1, 2. Tulota kupata pashi lishililidyo?

KUMBUKILA wako uwena mwanda, muwakati padyoko wona imepo yakujowa. Maundi ankwanjanga kudimbya na kushanya kunkumeta na ding’uva dinkwomba. Muwakati padyoko imbula ikatunduvanga kutonya. Wako undálambela pashinu pakutilila. Kwaumwiu wako undapuwanga ukapata pashinu pakutilila pambone!

² Wetu yadavo tunkunama muwakati wamatatisho lakulingana na alo. Shinamilo sha mushilambo shinkuka mushu shikamadyanga. Wako unkuulula kulyudya doni: ‘Ngulota kupata pashi pakutukutila?’ Nkwándika Libuku lya Dimu mu Ibibiliya atedoni: ‘Nammanyia Yeova: ‘wako ni lyutu lyakutilila na lishililidyo lyangu; Nnungu wangu, waninkulupila.’’ (Dimu 91:2) Yeova ankuulula kutupwashela pakulota tuulule kupililila, na kutupa lilindililo lyambone muwakati wida mushu.

3. Ituvaikidile tutende nyamani pakulota Yeova atupwashele?

³ Yeova alota kutushunga dashi? Nae ankuulula kutupwashela pakulota tuulule kupililila matatisho etu, mwaa nae ankuvanavo dimongo kumpunda aijá atuvyauvyanga. Ata vikatumilila vinu vyakujowa ambi, ituvaikidile tuvenavo wakika kenga muwakati wakuvandika Yeova andamalidya. Ibibiliya inkutupa ntima shii wakulota kuka mushu tunanopa “Nkati mulinagwaledyo lyake Nnungu.” (Yudashi 21) Wetu ituvaikidile tummandike Yeova pakulota nae atupwashele muwakati wakukamadyanga. Kanji tulota kuululula dashi?

4, 5. Yeova alodidye dashi kenga ankutunnagwaledya?

⁴ Pakulota tuke mushu tuva tuvambodi vake Yeova, ituvaikidile tumanye mwashi mwatunagwaladyedya nae wetu. Kumbukila vinu uti vyatandile Yeova. Nae anditupa shilambo shambone shapai, milandi vyakuvilingananga na vanyama vakuvailanga. Namomo, anditupa vyakulya vyakunogwa na medi lakukumbila lambone. Mu Ibibiliya, Yeova anditupundisha lina lyake na mavalelo ake ambone. Nayadavo, nae andilodya linagwaledyo lyoe kwetu pakuntumidya mwanagwe wakunagwaleka, Yesu, mushilambo shapai pakulota ajaule shingumi shake kwamwaa wetu. (Nshuwau 3:16) Kwamwaa wa shadaka asho, wetu tunkuvanavo lilindililo lyambone muwakati wamushu.

⁵ Yeova andivika utawala kuwa na kummika Yesu kuva Nanangalaledi, muwakati padyoko Ishilikali ayo indamalidya mauvilo mushilambo uti shapai. Utawala awo undatadya shilambo shapai uti kuva palaishu, kula munu andanama mu amani na lipuwilo mu myaka víkamalilika. (Dimu 37:29) Indila inji yalodidye Yeova kenga ankutunagwaledya ni kwa kutupundisha mwashi mwakunamila shana muwakati au. Na nae ankutulalika tushwali kwake, na ave tayali kutwigwilila. Kwaumwiu, Yeova andilodya shana kenga ankunnagwaledya kula munu pakati petu.

6. Wako ulota kulodya dashi kenga unkutumbyanga linagwaledyo lyake Yeova?

⁶ Wako ulota kulodya dashi kenga unkutumbyanga linagwaledyo lyake Yeova? Nnambwalele nae kwavinu uti vyakutandadile. Kanji vanu voe nelo, havanavanavo shinu madyavalelo akulambwalela. Vinu avi yadavo vindítandeka muwakati umwe Yesu àvele mushilambo shapai. Mumwanda umo, Yesu andívaponia vanu kumi vamalemba, kanji munu jumo tu bai ni annambwaladíle. (Lukashi 17:12-17)  Wetu tulota tuve kenga aijá annambwaladile Yesu. Kula liduva ituvaikidile tunnambwalele Yeova.

7. Ituvaikidile tunnagwaledye dashi Yeova?

⁷ Nayadavo, ituvaikidile tunnagwaledye Yeova. Yesu andívamanyia vakwoda vake kenga indivavaikila vannagwaledye Yeova na ntima wavo uti, ungumi wavo uti, na ding’anong’ano dyao uti. (Shomya Mateu 22:37.) Manaake nyamani?

8, 9. Tulota kulodya dashi kenga tunkunnagwaledya Yeova?

⁸ Da inkutosha kutangola vila doni tunkunnagwaledya Yeova? Mene. Ikava kenga tunkunnagwaledya Yeova na ntima wetu uti, mili wetu uti na ding’anong’ano dyetu uti, tundalodya kwavitendo vyetu. (Mateu 7:16-20) Ibibiliya inkupundisha ngala, ikava kenga tunkunnagwaledya Yeova, tundaigwilila malamulo ake. Da lankukamadyanga kwigwilila? Mene, mwaa “malamulo ake lo [Yeova] hanaidopa shinu.”—Shomya 1 Nshuwau 5:3.

