1, 2. Kimoun ki pouvé protéjé nou jòdla ?

IMAJINÉ : ou ka maché dèrò roun jou i gen roun patché van. Syèl-a ka divini nwè. I gen zéklè, loraj ka grondé épi roun gro lapli ka koumansé tonbé fò. Ou ka chaché roun koté pou paré lapli-a. Épi men ou ka trapé roun koté : a pa ti soulajman ou gen !

² Nou sitiyasyon prèské kou sa nou fini wè-a. Tout bagaj plizanpli mové asou latè-a. Pitèt ou ka doumandé ou kò : « Ki koté mo pouvé alé pou mo protéjé ? » Roun sèrvitèr Bondjé ékri : « Mo lé di Jéova : “To sa mo réfij ké koté mo ka jwenn sékirité, mo konfyans a annan mo Bondjé i fika” » (Psaume 91:2). Jéova ka bay nou roun soulajman jòdla ké roun bèl èspwar pou pita.

3. Kisa nou divèt fè pou Jéova protéjé nou ?

³ Kouman Jéova ka protéjé nou ? I pouvé idé nou tchenbé rèd douvan nenpòrt ki traka. I lontan pi pwisan pasé tout sa-ya ki té ké lé fè nou soufri. Menmsi roun malò rivé nou, nou savé ki asiré, Jéova ké tiré tout nou soufrans pita. Labib-a ka ankourajé nou rété « annan lanmou Bondjé » (Jude 21). Pou Jéova idé nou annan nou tribilasyon, nou divèt rété so zanmi. Mé kouman nou ké rivé fè sa ?

4, 5. Kouman Jéova ka montré nou i kontan nou ?

⁴ Pou rété zanmi Jéova, nou divèt konprann fòrs  lanmou i gen pou nou. Sonjé tousa i ka fè pou nou. I bay nou latè-a ki byen jòlòt, é i mété roun patché zannimo ké plant ki bèl toubonnman. I ka bay nou osi bon bagaj pou manjé ké dlo ki bon pou bwè. Annan Labib-a i ka fè nou konnèt so non ké so bèl kalité. Épi pi fò ankò, i montré i kontan nou lò i voyé asou latè so Pitit Jézi i té tèlman kontan-an. A té pou i té bay so lavi pou nou (Jean 3:16). Gras a sa sakrifis-a, nou gen roun bèl èspwar pou pita.

⁵ Jéova mété Rwayonm mésyanik-a, a roun gouvèrnman Mési-a ka dirijé. Sa Rwayonm-an annan syèl-a. Titalò i ké fè tout soufrans disparèt é i ké fè latè-a divini roun paradi. Annan Paradi-a, tout moun ké viv pou tout-tan annan lapè épi ké tchò kontan (Psaume 37:29). Jéova ka montré osi lanmou i gen pou nou lò i ka di nou kouman nou pouvé jwenn miyò lavi i pouvé gen. Anplis di sa, i ka doumandé nou priyè l’, é i toujou paré pou kouté nou. Jéova ka byen montré ki i kontan nou chak.

6. Kouman ou divèt réyaji douvan lanmou Jéova ?

⁶ Kouman ou divèt réyaji douvan lanmou Jéova ? Montré li ki ou gen rékonésans pou tousa i ka fè pou ou. Jòdla, bokou moun pa ka sonjé di mèrsi. Sa té ka fèt déja lò Jézi té asou latè-a. Roun jou, i géri 10 wonm ki té gen lalèp, mé rounsèl annan yé di li mèrsi (Luc 17:12-17). Nou lé fè kou sa wonm-an. Nou toujou lé montré Jéova nou rékonésans.

7. Kouman nou divèt kontan Jéova ?

⁷ Nou divèt montré osi ki nou kontan Jéova. Jézi di  so disip-ya ki yé té divèt kontan Jéova « ké tout yé tchò », « ké tout yé nanm » épi « ké tout yé pansé » (li Matthieu 22:37). Kisa sa lé di ?

8, 9. Kouman nou divèt montré Jéova ki nou kontan l’ ?

⁸ Ès a yenki di ki nou kontan Jéova ? Non. Nou divèt montré annan fason nou ka viv ki nou kontan l’« ké tout nou tchò », « ké tout nou nanm » épi « ké tout nou pansé » (Matthieu 7:16-20). Labib-a ka di san katakata ki, si nou kontan Bondjé nou ké obéyi so lalwa. Ès obéyi so lalwa a roun bagaj ki rèd ? Non, paské so lalwa « pa fòrsan » (li 1 Jean 5:3).

