1, 2. Bi ne yen asoé e vé melu ma?

TAME simesane na wo tyi’ilane beta ôkañe mveñ é kômbô’ô noñ. Yôp ô nga vine ne viu, feleves é nga bo, zo’oyañ é nga bam. Mvuse ya valé e temeteme na mbia veñ a tyi’i yôp. Ô nga jeñe vôm ô ne wu’ubu. Abime mvo’é te éyoñe wo yene vôm ô ne wu’ubu!

² Melu ma, bi tele fe aval été te. Abé é ne si, é ne fo’o ve ke da nenenen. Ô ne sili na, ‘Nde me ne ke sobô vé?’ Ntili Kalate Besam a nga tili Kalate Zambe été na “M’aye jô ajô Yéhôva na: ‘a ne me vôme m’asobô a ôleme viam; Zambe wom, nnye me to nye mebun.’” (Besam 91:2) Yaa, Yéhôva a ne volô bia na bi dañe minju’u bia tôban éyoñe ji, a ve fe bia ndi nlem asu melu ma zu.

3. Aval avé bi ne bo na Yéhôva a bo asoé dangan?

³ Aval avé Yéhôva a ne ba’ale bia? A ne ve bia ngule ya dañe minju’u mise bia tôbane mie. A ne ngul a dañe môt ase a ne jeñe na, a bo bia abé. Nde, ja’a mbia jam éziñ a kui bia éyoñe ji, bia yiane tabe ndi na Yéhôva a ye kôme mame mete melu ma zu. Kalate Zambe a ve bia ngule nyul éyoñ a jô na: ‘bi ba’ale’e bia bebiene nye’ane Zambe été’ (Jude 21) Bia yiane subu Yéhôva bebé asu na bi bi ngul éyoñe bi tele minju’u été. Ve aval avé bi ne de bo?

4, 5. Aval avé Yéhôva a nga liti na a nye’e bia?

⁴ Asu na bi subu Yéhôva bebé, bia yiane yeme beta  nye’an a bili mfa’a wongan. Fase mam mese Yéhôva a boya asu dangan. A nga ve bia mbamba étaba’a, ane a nga jalé je a mbamba bilé a betit. A nga ve fe bia bidi bi ne mvaé na bi di, a mendime me ne mfubane na bi nyu. A nga belane Kalate Zambe na a ye’ele bia éyôlé jé a mbamba mefulu mé. Beta jam a dañ a ne na, a nga liti bia nye’ane wé éyoñ a nga lôm atyi’i Mone dé a nye’e, Yésus, na a zu ve ényiñe jé asu dangan. (Jean 3:16) Bi bili beta ndi nlem asu melu ma zu amu metuna’a mé.

⁵ Yéhôva a nga telé Éjôé Messie e yôp. Éjôé te é mbeme zu va minju’u mise. Éjôé te ja ye bo na si é beta bo paradis, vôme môt ase a ye nyiñe mvo’é été a meva’a été nnôm éto. (Besam 37:29) Yéhôva a nga liti fe bia nye’ane wé amu a nga ye’ele bia avale bia yiane nyiñ éyoñe ji. A jô fe bia na bi ye’elane nye a na, alo dé é baa meye’elane mangane bia bo. Yéhôva a nga liti môt ase ya bebia nye’ane wé.

6. Aval avé bi ne yalane nye’ane Yéhôva?

⁶ Aval avé ô ne yalane nye’ane Yéhôva? Liti’i nye na wo ve nye akéva asu mam mese a boya asu dôé. Jam é ne engôngol é ne na, melu ma abui bôt é nji yeme ve akéva. Jame te é nga yené fe éyoñe Yésus a mbe si va. Môs éziñ a nga saé minzezam awôm, ve wua ñwô étam ô nga zu ve nye akéva. (Luc 17:12-17) Bia kômbô funane wu ô nga zu ve Yésus akéva. Bia kômbô fe ve Yéhôva akéva éyoñ ése.

7. Aval avé bia yiane yalane beta nye’ane Yéhôva a nye’e bia?

⁷ Bia yiane fe liti Yéhôva nye’ane bi bili asu dé. Yésus a nga jô beyé’é bé na ba yiane nye’e Yéhôva a nlem ôse, a nsisim ôse, a asimesan ase. (Lañe Matthieu 22:37.) Nalé ate a tinan aya?

8, 9. Aval avé bi ne liti Yéhôva na bia nye’e nye?

 ⁸ Ye da sili na bi jô fo’o ve na bia nye’e Yéhôva? Momo. Nge bia nye’e Yéhôva a nlem ôse, nsisim ôse, a asimesan ase, bia ye liti de a mimboane miangan. (Matthieu 7:16-20) Kalate Zambe a ye’ele ne sañesañe na, nge bia nye’e Zambe, bia ye tôñe metiñe mé. Ye jame te é ne ayaé? Momo, amu “metiñe mé me nji bo adit.”​—Lañe 1 Jean 5:3.

