1, 2. ¿Jaraleechi akaaliijaka waya maaʼutpünaa?

JÜLÜJATAA paaʼin warai pümüle suluʼupünaa wanee kaaye, asirümajaasü tü kaʼikat, atüttüsü jee kayaasü maʼin, shiʼitamaataka tü juyakat. Püchajaaka eeinjachire pia ekerotuin suulia shiʼitüin juya paaʼu, anasü paaʼin puusütapa eeinjachire paʼatapajüin sülatüin tü juyakat.

² Müsia neʼe wakuwaʼipa maaʼutpünaa, amojujaasü maʼin sukuwaʼipa tü Mmakat. Eesüjaʼa süpüla jülüjain paaʼin jaraleechin akaaliijain pia suulia kasa mojusü. Anuu tü nümakat chi ashajüikai süpüshi tü sümakat Salmo: «Meechi taya nümüin Jeʼwaa: ‹Pia chi tounjulaayakai otta akaalinjakai taya, chi Tamaleiwase tanoujakai anain›» (Salmo 91:2). Eeshi süpüla nükaaliijain waya Jeʼwaa soʼunnaa tü müliaa weʼrakat maaʼutpünaa otta naapeerü wamüin mapeena wanee kasa anashaataka maʼin.

3. ¿Kasa waaʼinrajatka süpüla nükaaliijain waya Jeʼwaa?

³ ¿Kasa naaʼinraka Jeʼwaa süpüla nükaaliijain waya? Eeshi süpüla nükaaliijain waya Jeʼwaa jaʼitairü kasain alatüin wamüin. Pülashi maʼin Jeʼwaa suulia wayuu eekai saainjeein kasa mojusü wamüin. Jaʼitairü sülatalaʼa sümüle kasa mojusü wamüin nunouteʼereerü Jeʼwaa tia mapeena. Jiyaawata «waneepia jaalin nüpüla Maleiwa», müsü tü Wiwüliakat wamüin (Judas 21). Ayateena nükaaliijain waya Jeʼwaa soʼunnaa müliaa ayatüle aleewain waya nümaa.

4, 5. ¿Jamüsü watüjaaka saaʼu alin waya nüpüla Jeʼwaa?

⁴ Ayateena aleewain waya nümaa Jeʼwaa wayaawatüle waneepia waalin nüpüla. Jülüja paaʼin wattain maʼin saalii  kasa naaʼinraka Jeʼwaa wapüleerua: anasü maʼin tü Mmakat nukumajaka wapüla, watta saalii wunuʼulia, naatayaa müsü tü mürütkalüirua, miyoʼu wüin suluʼu otta jemetüsü maʼin tü eküülü naapakat wamüin. Nüküjain wamüin sükajee tü Wiwüliakat Jeʼwaain nünülia otta anashaatain maʼin nukuwaʼipa. Watüjaa aaʼu miyoʼuin maʼin tü waalinkat nüpüla Maleiwa süka nuluwataain chi Nüchon aishikai maʼin nüpüla süpüla naapajiraain nikii waaʼu (Juan 3:16, TNM). Süka naapajiraain nikii Jesuu waaʼu anashaatasü maʼin tü kasa waʼatapajakat nutuma Maleiwa.

⁵ Aikalaaichipa Jesuu sünain aluwatawaa nutuma Jeʼwaa sirumatuʼu. Najaʼttireerü tü müliaa shiʼrakat wayuu maaʼulu otta paʼaraiiseerü tü Mmakat nutuma. Suluʼupa waya tü Paʼaraiisükat, jimateerü waaʼin otta müiria nnojoluin mojuin waaʼin (Salmo 37:29). Süka alin maʼin waya nüpüla Jeʼwaa nikirajüin waya süpüla anainjatüin wakuwaʼipa. Keeʼireesü naaʼin Jeʼwaa woʼuraajüinjanain nümüin otta naapajeein tü wanüikikat. Aitaʼaleeshiijaʼa maʼin waya nüpüla Jeʼwaa.

6. ¿Kasa waaʼinrajatka süka alin waya nüpüla Jeʼwaa?

⁶ Aashin kojutuin maʼin pümüin naaʼinrüin Jeʼwaa wainma kasa püpüleerua otta alin maʼin pia nüpüla. Wainmapejeʼe wayuu matüjainka aapaa analuʼut nümüin. Mapuʼusia sukuwaʼipa wayuu nükalioʼu Jesuu. Jamüsüjaʼa soʼu wanee kaʼi, niiʼiyajüin Jesuu polooshii wayuu ajaʼttaa atachii, waneeshia neʼe chi aapakai analuʼut nümüin (Lucas 17:12-17). Meesü wakuwaʼipa maʼaka naaʼin chi wayuu aapakai analuʼut nümüin Jesuu, kojuteesü wamüin waneepia tü naaʼinrakat Jeʼwaa wapüleerua.

