1, 2. Henfa na yebotum enya ahobambɔ ndɛ?

FA NO dɛ enam na ehum hyɛɛ ase dɛ orutu. Wimu muna kusuww, enyinam tsetsew na asenaman hyɛ ase bobɔ mu. Afei, nsu hyɛ ase tɔ na ehwehwɛ beebi kosuma. Ewiei koraa no sɛ inya beebi a oye kosuma a, hwɛ ahom ara a ibogu!

² Yɛwɔ tsebea a ɔtse dɛm mu ndɛ. Sɛɛ ara na wiadze nsɛm resɛɛ. Ibia ibosusu dɛ, ‘Henfa na mubotum enya ahobambɔ?’ Ɔdwontofo bi a ɔwɔ Bible no mu kãa dɛ: “Mebɛkã wɔ Ewuradze ho dɛ, Ɔno nye mo guandɔbea na m’akoban; me Nyankopɔn, ɔno no mu na medze moho twer no.” (Ndwom 91:2) Ampaara, Jehovah botum eyi hɛn efi hɛn haw mu ndɛ na ɔabɔ hɛn anohoba dɛ, ɔbɛma hɛn daakye ho enyidado a ɔyɛ enyigye.

3. Yebesi dɛn dze Jehovah ayɛ hɛn guandɔbea?

³ Jehovah besi dɛn abɔ hɛn ho ban? Obotum aboa hɛn ma yeedzi hɛn haw biara ho dwuma. Afei so, ɔwɔ tum sen nyimpa biara a ibia ɔbɔbɔ mbɔdzen dɛ obepira hɛn no. Kaansa adze bɔn bi to hɛn ndɛ mpo a, yebotum enya awerɛhyɛmu dɛ, daakye obesiesie ɔhaw no. Bible no hyɛ hɛn nkuran dɛ: “Hom nsie homho wɔ Nyankopɔn dɔ mu.” (Jude 21) Sɛ yebenya Jehovah no mboa wɔ mber a no mu yɛ dzen mu a, ɔsɛ dɛ yɛtakyer no ho. Naaso, yebesi dɛn ayɛ dɛm?

4, 5. Ebɛn kwan do na Jehovah ada no dɔ edzi akyerɛ hɛn?

⁴ Sɛ yebotum atakyer Jehovah ho a, ɔsɛ dɛ yehu ɔdɔ a  ɔdze dɔ hɛn no. Susu dza Jehovah ayɛ ama hɛn no ho hwɛ. Ɔama hɛn asaase fɛfɛɛfɛw na ɔdze ndua na mbowa ahyɛ do mã. Bio so, ɔama hɛn edziban ahorow a ɔyɛ dɛw dɛ yendzi na nsu pa dɛ yɛnnom. Jehovah nam Bible no do ama yeehu ne dzin nye no suban ahorow a ɔyɛ fɛw no. Dza ɔsen ne nyinara no, ɔdaa no dɔ edzi ber a ɔsomaa no Dɔba Jesus baa asaase do bowui maa hɛn no. (John 3:16) Osian dɛm afɔrbɔ yi ntsi, yɛwɔ daakye ho enyidado a ɔyɛ enyigye.

⁵ Jehovah dze Messiah Ahendzi no esi hɔ. Iyi yɛ ɔsor tumdzi a ɔbɛma amandzehu nyina aba ewiei ndaansa yi ara. Ahendzi no bɛma asaase adan paradise. Obiara bɛtsena ase wɔ asomdwee nye enyigye mu afebɔɔ. (Ndwom 37:29) Ɔkwan fofor a Jehovah ada no dɔ edzi akyerɛ hɛn nye dɛ, ɔakyerɛkyerɛ hɛn ɔkwan a oye sen biara a ɔsɛ dɛ yɛfa do bɔ hɛn bra ndɛ. Bio so, ɔto nsa frɛ hɛn dɛ yɛmbɔ no mpaa na ɔayɛ krado dɛ obetsie hɛn mpaabɔ daa. Jehovah ada no dɔ edzi pefee akyerɛ obiara.

6. Ebɛnadze na ɔsɛ dɛ eyɛ wɔ ɔdɔ a Jehovah ada no edzi akyerɛ wo no ho?

⁶ Ebɛnadze na ɔsɛ dɛ eyɛ wɔ ɔdɔ a Jehovah ada no edzi akyerɛ wo no ho? Ɔsɛ dɛ eda no ase wɔ dza ɔayɛ ama wo nyina ho. Awerɛhosɛm nye dɛ, ndɛ nyimpa pii yɛ bɔnyiayɛfo. Nna dɛm na nyimpa pii tse wɔ Jesus n’aber do. Da kor bi, Jesus saa akwatafo du yarba, naaso hɔn mu kor pɛr na ɔdaa Jesus ase. (Luke 17:12-17) Yɛpɛ dɛ yesuasua ɔbarimba no a ɔdaa Jesus ase no. Yɛpɛ dɛ yɛda Jehovah ase daa.

