1, 2. Ko ai e mafai ke puipuiʼia tātou i le temi nei?

KOTOU fakakaukauʼi le anoʼaga leinei: E kotou saʼele i fafo i se aso e tuʼu veli ai le lagi. E kamata fakapōʼuli le lagi. E pā le mana o tapa le ʼuila o tō mo ʼua lalasi. E kotou afa se gāneʼa ke kotou fakamalumalu ai. E kotou maʼua ti e kotou fiafia!

² E tou teitei tatau pe le anoʼaga lenā. Ku asilisili veli a anoʼaga alā kua soko i le mālamanei. Lagi e kotou pati: ‘Ko fea e mafai ke kau ano ki ai ke kau sao ai?ʼ Na tosi e le kaunaga a le Atua: “E kau pati [“kia Seova,” MN] : Loku ulufaga mo loku kolo tau, loku Atua leia e kau fanaki ki ai !” (Pesalemo 91:2) E soli mai e Seova le fakafīmālie ti mo se amanaki fakatalatupuʼa ki le kāʼau.

3. Koleā e tonu ke tou fai ke puipui ai tātou e Seova?

³ E puipui fefeʼaki tātou e Seova? E mafai lana tokoi mai ke tou katakiʼi a faigataʼaʼia kesekese. Ti e makeke ake a ia ia lātou alā e faiʼia mai ni aga e veli. Kāpau e soko se tuʼutāmaki kia tātou, e mafai ke tou tui papau e puliʼi loa e Seova otātou mamae fuli i le kāʼau. E fakalotomakekeʼi tātou e le Tosi-Tapu: “Ke kotou nofo mau i le alofa o le Atua.” (Suta 21) Ke tokoi mai a Seova ki otātou faigataʼaʼia, e tonu ke tou nonofo ko lona kausoa. O fefeʼaki?

4, 5. E fakasā fefeʼaki mai e Seova a lona alofa kia tātou?

⁴ Ke tou nonofo ko le kausoa o Seova e tonu ke tou  matala, e alofa lasi a ia kia tātou. Kotou manatuʼi a neʼa fuli alā e fai e ia ma tātou. Na soli mai e ia le kele fulumālie ku ʼapele ko manu mo laʼakau fulumālie. E toe soli mai e ia le neʼa kai mālie ti mo le vai meʼā. E toe fakasā mai e ia i le Tosi-Tapu, a lona suafa mo ona kalitate mālilie. Kae na fakasā tafito mai e Seova a lona alofa i lana kakauʼi mai lona Alo alofaina ko Sesu, ke soli lona maʼuli ma tātou. (Soane 3:16) Ko ia e tou maʼua mei le sakilifisio lenā o Sesu le amanaki mālie ki le kāʼau.

⁵ Kua fakatuʼu e Seova le Puleʼaga i Selo leia e takitaki e le Mesia. E puliʼi loa e le Puleʼaga lenā a mamae fuli mo fakaliliu ai le kele ko le palatiso. E maʼuli loa a fenua fuli i le tokamālie mo le fiafia o leʼegato i le Palatiso. (Pesalemo 37:29) E toe fakasā mai e Seova lona alofa i lana fakamatala mai pe fefeʼaki latātou maʼua le maʼuli e mālie. E toe fakalotomakekeʼi e ia tātou ke tou faikole kiate ia talie e kataki tuʼumaʼu o fakalogo mai. E fakasā mālie mai e Seova a lona alofa kia tātou takitautokatasi.

6. Koleā le aga e tonu ke kotou fai ke taʼui ai le alofa o Seova?

⁶ Koleā le aga e tonu ke kotou fai ke taʼui ai le alofa o Seova? Kotou fakasā kiate ia e kotou mālieʼia a neʼa fuli alā e fai e ia ma koutou. Tokaʼapi i le temi nei e se lotou manatu o fakamālō. Ti na toe fenaʼaki i le temi na nofo ai Sesu i le kele. I le tasi a aso, na fakamālolo e ia ni tagata kilia e tino agafulu, kae ko le tokatasi faʼi na toe liliu o fakamālō kia Sesu. (Luka 17:12-17) Ti ko tātou, e tou fia tatau pe le tagata lenā na toe liliu kia Sesu. E tou fia fakasā tuʼumaʼu a lotātou lotofakafetaʼi kia Seova.

