1, 2. Bi, an be se ka dogoyɔrɔ sɔrɔ min?

MIIRI k’a filɛ, i be tagamana sanfɔɲɔba jukɔrɔ. Saan finna tititi. Saan be bari ka mɛnɛmɛnɛ, sanpɛrɛnkan be bɔ ani sanjiba b’a daminɛ ka ben. I be teliya ka dogoyɔrɔ ɲini. A laban, i ye dogoyɔrɔ ɲuman sɔrɔ. O ye lafiya ye dɛ!

² Bi, koow cogoya be komi an be sanfɔɲɔba jukɔrɔ. Duniɲa ka koow be juguyara le ka taga. N’a sɔrɔ i b’i yɛrɛ ɲininga ko: “Ne be se ka dogoyɔrɔ sɔrɔ min?” Bibulu sɛbɛbaga dɔ y’a fɔ ko: “Ne kɔni be Masaba [Jehova] koo fɔ ko: ‘N dogoyɔrɔ, n dogoyɔrɔ barikaman lo. Ne ka Ala lo, ne jigi be min kan.’ ” (Zaburuw 91:2). Jehova be se k’an dɛmɛ k’an ka gwɛlɛyaw ɲɛnabɔ sisan yɛrɛ ani a be jigiya ɲuman di an ma siniɲasigi koo la.

3. An be se ka Jehova kɛ an dogoyɔrɔ ye cogo di?

³ An be se ka Jehova kɛ an dogoyɔrɔ ye cogo di? A be se k’an dɛmɛ ka gwɛlɛya sifa bɛɛ ɲɛnabɔ. Mɔgɔ o mɔgɔ b’a ɲini ka koo jugu kɛ an na, Jehova fanga ka bɔn ka tɛmɛ o tigi ta kan fɔɔ ka taga ka na. Hali ni koo jugu y’an sɔrɔ sisan, an lanin b’a la ko Jehova bena o lalaga. Bibulu b’an jija ko: “Aw ka to Ala ka kanuya la.” (Zude 21). N’an b’a fɛ ka Jehova ka dɛmɛ sɔrɔ gwɛlɛya tuma na, fɔɔ an ka to a kɔrɔ. Nka, an be se k’o kɛ cogo di?

4, 5. Jehova y’a ka kanuya yira an na cogo di?

⁴ N’an b’a fɛ ka to Jehova kɔrɔ, fɔɔ an ka la a la ko a b’an kanu kosɔbɛ. Miiri k’a filɛ a ye min bɛɛ kɛ an ye. A ye dugukolo cɛɲumanba di an ma ani k’a fa yiriw ani bɛgɛn cɛɲumanbaw la. A ye dumunifɛn diimanw ani jii saniyanin di an ma fana. A y’a tɔgɔ n’a jogo kabakomanw yira an na Bibulu kɔnɔ. Min yɛrɛ kɔrɔtanin lo, o ye ko a y’a Dencɛ kanulen Yezu ci ka na dugukolo kan, a y’a niin di an kosɔn. O la, a y’a yira ko a b’an kanu (Zan 3:16). O saraka kosɔn, an be ni jigiya ɲuman ye siniɲasigi koo la.

⁵ Jehova ye gofɛrɛnɛman dɔ sigi sankolo la. O ye Masiya ka Masaya ye. Yanni dɔɔni, o Masaya bena tɔɔrɔw bɛɛ ban ani ka dugukolo kɛ alijɛnɛ ye. Bɛɛ bena kɛ hɛɛrɛ ni ninsɔndiya la fɔɔ abada (Zaburuw 37:29). Jehova y’a yira cogoya wɛrɛ la ko a b’an kanu. A y’a yira an na an be se ka ɲɛnamaya kɛ cogo fisaman min na sisan yɛrɛ. A fana b’a ɲini an fɛ an k’ale deli ani a labilanin lo k’o deliliw lamɛn tuma bɛɛ. Tiɲɛn na, Jehova y’a yira ka gwɛ ko a b’an kelen kelen bɛɛ kanu.

