1, 2. Opi pu matu munu ondjeverero ndino?

NGATU tje mo kayenda pendje nu eyuru ra pata. Okuzambo aku utu okutjena nokuṱuṱuma. Tjimanga ombura ai utu okuroka. Nove o utu okupaha oruveze rwomaundiro. Omuinyo woye tjiri mau u pehi tji wa munu oruveze pu mo undu!

² Eṱe tu hupa mozongaro otjingezo ndino. Ozongaro mouye ze ririrako ozombi tjinene. Ove mape ya o ripura kutja ‘Hapo opi pu me kamuna ondjeverero?’ Omutjange wEpsalme wa tja: ‘Ma yenene okutja nai ku Ye: “OOve omuyame wandje omunamasa. OOve Ndjambi wandje ku mbe riyameka.”’ (Epsalme 91:2) Otjiperi, Jehova ma yenene okutupa ombatero okutjinda omauzeu wetu nai nu u tu pa omaundjiro omawa woruyaveze.

3. Eṱe matu sokutjita vi kutja Jehova ma rire omaundiro wetu?

³ Jehova me tu tjevere vi? Eye ma yenene okutupa omasa wokutja tu tjinde omauzeu ngu tu na wo, nu eye u nomasa okukapita omundu ngamwa ngu mape ya a kondjo okutuhihamisa. Nandarire kutja pa tjitwa otjiṋa otjivi ku eṱe nai, matu yenene okukara nongamburiro kutja Jehova ma isapo omihihamo avihe moruyaveze. Ombeibela i tu tunduuza kutja, “Kareye morusuvero rwaNdjambi.” (Judas 21) Matu sokukara popezu na Jehova kutja eye me tu vatere moruveze rwouzeu. Nu hapo otjiṋa hi matu tji tjiti vi?

4, 5. Omomiano viṋe Jehova ma raisa orusuvero rwe ku eṱe?

⁴ Kutja tu kare popezu na Jehova, eṱe matu sokutjiwa kutja eye we tu suvera pu pe ṱa pi. Ripurira koviṋa avihe Jehova  mbye tu tjitira. Eye we tu pa ehi ewa mu mu nomiti novinamuinyo oviwa tjinene. Eye wina we tu pa ovikurya ovitjate okurya nomeva omakohoke okunwa. Okupitira mOmbeibela, Jehova we tu honga ena re novikaṋena vye oviwa. Kombanda yaavihe, eye we tu raisira orusuvero rwe indu tja hinda Jesus, Omuna we omusuverwa kehi kutja me yekuṱira eṱe. (Johanes 3:16) Nu mena rombunguhiro yaJesus ndjo, eṱe tu nomaundjiro woruyaveze oruwa tjinene.

⁵ Jehova wa zika Ouhona mbu honaparerwa po i Messias, owo mbu ri ohoromende yomeyuru ndji mai yekuisapo omauzeu aehe moruveze rwatjimanga. Ouhona mbwi mau tjiti kutja ehi ri rire oparadisa, ovandu avehe mu mave katura mohange nondjoroka nga aruhe. (Epsalme 37:29) Omuano warwe Jehova me tu raisira orusuvero omokutuhonga omuano omusembasemba wokuhupa nai. Eye wina u tu ṋanga kutja tu kumbe ku ye nu aruhe u ri mbo okupuratena kozongumbiro zetu. Jehova tjiri wa raisira auhe wetu orusuvero.

6. Ove mo sokutoorera ko omikambo viṋe korusuvero rwaJehova?

⁶ Mo raisa vi ondangi yoye korusuvero rwaJehova? Mu raisira kutja u nondangi koviṋa avihe mbye ku tjitira. Ouhumandu, ovandu ovengi ndino kave nondangi. Ongaro ndji, ondjari novandu moruveze rwaJesus wina. Otjikando tjimwe, Jesus wa verukisa ovandu 10 mba verere omutjise wongana, nungwari i umwe uriri mu wo ongwa tja okuhepa. (Lukas 17:12-17) Ngatu kondje okukara tjimuna omurumendu ngwi ngwa raisa ondangi ye ku Jesus. Aruhe ngatu kondje okuraisa ondangi yetu ku Jehova.

