosô, di ga ba maséé i ti Yéhôva mayéga.

7. Letee ni limbe likala di nlama gwés Yéhôva?

 ⁷ Di nlama ki unda le di ngwés Yéhôva. Yésu a bi kal banigil bé le ba nlama gwés Yéhôva ni ñem wap wonsôna, ni nom yap yosôna, ni mahoñol map momasôna. (Añ Matéô 22:37.) Kii hala a nkobla?

8, 9. Lelaa di nla unda Yéhôva le di ngwés nye?

⁸ Baa hala a kôli i pot ndik ni nyo le di ngwés Yéhôva? Heni. Ibale di ngwés Yéhôva ni ñem wés wonsôna, ni nom yés yosôna, ni mahoñol més momasôna, maboñog més ma ga unda gwéha di gwé inyu yé. (Matéô 7:16-20) Bibel i ntibil yaga niiga le ibale di ngwés Djob, di ga nôgôl mambén mé. Baa hala a yé ndutu? To, inyule ‘matiñ ma Yéhôva ma ta bé nledek.’​—Añ 1 Yôhanes 5:3.

⁹ Ngéda di nôgôl Yéhôva, di niñ loñge ikété maséé. (Yésaya 48:17, 18) Ndi kii i ga hôla bés i yén bebee ni Yéhôva? Di timbhe le mbadga i.

10. Inyuki u nlama kônde nigil i yi Yéhôva?

¹⁰ Lelaa u bi yila liwanda li Yéhôva? Yigil yoñ i Bibel i bi hôla we i kônde yi Yéhôva ni i yila liwanda jé. Liwanda joñ ni nye li yé kiki hié u ngwés le hi kônde loñ. Nlélém kiki hié hi gwé ngôñ ni tjéé inyu kônde loñ, hala nyen u nlama kônde nigil i yi Yéhôva inyu lédés liwanda joñ ni Yéhôva.​—Bingéngén 2:1-5.

11. Lelaa biniigana bi Bibel gw’a tihba we?

¹¹ Kiki u nkena yigil yoñ i Bibel ni bisu, u ga nigil mam ma m’a tihba ñem woñ. Béñge kiki banigil ba Yésu iba ba bi nôgda ngéda Yésu a bé toñlene bo mbañ i Bibel. Ba bi kal le: “Baa miñem mi loñok bé bés ngéda a pôdhege bés njel, a toñlege bés Bitilna?”​—Lukas 24:32.

12, 13. (a) Gwéha yés inyu Djob i nla yila lelaa? (b) Lelaa di nla boñ le gwéha yés i Yéhôva i sune bañ?

 ¹² Nlélém kiki hala a bi tihba miñem mi banigil ngéda ba bi tibil nok Bitilna, bebeg hala nyen yak we u bi bana minlélém mi makénd ngéda u bi bôdôl nok Bibel. Hala a bi hôla we i yi Yéhôva ni gwés nye. U ngwés bé le i gwéha i, i sune.​—Matéô 24:12.

¹³ Ngéda u nyila liwanda li Djob, u nlama boñ biliya bi ngui inyu kônde lédés liwanda li. U nlama kônde nigil i yi nye ni Yésu, ni i hoñol mam u nigil, inyu yi lelaa u ga bôñôl mo i niñ yoñ. (Yôhanes 17:3) Ngéda u ñañ tole u nigil Bibel, badba le: ‘Kii hala a niiga me inyu Yéhôva Djob? Inyuki me nlama gwés nye ni ñem wem wonsôna, yak ni nom yem yosôna?’​—1 Timôtéô 4:15.

14. Lelaa masoohe ma nhôla bés i néñés gwéha yés inyu Yéhôva?

 ¹⁴ Ngéda u gwé loñge liwanda, u nkwel ni nye hiki ngéda, hala a nkônde lédés maada manan. Nlélém jam inyu yés, ngéda di nkwel ni Yéhôva hiki ngéda ni njel masoohe, hala a nkônde néñés gwéha yés inyu yé. (Añ 1 Tésalônika 5:17.) Masoohe ma yé likébla lilam kiyaga, li li nlôl ni Isañ wés nu a yé ngii. Di nlama kwélés nye hiki ngéda ni ñem wés wonsôna. (Tjémbi 62:9) Di nlama bé tiimba minlélém mi masoohe mi di nigil ni ño, ndi di nlama toi kal mam di nhoñol. Ñ, ibale di nke ni bisu i nigil Bibel, di soohege ki ni ñem wés wonsôna, di ga kônde néñés gwéha yés inyu Yéhôva.

15, 16. Lelaa u ntehe nson u añal ñañ nlam?

¹⁵ Ibale di ngwés yén bebee ni Yéhôva, di nlama kal bôt bape hémle yés. I niiga bôt bape i yi Yéhôva i yé bisai bikeñi. (Lukas 1:74) Hala a yé ki nson Yésu a bi ti bañga bikristen gwobisôna. Hiki wada wés a nlama añal miñañ minlam mi Ane Djob. Baa u ma boñ hala?​—Matéô 24:14; 28:19, 20.

