1, 2. Pakabirokantayo ita iti proteksion?

PANUNOTEM a magmagnaka iti ruar bayat nga um-umay ti bagyo. Nakuyemen ti tangatang, mangrugin nga agkimat ken aggurruod. Kalpasanna, nagbayakabaken ti tudo. Nagbirokka iti paglinongam. Nabang-aranka unay idi nakabirokkan iti natalged ken namaga a lugar!

² Kasta met la ti situasiontayo ita. Dumakdakes dagiti kasasaad iti lubong. Mabalin a maisaludsodmo, ‘Pakabirokak iti proteksion?’ Insurat ti maysa a salmista iti Biblia: “Ibagakto ken Jehova: ‘Sika ti kamang ken salaknibko, ti Diosko a pagtalkakto.’” (Salmo 91:2) Wen, kabaelannatayo a bang-aran ni Jehova kadagiti problematayo ita, ken ipaayannatayo iti nagsayaat a namnama iti masanguanan.

3. Ania ti aramidentayo tapno agbalin ni Jehova a kamangtayo?

³ Kasano a maprotektarannatayo ni Jehova? Matulongannatayo a mangsango iti aniaman a problematayo, ken nabilbileg nga amang ngem iti asinoman a mabalin a mangdangran kadatayo. Uray no adda dakes a mapasamak kadatayo ita, masiguradotayo a tarimaanento dayta ni Jehova iti masanguanan. Iparegta kadatayo ti Biblia: “Agtalinaedkayo iti ayat ti Dios.” (Judas 21) Masapul nga agtalinaedtayo a nadekket ken Jehova tapno tulongannatayo kadagitoy a narigat a tiempo. Ngem kasanotayo nga aramiden dayta?

4, 5. Kasano nga impakita ni Jehova nga ay-ayatennatayo?

⁴ Tapno agtalinaedtayo a nadekket ken Jehova, masapul  nga ammuentayo no kasano kadakkel ti panagayatna kadatayo. Panunotem ti amin nga inaramiden ni Jehova para kadatayo. Intedna ti nagpintas a daga a napno iti agkakapintas a mula ken animal. Impaayannatayo met kadagiti agkakaimas a makan ken nadalus a danum a mainum. Babaen ti Biblia, insuro ni Jehova ti naganna ken dagiti nagsasayaat a kualidadna. Kangrunaan iti amin, impakitana nga ay-ayatennatayo babaen ti panangibaonna ditoy daga iti dungdungnguenna nga Anak a ni Jesus, tapno isakripisiona ti biagna para kadatayo. (Juan 3:16) Gapu iti dayta, addaantayo iti nagsayaat a namnama iti masanguanan.

⁵ Inted ni Jehova ti Mesianiko a Pagarian, ti nailangitan a gobierno a dandanin mangikkat iti amin a panagsagaba. Pagbalinento dayta a Pagarian a paraiso ti daga, a pagbiagan ti amin a sitatalna ken siraragsak iti agnanayon. (Salmo 37:29) Ti sabali pay a pamay-an nga impakita ni Jehova nga ay-ayatennatayo ket ti panangisurona kadatayo iti kasayaatan a wagas ti panagbiag ita. Aw-awisennatayo met nga agkararag kenkuana, ken kanayon a nakasagana a dumngeg kadagiti kararagtayo. Nalawag nga impakita ni Jehova nga ay-ayatenna ti tunggal maysa kadatayo.

6. Kasanom a masubadan ti ayat ni Jehova?

⁶ Kasanom a masubadan ti ayat ni Jehova? Ipakitam nga agyamyamanka iti amin nga inaramidna para kenka. Makapaladingit ta adu ita ti saan a managyaman. Kasta met laeng idi adda ni Jesus ditoy daga. Naminsan, pinaimbag ni Jesus ti 10 nga agkukutel ngem maymaysa laeng ti nagyaman kenkuana. (Lucas 17:12-17) Kayattayo a tuladen dayta a lalaki a nagyaman ken Jesus. Kayattayo ti kanayon nga agyaman ken Jehova.

7. Kasano ti rumbeng a panangayattayo ken Jehova?

⁷ Masapul met nga ipakitatayo nga ay-ayatentayo ni Jehova. Imbaga ni Jesus kadagiti adalanna a masapul nga ayatenda ni Jehova iti amin a puso, amin a kararua, ken amin a panunotda.  (Basaen ti Mateo 22:37.) Ania ti kayat a sawen dayta?

8, 9. Kasanotayo a maipakita nga ay-ayatentayo ni Jehova?

⁸ Umdas kadi ti basta panangibaga nga ay-ayatentayo ni Jehova? Saan. No ay-ayatentayo ni Jehova iti amin a puso, kararua, ken panunottayo, ipakitatayo ti ayattayo kenkuana babaen ti aramid. (Mateo 7:16-20) Nalawag nga isursuro ti Biblia a no ay-ayatentayo ti Dios, tungpalentayo dagiti bilinna. Narigat kadi dayta? Saan, ta ‘saan a makapadagsen dagiti bilin’ ni Jehova.​—Basaen ti 1 Juan 5:3.

