1, 2. O cei e noda ivakaruru nikua?

KAYA mada o taubale tiko o qai donumaka na draki ca. E vakaturubuto na lomalagi, lidi na yaseyase, vadugu tale ga na kurukuru. Oti e tau bi sara na uca. Sa wacava na nomu marau ni o raica e dua na vanua mamaca mo vakaruru kina.

² Dua na ituvaki va qori eda tu kina nikua. E torosobu tiko ga na ituvaki kei vuravura. O na rairai veinanuyaka, ‘I vei au rawa ni vakaruru kina?’ E kaya na daunisame: “Au na kaya vei Jiova: ‘Oni noqu ivakaruru kei na noqu idrodro, noqu Kalou au vakanuinui kina.’” (Same 91:2) Io, e rawa ni taqomaki keda o Jiova ena gauna dredre qo. E yalataka tale tu ga e dua na inuinui totoka me baleta na gauna se bera mai.

3. Na cava meda cakava ke da vinakata na veivuke i Jiova?

³ Ena taqomaki keda vakacava o Jiova? Ena vukei keda meda walia na leqa cava ga eda sotava. E kaukaua duadua o Jiova, ena guce ga nodra sasaga o ira era via vakaleqai keda. Eda nuidei ni na vakaotia ena gauna se bera mai o Jiova na veika ca eda sotava tu nikua. Eda uqeti ena iVolatabu: “Ni tiko ga ena loloma ni Kalou.” (Juta 21) Io, e bibi meda kabiti Jiova tiko ga ke da vinakata me veivuke nida sotava na ituvaki dredre. Ia na cava meda cakava meda kabiti Jiova tiko ga kina?

4, 5. E vakaraitaka vakacava o Jiova na nona lomani keda?

⁴ Eda na kabiti Jiova tiko ga ke da vakadinata ni  lomani keda vakalevu. Vakasamataka mada na veika sa cakava ena vukuda. E solia vei keda e dua na vuravura totoka, qai vakatubuqoroqoro na kau kei na manumanu eda raica kina. E vakarautaka vei keda na kakana vakatitiweli, kei na wainigunu savasava. E vakatakila ena iVolatabu na yacana kei na nona itovo qoroi. Ia na ivakaraitaki uasivi duadua ni nona loloma na nona tala mai vuravura na Luvena lomani me mate ena vukuda. (Joni 3:16) Ke sega na isoro qori, ena sega na inuinui totoka me baleta na gauna se bera mai.

⁵ Sa tauyavutaka o Jiova na matanitu vakaMesaia, na matanitu vakalomalagi ena vakaotia na rarawa kece. Na Matanitu qori ena vukica na vuravura me parataisi, qai vakilai tawamudu kina na marau kei na vakacegu. (Same 37:29) Dua tale na sala e vakaraitaka kina o Jiova ni lomani keda oya ni dusimaki keda ena ivakarau ni bula vinaka duadua ena gauna qo. E vinakata tale ga meda masu vua, qai tu vakarau me rogoca na noda masu. Io, e lomani keda yadua sara ga o Jiova.

6. Me uqeti iko vakacava na loloma i Jiova?

⁶ Me uqeti iko vakacava na loloma i Jiova? Vakaraitaka vua ni o vakavinavinakataka na ka kece sa cakava ena vukumu. E ka ni rarawa nira sega ni dau vakavinavinaka e levu nikua. E va tale ga qori ena gauna a bula voli kina o Jisu e vuravura. Kena ivakaraitaki, a vakabula e tini na vukavuka o Jisu, ia e dua ga e vakavinavinaka vua. (Luke 17:12-17) Meda vakatotomuria mada ga na turaga a vakavinavinakataki Jisu, ena noda vakavinavinaka tiko ga vei Jiova.

7. Me vakacava na ivakarau ni noda lomani Jiova?

⁷ E bibi tale ga meda vakaraitaka nida lomani Jiova.  A tukuna o Jisu me ratou lomani Jiova na nona tisaipeli ena lomadratou taucoko, nodratou vinaka taucoko, kei na nodratou vakasama taucoko. (Wilika Maciu 22:37.) Na cava na kena ibalebale ya?

8, 9. Eda na vakaraitaka vakacava vei Jiova nida lomani koya?

⁸ E sega ni rauta ga meda tukuna nida lomani Jiova. Ke da lomani Jiova ena lomada taucoko, vinaka taucoko, kei na noda vakasama taucoko, eda na vakaraitaka qori ena ka eda cakava. (Maciu 7:16-20) E vakamatatataka na iVolatabu nida na muria na ivakaro ni Kalou ke da lomani koya. E sega ni dredre qori baleta e sega ni ‘icolacola bibi na ivunau i Jiova.’—Wilika 1 Joni 5:3.

