1, 2. Ni kwi twingaya pa kuti tucingililwe?

ELENGANYENI ukuti muleenda pa nse ninshi kuli icimwela icikalamba. Mwamona fye umuulu wafiita, inkuba yatendeka ukubyata, ne mfula yalabulukuta. Ilyo line fye, imfula yatendeka ukuloka kabili mwatampa ukufwaya umwakuuba imfula. Awe mwasanga no mwakuuba, mwaumfwa na bwino sana.

² Ifilecitika muno nshiku nafipalana sana ne fi twalanda pa muulu. Ifintu mu calo filebipilako fye. Nalimo mulayipusha amuti, ‘Ni kwisa ningaya pa kuti incingililwe?’ Kemba wa malumbo atile: “Nkasosa kuli Yehova nati: ‘Ni mwe cubo candi kabili uwa kuncingilila, ni mwe Lesa wandi, uo natetekela.’” (Amalumbo 91:2) Ca cine, Yehova kuti atwafwa nga natukwata amafya, kabili alitulaya ukuti ifintu fikawama ku ntanshi.

3. Bushe Yehova kuti atucingilila shani?

³ Bushe Yehova kuti atucingilila shani? Kuti atwafwa ukushipikisha amafya yonse ayo twingakwata kabili alikwata amaka ukucila pa muntu onse uwingafwaya ukutusansa. Nga ca kuti ifibi fyatucitikila, tulecetekela ukuti ku ntanshi, Yehova akawamya ifintu fyonse. Baibolo itukoselesha ukuti: “Ikalilileni mu kutemwa kwa kwa Lesa.” (Yuda 21) Kanshi nga tulefwaya ukuti Yehova aletwafwa ilyo tuli na mafya, tufwile ukutwalilila ukuba ifibusa fyakwe. Nomba kuti twaba shani ifibusa fya kwa Yehova?

4, 5. Bushe Yehova atulanga shani ukuti alitutemwa?

⁴ Nga tulefwaya ukutwalilila ukuba cibusa wa kwa  Yehova, tulingile twaishiba ifyo atutemwa. Tontonkanyeni pa fintu fyonse ifyo Yehova atucitila. Alitupeela isonde ilisuma nga nshi umwaba ifimenwa ifisuma sana ne nama. Na kabili, alitupeela ifya kulya ifyo tuipakisha na menshi aya kunwa ayasuma. Muli Baibolo, Yehova alitweba ishina lyakwe kabili alitusambilisha pa mibele yakwe iisuma nga nshi. Ne cacilapo, icilanga ukuti alitutemwa, alitumine Umwana wakwe Yesu pano isonde ku kwisatufwila. (Yohane 3:16). Kabili apo alitufwilile, twalikwata isubilo lya kuti ifintu fikawama ku ntanshi.

⁵ Yehova alibikako Ubufumu bwa kwa Mesia nelyo ubuteko ubwaba ku muulu ubukafumyapo amacushi yonse. Ubu Bufumu bukalenga isonde likabe paradaise kabili bonse abakalaikalamo bakaba no mutende ne nsansa umuyayaya. (Amalumbo 37:29) Inshila na imbi iyo Yehova atulangilamo ifyo atutemwa, kutusambilisha ifingatwafwa ukulaikala bwino na pali ino ine nshita. Na kabili, alitweba no kuti tulepepa kuli ena kabili lyonse aliiteyanya ukukutika ku mapepo yesu. Kanshi ukwabula no kutwishika, Yehova alitulanga ukuti alitutemwa.

6. Finshi mulingile ukucita pa fintu fyonse ifyo Yehova amucitila?

⁶ Finshi mulingile ukucita pa fintu fyonse ifyo Yehova amucitila? Mufwile ukulatasha. Ku ca bulanda, abantu abengi muno nshiku tabatasha pa fyo Yehova abacitila. Ifi fine e fyo cali na lintu Yesu ali pano isonde. Inshita imo, Yesu alyundepe abantu ikumi abalwele ifibashi, lelo umo fye e watashishe pa fyo Yesu amucitile. (Luka 17:12-17) Na ifwe tufwile ukuba nga ulya umwaume uwatashishe Yesu. Tufwile tuletasha Yehova lyonse pa fyo atucitila.

