1, 2. Openi hatu dulu okumona eameno kunena?

DILADILA nee ngeno to ende moshikungulu shomhepo ya kula. Keulu otaku ende taku laula, ove ou udite omingungumo nou wete oushelu tava shela. Opo u li po odula oya hovela okuloka, paife oto kongo nee apa to yaama. Ito ka kala tuu wa hafa ngeenge owa mono onhele iwa yokuyaama!

² Kunena nafye otu li monghalo ya faafana. Eenghalo dounyuni otadi ende tadi naipala neenghono. Otashi dulika u lipule kutya: ‘Openi handi dulu okumona eameno?’ Omupsalme umwe okwa ti: “Eameno lange, nohotengulu yange, Kalunga kange, ou handi mu lineekele.” (Epsalme 91:2) Jehova ota dulu oku tu amena mounyuni ou u yadi omaupyakadi, nokwe tu pa yo eteelelo li na sha nonakwiiwa.

3. Ongahelipi Jehova ta dulu oku tu amena?

³ Ongahelipi Jehova ta dulu oku tu amena? Ota dulu oku tu kwafela tu lididimikile omaupyakadi oo tu na, noku na eenghono e dule keshe oo tashi dulika a kendabale oku tu etela oshiponga. Nonande otu ningilwe oinima ii paife, ohatu dulu okukala noushili kutya Jehova ota ka xulifa po oinima oyo monakwiiwa. Ombiibeli otai tu ladipike tu “likaleke mohole yaKalunga.” (Judas 21) Otwa pumbwa okukala popepi naJehova opo e tu amene momafimbo madjuu. Ndele mbela osho ohatu shi ningi ngahelipi?

4, 5. Ongahelipi Jehova e tu ulikila ohole?

⁴ Opo tu kale popepi naJehova, otwa pumbwa okudiladila  kombinga yanghee e tu hole neenghono. Diladila yo koinima aishe oyo Jehova e tu ningila. Okwe tu pa edu liwa li yadi oinima iwa, ngaashi omiti noinamwenyo. Okwe tu pa yo oikulya iwa nomeva. Jehova okwe tu honga edina laye nosho yo omaukwatya aye mawa okupitila mOmbiibeli. Naashi sha denga mbada, okwe tu ulikila ohole yaye eshi a tuma Omona waye omuholike, Jesus, kombada yedu e tu yandjele omwenyo waye. (Johannes 3:16) Paife otu na eteelelo lonakwiiwa omolweyambo laJesus.

⁵ Jehova okwa dika po Ouhamba wopaMessias, epangelo lomeulu, olo mafiku tali ka xulifa po okumona oixuna akushe. Epangelo olo otali ka ninga edu oparadisa, omo keshe umwe ta ka kala nombili nokwa hafa fiyo alushe. (Epsalme 37:29) Omukalo umwe vali omo Jehova e tu ulikila ohole yaye omoku tu honga nghee hatu dulu okukala nonghalamwenyo iwa paife. Okwe tu shiva yo tu mu ilikane, nokwe lilongekida alushe okupwilikina komailikano etu. Okwa ulika filufilu kutya oku hole ovanhu aveshe.

6. Ohole yaJehova yoku ku hola oi na oku ku linyengifa u ninge shike?

⁶ Ohole yaJehova yoku ku hola oi na oku ku linyengifa u ninge shike? Mu ulikila kutya owa pandula omolwaasho e ku ningila. Shinyikifa oluhodi, ovanhu vahapu kunena kave na olupandu. Osho osha faafana nopefimbo laJesus. Pomhito imwe, Jesus okwa li a velula ovanashilundu omulongo, ndele umwe ashike a li e mu pandula. (Lukas 17:12-17) Nafye otwa hala okukala twa fa omulumenhu oo a pandula Jesus, mokukala hatu pandula Jehova alushe.

7. Otu na okukala tu hole Jehova shi fike peni?

⁷ Otwa pumbwa yo okuulikila Jehova kutya otu mu hole. Jesus okwa li a lombwela ovahongwa vaye kutya nava kale ve hole Jehova nomutima wavo, nomwenyo wavo nosho yo  omadiladilo avo aeshe. (Lesha Mateus 22:37.) Osho osha hala kutya ngahelipi?

8, 9. Ongahelipi hatu ka ulika kutya otu hole Jehova?

⁸ Mbela osha wana ashike okutya otu hole Jehova? Ahowe. Ngeenge otu hole Jehova nomutima aushe, nomwenyo aushe nosho yo nomadiladilo etu aeshe, ohatu ka katuka eenghatu odo tadi ulike kutya otu mu hole. (Mateus 7:16-20) Ombiibeli otai hongo kutya ngeenge otu hole Kalunga, ohatu ka dulika koipango yaye. Ndele mbela osho oshidjuu? Hasho nandenande, molwaashi ‘oipango yaye kai fi idjuu.’ — Lesha 1 Johannes 5:3.

