1, 2. Dai ni aten hta makawp maga lam gara kaw mu tam na kun?

NBUNG laru ru ai shani hta nang shinggan kaw lam hkawm nga ai ngu shingran yu u. Lamu gaw sin wa ai hte myihprap galam nna mu ngoi wa ai. Dai hpang marang htu wa ai. Shimlum ai shara hpe nang hkan tam ai. Hpang jahtum hta, shimlum nna hkraw ai shingbyi shara hpe mu ai shaloi nang grai pyaw mat na re.

² Dai ni anhte dai zawn masa hta nga nga ai. Mungkan masa ni grau sawng wa ai. ‘Makawp maga lam gara kaw mu tam na kun?’ nga nna nang myit na re. Shakawn kungdawn sara ndai hku ka ai: “Ngai gaw Yehowa hpe, ‘Nye a shingbyi shara hte wahpang, Ngai hpa nga ai Karai Kasang nang rai nga ndai,’ nga nna tsun nga na nngai.” (Shakawn 91:2) Ya aten Yehowa gaw, anhte a manghkang ni kaw nna hkye lu ai zawn, htawm hpang a matu mung myit mada lam jaw ai.

3. Yehowa gaw anhte a shingbyi shara gara hku byin lu na kun?

³ Yehowa anhte hpe gara hku makawp maga ya ai kun? Anhte a manghkang ni hpe hparan lu na matu shi karum ya lu nna, anhte hpe shoihpa jaw mayu ai ni hta na shi grau atsam nga ai. Ya, anhte hta n kaja ai lam ni byin nga yang pyi, Yehowa gaw htawm hpang hta bai kaja hkra galaw ya na hpe kam mai ai. Anhte hpe “Karai Kasang a n-gaw nwai ai myit hta a nga nga mu” nga nna Chyum Laika hta n-gun jaw da ai. (Yuda 21) Yakhkak ai aten hta karum shingtau lam lu na matu Yehowa hte ani sha nga ra ai. Raitim anhte gara hku galaw lu na kun?

4, 5. Yehowa gaw anhte hpe tsawra ai lam gara hku madun ai kun?

⁴ Yehowa hte ani sha nga lu na matu, shi anhte hpe kade daram tsawra ai hpe chye ra ai. Anhte a matu Yehowa galaw  ya ai lam ni hpe myit yu u. Dusat ni, hpun ni, nampan ni hte tsawm htap nga ai mungkan ga hpe jaw da ai. Namchyim hkum ai malu masha ni hte san seng ai hka ni hpe mung jaw da ai. Yehowa gaw Chyum Laika hku nna, shi a amying hte atsam ningja ni hpe tsun dan ai. Anhte a matu shi tsawra ai kasha Yesu a asak hpe jaw nna anhte hpe grai tsawra ai lam madun ai. (Yawhan 3:16) Dai zawn sak jaw ya wa ai majaw, anhte hta htawm hpang hte seng nna myit mada lam ni nga wa ai.

⁵ Yehowa gaw Meshia Mungdan re ai sumsing lamu asuya hpe gawde ngut sai majaw, kade nna yang yakhkak ai lam yawng hpe yeng seng ya sana. Dai Mungdan gaw mungkan ga hpe hparadisu byin hkra galaw ya nna, dai hta nga ai ni gaw ngwi pyaw simsa let htani htana nga lu na re. (Shakawn 37:29) Yehowa gaw, anhte hpe ya aten hta kaja htum asak hkrung lu na matu sharin ya nna mung shi a tsawra myit hpe madun ai. Shi hpe akyu hpyi na matu saw shaga nna, anhte a akyu hpyi ga ni hpe madat ya na matu galoi mung jin nga ai. Yehowa gaw anhte langai hpra hpe tsawra ai lam asan sha madun dan ai.

6. Yehowa a tsawra myit hpe nang gara hku bai htang na kun?

⁶ Yehowa a tsawra myit hpe nang gara hku bai htang na kun? Nang hpe galaw ya ai lam yawng a matu, shi hpe chyeju dum ai lam madun ra ai. Dai ni aten hta chyeju n dum ai ni law nga ai. Yesu mungkan ntsa nga ai shaloi mung, chyeju n chye dum ai ni law law nga wa ai. Kalang mi hta, Yesu gaw manggang kap ai marai shi hpe shamai ya ai. Dai ni kaw nna marai langai sha shi hpe chyeju dum wa ai. (Luka 17:12-17) Yesu hpe chyeju dum ai wa hte sha anhte bung mayu ga ai. Yehowa hpe galoi mung chyeju dum chye ai ni anhte byin mayu ai.

