1, 2. Dini alai kitai ulih belindung kemaya hari tu?

UJI gambarka, nuan benung bejalai maya hari kudi. Mua hari chelum, kilat manchar, lalu guntur balat bemunyi. Enda lama udah nya, ujan bangat nyadi. Nuan ngiga endur belalai. Nuan berasai gaga laban tetemuka endur ti likun sereta rangkai!

² Kitai mega napi utai ti sama kemaya hari tu. Gaya utai ba dunya majak jai. Nuan engka berunding, ‘Dini alai aku ulih belindung?’ Ku pemasmur nulis: Aku deka “nyebut ngagai [Jehovah], ‘Nuan endang penyaga enggau pengelindung aku. Nuan endang Petara aku. Aku manggaika pengarap aku ba Nuan.’” (Masmur 91:2) Amat, Jehovah ulih ngelantangka ati kitai ari penusah ke ditapi kitai diatu, lalu Iya meri kitai pengadang ti ngerinduka ati ke jemah ila.

3. Baka ni kitai ulih nyadika Jehovah endur alai belindung?

³ Baka ni Jehovah ulih nyaga kitai? Iya ulih nulung kitai mutarka sebarang penusah ke ditapi kitai, lalu Iya kering agi ari sebarang orang ke deka ngemediska kitai. Taja pan utai ti jai nyadi ba kitai diatu, kitai pechaya Jehovah deka ngaduka pengerusak nya jemah ila. Bup Kudus meransang kitai: ‘Meruan dalam pengerindu Petara.’ (Jude 21) Kitai patut meruan semak ngagai Jehovah ngambika bulih tulung ari Iya ba maya ti tusah. Tang baka ni kitai ulih ngereja nya?

4, 5. Baka ni Jehovah ngayanka pengerindu Iya ngagai kitai?

⁴ Ngambika meruan semak ngagai Jehovah, kitai patut nemu Iya balat rinduka kitai. Uji pikirka semua utai ti  udah digaga Jehovah ke kitai. Iya udah meri kitai dunya ti manah, lalu ngemenuhka dunya enggau utai tumbuh sereta jelu ti ngerinduka ati. Iya mega meri kitai pemakai ti nyamai sereta ai ti beresi. Nengah Bup Kudus, Jehovah udah ngajar kitai pasal nama sereta kualiti Iya ti badas. Ari semua utai, Iya mandangka pengerindu ngagai kitai lebuh Iya ngirumka Anak ti dikesayauka Iya, Jesus, ke dunya ngambika meri nyawa diri ke kitai. (John 3:16) Lalu ketegal genselan Jesus nya, kitai bisi pengadang ti ngerinduka ati jemah ila.

⁵ Jehovah udah nyediaka Perintah Iya ti di serega ke enda lama agi deka muai semua pemerinsa. Perintah nya deka ngaga dunya nyadi paradais, alai semua orang deka idup lantang sereta dalam pemaik belama iya. (Masmur 37:29) Siti agi chara Jehovah udah ngayanka pengerindu ngagai kitai, iya nya ngajar kitai chara idup ti pemadu manah diatu. Iya mega ngasuh kitai besampi ngagai Iya, lalu Iya seruran sedia deka mendingka sampi kitai. Jehovah udah enggau terang ngayanka pengerindu Iya ngagai tiap iku kitai.

6. Baka ni nuan ulih malas pengerindu Jehovah?

⁶ Baka ni nuan ulih malas pengerindu Jehovah? Ngayanka diri beterima kasih ke semua utai ti udah digaga Iya ke nuan. Tang sayau amat, mayuh orang kemaya hari tu enda beterima kasih. Tu mega nyadi lebuh Jesus agi ba dunya. Bisi sekali, Jesus ngeraika sepuluh iku orang ke kena sakit lan, tang semina seiku aja ke beterima kasih ngagai iya. (Luke 17:12-17) Kitai deka baka lelaki ke beterima kasih ngagai Jesus. Kitai seruran deka beterima kasih ngagai Jehovah.

7. Ni penalam pengerindu kitai ngagai Jehovah?

⁷ Kitai mega patut ngayanka pengerindu ngagai Jehovah. Jesus ngasuh bala murid iya rinduka Jehovah enggau  pengabis ati sida, enggau pengabis semengat sida, enggau pengabis runding sida. (Bacha Matthew 22:37.) Nama reti nya?

8, 9. Baka ni kitai ulih ngayanka diri rinduka Jehovah?

⁸ Kati nya chukup semina madahka diri rinduka Jehovah? Enda. Enti kitai rinduka Jehovah enggau pengabis ati, semengat enggau runding, kitai deka ngayanka pengerindu ngagai Iya ari utai ti digaga kitai. (Matthew 7:16-20) Bup Kudus enggau terang madahka, enti kitai rinduka Petara, kitai deka ngasika pesan Iya. Kati nya tusah? Enda, laban “pesan Iya ukai utai ti mar dititihka.”—Bacha 1 John 5:3.

