1, 2. Undi nu pode atxa proteson oji?

IMAJINA ma bu sta ta pâsia i bu odja un tenporal ta ben. Séu kumesa ta bira sukuru, i bu kumesa ta obi strubada i ta odja raiu na Séu. Dipôs txuba kumesa ta kai. Di sertéza bu ta kóre pa bu djobe un lugar pa bu sukundi, pa tenporal ka panha-u. Óras ki bu atxa un lugar pa bu sukundi, modi ki bu ta xinti?

² Oji nu sta na mésmu situason. Mundu sta kada bês más piór. Talvês bu ta pergunta: ‘Na undi ki N pode atxa proteson?’ Un skritor di Salmu skrebe: ‘N sta fla Jeová: ‘Bo é nha proteson i nha fortaléza, nha Deus, na ken ki N ta kúnfia.’’ (Salmo 91:2 ) Jeová pode proteje-nu di prublémas di es mundu. Tanbê el ta da-nu un grandi speransa pa futuru.

3. Modi ki nu pode faze di Jeová nos proteson?

³ Modi ki Jeová pode proteje-nu? El ta djuda-nu lida ku kalker prubléma ki nu sta pasa pa el i el ten más puder ki kalker algen ki krê prujudika-nu. Mésmu ki algun kuza mariadu kontise ku nos oji, nu pode ten sertéza ma Jeová ta ben rezolve-nu el na futuru. Bíblia ta nkoraja-nu: ‘Kontínua na amor di Deus’. (Judas 21 ) Nu meste kontínua ta ser amigu di Jeová pa el pode ser nos proteson na momentus difísil. Má modi ki nu pode faze kel-li?

4, 5. Modi ki Jeová ta mostra ma el ta ama-nu?

⁴ Pa nu kontínua ta ser amigu di Jeová nu meste ntende kel grandi amor ki el ten pa nos. Pensa na tudu kuza ki Jeová dja faze pa nos. El da-nu un Téra bunitu ku txeu planta i animal. Tanbê el da-nu kumida sábi i agu pa bebe. Através di Bíblia, Jeová inxina-nu se nómi i se kualidadis. Má próva más grandi di se amor foi kantu el manda se Fidju ki el ta ama txeu, pa da se vida pa nos. (João 3:16 ) I pamodi sakrifisiu di Jizus nu ten un grandi speransa pa futuru.

⁵ Jeová ranja un Reinu ki é un govérnu na Séu i se Rei é Jizus. Ka ta dura, es Reinu ta ben kaba ku tudu sufrimentu. Reinu di Deus ta ben bira Téra un paraízu, undi ki tudu algen ta ben vive na pas i filís pa tudu ténpu. (Salmo 37:29 ) Otu manera ki Jeová ta mostra ma el ta ama-nu é pamodi el ta inxina-nu modi ki nu pode vive na es mundu difísil. Tanbê el ta konvida-nu pa nu pâpia ku el na orason i sénpri el ta obi-nu. Jeová ta mostra klaru ma el ta ama nos tudu.

6. Modi ki bu ta mostra ma bu ta ama Deus?

⁶ Modi ki bu pode mostra ma bu ta ama Deus? Mostra-l ma bu sta kontenti pa tudu kuza ki el faze pa bo. É péna ki oji txeu algen é ingratu. Kontise mésmu kuza kantu ki Jizus staba na Téra. Pur izénplu, Jizus txiga di kura 10 algen ki tinha un duénsa runhu ki txoma lépra. Má sô un di es ki ba agradise-l. (Lucas 17:12-17 ) Nu krê ser sima kel ómi ki agradiseba Jizus. Sénpri nu krê agradise Jeová pa tudu kuza ki el ta faze pa nos.

7. Modi ki debe ser nos amor pa Jeová?

⁷ Tanbê nu meste mostra ma nu ta ama Jeová. Jizus  fla se disiplus ma es debe ama Jeová di tudu ses korason, di tudu ses alma i di tudu ses menti. (Lé Mateus 22:37.) Kuzê ki kel-li krê fla?

8, 9. Modi ki nu ta mostra ma nu ta ama Jeová?

⁸ Sô fla na bóka ma nu ta ama Jeová ta txiga? Nau. Pa kuza ki nu ta faze nu ta mostra si nu ta ama Jeová di tudu nos korason, alma i menti. (Mateus 7:16-20 ) Bíblia ta inxina klaru ma si nu ta ama Deus nu ta obi ku se mandamentus. Má faze kel-li é difísil? Nau, pamodi ‘mandamentus di Jeová é ka pizadu’. — Lé 1 João 5:3.

