1, 2. Ізестіг чазынҷаң орын хайда таап аларға?

САҒЫН кӧріңер, сірер тасхар полғанда, хазыр чил пол сыххан. Тигір харал парған, чалын чалбырапча, кӱгӱрт кӱзӱрепче. Ӱр ниместең наңмыр ур сығар, аннаңар сірер чазынҷаң чир тілепчезер. Ізестіг паза хуруғ орын таап алғанда ла, чӱрееңер амырап парча.

² Пӱӱн піс чуртапчатхан тус андағ «хазыр чилліг» кӱнге тӧӧй. Чир чалбахтағы чуртас кӱннің кӱнге хомайдаң хомай полып одырча. Че пістің ізестіг чазынҷаң орын пар. Нимедір ол? Псаломны пасхан кізі теен: «Мин Иеговаа тирбін: „Син минің чазынҷаң чирім паза минің сівеем, минің Худайым, хайзына пӱкӱлее ізенем“» (Псалом 91:2). Ол піске сидіктерні тобырарға полысча паза алнында полар чахсы чуртасха ізеніс пирче, аннаңар Иегованы пістің чазынҷаң орныбыс тирге чарир.

3. Иегова пістке чазынҷаң орын ползын тіп, ниме идерге кирек?

³ Хайдағ даа сидіктерге урунзабыс, Иегова оларны прай сыдас парыбызарға кӱс пирер. Иегова хайдағ даа ыырҷыларыбыстаң хай-хай кӱстіг. Чуртазыбыста уғаа хомай кирек пол парза даа, Иегова ол чобағларның салтарларын прай чох идібізерінде ікінҷілебеске чарир. Библия хығырча: «Худай хынызынаң сыхпаңар» (Иуданың 21, НТ). Сидік тустарда аннаң полызығ алар ӱчӱн, Иеговаа чағын тудынарға кӱстеніңер.

4, 5. Иегованың піске хынчатханы нимедең кӧрінче?

⁴ Иегованаң ынархазыбысты чідірбес ӱчӱн, ол піске тың хынчатханын ундутпасха кирекпіс. Сағын на кӧріңер, ол піске нинҷе кӧп чахсы ниме ит пирген. Ол піске уғаа сіліг чир, ӧзімнер паза аң-хустар пиріп, хынызын кӧзіт пирген. Ағаа хоза, аймах-пасха тадылығ чиис паза арығ суғ пирген. Иегова піске Библия пастыра позының адын ас пирген паза чахсы качестволарынаңар чоохтап пирген. Позының Оолғын, Иисус Христосты, пістің ӱчӱн чуртазын пирібіссін тіп, чирзер ысханында аның хынызы иң чахсы кӧрінче. Анзы аның сыйыхтарның иң аарлығ сыйии полча (Иоанн 3:16). Иисустың тайииның сылтаанда, пістің чахсы чуртасха ізеніс пар.

⁵ Иегова тигірде Мессианскай Хан-ӱлгӱні турғыс салған. Ол Хан-ӱлгӱ прай чобағларны чох идібізер. Аның устаанынаң прай чир рай пол парар. Анда кізілер амыр паза часкалығ мӧгі чуртас чуртирлар (Псалом 37:29). Иегова піске иң чахсы чол кӧзітче паза пазырыстарыбысты хаҷан даа истерге сӧс пирче. Іди ол полған на кізее хынызын іле кӧзітче.

6. Иегованың хынызына хайди ӱндезерге?

⁶ Иегованың хынызына хайди ӱндезерге? Прай ол пирген нимелернің ӱчӱн аны алғыстаңар. Ачырғастығ, че пӱӱн кӧбізі алғыстығ нимес. Иисус Христостың тузында кізілер андағох полғаннар. Пірсінде Иисус чызығ палығлығ он кізіні имнебіскен. Че пір ле кізі, нандыра киліп, аны алғыстаан (Лука 17:12—17). Аннаңар Иегованы алғыстирға хаҷан даа ундутпаалар!

7. Иеговаа хайди хынарға кирек?

⁷ Иегова піске хынчатханда, піске дее ағаа хынарға кирек. Иисус ӱгренҷілеріне Иеговаа прай чӱрекнең,  прай кӧңнінең паза прай сағыснаң хынарға кирек теен. (Матфей 22:37 хығырыбызыңар.) Анзы ниме таныхтапча?

8, 9. Иеговаа хынызыбысты хайди кӧзіт поларбыс?

⁸ «Мин Иеговаа хынчам» теенінең пасха пірее ниме идерге кирек пе? Йа, кирек. Иеговаа прай чӱреебіснең, прай кӧңнібіснең паза прай сағызыбыснаң хынчатханыбыс киректерібістең кӧрінерге кирек (Матфей 7:16—20). Худайға хынчатсабыс, аның чахығларын толдырарбыс тіп Библияда кӧні чоохталча. Аның чахығларын толдырарға аар нимес нооза. (1 Иоанның 5:3 хығырыбызыңар.)

