1, 2. Ni nkahe eyi turi kubasa kwiha oburinzi omuri obu bwire?

TECEREZA ori kutambura omu njura erimu omuyaga mwingi. Iguru ryayiragura, emirabyo yarabya kandi enkuba zatandika kuhinda. Enjura yatandika kugwa. Waronda ah’okwigama. Ka nikikushemeza washanga ogo mwanya guri murungi kandi gutarimu embeho!

² Turi omu mbera nk’eyo omuri obu bwire. Ensi nekizaho kuba mbi munonga. Nobasa kwebuza ngu: ‘Ni nkahe eyi ndi kubasa kwiha obuhungiro?’ Omuhandiki wa Zaaburi akahandika ngu: ‘Ndyagira Mukama nti: “Ni iwe buhungiro bwange, kandi orugo rwange orugumire, Ruhanga wange owu ndi kwesiga.”’ (Zaaburi 91:2) Mazima, erizoba Yehova nabasa kutuyamba omu bibuzo ebi twine, kandi aturaganisa ebirungi byingi omu biro eby’omu misho.

3. Ni bata oku turi kubasa kuhindura Yehova obuhungiro bwitu?

³ Ni bata oku Yehova ari kuturinda? Natukwasa kwehanganira ebizibu ebi twine, kandi ayine amani agari kukirira kimwe ag’omuntu wena ori kubasa kutukora kubi. N’obu ekintu kibi kiri kubasa kutuhikaho hati, nitwesigira kimwe ku Yehova arije kuboneza ebintu byona ebisisikire. Bibuli netugambira ngu: “Mwerindire omu kukunda kwa Ruhanga.” (Yuda 21) Tushemerire kuguma hihi ya Yehova twaba turi kwenda ngu atukwase twabugana ebizibu. Konka shi eki nitubasa kukikora tuta?

4, 5. Ni bata oku Yehova yatwerekire rukundo?

⁴ Kugira ngu tuhike hihi ya Yehova, tushemerire kuteketeka oku ari kutukunda. Tecereza aha bintu byona ebi  Yehova yatukorire. Akatuha ensi ebonire munonga kandi erimu ebihingwa n’enyamishwa ebiri kutushemeza munonga. Nambwenu akatuha ebyokurya birungi n’amizi g’okunywa. Yehova akatugambira izina ryeye n’emitwarize yeye mirungi, akoresize Bibuli. Ekiri kukira byona, akatwereka ku natukunda obu yayoherize Omwana weye Yesu omu nsi, owu ari kukunda munonga, ngu atufere. (Yohaana 3:16) Kandi eco kitambo nikituma twagira amasiko ag’omu biro eby’omu misho.

⁵ Yehova akataho Obukama bwa Mesia, ni bwo butegeki bw’omu iguru, oburi hihi kwihaho okubonabona kona. Obwo Bukama buryahindura ensi yona paradiso, kandi twena turyabaho ebiro byona twine obusinge n’okushemererwa. (Zaaburi 37:29) Obundi buryo obu Yehova yatwerekiremu rukundo yeye, ni okutwegesa oku turi kubasa kubaho kurungi erizoba. Nambwenu natweta ngu tumushabe, kandi natura ayetekatekire kuhurira eshara zitu. Yehova akereka abantu bona rukundo yeye.

6. Okayereka ota ku nosima Yehova ahabw’okukukunda?

⁶ Ni bata oku ori kubasa kusima Yehova ahabw’okukukunda? Mwereke ku nomusima ahabw’ebintu byona ebi yakukorire. Ekiri kushasha, ni oku abingi omuri obu bwire bari entasima. Oko ni ko byabire biri omu bwire bwa Yesu. Izoba rimwe, Yesu akakiza ababembe ikumi, konka omwe wenka ni we wagarukire kumusima. (Luka 17:12-17) N’itwe nitwenda kuba nk’ogo mushija owasimire Yesu. Nitwenda ngu tugume turi kusima Yehova burizoba.

7. Tushemerire kukunda Yehova biri kwingana ki?

⁷ Nambwenu tushemerire kwereka Yehova ku nitumukunda. Yesu akagambira abegi beye ku bashemerire kukunda Yehova n’omutima gwabo gona, n’amagara gabo  gona, n’obwenge bwabo bwona. (Shoma omuri Matayo 22:37.) Eco nikimanyisa ki?

8, 9. Ni bata oku turi kubasa kwereka Yehova ku nitumukunda?

⁸ Mbehi okugamba kusha ku nitukunda Yehova nikimara? Ingaha. Twaba turi kukunda Yehova n’omutima gwitu gona, n’amagara gitu gona, n’obwenge bwitu bwona, tushemerire kubyereka omu bikorwa. (Matayo 7:16-20) Bibuli neyegesa ge ku tushemerire korobera ebiragiro bya Ruhanga, twaba turi kumukunda. Eco shi kigumire? Tikigumire, ahabw’okuba ‘ebiragiro byeye tibirusya.’—Shoma omuri 1 Yohaana 5:3.