7. E tonu ke tou alofa fefeʼaki kia Seova?

⁷ E tonu foki ke tou toe fakasā e tou alofa kia Seova. Na pati a Sesu ki ana tisipulo: E tonu ke kotou alofa kia Seova i lokotou loto kātoa, mo lokotou laumālie kātoa,  ti mo lokotou manatu kātoa. (Lau Mateo 22:37.) Koleā lona fakaʼuiga?

8, 9. E tou fakasā fefeʼaki e tou alofa kia Seova?

⁸ E feʼauga ko ia le pati e tou alofa kia Seova? Leʼai. Kāpau e tou alofa kia Seova i lotātou loto kātoa, mo lotātou laumālie kātoa, ti mo lotātou manatu kātoa ti e tou fakasāʼia loa i atātou gaʼoi. (Mateo 7:16-20) E pati fakatotonu mai a le Tosi-Tapu: Kāpau e tou alofa ki le Atua, ti e tou fakalogo loa ki ana fakatotonu. Ti e mafai latātou fakalogo ki ai talie e “leaise faigataa.”—Lau 1 Soane 5:3.

⁹ Kāpau e tou fakalogo kia Seova, ti e tou maʼuli fiafia loa. (Esaia 48:17, 18) Kae koleā ka tokoi mai loa ke tou nonofo maʼu ko lona kausoa?

10. Koleā e tonu ai ke soko atu lakotou ako ke kotou iloa a Seova?

¹⁰ Na kotou liliu fefeʼaki o kausoa mo Seova? I lakotou ako le Tosi-Tapu, na kotou iloa ai pe ko ai a ia, o tuputupu ai loa lakotou fakakausoa mo ia. E fai le fakakausoa lenā pe se afi. Ke soko atu le kakā o le afi, e tonu ke velo tuʼumaʼu ni fafie ki ai. O toe felaʼaki, ke makeke tuʼumaʼu lakoutou fakakausoa mo Seova, e tonu ke soko atu lakotou ako ke kotou ʼaga o iloa a ia.—Taagapati 2:1-5.

11. Koleā e kotou logoʼi o uiga mo akonaki Fakatosi-Tapu?

¹¹ I le soko atu o le ako o le Tosi-Tapu, e kotou akoʼi ai ni anoʼaga e malave loa ki okotou loto. Kotou tokagaʼi pe koleā na logoʼi e tisipulo e lua a Sesu i lana ʼaga o fakamatala ake a māsau fakakikite i le Tosi-Tapu. Na lā pati: “Pe na leaise vevela ota loto, i lana masau mai kia taua i le ala, o fakamatala mai kia taua le Tositapu ?”—Luka 24:32.

12, 13. (1) Koleā e mafai ke soko ki lotātou alofa ki le Atua? (2) Koleā e tonu ke tou ʼaga o fai ke makeke tuʼumaʼu ai lotātou alofa ki le Atua?

 ¹² I le matala a le kau tisipulo a Sesu ki folafola o le Tosi-Tapu, na malave ki olātou a loto. Lagi kua kotou logoʼi mo koutou le fiafia lenā i lakotou kamata matala ki le Tosi-Tapu. Ti na tokoi atu le anoʼaga lenā ke kotou iloa mo alofa kia Seova. Ko ia ʼaua na kotou tuku le alofa lenā ke momoko pe ke puli.—Mateo 24:12.

¹³ E tonu ke kotou faiga fakamālotoloto i lokotou maʼuli ke makeke tuʼumaʼu lokotou alofa mo lokotou fakakausoa mo le Atua. Kotou soko atu lakotou ako ke kotou iloa a Seova mo Sesu. Kotou fakakaukau pe fefeʼaki lakotou ʼaga o maʼuliʼi a neʼa alā e kotou akoʼi. (Soane 17:3) Mokā kotou lau pe kotou ako le Tosi-Tapu, kotou fai kia koutou le vesili leinei: ‘Koleā le ako e kau maʼua mei ai o uiga mo Seova? Koleā e fakalotoʼi au ki ai e vāega anei, ke  kau alofa ai kia Seova i loku loto kātoa ti mo loku atamai kātoa?ʼ—1 Timoteo 4:15.