⁹ Lebuh kitai ngasika Jehovah, kitai ngembuan pengidup ti lantang sereta ngemuaska ati. (Isaiah 48:17, 18) Tang nama deka nulung kitai meruan semak ngagai Jehovah? Aram kitai meda.

10. Nama kebuah nuan patut terus belajar pasal Jehovah?

¹⁰ Baka ni nuan nyadi pangan Jehovah? Ari pengawa belajarka Bup Kudus, nuan ngelala Jehovah enggau dalam agi sereta ngemansangka kaul enggau Iya. Kaul tu baka api ke deka diasuh nuan mengkang mau. Baka api ke begunaka kayu ngambika mengkang mau, nuan patut terus belajar pasal Jehovah ngambika kaul nuan enggau Iya mengkang teguh.—Jaku Dalam 2:1-5.

11. Nama deka nyadi enti nuan terus belajarka Bup Kudus?

¹¹ Seraya nuan terus belajarka Bup Kudus, nuan deka belajarka utai ti amat negu ati nuan. Peratika baka ni asai ati dua iku murid Jesus lebuh Jesus nerangka utai ti dipadah Bup Kudus ngagai seduai iya. Ku seduai iya: ‘Enda ka ati tua asai ke disar api lebuh iya bejaku enggau tua ba jalai raya tadi, lebuh iya nerangka Bup Kudus ngagai tua?’—Luke 24:32.

12, 13. (a) Nama ulih nyadi ba pengerindu kitai ngagai Petara? (b) Baka ni kitai ulih ngetanka pengerindu ngagai Jehovah ngambika meruan bisi?

 ¹² Sama baka ati dua iku murid nya ke berasai diperansang lebuh seduai iya meretika Bup Kudus, nuan mega ngasaika utai ti sama lebuh nuan berengkah meretika Bup Kudus. Tu nulung nuan ngelala Jehovah sereta rinduka Iya. Nuan enggai pengerindu nuan ngagai Jehovah majak kurang.—Matthew 24:12.

¹³ Enti nuan udah nyadi pangan Petara, nuan patut bebendar ngetanka kaul enggau Iya ngambika teguh. Nuan enda tau enda terus belajar pasal Iya enggau Jesus, lalu mikirka utai ti dipelajarka nuan sereta chara nuan ulih ngena utai ti dipelajarka ba pengidup. (John 17:3) Lebuh nuan macha tauka belajarka Bup Kudus, tanya diri empu: ‘Nama dipelajarka aku pasal Petara Jehovah ari utai tu? Nama kebuah  aku patut rinduka Iya enggau pengabis ati sereta semengat?’—1 Timoti 4:15.

14. Baka ni sampi nulung pengerindu kitai ngagai Jehovah mengkang teguh?

¹⁴ Enti nuan bisi pangan rapat, nuan selalu berandau enggau iya, lalu tu ngasuh kaul seduai mengkang teguh. Pia mega, lebuh kitai seruran bejaku enggau Jehovah dalam sampi, nya ngasuh pengerindu kitai ngagai Iya mengkang teguh. (Bacha 1 Tesalonika 5:17.) Sampi nya pemeri ti badas ari Apai kitai ti di serega. Kitai patut seruran bejaku enggau Iya ari ati. (Masmur 62:8) Kitai enda patut nandu leka sampi ke dikingatka kitai, tang patut nyebut utai ke amat bisi dalam ati. Amat, enti kitai terus belajarka Bup Kudus sereta besampi ari ati, kitai deka ngasuh pengerindu ngagai Jehovah teguh.

15, 16. Nama runding nuan pasal pengawa nginjil?

¹⁵ Enti kitai deka meruan semak ngagai Jehovah, kitai mega patut bejaku pasal pengarap kitai enggau orang bukai. Bejaku enggau orang bukai pasal Jehovah nya peluang ti badas. (Luke 1:74) Lalu nya tanggung pengawa ke diberi Jesus ngagai semua orang Kristian ti bendar. Tiap iku kitai patut nusui berita manah pasal Perintah Petara. Kati nuan udah ngereja nya?—Matthew 24:14; 28:19, 20.

¹⁶ Rasul Paul ngasaika pengawa nginjil nya berega amat; iya ngumbai nya “reta.” (2 Korint 4:7) Madah ngagai orang bukai pasal Jehovah sereta tuju Iya, nya pengawa ti beguna amat ke ulih digaga nuan. Nya siti chara nuan gawa ke Jehovah, lalu Iya beterima kasih ke utai ti digaga nuan ke Iya. (Hebrew 6:10) Nginjil mega ulih mai penguntung ngagai nuan sereta orang ke mendingka nuan, laban nuan nulung orang bukai sereta diri empu semak ngagai Jehovah, lalu bulih pengidup ti meruan belama iya. (Bacha 1 Korint  15:58.) Kati bisi pengawa bukai ke ulih ngasuh ati nuan puas agi?