7. Kuti twalanga shani ukuti twalitemwa sana Yehova?

⁷ Na ifwe bene tufwile ukulanga ukuti twalitemwa Yehova. Yesu aebele abasambi bakwe ukuti bafwile ukutemwa Yehova no mutima wabo onse, no mweo wabo  onse, kabili no kutontonkanya kwabo konse. (Belengeni Mateo 22:37.) Bushe aya mashiwi yalola mwi?

8, 9. Finshi twingacita pa kuti tulange Yehova ukuti twalimutemwa?

⁸ Bushe tufwile ukupelela fye pa kulanda ukuti twalimutemwa Yehova? Awe. Nga ca kuti twalimutemwa Yehova no mutima wesu onse, umweo wesu onse e lyo na mano yesu yonse, tukalanga ifyo twamutemwa mu fyo tucita. (Mateo 7:16-20) Baibolo ilatusambilisha ukuti nga twalimutemwa Lesa, tukalakonka amafunde yakwe. Bushe ukukonka amafunde kwalyafya? Awe, pantu “amafunde yakwe [Yehova] taya-afya.”—Belengeni 1 Yohane 5:3.

⁹ Nga tuleumfwila Yehova tulaba ne nsansa no bumi ubusuma. (Esaya 48:17, 18) Nomba cinshi cikatwafwa ukutwalilila ukuba cibusa wa kwa Yehova? Lekeni tusambilile.

10. Mulandu nshi mufwile ukutwalilila ukulasambilila pali Yehova?

¹⁰ Finshi fyalengele mube cibusa wa kwa Yehova? Ifyo mwasambilile muli Baibolo fyalimwafwa ukwishiba Yehova no kuba cibusa wakwe. Bucibusa bwenu na Yehova kuti twabupashanya ku mulilo uo mulefwaya ukuti utwalilile fye ukwaka. Nga tulefwaya ukuti umulilo utwalilile ukwaka, tufwile ukulabikapo inkuni. Na imwe nga mulefwaya bucibusa bwenu na Yehova bulekoselako, mufwile ukutwalilila ukulasambilila pali ena.—Amapinda 2:1-5.

11. Finshi fikacitika nga mwatwalilila ukulasambilila Baibolo?

¹¹ Nga mwatwalilila ukusambilila Baibolo, mukeshiba ifintu ifyo mukatemwa nga nshi. Moneni ifyo abasambi ba kwa Yesu babili baumfwile ilyo Yesu alebalondolwela amasesemo ayaba mu Baibolo. Batile: “Bushe imitima yesu tayacilabilima ilyo acilalanda na ifwe mu nshila, ilyo acilatulondolwela Amalembo?”—Luka 24:32.

12, 13. (a) Cinshi cingacitika ku kutemwa uko twatemwa Lesa? (b) Finshi tufwile ukulacita pa kuti tutwalilile ukutemwa Yehova?

 ¹² Na imwe bene mufwile mwalitemenwe ilyo mwatampile ukumfwikisha Amalembo ya mu Baibolo, nga filya fine abasambi ba kwa Yesu baumfwile ilyo abalondwelele Amalembo. Ukumfwikisha Amalembo e kwamwafwile ukwishiba Yehova no kumutemwa. Ukwabula no kutwishika te kuti mufwaye ukutemwa uko mwatemwa Yehova kucepe.—Mateo 24:12.