⁹ Twayorobera Yehova, nitushemererwa kandi tuhurira twamarwa. (Isaaya 48:17, 18) Konka shi ni enki ekirije kutukwasa kuguma hihi ya Yehova? Reka tukirebe.

10. Ahabw’enki oshemerire kugumizamu kwega ebya Yehova?

¹⁰ Ni bata oku wabire munywani wa Yehova? Okatandika kwega Bibuli, wamanya izina rya Yehova, rero mwatandika kugirana obunywani. Obwo bunywani ni nk’omuriro ogu oshemerire kuguma ori kwasya ngu gutarara. Nk’oku omuriro guri kwetenga enku kugira ngu gugume guri kwaka, n’iwe oshemerire kugumizamu kwega ebya Yehova kugira ngu mugume mwinine obunywani buhamire.—Enfumu 2:1-5.

11. Ni bata oku enyegesa za Bibuli ziri kubasa kukuhika aha mutima?

¹¹ Wagumizamu kwega Bibuli, noyija kumanya ebintu byingi kandi biryakuhika aha mutima. Yijuka oku abegi babiri ba Yesu bayehurire ku yabashobororire obuhanuzi bw’omuri Bibuli. Bakagamba ngu: ‘Emitima yitu tiyashashanuka obu yaba nagamba n’itwe omu muhanda, natushururira Ebyahandikirwe?’—Luka 24:32.

12, 13. (a) Ni enki ekiri kubasa kuhika ahari rukundo eyi twinire Ruhanga? (b) Tukakora ki ngu rukundo eyi twinire Yehova egumeho?

 ¹² Nk’oku abo begi ba Yesu bashoborokirwe Ebyahandikirwe bikabahika aha mutima, n’iwe nobasa kuba ari ko wayehurire ku watandikire kushoborocerwa Bibuli. Eco kikakukwasa kumanya Yehova n’okumukunda. Toshemerire kwikiriza ngu eyo rukundo ehore.—Matayo 24:12.

¹³ Obu wamazire kuba munywani wa Ruhanga, oshemerire kutamu amani kugira ngu obwo bunywani bukizeho kuhama. Oshemerire kugumizamu kwega ebya Yehova na Yesu kandi otekateka aha bi ori kwega n’oku wakubita omu bikorwa omu kubaho kwawe. (Yohaana 17:3) Waba noshoma ninga ori kweyegesa Bibuli, ogume oyebuze ngu: ‘Ebi nibinyegesa ki ahari Yehova Ruhanga? Ahabw’enki nshemerire kumukunda n’omutima gwange gona n’amagara gange gona?’—1 Timoseo 4:15.

14. Eshara ekatukwasa eta kuhamya rukundo eyi twinire Yehova?

 ¹⁴ Waba oyine omunywani, nogamba na we burizoba, kandi eco nikituma obunywani bwanyu bwaguma. Omuri obwo buryo, twaguma turi kugamba na Yehova omu kushaba, nikituma rukundo eyi tumwinire yakizaho kuguma. (Shoma omu 1 Batesalonika 5:17.) Eshara ni ekiconco c’omuhendo ecarugire ahari Tata ow’omu iguru. Tushemerire kugamba na we burizoba tubyihire aha mutima. (Zaaburi 62:8) Titushemerire kugarukagaruka omu mashara agu twakwasire omu mutwe, ahobwe tushemerire kugamba ebiri aha mutima. Mazima, twagumizamu kwega Bibuli kandi tukashaba tubyihire aha mutima, turyatuma rukundo eyi twinire Yehova yakizaho kuhama.

15, 16. Omurimo g’okuburira nogureba ota?

¹⁵ Twaba turi kwenda kuguma hihi ya Yehova, nambwenu tushemerire kugambira abandi ebi turi kwikiriza. Kugambira abandi ebya Yehova ni omugisha ogw’amani. (Luka 1:74) Kandi ni omurimo ogu Yesu yahire Abakristo bona ab’amazima. Twena tushemerire kukora omurimo g’okuburira obutumwa burungi bw’Obukama bwa Ruhanga. Mbehi watandikire kuburira?—Matayo 24:14; 28:19, 20.

¹⁶ Entumwa Paulo akaba nareba omurimo g’okuburira nk’og’omuhendo; akagamba ku ni “obutungi.” (2 Abakorinso 4:7) Kugambira abandi ebya Yehova n’ekigendererwa ceye ni go murimo mukuru oguri kukira eyindi yona eyi ori kubasa kukora. Ni omugisha ogu oyine kandi ebi ori kukora tari kubasa kubyebwa. (Abaheburaayo 6:10) Omurimo g’okuburira nigukwasa abu ori kuburira konka n’iwe nigukukwasa, ahabw’okuba nigutuma mwena mwakizaho kuhika hihi ya Yehova kandi mugira omasiko ag’okutunga amagara agatahwaho. (Shoma omu 1 Bakorinso 15:58.)  Mbwenu shi hariho ogundi murimo oguri kubasa kutuma watunga okushemererwa nk’okwe?

