1, 2. Vbe ima khian ya sẹtin gha mwẹ agbẹkunsotọ hẹ vbe ẹdẹnẹrẹ?

GIA kha wẹẹ, u khian vbe odẹ vbe ẹdẹ ọkpa, u ghi ghee, amẹ wa bi, ayan suẹn gha yanyan, avannukhunmwu na gha vannọ. Vbọ ma he kpẹẹ vba, amẹ na suẹn gha rhọọ. Ẹre u na gualọ ehe ne u gha lẹre yi. Ẹi mwẹ orhiọn ruẹ ma sotọ vbe u ghi miẹn ehe ne u khian lẹre yi!

² Erriọ agbọn ne ima ye vbe ẹdẹnẹrẹ wa vbe ye. Te emwi hia ghi wa rhia yọ rhia yọ. U sẹtin gha roro ẹre wẹẹ, ‘Vbia khian ya sẹtin gha mwẹ agbẹkunsotọ hẹ?’ Ọkpa vbe usun emwa ni gbẹn ebe Psalm keghi kha wẹẹ, “I gha sẹtin tama [Osanobua] wẹe, ‘Uwẹ ọrọre nọ gbinna mẹ kevbe ugue mwẹ, uwẹ ọrọre Osanobua mwẹ, ọmwa ne I mu ẹtin mwẹ yan.’” (Psalm 91:2) Vbene ẹmwata, e Jehova gha sẹtin sọfurre ye ọlọghọmwa ne ima ye vbe ẹdẹnẹrẹ, ọ vbe yan rẹn wẹẹ, emwi hia gha dunna ne ima vbe odaro.

3. De emwi ne ima gha ru ne Jehova mieke na gha gbogba ga ima?

³ De vbene Jehova ya gbogba ga ima hẹ? Ọ keghi ru iyobọ ne ima ya sẹtin zin egbe ọlọghọmwa ne ima rhirhi gha ye. E Jehova ne olẹtin, gha sẹtin gbogba ga ima, ne eghian ghẹ rhie ikuanegbe ne ima. Ọ gha khọnrẹn ne emwi dan sunu daa ima nia, gi ima gha mwẹ ilẹkẹtin wẹẹ, e Jehova gha sọfurre yọ vbe odaro. E Baibol keghi rhie adia na ne ima. Ọ wẹẹ ne ima ‘ye gha rre uwu ahoẹmwọmwa Osanobua.’ (Jud 21) Ọna rhiema wẹẹ, ọ khẹke ne ima sikẹ e Jehova nọ mieke na gha ru iyobọ ne ima vbe ẹghẹ ibavbaro. Vbe ima khian ya sẹtin ru ọna hẹ?

4, 5. De odẹ ne Jehova he ya rhiẹre ma wẹẹ irẹn hoẹmwẹ ima?

⁴ Ne ima mieke na sẹtin sikẹ e Jehova, ọ khẹke ne ima rẹn vbene ọ hoẹmwẹ ima sẹ hẹ. Muẹn roro emwi hia ne Jehova he ru nuẹn. Ọ keghi yi agbọn ne mosee ne ima, ọ na vbe yi emwi okọ kevbe aranmwẹ ughughan ye uwu ẹre. Osanobua ẹre ọ kpemehe evbare esi ne ima, irẹn ẹre ọ vbe ru ẹre ne amẹ nọ hianrẹn gha rre ehe hia vbe uhunmwu otagbọn. Ẹmwẹ Osanobua nọ re Baibol, ẹre ọ ya ima rẹn eni Osanobua kevbe akpa ughughan ne irẹn mwẹ. Nọ ghi wa sẹ ehia, ọre ne Jehova na gie Jesu gha die agbọn na, nọ do ya arrọọ ọghẹe zọ ese ne ima. (Jọn 3:16) Izọese na, ẹre ọ ya ima mwẹ ilẹkẹtin wẹẹ, emwi hia gha dunna vbe odaro.

