1, 2. Tu hunah buk nading mun koi-ah mu ding ihi hiam?

HUIHPI nun ni-in inn pua-ah lam a pai-in kingaihsun in. Khim hong zingin khuaphelep hong taangin van hong ging a, tua zawh a sawt loin guah hong zu ziahziah hi. Kibuk nading mun na zon leh a tawpna-ah a lungmuan huai, a keuna mun na muh ciang na lungnop dan ding!

² Tu huna i nuntakna zong tua dan pian mah ahi hi. Leitung thute hong sia semsem hi. Tua ahih manin ‘Kibuk nading mun koi-ah mu ding ka hi hiam?’ ci-in theinuam ding hi teh. Lai Siangtho sunga Late atpa in: “TOPA tungah, ‘Ka bukna le ka munkip muanhuai, ka muan ka Pasian na hi hi,’ ” na ci hi. (Late 91:2) Hi mah hi, Jehovah in tu lai taka i tuak buainate pan hong noptuamsak thei a, tua ciang mailam ading a hoih mahmah lametna zong hong pia hi.

3. Jehovah tung i buk theih nading bang i sep kul a hiam?

³ Jehovah in koi bangin hong kem thei ding a hiam? Ama’n i buainate khempeuh i siansak zawh nading hong huh thei a, hong bawlsia nuam khathei mi kuamapeuh sangin amah thahat zaw hi. Tu-in zong i tungah thusia lasia hong piang lezong, mai lamah Jehovah in tua siatnate hong puahphat sakkik ding hi cih i muang thei hi. Lai Siangtho in: “Pasian’ itna sungah na kip un,” ci-in hong hanthawn hi. (Jude 21) Haksatna i tuak ciang ama huhna i ngah nadingin Jehovah tawh kinai taka i om ding kisam hi. Tua pen en’ koici sep theih ding ihi hiam?

4, 5. Jehovah in ei tungah ama itna koi bangin hong lakkhia a hiam?

⁴ Jehovah tawh kinai taka i om nop leh ama’n ei bangzah takin hong it hiam cih i theih ding kisam hi. Jehovah  in ei ading hong bawlsak na khempeuh ngaihsun in. Ama’n a ithuai ganhingte le singkungte tawh kidim a hoih mahmah leitung hong pia hi. Tua banah i nek dingin a lim mahmah an le i dawn ding tui siangthote zong hong pia hi. Jehovah in Lai Siangtho tungtawnin ama min le ama hoihnate hong hilh hi. Tua teng khempeuh sangin Pasian in a it mahmah a Tapa Jesuh ii nuntakna ei ading a piakhia dingin hih leitungah a hong sawl ciang ei tungah ama hong itna a hong lak hi. (Johan 3:16) Tua banah tua kipiakkhiatna hangin mai lamah a manpha mahmah lametna i nei hi.

⁵ Jehovah in Messiah Kumpi, vantung ki-ukna hong vaihawmsak a, gentheih haksatna khempeuh a sawt loin beisiangsak tading hi. Tua Kumpi in leitung pen paradais-in hong bawl ding a, tua takah a nungta kuamapeuh kilem takin le lungnuam takin nungta suak ding uh hi. (Late 37:29) Jehovah in ei hong itna hong lahkhiatna adang khat pen tu hun nangawnin a hoih penin i nuntak theih nading thu hong hilhna ahi hi. Ama kiang thu i nget ding zong hong zawn a, i thungetnate a ngai dingin kigingsa-in om den hi. Jehovah in ei mimal khat ciat tungah ama itna kician takin hong lak hi.

6. Jehovah’ itna nangh koi bangin thukkik ding na hiam?

⁶ Jehovah’ itna nangh koi bangin thukkik ding na hiam? Nang ading hong bawlsak na khempeuh tungah na lungdamna ama tung na lak in. A lungnop lohhuai khatah, tu huna mi a tamzaw in lungdam theihna nei lo uh hi. Jesuh leitungah a om lai-in tua bang dan mah thu na piang hi. Hun khat lai-in, Jesuh in miphak sawmte na damsak a, ahih hang mi khat bek in lungdamna na ko hi. (Luka 17:12-17) Jesuh kiang lungdam ing, a ci tua pa tawh i kibang nuam hi. Jehovah tungah a tawntungin i lungdam nuam hi.