⁹ Иегованың чооғын иссебіс, часкалығ поларбыс (Исаия 48:17, 18). Че Иегованаң ынархазыбысты чідірбеске ниме полыс пирер? Піліп алаалар.

10. Ноға Иеговадаңар аннаң андар піліс аларға кирек?

¹⁰ Иегованаң хайди нанҷылас сыхханыңарны сағысха кирчезер бе? Библияны ӱгреніп, Худайдаңар пілістерің хозылып одырған, іди ағаа нанҷы пол парғазар. Худайнаң нанҷыласханын кӧйчеткен отнаң тиңнестірерге чарир. От кӧйзін тіп, одың сыбыра сал турарға кирек. Ол «отты» ӱзӱрбеске хынчатсар, аннаң андар Иеговадаңар піліс ал турыңар (Притчи 2:1—5).

11. Библиядағы сыннар сірерге хайди влиять поларлар?

¹¹ Библияны аннаң андар ӱгрензер, андағы сыннар чӱрееңерге хайди даа теңерлер. Иисус позынаңар ухаанҷыластарны ікі ӱгренҷее чарыда чоохтап пиргенде, аның сӧстері оларның чӱректеріне ідӧк теңеннер. Олар тееннер: «Ол, чолда піснең чоохтазып, Худай Пічиинеңер чарытчатханда, пістің чӱреебіс ачыбаан ма ни?» (Лука 24:32).

12, 13. а) Иеговаа хынызыбыс хайди пол парарға айабас? б) Иеговаа хынысты соот салбасха ниме полызар?

 ¹² Иисустың ӱгренҷілерінің чӱректеріне ниме теңен? Ызых Пічіктің кизегін піліп алғаны. Сірер Библияны оңнап сыхханда, ідӧк тың ӧрінген поларзар. Анзы сірерні Иегованаң чағын танызып аларға паза ағаа хынарға кӧӧктірген. Че Худайға хыныс сооп парарға айабас. Піс ікінҷілебинчебіс, сірер ол хынысты соот саларға хынминчазар (Матфей 24:12).

¹³ Сірер Иегованың нанҷызы пол парған ползар даа, ынархазыңарны тыыдарын тохтатпаңар. Худайдаңар паза Иисус Христостаңар піліс алып, алған пілістернең чуртаста хайди тузаланарға тирең сағыныңар (Иоанн 17:3). Библияны істесчетсер алай аны олаңай ла хығырчатсар, постарыңа мындағ сурығлар турғызыңар: «Иеговадаңар ниме піліп алдым? Ноға Иеговаа ла прай  чӱреемнең паза кӧңнімнең хынарға кирексім?» (1 Тимофейге 4:15).

14. Хайди пазырыс Иеговаа хыныснаң палғалыстығ?

¹⁴ Чағын нанҷылар нимедең кӧрінчелер? Олар удаа чоохтасчалар. Іди оларның ынархазы пиктең пик полып одырча. Ідӧк пазырыста Иегованаң сыбыра чоохтасчатсабыс, аннаң ынархазыбыс пиктең пик полып одырча. (1 Фессалониктегілерге 5:17 хығырыбызыңар.) Пазырыс — тигірдегі Пабабыстың аарлығ сыйии. Аннаңар, чӱреебісте ниме полчатханын прай азып, пазыр турарға кирек (Псалом 62:8). Ӱгрен салған пазырыстарны хатап-хатап чоохтирға чарабас, Худайзар чӱреебістең сыхчатхан сӧстернең айланарға кирек. Иеговаа хынысты тыыдар ӱчӱн, Библияны аннаң андар ӱгренерге паза ағаа прай чӱрекнең пазырарға кирек.

15, 16. Худай сӧзін искіреріне хайди кӧрчезер?

¹⁵ Худайнаң ынархас уйан пол парбас ӱчӱн, пасхаларына Иеговадаңар чоохтирға кирек. Ол тоғыста араласханы піске улуғ аарлас. Ағаа хоза, Христос ӱгренҷілеріне Иеговадаңар искірерге чахаан. Піс прайзыбыс Худайның Хан-ӱлгӱзінеңер чахсы хабарны искірерге кирекпіс. Сірер ол тоғыста араласчазар ба? (Матфей 24:14; 28:19, 20).

¹⁶ Павел илҷі Худай сӧзін искірерін аарлыға санаан, ол аны «ис-пай» тіп адаан (2 Коринфтегілерге 4:7). Амғы туста Иеговадаңар паза аның сағын салған сағызынаңар кізілерге чоохтирынаң аарлығ тоғыс чоғыл. Анзы Иеговаа пазырыстың чардығы. Иегова пістің нымысчыланызыбысты пӧзік паалапча (Еврейлерге 6:10). Нымысчыланыста араласханы сірерге ле нимес, че сірерні исчеткеннерге дее туза ағылар: олар, сірерӧк чіли,  Иеговаа чағын полып алып, мӧгі чуртас сыйыхха аларлар. (1 Коринфтегілерге 15:58 хығырыбызыңар.) Хан-ӱлгӱдеңер искірерінең турыстығ тоғыс чоғыл!