⁹ Tukamwigwilila Yeova, tundavanavo lipuwilo na shinamilo shambone. (Ishaiya 48:17, 18) Napanelo, nyamani shilota kutupwashela wetu pakulota tuke mushu tuva tuvambodi vake Yeova? Leka tulole.

10. Mwaa shani indikuvaikila uke mushu ulipundisha kwaupande wake Yeova?

¹⁰ Utunduvenge dashi kuva mbodi umwe Yeova? Kupitila mapundisho lamu Ibibiliya, andikupwashela kummanya shana Yeova, na kuva mbodi wake. Umbodi awo ni kenga moto waulota haunadimike. Kenga moto unalateka ding’uni pakulota uke mushu ukalela, wako yadavo ikuvaikidile uke mushu ulipundisha kwaupande wake Yeova pakulota umbodi wako unonowangike.—Mikong’o 2:1-5.

11. Ulota kumanya nyamani ukauka mushu ulipundisha Ibibiliya?

¹¹ Ukauka mushu ulipundisha Ibibiliya, undamanya vinu vyoe vilota kukwinjila muntima. Lola mpano wa  vakwoda vavili vake Yesu mwavaligwidídye muwakati Yesu pashivalanga vyakulava vya mu Ibibiliya. Vanavo vatangwèle doni: ‘Da mitima vyetu havishitubuka pashituvalangila niindila atwigwiniya Maandiko?’—Lukashi 24:32.

12, 13. (a) Shilota kutandeka nyamani pakati pa linagwaledyo lyetu namu Yeova? (b) Ituvaikidile tutende nyamani pakulota linagwaledyo lyetu halinapunguke?

¹² Kenga momo Mwavaligwidídye vakwoda vake Yesu pavaigwíte shana maandiko, ngwona kenga wako ulígwite yadavo pautunduvenge kwigwa shana Ibibiliya. Kwamwaa awo, undikupwashela kummanya Yeova na kunnagwaledya. Haunaleke linagwaledyo lyako lipunguka.—Mateu 24:12.

¹³ Baada ya kuva mbodi wa Nnungu, indikuvaikila ulikanyalidye pakulota umbodi wako ngwengwe unonowangike. Indikuvaikila uke mushu ulipundisha kwaupande wake Yeova namu Yesu na ukumbukila avilá vyaulipundisha pakulota umanye mwashi mwakutumilila mushinamilo shako.  (Nshuwau 17:3) Paushomya au paulipundisha Ibibiliya, lyudye doni: ‘Shinu ashi shingupundisha nyamani kwaupande wake Yeova? Mwaa shani ininguvaikila ninnagwaledye na ntima wangu uti naungumi wangu uti?’—1 Timoti 4:15.

14. Kushwali kulota kutupwashela dashi kunanowanga linagwaledyo lyetu namu Yeova?

¹⁴ Ukavanavo mbodi wakukulupilika, undatangolanavo kula wakati, na kwakutenda davo umbodi wenu unanonowangika. Wetu yadavo, tukatangola ngwengwe namu Yeova kwaindila ya kushwali, linagwaledyo lyetu lindananowangika. (Shomya 1 Vateshalonika 5:17.) Kushwali ni shawadi yambone yatupele Tatagwetu avele kuwa. Ituvaikidile tutangole namu nae na ntima wetu uti. (Dimu 62:8) Ituvaikidile tutangole ashilá shatuvenavo muntima kwabila kujidyaujidya malove lamulolo. Kwaumwiu, tukauka mushu tulipundisha Ibibiliya na tushwali na ntima wetu uti, linagwaledyo lyetu namu Yeova lindananowangika.

15, 16. Wako wona dashi shimadengo shakwandadya ntenga?

¹⁵ Nayadavo, pakulota tuke mushu tuva tuvambodi vake Yeova, ituvaikidile tuvamanyie vanu likulupililo lyetu. Kuvamanyia vanu umwiu umwe Yeova ni dinema dikumene namene. (Lukashi 1:74) Ala ni madalaka lavapele Yesu vaklistu uti vaiu. Wetu uti indituvaikila twandyadye ntenga wambone wa Utawala wa Nnungu. Da wako unditunduvanga tayali shimadengo asho?—Mateu 24:14; 28:19, 20.

¹⁶ Myombe Paulu andyóna shimadengo sha kwandandya ntenga kuva “mali.” (2 Vakolintu 4:7) Kuvamanyia vanu ntenga umwe Yeova na vyakulivikila vyake ni shimadengo shikumene shivaikidile wako utende. Ayo ni indila inji yakuntumikila Yeova, na manya kenga nae ankutumbyanga shimadengo shako shaukola kwamwaa wake. (Vabalaniya 6:10) Kwandadya ntenga kunakupwashela wako pamo na vanu vanji kummandika Yeova na kupata  shingumi shíkamalilika. (Shomya 1 Vakolintu 15:58.) Na hashipali shimadengo shilota kukupa lipuwilo kupunda shakwandadya ntenga.