17. Ahabw’enki omurimo g’okuburira gushemerire kukorwa juba?

¹⁷ Omurimo g’okuburira gushemerire kukorwa juba. Tushemerire ‘kuburira ekigambo ca Ruhanga,’ kandi tushemerire ‘kuguma turi kukiburira.’ (2 Timoseo 4:2) Abantu nibenda kuhurira ebikwatirine n’Obukama bwa Ruhanga. Bibuli negira ngu: ‘Izoba rya [Yehova] erikuru riri hihi! Riri hihi kandi nirirahuka munonga!’ Emperu ‘tericerererwa!’ (Zefania 1:14; Habakuuki 2:3) Ni amazima, juba aha Yehova nayija kucwekereza ensi ya Sitaane eyasisikire. Konka eco kitakabireho, tushemerire kurabura abantu kugira ngu batoranemu kuhereza Yehova.

18. Ahabw’enki tushemerire kuramya Yehova turi hamwe n’Abakristo bagenzi bitu?

¹⁸ Yehova nayenda ngu tumuramye turi hamwe n’Abakristo bagenzi bitu. Bibuli negira ngu: ‘Ka tutekatece oku twakwezirikisana kukundana n’okukora ebirungi, tutari kureka kuteranira hamwe, nk’oku abamwe bagira, kureka tugumyane, kandi nk’oku muri kureba ngu ekiro eco kiri hihi n’okuhika, mweyongere kutwaza mutyo.’ (Abaheburaayo 10:24, 25) Tushemerire kutamu amani tukaza omu materaniro gona. Amateraniro nigatuma twagaruranamu amani kandi tugumyana.

19. Ni enki ekiri kubasa kutukwasa kukunda benetata na banyanyazi?

¹⁹ Ku orije omu materaniro, noyija kubona abanywani abarungi abaryakukwasa kuramya Yehova. Noyija kubugana benetata na banyanyazi abari kutamu amani omu kuramya Yehova nk’oku n’iwe ori kukikora. Na bo tibahikirire kandi nibashobya. Bakushobeza obe oyetegwire kubasasira. (Shoma omu Bakolosai 3:13.) Ogume ote omutima aha mitwarize mirungi eyi benetata na banyanyazi bine, eco nikija kukukwasa kubakunda n’okuhika hihi ya Yehova.

20, 21. “Amagara aga buzima” ni enki?

²⁰ Yehova nayenda ngu banywani beye bagire amagara marungi. Bibuli netwegesa ku amagara ag’omu biro eby’omu misho gariba gari marungi kukira aga hati.

²¹ Omu biro eby’omu misho, nitwija kubaho ebiro byona, etari emyaka 70 ninga 80 kusha. Nitwija kubaho omuri paradiso ndungi twine “amagara agatahwaho,” tuhikirire, twine obusinge n’amashemererwa. Eco ni co Bibuli eri kweta “amagara aga buzima.” Yehova naturaganisa kutuha amagara aga buzima, konka n’itwe tushemerire kukora cona ekiri kubasika kugira ngu ‘tuhamire kimwe’ ahari go.—1 Timoseo 6:12, 19.

22. (a) Ni bata oku ori kubasa ‘kuhamira kimwe aha magara agatahwaho?’ (b) Ahabw’enki tutari kubasa kugura amagara agatahwaho?

²² Tukakora ki ngu ‘tuhamire kimwe aha magara agatahwaho’? Tushemerire ‘kukora ebirungi’ kandi ‘tuba abatungi’ omu mirimo emirungi. (1 Timoseo 6:18) Eco nikimanyisa ku tushemerire kuta omu bikorwa ebi turi kwega omuri Bibuli. Konka, tituritunga amagara aga buzima ahabw’amani gitu. Tituri kubasa kugura amagara agatahwaho. Ni ekiconco eki Yehova ari kuha abahereza beye ab’abesigwa, kandi ni ‘ekiconco c’embabazi.’ (Abarooma 5:15) Mazima, Tata ow’omu iguru nayenda kuha eco kiconco abahereza beye ab’abesigwa.

23. Ahabw’enki oshemerire kusharamu kurungi hati?

²³ Yebuze ngu: ‘Mbehi nindamya Ruhanga omu buryo obu ari kwikiriza?’ Wareba oshemerire kugira ebi wahindura, ohike nokikora bucari kare. Twayesiga Yehova kandi tukakora eki turi kubasa ngu tumworobere, na we nayija kuba obuhungiro bwitu. Aryagumizamu kurinda abahereza beye ab’abesigwa omuri ebi biro eby’aha muheru  gw’egi nsi ya Sitaane eyasisikire. Bwanyima, Yehova aryatuta omuri paradiso tuturemu ebiro byona, nk’oku yaturaganisize. Mazima, ku orasharemu kurungi hati, noyja kutunga amagara aga buzima!