7. Omomuano uṋe mu matu sokusuvera Jehova?

⁷ Eṱe wina tu hepa okuraisa orusuvero rwetu ku Jehova. Jesus wa raera ovahongewa ve kutja ngave suvere Jehova nomitima vyawo avihe, nomiinyo vyawo avihe nozondunge zawo azehe. (Lesa Mateus 22:37.) Ihi matji hee tjike?

8, 9. Matu yenene okuraisira vi Jehova kutja twe mu suvera?

 ⁸ Okuhungira uriri kutja twa suvera Jehova hapo kwa yenene? Kako. Tji twa suvera Jehova nomutima, omuinyo nozondunge zetu azehe okutja matu sokumuraisira orusuvero ndwi movitjitwa vyetu. (Mateus 7:16-20) Ombeibela i honga oukahu kutja tji twa suvera Mukuru, matu kara nonḓuviro komatwako we. Hapo okutjita nao ouzeu? Kako, orondu ‘omatwako waNdjambi kamazeu.’—Lesa 1 Johanes 5:3.

⁹ Tji twa kara nonḓuviro ku Jehova, tu kara nehupo ewa rondjoroka. (Jesaja 48:17, 18) Nu hapo otjikeṋa tji matji tu vatere okukara popezu na Jehova? Ngatu konḓonone.

10. Ongwaye tji mo sokukayenda komurungu okurihonga ohunga na Jehova?

¹⁰ Pe ya vi u rire epanga raJehova? Okupitira momakonḓononeno woye wOmbeibela, ove wa uta okutjiwa ovingi ohunga na Jehova nu wa tunga oupanga kuna ye. Oupanga mbwi u ri tjimuna omuriro mbu tu sokukondja kutja au ha zemi. Tjimuna omuriro tji u hepa ozonguṋe kutja au ha zemi, ove wina mo hepa okukayenda komurungu okurihonga ohunga na Jehova kutja oupanga woye kuna ye u harere ko omasa.—Omiano 2:1-5.

11. Omahongero wOmbeibela mape ya aye ku ṱunu vi?

¹¹ Otja tji mo kayenda komurungu okurihonga Ombeibela, mo kerihonga ovingi mbi mavi ku ṱunu komutima. Tara komuano ovahongewa vaJesus 2 mu va ṱunwa indu Jesus tjee ve kahururire omaprofetero wOmbeibela. Owo va tja: “Omitima vyetu kaavi rundu nenyando are, indu Eye tjiya hungire kuna eṱe mondjira nokutupanguṋunina Omatjangwa?”—Lukas 24:32.

12, 13. (a) Orusuvero rwetu ku Mukuru mape ya aru tjiti vi? (b) Eṱe matu yenene vi okutjaera kutja orusuvero rwetu ku Jehova aru ha poro?

 ¹² Tjimuna ovahongewa tji va ṱunwa tjinene indu tji va zuva Omatjangwa nawa, ove wina mape ya wa ṱunwa momuano otjingewo indu tji wa uta okuzuva Ombeibela nawa. Otjiṋa hi tje ku vatera kutja u tjiwe Jehova nu u mu suvere. Kondja kutja orusuvero ndwi aru ha poro.—Mateus 24:12.

¹³ Indu tji wa rire epanga raMukuru, ove mo sokukondja oukukutu kutja oupanga mbwi u pamene ko. Mo sokukayenda komurungu okurihonga ohunga na ye na Jesus nokuripura kutja oviṋa mbi we rihongo mo vi ṱakamisa vi mehupo roye. (Johanes 17:3) Indu tji mo lese poo tji mo konḓonona Ombeibela, ripura omuini kutja, ‘Otjiṋa hi matji ndji hongo tjike ohunga na Jehova Mukuru? Ongwaye tji me sokumusuvera nomutima nomasa wandje aehe?’—1 Timoteus 4:15.