⁹ Óras ki nu ta obi ku Jeová, nu ta ten un vida sábi i filís. (Isaías 48:17, 18 ) Má kuzê ki ta ba djuda-nu kontínua ta ser amigu di Jeová? Nu ben odja.

10. Pamodi ki bu debe kontínua ta prende sobri Jeová?

¹⁰ Modi ki bu bira amigu di Jeová? Sima bu studa Bíblia, bu fika ta konxe Jeová más midjór i bu bira se amigu. Es amizadi é sima un lumi ki bu ka krê pa paga. Sima bu meste poi lenha na lumi pa ka paga, tanbê bu meste kontínua ta prende sobri Jeová pa nhos amizadi kontínua fórti. — Provérbios 2:1-5.

11. Kuzê ki pode kontise sima bu ta ba ta studa Bíblia?

¹¹ Sima bu ta ba ta studa Bíblia, bu ta prende kuzas ki ta toka bu korason. Odja modi ki dôs disiplu di Jizus xinti kantu Jizus splika-s profesias di Bíblia. Es fla: “Nos korason xinti sábi désdi kel primeru óra ki el staba ta pâpia ku nos na kaminhu i el ba ta splika-nu Skrituras Sagradu ti ki nu txiga li!” — Lúkas 24:32, BPK.

12, 13. (a) Kuzê ki pode kontise ku nos amor pa Jeová? (b) Kuzê ki nu meste faze pa nos amor pa Jeová kontínua sénpri fórti?

 ¹² Sima kes dôs disiplu di Jizus xinti sábi kantu es ntende Skrituras, bo tanbê bu xinti kel mésmu kuza kantu bu kumesa ta ntende Bíblia. Kel-li djuda-u konxe Jeová i tanbê ama-l. Bu ka krê pa es amor frakise. — Mateus 24:12.

¹³ Dipôs ki bu bira amigu di Deus, bu meste kontínua ta sforsa pa bu amizadi ku el fika más fórti. Bu meste kontínua ta prende sobri Jeová i Jizus. Tanbê, bu meste pensa na kuzas ki bu sta prende i modi ki bu pode aplika-l na bu vida. (João 17:3 ) Óras ki bu ta lé ô studa Bíblia, pergunta bu kabésa: ‘Kuzê ki N prende sobri Jeová? Pamodi ki N debe ama-l di tudu nha korason?’ — 1 Timóteo 4:15.

14. Modi ki orason ta poi nos amor pa Jeová fika más fórti?

 ¹⁴ Óras ki bu ten un grandi amigu, nhos ta pâpia tudu óra. Kel-li ta poi nhos amizadi fika más fórti. Di mésmu manera, óras ki nu ta pâpia ku Jeová tudu óra na orason, nos amor pa el ta fika más fórti. (Lé 1 Tessalonicenses 5:17.) Orason é un grandi prezenti di nos Pai ki sta na Séu. Sénpri nu debe pâpia ku el di tudu nos korason. (Salmo 62:8 ) Nu ka debe ripiti sénpri mésmu palavra na orason, má nu debe fla kel ki nu sta ta xinti na korason. Nton, si nu kontínua ta studa Bíblia i ta faze orason di korason, nos amor pa Jeová ta fika kada bês más fórti.

15, 16. Kuzê ki bu ta atxa di trabadju di pregason?

¹⁵ Pa nu kontínua amigu di Jeová, tanbê nu meste pâpia ku otus algen sobri nos fé. Pâpia ku otus algen sobri Jeová é un priviléjiu grandi. (Lucas 1:74 ) Kel-li é un responsabilidadi ki Jizus da tudu kristons verdaderu. Nos tudu nu debe prega notísias sábi di Reinu di Deus. Dja bu kumesa ta faze kel-li? — Mateus 24:14; 28:19, 20.

¹⁶ Apóstlu Polu sabeba ma pregason éra un trabadju rei di inportanti. El fla ma pregason éra sima un ‘tizoru’. (2 Coríntios 4:7 ) Pâpia ku otus algen sobri Jeová i se vontadi é midjór trabadju ki bu pode faze i midjór manera di bu sirbi Jeová. El ta da valor pa tudu ki bu ta faze pa el. (Hebreus 6:10 ) Trabadju di pregason pode djuda-u i tanbê pode djuda otus algen ten amizadi ku Deus i ganha vida itérnu. (Lé 1 Coríntios  15:58.) Ten algun otu trabadju ki pode da-u más alegria ki pregason?