⁹ No agtulnogtayo ken Jehova, agbalin a naragsak ken makapnek ti biagtayo. (Isaias 48:17, 18) Ngem ania ti makatulong kadatayo nga agtalinaed a nadekket ken Jehova? Kitaentayo.

10. Apay a masapul nga itultuloymo ti agsursuro maipapan ken Jehova?

¹⁰ Kasano a nagbalinka a gayyem ni Jehova? Babaen ti panagadalmo iti Biblia, ad-adda a naam-ammom ni Jehova ken nagbalin a gayyemmo. Dayta a pannakigayyem ket kasla apuy a kayatmo a pagtalinaeden a narubrob. Kas iti apuy a masapul a sungrodan, masapul nga itultuloymo ti agsursuro maipapan ken Jehova tapno agtalinaed a natibker ti panaggayyemyo.​—Proverbio 2:1-5.

11. Ania koma ti epekto kenka dagiti pannursuro ti Biblia?

¹¹ Bayat nga itultuloymo ti agadal iti Biblia, addanto dagiti masursurom a talaga a mangtukay iti pusom. Siputam no ania ti narikna ti dua nga adalan ni Jesus idi inlawlawagna kadakuada dagiti padto ti Biblia. Kinunada: “Isu met la gayam a natukay ti pusota idi makisarsarita kadata iti dalan, bayat nga inlawlawagna a naimbag kadata dagiti Kasuratan!”​—Lucas 24:32.

12, 13. (a) Ania ti mabalin a mapasamak iti ayattayo iti Dios? (b) Kasanotayo a mapagtalinaed a nabiag ti ayattayo ken Jehova?

 ¹² Natukay ti puso dagiti adalan idi naawatanda ti Kasuratan, ket mabalin a kasta met la ti nariknam a kinagagar idi nangrugi a maawatam ti Biblia. Dayta ti timmulong kenka a mangam-ammo ken Jehova ken mangayat kenkuana. Dimo kayat a bumaaw dayta nga ayat.​—Mateo 24:12.

¹³ Apaman nga agbalinka a gayyem ti Dios, masapul nga ikagumaam a pagtalinaeden a natibker ti panaggayyemyo. Masapul nga itultuloymo ti agsursuro maipapan kenkuana ken ni Jesus, panunotem dagiti maad-adalmo, ken no kasano a mayaplikarmo dagita iti biagmo. (Juan 17:3) No basaem wenno adalem ti Biblia, isaludsodmo iti bagim: ‘Ania ti isuro daytoy kaniak maipapan ken Jehova a Dios? Apay a masapul nga ayatek iti amin a puso ken kararuak?’​—1 Timoteo 4:15.

14. Kasano a makatulong ti kararag tapno agtalinaed a natibker ti ayattayo ken Jehova?

 ¹⁴ No adda nasayaat a gayyemmo, kanayonka a makitungtong kenkuana tapno agtalinaed a natibker ti panaggayyemyo. No kanayontayo met a makisarita ken Jehova babaen ti kararag, agtalinaed a natibker ti ayattayo kenkuana. (Basaen ti 1 Tesalonica 5:17.) Ti kararag ket nagsayaat a sagut manipud iti nailangitan nga Amatayo. Masapul a kanayon a naimpusuan a makisaritatayo kenkuana. (Salmo 62:8) Saantayo nga ikabesa dagiti kararagtayo no di ket ibagatayo ti talaga a marikriknatayo. Wen, no itultuloytayo nga adalen ti Biblia ken naimpusuan nga agkararagtayo, agtalinaed a natibker ti ayattayo ken Jehova.

15, 16. Ania ti pangibilangam iti trabaho a panangasaba?

¹⁵ No kayattayo ti agtalinaed a nadekket ken Jehova, masapul met nga ibagatayo iti sabsabali ti maipapan iti pammatitayo. Nagsayaat a pribilehio ti panangisarita iti sabsabali iti maipapan ken Jehova. (Lucas 1:74) Ken responsabilidad dayta nga inted ni Jesus iti amin a pudno a Kristiano. Masapul nga ikasaba ti tunggal maysa kadatayo ti naimbag a damag maipapan iti Pagarian ti Dios. Inaramidmo kadin dayta?​—Mateo 24:14; 28:19, 20.

¹⁶ Imbilang ni apostol Pablo a nakapatpateg ti panangasaba; inawaganna dayta a “gameng.” (2 Corinto 4:7) Ti panangibaga iti sabsabali iti maipapan ken Jehova ken iti panggepna ti kapatgan a trabaho a maaramidmo. Maysa dayta a pamay-an ti panagserbim ken Jehova, ket ipategna ti ar-aramidem para kenkuana. (Hebreo 6:10) Maysa pay, ti panangasaba ket pakagunggonaam ken dagidiay dumngeg kenka ta tultulongam ida ken ti bagim nga agbalin a nadekket ken Jehova ken maaddaan iti agnanayon a biag. (Basaen ti  1 Corinto 15:58.) Adda kadi pay sabali a trabaho nga ad-adda a mangyeg kenka iti pannakapnek?