7. ¿Jamüinjatü sukuwaʼipa naalin Jeʼwaa wapüla?

⁷ Jaʼyainjatü saaʼu wakuwaʼipa alin maʼin wapüla Jeʼwaa. Nüküjain Jesuu namüin na nikirajüinkana alinjachin Jeʼwaa napüla süka süpüshuaʼa naaʼin, süka süpüshuaʼa nakuwaʼipa otta süka tü jülüjakat naaʼin (paashajeʼera Mateo 22:37, TNM).

8, 9. ¿Kasa waaʼinrajatka shiimainre alin wapüla Jeʼwaa?

⁸ «Aishi Jeʼwaa tapüla» nnojoishii müinjanain neʼe waya.  Shiimainre alin wapüla Jeʼwaa süka süpüshuaʼa waaʼin, süka wakuwaʼipa otta süka tü jülüjakat waaʼin, waaʼinreerü tü anakat noʼuluʼu (Mateo 7:16-20). Saashin tü Wiwüliakat waaʼinreerü tü nuluwataakalü anain waya chi Maleiwakai shiimainre alin nia wapüla. ¿Iseetche wachiki tia? Nnojotsü isain wachiki aaʼinraa tü nuluwataakalü anain Jeʼwaa (paashajeʼera 1 Juan 5:3).

⁹ Woonoole sümaa tü nuluwataakalü anain Jeʼwaa aneerü wakuwaʼipa otta talateerü maʼin waaʼin (Isaías 48:17, 18). ¿Kasa waaʼinrajatka süpüla ayatüin aleewain waya nümaa Jeʼwaa? Wekirajaa sünain tia.

10. ¿Jamüshi ayatüinjachika pia sünain ekirajaa nüchiki Jeʼwaa?

¹⁰ ¿Kasa aleewaka anainjee pia nümaa Jeʼwaa? Sutuma pikirajaain sünain tü Wiwüliakat, piʼraajüin maʼin nukuwaʼipa Jeʼwaa otta kooʼomüinsü naalin püpüla. Aleewaa nümaa Jeʼwaa müsü aka saaʼin wanee siki chuwatüsü, epeʼipajünajatü shia suulia shiyokojooin. Müsia neʼe wakuwaʼipa nümaa Jeʼwaa, ayateena waya aleewain nümaa wekirajaale maʼin nüchiki (Proverbios 2:1-5).

11. ¿Jameerü paaʼin sutuma tü kasa piyaawateetkalü aaʼu süchiki tü Wiwüliakat?

¹¹ Sümaʼinruʼu pikirajaain sünain tü Wiwüliakat, piyaawateerü aaʼu wainma kasa talateetka atuma paaʼin. Jamüshiijaʼa piamashii na nikirajüinkana Jesuu, talatashaanasü maʼin naaʼin wanaa sümaa nüküjain Jesuu namüin jamaluʼuluin waneirua pütchi aküjünatüjütkalia achiki paala. «Keenairüje talatashaanain maʼin waaʼin wanaa sümaa naashajaain wamaa suluʼu tü wopukot sünain nikirajüin waya sünain tü pütchi nüchikimaajatkat Maleiwa», müshii naya (Lucas 24:32).

12, 13. (1) ¿Kasa eeka süpüla sülatüin nnojorüle kooʼomüin waalin nüpüla Jeʼwaa? (2) ¿Kasa waaʼinrajatka süpüla kooʼomüin naalin Jeʼwaa wapüla?

¹² Talatashaatasü naaʼin na nikirajüinkana Jesuu sutuma tü nümakat namüin. Eesüjaʼa talatüle maʼin paaʼin sutuma  piyaawatüin saaʼu wainma kasa suluʼujee tü Wiwüliakat. Sükajee tia piʼraajüin nukuwaʼipa Jeʼwaa otta kooʼomüinsü tü naalinkat püpüla. Aashin nnojoluin seemiajaweein naalin Jeʼwaa püpüla (Mateo 24:12).

¹³ Süka aleewaichipain pia nümaa Maleiwa, püchajaa sukuwaʼipa süpüla kooʼomüin putuma tü naalinkat püpüla. Ayataa pikirajaain nüchiki Jeʼwaa otta Jesuu, püsakireʼera paaʼin sünain tü pikirajaakalü anain otta punouteʼera pukuwaʼipa wanaapünaa sümaa tü sümakat tü Wiwüliakat (Juan 17:3, TNM). Paashajeʼerapa tü Wiwüliakat, jülüja paaʼin kasain shikirajaain anain pia nüchiki Jeʼwaa otta jülüja paaʼin kooʼomüinre naalin Jeʼwaa püpüla sutuma tü pikirajaakalü anain (1 Timoteo 4:15).