7. Yehowa hpe anhte kade daram tsawra ging ai kun?

⁷ Anhte mung, Yehowa hpe tsawra ai lam madun ra ai. Yesu gaw shi a sape ni hpe myit masin mahkra, myit kraw lawang  mahkra, myit mang mahkra hte Yehowa hpe tsawra na matu tsun wa ai. (Mahte 22:37 hpe hti u.) Dai gaw hpa lachyum rai kun?

8, 9. Yehowa hpe anthe tsawra ai lam gara hku madun lu na kun?

⁸ Yehowa hpe anhte tsawra ai ngu n-gup ga hte tsun ai hte sha rai sai kun? N re. Yehowa hpe myit masin mahkra, myit kraw lawang mahkra, myit mang mahkra hte anhte tsawra ai nga yang, galaw hkawm sa ai lam ni hta tsawra ai lam hpe tatut madun na re. (Mahte 7:16-20) Anhte Karai Kasang hpe tsawra ai nga yang, shi hkang da ai tara ni hpe hkan sa na re nga nna Chyum Laika hta asan sha tsun da ai. Dai gaw yak ai kun? N yak ai. Yehowa a “hkang da ai ga chyawm gaw, yak la nga ai n rai” nga nna tsun da ai majaw re.—1 Yawhan 5:3 hpe hti u.

⁹ Yehowa a ga madat yang, ngwi pyaw nna myit dik ai prat lu na re. (Esaia 48:17, 18) Yehowa hte ani sha nga lu na matu anhte hpe gara gaw karum ya lu ai kun? Yu yu ga.

10. Yehowa a lam hpa majaw matut hkaja ra ai kun?

¹⁰ Yehowa a jinghku nang gara hku byin lu na kun? Chyum Laika hkaja ai kaw nna, nang Yehowa a lam grau chye wa nna shi hte grau hku hkau wa sai. Ndai hku hkau lam hpe wan hte shadawn mai ai. Wan matut chyi nga na matu hpun ra ai zawn, Yehowa hte hku hkau lam ngang kang na matu, shi a lam matut sharin la ra ai.—Ga Shagawp 2:1-5.

11. Chyum Laika hkaja ai gaw nang hpe gara hku akyu jaw lu ai kun?

¹¹ Chyum Laika matut hkaja wa ai hte maren, na a myit masin hpe hkra ya ai lam ni chye wa na. Ga shadawn, Yesu gaw shi a sape lahkawng hpe Chyum Laika myihtoi ga ni hpe sanglang dan ai shaloi, myit masin hpe kade daram hkra ya ai lam Chyum Laika hta ndai hku tsun da ai: “Lam e anhte ga tsun nna, Chyum Laika ni a ga lachyum tsun hpaw dan mi ai shaloi, an a myit masin gadau gadap nga ma li ai, n rai ni?”—Luka 24:32.

12, 13. (a) Yehowa hpe tsawra ai anhte a tsawra myit gaw hpa byin mat chye ai kun? (b) Yehowa hpe tsawra ai myit matut nga hkra anhte gara hku galaw lu na kun?

 ¹² Yesu a sape ni gaw Chyum Laika chye na wa ai shaloi myit masin hkra wa ai zawn, nang mung Chyum Laika shawng nnan chye na wa ai shaloi dai zawn hkamsha wa na re. Dai hku hkamsha ai myit gaw Yehowa hpe chye chyang wa nna tsawra wa hkra karum ya ai. Dai tsawra myit yawm mat hkra nang n kam galaw na re.—Mahte 24:12.

¹³ Karai Kasang a jinghku byin mayu yang shi hte hku hkau lam ngang kang hkra shakut ra ai. Karai Kasang hte Yesu a lam matut sharin la ra ai. Nang sharin la ai lam ni hpe na a prat hta gara hku hkan sa na hpe sumru ra ai. (Yawhan 17:3) Nang Chyum Laika hti ai (sh) hkaja ai shaloi tinang hkrai ndai hku san yu u: ‘Ndai gaw Yehowa Karai Kasang hte seng nna ngai hpe hpa sharin ya ai kun? Shi hpe myit masin mahkra, myit kraw lawang mahkra hte hpa majaw tsawra ging ai kun?’—1 Timohti 4:15.