6. I be se k’a yira cogo di ko i sɔnna Jehova ka kanuya la?

⁶ I be se k’a yira cogo di ko i sɔnna Jehova ka kanuya la? A ye koo minw bɛɛ kɛ i ye, a yira ko i b’a waleɲuman lɔn o kosɔn. A fɔ man di, nka mɔgɔ caaman ye waleɲumanlɔnbaliw ye bi. O kelen tun lo Yezu ka wagati la. Loon dɔ, Yezu ye kunatɔcɛ tan kɛnɛya. Nka, u la kelen dɔrɔn lo y’a fo (Luka 17:12-17). An b’a fɛ k’ale lo ladegi. An ka ɲi ka Jehova waleɲuman lɔn tuma bɛɛ.

7. An ka ɲi ka Jehova kanu cogo di?

 ⁷ An ka ɲi k’a yira fana ko an be Jehova kanu. Yezu y’a fɔ a ka kalandenw ye ko u ka kan ka Jehova kanu n’u dusu bɛɛ ye, n’u niin bɛɛ ye ani n’u hakili bɛɛ ye (Matiyo 22:37 kalan). O kɔrɔ ko di do?

8, 9. An be se k’a yira Jehova la cogo di ko an b’a kanu?

⁸ K’a fɔ ko an be Jehova kanu, yala o dɔrɔn be bɔri kɛ wa? Ayi, o dɔrɔn tɛ bɔri kɛ. An ka kɛwalew lo bena a yira n’an be Jehova kanu n’an dusu, an niin ani an hakili bɛɛ ye (Matiyo 7:16-20). Bibulu b’a fɔ ka gwɛ ko n’an be Ala kanu, an bena a ka sariyaw labato. Yala o ka gwɛlɛ wa? Ayi. Bibulu b’a fɔ ko Jehova “ka ciiw batoli fana man gwɛlɛ.”—1 Zan 5:3 kalan.

⁹ N’an be mɛnni kɛ Jehova fɛ, an bena kɛ hɛɛrɛ la ani an bena wasa (Ezayi 48:17, 18). Nka mun lo bena an dɛmɛ an ka to Jehova kɔrɔ? An k’o lajɛ.

10. Mun na i ka ɲi ka to ka Jehova lɔn ka ɲɛ?

¹⁰ I kɛra Jehova teri ye cogo di? Bibulukalan y’i dɛmɛ ka Jehova lɔn ka ɲɛ ani ka teriya kɛ n’a ye. O teriya be i n’a fɔ tasuma, i t’a fɛ min ka faga. Tasuma mako be lɔgɔ la walisa a kana faga. O cogo kelen na, to ka dɔ fara i ka lɔnniya kan Jehova koo la. O la, dɔ bena fara aw ka teriya barika kan.—Talenw 2:1-5.

11. Bibulu ka kalanw bena mun lo kɛ i la?

¹¹ N’i tora ka bibulukalan kɛ, i bena koo caaman lɔn minw bena i dusu sɔrɔ. Tuma min na Yezu tun be Bibulu ka kiraya kuma dɔw ɲɛfɔra a ka kalanden fila dɔw ye, a filɛ o ye min kɛ u la. U y’a fɔ ko: “A kumana an fɛ sira la ka Kitabuw kɔrɔw yira an na tuma min  na, an dusukun ɲagalilenba tun tɛ wa?”—Luka 24:32, ABM.

12, 13. a) Ala kanuya min be an na, mun lo be se k’o sɔrɔ? b) An be se ka mun lo kɛ walisa an ni Ala ka teriya barika kana dɔgɔya?

¹² Yezu ka kalandenw ye Ala ka Kuma faamu minkɛ, u dusukun ɲagalila. N’a sɔrɔ e fana dusukun ɲagalila tuma min na i y’a daminɛ ka Bibulu faamu. O ye i dɛmɛ ka Jehova lɔn ani k’a kanu. I t’a fɛ o kanuya ka sumaya.—Matiyo 24:12.

¹³ N’i kɛra Ala teri ye, to k’i jija walisa aw ka teriya barika kana dɔgɔya. To k’a ɲini ka Ala ni Yezu lɔn ka ɲɛ. I be min kalanna, miiri o la ani a filɛ i be se k’o sira tagama cogo min na (Zan 17:3). Bibulu kalantɔ wala a sɛgɛsɛgɛtɔ, i yɛrɛ ɲininga ko: “O be mun lo yira ne la Jehova Ala koo la? Mun na n’ ka kan k’a kanu ni n’ dusukun bɛɛ ani n’ niin bɛɛ ye?”—1 Timote 4:15.