⁹ Eda na marau, ena vakainaki tale ga na noda bula ke da talairawarawa vei Jiova. (Aisea 48:17, 18) Meda raica mada na ka meda cakava meda kabiti Jiova tiko ga kina.

10. Na cava mo vulica tiko ga kina na veika me baleti Jiova?

¹⁰ Na cava o cakava mo itokani kina i Jiova? O mai kilai Jiova vinaka ena nomu vulica na iVolatabu, o veitokani rawa tale ga kina kei koya. Ia na veitokani qori e vinakati me vaka na buka e sega ni boko rawa. Me vaka ga na kena uturi tiko ga na buka me kua kina ni boko, e bibi mo vulica tiko ga na veika me baleti Jiova me dei kina na nomudrau veitokani.—Vosa Vakaibalebale 2:1-5.

11. Ena uqeti iko vakacava na veika o vulica ena iVolatabu?

¹¹ Ni toso tiko na nomu vuli iVolatabu, ena tara sara ga na lomamu na veika o vulica. Erau vakila tale ga qori e rua na tisaipeli ni vakamacalataka vei rau o Jisu na parofisai vakaivolatabu. Erau kaya: “E uqeta sara ga na lomadaru na nona vosa tiko vei kedaru e gaunisala, ni sereka voli na iVolatabu, se vakacava?”​—Luke 24:32.

12, 13. (a) Na cava e rawa ni yaco ena noda lomana na Kalou? (b) Na cava meda cakava me kua kina ni luluqa noda lomani Jiova?

 ¹² De dua e uqeti tale ga na lomamu me vakataki rau na tisaipeli i Jisu, ena gauna o sa qai kila vinaka kina na ka e kaya na iVolatabu. O mai kilai Jiova kina, o lomani koya tale ga. Ia ke da sega ni qaqarauni, ena rawa ni batabata na loloma qori.—Maciu 24:12.

¹³ Ke o sa itokani mada ga ni Kalou, e bibi mo sasaga me dei tiko ga na nomudrau veitokani. Me kua ni cegu na nomu vulica na veika me baleti Jiova kei Jisu, vakasamataka tale ga na veika o vulica kei na sala mo bulataka kina. (Joni 17:3) Ni o wilika qai vulica na iVolatabu, e vinaka mo dau taroga: ‘Na cava au vulica eke me baleta na Kalou o Jiova? Na cava meu lomani koya kina ena lomaqu taucoko, kei na noqu vinaka taucoko?’​—1 Timoci 4:15.

14. E yaga vakacava na masu me kua kina ni luluqa na noda lomani Jiova?

 ¹⁴ Ni tiko nomu itokani vinaka, drau na veivosaki wasoma. Qo ena dei kina nomudrau veitokani. Ena sega tale ga ni luluqa na noda lomani Jiova ke da masu wasoma vua. (Wilika 1 Cesalonaika 5:17.) Na masu e nona isolisoli talei na Tamada vakalomalagi, meda dau talaucaka gona vua na lomada. (Same 62:8) Me kua ni dua tu ga na noda qaqanimasu se me wiligusutaki, me vu sara ga mai lomada na ka eda kaya. Io, ena sega ni luluqa na noda lomani Jiova ke da vulica tiko ga na iVolatabu qai masu mai vu ni lomada.

15, 16. Na cava nomu rai me baleta na cakacaka vakavunau?

¹⁵ E bibi meda tukuna vei ira eso tale na ka eda vakabauta ke da via kabiti Jiova tiko ga. Dua dina na ka dokai meda tukuni Jiova vei ira eso tale. (Luke 1:74) Qori na itavi e lesia o Jisu vei ira kece na lotu vaKarisito dina. E dodonu meda vunautaka kece na itukutuku vinaka ni Matanitu ni Kalou. Vakacava o sa cakava tiko qori?—Maciu 24:14; 28:19, 20.

¹⁶ Dua na ka nona vakamareqeta na cakacaka vakavunau na yapositolo o Paula, e vakatoka kina me “iyau talei.” (2 Korinica 4:7) Na nomu tukuni Jiova vei ira eso tale kei na nona inaki, e cakacaka bibi duadua mo vakaitavi kina. Qori e dua na sala o qaravi Jiova kina, qai vakamareqeta o koya na veika o cakava ena vukuna. (Iperiu 6:10) Na cakacaka vakavunau ena yaga tale ga vei iko kei ira na rogoci iko baleta e vakavolekati keda vei Jiova, eda na bula tawamudu kina. (Wilika  1 Korinica 15:58.) E sega tale ni dua na cakacaka me marautaki me vaka na cakacaka vakavunau.

