1, 2. Diin kita makakita sing proteksion subong?

IMADYINA nga nagalakat ka sa dalan kag nagabagyo. Nagadulom ang langit, nagapangilat, kag mabaskog ang daguob. Dayon gulpi lang nagbubo ang mabaskog nga ulan. Nangita ka sang mapasilungan. Nalipay ka gid sang nakakita ka sang mapasilungan kag indi ka mabasa!

² Amo sini ang sitwasyon naton subong. Nagalala na gid ang sitwasyon sang kalibutan. Mahimo magpalibog ka, ‘Diin ako makakita sing proteksion?’ Ang salmista sang Biblia nagsulat: “Magasiling ako kay Jehova: ‘Ikaw ang akon dalangpan kag ang akon kuta [ukon, pamakod], ang akon Dios nga akon ginasaligan.’” (Salmo 91:2) Huo, mapaumpawan kita ni Jehova sa aton mga problema subong, kag ginahatagan niya kita sing makalilipay nga paglaum sa palaabuton.

3. Paano naton mangin dalangpan si Jehova?

³ Paano kita maproteksionan ni Jehova? Mabuligan niya kita nga maatubang ang aton mga problema, kag mas gamhanan sia sa kay bisan sin-o nga gusto maghalit sa aton. Bisan pa may malain nga matabo sa aton subong, makasalig ka nga solusyonan ini ni Jehova sa palaabuton. Ginapalig-on kita sang Biblia: “[Magpabilin] kamo sa gugma sang Dios.” (Judas 21) Dapat padayon kita nga mangin suod kay Jehova para buligan niya kita sa aton mga kabudlayan. Pero paano naton ini himuon?

4, 5. Paano ginpakita ni Jehova ang iya pagpalangga sa aton?

⁴ Para padayon kita nga mangin suod kay Jehova, dapat  naton dumdumon kon daw ano niya kita ka palangga. Pamensara ang tanan nga ginhimo ni Jehova para sa aton. Ginhatagan niya kita sing matahom nga duta nga puno sing manami nga mga tanom kag mga sapat. Ginhatagan man niya kita sing manamit nga mga pagkaon kag matinlo nga tubig. Paagi sa Biblia, ginsugid niya sa aton ang iya ngalan kag ang iya matahom nga mga kinaiya. Labaw sa tanan, ginpakita niya nga palangga niya kita sang ginpadala niya sa duta ang iya pinalangga nga Anak, si Jesus, agod ihatag ang iya kabuhi para sa aton. (Juan 3:16) Paagi sini nga halad, may matahom kita nga paglaum sa palaabuton.

⁵ Nag-aman si Jehova sang Mesianiko nga Ginharian, isa ka langitnon nga gobierno nga magatapos sang tanan nga pag-antos sa indi madugay. Himuon sini nga Ginharian nga paraiso ang duta, kag magakabuhi na sing malinong kag malipayon ang mga tawo sing wala katapusan. (Salmo 37:29) Ang isa pa ka paagi nga ginpakita ni Jehova ang iya pagpalangga amo nga gintudluan niya kita kon ano ang pinakamaayo nga kabuhi subong. Ginaagda man niya kita nga mangamuyo sa iya, kag handa gid sia pirme mamati sa aton. Maathag nga palangga gid kita ni Jehova.

6. Paano mo mabalusan ang pagpalangga ni Jehova?

⁶ Paano mo mabalusan ang pagpalangga ni Jehova? Ipakita nga nagapasalamat ka gid sa tanan nga ginhimo niya para sa imo. Madamo ang indi mapinasalamaton subong, pareho sang ari si Jesus sa duta. Isa ka bes, gin-ayo niya ang pulo ka aruon, pero isa lang ang nagpasalamat sa iya. (Lucas 17:12-17) Gusto naton nga pareho kita sa tawo nga nagpasalamat kay Jesus. Gusto gid naton pirme pasalamatan si Jehova.

7. Daw ano naton dapat ka palangga si Jehova?

⁷ Dapat man naton ipakita nga palangga naton si Jehova. Ginsilingan ni Jesus ang iya mga disipulo nga dapat nila palanggaon si Jehova sa bug-os nila nga tagipusuon, kalag,  kag hunahuna. (Basaha ang Mateo 22:37.) Ano ang buot silingon sini?

8, 9. Paano naton mapakita nga palangga naton si Jehova?

⁸ Bastante na bala nga magsiling kita nga palangga naton si Jehova? Indi. Kay kon palangga naton si Jehova sa bug-os naton nga tagipusuon, kalag, kag hunahuna, dapat makita ini sa aton mga ginahimo. (Mateo 7:16-20) Maathag nga ginatudlo sa aton sang Biblia nga kon palangga naton ang Dios, dapat naton tumanon ang iya mga sugo. Mabudlay bala ina? Indi, kay ang mga sugo ni Jehova “indi mabug-at.”—Basaha ang 1 Juan 5:3.