¹⁶ Ñôma Paul a bi nôgda le nson u añal ñañ nlam u yé nseñ ngandak; a bi kal le u yé “lisôô li nkus.” (2 Korintô 4:7) I niiga bôt bape i yi Yéhôva ni bitelbene gwé i yé nson u nla gwel, u bak ki nson u nlôôha ba mahee. Hala a yé njel yada u nla gwélél inyu bégés Yéhôva. Yak nye a ndiihe mam u mboñ inyu yé. (Lôk Héber 6:10) I añal ñañ nlam i nla lona we ni bet ba ñemble we bisai, inyule u nhôla bo, u hôlga ki wemede i kôôge Yéhôva bebee, ni i kôhna niñ boga. (Añ 1 Korintô 15:58.) Baa nson umpe u yé, u u nla ti we nya ngandak maséé i?

17. Inyuki bôlô i téé likalô i yé nson u u nlama bôña bihôô bihôô?

 ¹⁷ Bôlô i téé likalô i yé nson u u nlama bôña bihôô bihôô. Di nlama “añal bañga Nyambe,” di nlama ‘yaga ligip’ i boñ hala. (2 Timôtéô 4:2) Bôt ba nlama nok ñañ u Ane Djob. Bibel i nkal le: “Ngwa nkeñi u Yéhôva u gwé ni moo. U gwé yaga ni moo, u nhoo ngandak!” Lisuk ‘l’a set bé!’ (Sôfônia 1:14; Habakuk 2:3) Ñ, ndék ngéda Yéhôva a ga tjé béba nkoñ isi u Satan. Ndi ilole hala a mbôña, di nlama béhe bôt inyu boñ le ba laa pohol i gwélél Yéhôva.

18. Inyuki di nlama bégés Yéhôva ni ini bañga bikristen ipe?

¹⁸ Yéhôva a ngwés le di bégés nye ni ini bañga bikristen ipe. Bibel i nkal le: “Di béngna ki bés ni bés. Le ndi hi mut a nyégha maasañ nyuu i kôna gwéha ni minson minlam. Di nwas bañ likoda jés li mitin, kiki lem bahogi, ndi di béhnaga bés ni bés, loñge loñge yaga ki lakii ni ntehe le ngwa u u nkôôge bebee.” (Lôk Héber 10:24, 25) Di nlama boñ biliya gwés gwobisôna inyu ke i makoda momasôna. Makoda ma nti ki bés pôla i lédés ni ti wada ni nuu lipém.

19. Kii nla hôla bés i gwés bilôk bikéé gwés bi bôlôm ni bi bôda?

¹⁹ Ngéda u nke i makoda, u ga boma loñge mawanda, i i ga hôla we i bégés Yéhôva. U ga boma bilôk bikéé bi bôlôm ni bi bôda nya ndi nya, bi bi mboñ biliya gwap gwobisôna kiki we. Yak bo ba yé bikwéha bi bôt kiki we, jon yak bo ba mboñ mahôha. Ngéda ba mboñ hihôha, ba bebee i nwéhél bo. (Añ Kôlôsé 3:13.) Bok ndik mis moñ i bilem bilam bi lôk kéé yoñ i bôlôm ni i bôda. Ibale u mboñ hala, hala a ga hôla we i gwés bo ni i kôôge bebee ni Yéhôva.

20, 21. Kii i yé “bañga niñ”?

²⁰ Yéhôva a ngwés le mawanda mé momasôna ma bana niñ i nlôôha ba loñge. Bibel i niiga bés le niñ yés i dilo di nlo i ga ba mahéñha kiyaga ni i niñ di gwé i len ini.

²¹ I dilo di nlo, di ga niñ i boga ni boga, ha ndik inyu 70 tole 80 ma ñwii bé. Di ga séé “niñ i boga” ikété mbôô u yôni, ni nsañ, ni maséé, ikété loñge paradis. Ini niñ yon Bibel i nsébél le “bañga niñ.” Yéhôva a mbôn le a ga ti bés bañga niñ, ndi di nlama boñ kii yosôna di nla i len ini inyu “kabda [yo] moo”​—1 Timôtéô 6:12, 19.

22. (a) Lelaa di nla ‘kabda bañga niñ moo’? (b) Inyuki biliya gwés bi nla bé ti bés bañga niñ?

²² Lelaa di nla ‘kabda bañga niñ moo’? Di nlama ‘boñ loñge,’ di “bak mingwañ ikété minson minlam.” (1 Timôtéô 6:18) Hala a nkobla le di nlama gwélél mam di nigil ikété Bibel. Ndi, biliya gwés bé gwon bi nti bés bañga niñ. Kekikel, bañga niñ i nla bé ba kiki nsaa le di nkôs inyu biliya gwés. Di kôli bé bana niñ boga, ndi i yé likébla Yéhôva a nti bagwélél bé ba ba ntéñbe ni nye. I yé njel yada Yéhôva a ñunda bés konangoo yé. (Rôma 5:15) Isañ wés nu ngii a ngwés toi ti bagwélél bé ba ba téñbe ni nye lini likébla.

23. Inyuki u nlama yoñ makidik malam hanano?

²³ Bat wemede le, ‘Baa me yé gwélél Yéhôva i nya i nlémél nye?’ Ibale u nléba le u nlama boñ ngim mahéñha, boñ mo ngwéé ni ngwéé. Ngéda di mbôdôl Yéhôva ñem, di boñok kii yosôna di nla inyu nôgôl nye, a ga yila lisolbene jés. A ga tééda litén jé li  telepsép i dilo di nsôk di béba nkoñ isi u Satan. Mbus ha nyen, Yéhôva a ga boñ toi le di niñ ikété Paradis i boga ni boga, ndik kii a bi bôn. Ñ, u nla bana bañga niñ ibale u nyoñ makidik malam hanano!