7. Bangzah dongin Jehovah i it ding kisam a hiam?

⁷ En’ zong Jehovah i itna i lah ding kisam hi. Jesuh in a  nungzuite kiang na lungsim khempeuh uh, na nuntakna khempeuh uh, le na pilna khempeuh uh tawh Jehovah na it ding uh hi ci-in na gen hi. (Matthai 22:37 Sim in.) Tua pen bang a cihnopna hiam?

8, 9. Jehovah i itna koici lak ding ihi hiam?

⁸ Jehovah it ing, cih bek tawh a kicing ding hiam? Kicing lo hi. I lungsim, i nuntakna le i pilna khempeuh tawh Jehovah it ihih leh amah i itna pen i gamtatna tawh i lah ding kisam hi. (Matthai 7:16-20) Pasian i it takpi leh ama thupiakte i man ding kul hi ci-in Lai Siangtho in kician takin hong hilh hi. Tua pen haksa-in na um hiam? Haksa lo ding hi, ba’hang hiam cih leh Jehovah’ “thupiakte zuih ding a haksa lua hi lo” ahih man ahi hi.—1 Johan 5:3 Sim in.

⁹ Jehovah thu i man ciang i nuntakna-ah lungnopna le lungkimna i nei hi. (Isaiah 48:17, 18) Ahih hang Jehovah tawh kinai taka i om theih nading bang in hong huh ding a hiam? Tu’n en ni.

10. Jehovah thu na sin suak ding ba’hang kisam a hiam?

¹⁰ Jehovah’ lawm koi bangin hong suak na hiam? Lai Siangtho na sinna pan Jehovah nong thei semsem a, na kilawmtakna uh zong hong khangto semsem hi. Tua kilawmtakna pen na kuansuak sak den ding mei tawh kibang hi. Mei a kuan suak nading singkhuah a kisap mah bangin Jehovah tawh na kilawmtakna a kip suak nading ama thu na sin suak ding kisam hi.—Paunak 2:1-5.

11. Lai Siangtho thuhilhnate in koi bangin phattuamna hong pia thei a hiam?

¹¹ Lai Siangtho na sin suak leh na lungsim hong sukha ding thute mu ding hi teh. Jesuh in a nungzuite nih kiang Lai Siangtho genkholhnate a khiatna a hilh khit ciang a nungzuite lungsim a sukkhakna na ngaihsun in. Amau: “Lampi ah hong hopih a Lai Siangtho khiatna khawng a  hong genlai in i lungsim hong sukha mahmah hi,” na ci uh hi.—Luka 24:32, ZSV.

12, 13. (a) Pasian i itna bang ci thei ahi hiam? (b) Jehovah i itna a hin suak nading bang i sep ding kisam a hiam?

¹² Nungzuite in Lai Siangtho a khiatna a tel uh ciang a lungsim uh a sukkhak mah bangin nangh zong Lai Siangtho thu nong tel ciang na lungsim hong sukha ding hi. Tua in Jehovah na theih nading le amah na it theih nading hong huh ding hi. Tua itna a kiam ding ut lo ding hi teh.—Matthai 24:12.

¹³ Pasian’ lawm na suak ciang amah tawh na kilawmtakna a kip suak nading hanciam taka na sep ding kisam hi. Amah le Jesuh thu na sin suak loh phamawh a, tua khit teh na sin thute le tua thute koici nuntakpih ding cih na ngaihsut ding zong kisam hi. (Johan 17:3) Lai Siangtho sim ahih kei leh na sin ciang: ‘Hih thu in Jehovah Pasian tawh kisai kei bang hong hilh a hiam? Ka lungsim le ka nuntakna khempeuh tawh amah ka it ding ba’hang kisam a hiam?’ ci-in na kidong in.—1 Timoti 4:15.