⁹ Ngeenge ohatu dulika kuJehova, ohatu ka kala twa hafa notwa wanenwa. (Jesaja 48:17, 18) Ndele mbela oshike tashi tu kwafele tu kale popepi naJehova? Natu ka taleni kutya oshike tashi tu kwafele.

10. Omolwashike wa pumbwa okutwikila okulihonga kombinga yaJehova?

¹⁰ Osha enda ngahelipi opo u ninge kaume kaJehova? Momukokomoko wekonakonombiibeli loye, owa dula okushiiva Jehova nawa nowa panga oukaume naye. Oukaume wa tya ngaho otau dulu okufanekwa nomundilo wa tema. Ngaashi ashike omundilo wa pumbwa oikuni opo u kale wa tema, naave owa pumbwa okutwikila okulihonga kombinga yaJehova opo u kaleke po oukaume weni naye. — Omayeletumbulo 2:1-5.

11. Omahongo Ombiibeli otaa dulu oku ku kuma ngahelipi?

¹¹ Eshi to twikile okukonakona Ombiibeli, oto ke lihonga oinima oyo tai kumu omutima woye. Didilika nghee ovahongwa vaJesus vavali va li ve udite eshi Jesus a li te va yelifile omaxunganeko Ombiibeli. Ova ti: “Omitima detu inadi xwama tuu mufye, eshi a popya nafye mondjila ndele [okwe] tu fatululila omishangwa!” — Lukas 24:32.

12, 13. (a) Oshike tashi dulu okuningilwa ohole yetu yokuhola Jehova? (b) Ongahelipi hatu dulu okukaleka po ohole yetu yokuhola Jehova?

 ¹² Ngaashi ashike omitima dovahongwa da li da kumwa eshi va uda ko Omishangwa, naave otashi dulika wa kumwa komutima eshi wa hovele okuuda ko Ombiibeli. Naasho oshe ku kwafela u kale u hole Jehova, noino hala ohole oyo i talale. — Mateus 24:12.

¹³ Ngeenge owa ningi kaume kaJehova, owa pumbwa okulonga noudiinini opo u kaleke po oukaume weni naye. Ou na okutwikila okulihonga kombinga yaye noyaJesus nokudilonga kwaasho to lihongo nonghee to dulu oku shi tula moilonga. (Johannes 17:3) Ngeenge to lesha ile to konakona Ombiibeli, lipula kutya: ‘Osho otashi hongo nge shike kombinga yaJehova? Omolwashike ndi na okukala ndi mu hole nomutima nosho yo nomwenyo wange aushe?’ — 1 Timoteus 4:15.

14. Ongahelipi eilikano tali dulu oku tu kwafela tu kale tu hole Jehova nohole yomoule?

 ¹⁴ Ngeenge ou na kaume kopofingo, oho popi naye pandjikilile, naasho ohashi pameke oukaume weni. Sha faafana, ngeenge ohatu popi naJehova pandjikilile meilikano, ohole yetu yoku mu hola ohai ningi yomoule. (Lesha 1 Ovatessaloniki 5:17.) Eilikano oli li oshali ya dja kuTate yetu womeulu. Onghee hano, otu na okukala hatu popi alushe naye tashi di komutima. (Epsalme 62:9) Katu na okweendulula omailikano sha fa okatevo, ashike otu na okupopya tashi di komutima. Ngeenge otwa twikile okukonakona Ombiibeli nokwiilikana tashi di komutima, ohatu ka kala tu hole Jehova nohole yomoule.

15, 16. Owa tala ko ngahelipi oilonga yokuudifa?

¹⁵ Ngeenge otwa hala okukala popepi naJehova, otwa pumbwa okulombwela ovanhu vakwetu kombinga yeitavelo letu. Okulombwela ovanhu kombinga yaJehova oshi li oufembanghenda munene. (Lukas 1:74) Oshi li yo oshinakuwanifwa osho Jesus a yandja kOvakriste aveshe vashili. Keshe umwe womufye oku na okuudifa onghundana iwa yOuhamba waKalunga. Mbela owa hovela nale okuudifa? — Mateus 24:14; 28:19, 20.

¹⁶ Omuyapostoli Paulus okwa li e udite kutya oilonga yokuudifa oiwa unene; nokwe i ifana “emona.” (2 Ovakorinto 4:7) Okulombwela ovanhu vakwetu kombinga yaJehova nosho yo elalakano laye oshi li oshilonga sha fimanenena osho hatu dulu okulonga. Ou li yo omukalo umwe omo to dulu okulongela Jehova, na Jehova okwa lenga oilonga yetu. (Ovaheberi 6:10) Okuudifa otaku dulu yo oku ku etela ouwa nosho yo ovo tave ku pwilikine, molwaashi oto kwafele ovanhu vakweni naave mwene mu ehene popepi naJehova noku ka mona omwenyo waalushe.  (Lesha 1 Ovakorinto 15:58.) Ndele mbela ope na ngoo vali oilonga imwe oyo tai dulu oku ku etela ehafo la fa olo hali di mokuudifa?

