1, 2. Na wapi beto lenda zwa lutaninu bubu yai?

YINDULA nde nge ke tambula na nzila mpi mvula mosi ya ngolo ke zola kunoka. Zulu me kuma mudidi, bansemo ya nzasi me yantika kusema mpi banzasi me yantika kubula. Na mbala mosi mvula me yantika kunoka. Nge ke sosa kisika ya kubumbana. Na nima, nge me mona kisika mosi ya lutaninu. Ntembe kele ve nde nge ta wa kiese mingi!

² Beto ke kutana ti diambu ya mutindu mosi bubu yai. Mambu ya nsi-ntoto ke landa kukuma mbi. Nge lenda kudiyula nde: ‘Na wapi mono lenda zwa lutaninu?’ Muyimbi ya bankunga sonikaka nde: “Mono ta tuba na Yehowa nde: ‘Nge kele kitininu na mono mpi kisika na mono ya ngolo ya lutaninu, Nzambi na mono yina mono ke tudilaka ntima.’” (Nkunga 91:2) Ya kieleka, Yehowa lenda pesa beto kikesa sambu na bampasi yina beto ke kutana ti yo ntangu yai mpi yandi ke pesa beto kivuvu mosi ya kitoko sambu na bilumbu ke kwisa.

3. Inki mutindu beto lenda kumisa Yehowa kisika na beto ya kubumbana?

³ Inki mutindu Yehowa lenda tanina beto? Yandi lenda sadisa beto na kukanga ntima na konso mpasi yina beto lenda kutana ti yo, mpi yandi kele ngolo mingi kuluta konso muntu yina ke sosa kusala beto mbi. Ata beto kutana ti bampasi bubu yai, beto tula ntima nde Yehowa ta manisa yo na bilumbu ke kwisa. Biblia ke siamisa beto nde: “Beno bikala na zola ya Nzambi.” (Yude 21) Beto fwete bikala pene-pene na Yehowa sambu yandi sadisa beto ntangu beto ke kutana ti bampasi. Kansi, inki mutindu beto lenda sala yo?

4, 5. Inki mutindu Yehowa me monisaka zola na yandi sambu na beto?

⁴ Sambu na kubikala pene-pene na Yehowa, beto fwete bakisa nde yandi ke zolaka beto mingi. Yindula mambu yonso yina yandi me salaka sambu na beto. Yandi me pesaka beto ntoto, me fulusaka yo ti banti ya kitoko mpi bambisi. Yandi me pesaka beto mpi madia ya ntomo ti masa ya bunkete sambu na kunwa. Na nzila ya Biblia, Yehowa me longaka beto zina na yandi mpi bikalulu na yandi ya kitoko. Diambu ya kuluta mfunu kele nde, yandi monisaka zola na yandi sambu na beto ntangu yandi tindaka Yezu, Mwana na yandi ya yandi ke zolaka mingi sambu na kupesa luzingu na yandi sambu na beto. (Yoane 3:16) Kimenga ya Yezu me pesaka beto kivuvu ya mbote sambu na bilumbu ke kwisa.

⁵ Yehowa me tulaka Kimfumu ya Mesia disongidila, luyalu mosi ya zulu yina ta manisa bampasi yonso ntama mingi ve. Kimfumu yina ta kumisa ntoto paladisu, kisika yina bantu yonso ta zinga kimakulu na ngemba mpi na kiese. (Nkunga 37:29) Diaka, Yehowa ke monisaka zola na yandi sambu na beto ntangu yandi ke longaka beto mutindu ya kuvanda ti luzingu ya kuluta mbote bubu yai. Yandi ke lombaka beto na kusamba yandi mpi yandi ke vandaka ntangu yonso ya kuyilama sambu na kuwa bisambu na beto. Yehowa me monisaka pwelele zola na yandi sambu na konso muntu.