14. Jehovah i itna a kip nading thungetna in koi bangin hong huh thei ding a hiam?

 ¹⁴ Lawm hoih khat na neih ciang amah tawh manmanin na kiho uh a, tua na kihona in na kilawmtakna uh hong kipsak hi. Tua mah bangin Jehovah kiang thungetna tawh manmana i kiho leh, tua in amah tawh i ki-itna hong kipsak ding hi. (1 Thesalonika 5:17 Sim in.) Thungetna pen vantunga i Pa hong piak a manpha mahmah letsong khat ahi hi. A tawntungin i lungsim panin i hopih ding kisam hi. (Late 62:8) Lotngahsa thute lawh kikkik a thunget ding hi lo hi, ahih hang i thunget ciang man takin i gen ding kisam hi. Hi mah hi, Lai Siangtho sin suak a, i lungsim pan thu i nget suaka leh Jehovah i itna hong kip ding hi.

15, 16. Tangko nasep pen bangci muh na hiam?

¹⁵ Jehovah tawh kinai taka i om nop leh i upna tawh kisai midangte kiang i gen ding zong kisam hi. Jehovah thu midangte kiang i genna pen a manpha mahmah nasep ahi hi. (Luka 1:74) Tua banah hih nasep pen Jesuh in Khristian mante khempeuh kiang a piak tavuan ahi hi. Pasian’ Gam a lungdamhuai thu ei mimal khat ciat in i tangko loh phamawh hi. Tua bangin tangko ta na hiam?—Matthai 24:14; 28:19, 20.

¹⁶ Sawltak Paul in tangko nasep pen a thupi mahmahin ngaihsun hi; ama’n tua pen “na manpha” na ci hi. (2 Korin 4:7) Jehovah thu le ama ngimna midangte kiang na gen pen na sep theih na khempeuh lakpan a thupi pen nasep ahi hi. Tua pen Jehovah Pasian na na sep theih nading lampi hi-in, ama adingin na sepsak pen manpha a sa hi. (Hebru 6:10) Tangko nasepna in nang le na thugen a ngaite hamphatna hong ngahsak khawm ding hi. Ahang pen midangte na huh kawmin Jehovah tawh na kinai zaw ding a, tawntung nuntakna zong ngah ding na hih man ahi hi. (1 Korin 15:58 Sim in.) Hih pen nasep hong kipia khempeuh lakpan na lung hong kimsak pen nasep ahi ding hiam?

17. Tangko nasep pen ba’hang thupi mahmah a hiam?

 ¹⁷ Tangko nasep pen nak thupi mahmah ta hi. “Pasian’ thu” i tangko ding kisam a, thupi takin i “kin ngaihsut” ding zong kisam hi. (2 Timoti 4:2) Pasian Gam thu mite in a zak ding uh kisam hi. Lai Siangtho in: “TOPA’ ni hong naita a, nai mahmahin hong tung hathat hi!” ci hi. Hun bei ding “zekai lua nawn lo ding hi!” (Zefaniah 1:14; Habakkuk 2:3) Man mah hi, a sawt loin Jehovah in siatna tawh a kidim Satan’ leitung susia tading hi. Hih thu a pian ma, mite thu i hilh ding kisam hi, tua hileh bek amau Jehovah Pasian na sep ding teel thei ding uh hi.

18. Khristian man adangte tawh ba’hang Jehovah bia khawm ihi hiam?

¹⁸ Jehovah in Khristian mante tawh amah i biak khop ding deih hi. Lai Siangtho in: “Khatlekhat ki-itin a hoih nate i sep nadingin kihanthawn ciat ni. Mi pawlkhatte in kikhop a pelh bang hi loin, eite in kikhop khawmnate pelh loin om ni. Topa’ hong pai ding Ni hong naina thu thei ihih manin khatlekhat kihanthawn semsemzaw ni,” na ci hi. (Hebru 10:24, 25) Kikhop hun khempeuhah i kihel theih nading ihih theih zahin i hanciam ding kisam hi. Kikhopna-ah khatlekhat tha kipia a, kihanthot theihna hunpha i ngah ding hi.