17. Omolwashike oilonga yokuudifa ya endelela?

¹⁷ Oilonga yokuudifa oya endelela neenghono shi dulife nale. Otu na ‘okuudifa ondjovo mefimbo liwa nomefimbo lii.’ (2 Timoteus 4:2) Ovanhu ova pumbwa okuudifilwa kombinga yOuhamba waKalunga. Ombiibeli oya ti: “Efiku linene lOmwene oli li popepi! Heeno, popepi li li, ndee tali endelele okufika!” Exulilo “itali fyaala ko” ile itali kala ko. (Sefanja 1:14; Habakuk 2:3) Mafiku, Jehova ota ka hanauna po ounyuni waSatana woukolokoshi. Ndele fimbo osho inashi ningwa, ovanhu ove na okulondwelwa opo va hoolole okulongela Jehova.

18. Omolwashike tu na okulongela Jehova pamwe nOvakriste vakwetu vashili?

¹⁸ Jehova okwa hala tu mu longele pamwe nOvakriste vakwetu vashili. Ombiibeli oya ti: “Tu filafaneni oshisho fye tu twafane omukumo mohole nomoilonga iwa. Tu ha efe eongalo letu vene, ngaashi vamwe ve li po hava ningi, ndelenee tu kumaidafaneni, unene eshi tamu mono efiku olo tali ehene popepi.” (Ovaheberi 10:24, 25) Onghee hano, natu kendabaleni tu kale hatu ongala nopehe na okufaula. Okwoongala ohaku tu pe omhito yokutwaafana omukumo nokupamekafana.

19. Oshike tashi ke tu kwafela tu kale tu hole Ovakriste vakwetu?

¹⁹ Ngeenge owa kala ho ongala, oto ka mona ookaume vawa ovo tave ku kwafele u longele Jehova. Oto ka shakeneka ovamwatate novamwameme ve lili noku lili, ovo navo tava ningi ngaashi tava dulu opo va longele Jehova. Ngaashi ashike ove, navo inava wanenena nohava ningi omapuko. Nongeenge ova ningi omapuko, kala alushe we lilongekida oku va dimina po. (Lesha Ovakolossi 3:13.) Kala alushe ho yandje elitulemo komaukwatya mawa Ovakriste  vakweni, molwaashi ngeenge owa ningi ngaho otashi ke ku kwafela u kale u va hole nou ehene popepi elela naJehova.

20, 21. “Omwenyo waalushe” owa kwatela mo shike?

²⁰ Jehova okwa hala ookaume kaye aveshe va hafele onghalamwenyo iwa kuhe na vali. Ombiibeli otai tu lombwele kutya onghalamwenyo yetu monakwiiwa otai ka kala ya yooloka ko filufilu kwaai yopaife.

²¹ Monakwiiwa i li popepi, ohatu ka kala fiyo alushe, ndele hamido ashike 70 ile 80. Ohatu ka hafela “omwenyo waalushe” tu na oukolele, ombili nehafo moparadisa ya wapala. Jehova okwa udaneka kutya ote ke tu pa omwenyo waalushe, ashike otu na okuninga keshe osho hatu dulu opo tu ke u “mone.” — 1 Timoteus 6:12, 19.

22. (a) Ongahelipi hatu dulu okudiinina eteelelo ‘lomwenyo waalushe’? (b) Omolwashike itatu dulu okulongela omwenyo waalushe?

²² Ongahelipi hatu dulu okudiinina eteelelo ‘lomwenyo waalushe’? Otu na ‘okulonga ouwa nokuninga oipuna yoilonga iwa.’ (1 Timoteus 6:18) Osho osha hala kutya otu na okutula moilonga osho hatu lihongo mOmbiibeli. Ashike oku ka mona omwenyo waalushe inaku likolelela keenghendabala detu. Itatu dulu okulongela omwenyo waalushe, molwaashi ou li oshali oyo twa pewa kuJehova tu li ovapiya vaye ovadiinini ‘omolwefilonghenda’ laye linene. (Ovaroma 5:15) Tate yetu womeulu okwa hala okupa ovapiya vaye ovadiinini oshali oyo.

23. Omolwashike wa pumbwa okuninga etokolo li li mondjila paife?

²³ Lipula kutya: ‘Mbela ohandi longele ngoo Kalunga monghedi oyo a hokwa?’ Ngeenge owa didilike kutya owa pumbwa okuninga omalunduluko, shi ninga diva. Jehova ote ke tu amena ashike ngeenge otwe mu lineekela nohatu ningi ngaashi hatu dulu opo tu dulike kuye. Ota ka amena ovapiya vaye ovadiinini momafiku axuuninwa ounyuni  waSatana woukolokoshi. Opo nee Jehova ota shilipaleke kutya ohatu ka kala mOparadisa fiyo alushe, ngaashi naanaa a udaneka. Nopehe na omalimbililo, oto dulu oku ka kala nomwenyo waalushe ngeenge owa ningi etokolo li li mondjila paife.