1, 2. Asa ta modangop alang sa proteksiyon?

HUNAHUNAA nga naglakaw ka sa gawas. Midag-om, mikilat, unya midalugdog. Dayon mibundak ang ulan. Dako nimong pasalamat dihang nakakita kag kasilongan!

² Ingon niana ang atong situwasyon. Nagkagrabe ang kahimtang sa kalibotan. Tingali mangutana ka, ‘Asa ko modangop alang sa proteksiyon?’ Ang salmista misulat: “Moingon ko kang Jehova: ‘Ikaw ang akong dangpanan ug salipdanan, ang akong Diyos nga akong gisaligan.’” (Salmo 91:2) Oo, si Jehova makahatag natog paghupay sa atong mga problema karon, ug naghatag siyag nindot nga paglaom sa umaabot.

3. Unsaon nato paghimo si Jehova nga atong dangpanan?

³ Sa unsang paagi ta proteksiyonan ni Jehova? Tabangan ta niya sa pag-atubang sa atong mga problema, ug mas gamhanan siya kay kang bisan kinsa nga mosulay sa pagdaot kanato. Bisag dunay daotang mahitabo nato karon, makasalig ta nga ayohon ni Jehova sa umaabot ang maong kadaot. Ang Bibliya nagdasig nato nga ‘magpabilin sa gugma sa Diyos.’ (Judas 21) Kinahanglang magpabilin tang suod kang Jehova aron matabangan ta niya sa lisod nga mga kahimtang. Apan unsaon nato kana paghimo?

4, 5. Giunsa pagpakita ni Jehova ang iyang gugma kanato?

⁴ Aron magpabiling suod kang Jehova, kinahanglan natong maamgohan kon unsa ka dako ang iyang gugma kanato. Hunahunaa ang tanan niyang nabuhat kanato.  Gihatagan ta niyag nindot nga yuta ug gipuno kinig tanom ug hayop, apil pod lamiang pagkaon ug hinlong tubig. Pinaagi sa Bibliya, gitudloan ta ni Jehova sa iyang ngalan ug sa iyang makapadaning mga hiyas. Labaw sa tanan, gipakita niya ang iyang gugma dihang gipadala niya sa yuta ang iyang pinalanggang Anak, si Jesus, aron ihatag ang iyang kinabuhi alang kanato. (Juan 3:16) Ug tungod niana, duna tay nindot nga paglaom sa umaabot.

⁵ Gitagana ni Jehova ang Mesiyanikong Gingharian, usa ka langitnong gobyerno nga sa dili madugay motapos sa tanang pag-antos. Himoon niini ang yuta nga Paraiso, diin ang tanan magpuyo nga malinawon ug malipayon hangtod sa hangtod. (Salmo 37:29) Gipakita sab ni Jehova ang iyang gugma pinaagi sa pagtudlo kanato kon unsaon nga mabatonan ang kinamaayohang kinabuhi karon. Gidapit pod ta niya sa pag-ampo, ug siya kanunayng andam nga mamati nato. Gipakita gyod ni Jehova ang iyang gugma sa matag usa kanato.

6. Unsaon nimo pagpakita nga gipabilhan nimo ang gugma ni Jehova?

⁶ Unsaon nimo pagpakita nga gipabilhan nimo ang gugma ni Jehova? Ipakita nga mapasalamaton ka sa tanan niyang nahimo kanimo. Ikasubo, daghan ang dili mapasalamaton. Ingon ana sa panahon ni Jesus. Usa ka higayon, giayo ni Jesus ang 10 ka sanlahon, apan usa lang ang nagpasalamat. (Lucas 17:12-17) Gusto natong sundogon ang maong tawo. Magpasalamat ta kanunay kang Jehova.

7. Unsaon nato paghigugma si Jehova?

⁷ Kinahanglan sab natong ipakita ang atong gugma kang Jehova. Giingnan ni Jesus ang iyang mga tinun-an nga higugmaon si Jehova sa tibuok kasingkasing, kalag, ug hunahuna. (Basaha ang Mateo 22:37.) Unsay ipasabot niana?

8, 9. Unsaon nato pagpakita kang Jehova nga gihigugma nato siya?

 ⁸ Igo na ba ang pag-ingon nga gihigugma nato si Jehova? Dili. Kon gihigugma nato siya sa tibuok kasingkasing, kalag, ug hunahuna, ipakita nato kana pinaagig buhat. (Mateo 7:16-20) Ang Bibliya tin-awng nagtudlo nga kon gihigugma nato ang Diyos, sundon nato ang iyang mga sugo. Lisod ba kana? Dili, kay ang mga sugo ni Jehova “dili bug-at.”—Basaha ang 1 Juan 5:3.

⁹ Kon sundon nato si Jehova, kita mahimong malipayon ug matagbawon. (Isaias 48:17, 18) Pero unsay makatabang aron makapabilin tang suod niya?