17. Pamodi ki trabadju di pregason é urjenti?

¹⁷ Pregason é un trabadju ki ka pode dexadu pa dipôs. Nu debe ‘prega palavra’ i nu debe ‘faze-l urjenti’. (2 Timóteo 4:2 ) Pesoas meste sabe sobri Reinu di Deus. Bíblia ta fla: ‘Kel grandi dia di Jeová sta kuazi ta txiga! El sta pértu i el sta ta ben uma na forsa!’ El ‘ka ta atraza!’ (Sofonias 1:14; Habacuque 2:3 ) Ka ta dura, Jeová ta ben kaba ku es mundu mau di Satanás. Antis di kel-li kontise, pesoas meste ser avizadu pa es pode skodje sirbi Jeová.

18. Pamodi ki nu debe adora Jeová djuntu ku otus kriston verdaderu?

¹⁸ Jeová krê pa nu adora-l djuntu ku otus kriston verdaderu. Bíblia ta fla: ‘Nu pensa na kunpanheru pa nu insentiva kunpanheru pa amor i pa bons óbra, ka nu dexa di sta na runion, sima alguns ta kustuma faze, má nu da kunpanheru koraji, inda más gósi ki nhos sta ta odja kel dia ta txiga.’ (Hebreus 10:24, 25 ) Nu debe faze tudu kel ki nu pode pa nu sta na tudu runion. Runions ta da-nu xansi pa nu da kunpanheru forsa i koraji.

19. Kuzê ki pode djuda-nu kontínua ta ama nos irmon?

¹⁹ Óras ki bu ta sisti runion, bu ta atxa bons amigu ki ta djuda-u adora Jeová. Bu ta ba konxe irmons i irmans ku situason di vida diferenti. Má sima bo, es sta ta faze ses midjór pa es sirbi Jeová. Tanbê, es é ka perfetu i es ta fadja sima bo. Óras ki kel-li kontise bu debe sta prontu pa purdua-s. (Lé Colossenses 3:13.) Konsentra sénpri na kes bon kualidadi ki bus irmon ten.  Faze si, ta djuda-u ama-s i tanbê bu ta bira más amigu di Jeová.

20, 21. Kuzê ki é kel ‘vida di verdadi’?

²⁰ Jeová krê pa tudu se amigus ten midjór vida posível. Bíblia ta inxina-nu ma nos vida na futuru ta ba ser totalmenti diferenti di vida ki nu ten oji.

²¹ Oji nu ta vive sô 70 ô 80 anu. Na futuru nu ta ben vive pa tudu ténpu. Nu ta ben goza ‘vida itérnu’ ku saúdi perfetu, na pas i filisidadi na un paraízu bunitu. É kel-li ki Bíblia ta txoma di ‘vida di verdadi’. Jeová promete da-nu kel midjór vida ki ten, má nu meste faze gósi tudu kel ki nu pode pa nu resebe kuzas ki el promete-nu. — 1 Timóteo 6:12, 19.

22. (a) Modi ki nu pode ‘pega ku tudu forsa kel vida di verdadi’? (b) Pamodi ki nu ka merese vida itérnu?

²² Modi ki nu pode ‘pega ku tudu forsa kel vida di verdadi’? Nu meste ‘faze bondadi’, i ser ‘riku di bons óbra’. (1 Timóteo 6:18 ) Kel-li krê fla ma nu meste faze kel ki nu ta prende na Bíblia. Má, vida ki bale péna ka ta dipende sô di nos sforsu. Nu ka merese vida itérnu. El é un prezenti ki Jeová ta da kes algen ki ta sirbi-l pa el mostra-nu se ‘bondadi ki nu ka ta merese’. (Romanos 5:15 ) Jeová ta faze di tudu pa el da vida itérnu pa kes algen ki ta sirbi-l.

23. Pamodi ki nu meste sirbi Jeová gósi?

²³ Pergunta bu kabésa: ‘N sta ta adora Jeová sima el ta krê?’ Si bu da kónta ma bu meste faze algun mudansa, bu debe faze-l gósi. Óras ki nu ta kúnfia na Jeová i nu ta faze tudu kel ki nu pode pa nu obi ku el, Jeová ta proteje-nu. El ta kontínua ta proteje kes  algen ki ta sirbi-l na ténpu di fin di es mundu mau di Satanás. Dipôs, Jeová ta kunpri se promésa di da se povu vida pa tudu ténpu na Paraízu. Bu pode ganha kel vida ki bale péna si bu skodje sirbi Jeová gósi!