14. Delili be se k’a to cogo di Jehova koo be diya an ye kosɔbɛ?

 ¹⁴ Ni teri ɲuman b’i fɛ ani aw be to ka kuma ɲɔgɔn fɛ, aw ka teriya bena to ka barika sɔrɔ. O cogo kelen na, n’an be to ka Jehova deli, a koo bena to ka diya an ye kosɔbɛ (1 Tesalonikaw 5:17 kalan). Delili ye an sankolola Faa ka nilifɛnba ye. O kama, an ka ɲi k’a deli n’an dusukun bɛɛ ye tuma bɛɛ (Zaburuw 62:9). An man kan ka an ka deliliw degi an kuun na ani ka to ka segi kuma kelen kan. Nka, an ka ɲi ka delili kɛ ni kɔnɔgwɛ ye. N’an tora ka Bibulu kalan ani ka Jehova deli n’an dusukun bɛɛ ye, Jehova koo bena to ka diya an ye kosɔbɛ.

15, 16. E be waajuli baara jati cogo di?

¹⁵ N’an b’a fɛ ka to Jehova kɔrɔ, an ka ɲi k’an ka limaniya kofɔ mɔgɔw ye. Ka Jehova kofɔ mɔgɔw ye, o ye nɛɛmaba yɛrɛ lo ye! (Luka 1:74). O ye kunkanbaara ye, Yezu ye min kalifa kerecɛn sɔbɛw bɛɛ ma. An kelen kelen bɛɛ ka kan ka Ala ka Masaya kibaro diiman fɔ mɔgɔw ye. Yala i b’o lo kɛ wa?—Matiyo 24:14; 28:19, 20.

¹⁶ Ciden Pol tun be waajuli baara jati fɛɛnba ye. A y’a fɔ ko o ye “nafoloba” lo ye (2 Korɛntikaw 4:7, ABM). Ka Jehova n’a sagonata kofɔ mɔgɔw ye, baara si tɛ yen min nafa sera o ma. O ye Jehova batocogo dɔ lo ye. I be min kɛ o baara la, o ka di Jehova ye (Eburuw 6:10). N’i be waajuli kɛ, o be se ka e n’i lamɛnbagaw nafa. Cogo di do? O bena a to aw k’aw magwɛrɛ Jehova la ani ka ɲɛnamaya banbali sɔrɔ  (1 Korɛntikaw 15:58 kalan). Yala baara wɛrɛ be yen min be se k’i wasa ka tɛmɛ o kan wa?

17. Mun na waajuli baara ye kɔrɔtɔko ye?

¹⁷ Waajuli baara ye kɔrɔtɔko lo ye. An ka ɲi “ka Ala ka kuma fɔ” ani k’an “jija a la.” (2 Timote 4:2, ABM). Mɔgɔw mako b’a la ka Ala ka Masaya koo mɛn. Bibulu b’a fɔ ko: “A surunyana, Masaba ka lonba surunyana! A be nana ni karama ye!” Duniɲa laban loon “tɛna to kɔ.” (Sofoni 1:14; Abakuki 2:3, NW). Yanni dɔɔni, Jehova bena Sutana ka duniɲa jugu nin halaki. Sanni o loon ka se, an ka kan ka mɔgɔw lasɔmi walisa u k’a latigɛ ka Jehova bato.

18. Mun na an ka ɲi ka jɛn ni kerecɛn sɔbɛw ye ka Jehova bato?

¹⁸ Jehova b’a fɛ an ka jɛn ni kerecɛn sɔbɛw ye k’ale bato. Bibulu b’a fɔ ko: “An ka jija ka ɲɔgɔn dɛmɛ ka kanuya sira taama, ka koɲuman kɛ. An kana ban ka taga an ka ɲɔgɔnlajɛnyɔrɔ la, i n’a fɔ dɔw be to k’a kɛ cogo min na. Nga an ka ɲɔgɔn jaa gwɛlɛya, bari aw yɛrɛ ɲaa b’a la ko Matigi ka loon surunyana ka ban.” (Eburuw 10:24, 25). An ka ɲi k’an seko bɛɛ kɛ ka kɛ lajɛnw bɛɛ la. Lajɛnw na, an be sababu sɔrɔ ka ɲɔgɔn jija ani ka ɲɔgɔn barika bonya.