⁹ Si nou ka obéyi Jéova, nou ké gen roun lavi ké tchò kontan (Isaïe 48:17, 18). Mé kisa ki ké idé nou rété so zanmi ?

10. Poukisa ou divèt kontinyé anprann konnèt Jéova ?

¹⁰ Kouman ou fè pou divini zanmi Jéova ? Lò ou étidyé Labib-a, ou anprann konnèt li, épi ou lanmityé ké li divini pi fò. Sa lanmityé-a kou roun difé. Pou roun difé kontinyé limen, ou divèt mété bwa annan l’. Menm fason-an, pou ou lanmityé ké Jéova rété fò, ou divèt kontinyé anprann konnèt li (Proverbes 2:1-5).

11. Kouman ansèyman Labib-a ké aji asou ou ?

¹¹ Lò ou ké kontinyé étidyé Labib-a, ou ké anprann bagaj ki ké touché ou tchò. Gadé sa dé disip Jézi rousanti lò i èspliké yé profési annan Labib-a. Yé di : « Ès i pa té gen roun difé annan nou tchò lò i té ka palé pou nou asou larout-a, lò i té ka byen èspliké nou Ékritir-ya ? » (Luc 24:32).

12, 13. a) Kisa ki pouvé rivé nou lanmou pou Bondjé ? b) Kisa nou divèt fè pou nou lanmou pou Bondjé rété fò ?

 ¹² Lò disip Jézi konprann Ékritir-ya, sa touché yé tchò. Asiré, ou tchò té divèt kontan toubonnman lò ou koumansé konprann Labib-a. Sa idé ou konnèt Jéova é kontan l’. Pa lésé sa lanmou-a divini frèt, ouben pédi so fòrs (Matthieu 24:12).

¹³ Pou ou lanmityé ké Bondjé rété fò, ou divèt travay rèd. Kontinyé anprann bagaj asou Bondjé ké asou Jézi. Réfléchi asou fason ou ké apliké sa ou ka anprann annan ou lavi (Jean 17:3). Lò ou ka li Labib-a ouben lò ou ka étidyé l’ doumandé ou kò : « Kisa sa ka anprann mo asou Jéova ? Annan sa vèrsé-ya kisa ki ka pousé mo kontan l’ ké tout mo tchò épi ké tout mo nanm ? » (1 Timothée 4:15).

14. Lapriyè ka idé nou fè nou lanmou pou Jéova rété fò. Poukisa ?

 ¹⁴ Lò ou gen roun zanmi pròch, ou ka palé ké li souvan. A konsa ou lanmityé ké li ka rété fò. Menm fason-an, lò nou ka palé ké Jéova souvan annan lapriyè, nou lanmou pou li ka rété fò (li 1 Thessaloniciens 5:17). Lapriyè sa roun bèl kado nou Papa ki annan syèl-a bay nou. Nou divèt toujou palé ké li ké tout nou tchò (Psaume 62:8). Nou pa divèt répété lapriyè ki nou anprann résité. Mé sa nou ka di divèt soti di nou tchò. Pou nou lanmou ké Jéova rété fò, nou divèt kontinyé étidyé Labib-a épi priyè l’ ké tout nou tchò.

15, 16. Kisa ou ka pansé di prédikasyon-an ?

¹⁵ Pou nou rété zanmi Jéova, nou divèt osi palé ké ròt moun-yan di sa nou anprann annan Labib-a. Palé di Jéova sa roun gran lònò (Luc 1:74). É a roun rèsponsabilité Jézi bay tout krétyen-yan. Nou tout divèt préché bon nouvèl Rwayonm Bondjé-a. Ès ou ja ka fè sa ? (Matthieu 24:14 ; 28:19, 20).

¹⁶ Pou apot Pòl, prédikasyon-an té gen bokou valò. I di ki a té roun « trézòr » (2 Corinthiens 4:7). Bagaj pi enpòrtan ou pouvé fè a palé ké ròt moun-yan di Jéova ké so projè. A roun fason di adoré Jéova. É i kontan tousa ou ka fè pou li (Hébreux 6:10). Anplis, prédikasyon-an ka mennen bénédiksyon pou ou ké sa-ya ki ka kouté ou. Lò ou ka préché, ou ka idé ròt moun-yan é ou menm osi vini pi pròch di Jéova épi gen lavi pou tout-tan (li 1 Corinthiens 15:58). Ès rounòt bagaj pouvé bay ou plis tchò kontan ?