¹³ Nga mwaba cibusa wa kwa Lesa, mufwile ukubombesha pa kuti bucibusa bwenu bulekoselako. Mufwile ukutwalilila ukulasambilila pali Yehova na Yesu no kulatontonkanya pa fyo mulesambilila ne fyo mwingalafibomfya. (Yohane 17:3) Ilyo mulebelenga nelyo ukusambilila Baibolo, muleyipusha amuti: ‘Bushe ifi nabelenga filensambilisha finshi pali Yehova Lesa? Mulandu nshi mfwile ukutemenwa Yehova no mutima wandi onse no mweo wandi onse?’—1 Timote 4:15.

14. Bushe ipepo litwafwa shani ukukosha bucibusa bwesu na Yehova?

 ¹⁴ Nga mwalikwata cibusa, mulalanda nakwe lyonse, kabili ukucita ifi kulalenga bucibusa bwenu bulekoselako. Ifi fine e fyo ciba na kuli bucibusa bwesu na Yehova. Nga tulelanda nakwe lyonse mwi pepo, bucibusa bwesu na ena bulakoselako. (Belengeni 1 Abena Tesalonika 5:17.) Ukulanda na Shifwe wa ku muulu mwi pepo lishuko ilikalamba nga nshi. Tufwile ukulamweba fyonse ifyaba ku mitima yesu. (Amalumbo 62:8) Ilyo tulepepa, tatulingile ukulabwekeshapo fye ifyebo fimo fine, lelo tufwile ukulanda ifyebo ifilefuma mu mutima wesu. E ico nga twatwalilila ukusambilila Baibolo no kulalanda ifyebo ifilefuma mu mutima, bucibusa bwesu na Yehova bukakoselako.

15, 16. Bushe mumona shani umulimo wa kubila imbila nsuma?

¹⁵ Nga tulefwaya ukutwalilila ukupalama kuli Yehova tufwile ukulaebako abantu ifyo twamutetekela. Ukwebako abantu pali Yehova lishuko icine cine. (Luka 1:74) Na kuba, e mulimo uo Yesu apeele Abena Kristu ba cine bonse. E ico tufwile ukulabila imbila nsuma iya Bufumu bwa kwa Lesa. Bushe mulabila imbila nsuma iya Bufumu bwa kwa Lesa?—Mateo 24:14; 28:19, 20.

¹⁶ Umutumwa Paulo alishibe ukuti umulimo wa kubila imbila nsuma walicindama nga nshi, alandile ukuti uyu mulimo “Cuma.” (2 Abena Korinti 4:7) Ukwebako abantu pali Yehova na pa bufwayo bwakwe e mulimo uwacindamisha uo mulingile ukulabomba. Nga mulebila imbila nsuma ninshi mulebombela Yehova kabili alatasha sana. (AbaHebere 6:10) Ukubila mbila nsuma kuti kwamwafwa kumo na abo muleshimikila ukupalama kuli Yehova no kukwata umweo wa muyayaya. (Belengeni 1 Abena Korinti 15:58.) Kanshi ukubila imbila  nsuma e mulimo fye uwingamuletela insansa sha cine cine!

17. Mulandu nshi tulingile ukulabilila sana imbila nsuma?

¹⁷ Tulingile ukubila sana imbila nsuma. Tufwile ‘ukubila icebo,’ no kuba ‘abacincila.’ (2 Timote 4:2) Abantu bafwile ukwishiba Ubufumu bwa kwa Lesa. Baibolo itila: “Ubushiku ubukalamba ubwa kwa Yehova nabupalama. Nabupalama, kabili buleyangufyanya nga nshi.” Kabili impela ‘tayakacelwe.’ (Sefania 1:14; Habakuki 2:3) Kanshi kwashala fye panono Yehova ali no konaula icalo ca kwa Satana. Lelo ilyo Yehova talacita ifi, tufwile twasoka abantu pa kuti baisalilepo abene ukubombela Yehova.