14. Koleā e tokoi mai ai a le faikole ke tou taupau se alofa makeke kia Seova?

¹⁴ Ko lakotou māsau tuʼumaʼu mo se tasi leia ko sokotou kausoa mālie, e tuputupu ai loa lokotou fakakausoa o makeke. O toe felaʼaki, kāpau e tou māsau tuʼumaʼu kia Seova i le faikole ti e makeke ai loa lotātou alofa kiate ia. (Lau 1 Tesalonika 5:17.) Ko le faikole, ko le neʼa alofa fakatalatupuʼa e tou maʼua mei lotātou Tamana i selo. E tonu ke tou māsau tuʼumaʼu kiate ia i lotātou loto kātoa. (Pesalemo 62:9) E leʼese tonu ke tou lau liuliuga ni faikole na ako faka atamai, kae e tonu ke tou māsau ki neʼa e tou manatu ki ai. Ko ia, ke makeke tuʼumaʼu lotātou alofa kia Seova e tonu ke soko atu latātou ako le Tosi-Tapu ti mo faikole kiate ia i lotātou loto kātoa.

15, 16. Koleā lakotou manatu o uiga mo le gaʼoi faifakamafola?

¹⁵ Ke tou nonofo ko le kausoa o Seova, e tonu foki ke tou māsau mo lātou ake alā o uiga mo latātou tui. (Luka 1:74) Ti ko se maʼua lenā na soli e Sesu ki le kau Kilisiteano fuli. E tonu kia tātou fuli ke tou fakamafola le logo mālie o le Puleʼaga o le Atua. E kotou fakasoko ko ia le anoʼaga lenā?—Mateo 24:14; 28:19, 20.

¹⁶ Ko le faifakamafola, na ko se anoʼaga maʼuiga a ia ki le apositolo ko Paulo. Na pati a ia: Ko se “koloa.” (2 Kolinito 4:7) Ko lakotou māsau ki ʼiki o uiga mo Seova ti mo ana fakatuʼutuʼu, ko se gaʼoi maʼuiga e mafai ke kotou kau ki ai ti ko se faʼasiga kaunaga a ia kia Seova. Ti e fiafia lasi a ia i lana tio ki faiga alā e kotou fai kiate ia. (Epeleo 6:10) E kotou toe maʼua mei le gaʼoi faifakamafola ni tapuakina o toe felaʼaki kia lātou alā e fakalogo kia koutou. I le  faifakamafola, e kotou tokoi kia lātou ake alā o toe felaʼaki mo koutou totonu ke kotou fakafeofi ai kia Seova ti ke kotou maʼua ai le maʼuli leʼegato. (Lau 1 Kolinito 15:58.) E mafai ko ia ke kotou maʼua se fiafia lasi mei se tasi ake gaʼoi?

17. Koleā e fakatavili ai le gaʼoi faifakamafola?

¹⁷ Ko le faifakamafola ko se gaʼoi e fakatavili. E tonu ke “fakasa le folafola . . . i le kataki fualoa.” (2 Timoteo 4:2) E tonu ke fakasā le Puleʼaga o le Atua ke logo ki ai a tagata fuli. E pati i le Tosi-Tapu: “Kua ofi le aso lasi o [“Seova,” MN], kua ofi mai a ia, ti e au fakatavili a ia.” Ko ia e se “tuvai” le aso fakamuli. (Sofoni 1:14; Apakuki 2:3) Kua vave fua le ʼaga a Seova o puliʼi le mālama a Satana. Kae i muʼa, e tonu ke fakatokaga ki tagata fuli ki neʼa alā ka soko, ke mafai ai lalātou filifili ke lotou kaunaga kia Seova.