6. Inki mutindu nge lenda monisa ntonda sambu na zola yina Yehowa me monisilaka nge?

⁶ Inki mutindu nge fwete monisa ntonda sambu na zola yina Yehowa me monisilaka nge? Monisa yandi nde nge kele na ntonda sambu na mambu yonso yina yandi me salaka sambu na nge. Kansi bubu yai, bantu mingi ke monisaka ve ntonda. Yo vandaka mpi mutindu mosi ntangu Yezu vandaka na ntoto. Kilumbu mosi, Yezu belulaka bantu kumi yina vandaka kubela maladi ya lepre kansi muntu mosi mpamba kwisaka kupesa yandi matondo. (Luka 17:12-17)  Beto fwete vanda bonso muntu yina pesaka Yezu matondo. Beto fwete pesaka Yehowa matondo ntangu yonso.

7. Inki mutindu beto fwete zola Yehowa?

⁷ Beto mpi beto fwete monisa zola na beto sambu na Yehowa. Yezu longaka balongoki na yandi nde bo fwete zola Yehowa na ntima na bo ya mvimba, na moyo na bo ya mvimba, mpi na mabanza na bo yonso. (Tanga Matayo 22:37.) Yo ke tendula nki?

8, 9. Inki mutindu beto lenda monisa zola na beto sambu na Yehowa?

⁸ Keti beto fwete suka kaka na kutuba nde beto ke zolaka Yehowa? Ve. Kana beto ke zolaka Yehowa na ntima ya mvimba, na moyo ya mvimba, mpi na mabanza yonso, beto ta monisa zola na beto sambu na yandi na bisalu. (Matayo 7:16-20) Biblia ke longaka beto pwelele nde kana beto ke zola Nzambi, beto ta zitisa bansiku na yandi. Keti yo kele mpasi? Ve, sambu “bansiku [ya Yehowa] kele kilo ve.”—Tanga 1 Yoane 5:3.

⁹ Kana beto ke lemfukila Yehowa, beto ta vanda ti luzingu ya kiese mpi ya mbote. (Yezaya 48:17, 18) Kansi nki ta sadisa beto na kubikala pene-pene na Yehowa? Beto tadila yo ntangu yai.

10. Sambu na nki nge fwete landa kulonguka mambu ya Yehowa?

¹⁰ Inki mutindu nge me kumaka nduku ya Yehowa? Kulonguka na nge ya Biblia me sadisaka nge na kuzaba Yehowa mbote-mbote mpi na kukumisa kinduku na nge ti yandi ngolo. Kinduku yina kele bonso tiya yina nge fwete sala yonso sambu yo landa kupela. Kaka mutindu yo ke lombaka nde beto yika bankuni sambu tiya landa kupela, nge fwete landa kulonguka mambu ya Yehowa sambu na kulanda kukumisa kinduku na nge ti yandi ngolo.—Bingana 2:1-5.

11. Inki mutindu malongi ya Biblia lenda simba ntima na nge?

¹¹ Kana nge ke landa kulonguka Biblia, nge ta longuka  mambu yina ta simba kibeni ntima na nge. Tala mutindu balongoki zole ya Yezu waka ntangu Yezu vandaka kutendudila bo bambikudulu ya Biblia. Bo tubaka nde: “Keti bantima na beto vandaka kupela ve ntangu yandi vandaka kusolula ti beto na nzila, ntangu yandi vandaka kutendudila beto Masonuku mbote-mbote?”—Luka 24:32.

12, 13. (a) Inki lenda kumina zola na beto sambu na Nzambi? (b) Inki beto lenda sala sambu zola na beto sambu na Yehowa kulanda kuvanda ngolo?

¹² Kaka mutindu ntima ya balongoki waka kiese ntangu bo bakisaka Masonuku, nge mpi lenda wa kiese ya mutindu mosi kana nge me yantika kubakisa Biblia. Yo ta sadisa nge na kuzaba Yehowa mpi na kuzola yandi. Nge fwete sala yonso sambu zola yai kumana ve.—Matayo 24:12.

¹³ Kana nge kuma nduku ya Nzambi, nge fwete sala bikesa sambu kinduku na nge ti yandi kulanda kukuma ngolo. Nge fwete landa kulonguka mambu ya me tala yandi mpi Yezu. Nge fwete yindula mambu yina nge ke longuka mpi  mutindu nge fwete sadila yo na luzingu na nge. (Yoane 17:3) Ntangu nge ke tanga to ke longuka Biblia, kudiyula nde: ‘Inki diambu yai ke longa mono na yina me tala Yehowa Nzambi? Sambu na nki mono fwete zola Yehowa na ntima na mono ya mvimba mpi na moyo na mono ya mvimba?’—1 Timoteo 4:15.