17. Nama kebuah pengawa nginjil patut diperumbanka?

¹⁷ Pengawa nginjil patut diperumbanka. Kitai patut ‘nusui Jaku nya,’ lalu kitai patut ngereja nya enggau berumban sereta bebendar. (2 Timoti 4:2) Orang patut ninga pasal Perintah Petara. Bup Kudus madahka: ‘Hari Jehovah nyau semak - semak amat lalu deka datai enggau jampat!’ Hari nya enda laun. (Sepaniah 1:14; Habakuk 2:3) Amat, enda lama da agi, Jehovah deka ngerusak dunya Sitan ti jai. Sebedau nya nyadi, orang patut ditangkan ngambika sida ulih milih nyembah Jehovah.

18. Nama kebuah kitai patut nyembah Jehovah begulai enggau orang Kristian ti bendar ke bukai?

¹⁸ Jehovah deka kitai nyembah Iya begulai enggau orang Kristian ti bendar ke bukai. Bup Kudus madahka: “Lalu aram kitai berundingka chara kitai tau nyungkak pangan diri ngayanka pengerindu lalu ngereja pengawa ti badas, enda ngelengkaka pengawa begempuru, baka sekeda orang, tang meransang pangan diri, lalu bebendar agi ngereja nya laban kita meda Hari Tuhan nyau semak.” (Hebrew 10:24, 25) Kitai patut enggau naka ulih datai ngagai semua gempuru. Gempuru meri kitai peluang meransang sereta ngeringka pangan diri.

19. Nama ulih nulung kitai rinduka bala menyadi Kristian kitai?

¹⁹ Lebuh nuan datai ke gempuru, nuan deka bulih bala pangan ti manah ke deka nulung nuan nyembah Jehovah. Nuan deka betemu enggau mayuh bala menyadi Kristian ti bebida. Baka nuan, sida deka enggau naka ulih nyembah Jehovah. Lalu sida mega enda sempurna sereta ngereja penyalah. Enti sida ngereja penyalah, besedia meh ngampun sida. (Bacha Kolosi 3:13.) Seruran beratika kualiti manah bala menyadi Kristian nuan, laban nya deka nulung nuan rinduka sida sereta majak semak agi ngagai Jehovah.

20, 21. Nama reti “pengidup ti bendar”?

²⁰ Jehovah deka semua bala pangan Iya ngembuan pengidup ti pemadu badas. Bup Kudus madahka, pengidup kitai jemah ila deka jauh bebida ari pengidup kitai kemaya hari tu.

²¹ Jemah ila, kitai deka idup belama iya, ukai semina idup 70 tauka 80 taun. Kitai deka gaga ati enggau “pengidup ti meruan belama iya” laban deka gerai belama iya, bisi pemaik, sereta pengelantang ba dunya paradais ti manah. Nya meh ke dikumbai Bup Kudus “pengidup ti bendar.” Jehovah besemaya deka meri kitai pengidup ti bendar, tang kitai enda tau enda enggau naka ulih diatu bepegai rat ba pengidup ti bendar.—1 Timoti 6:12, 19.

22. (a) Baka ni kitai ulih bepegai rat ba “pengidup ti bendar”? (b) Nama kebuah kitai enda layak nerima pengidup ti meruan belama iya?

²² Baka ni kitai ulih bepegai rat ba “pengidup ti bendar”? Kitai enda tau enda “ngereja pemadas” sereta “kaya dalam pengawa ti badas.” (1 Timoti 6:18) Reti nya, kitai patut nitihka utai ti dipelajarka kitai ari Bup Kudus. Taja pia, pengidup ti bendar ukai bepanggai ba utai ke dikereja kitai empu. Kitai enda layak nerima pengidup ti meruan belama iya. Nya pemeri ti pechuma ari Jehovah ngagai nembiak Iya ke tetap ati, chunto ti “pengasih” ari Iya. (Rome 5:15) Apai kitai ti di serega amat keran deka meri pemeri tu ngagai nembiak Iya ke tetap ati.

23. Nama kebuah nuan patut ngaga pilih ti betul diatu?

²³ Tanya diri empu, ‘Kati aku nyembah Jehovah ngena chara ti diterima Iya?’ Enti nuan ngasaika diri patut ngaga sekeda ubah, nuan patut ngaga iya jejampat. Enti kitai bepanggai ba Jehovah lalu enggau naka ulih ngasika Iya, Jehovah deka ngelindung kitai. Iya deka nembiak Iya ke tetap ati selamat ba maya hari ti penudi dunya Sitan ti jai.  Udah nya, Jehovah deka nentuka kitai idup ba Paradais belama iya, baka ke udah disemaya Iya. Amat, nuan tau bulih pengidup ti bendar enti nuan ngaga pilih ti betul diatu!