⁵ E Jehova mu Arriọba ọghe Mẹzaia gbọọ nẹ vbe ẹrinmwi. Arriọba na gha rherhe sọfurre ye ọlọghọmwa hia. Arriọba na, ẹre ọ khian ya agbọn na khian e paradais, vbe ẹghẹ nii, emwa hia ghi do gha rre uwu ọfunmwegbe kevbe oghọghọ vbe etẹbitẹ. (Psalm 37:29) Odẹ ọvbehe ne Jehova vbe ya rhiẹre ma wẹẹ irẹn hoẹmwẹ ima, ọre nọ na maa ima re, odẹ nọ ghi maan sẹ, ne ima khian ya gha loo arrọọ ọghe ima. Ọ vbe hoo ne ima gha na erhunmwu gie irẹn, ọ wa vbe mu egbe nọ ya họn erhunmwu ima. E Jehova gele rhiẹre ma wẹẹ, irẹn hoẹmwẹ dọmwadẹ ima.

6. Vbua khian ya rhiẹre ma wẹẹ u gbọyẹmwẹ ye ahoẹmwọmwa ne Jehova mwẹ daa ruẹ?

⁶ Vbua khian ya rhiẹre ma wẹẹ u gbọyẹmwẹ ye ahoẹmwọmwa ne Jehova mwẹ daa ruẹ? Gha kpọnmwẹ ọnrẹn ye emwi hia nọ he ru nuẹn. Ọ keghi re emwi da ọmwa wẹẹ, emwa ẹsoghodan ẹre ọ gba ehe hia vbe uhunmwu otagbọn vbe ẹdẹnẹrẹ. Erriọ vbe gha ye vbe ẹghẹ Jesu. Ọ mwẹ ẹghẹ ne Jesu ya mu ikpia igbe ni ghaa khuọnmwi emianmwẹ oti egbe rran, sokpan, ọkpa vbọ, ẹre ọ do kpọnmwẹ Jesu. (Luk  17:12-17) Ọ khẹke ne ima ya egbe taa okpia nii. Gi ima gha gbọyẹmwẹ ye emwi hia ne Jehova ru ne ima.

7. De vbe nọ khẹke ne ahoẹmwọmwa ne ima mwẹ ne Jehova wegbe sẹ hẹ?

⁷ Ọ vbe khẹke ne ima hoẹmwẹ e Jehova. Jesu keghi tama erhuanegbe ẹre ne iran ya ekhọe hia, orhiọn hia, otọ ẹko hia, kevbe ẹtin hia hoẹmwẹ e Jehova. (Tie Matiu 22:37.) Vbe a ya ọna kha?

8, 9. De vbene ima khian ya rhiẹre ma wẹẹ ima hoẹmwẹ e Jehova?

⁸ Ma ghaa ya unu kẹkan tae wẹẹ ima hoẹmwẹ e Jehova, ọni ma sẹ. Ma gha gele ya ekhọe hia kevbe ẹtin ima hia hoẹmwẹ e Jehova, ọ ghi gha rhiegbe ma vbe uyinmwẹ ima. (Matiu 7:16-20) E Baibol khare wẹẹ, ma gha gele hoẹmwẹ Osanobua, ma ghi gha lele uhi ọghẹe. Uhi Osanobua lọghọ na lele ra? Ẹo. Uhi Osanobua i “re nọ lọghọ ne ima gbe.”—Tie 1 Jọn 5:3.

⁹ Ma ghaa họn ẹmwẹ ne Jehova, ma ghi gha mwẹ oghọghọ kevbe agbẹkunsotọ vbe arrọọ ọghe ima. (Aizaia 48:17, 18) De emwi nọ gha ru iyobọ ne ima ya sikẹ e Jehova? Gia ziro yan rẹn nia.

10. Vbọzẹe nọ na khẹke ne u ye gha ruẹ emwi vbekpae Jehova?

¹⁰ Vbua ya do gha re ọsie Jehova hẹ? E Baibol na tie, ẹre ọ ya ruẹ do rẹn e Jehova, ẹre ọ vbe ya ruẹ do gha re ọsiọre. U ghaa ghae erhẹn, u ma na hoo ne erhẹn nii dọyọ, u ghi gha si yọ. Erriọ asikẹgbe ne u gu e Jehova mwẹ vbe ye. Ọ khẹke ne u gha ruẹ emwi vbekpae Jehova ne u mieke na do gha re ọsiọre ne khuankhuankhuan.—Itan 2:1-5.