14. ¿Jamüsü ayateetka tü naalinkat Jeʼwaa wapüla woʼuraajüle waneepia?

¹⁴ Aleewale maʼin pia nümaa wanee wayuu, yootowaishi pia waneepia nümaa, aleewaleeshia maʼin pia nümaa sünainjee tia. Müsia neʼe tü naalinkat Jeʼwaa wapüla, akooʼomüinraasü shia  sutuma woʼuraajüin nümüin weinshi (paashajeʼera 1 Tesalónica 5:17). Anataʼaleesüjaʼa maʼin wakuwaʼipa süka eein süpüla woʼuraajüin nümüin chi Washi iipünaajachikai, achuntajana waya nümüin süka süpüshuaʼa waaʼin (Salmo 62:8). Nnojotsü weiteʼerakuʼu wamüinjatüin wanüiki woʼuraajapa, waküjainjatü shia suluʼujee waaʼin. Ayatüle wekirajaain sünain tü Wiwüliakat otta woʼuraajüle süka süpüshuaʼa waaʼin ayateerü tü naalinkat Jeʼwaa wapüla.

15, 16. ¿Jamüsü saaʼin pümüin aküjaa pütchi nüchiki Jeʼwaa?

¹⁵ Ayateena waya aleewain nümaa Jeʼwaa waküjale namüin na waneinnua süchiki tü wanoujakalü anain. Kojutuinjatü maʼin wamüin eein süpüla waküjain namüin na waneinnua nüchiki Jeʼwaa (Lucas 1:74, 75). Nuluwataain Jesuu na shiimainshiikana anoujain sünain aküjaa sümüin wayuu süchiki Sukuwaʼipa Aluwatawaa nutuma Maleiwa, makalaka woonooinjanain sümaa tia. ¿Aküjawaishi pia pütchi nüchiki Maleiwa sümüin wayuu? (Mateo 24:14; 28:19, 20).

¹⁶ Kojutushaatasü nümüin Pablo aküjaa pütchi nüchiki Maleiwa, müsü aka saaʼin wanee «korolo kojutusü» nümüin (2 Corinto 4:7, TNM). Nnojotsü eein wanee kasa alanaʼaleeka ojutu suulia aküjaa nüchiki Jeʼwaa otta süchiki tü nüchekakat wapüleerua. Wanaa sümaa püküjain sümüin wayuu nüchiki Jeʼwaa, aʼyataashi pia nümüin otta kojutusü maʼin nümüin tü paaʼinrakat (Hebreokana 6:10). Aleeweechi maʼin pia nümaa Jeʼwaa pükaaliijale na waneinnua süpüla aleewain naya nümaa Jeʼwaa. Ayatüle pia sünain aküjaa pütchi nüchiki Jeʼwaa «oʼtteʼenneena na aapajakana pünüiki. Je müshia piakaʼiya, oʼttaweechi» (paashajeʼera 1 Timoteo 4:16). Nnojotsü eein wanee aʼyatawaa anaʼleeka maʼin suulia aküjaa sümüin wayuu nüchiki Jeʼwaa.

17. ¿Jamüshii waʼyataainjanaka maʼin sünain aküjaa pütchi sümüin wayuu?

¹⁷ Aʼyataainjana maʼin waya sünain aküjaa pütchi sümüin  wayuu. Müsü tü Wiwüliakat: «Püküja pümata waneepia tü nünüikikat Maleiwa sümüin wayuu. Anakaja ayatüle pia sünain aküjaa shia» (2 Timoteo 4:2). Choʼujaasü süküjünüin sümüin wayuu süchiki nukuwaʼipa Maleiwa sünain aluwatawaa. Saashin tü Wiwüliakat, «alüʼütsü tü nükaliakat Jeʼwaa» otta «nnojoleerü kamaʼain shia» (Sofonías 1:14; Habacuc 2:3). Alüʼütsü tü kaʼi süpüla najaʼttirüinjatüin Maleiwa tü kasa mojusü nuluwataakalü aaʼu Satanaa. Süpülapünaa süntüin tia kaʼikat waapirüinjanain na wayuukana süpüla naneeküin naʼyataainjanale nümüin Jeʼwaa.

18. ¿Jamüshii woutkajaainjanaka sünain aʼwaajaa Jeʼwaa namaa na wawalayuukana?

¹⁸ Keeʼireesü naaʼin Jeʼwaa noutkajaainjanain na shiimainshiikana anoujain süpüla naʼwaajüin nia. Anuu tü sümakat tü Wiwüliakat: «Anakaja müleka wakaaliijiraale wapüshua sünain kamaneejiraain je sünain waaʼinrüin tü anasükat. Je anakaja müleka nnojoliire müin aka waya naaʼin na wayuu akulajaakana aaʼin sünain jutkatirawaa. [...] Anakaja wachiaajiraale waneepia, süka sülüʼülüin nükalia chi Senyotkai» (Hebreokana 10:24, 25). Wachajaainjatü maʼin sukuwaʼipa süpüla woutkajaainjanain waneepia namaa na wawalayuukana. Sünain tü outkajawaakat akaaliijiraashii waya namaa na wawalayuukana otta wachecherüin waaʼin sünain anoujaa.