14. Inki mutindu kisambu ke sadisaka beto sambu zola na beto sambu na Yehowa kulanda kukuma ngolo?

¹⁴ Kana nge kele ti nduku mosi ya ngolo, nge ta solulaka ti yandi mbala na mbala, ebuna kinduku na beno ta kuma ngolo. Mutindu mosi, kana beto ke solula mbala na mbala ti Yehowa na kisambu, zola na beto sambu na yandi ta landa kukuma ngolo. (Tanga 1 Batesalonika 5:17.) Kisambu kele dikabu ya mfunu yina me katukaka na Tata na beto ya zulu. Ntangu yonso, beto fwete solulaka ti yandi na ntima ya mvimba. (Nkunga 62:8) Ntangu beto ke samba, beto fwete vutukilaka ve bangogo yina beto me kangaka na ntu kansi beto fwete vanda masonga na mambu yina beto ke tuba. Ya kieleka, kana beto ke landa kulonguka Biblia mpi ke samba na ntima ya mvimba, zola na beto sambu na Yehowa ta landa kukuma ngolo.

15, 16. Inki mutindu nge ke tadilaka kisalu ya kusamuna?

¹⁵ Kana beto ke zola kubikala pene-pene na Yehowa, beto fwete zabisa mpi bantu ya nkaka lukwikilu na beto. Kuzabisa bantu ya nkaka mambu ya Yehowa kele dibaku mosi ya kitoko. (Luka 1:74) Yo kele mpi kisalu yina Yezu pesaka Bakristu yonso ya kieleka. Beto yonso fwete samuna nsangu ya mbote ya Kimfumu ya Nzambi. Keti nge ke salaka yo?—Matayo 24:14; 28:19, 20.

¹⁶ Ntumwa Polo monaka nde kisalu ya kusamuna vandaka mfunu mingi, yo yina yandi bingaka yo “kimvwama.” (2 Bakorinto 4:7) Kuzabisa bantu ya nkaka mambu ya Yehowa mpi lukanu na yandi kele kisalu ya kuluta mfunu yina beto fwete sala. Nge lenda sadila Yehowa mutindu yina mpi  yandi ke sepelaka mingi na kisalu yina nge ke salaka sambu na yandi. (Baebreo 6:10) Kisalu ya kusamuna lenda natila nge mpi bantu yina nge ke longa mambote, sambu nge ti bantu yina nge ke sadisa ta kwenda pene-pene na Yehowa mpi ta baka luzingu ya mvula na mvula. (Tanga 1 Korinto 15:58.) Keti kele ti kisalu ya nkaka yina lenda pesa nge kiese ya mingi kuluta?

17. Sambu na nki kisalu ya kusamuna fwete salama nswalu?

¹⁷ Kisalu ya kusamuna fwete salama nswalu kibeni. Beto fwete “longa nsangu,” mpi beto fwete “sala yo kukonda kusukinina.” (2 Timoteo 4:2) Bantu fwete wa nsangu ya Kimfumu ya Nzambi. Biblia ke tuba nde: “Kilumbu ya nene ya Yehowa kele pene-pene! Yo kele pene-pene mpi yo ke finama nswalu kibeni!” Nsuka “ta sukinina ve!” (Sefania 1:14; Habakuki 2:3) Ya kieleka kubika fioti, Yehowa ta fwa nsi-ntoto ya mbi ya Satana. Na ntwala nde yandi sala yo, beto fwete kebisa bantu sambu bo baka lukanu ya kusadila yandi.

