1, 2. Didia do boi tadapot parlinggoman?

PINGKIRHON ma, molo mardalan sasada hita tingki gogo alogo. Mangkolom langit, ro sillam jala gogo soara ni ronggur. Dung i, dobar ma udan. Las ma rohanta tingki taida adong inganan panisioan!

² Dos songon i ma na masa saonari on. Lam tu susana do portibi on. Olo do sungkunsungkun rohanta, ’Didia do boi tadapot parlinggoman?’ Panurat buku Psalmen mandok, ”Ningku do mandok Jahowa: Haporusanku jala partanobatoanku, Debatangku, marhaposan tu Ibana do ahu.” (Psalmen 91:2) Tutu, Jahowa do na boi mangalehon haluaon tu hita sian hasusaanta saonari jala dilehon do pangkirimon tu hita tu ari na naeng ro.

3. Songon dia do Jahowa asa gabe parlinggoman di hita?

³ Songon dia Jahowa mangalinggomi hita? Ala gumogo do Jahowa sian manang ise pe, boi do urupanNa hita tingki masa hasusaan. Nang pe masa hasusaan tu hita saonari, pos do rohanta padengganon ni Jahowa do saluhutna i di ari na naeng ro. Bibel paposhon rohanta, ”Ramoti hamu ma dirimuna di bagasan holong ni roha ni Debata.” (Judas 21) Ingkon tongtong do hita jonok tu Jahowa asa diurupi hita tingki masa hasusaan. Alai, songon dia do bahenonta asa tongtong hita jonok tu Ibana?

4, 5. Songon dia do Jahowa patuduhon holongNa tu hita?

⁴ Asa tongtong jonok tu Jahowa, porlu taingot balga ni holongNa tu hita. Rimangi ma angka naung nilehon ni Jahowa tu hita. Dilehon Ibana tano on laho ingananta jala dilehon suansuanan dohot angka binatang. Dilehon sipanganon dohot aek siinumon. Marhite Bibel, dipaboa do tu hita goarNa dohot angka parangeNa na denggan. Dung i, dipatuduhon do tu hita holongNa, tingki disuru anakNa ro tu tano on paluahon hita. (Johannes 3:16) Alani tobusan i, boi hita mandapot pangkirimon di ari na naeng ro.

⁵ Dipajongjong Jahowa do sada Harajaon na mamarenta sian surgo laho pasohothon hasusaan. Harajaon i ma na laho mambahen tano on gabe Paradeiso, na parohon hadameon dohot hasonangan salelenglelengna. (Psalmen 37:29) Saonari pe, diajari do hita asa denggan parngoluonta. Ditangihon Ibana do tangiangta. Dipatuduhon do holongNa tu hita ganup marsadasada.

6. Songon dia do hita manjangkon holong ni Jahowa?

⁶ Songon dia do hita manjangkon holong ni Jahowa? Tapatuduhon ma hamauliateon tu saluhut naung nilehonNa tu hita. Alai saonari, godang do jolma na so mamboto mandok mauliate. Songon na masa tingki Jesus di tano on. Sada tingki, dipamalum Jesus sampulu halak na marsahit kusta, alai holan sada do na mandok mauliate tu ibana. (Lukas 17:12-17) Tatiru ma sisahalak na mandok mauliate tu Jesus. Mandok mauliate ma hita tongtong tu Jahowa.

7. Holong na songon dia do ingkon tapatuduhon tu Jahowa?

⁷ Porlu do hita tongtong patuduhon holongta tu Jahowa. Didok Jesus tu angka siihuthon ibana, ingkon  mangkaholongi Jahowa do hita sian nasa roha, sian nasa gogo dohot sian nasa pingkiran. (Jaha Mateus 22:37.) Aha do lapatan ni on?

8, 9. Songon dia do hita patuduhon na tahaholongi Jahowa?

⁸ Sae do holan mandok holong rohanta tu Jahowa? Ndang. Molo tahaholongi Jahowa sian nasa roha, gogo dohot sian nasa pingkiran, tapatuduhon ma i sian parange dohot parniulaonta. (Mateus 7:16-20) Dipaboa di Bibel, molo tahaholongi Debata ingkon oloanta do angka parentaNa. Maol do mangulahon on? Ndang, alana ”ndada na dokdok patikna i”.​—Jaha 1 Johannes 5:3.