17. Poukisa prédikasyon-an a roun travay nou divèt fè san pédi tan ?

 ¹⁷ Prédikasyon-an a roun travay ki divèt fèt san pédi tan. Nou divèt « préché paròl-a [...] ké pèrsévérans » (2 Timothée 4:2). Tout moun divèt tandé palé di Rwayonm Bondjé-a. Labib-a ka di : « Gran jou Jéova-a pròch. I pròch, é i ka rivé ké ti kouri. » Lafen-an « pa ké an rétar » (Sophonie 1:14 ; Habacuc 2:3). Titalò, Jéova ké fè monn Satan-an disparèt. Mé anvan sa rivé, moun-yan divèt savé sa ki ké pasé pou yé pouvé chwazi adoré Jéova.

18. Poukisa nou divèt adoré Jéova ansanm ké ròt vré krétyen-yan ?

¹⁸ Jéova lé nou adoré l’ ansanm ké ròt vré krétyen-yan. Labib-a ka di : « Annou gadé roun pou ròt pou nou idé nou konpanyen gen lanmou é fè bèl bagaj, épi annou pa lésé nou réinyon-yan kou sèrten gen labitid, mé annou ankourajé nou konpanyen, plis ankò paské zòt ka wè jou-a ka rivé » (Hébreux 10:24, 25). Nou divèt fè tousa nou pouvé pou alé annan tout réinyon-yan. Sa réinyon-yan ka pèrmèt nou ankourajé nou konpanyen.

19. Kisa ki pouvé idé nou kontan nou frè ké nou sò-ya ?

¹⁹ Lò ou ké alé annan réinyon krétyen-yan ou ké trapé zanmi ki ké idé ou adoré Jéova. Ou ké jwenn tout kalité frè ké sò. Kou ou menm yé ka fè tousa yé pouvé pou adoré Bondjé. Mé kou ou menm osi, yé pa parfè é yé ka fè ouben yé ka di bagaj yé pa divèt. A pou sa ou divèt paré pou pardonnen yé (li Colossiens 3:13). Toujou kontinyé sonjé sa yé ka fè ki bon. Sa ké idé ou kontan yé é vini pi pròch ankò di Jéova.

20, 21. A kisa ki « vré lavi-a » ?

²⁰ Jéova lé miyò lavi i pouvé gen pou so zanmi. Labib-a ka anprann nou ki dimen, nou lavi ké chanjé nèt.

²¹ Nou pa ké viv 70 ouben 80 lannen rounso. Nou ké gen « lavi pou tout-tan ». Nou ké viv annan lapè ké roun santé parfè annan Paradi-a. Labib-a ka aplé sa lavi-a « vré lavi-a ». Jéova ka promèt i ké bay nou sa lavi-a. Mé nou divèt fè tousa nou pouvé pou « tchenbé vré lavi-a ké tout nou fòrs » dipi aprézan (1 Timothée 6:12, 19).

22. a) Kouman nou pouvé « tchenbé vré lavi-a ké tout nou fòrs » ? b) Poukisa nou pa pouvé mérité lavi pou tout-tan ?

²² Kouman nou pouvé « tchenbé vré lavi-a ké tout nou fòrs » ? Nou divèt « travay pou fè sa ki byen » é « fè bokou bèl bagaj » (1 Timothée 6:18). Sa lé di ki nou divèt fè sa nou ka anprann annan Labib-a. Mé a pa paské nou ka travay rèd ki nou ké gen vré lavi-a. Nou pa pouvé gen lavi pou tout-tan kousidiré nou té ka mérité l’. A roun kado Jéova ka bay nou, roun favèr nou pa mérité (Romains 5:15). Nou Papa ki annan syèl-a vréman lé bay so sèrvitèr sa kado-a.

23. Poukisa ou divèt pran bon désizyon-yan san pédi tan ?

²³ Doumandé ou kò : « Ès mo ka adoré Bondjé fason i kontan-an ? » Si ou divèt fè chanjman annan ou lavi, fè sa chanjman-yan aprézan. Si nou ka fè tousa nou pouvé pou obéyi Jéova é si nou gen konfyans an li, i ké sa nou réfij. I ké protéjé so sèrvitèr-ya pannan  tout dèrnyé jou-ya di monn Satan-an. Apré sa, i ké fè sa ki fo pou nou viv annan Paradi-a pou tout-tan, kou i té promèt. Si ou ka pran bon désizyon-yan san pédi tan, ou ké pouvé profité di vré lavi-a !