14. Ongumbiro mai tu vatere vi kutja orusuvero rwetu ku Jehova aru ha poro?

 ¹⁴ Tji u nepanga ropopezu, ove mape ya u hungira kuna ye aruhe nu otjiṋa hi tji tjita kutja oupanga weṋu u hare omasa. Momuano otjingewo, tji matu hungire kuna Jehova aruhe mongumbiro, ku tjita kutja orusuvero rwetu ku ye ru kurire ko. (Lesa 1 Ovatesalonika 5:17.) Ongumbiro otjiyandjewa tjapeke okuza ku Tate womeyuru. Eṱe aruhe ngatu hungire kuna ye okuza komitima vyetu. (Epsalme 62:8) Katu sokuyarukira po ozongumbiro zetu okuza motjiuru uriri nungwari tu sokuhungira oviṋa mbi mavi zu komutima tjiri. Tji twa kayenda komurungu okukonḓonona Ombeibela nokukumba okuza komutima tjiri, maku tu vatere kutja orusuvero rwetu ku Jehova ru kurire ko.

15, 16. Oviungura vyokuzuvarisa u vi vara vi?

¹⁵ Tji matu vanga okukara popezu na Jehova matu sokuhungira kuna varwe ohunga nongamburiro yetu. Okuhungira kuna varwe ohunga na Jehova tjiri ondjingonekero onene. (Lukas 1:74) Nu inga omerizirira Jesus nga yandja kOvakriste vatjiri avehe. Auhe wetu ma sokuzuvarisa ombuze ombwa ohunga nOuhona waMukuru. Ove wa rora okutjita nao?—Mateus 24:14; 28:19, 20.

¹⁶ Omuapostele Paulus aa vara otjiungura tjokuzuvarisa hi otjotjiṋa ‘otjihuze’ tjinene. (2 Ovakorinte 4:7) Okuraera varwe ohunga na Jehova nondando ye ootjiungura otjinanḓengu ove tji mo yenene okutjita. Imbwi oomuano wokukarera Jehova nu eye u vara oviungura vyoye pondondo yokombanda. (Ovaheberi 6:10) Okuzuvarisa wina maku yama ove omuini na imba mbu mave puratene kove mena rokutja u vatera varwe na ove omuini  okutumbuka popezu na Jehova nokumuna omuinyo waaruhe. (Lesa 1 Ovakorinte 15:58.) Hapo pe notjiungura tjarwe tji tji yandja onyuṋe okukapita hi?

17. Ongwaye oviungura vyokuzuvarisa tji vi nohakahana?

¹⁷ Otjiungura tjokuzuvarisa tji nohakahana. Tu ‘sokuzuvarisa ombuze’ natu “panḓere po.” (2 Timoteus 4:2) Ovandu ve hepa okuzuva ohunga nOuhona waMukuru. Ombeibela mai tja: “Eyuva enene raMuhona ri ri popezu, ri ri popezu tjinene, nu mari ya tjimanga!” Omaandero ‘kaye nokuwombisiwa.’ (Sefanja 1:14; Habakuk 2:3) Otjiperi, moruveze rwatjimanga, Jehova ma yandeke ouye waSatan ourunde mbwi. Ngunda imbi avi hi ya tjitwa, ovandu mave sokurakiziwa kutja ve toorore okukarera Jehova.