17. Mwaa shani kwandadya ntenga ni shimadengo shashipajelo?

¹⁷ Shimadengo shakwandadya ntenga ni shashipajelo namene. Ituvaikidile “tuvalange lilove”, na “tutende shipajelo.” (2 Timoti 4:2) Vanu valota vamanye Utawala wa Nnungu. Ibibiliya inkushidoni: ‘Liduva likumene lyake Yeova lindivandika! Lindivandika na linkwida shipajelo!’ Mwisho ‘hautima shinu!’ (Soponiya 1:14; Abakuki 2:3) Kwaumwiu, muwakati wakuvandika, Yeova andabamola shilambo shakunyata shimwe shatwani. hakanava kutenda davo, vanu ivavaikidile vamanye pakulota vatandole kuntumikila Yeova.

18. Mwaa shani indituvaikila tulipudye kwake Yeova pamo na Vaklistu vamanyite umwiu?

¹⁸ Yeova alota tulipudye kwake pamo na Vaklistu vaiu vamanyite umwiu. Ibibiliya inkushidoni: “Namomo tukumbukile namene mwashi mwakwimulanila kwalinagwaledyo na kutandedya matendo ambone, hatunaleke kukadyanianga, kulingana kenga mwavatandela vanji kanji indituvaikila twing’ane ntima shii, kupunda namene po pamwona kuvandika liduva apa.” (Vabalaniya 10:24, 25) Ituvaikidile tulikanyalidye pakulota hatunakatoke mikutano uti. Mikutano ni vilota kutupa dimongo dyakupana ntima shii pakati pashipinga.

19. Shilota kutupwashela nyamani pakulota tuvanagwaledye vanung‘unumunu na valumbumunu Vaklistu?

¹⁹ Ukauka kumikutano, undavapata vambodi vambone valota kukupwashela kulipudya kumwe Yeova. Undakadyananavo vanung’unumunu na valumbumunu valikanyalidya kenga wako kulipudya kumwe Yeova. Vanavo uti havanava shinu vanu vakakowa. Vakakukawedya ikuvaikidile uve tayali kuvalivaliva. (Shomya Vakoloshu 3:13.) Kula wakati likanyalidye kulola vitendo vyambone vya vanung’unumunu  pamo na vya valumbumunu Vaklistu, ukatenda davo unavanagwaledya na unava pepi namu Yeova.

20, 21. “Shingumi shiu” ni nyamani?

²⁰ Yeova alota vambodi vake uti vavenavo shingumi shambone. Ibibiliya inkutupundisha kenga shingumi shetu mushu shinamamodya kuva shambone kupunda shingumi shanelo.

²¹ Muwakati wida hatunama shinu myaka 70 au 80 bai. Wetu uti tunapuwanga na shingumi shíkamalilika mu myaka víkamalilika ku palaishu. Ashi ni “shingumi shiu” shivalangigwa mu Ibibiliya. Yeova andilivikila kutupa shingumi shiu, ata ikava davo ituvaikidile tulikanyalidye namene “pakulota tupate shingumi shíkamalilika.”—1 Timoti 6:12, 19.

22. (a) Tulota “kukamulila dashi shingumi shiu”? (b) Mwaa shani hatuulula kupata shingumi shíkamalilika kwa dimongo dyetu gweka?

²² Tulota “kukamulila dashi shingumi shiu”? Ituvaikidile “tutende wambone” na “tuve tuvatajili mushimadengo shambone.” (1 Timoti 6:18) Ashi shitupundisha kenga indituvaikila tutandedye ashilá shatulipudisha mu Ibibiliya. Na ivedoni, hatuulula mwiko kupata shingumi shiu kwa dimongo dyetu gweka. Mwaa shingumi shíkamalilika ni shawadi yaumidye Yeova kuvapa vatumika vake vakukulupilika, kwamwaa wa “umonyo wake.” (Valoma 5:15) Ata nelo, tatagwetu wakuwa alota avape vatumika vake vakwaminika shawadi ayo.

23. Mwaa shani indikuvaikila umye wamushi wambone ambi?

²³ Lyudye doni, ‘Da ninkulipudya kwa Nnungu kulingana na malotelo ake?’ Ukalimanya kenga indikuvaikila utende mabadiliko, aunatime. Tukankulupila Yeova na tukalikanyalidya kumwigwilila, nae andava lyutu lyetu lyakutukutila. Nae anavashunga vatumika vake vakukulupilika mumaduva amwisho a shilambo shakunyata shimwe Shatwani. Baada ya apo, Yeova andauka natupa shingumi  shíkamalilika ku palaishu, kenga mwalivikidile. Napavedoni, unkuulula kupata shingumi shíkamalilika ukalikanyalidya kumya wamushi wambone ambi.