18. Koleā e tonu ai ke tou tausi kia Seova mo ʼiki ake Kilisiteano māʼoki?

¹⁸ E loto a Seova ke tou tausi kiate ia mo ʼiki ake Kilisiteano māʼoki. E pati i le Tosi-Tapu: “Ke tou fetokagaaki ia tatou ke ekenaki tatou ki le alofa ti mo gaoi malilie. Ke aua na tou tiaki latatou fakatasi ofaipe le fai masani a ni iki, kae tou feakonakiaki ia tatou, ti e toe asilisili ake le nea lena kua kotou tio kua ofi mai le aso.” (Epeleo 10:24, 25) E tonu ke tou faiga fakamālotoloto ke tou kau ki fono fuli, talie e tou maʼua ai le faigamālie ke tou fefakalotomakekeiʼaki.

19. Koleā ka tokoi mai loa ke tou alofa ki otātou tuagaʼane mo fetaina?

¹⁹ I le kau ki fono Fakakilisiteano, e kotou maʼua loa ni kausoa e lotou tokoi atu ke kotou tausi kia Seova. E kotou felavei loa mo ni tuagaʼane mo ni fetaina kesekese. Ko ia o fai pe koutou, e lotou ʼagasala mo lakasala, kae e lotou toe faiga fakamālotoloto ke mālie lalātou tausi ki le Atua. Ko ia, kotou kataki o fakamolemole kia lātou. (Lau Kolose  3:13.) Kotou metitasio tuʼumaʼu ki olātou kalitate, ti e tokoi atu loa ke kotou alofa kia lātou ti mo fakafeofi lasi kia Seova.

20, 21. Koleā le “mauli maoki”?

²⁰ E loto a Seova ke maʼua e ona kausoa se maʼuli mālie. E akoʼi mai e le Tosi-Tapu, e kese ake loa lotātou maʼuli i le kāʼau.

²¹ E leʼese tou maʼuʼuli loa i ni fētuʼu e 70 pe 80. Kae e tou maʼua loa le “mauli lee gato.” E tou maʼuʼuli saosaoa loa ti mo tokamālie i le palatiso. E fakaʼigoa le maʼuli lenā i le Tosi-Tapu ko le “mauli maoki.” Ti e fakapapau mai e Seova, e soli mai loa e ia le maʼuli lenā. Kae e tonu ke tou faiga fakamālotoloto i le temi nei ke tou ʼaga o “too” le faigamālie lenā.—1 Timoteo 6:12, 19.

22. (1) E mafai ke tou maʼua fefeʼaki “le mauli maoki”? (2) Koleā e se mafai ai ke tou maʼua le maʼuli leʼegato mei atātou faiga?

²² E mafai ke tou maʼua fefeʼaki “le mauli maoki”? E tonu ke tou “fai le malie” ti ke tou “mou koloa i gaoi malilie.” (1 Timoteo 6:18) Ko lona fakaʼuiga, e tonu ke tou maʼuliʼi a neʼa fuli alā e tou ako i le Tosi-Tapu. Kae leʼaise tou maʼua loa le maʼuli māʼoki o tupu ko atātou faiga o toe felaʼaki mo le maʼuli leʼegato, talie ko le neʼa alofa lenā ko se ‘kalasia e soli noa’ e Seova. (Loma 5:15) Ko le neʼa alofa lenā e soli māʼoki e lotātou Tamana i selo ki ana kaunaga fuli.

23. Koleā e tonu ai ke kotou fai nei ni tonu mālilie?

²³ Kotou fai kia koutou le vesili lenei: ‘E kau alofa ko ia ki le Atua o mulimuli ki lona loto?’ Kāpau e tonu ke kotou fai ni fetogi i lokotou maʼuli, ti e tonu ke kotou fai nei. Kāpau e tou faiga fakamālotoloto ke tou fakalogo kia Seova mo fanaki kiate ia, ti e liliu loa a ia ko lotātou ulufaga. Lolotoga o temi fakamuli, e puipui loa e ia ana kaunaga mei  le mālama a Satana. O mulimuli ki lana fakapapau e fai loa e ia le puleʼaki ke tou maʼuʼuli ai i le Palatiso o leʼegato. Ko ia kāpau e kotou fai nei ni tonu mālilie ti e mafai loa ke kotou maʼua le maʼuli māʼoki.