19. ¿Kasa waaʼinrajatka süpüla alinjanain wapüla na wawalayuukana?

¹⁹ Sünain tü outkajawaakat piʼraajeena wayuu anakana süpüla paʼaleewain, nakaaliijeechi pia süpüla piʼyataain nümüin Jeʼwaa. Piʼraajeena wawalayuu naatakana akuwaʼipa aainjakana wainma kasa süpüla ayatüin naya sünain aʼyatawaa nümüin Jeʼwaa. Eepejeʼe tü kasa mojukat natuma süka kaleʼeruʼuin naya kaainjalaa maʼaka saaʼin wayuu süpüshuaʼa. Noʼtchejaale sümaa wanee kasa, pülatira sooʼopünaa paaʼin tü kasa mojukat natuma (paashajeʼera Éfeso 4:32). Anasü shiale jülüjain paaʼin tü kasa anakat natuma na wawalayuukana. Müleʼe shia putuma, aijeena maʼin naya püpüla otta paʼaleewainjeechi maʼin Jeʼwaa.

20, 21. ¿Jameerü sukuwaʼipa tü kataakalü oʼuu naapüinjatka Maleiwa wamüin?

²⁰ Saashin tü Wiwüliakat, aneerü maʼin sukuwaʼipa wayuu mapeena, nnojoleerü müin aka saaʼin sukuwaʼipa wayuu maaʼutpünaa. Tia shia tü keeʼireekat naaʼin Jeʼwaa napüleerua na naʼaleewainkana.

²¹ Kateerü woʼu mapeena süpüla kaʼikat süpüshuaʼa, nnojoluinjatü katüin woʼu 70 jee shiale 80 juya neʼe. Aneerü maʼin waaʼin suluʼu wanee paʼaraiisü, jimateerü waaʼin, talateena waya waneepia otta nnojoleena waya ayuulin. Tia shia tü kataakalü oʼuu naapüinjatka Maleiwa wamüin. Nüküjain Jeʼwaa sünain katüinjatüin woʼu mapeena süpüla kaʼikat süpüshuaʼa, aʼyataainjanapejeʼe maʼin waya süpüla naapüinjatüin wamüin tia (1 Timoteo 6:12, 19, TNM).

22. (1) ¿Kasa waaʼinrajatka süpüla katüinjatüin woʼu waneepia? (2) ¿Katüinjatche woʼu waneepia sünainjee waaʼinrüin neʼe kasa anasü?

²² ¿Kasa waaʼinrajatka süpüla katüinjatüin woʼu waneepia? Aʼyataainjana waya «sünain aaʼinraa waneepia kasa anasü» (1 Timoteo 6:18). Waaʼinrüin tia wanaa sümaa woonooin sümaa tü shikirajakalü anain tü Wiwüliakat. Katüinjatpajaʼa woʼu waneepia sünainjee «anamiain maʼi» Jeʼwaa wamüin, nnojotsü sünainjeejatüin neʼe waaʼinrüin kasa anasü (Éfeso 2:8, 9). Keeʼireeshaatasü naaʼin chi Washi iipünaajachikai katüinjatüin noʼu süpüla kaʼikat süpüshuaʼa na aʼyataakana nümüin.

23. ¿Jamüsü püneeküinjatka maaʼulu aʼyatawaa nümüin Jeʼwaa?

²³ Anasü jülüjale paaʼin müleka paaʼinrüle tü anakat noʼuluʼu Maleiwa. Eerejeʼe wanee kasa punouteʼerüinjatka sünain pukuwaʼipa punouteʼeramaata shia. Kanoulale maʼin waya nünain Jeʼwaa, wachajaweerü sukuwaʼipa süpüla woonooin sümaa tü nuluwataakalü anain, sükajee tia, meechi aka naaʼin wanee wounjulaaya Jeʼwaa. Alüʼütsü sükalia süpüla sajaʼttajatüin kasakat süpüshuaʼa, naaʼinmajeena Jeʼwaa na waneepiakana nümaa soʼunnaa tü kaʼi apütaakat. Kateetkalaka woʼu süpüla kaʼikat  süpüshuaʼa suluʼu tü Paʼaraiisükat maʼaka keeʼireetüjüliain shia naaʼin Maleiwa. Püneeküle aʼyatawaa nümüin Maleiwa maaʼulu, eesü süpüla naapüin pümüin mapeena tü kataakalü oʼuu waneepia.