⁹ Ang pagtuman kay Jehova nagaresulta sa malipayon kag kontento nga kabuhi. (Isaias 48:17, 18) Pero ano ang makabulig sa aton para padayon kita nga mangin suod kay Jehova? Hibaluon naton.

10. Ngaa dapat padayon ka nga magtuon parte kay Jehova?

¹⁰ Paano ka nangin abyan ni Jehova? Paagi sa imo pagtuon sa Biblia, nakilala mo pa gid si Jehova kag nangin abyan ka niya. Ini nga pagpakig-abyan daw pareho sa kalayo nga indi mo gusto mapalong. Pareho sa kalayo nga dapat gatungan para padayon nga magdabdab, dapat padayon ka man nga magtuon parte kay Jehova para padayon ka nga mangin suod sa iya.—Hulubaton 2:1-5.

11. Ano ang epekto sa imo sang mga panudlo sang Biblia?

¹¹ Sa imo padayon nga pagtuon sa Biblia, matandog ka gid sa pila ka butang nga imo matun-an. Talupangda kon ano ang ginbatyag sang duha ka disipulo ni Jesus sang ginpaathag niya sa ila ang mga tagna sa Biblia. Nagsiling sila: “Indi bala natandog gid ang aton tagipusuon sang ginabuksan niya sa aton ang Kasulatan samtang nagalakat kita sa dalan?”—Lucas 24:32.

12, 13. (a) Ano ang posible matabo sa aton pagpalangga sa Dios? (b) Ano ang dapat naton himuon para indi magbugnaw ang aton pagpalangga kay Jehova?

 ¹² Natandog gid ang tagipusuon sang mga disipulo sang naintiendihan nila ang Kasulatan, kag amo man sini ang mabatyagan mo kon maintiendihan mo na ang Biblia. Makabulig ini sa imo nga makilala si Jehova kag palanggaon sia. Sigurado nga indi mo gusto nga magbugnaw ang pagpalangga mo sa iya.—Mateo 24:12.

¹³ Kon mangin abyan ka na sang Dios, dapat mo tinguhaan nga pabakuron ini. Dapat padayon mo nga tun-an ang parte sa iya kag kay Jesus, dayon pamensari ini sing maayo kag kon paano mo ini maaplikar sa imo kabuhi. (Juan 17:3) Kon ginabasa ukon ginatun-an mo ang Biblia, pamangkuta ang imo kaugalingon: ‘Ano ang ginatudlo sini sa akon parte kay Jehova nga Dios? Ngaa dapat ko sia palanggaon sing bug-os tagipusuon kag kalag?’—1 Timoteo 4:15.

14. Paano ang pangamuyo makabulig sa aton para magbakod pa gid ang aton pagpalangga kay Jehova?

 ¹⁴ Kon may suod ka nga abyan, pirme gid kamo nagaistoryahanay para mangin suod pa gid kamo. Amo man sini kon regular kita nga nagapangamuyo kay Jehova, nagabakod pa gid ang aton pagpalangga sa iya. (Basaha ang 1 Tesalonica 5:17.) Matahom gid nga regalo sang aton Amay sa langit ang pangamuyo. Dapat pirme kita makig-istorya sa iya sing tinagipusuon. (Salmo 62:8) Indi naton dapat pagsauluhon ang aton mga pangamuyo, kundi dapat sinsero kita sa aton ginasiling. Huo, magabakod pa gid ang aton pagpalangga kay Jehova kon padayon kita nga magtuon sa Biblia kag sinsero nga mangamuyo sa iya.

15, 16. Para sa imo, ano ang pagbantala?

¹⁵ Para padayon nga mangin suod kay Jehova, dapat man naton isugid sa iban ang aton pagpati. Pribilehiyo gid naton nga isugid ang parte kay Jehova. (Lucas 1:74) Kag responsibilidad ini nga ginhatag ni Jesus sa tanan nga matuod nga Cristiano. Dapat naton ibantala ang maayong balita sang Ginharian sang Dios. Ginahimo mo na bala ini?—Mateo 24:14; 28:19, 20.

¹⁶ Para kay apostol Pablo importante gid ang pagbantala, amo nga gintawag niya ini nga “bahandi.” (2 Corinto 4:7) Ang pagsugid sa iban parte kay Jehova kag sa iya katuyuan amo ang pinakaimportante nga buluhaton nga mahimo mo. Isa ini ka paagi nga maalagad mo si Jehova, kag ginaapresyar gid niya ini. (Hebreo 6:10) Ang pagbantala makabulig man sa imo kag sa mga nagapamati sa imo nga mangin suod kay Jehova kag makabaton sang kabuhi nga wala sing katapusan. (Basaha ang 1 Corinto 15:58.) Wala na sing iban pa nga buluhaton nga makahatag sa imo sing daku nga kalipay!