17. Apay a naganat ti trabaho a panangasaba?

¹⁷ Naganat unay a trabaho ti panangasaba. Masapul nga ‘ikasabatayo ti sao’ ken masapul a ‘sigaganat nga aramidentayo dayta.’ (2 Timoteo 4:2) Nasken a mangngeg dagiti tattao ti maipapan iti Pagarian ti Dios. Kuna ti Biblia: “Asidegen ti dakkel nga aldaw ni Jehova! Asidegen ken nakaparpartak ti iyaayna!” “Saanto a maladaw” ti panungpalan! (Sofonias 1:14; Habakuk 2:3) Wen, nakaas-asidegen a dadaelen ni Jehova ti dakes a lubong ni Satanas. Sakbay a mapasamak dayta, masapul a mapakdaaran dagiti tattao tapno mapilida ti agserbi ken Jehova.

18. Apay a masapul nga agdaydayawtayo ken Jehova a kadua dagiti pudno a Kristiano?

¹⁸ Kayat ni Jehova nga agdaydayawtayo kenkuana a kadua dagiti pudno a Kristiano. Kuna ti Biblia: “Agpipinnanunottayo tapno matignaytayo a mangipakita iti ayat ken nasayaat nga ar-aramid, a ditay baybay-an ti panaggigimongtayo, kas iti nakayugalian ti dadduma, no di ket agpipinnaregtatayo, ken ad-adda pay nga aramidentayo amin dagita bayat a makitkitayo nga umas-asidegen ti aldaw.” (Hebreo 10:24, 25) Ikagumaantayo nga atenderan ti amin a gimong. Gundawaytayo ti makapagpipinnaregta ken makapagpipinnabileg kadagiti gimong.

19. Ania ti makatulong kadatayo a mangayat kadagiti Kristiano a kakabsattayo?

¹⁹ No umatenderka kadagiti gimong, maam-ammom dagiti nagsayaat a gagayyem a tumulong kenka nga agdayaw ken Jehova. Nadumaduma a kakabsat ti maam-ammom sadiay, a kas kenka a mangar-aramid iti amin a kabaelanda nga agdayaw iti Dios. Ken kas kenka, saanda a perpekto ken agkamalida met. No agkamalida, nakasaganaka koma a mangpakawan. (Basaen ti Colosas 3:13.) Kanayon a kitaem dagiti nasayaat a kababalin dagiti Kristiano a kakabsatmo ta  makatulong dayta kenka a mangayat kadakuada ken agbalinka a nadekdekket ken Jehova.

20, 21. Ania ti “pudpudno a biag”?

²⁰ Kayat ni Jehova a maaddaan dagiti gagayyemna iti kasayaatan a biag. Isursuro ti Biblia a ti biagtayo iti masanguanan ket talaga a naiduma iti biag ita.

²¹ Iti masanguanan, agbiagtayo nga agnanayon, saan la a 70 wenno 80 a tawen. Tagiragsakentayto ti “biag nga agnanayon” nga addaan iti perpekto a salun-at, talna, ken kinaragsak iti napintas a paraiso. Dayta ti ibagbaga ti Biblia a “pudpudno a biag.” Inkari ni Jehova nga itedna kadatayo daytoy a pudpudno a biag, ngem masapul nga aramidentayo ti amin a kabaelantayo a ‘mangpetpet’ iti dayta.​—1 Timoteo 6:12, 19.

22. (a) Kasano a ‘mapetpetantayo ti pudpudno a biag’? (b) Apay a saantayo a mategged ti agnanayon a biag?

²² Kasano a ‘mapetpetantayo ti pudpudno a biag’? Masapul nga ‘agaramidtayo iti naimbag’ ken ‘agbalintayo a nabaknang iti nasayaat nga ar-aramid.’ (1 Timoteo 6:18) Kayatna a sawen a nasken nga iyaplikartayo ti naadaltayo iti Biblia. Ngem saantayo a magun-od ti pudpudno a biag iti bukodtayo a panagregget. Ditay pulos mategged ti agnanayon a biag. Dayta ket awan bayadna a sagut ni Jehova kadagiti matalek nga adipenna. Maysa dayta a pakakitaan iti ‘nagpaiduma a kinaimbagna.’ (Roma 5:15) Talaga a kayat nga ited ti nailangitan nga Amatayo daytoy a sagut kadagiti matalek nga adipenna.

23. Apay a masapul a mangaramidka ita kadagiti umiso a desision?

²³ Isaludsodmo iti bagim, ‘Daydayawek kadi ti Dios iti pamay-an a kayatna?’ No makitam nga adda masapul a balbaliwam, aramidem a dagus dayta. No agpannuraytayo ken Jehova ken ikagumaantayo ti agtulnog kenkuana, agbalin a kamangtayo ni Jehova. Protektaranna dagiti matalek nga  adipenna kadagitoy maudi nga al-aldaw ti dakes a lubong ni Satanas. Kalpasanna, siguraduen ni Jehova nga agbiagtayo nga agnanayon iti Paraiso, kas iti inkarina. Wen, magun-odmo ti pudpudno a biag no mangaramidka ita kadagiti umiso a desision!