19. Khristian unaunu le unaupate i it nading bangin hong huh thei ding a hiam?

¹⁹ Na kikhop ciang Jehovah Pasian na biak theih nadinga hong huh ding lawm hoihte tawh kimu ding hi teh. Unaunu le unaupa mi tuamtuam tawh na kimu ding a, nang mah bangin ahih theih zahun Pasian biak ding a hamciam mite ahi uh hi. Tua khit teh nang mah bangin amau zong a kicingtaak lo mi hi uh a, zong khial thei uh hi. Tua bangin a sep khak uh ciang na maisak theih nading na kigingkhol in. (Kolose 3:13 Sim in.) A tawntungin nang ii Khristian unaunu le unaupate ii hoihnate na masuan zaw in, tua banga na sepna in amau na it theih nading hong huh ding a, Jehovah tawh zong na kinai zaw ding hi.

20, 21. ‘Nuntakna takpi’ a cih in bang a hiam?

²⁰ Jehovah in ama lawmte khempeuh a hoih penin a nuntak ding uh a deih hi. Lai Siangtho in tu huna i nuntakna le mai lama i ngah ding nuntakna pen kilamdang mahmah ding hi na ci hi.

²¹ Mai lamah a tawntungin i nungta ding a, kum 70 kum 80 bek hi nawn lo ding hi. A etlawm leitung paradais-ah “nuntak tawntungna” pen a cingtaak cidamna, kilemna le lungnopna tawh kidimin nuam i sa mahmah ding hi. Tua ahih manin Lai Siangtho in ‘nuntakna takpi’ a cihna ahang ahi hi. Jehovah in tua nuntakna takpi hong pia ding hi’ng ci-in kamciam hong pia hi, ahih hang tua pen i “lenkip” zawh nading tu hun mahin ihih theih khempeuh tawh i hanciam ding kisam hi.—1 Timoti 6:12, 19.

22. (a) En’ koi bangin ‘nuntak tawntungna lenkip’ thei ding ihi hiam? (b) Tawntung nuntakna ba’hang lei zo lo ihi hiam?

²² En’ koi bangin ‘nuntak tawntungna lenkip’ thei ding ihi hiam? En’ “a hoih nate semin, gamtat pha” tawh i gamtat ding kul hi. (1 Timoti 6:18) A cihnopna in Lai Siangtho pan i sin thute i nuntakpih ding a cihna ahi hi. Ahi zongin nuntakna takpi i ngah nading ei ii hanciam zawh thu tungah kinga lo hi. En’ cikmah hunin tawntung nuntakna i lei zo kei ding hi. Tua pen Jehovah in a citak ama nasemte ading a khonga a piak letsong hi a, ama “hehpihna” a lahna khat ahi hi. (Rom 5:15) Tua letsong pen vantunga i Pa in a citak ama nasemte pia nuam takpi hi.

23. Tu hun mahin thuman na teel ding ba’hang thupi a hiam?

²³ ‘Pasian’ deihna tawh kituakin amah ka bia hiam?’ ci-in na kidong in. Kikhel ding pawlkhat a omlam na kitheih leh na kikhel pah a kul hi. Jehovah tung kinga-in ama thu i man nading i sep theih khempeuh sem le’ng Jehovah pen i bukna hong hi ding hi. Siatna tawh a kidim hih Satan leitung a bei ding hun sungah Pasian in a citak  ama mite kem suak ding hi. Tua khit ciang Jehovah in a kamciamsa mah bangin Paradais-ah a tawntunga i nuntak ding hong kiciansak ding hi. Man mah hi, tu hun mahin thuman na teel leh nuntakna takpi na ngah ding hi!