⁹ Éyoñe bia bo Yéhôva mewôk, bi bili mbamba ényiñ. (Ésaïe 48:17, 18) Ve jé ja ye volô bia na bi subu Yéhôva bebé? Bi tame de zu yen.

10. Amu jé wo yiane ke ôsu a yé’é mam a lat a Yéhôva?

¹⁰ Aval avé ô nga bo mvôé Yéhôva? A zene ya ayé’é ya Kalate Zambe ô nga yé’é abui mam a lat a Yéhôva, a bo na mvôé denan é nen. Amvôé te é ne ane nduane wo yi na é ke ôsu a yôñ. Aval ane nduane ja sili nja’a asu na é ke ôsu a yôñ, avale te fe bia yiane ke ôsu a yé’é mam a lat a Yéhôva asu na bi ba’ale amvôé dangan.​—Minkana 2:1-5.

11. Aval avé miñye’elane ya Kalate Zambe mi anambe wo?

¹¹ Avale wo ye ke ôsu a yé’é Kalate Zambe, wo ye yé’é mame me aye fo’o nambe nleme wôé. Tame yen avale beyé’é be Yésus bebaé be nga wô’ôtan éyoñe Yésus a nga timine be minkulane mejô ya Kalate Zambe. Be nga jô na: “Ke minleme miangane mi ate yôñ a mevak, éyoñ a te kobô bia zen, a liti bia mejô me ya Kalate Zambe?”​—Luc 24:32.

12, 13. (a) Jé é ne kui nye’ane bi bili asu Zambe? (b) Aval avé bi ne bo asu na nye’ane bi bili asu Yéhôva ô bo te vobô?

¹² Fo’o ve avale beyé’é be Yésus be nga wô’ôtan éyoñe  be nga wô’ô mejô me Zambe, ô ne fe wô’ôtan avale da éyoñe wo taté na wo tu’a yeme miñye’elane mi ne Kalate Zambe été. Jame te nde é nga volô wo na ô yeme Yéhôva a nye’e nye. Ô nji yi na nye’ane te ô vobô.​—Matthieu 24:12.

¹³ Éyoñ ô nto mvôé Zambe, wo yiane ke ôsu a yemete amvôé mia nye. Wo yiane ke ôsu a yé’é abui mame mfa’a Zambe a Yésus, wo yiane fe fase mame wo te yé’é; wo yiane sili womiene na ‘Nde me ne bo aya asu na me belane mame ma te yé’é ényiñe jam?’ (Jean 17:3) Éyoñe wo lañ a yé’é Kalate Zambe, sili’i womiene na: ‘Jé mame ma me aye’ele ma mfa’a Zambe? Amu jé ma yiane nye’e nye a nlem ôse, a nsisim ôse?’​—1 Timothée 4:15.

14. Aval avé meye’elane me avolô bia na, bi ba’ale nye’ane bi bili asu Yéhôva?

 ¹⁴ Éyoñ ô bili mba mvôé, ô ne mbane ya kobô a nye, a mboane te wo ba’ale amvôé denan. Avale te fe, éyoñe bi ne mbane ya laan a Yéhôva meye’elan, bia yemete nye’ane bi bili asu dé. (Lañe 1 Bethessalonicien 5:17.) Meye’elane me ne beta das a so bia be Ésa wongane ya yôp été. Bia yiane kate nye éyoñ ése mam ma so bia nlem été. (Besam 62:8) Bi nji yiane kobô meye’elane nlô, ve mame bia jô ma yiane so bia nlem été. Nge bia ke ôsu a yé’é Kalate Zambe, a kate Yéhôva mam ma so bia nlem été, bia ye ba’ale nye’ane bi bili asu dé.

15, 16. Wo yen ésaé nkañete aya?

¹⁵ Nge bia yi na bi ke ôsu a subu Yéhôva bebé, bia yiane fe kate bôte bevo’o mame bia buni. E laane bôte bevo’o mam a lat a Yéhôva a ne beta ma’a. (Luc 1:74) A ne fe mbe’e Yésus a nga ve benya Bekristene bese. Môt ase ya bebia a yiane kañete mbamba fôé ya Éjôé Zambe.Ye ô boya jame te?​—Matthieu 24:14; 28:19, 20.

¹⁶ Nlômane Paul ô mbe ô simesane na ésaé nkañetane mbamba fôé é ne ésaé é ne dia; a nga loone je na “édima jôm.” (2 Becorinthien 4:7) Ésaé ja dañe mfi ô ne bo é ne na, ô kate bôte bevo’o mam a lat a Yéhôva a nsôñane wé. A ne zene jia ya kañe Yéhôva, a Yéhôva a yene mame mese wo bo nye anen. (Behébreu 6:10) Éyoñe wo kañete mbamba fôé, ô ne yene mfi ya été, a bôte ba vô’ôlô wo fe be ne yene mfi ya été. Amu éyoñe wo bo de wo volô bôte bevôk, a womien ase na mi subu Yéhôva bebé, ndembene mi ne bi ényiñe ya  melu mese. (Lañe 1 Becorinthien 15:58.) Ye ésaé éfe é ne ve wo abime meva’a te?