14. Akyu hpyi ai gaw Yehowa hpe tsawra ai myit matut nna ngang kang wa hkra gara hku karum ya ai kun?

 ¹⁴ Nang hte na a manang galoi mung matut mahkai ai gaw, nan lahkawng a hku hkau lam hpe matut ngang kang ya ai. Dai hte maren Yehowa hpang tut nawng akyu hpyi yang, shi hpe tsawra ai myit matut nna grau ngang kang wa na. (1 Htesaloni 5:17 hpe hti u.) Akyu hpyi ai gaw sumsing lamu na Wa anhte hpe jaw da ai laksan kumhpa re. Anhte myit masin mahkra hte shi hpe tut nawng akyu hpyi ra ai. (Shakawn 62:8) Anhte a akyu hpyi ga gaw matsing da ai ga ni hpe bai kahtap htap tsun ai hku n re ai sha, myit kraw kata na sa ai ga ni rai ra ai. Chyum Laika hpe matut hkaja nna, myit masin mahkra hte akyu hpyi yang, Yehowa hpe tsawra ai myit matut ngang kang nga na re.

15, 16. Hkaw tsun bungli hpe nang gara hku mu mada ai kun?

¹⁵ Yehowa hte ani sha nga mayu yang, anhte a kam sham ai lam kaga ni hpe tsun dan ra ai. Yehowa a lam kaga ni hpe tsun dan ai gaw, laksan ahkaw ahkang langai re. (Luka 1:74) Dai gaw teng man ai Hkristan yawng hpe Yesu jaw da ai lit re. Anhte yawng gaw Karai Kasang Mungdan a kabu gara shiga hpe hkaw tsun ra ai. Nang dai hku galaw nga sai kun?—Mahte 24:14; 28:19, 20.

¹⁶ Kasa Pawlu gaw, hkaw tsun bungli hpe grai manu shadan ai majaw, dai hpe “sut gan” nga nna tsun ai. (2 Korinhtu 4:7) Yehowa hte shi a yaw shada lam kaga ni hpe tsun dan ai gaw, nang galaw lu ai kaw nna kaja htum re ai. Dai gaw, Yehowa a magam gun ai rai nna, nang galaw ai hpe shi manu shadan ai. (Hebre 6:10) Hkaw tsun bungli gaw, nang hte kaga masha ni hpe akyu jaw ai. Shanhte hte nang gaw Yehowa hte grau nihtep wa nna htani htana asak mung lu na majaw re. (1 Korinhtu 15:58 hpe hti u.) Karai a magam gun ai hta grau nna nang hpe myit shadik ya lu ai kaga bungli naw nga ai kun?

17. Hkaw tsun bungli gaw hpa majaw grai ahkyak nga ai kun?

 ¹⁷ Hkaw tsun bungli gaw grai ahkyak ai. Anhte shakut “shaja” let “mungga hpe hkaw” tsun ra ai. (2 Timohti 4:2) Karai Kasang a mungdan shiga hpe masha yawng na lu na matu grai ahkyak nga ai. “Yehowa a galu kaba ai nhtoi ni nga ai; dai gaw ni wa nna grai lawan nga ai.” Chyahtum gaw “hpang hkrat na, n rai” nga nna Chyum Laika hta tsun da ai. (Zehpani 1:14; Habaku 2:3) Kade nna yang, Yehowa gaw Satan a n hkru ai mungkan hpe jahten kau sana re. Garai n jahten shi yang, masha ni Yehowa hpe nawku na matu lata lu hkra, shanhte hpe sadi jaw ra ai.