⁹ Molo taoloi Jahowa, denggan ma parngoluonta jala sonang rohanta. (Jesaya 48:17, 18) Alai, songon dia do asa tongtong jonok hita tu Jahowa? Taida ma di parsiajaran on.

10. Boasa porlu hita tongtong marsiajar taringot Jahowa?

¹⁰ Songon dia do bahenonta asa gabe aleale ni Jahowa? Marhite marsiajar Bibel, boi ma lam tatanda Jahowa jala lam tapatogu paralealeonta tu Ibana. Paralealeon on, dos songon api na ingkon sai tajaga jala ingkon ditambai do soban asa unang mintop. Suang songon i ma, porlu hita tongtong marsiajar taringot Jahowa asa boi tongtong togu paralealeonta tu Ibana.​—Poda 2:1-5.

11. Songon dia do ajaran ni Bibel marpangkorhon tu hita?

¹¹ Molo tongtong taparsiajari Bibel, olo do adong ayat ni Bibel na hona tu rohanta. Ingot ma pangkilalaan ni dua sisean ni Jesus tingki dipatorang tu nasida surirang ni Bibel. Didok nasida, ”Nda hira na  marsigorgor do pangkilalaanta di tingki mangkatai Ibana tu hita di tongan dalan i dohot na pinatorangNa na tarsurat i tu hita?”​—Lukas 24:32, Bibel siganup ari.

12, 13. (a) Boasa ingkon tajaga holongta tu Jahowa? (b) Songon dia bahenonta asa sai tahaholongi Ibana?

¹² Songon angka sisean i, marsigorgor rohanasida dung diantusi na tarsurat i. Olo do songon i pangkilalaanta dung taantusi hata ni Bibel. On mangurupi hita mananda jala mangkaholongi Jahowa. Ndang lomo rohanta gabe lam ngali holongta tu Ibana.​—Mateus 24:12.

¹³ Ingkon tajaga do paralealeonta tu Debata asa tongtong togu. Taparsiajari ma taringot Jahowa dohot Jesus jala tarimangi parsiajaran i. Dung i, taulahon ma di parngoluonta. (Johannes 17:3) Tingki manjaha manang marsiajar Bibel, tasungkun ma dirinta: ’Aha do na diajarhon ayat on taringot Jahowa? Boasa ingkon  huhaholongi Jahowa sian nasa gogongku dohot rohangku?’​—1 Timoteus 4:15.

14. Songon dia do tangiang boi patoguhon holongta tu Jahowa?

¹⁴ Dos songon na maraleale, lam jotjot nasida mangkatahatai lam togu ma paralealeon ni nasida. Songon i ma, molo jotjot hita martangiang tu Jahowa lam togu ma holongta tu Ibana. (Jaha 1 Tessalonik 5:17.) Silehonlehon na arga do tangiang tu hita. Jotjot ma hita martangiang sian roha tu Jahowa. (Psalmen 62:8) Tingki martangiang hita, unang ma taulangulangi. Boi ma tajaga lam togu holongta tu Jahowa molo tongtong hita marsiajar Bibel jala martangiang sian roha.

15, 16. Songon dia do pangkilalaanta tu ulaon marbarita na uli?

¹⁵ Asa tongtong jonok hita tu Jahowa, porlu do tapaboa taringot haporseaonta tu angka halak. Hak na sumurung do di hita paboahon taringot Jahowa tu angka halak. (Lukas 1:74) On ma parenta na nilehon ni Jesus tu sude halak Kristen na mangihuthon ibana. Sude halak Kristen ingkon pasahathon barita na uli taringot Harajaon ni Debata. Dohot do hamu mangulahon i?​—Mateus 24:14; 28:19, 20.

¹⁶ Songon na dihilala ni apostel Paulus, arga situtu do ulaon marbarita i, didok ibana do i ”arta”. (2 Korint 4:7) Paboahon tu halak taringot Jahowa dohot sangkapNa, i do ulaon na rumingkot taulahon. Sada cara do i di hita laho manomba Jahowa jala diargai Ibana do molo taulahon i. (Heber 6:10) Ulaon marbarita na uli pe, parohon laba di hita dohot tu halak na manangihon hita. Alana, tingki taurupi halak mananda Jahowa, hita pe lam jonok ma tu Ibana jala tadapot ma hangoluan  salelenglelengna. (Jaha 1 Korint 15:58.) Pasahathon barita na uli ma ulaon na boi mambahen las rohanta.