18. Ongwaye tji matu sokurikotamena ku Jehova pamwe nOvakriste ovakwetu vatjiri?

¹⁸ Jehova u vanga kutja tu rikotamene ku ye pu nOvakriste ovakwetu vatjiri. Ombeibela i tja: “Ngatu rikenderasane mokupandiparisasana morusuvero na moviungura oviwa. Atu isa okuyenda kozombongarero zombongo otja tjiva tjinga ave tjita; nungwari ngatu pandiparisasane okuyenda ku zo, tjinga amamu munu kutja Eyuva raMuhona ri ri pokuya.” (Ovaheberi 10:24, 25) Tu sokukondja pu twa yandera kutja aruhe tu kare pozombongarero azehe zombongo. Ozombongarero nḓa ze tu pa oruveze oruwa kutja tu tungasane mombepo nokutunduuzasana.

19. Otjikeṋa tji matji tu vatere okusuvera ovakambure ovakwetu?

¹⁹ Tji wa kara pozombongarero zombongo, mo kamuna omapanga omawa ngu maye ku vatere okukarera Jehova. Mo kahakaena ku nomarumbi novaṱena kwetu pekepeke mbe kondja pu mave yenene tjimuna ove kutja ve karere Jehova. Owo wina kavandu ohomonena nu ve tjita ozondataiziro tjimuna ove. Indu tji va tjiti nao, ve isira. (Lesa Ovakolose 3:13.) Aruhe yandja ombango kovikaṋena  oviwa vyovakambure ovakweṋu, orondu okutjita nao maku ku vatere okuvesuvera nokutumbuka popezu na Jehova.

20, 21. “Omuinyo watjiri,” u heya tjike?

²⁰ Jehova u vanga kutja omapanga we aehe ye kare nehupo esembasemba. Ombeibela i tu honga kutja moruyaveze ehupo retu kari nokukasana kehupo ndi tu hupa nai.

²¹ Moruyaveze katu nakukahupa oure wozombura 70 poo 80 uriri nungwari matu kahupa nga aruhe. Moparadisa matu karira ovandu ovaveruke, mbe nohange nondjoroka. Ombeibela itja imbwi “omuinyo watjiri.” Jehova u tu kwizikira kutja me tu pe omuinyo mbwi, posi yokutja matu sokutjita avihe mbi matu yenene nai kutja tu ‘rarakane omuinyo’ mbwi.—1 Timoteus 6:12, 19.

22. (a) Matu yenene vi ‘okumuna omuinyo watjiri’? (b) Ongwaye tji tu hina maatu munu omuinyo waaruhe ku eṱe oveni?

²² Eṱe matu yenene vi ‘okumuna omuinyo watjiri’? Matu ‘sokutjita ouwa.’ (1 Timoteus 6:18) Ihi matji hee kutja matu sokuṱakamisa mbi matu rihongo okuza mOmbeibela momiinyo vyetu. Posi yokutja, omuinyo watjiri kau zu mozongondjero zetu oveni. Kamaatu yenene okumuna omuinyo waaruhe ku eṱe oveni. Owo otjiyandjewa okuza ku Jehova kovakarere ve ovaṱakame nu tji tji raisa “otjari” tje. (Ovaroma 5:15) Tate womeyuru tjiri u vanga okuyandja otjiyandjewa hi kovakarere ve ovaṱakame.

23. Omena ratjike tji mo sokutoora omikambo omisemba nai?

²³ Ripura omuini kutja, ‘Hapo ami mbi rikotamena ku Mukuru momuano mbwe yakura?’ Indu tji wa munu kutja mo sokutjita omarundurukiro kaaṋi, tjita nao tjimanga. Tji matu ṱakama mu Jehova natu tjiti oviṋa avihe mbi matu yenene kutja tu kare nonḓuviro ku ye, eye ma rire omaundiro wetu. Eye ma tjevere ovakarere ve ovaṱakame  momayuva omasenina wouye waSatan ourunde mbwi. Okuzambo, Jehova ma tjiti kutja tu kare mOparadisa nga aruhe otja pa kwizika. Ove mo yenene okukara nomuinyo watjiri indu tji wa toora omikambo omisemba nai.