19. Mun lo bena an dɛmɛ k’an kerecɛnɲɔgɔnw kanu?

¹⁹ N’i be taga lajɛnw na, i bena teri sɔbɛw sɔrɔ minw bena i dɛmɛ ka Jehova bato. I bena balimaw sɔrɔ yen minw b’u seko kɛra ka Jehova bato i ko ele b’a kɛra cogo min na. I ko ele, u fana ye mɔgɔ dafabaliw ye ani u be fili. N’u filila, i ka sɔn ka yafa u ma (Kɔlɔsikaw 3:13 kalan). U ka jogo ɲumanw lo filɛ tuma bɛɛ. N’i y’o kɛ, o bena i dɛmɛ k’u kanu ani k’i magwɛrɛ kosɔbɛ Jehova la.

20, 21. ‘Ɲɛnamaya sɔbɛ’ ye mun lo ye?

²⁰ Jehova b’a fɛ a teriw bɛɛ ka ɲɛnamaya fisaman sɔrɔ. Bibulu b’a fɔ ko an bena ɲɛnamaya min kɛ sini, o ni bi ta tɛ kelen ye hali dɔɔni.

²¹ An ka ɲɛnamaya tɛna dan saan 70 wala saan 80 dɔrɔn ma! Nka, an bena “ɲɛnamaya banbali” kɛ alijɛnɛ cɛɲumanba kɔnɔ, kɛnɛya dafanin na ani hɛɛrɛ ni ninsɔndiya la. Bibulu b’o lo weele ko ‘ɲɛnamaya sɔbɛ.’ Jehova y’a daa di ko a bena o ɲɛnamaya ɲɔgɔn lo di an ma. Nka, fɔɔ an k’an seko bɛɛ kɛ sisan walisa k’o sɔrɔ.—1 Timote 6:12, 19, ABM.

22. a) An be se ka ‘ɲɛnamaya sɔbɛ sɔrɔ’ cogo di? b) Mun na an tɛ se ka ɲɛnamaya banbali sɔrɔ an yɛrɛ ma?

²² An be se ka ‘ɲɛnamaya sɔbɛ sɔrɔ’ cogo di? An ka kan ka “koɲuman kɛ” (1 Timote 6:18). O kɔrɔ ko an ye min kalan Bibulu kɔnɔ, an ka kan k’o sira tagama. Nka, an be jijali minw kɛ, o lo tɛna a to an be ɲɛnamaya sɔbɛ sɔrɔ. An tɛ se ka ɲɛnamaya banbali sɔrɔ an yɛrɛ ma abada. O ye Jehova ka nilifɛn ye. A b’o di a sagokɛla kantigiw ma a ka “nɛɛma” kosɔn (Ɔrɔmukaw 5:15). An sankolola Faa b’a fɛ sɔbɛ la k’o nilifɛn di a sagokɛla kantigiw ma.

23. Mun na i ka kan ka desizɔn ɲumanw ta sisan?

²³ I yɛrɛ ɲininga ko: “Yala ne be Ala bato i ko a b’a fɛ cogo min na wa?” N’i y’a ye ko i ka ɲi ka yɛlɛmani dɔw kɛ, sin k’u kɛ kelen. N’an y’an jigi la Jehova kan ani an y’an seko bɛɛ kɛ ka mɛnni kɛ a fɛ, a bena kɛ dogoyɔrɔ sɔbɛ ye an fɛ. A bena a sagokɛla kantigiw tanga Sutana ka duniɲa juguman nin laban loonw na. O kɔ, a bena labɛnw kɛ walisa an ka se ka  ɲɛnamaya kɛ fɔɔ abada i ko a tun y’a fɔ cogo min na. Tiɲɛn na, n’i ye desizɔn ɲumanw ta sisan, i bena se ka ɲɛnamaya sɔbɛ sɔrɔ!