7. Ebɛn kwan do na ɔsɛ dɛ yɛdɔ Jehovah?

⁷ Ɔsɛ dɛ hɛn so yɛda hɛn dɔ edzi kyerɛ Jehovah. Jesus kãa kyerɛɛ n’esuafo no dɛ, ɔsɛ dɛ wɔdze hɔn akoma nyina, nye hɔn kra nyina nye hɔn adwen nyina dɔ Jehovah. (Kenkan Matthew 22:37.) Iyi kyerɛ dɛn?

8, 9. Yebesi dɛn ada hɛn dɔ edzi akyerɛ Jehovah?

 ⁸ Aso kã a yɛbɛkã kɛkɛ dɛ yɛdɔ Jehovah no ara dɔɔ sõ? Oho. Yɛdze hɛn ndzeyɛɛ na yɛdze bɛkyerɛ dɛ, yɛdze hɛn akoma, hɛn kra, nye hɛn adwen nyina dɔ Jehovah. (Matthew 7:16-20) Bible no kyerɛkyerɛ pefee dɛ, sɛ yɛdɔ Nyankopɔn a, yebedzi n’ahyɛdze do. Aso ɔyɛ dzen dɛ yɛbɛyɛ dɛm? Oho, osiandɛ Jehovah “n’ahyɛdze no nnyɛ dzen.”​—Kenkan 1 John 5:3.

⁹ Sɛ yɛyɛ setsie ma Jehovah a, yenya enyigye nye akomatɔyamu wɔ hɛn asetsena mu. (Isaiah 48:17, 18) Naaso, ebɛnadze na ɔbɔboa hɛn ma yaatakyer Jehovah ho? Ma yɛnhwɛ.

10. Ebɛnadze ntsi na ɔsɛ dɛ ekɔ do sũa Jehovah no ho adze?

¹⁰ Isii dɛn bɛyɛɛ Jehovah ne nyɛnko? Dze nam Bible a esũa no do. Iyi ama ebohu Jehovah yie na enye no enya anyɛnkofa a no mu yɛ dzen. Dɛm anyɛnkofa yi tse dɛ gya a epɛ dɛ ɔdzɛw. Dɛ mbrɛ gya hia nyena na ɔaakɔ do adzɛw no, dɛmara so na ɔsɛ dɛ ekɔ do sũa Jehovah no ho adze na ama enye no ntamu anyɛnkofa no mu aayɛ dzen.​—Mbɛbusɛm 2:1-5.

11. Ebɛn kwan do na Bible nkyerɛkyerɛ botum akã wo?

¹¹ Aber a ekɔ do sũa Bible no, ibohu ndzɛmba a ɔbɛkã w’akoma ankasa. Susu mbrɛ Jesus n’esuafo beenu bi tsee nkã ber a nna Jesus rekyerɛkyerɛ Bible nkɔnhyɛsɛm mu akyerɛ hɔn no ho hwɛ. Wɔkãa dɛ: “Ɔnye hɛn rekasa wɔ kwan mu, na obuee kyerɛwnsɛm no mu kyerɛɛ hɛn no, hɛn akoma annhyehye hɛn mu anaa?”​—Luke 24:32.

12, 13. (a) Ebɛnadze na ɔnnsɛ dɛ yɛma ɔba ɔdɔ a yɛwɔ ma Nyankopɔn no do? (b) Yebesi dɛn ahyɛ ɔdɔ a yɛwɔ ma Jehovah no mu dzen?

¹² Dɛ mbrɛ esuafo no tsee Kyerɛwnsɛm no ase a ɔkãa  hɔn akoma no, ibia wo so nyaa enyigye a ɔtse dɛm ber a nna irinya Bible no mu ntseasee no. Iyi na ɔboaa wo ma ibohun Jehovah yie na inyaa ɔdɔ maa no. Ɔnnsɛ dɛ ema ɔdɔ a ɔtse dɛm no n’ano gow da.​—Matthew 24:12.

¹³ Sɛ inya bɛyɛ Nyankopɔn ne nyɛnko a, ɔsɛ dɛ eyer woho ma anyɛnkofa no no mu kɔ do yɛ dzen. Ɔsɛ dɛ ekɔ do sũa Nyankopɔn na Jesus hɔn ho adze na edwendwen dza irusũa no ho nye mbrɛ ibotum dze edzi dwuma wɔ w’asetsena mu. (John 17:3) Sɛ erekenkan anaa irusũa Bible no a, bisa woho dɛm nsɛm yi: ‘Ebɛnadze na dɛm asɛm yi kyerɛkyerɛ me fa Jehovah Nyankopɔn ho? Ebɛnadze ntsi na ɔsɛ dɛ medze m’akoma nye me kra nyina dɔ Jehovah?’​—1 Timothy 4:15.