18. Cinshi tulingile ukulapepela Yehova pamo na Bena Kristu banensu?

¹⁸ Yehova afwaya ukuti tulemupepa pamo na Bena Kristu banensu. Baibolo itila: “Tutontonkanye pa banensu ku kucincishanya ku kutemwa kabili ku kubomba imilimo iisuma, twilapuswa ku kulongana, filya waba umusango wa bamo, lelo tulekoseleshanya, maka maka apo mulemona ubushiku bulya bulepalama.” (AbaHebere 10:24, 25) Tulingile ukubombesha pa kuti tulelongana lyonse. Nga tulelongana tulakwata ishuko lya kucincishanya no kukoseleshanya.

19. Cinshi cingatwafwa ukulatemwa aba bwananyina?

¹⁹ Nga mulelongana, kuti mwakwata ifibusa ifikalamukoselesha ukulabombela Yehova. Kuti muleba pamo na bamunyinefwe na bankashi abatemwa ukubombela Yehova nga fintu mwatemwa. Aba aba bwananyina tabapwililika nga filya fine na imwe mushapwililika, kanshi nabo bene balalufyanya. Nga ca kuti bamulufyanya, mulingile mwabelela. (Belengeni Abena Kolose 3:13.) Cila nshita mulebika amano ku fisuma ifyo aba bwananyina bacita pantu nga mulecita ifi, mukabatemwa kabili mukapalama sana kuli Yehova.

20, 21. Bushe “umweo wine wine” ni cinshi?

²⁰ Yehova afwaya ukuti bonse abaaba ifibusa fyakwe baleikala bwino sana. Baibolo itusambilisha ukuti ku ntanshi ubumi bwesu tabwakabe nga fintu bwaba muno nshiku.

²¹ Ku ntanshi, tatwakaleikala fye imyaka 70 nelyo 80 nga fintu twikala ino nshita. Lelo tukekala “umuyayaya” muli paradaise iisuma nga nshi umo tukalaikala umutende, tatwakalelwala, kabili tukaba ne nsansa nga nshi. Ubu e bumi ubo Baibolo ita ukuti “umweo wine wine.” Yehova alitulaya ukuti akatupeela ubumi bwine bwine, lelo tufwile ukubombesha pa kuti ‘twikatishe’ ku bumi bwine bwine.—1 Timote 6:12, 19.

22. (a) Kuti twacita shani pa kuti ‘twikatishe ku mweo wine wine’? (b) Mulandu nshi tushingaipeelela umweo wa muyayaya?

²² Kuti twacita shani pa kuti ‘twikatishe ku mweo wine wine’? Tulingile “ukulacita ifisuma” no “kulabomba sana imilimo iisuma.”(1 Timote 6:18) Aya amashiwi yalolele mu kuti tufwile ukulakonka ifyo tusambilila mu Baibolo. Na lyo line, nangu tubombeshe shani, te kuti tuipeele umweo wa muyayaya. Ni Yehova fye e upeela ababomfi bakwe aba cishinka ubumi bwa muyayaya pa mulandu ne “cikuuku” cakwe. (Abena Roma 5:15) Ala Shifwe wa mu muulu alafwaisha ukupeela ababomfi bakwe aba cishinka ubumi bwine bwine!

23. Mulandu nshi mulingile ukusalilapo ukubombela Yehova?

²³ Yipusheni amuti, ‘bushe ndapepa Lesa ukulingana ne fyo afwaya?’ Nga ca kuti mwasanga ukuti mulingile ukwaluka muli fimo, mufwile ukwaluka ilyo line. Nga ca kuti tuleumfwila Yehova muli fyonse kabili twashintilila pali ena, akalatucingilila. Na kuba, alacingilila abantu bakwe aba cishinka mu nshiku sha kulekelesha isha calo ca kwa Satana Kaseebanya. Yehova akatupeela ubumi  bwa muyayaya mu Paradaise nga fintu atulaya. Cine cine kuti mwakwata ubumi bwine bwine ku ntanshi nga mwasalapo ukulabombela Yehova!