10. Nganong angay kang magpadayon sa pagkat-on bahin kang Jehova?

¹⁰ Sa unsang paagi ka nahimong higala ni Jehova? Sa pagtuon nimo sa Bibliya, mas nailhan nimo siya ug nasuod ka niya. Kini nga panaghigalaay nahisamag kalayo nga gusto nimong nagdilaab kanunay. Sama nga ang kalayo nagkinahanglag sugnod aron modilaab, kinahanglang padayon kang magkat-on bahin kang Jehova aron magpabiling lig-on ang inyong panaghigalaay.—Proverbio 2:1-5.

11. Unsay mahimong epekto kanimo sa mga pagtulon-an sa Bibliya?

¹¹ Samtang padayon kang nagtuon sa Bibliya, duna kay mga makat-onan nga makatandog nimo. Matikdi ang gibati sa duha ka tinun-an ni Jesus samtang iyang gipatin-aw kanila ang mga tagna sa Bibliya. Sila miingon: “Mao diay nga natandog pag-ayo ang atong kasingkasing dihang iyang gipatin-aw pag-ayo ang Balaang Kasulatan samtang nanglakaw ta sa dalan!”—Lucas 24:32.

12, 13. (a) Unsay posibleng mahitabo sa atong gugma sa Diyos? (b) Unsay atong himoon aron dili mobugnaw ang atong gugma kang Jehova?

¹² Ang kasingkasing sa mga tinun-an natandog dihang nasabtan nila ang Kasulatan. Lagmit mao sab nay imong  gibati dihang anam-anam nimong nasabtan ang Bibliya. Kini nakatabang nimo nga mailhan ug higugmaon si Jehova. Dili gyod nimo gustong mobugnaw kini nga gugma.—Mateo 24:12.

¹³ Dihang mahimo na kang higala sa Diyos, kinahanglang maningkamot ka nga magpabiling lig-on ang inyong panaghigalaay. Kinahanglang padayon kang magkat-on bahin kaniya ug kang Jesus ug maghunahuna sa imong nakat-onan ug kon unsaon kini pagpadapat. (Juan 17:3) Dihang magbasa o magtuon ug Bibliya, hunahunaa kini: ‘Unsay gitudlo niini bahin kang Jehova? Nganong angay nako siyang higugmaon sa tibuok kasingkasing ug kalag?’—1 Timoteo 4:15.

14. Sa unsang paagi makatabang ang pag-ampo aron magpabiling lig-on ang atong gugma kang Jehova?

¹⁴ Kon naa kay suod nga higala, kanunay kang makig-estorya niya. Makatabang ni nga magpabilin mong suod. Sa samang paagi, kon kanunay tang mag-ampo, magpabiling  lig-on ang atong gugma kang Jehova. (Basaha ang 1 Tesalonica 5:17.) Ang pag-ampo maoy nindot nga regalo gikan sa atong langitnong Amahan. Kinahanglang pirme tang makig-estorya kaniya nga kinasingkasing. (Salmo 62:8) Sinsero tang moampo niya, dili balikbalik ug sinag-ulo. Kon padayon tang magtuon sa Bibliya ug kinasingkasing nga moampo, magpabiling lig-on ang atong gugma kang Jehova.

15, 16. Unsay pag-isip nimo sa buluhatong pagsangyaw?

¹⁵ Aron magpabilin tang suod kang Jehova, kinahanglan sab nga makig-estorya ta sa uban bahin sa atong tinuohan. Dakong pribilehiyo ang pagpakig-estorya bahin kang Jehova. (Lucas 1:74) Responsabilidad kini nga gihatag ni Jesus sa tanang matuod nga Kristohanon. Kitang tanan angayng magsangyaw sa maayong balita sa Gingharian sa Diyos. Nahimo na ba nimo kini?—Mateo 24:14; 28:19, 20.

¹⁶ Bililhon kaayo kang apostol Pablo ang pagsangyaw; gitawag niya kinig “bahandi.” (2 Corinto 4:7) Ang pagpakig-estorya sa uban bahin kang Jehova ug sa iyang katuyoan mao ang imong labing importanteng buluhaton. Bahin kini sa imong pag-alagad kang Jehova, ug gipabilhan niya ang imong ginahimo para niya. (Hebreohanon 6:10) Ang pagsangyaw makahatag sab ug kaayohan nimo ug sa mamati nimo kay gitabangan nimo sila ug ang imong kaugalingon nga masuod kang Jehova ug makabaton ug kinabuhing walay kataposan. (Basaha ang 1 Corinto 15:58.) Duna pa bay buluhaton nga makahatag nimog labawng kalipay?