14. Ebɛn kwan do na mpaabɔ boa ma yɛhyɛ ɔdɔ a yɛwɔ ma Jehovah no mu dzen?

¹⁴ Sɛ ewɔ nyɛnko bi a epɛ n’asɛm a, ɔyɛ a etaa nye no  dzi nkɔmbɔ. Iyi hyɛ hom anyɛnkofa no mu dzen. Dɛmara so na sɛ yɛtaa nye Jehovah kasa wɔ mpaabɔ mu a, ɔma yɛhyɛ ɔdɔ a yɛwɔ ma no no mu dzen. (Kenkan 1 Thessalonicafo 5:17.) Mpaabɔ yɛ akyɛdze soronko a ofi hɛn sor Egya no nkyɛn. Ɔsɛ dɛ yefi hɛn akoma mu bɔ no mpaa daa. (Ndwom 62:8) Ɔnnsɛ dɛ yɛkyer mpaabɔ gu hɛn tsir mu na yesi do kã no mpɛn pii, na mbom ɔsɛ dɛ ɔyɛ nsɛm a ofi hɛn akoma mu. Ampaara, sɛ yɛkɔ do sũa Bible no na yefi hɛn akoma mu bɔ mpaa a, yebotum ahyɛ ɔdɔ a yɛwɔ ma Jehovah no mu dzen.

15, 16. Ɔsɛ dɛ ibu Asɛnka edwuma no dɛn?

¹⁵ Sɛ yɛpɛ dɛ yɛkɔ do takyer Jehovah ho a, ɔsɛ dɛ yɛkã hɛn gyedzi ho asɛm kyerɛ afofor so. Jehovah a yɛbɛkã no ho asɛm akyerɛ afofor no kã hokwan a yeenya a yɛdze rosom no no ho. (Luke 1:74) Nkyii so, ɔyɛ ahyɛdze a Jesus dze ama nokwar Christianfo nyina. Ɔsɛ dɛ obiara kã Nyankopɔn n’Ahendzi no ho asɛmpa no. Ana edze woho ahyɛ edwuma a ɔtse dɛm yi mu dadaw?​—Matthew 24:14; 28:19, 20.

¹⁶ Nna ɔsomafo Paul tse nkã dɛ asɛnka edwuma no som bo paa; ɔfrɛɛ no “akoradze.” (2 Corinthfo 4:7) Kã a ebɛkã Jehovah nye no botae ho asɛm akyerɛ afofor no yɛ edwuma a ohia sen biara a ibotum ayɛ. Iyi yɛ ɔkwan kor a ibotum afa do asom Jehovah. Bio so, Jehovah n’enyi sɔ dza eyɛ ma no no. (Hebrewfo 6:10) Asɛnka edwuma no so botum ama ɔwo nye afofor eenya nhyira. Iyi tse dɛm, osiandɛ ɔma eboa woho nye hɔn a wotsie wo no ma hom twe pin Nyankopɔn, na ɔbɛma hom enya onnyiewiei nkwa. (Kenkan 1 Corinthfo 15:58.) Aso edwuma fofor bi wɔ hɔ a obotum ama enya akomatɔyamu asen iyi?

17. Ebɛnadze ntsi na asɛnka edwuma no gye ntsɛmpɛ?

 ¹⁷ Asɛnka edwuma no gye ntsɛmpɛ papaapa. Ɔsɛ dɛ ‘yɛkã asɛm no’ na ‘yefua mu’ dzendzenndzen. (2 Timothy 4:2) Ɔsɛ dɛ nkorɔfo tse Nyankopɔn n’Ahendzi no ho asɛm no. Bible no kã dɛ: “Ewuradze ne da kɛse no abɛn, abɛn, na ɔpɛ ntsɛm dɛ.” Ewiei no rennka ekyir anaa “orinnkyim.” (Zephaniah 1:14; Habakkuk 2:3) Ɔyɛ ampa, ɔrennkyɛr koraa, Jehovah bɛsɛɛ Satan no wiadze bɔn yi. Naaso, ansaana iyi besi no, ɔsɛ dɛ yɛbɔ nkorɔfo kɔkɔ mbrɛ ɔbɛyɛ a wobotum esi gyinae asom Jehovah.

18. Ebɛnadze ntsi na ɔsɛ dɛ yɛnye nokwar Christianfo afofor bɔ mu som Jehovah?

¹⁸ Jehovah pɛ dɛ yɛnye nokwar Christianfo afofor bɔ mu som no. Bible no kã dɛ: “Hom mma yɛndwendwen hɛnho do, nnunu hɛnho nkɔ dɔ nye ndwuma pa mu; hɛn werɛ mmfir hɛnho ehyiadzi, dɛ mbrɛ binom hɔn ntɔyɛɛ tse, na yentutu hɛnho fo dodoodow dɛ hom nyim dɛ da no rebɛn.” (Hebrewfo 10:24, 25) Ɔsɛ dɛ yetum yɛ dza yebotum biara kɔ nhyiamu no nyina. Nhyiamu ahorow no ma yenya hokwan hyehyɛ hɛnho nkuran na yɛhyehyɛ hɛnho dzen so.