17. Na cava e vakatotolotaki kina na cakacaka vakavunau?

¹⁷ Ni vakatotolotaki na cakacaka vakavunau, meda “kua ni lokuyara” gona ni “vunautaka na vosa.” (2 Timoci 4:2) E vinakati mera rogoca na lewenivanua na itukutuku ni Matanitu ni Kalou. E kaya na iVolatabu: “Sa voleka na siga levu i Jiova! Sa voleka, sa kusa sara mai!” “Ena sega ni bera” na icavacava. (Sefanaia 1:14; Apakuki 2:3) Io, sa voleka sara ni vakarusa o Jiova na vuravura ca i Setani. E bibi kina mera vakasalataki na lewenivanua me rawa nira digia mera qaravi Jiova.

18. Na cava meda qaravi Jiova vata kina kei ira na lotu vaKarisito dina?

¹⁸ E vinakata o Jiova meda qaravi koya vata kei ira na lotu vaKarisito dina. E kaya na iVolatabu: “Meda dau veinanumi nida veivakauqeti ena loloma kei na caka vinaka, meda kua ni biuta na noda soqoni vata me vaka e nodra ivalavala eso, ia meda veivakayaloqaqataki, vakabibi nida raica ni sa voleka mai na siga.” (Iperiu 10:24, 25) Meda saga sara meda dau tiko ena soqoni kece. Qori e gauna ni noda veivakayaloqaqataki kei na veivakaukauataki.

19. Na cava ena uqeti keda meda lomani ira na tacida vaKarisito?

¹⁹ Ni o lai soqoni, o na sotavi ira na itokani vinaka era na vukei iko mo qaravi Jiova. O na veimaliwai kei ira na mataveitacini era saga tale tiko ga mera qaravi Jiova ena nodra vinaka taucoko. O ira qori era sega ni uasivi me vakataki iko, era dau cala tale ga. Ke ra mani cala ena dua na gauna, tu vakarau mo vosoti ira. (Wilika Kolosa 3:13.) O na lomani ira na tacimu vaKarisito ke o dau kauaitaka ga na nodra itovo vinaka, ena vakavolekati iko tale ga vei Jiova.

20, 21. Na cava “na bula dina”?

²⁰ E vinakata o Jiova mera marautaka na nona itokani na nodra bula. Eda vulica ena iVolatabu ni na vinaka cake mai na ituvaki nikua na bula ena gauna se bera mai.

²¹ Ena sega ni 70 se 80 ga na yabaki na dede ni noda bula ena gauna se bera mai, ia ena tawamudu. Na “bula tawamudu” qori ena salavata mai na bula uasivi, vakacegu, kei na marau ena dua na parataisi totoka. E vakatoka na iVolatabu na ituvaki qori me “bula dina.” E yalataka tu vei keda na bula dina o Jiova, ia meda cakava na ka kece eda rawata ena gauna qo meda “taura matua kina.”​—1 Timoci 6:12, 19.

22. (a) Na cava meda cakava meda “taura matua kina na bula dina”? (b) Na cava e sega ni vakatau kina ena veika eda cakava na noda bula tawamudu?

²² Na cava meda cakava meda “taura matua kina na bula dina”? E dodonu meda “cakava na ka e vinaka,” meda “vakaitavi vakalevu ena cakacaka yaga.” (1 Timoci 6:18) Kena ibalebale e bibi meda bulataka na veika eda vulica ena iVolatabu. Ia na bula dina e sega ni vakatau ena veika eda cakava. Qori e isolisoli talei i Jiova vei ira na nona tamata yalodina, e ivakaraitaki ni nona “loloma soli wale.” (Roma 5:15) E vinakata dina na Tamada vakalomalagi mera marautaka na isolisoli qori na nona tamata yalodina.

23. Na cava mo vakatulewa vakavuku kina ena gauna qo?

²³ E bibi mo taroga, ‘E vakadonuya na Kalou na noqu ivalavala ni sokalou?’ Ke gadrevi mo vakavinakataka eso na ka, cakava sara ga qo. Ena noda idrodro o Jiova ke da nuitaki koya da qai saga ena noda vinaka kece meda talairawarawa vua. Ena taqomaki  ira na nona tamata yalodina ena gauna e vakarusa kina na vuravura ca i Setani. Ena raica tale ga meda bula tawamudu ena Parataisi me vaka ga e yalataka. Io, o na marautaka na bula dina ke o vakatulewa vakavuku ena gauna qo!