17. Boasa mansai ringkot ulaon marbarita na uli?

¹⁷ Ringgas ma hita marbarita na uli jala ingkon on ma ulaon na rumingkot di hita. (2 Timoteus 4:2) Porlu begeon ni sude halak taringot Harajaon ni Debata. Bibel mandok, ”Nunga jonok ari ni Jahowa na balga i, nunga jonok, tibu na ma ro!” jala ”ndang tagamon tartading!” ari i. (Sepania 1:14, Bibel siganup ari; Habakuk 2:3) Ndang sadia lelengnai, ripashonon ni Jahowa ma Sibolis jala pasohotonNa hajahaton sian portibi on. Alani i, porlu tabaritahon tu sude halak asa boi nasida mangoloi Jahowa.

18. Boasa ringkot manomba Jahowa rap dohot angka dongan?

¹⁸ Las do roha ni Jahowa molo tasomba Ibana rap dohot donganta na asing. Bibel mandok, ”Masiantoan ma hita, masipajujuan tu haholongon dohot tu angka ulaon na denggan! Unang tatadingkon parpunguanta hian, songon na hinasomalhon ni na deba; tung masipaingotan ma hita, jala lam i ma nian, ala lam jonok diida hamu ari i.” (Heber 10:24, 25) Tabahen ma na dumenggan tingki ro hita tu sude parpunguanta. Di parpunguan ma hita boi masipaingotan jala patoguhon haporseaonta be.

19. Aha do na boi mangurupi hita mangkaholongi dongan sahaporseonta?

¹⁹ Rap marsaor do hita dohot dongan sahaporseaon manomba Jahowa di parpunguan. Alai, sude hita nunga mardosa, olo do sipata adong na mambahen hansit rohanta. Molo adong na sala dibahen donganta, rade ma hita manalpuhon i. (Jaha Kolosse 3:13.) Parange na denggan ma na talului jala na sai taingot sian dongan  sahaporseaonta. Molo taulahon songon on, lam tahaholongi ma nasida jala lam jonok ma hita tu Jahowa.

20, 21. Aha do ”ngolu na tutu” i?

²⁰ Las roha ni Jahowa mangida alealeNa mangkilala hangoluan na denggan. Dipaboa di Bibel, adong hangoluan na dumenggan di ari na naeng ro, imbar sian hangoluan na tahilala saonari on.

²¹ Di Paradeiso, ndang holan 70 manang 80 taon hita mangolu. Alai, hilalaonta ma disi ”hangoluan salelengna” mardongan hadameon, las ni roha, ndang adong sahit. Didok ma i di Bibel ”ngolu na tutu”. On ma bagabaga ni Jahowa tu hita. Alai, ingkon marsitutu do hita asa boi ”manangkup” ngolu na tutu.​—1 Timoteus 6:12, 19.

22. (a) Songon dia do hita boi mandapot ”ngolu na tutu”? (b) Boasa ndang boi alani gogonta mandapot hangoluan salelengna i?

²² Asa boi tadapot ”ngolu na tutu”, aha do na ingkon siulahononta? Ingkon ”mangulahon na denggan” ma hita jala ”mamora di angka ulaon na denggan” i. (1 Timoteus 6:18) Lapatanna, ingkon taulahon do aha na taparsiajari sian Bibel. Silehonlehon ni Jahowa do ngolu na sasintongna. Ndang tadapot i alani gogonta sandiri. (Rom 5:15) Las do roha ni Jahowa mangalehon hangoluan na salelengna tu naposoNa na marsihohot.

23. Boasa ringkot mamillit laho mangulahon na sintong saonari?

²³ Tasungkun ma dirinta: ’Husomba do Jahowa mangihuthon cara na dihalomohonNa?’ Molo adong dope na laho sipaubaonta, ingkon tapauba ma. Molo tabahen do sian nasa gogonta laho mangoloi jala mangasahon Jahowa, ondinganNa ma hita.  OndinganNa do naposoNa asa malua sian ari panguhuman ni Jahowa. Dung i, boi ma hita mian di Paradeiso salelenglelengna. Molo tapillit mangulahon na sintong saonari, tadapot ma hangoluan na sasintongna i!