11. De vbene ọ khẹke ne imamwaemwi e Baibol gha ye hẹ vbe ekhọe ruẹ?

¹¹ Zẹvbe ne u ya tie Baibol, ẹi mwẹ u ma ruẹ emwi nọ gha mu ruẹ ekhọe. Vbe Jesu rhan otọ ẹmwẹ akhasẹ eso ni  rre Baibol ma erhuanegbe ẹre eva, ọ keghi mu iran ekhọe. Iran keghi kha wẹẹ: ‘Ẹi re te ọ ghaa giẹn vbuwe ima vbe na ghee erhẹn vbe ọ guan ban kevbe vbene ọ ya gha rhan otọ ebe nọhuanrẹn ma ima vbe odẹ?’—Luk 24:32.

12, 13. (a) De emwi nọ gha sẹtin sunu daa ahoẹmwọmwa ne ima mwẹ daa Osanobua? (b) De emwi ne ima gha ru ne ahoẹmwọmwa ne ima mwẹ ne Jehova ghẹ worua?

¹² Erhuanegbe Jesu ghi rẹn otọ emwi ne Jesu maa iran re, ọ keghi mu iran ekhọe. Ọ gha kẹ, erriọ vbe ya gbuẹ otiti vbe u suẹn gha rẹn otọ e Baibol. Ọna ẹre ọ ghi ya ruẹ do rẹn e Jehova sayọ, u na vbe do hoẹmwẹ ọnrẹn. Ghẹ gi ahoẹmwọmwa na worua.—Matiu 24:12.

¹³ U gha ghi khian ọsie Jehova nẹ, ọ khẹke ne u hia ne asikẹgbe na gha wegbe sayọ. Ọ khẹke ne u ye gha ruẹ emwi vbekpae Jehova kevbe Jesu, u ghi vbe gha ru erria yan emwi ne u ruẹ kevbe vbene u khian ya gha rhiẹre ye uyinmwẹ hẹ. (Jọn 17:3) U ghaa tie Baibol, nọ egbuẹ ọta  vbenian: ‘Vbe ako na maa mwẹ re vbekpae Jehova? Vbọzẹe nọ na khẹke ne I ya ekhọe mwẹ hia kevbe ẹtin mwẹ hia hoẹmwẹ ọnrẹn?’—1 Timoti 4:15.

14. De vbene erhunmwu ya ya ahoẹmwọmwa ne ima mwẹ ne Jehova wegbe sayọ hẹ?

¹⁴ U ghaa mwẹ ọse nọ maan, u na vbe gha gu ẹre guan vbe ẹghẹ hia, uwa ghi guobọ egbe sayọ. Erriọ erhunmwu ne ima na gie Jehova vbe ye. Ma ghaa na erhunmwu vbe ẹghẹ hia, ahoẹmwọmwa ne ima mwẹ daa re ghi gha wegbe sayọ. (Tie 1 Tẹsalonaika 5:17.) Erhunmwu keghi re ẹse ọhẹ nọ ke obọ Osanobua rre. Ọ khẹke ne ima gha fannọ otọ ẹko ima ma rẹn. (Psalm 62:8) Ọ ma khẹke ne ima gha ta ẹmwẹ ọkpa yaẹngbe yaẹngbe, ọ khẹke ne ẹmwẹ ne ima ta vbe erhunmwu ke ekhọe ima rre. Ma ghaa tie Baibol vbe ẹghẹ hia, ima na vbe gha ya ekhọe hia na erhunmwu, ahoẹmwọmwa ne ima mwẹ dae Jehova ghi gha wegbe sayọ.

15, 16. De aro ne uwẹ ya ghee iwinna ikporhu iyẹn nọ maan?