17. Ноға искіріг тоғызын, соона салдырбин, идерге кирек?

¹⁷ Піс Худайдаңар чахсы хабарны, соона салдырбин, искірерге кирекпіс (2 Тимофейге 4:2). Кізілерге Худайның Хан-ӱлгӱзінеңер амох истіп аларға кирек. Библияда чоохталча: «Иегованың илбек кӱні чағын. Ол чағын паза уғаа маңзырапча»; ол «орайлатпас» (Софония 1:14; Аввакум 2:3). Иегова Сайтанның чабал чир-чалбағын чох идібізер. Ол тус уғаа чағын. Аннаңар, кізілер Иеговаа нымысчыланарға пӧгін аларға маңнанзыннар тіп, піске оларны сизіндірерге кирек.

18. Ноға Иеговаа аның нымысчыларынаң хада пазырарға кирек?

¹⁸ Иегова пісті аның пасха нымысчыларынаң хада ағаа пазырзыннар тіп хынча. Библияда чоохталча: «Удур-тӧдір полызызааңар, хынарға паза чахсы киректер идерге кӧӧктірізееңер. Хай піреелері итчеткен чіли, чыылығларыбысты тастабааңар. Хан-пигібістің килер кӱні чағдапчатханын пілчеткенібісте, кӧңнілерібісті уламох кӧдірізееңер» (Еврейлерге 10:24, 25). Ӧме чыылығларына сыбыра чӧрер ӱчӱн, прай кӱс саларға кирек. Ол чыылығларда удур-тӧдір кӧңнілерібісті кӧдіріс поларбыс паза тыыдыс поларбыс нооза.

19. Харындас-пиҷелерге хынарға ниме полыс пирер?

¹⁹ Ӧмее чыылығларына чӧрзер, чахсы нанҷыларны таап аларзар. Олар сірерге Иеговаа чағын поларға полыс пирерлер. Сірерӧк чіли, Иеговаа прай чӱрекнең нымысчыланчатхан аймах-пасха харындас-пиҷелернең танызып аларзар. Че олар сірерӧк осхас чазыхтығлар, ідӧк алҷаастар итчелер. Аннаңар пыро тастирға тимде полыңар. (Колосстағыларға 3:13 хығырыбызыңар.) Ӧмедегі харындас-пиҷелернің, читпес сариларына хайығ  салбин, чахсы сариларынаңар сағын турыңар. Андада оларға хынарға оой арах полар паза сірер Иеговаа чағын арах пол парарзар.

20, 21. «Сын чуртас» нимедір ол?

²⁰ Иегова аның нанҷылары прай часкалығ ползыннар тіп хынча. Библия полар туста чуртас саңай пасха пол парар тіп ӱгретче.

²¹ Пістің чуртазыбыс 70—80 чыл ла полбас. Піс уғаа сіліг райда мӧгі чуртас чуртирбыс. Хаҷан даа ағырбаспыс. Пірдеезінең хорыхпаспыс. Сынап часкалығ поларбыс! Сах андағ чуртас Библияда «сын чуртас» тіп адалча. Иегова ол чуртасты піске сыйлирға молҷапча, че піске ол сыйыхты алып алар ӱчӱн, ол чуртасха пик «тудынарға» кирек (1 Тимофейге 6:12, 19).

22. а) Сын чуртасха хайди пик тудынарға? б) Мӧгі чуртасты, тоғынып, ал полар ба? Чарыда чоохтап пиріңер.

²² Сын чуртасха хайди пик тудынарға? Кізілерге «чахсы идерге» паза «чахсы киректерге пай поларға» (1 Тимофейге 6:18). Пасха сӧстернең чоохтаза, Библиядаң алған пілістернең чуртаста тузаланарға. Че сын, мӧгі чуртас тоғынған ӱчӱн пирілбинче. Аны Иегова піске паарсаснаң сыйлапча (Римдегілерге 5:15). Ікінҷілебеңер, тигірдегі Паба киртістіг нымысчыларына мӧгі чуртас сыйлап пирерге тың хынча.

23. Сірерге хайдағ пӧгін аларға кирек? Чарыда чоохтап пиріңер.

²³ Позыңарны сурыбызыңар: «Мин Худайның кӧңніне кірер иде пазырчам ма?» Чуртазыңарда ниме-де алыстырарға кирек полчатханын кӧр салзар, соона салдырбин алыстырыңар. Иегованың чооғын иссер ле паза ағаа ізензер ле, ол сірернің чазынҷаң орныңар полар. Сайтанның пу чабал чир-чалбағының тӱгенҷі кӱннерінде  Иегова позының киртістіг нымысчыларын хайраллир паза, пирген сӧзінің хоостыра, райда мӧгі чуртас сыйлап пирер. Йа, сірер амох орта чол таллап алзар, сын чуртасха чит поларзар!