17. Amu jé ésaé nkañete ja yiane boban avôl avô?

¹⁷ Nkañetane mbamba fôé ô ne ésaé ja yiane boban avôl avô. Bia yiane ‘kañete mejô’ me Zambe, a bia yiane de bo a ‘ngul’ ése. (2 Timothée 4:2) Bôte ba yiane wô’ô mam a lat a Éjôé Zambe. Kalate Zambe a jô na: “Beta môse ya Yéhôva a nto bebé, a nto bebé a zu avô!” Asu’ulane d’ “aye ke bem!” (Sophonie 1:14; Habakuk 2:3) Yaa, ana’ana Yéhôva a ye jiane mbia émo Satan. Ôsusua na jame te da boban, bôte ba yiane de yem, ndembene be ne tobe na ba kañe Yéhôva.

18. Amu jé bia yiane kañe Yéhôva fufulu a Bekristene bevok?

¹⁸ Yéhôva a yi na bi kañe nye fufulu a benya Bekristene bevok. Kalate Zambe a jô na: “Môt ase a simesa’ane nyô mbok, nsimesane ya tindi nye mfa’a ya nye’an a mbamba mimboane mi mam, a mi dañedañe bo nalé ane mia yene môs ôte ô za’a bebé.” (Behébreu 10:24, 25) Bia yiane ve mengule mese na bi tabe bisulane bise. Bisulane bia ve bia fane ya veane ngule nyul, a wônô mbunane môte mbok.

19. Jé é ne volô bia na bi nye’e bobejañ a bekale bangane ya nsisim?

¹⁹ Éyoñe wo tabe bisulan, wo ye bi mbamba bemvôé ba ye vôlô wo na ô kañe Yéhôva. Wo ye yene bobejañ a bekale mevale meva ba ve mengul ane wo na, be kañe nye. Be ne bebo mam abé a ba bo bikop ane wo. Éyoñe môte wua ya été a bo wo mbia jam, wo yiane jamé nye. (Lañe Becolossien 3:13.) Avale wo ye ve mengul éyoñ ése na, ô yene mbamba mefulu Bekristene bevo’o be bili, nde fe wo ye nye’e be abui a subu Yéhôva bebé.

20, 21. Jé é ne “ényiñ é ne fo’o ényiñ”?

²⁰ Yéhôva a yi na bemvôé bé bese be bi mbamba ényiñ. Kalate Zambe a ye’ele bia na, ényiñe jangane ya melu ma zu ja ye selane ji ya dene mimfa’a mise.

²¹ Melu ma zu, bia ye nyiñe nnôm éto sa ke fo’o ve mimbu 70 nge 80. Bia ye bi “ényiñe ya melu mese,” mvo’é minsôn, mvo’é a mbamba étaba’a. Jame te nde Kalate Zambe a loone na “ényiñ é ne fo’o ényiñ.” Yéhôva a ve bia ngaka’a na, a ye ve bia ényiñ é ne fo’o ényiñ, ve bia yiane ve mengule mese éyoñe ji asu na bi ‘bi’ je.​—1 Timothée 6:12, 19.

22. (a) Aval avé bi ne “bi ényiñ é ne fo’o ényiñ”? (b) Amu jé bi se ngule ya bi ényiñe ya nnôm éto a ngule jangan?

²² Aval avé bi ne bi “ényiñ é ne fo’o ényiñ”? Bia yiane “bo mvaé” a “bo minkukume mfa’a ya mbamba mimboane mi mam.” (1 Timothée 6:18) Nalé a tinane na, bia yiane bo mam bia yé’é Kalate Zambe été. Ve bi se ngule ya bi ényiñe ya melu mese a mengule mangan. A ne dase Yéhôva a ve bebo bisaé bé be ne bezôsô. A ne éve’ela “mveane zesé” wé. (Beromain 5:15) Ésa wongane ya yôp été a kômbô fo’o ve bebo bisaé bé be ne bezôsô dase te.

23. Amu jé wo yiane nyoñe mbamba mintyi’an éyoñe ji?

²³ Sili’i womiene na, ‘Ye ma kañe Zambe avale da yian?’ Nge ô yene na wo yiane tyendé mimfa’a miziñ, tyendé’é avôl avô. Éyoñe bi too ndi a Yéhôva, a éyoñ bia ve mengule mese na bi bo nye mewôk, Yéhôva a ye bo asoé dangan. Melu ya asu’ulane ya émo ji, a ye ba’ale bezôsô bebo bisaé bé mvo’é. Nde Yéhôva a ye bo mam mese ma sili asu na, bi nyiñe paradis nnôm  éto, fo’o ve aval émien a nga kak. Yaa, ô ne bi ényiñ é ne fo’o ényiñe nge wo nyoñe mbamba mintyi’an éyoñe ji!