18. Sambu na nki beto fwete sambila Yehowa ti Bakristu ya nkaka ya kieleka?

¹⁸ Yehowa ke zola nde beto sambila yandi ti Bakristu ya nkaka ya kieleka. Biblia ke tuba nde: “Beto tudila bankaka dikebi sambu na kupusa bo na kumonisa zola mpi na kusala bisalu ya mbote, beto yambula ve kuvukana kumosi, mutindu yo kele kikalulu ya bankaka, kansi beto pesana kikesa, mpi beno sala yo diaka mingi kuluta sambu beno ke mona kilumbu ke finama.” (Baebreo 10:24, 25) Beto fwete sala ngolo sambu na kukwenda na balukutakanu yonso. Balukutakanu ke pesaka beto dibaku ya kupesana kikesa mpi ngolo.

19. Inki lenda sadisa beto na kuzola bampangi na beto ya babakala mpi ya bankento?

¹⁹ Kana nge ke kwenda na balukutakanu, nge ta zwa banduku ya mbote yina ta sadisa nge na kusambila Yehowa. Nge ta mona bampangi ya babakala mpi ya bankento yina ke salaka ngolo sambu na kusambila yandi bonso nge. Bo kele mpi bantu ya kukonda kukuka mpi bo ke salaka bifu. Kana bo sala bifu, vanda ya kuyilama sambu na kulolula bo.  (Tanga Bakolosai 3:13.) Ntangu yonso, tula dikebi na bikalulu ya mbote ya bampangi na nge ya babakala mpi ya bankento mpidina yo ta sadisa nge na kuzola bo mpi na kukwenda kibeni pene-pene na Yehowa.

20, 21. “Luzingu ya kieleka” kele nki?

²⁰ Yehowa ke zola nde banduku na yandi yonso kuvanda na luzingu ya kuluta mbote. Biblia ke longa beto nde luzingu na beto ya bilumbu ke kwisa ta vanda kibeni ya kuswaswana ti luzingu yina beto ke zinga bubu yai.

²¹ Na bilumbu ke kwisa beto ta zinga ve bamvula 70 to 80, kansi beto ta zinga kimakulu. Beto ta zinga “mvula na mvula” ti mavimpi ya kukuka, na ngemba, mpi na kiese na paladisu mosi ya kitoko. Biblia ke bingaka yo “luzingu ya kieleka.” Yehowa ke sila na kupesa beto luzingu yai ya kieleka, kansi beto fwete sala ngolo ntangu yai sambu beto “simba ngolo” luzingu yango.—1 Timoteo 6:12, 19.

22. (a) Inki mutindu beto lenda “simba ngolo luzingu ya kieleka”? (b) Sambu na nki beto lenda kudipesa ve luzingu ya mvula na mvula?

²² Inki mutindu beto lenda “simba ngolo luzingu ya kieleka”? Beto fwete ‘sala mambu ya mbote’ mpi “kuvanda bamvwama na bisalu ya mbote.” (1 Timoteo 6:18) Yo ke tendula nde beto fwete sadila mambu yina beto ke longuka na Biblia. Kansi, beto ta baka ve luzingu yina ya kieleka na bikesa na beto mosi. Beto lenda kudipesa ve luzingu ya mvula na mvula. Yo kele dikabu ya ofele yina Yehowa me pesa bansadi na yandi ya kwikama; yo ke monisa “ntima ya mbote [na yandi] ya nene.” (Baroma 5:15) Tata na beto ya zulu ke zola kibeni kupesa bansadi na yandi ya kwikama dikabu yai.

23. Sambu na nki nge fwete sala nsola ya mbote bubu yai?

²³ Kudiyula nde: ‘Keti mono ke sambilaka Nzambi na mutindu yina yandi ke zolaka?’ Kana nge bakisa nde nge fwete sala bansoba, sala yo kukonda kusukinina. Kana beto ke tula ntima na Yehowa mpi ke sala yonso sambu na kulemfukila yandi, yandi ta vanda kisika na beto ya kumbumbana. Yandi  ta tanina bansadi na yandi ya kwikama na bilumbu ya nsuka ya nsi-ntoto ya mbi ya Satana. Na nima, Yehowa ta sala ngolo sambu beto zinga kimakulu na paladisu kaka mutindu yandi me silaka. Ya kieleka, nge lenda baka luzingu ya kieleka kana nge sala nsola ya mbote bubu yai!