¹⁵ Deghẹ ima hoo ne ima ye gha re ọsie Jehova, te ima gha tama emwa ọvbehe vbekpae iyayi ọghe ima. Ọna keghi re ukpamuyọmọ nọ hiunsi. (Luk 1:74) Ọna ọre iwinna ne Jesu waa ne Ivbiotu e Kristi ọghe ata. Ọ khẹke ne dọmwadẹ ima gha kporhu iyẹn nọ maan ọghe Arriọba. Uwẹ suẹn gha kporhu iyẹn nọ maan nẹ ra?—Matiu 24:14; 28:19, 20.

¹⁶ Aro nọ ghaan ẹre ukọ e Pọl wa vbe ya gha ghee iwinna ikporhu iyẹn nọ maan. Ọ keghi tie ẹre “emwi ighobioye.” (2 Kọrinti 4:7) Iwinna nọ ghi ru ekpataki sẹ nọ khẹke ne ima ru, ọre ne ima gha tama emwa ọvbehe vbekpae Jehova kevbe emwamwa ọghẹe. Ma ghaa mwẹ ọghae vbe iwinna na, te ima ga e Jehova, irẹn wa gbọyẹmwẹ yọ. (Hibru 6:10) U ghaa kporhu iyẹn nọ maan, uwẹ tobọ uwẹ kevbe emwa ne u kporhu ma ni miẹn ọnrẹn yi gha miẹn afiangbe vbọ;  wa ghi do sikẹ e Jehova sayọ, wa ghi vbe gha mwẹ ayayẹro ọghe arrọọ etẹbitẹ. (Tie 1 Kọrinti 15:58.) Iwinna ọvbehe i rrọọ nọ gha ya ruẹ gha sọyẹnmwẹ vbenian.

17. Vbọzẹe ne iwinna ikporhu iyẹn nọ maan na de ọghe ẹgiẹgiẹ?

¹⁷ Te iwinna ikporhu iyẹn nọ maan wa de ọghe ẹgiẹgiẹ nia, nọnaghiyerriọ, gi ima “kporhu enene ẹmwẹ,” gi ima vbe tuabọ yọ. (2 Timoti 4:2) Ọ khẹke ne emwa hia họn iyẹn nọ maan ọghe Arriọba. E Baibol khare wẹẹ: “Ẹdẹ nọkhua ọghe Nọyaẹnmwa sikẹ otọ nẹ, ọ wa sẹ otọ fo, ọ wa dee ẹgiẹgiẹ!” “Ẹi ra vbe kpẹẹ.” (Zẹfanaia 1:14; Habakọk 2:3) Vbe ne ẹi khian ghi kpẹẹ gbe, e Jehova gha fuẹn agbọn Esu rua. Vbene ọ te sẹ ẹghẹ nii, ọ khẹke ne ima ya obọ sekhae ne emwa, ne iran mieke na ru azẹ deghẹ Osanobua iran gha ga, ra Esu.

18. Vbọzẹe nọ na khẹke ne ima gha ga e Jehova vbuwe ẹbu Ivbiotu e Kristi ọghe ata?

¹⁸ E Jehova hoo ne ima gha ga irẹn vbuwe ẹbu Ivbiotu e Kristi ọghe ata. E Baibol khare wẹẹ: ‘Wa gi ima gha zẹ ye ẹmwẹ egbe, ne ima gha ye egbe obọ, na gha mwẹ ahoẹmwọmwa kevbe na gha ru emwi esi. Wa ghẹ gia do obọ iko ne a do miẹn egbe yi, zẹ vbene emwa eso ru na, sokpan wa gia rhie igiọdu ne egbe, katekate ne Ẹdẹ Nọyaẹnmwa na sẹ otọ fo nẹ.’ (Hibru 10:24, 25) Ọ ma khẹke na gha gbe ẹdẹ iko re. Iko ẹre ẹkpotọ na kie ne ima ya rhie igiọdu ne egbe.