17. Ngaa hilingagawon gid ang pagbantala?

 ¹⁷ Hilingagawon gid ang pagbantala. Dapat mo “ibantala ang pulong,” kag dapat “mangin masako ka sa sini.” (2 Timoteo 4:2) Dapat gid sugiran ang mga tawo parte sa Ginharian sang Dios. Ang Biblia nagasiling: “Malapit na ang daku nga adlaw ni Jehova! Malapit na ini kag nagapalapit sing tuman kadasig!” Ang katapusan “indi . . . maulihi!” (Sofonias 1:14; Habacuc 2:3) Huo, malapit na lang tapuson ni Jehova ang malain nga kalibutan ni Satanas. Gani antes sina, dapat naton paandaman ang mga tawo para makapili sila nga alagaron si Jehova.

18. Ngaa dapat naton simbahon si Jehova upod ang matuod nga mga Cristiano?

¹⁸ Gusto ni Jehova nga magsimba kita sa iya upod sa matuod nga mga Cristiano. Ang Biblia nagsiling: “Hunahunaon naton ang isa kag isa agod pahulagon sa gugma kag sa maayong mga buhat, nga wala ginapabay-an ang aton pagtilipon, subong sang kinabatasan sang iban, kundi nagapalig-unay sa isa kag isa, kag labi na gid samtang nakita ninyo nga malapit na ang adlaw.” (Hebreo 10:24, 25) Dapat naton himuon ang aton masarangan nga tambungan ang tanan nga miting. Paagi sini, mapalig-on kag mapabakod naton ang isa kag isa.

19. Ano ang makabulig sa aton nga palanggaon ang aton Cristiano nga kauturan?

¹⁹ Sa mga miting, makilala mo ang maayo nga mga abyan nga makabulig sa imo sa pagsimba kay Jehova. Makilala mo man ang mga kauturan nga nagatinguha gid nga simbahon si Jehova. Kag pareho sa imo, indi man sila perpekto kag makahimo sing sala. Gani mangin handa sa pagpatawad sa ila. (Basaha ang Colosas 3:13.) Tan-awa ang maayo nga mga kinaiya sang imo Cristiano nga kauturan, kay makabulig ini sa imo nga palanggaon sila kag mangin suod kay Jehova.

20, 21. Ano ang “matuod nga kabuhi”?

²⁰ Gusto ni Jehova nga may pinakamaayo nga kabuhi ang tanan niya nga abyan. Ginatudluan kita sang Biblia nga sa palaabuton mangin maayo na ang aton kabuhi, indi pareho subong.

²¹ Sa palaabuton, indi lang 70 ukon 80 ka tuig ang aton kabuhi, kundi wala sing katapusan. Magakabuhi na kita sa matahom nga paraiso sing “wala sing katapusan” nga may kalinong, malipayon, kag wala na sing masakit. Amo ina ang ginatawag sang Biblia nga “matuod nga kabuhi.” Nagpromisa si Jehova nga ihatag niya sa aton ining matuod nga kabuhi, pero dapat himuon naton ang tanan subong para ‘makapanguyapot sing malig-on’ sa sini.—1 Timoteo 6:12, 19.

22. (a) Paano kita “makapanguyapot . . . sing malig-on sa matuod nga kabuhi”? (b) Ngaa indi naton mabaton ang kabuhi nga wala sing katapusan kon sa aton lang?

²² Paano kita “makapanguyapot . . . sing malig-on sa matuod nga kabuhi”? Dapat kita “maghimo sang maayo” kag “mangin manggaranon sa maayong mga buhat.” (1 Timoteo 6:18) Buot silingon, iaplikar naton ang aton natun-an sa Biblia. Pero ang matuod nga kabuhi wala nagadepende sa aton pagtinguha. Indi gid naton mabaton ang kabuhi nga wala sing katapusan kon sa aton lang. Regalo ini ni Jehova sa iya matutom nga mga alagad, kag isa ini ka halimbawa sang iya “wala tupong nga kaayo.” (Roma 5:15) Gusto gid sang aton Amay sa langit nga ihatag ini nga regalo sa iya matutom nga mga alagad.

23. Ngaa dapat ka maghimo sing insakto nga desisyon subong?

²³ Pamangkuta ang imo kaugalingon, ‘Ginasimba ko bala ang Dios sa paagi nga ginabaton niya?’ Kon sa banta mo may dapat ka bag-uhon, himua ini dayon. Kon magsalig kita kay Jehova kag magtuman sa iya, mangin dalangpan naton sia. Proteksionan niya ang iya matutom nga katawhan sa  katapusan nga mga adlaw sang malain nga kalibutan ni Satanas. Siguraduhon ni Jehova nga maistar kita sa Paraiso sing wala katapusan, suno gid sa ginpromisa niya. Huo, mabaton mo ang matuod nga kabuhi kon maghimo ka sing insakto nga desisyon subong!