18. Teng man ai Hkristan ni hte rau Yehowa hpe hpa majaw nawku ra ai kun?

¹⁸ Yehowa gaw, teng man ai Hkristan ni hte rau, shi hpe anhte nawku na matu ra sharawng ai. “Tsaw ra ai myit rawng wa na hte kaja ai amu bungli byin wa na matu, shada shingjawng hkat lu hkra, langai hte langai myit tau myit htang nga ga: nkau mi wa htung nga ai zawn, anhte gaw tinang a zup hpawng ai lam hpe n koi n kau ai sha, shada da hpe shadum shahprang nga ga: dai nhtoi du magang ra ai hpe, nanhte chye myit dai majaw” shada da grau nna n-gun jaw hkat mu nga nna Chyum Laika hta tsun da ai. (Hebre 10:24, 25) Zuphpawng yawng hpe anhte shakut nna lung ra ai. Zuphpawng ni hta shada da n-gun jaw na matu ahkaw ahkang lu ai.

19. Anhte a Hkristan hpunau nauna ni hpe tsawra na matu hpa gaw karum ya lu ai kun?

¹⁹ Nang zuphpawng sa lung yang, Yehowa hpe nawku na matu nang hpe karum ya ai manang ni lu wa na. Nang zawn Yehowa hpe nawku na matu, shakut nga ai hpunau nauna ni hte nang hkrum lu na. Shanhte gaw nang zawn n hkum tsup ai ni rai nna shut chye ai. Shanhte shut hpyit ai lam ni nga wa yang, mara raw ya lu hkra myit hpe hkyen da ra ai. (Kolose 3:13 hpe hti u.) Hkristan hpunau nauna ni a kaja ai atsam ningja ni hpe galoi mung myit maju jung yang, shanhte hpe tsawra nna Yehowa hte ani sha nga lu na re.

20, 21. “Asak majing” ngu ai gaw hpa rai kun?

²⁰ Yehowa gaw shi a jinghku ni yawng hpe kaja htum asak aprat hpe lu shangun mayu ai. Htawm hpang hta lu na asak gaw, ya na asak hte tsep kawp n bung ai lam Chyum laika hta tsun da ai.

²¹ Htawm hpang hta anhte gaw asak 70, 80 daram hte n re ai sha, htani htana asak hkrung lu na re. Tsawm htap ai hparadisu hta ngwi pyaw simsa let hkam kaja nna, “htani htana asak” hkrung lu na re. Dai hpe Chyum Laika hta “asak majing” nga nna tsun da ai. Yehowa gaw anhte hpe dai asak majing jaw na ngu ga sadi jaw da ai. Raitim, dai hpe “magra” da na matu galaw mai ai lam yawng hpe galaw ra ai.—1 Timohti 6:12, 19.

22. (a) “Asak majing ngu ai asak hpe magra noi lu” na matu anhte gara hku galaw lu na kun? (b) Htani htana asak hpe anhte a n-gun atsam hte hpa majaw n mai lu ai kun?

²² “Asak majing ngu ai asak hpe magra noi lu” na matu, anhte gara hku galaw mai ai kun? Anhte “mai kaja ai galaw nga” nna, “mai kaja ai bungli hta sut su” ra ai. (1 Timohti 6:18) Chyum Laika kaw nna anhte chye wa ai hte maren hkan sa ra ai ngu ai lachyum re. Raitim, asak majing lu na gaw anhte shakut ai hta madung ai n re. Htani htana asak ngu ai gaw tinang a n-gun atsam hte lu mai ai n re. Dai gaw, sadi dung ai mayam ni hpe tsawra myit hte jaw ai Yehowa a “chyeju” kumhpa she re. (Roma 5:15) Sumsing lamu na anhte a Wa gaw, shi a sadi dung ai mayam ni hpe dai kumhpa teng sha jaw mayu ai.

23. Teng man ai lam hpe ya lata na matu hpa majaw ahkyak ai kun?

²³ ‘Karai Kasang hkap la ai lam hku ngai nawku nga ai kun?’ nga nna tinang hkum tinang san yu ra ai. Nang galai shai ra ai lam nkau mi hpe mu wa yang, kalang ta nang galai shai ra ai. Yehowa a ga madat na matu galaw lu ai lam yawng galaw nna, shi hpe kam hpa na nga yang Yehowa gaw anhte a shingbyi shara rai wa na re. Yehowa gaw Satan mungkan a jahtum nhtoi laman hta mung shi hpe sadi dung ai masha ni hpe hkye la na  re. Dai hpang Yehowa gaw ga sadi jaw da ai hte maren, Hparadisu hta anhte hpe htani htana nga shangun na re. Nang teng man ai lam hpe ya lata na nga yang, asak majing hpe lu na re.