19. Vbọ khian ya ima gha mwẹ ahoẹmwọmwa daa etẹn ima?

¹⁹ U ghaa yo iko vbe ẹghẹ hia, u ghi do gha mwẹ ọse ni maan ni gha ru iyobọ nuẹn ya gha ga e Jehova. U ghi do rẹn etẹn ughughan ni hia ne iran gha ga e Jehova vbene uwẹ vbe hia. Emwa ni ma gba ẹre iran khin, iran mwẹ abakuru vbene uwẹ vbe ye. Iran gha ru emwi nọ sọnnọ ruẹ, ya ekhọe hia yabọ iran. (Tie Kọlose 3:13.) Gha rhie aro tua ako ne iran na hia. U ghaa lele adia na, ahoẹmwọmwa ne u mwẹ daa etẹn ghi gha wegbe sayọ, erriọ asikẹgbe ne u gu e Jehova mwẹ khian vbe ya gha wegbe sayọ.

20, 21. Vbọ re “arrọọ ọghe ẹmwata”?

²⁰ E Jehova hoo ne eguọmwadia re hia gha sọyẹnmwẹ arrọọ nọ ghi maan sẹ. E Baibol gi ima rẹn wẹẹ, te agbọn ne ima ye na khian wa lughaẹn ne agbọn ọgbọn nọ dee.

²¹ Vbe agbọn ọgbọn nọ dee, te ima khian gha rrọọ vbe etẹbitẹ. Emwa i khian ghi gha wulo vbe iran gha sẹ odẹ ukpo 70 ra 80. Ma i khian ghi gha khuọnmwi, te ima khian gha sọyẹnmwẹ vbuwe ọfunmwegbe vbe paradais. Ọna ẹre Baibol tie ẹre “arrọọ ọghe ẹmwata.” E Jehova yan rẹn nẹ wẹẹ, ima gha sọyẹnmwẹ arrọọ ọghe ẹmwata, sokpan, te ima gha hia vbe odẹ ke odẹ, ne ima sẹtin “khọn miẹn arrọọ ọghe ẹmwata” na.—1 Timoti 6:12, 19.

22. (a) Vbe ima khian ya sẹtin “khọn miẹn arrọọ ọghe ẹmwata” hẹ? (b) Vbọzẹe ne ima i khian na sẹtin ya ẹtin obọ ima gha rrọọ vbe etẹbitẹ?

²² Vbe ima khian ya sẹtin “khọn miẹn arrọọ ọghe ẹmwata” hẹ? Ọ khẹke ne ima “gha ru emwi esi,” ma ghi vbe gha re emwa “ni fe vbe emwi esi na ru.” (1 Timoti 6:18) Ọna rhiema wẹẹ, ọ khẹke ne ima gha rhie emwi ne ima ruẹ ye uyinmwẹ. Vbọrhirhighayehẹ, ẹghẹ ọkpa i rrọọ ne ima khian ya sẹtin ya ẹtin obọ ima gha mwẹ arrọọ ọghe etẹbitẹ. Ọ keghi re ẹse ọhẹ ne Osanobua ya we eguọmwadia re ni mwẹ ẹkoata. Ọkpa vbe usun ẹse ọhẹ nọ ma te khẹke ima nọ. (Rom 5:15) E Jehova gele hoo ne eguọmwadia re gha rrọọ vbe etẹbitẹ.

23. Vbọzẹe nọ na khẹke ne u ru azẹ nọ khẹke nia?

²³ Nọ egbuẹ, ‘Mẹ ga Osanobua vbe odẹ ne irẹn kpasẹ yi ra?’ U gha bẹghe ẹre wẹẹ, ọ mwẹ asefẹn eso nọ na khẹke ne u ru afiwerriẹ, ghẹ zẹdẹ si obọ ẹgogo ghee iyeke. Ma gha ya egbe kọ e Jehova, ima na vbe gha họn ẹmwẹ nẹẹn vbe ẹghẹ hia, e Jehova ghi gha re ugue ọghomwa. E Jehova gha gbogba ga eguọmwadia re ni ya ẹkoata gae ya sẹ ufomwẹ ọghe  agbọn Esu na. E Jehova yan rẹn nẹ wẹẹ, emwa rẹn gha yin e Paradais vbe etẹbitẹ, ẹi mwẹ ọ ma mu eyan rẹn sẹ. Vbene ẹmwata, u gha sọyẹnmwẹ arrọọ ọghe ẹmwata, adeghẹ u na ru azẹ nọ khẹke nia!