19. Ebɛnadze na obotum aboa hɛn ma yaadɔ hɛn nuanom Christianfo?

¹⁹ Sɛ ekɔ Christianfo nhyiamu a, ibenya anyɛnkofo a hɔn suban ye a wobotum aboa wo ma aasom Jehovah. Ibehyia enuanom a hɔn nsɛm tsebea nye wodze dzi nsɛ a ɔsor beebi a wofi nye mfe a woedzi na wɔreyɛ dza wobotum biara dze asom Jehovah. Nkyii so, wɔyɛ nyimpa tse dɛ woara, wonndzi mu na wotum dzi mfomdo so. Sɛ wɔfom wo a, fi w’akoma mu fa kyɛ hɔn. (Kenkan Colossaefo 3:13.) Kɔ do fa w’adwen si su pa a wo nuanom Christianfo wɔ no do daa. Dɛm a ebɛyɛ no bɔboa wo ma aadɔ hɔn, na aatwe epin Jehovah ber nyina.

20, 21. Ebɛnadze nye “nokwar nkwa no”?

²⁰ Jehovah pɛ dɛ n’anyɛnkofo nyina nya asetsena a oye sen biara. Bible no ma yehu dɛ, hɛn daakye asetsena bɛyɛ soronko koraa efi asetsena a yɛwɔ mu ndɛ no ho.

²¹ Daakye, yɛnnkɛtsena ase mfrenhyia 70 anaa 80, na mbom yɛbɛtsena ase afebɔɔ. Yebenya “onnyiewiei nkwa,” apɔwmudzen a odzi mu, asomdwee nye enyigye wɔ paradise. Iyi na Bible no frɛ no “nokwar nkwa no.” Jehovah abɔ hɛn anohoba dɛ ɔbɛma hɛn dɛm nokwar nkwa yi, naaso ɔsɛ dɛ yɛyɛ dza yebotum biara dze ‘suo mu’ dzendzenndzen.​—1 Timothy 6:12, 19.

22. (a) Yebesi dɛn esuo “nokwar nkwa no mu”? (b) Ebɛnadze ntsi na yerunntum mmfa hɛn ahoɔdzen nnya nkwa a ɔtsena hɔ daa no?

²² Yebesi dɛn esuo “nokwar nkwa no mu”? Ɔsɛ dɛ yɛbɔ hɛn bra “yie” na yɛyɛ “ahonyafo wɔ ndwuma pa mu.” (1 Timothy 6:18) Iyi kyerɛ dɛ, ɔsɛ dɛ yɛdze dza yeesũa wɔ Bible no mu no dzi dwuma wɔ hɛn asetsena mu. Naaso, sɛ yebenya nokwar nkwa no a, onngyina hɛnankasa hɛn ahoɔdzen do. Yerunntum mmfa hɛn ahoɔdzen nnya nkwa a ɔtsena hɔ daa no. Ɔyɛ akyɛdze a ofi Jehovah nkyɛn a ɔdze ma no nkowaa anokwafo. Iyi yɛ ‘n’adom’ anaa n’ayamuyie a ɔbor do no ho nhwɛdo. (Romefo 5:15) Hɛn sor Egya no pɛ paa dɛ ɔdze dɛm akyɛdze yi ma no nkowaa anokwafo.

23. Ebɛnadze ntsi na ɔsɛ dɛ isisi gyinae ahorow a ɔyɛ papa ndɛ?

²³ Bisa woho dɛ, ‘Ana morosom Nyankopɔn wɔ ɔkwan a ɔsɔ n’enyi do?’ Sɛ ihu dɛ ohia dɛ eyɛ nsesã ahorow bi wɔ w’asetsena mu a, ɔwɔ dɛ eyɛ no ntsɛmara. Sɛ yɛdze hɛnho twer Jehovah na yɛyɛ dza yebotum biara dze yɛ setsie ma no a, Jehovah bɛyɛ hɛn guandɔbea. Ɔbɔbɔ no nkorɔfo anokwafo ho ban wɔ nda a odzi ewiei wɔ Satan  no wiadze bɔn yi mu. Jehovah bɔhwɛ ehu dɛ, yɛbɛtsena ase daa wɔ Paradise, dɛ mbrɛ ɔabɔ anohoba no. Ampaara, sɛ isisi gyinae ahorow a ɔyɛ papa ndɛ a, ibotum esuo nokwar nkwa no mu!