17. Nganong dinalian kaayo ang pagsangyaw?

¹⁷ Ang pagsangyaw dinalian kaayo. Angay natong “isangyaw ang pulong” ug ‘dili maglangan sa paghimo  niini.’ (2 Timoteo 4:2) Ang mga tawo kinahanglang makadungog bahin sa Gingharian sa Diyos. Ang Bibliya nag-ingon: “Ang dakong adlaw ni Jehova duol na! Kini duol na ug paspas kaayong nagsingabot!” Ang kataposan “dili maulahi!” (Sofonias 1:14; Habacuc 2:3) Oo, hapit na gyong laglagon ni Jehova ang kalibotan ni Satanas. Sa dili pa kana mahitabo, kinahanglang pasidan-an ang katawhan aron sila makaalagad kang Jehova.

18. Nganong angay natong simbahon si Jehova kauban sa ubang matuod nga Kristohanon?

¹⁸ Gusto ni Jehova nga simbahon nato siya kauban sa ubang matuod nga Kristohanon. Ang Bibliya nag-ingon: “Hunahunaon nato ang usag usa aron magdinasigay sa pagpakitag gugma ug sa paghimog maayong mga buhat, nga dili pasagdan ang atong mga panagkatigom, sama sa nabatasan sa uban, apan dasigon ang usag usa, ilabina gyod samtang makita ninyo nga ang adlaw nagkaduol na.” (Hebreohanon 10:24, 25) Angay tang maningkamot nga makatambong sa tanang tigom. Kahigayonan ni sa pagdinasigay ug paglig-onay sa usag usa.

19. Unsay makatabang nato nga higugmaon ang mga igsoon?

¹⁹ Dihang motambong kag tigom, makakita kag maayong mga higala nga motabang nimo sa pagsimba kang Jehova. Makahimamat kag lainlaing igsoon nga, sama nimo, naningkamot sa pagsimba niya. Sama nimo, dili sila hingpit ug masayop. Kon masayop sila, pasayloa sila. (Basaha ang Colosas 3:13.) Pagpokus kanunay sa maayong kinaiya sa mga igsoon kay kini makatabang nimo nga higugmaon sila ug mas masuod kang Jehova.

20, 21. Unsa ang “tinuod nga kinabuhi”?

²⁰ Gusto ni Jehova nga ang tanan niyang higala makabaton  sa kinamaayohang kinabuhi. Ang Bibliya nagtudlo nga ang atong kinabuhi sa umaabot lahi kaayo sa atong kinabuhi karon.

²¹ Sa umaabot, mabuhi ta sa walay kataposan, dili lang 70 o 80 ka tuig. Makabaton tag “kinabuhing walay kataposan,” hingpit nga panglawas, kalinaw, ug kalipay sa nindot nga Paraiso. Kanay gitawag sa Bibliya nga “tinuod nga kinabuhi.” Si Jehova nagsaad nga ihatag kini kanato, pero kinahanglang himoon nato ang tanan aron “makapangupot pag-ayo” niini.—1 Timoteo 6:12, 19.

22. (a) Unsaon nato ‘pagpangupot pag-ayo sa tinuod nga kinabuhi’? (b) Nganong wala magdepende sa kaugalingon natong paningkamot ang pagdawat ug kinabuhing walay kataposan?

²² Unsaon nato ‘pagpangupot pag-ayo sa tinuod nga kinabuhi’? Kita kinahanglang “maghimog maayo” ug “mahimong dato sa maayong mga buhat.” (1 Timoteo 6:18) Sa ato pa, ipadapat nato ang atong nakat-onan sa Bibliya. Pero ang tinuod nga kinabuhi wala magdepende sa kaugalingon natong paningkamot. Bisag unsay atong himoon, dili kini makapahimo natong takos nga modawat sa kinabuhing walay kataposan. Libre ni nga gasa ni Jehova alang sa iyang matinumanong mga alagad, usa ka pananglitan sa iyang “dili hitupngang pagkamaayo.” (Roma 5:15) Gusto gyod sa atong langitnong Amahan nga hatagan ang iyang matinumanong mga alagad niini nga gasa.

23. Nganong kinahanglang mohimo kag hustong mga desisyon karon?

²³ Pangutan-a ang imong kaugalingon, ‘Gisimba ba nako ang Diyos sa paagi nga iyang giuyonan?’ Kon naa kay angayng usbon, usba dayon kini. Kon mosalig ta kang Jehova ug maningkamot nga mosunod niya, siya mahimo natong dangpanan. Panalipdan niya ang iyang matinumanong katawhan sa kataposang mga adlaw sa  daotang kalibotan ni Satanas. Ug segurohon ni Jehova nga makapuyo ta sa Paraiso hangtod sa hangtod, sama sa iyang gisaad. Oo, imong mabatonan ang tinuod nga kinabuhi kon mohimo kag hustong mga desisyon karon!