ون توعىزىنشى تاراۋ
ەحوبامەن دوستىعىڭىزدى بەرىك ساقتاڭىز
1، 2. بۇگىندە كىم ٴبىز ٷشىن پانا بولىپ تابىلادى؟
ٴسىز كوشەدە كەتىپ بارا جاتىرسىز دەلىك. ٴبىر ۋاقىتتا داۋىل تۇرا باستادى. اسپان تۇنەرىپ، نايزاعاي ويناپ، كۇن كۇركىرەپ كەتتى. ارتىنان جاڭبىر قۇيدى. ٴسىز قورعاناتىن پانا ىزدەيسىز. ال تاپقاندا، قاتتى قۋانىپ كەتەسىز!
2 ٴبىز ٶمىر ٴسۇرىپ جاتقان ۋاقىت تا وسىنداي داۋىلدى كۇنگە ۇقسايدى. دۇنيەدەگى جاعداي بارعان سايىن ناشارلاپ بارادى. ٴبىراق ٴبىز پانا تاپقانىمىزعا وتە قۋانىشتىمىز. ٴزابۇر جىرشىسى ەحوبا قۇدايعا: «سەن مەنىڭ پانام ٵرى قورعانىمسىڭ، ارقا سۇيەيتىن قۇدايىمسىڭ»،— دەگەن (ٴزابۇر 91:2). ەحوبا بىزگە قيىندىققا تولى وسى دۇنيەدە قورعان بولا الادى. سونداي-اق ول جارقىن بولاشاققا دەگەن ٷمىت بەرەدى.
3. ەحوبا بىزگە پانا بولۋ ٷشىن نە ىستەۋىمىز كەرەك؟
3 ەحوبا ٴبىزدى قالاي قورعايدى؟ ول كەز كەلگەن قيىندىققا توتەپ بەرۋىمىزگە كومەكتەسەدى. ول بىزگە جاماندىق جاساعىسى كەلەتىندەردىڭ قاي-قايسىسىنان دا كۇشتى. باقىتسىزدىققا ۇشىراپ قالعان كۇندە دە، ەحوبا بولاشاقتا ٴبارىن قالپىنا كەلتىرەدى. سوندىقتان كيەلى كىتاپ ٴبىزدى: «قۇدايدىڭ سۇيىسپەنشىلىگىنەن ايىرىلماڭدار»،— دەپ شاقىرادى (ياھۋدا 21). ەحوبامەن قارىم-قاتىناسىمىزدى بەرىك ساقتاساق، قيىن كەزدە ونىڭ كومەگىن الا الامىز.
قۇدايدىڭ سۇيىسپەنشىلىگىن باعالاڭىز
4، 5. ەحوبا ٴبىزدى جاقسى كورەتىنىن قالاي كورسەتەدى؟
4 ەگەر ەحوبانىڭ ٴبىزدى قانشالىقتى جاقسى كورەتىنىن تۇسىنسەك، ونىمەن قارىم-قاتىناسىمىزدى بەرىك ەتىپ ساقتايمىز. ويلاپ كورىڭىزشى، ەحوبا ٴبىز ٷشىن قانشاما جاقسىلىق جاسادى! ول جەرىمىزدى، وسىمدىكتەر مەن جانۋارلاردى تاماشا ەتىپ جاراتتى. سونداي-اق دامدى ازىق-تۇلىك پەن تازا سۋ بەردى. كيەلى كىتاپ ارقىلى ەحوبا بىزگە وزىنىڭ ەسىمى مەن كەرەمەت قاسيەتتەرىن اشتى. ەڭ باستىسى، ول وزىنىڭ سۇيىكتى ۇلى يسانى ٴبىز ٷشىن جانىن قۇربان ەتۋگە جىبەرىپ، ٴبىزدى قاتتى جاقسى كورەتىنىن كورسەتتى (جوحان 3:16). وسى قۇرباندىقتىڭ ارقاسىندا بىزدە جارقىن بولاشاققا دەگەن ٷمىت پايدا بولدى.
5 سونداي-اق ەحوبا كوكتە ٴماسىحتىڭ پاتشالىعىن ورناتتى. بۇل ۇكىمەت جاقىندا بۇكىل قايعى-قاسىرەتتى جوق قىلىپ، جەردى جۇماققا اينالدىرادى. سوندا بارلىق ادام ماڭگى باقي باقىتتى، بەيبىت ٶمىر سۇرەدى (ٴزابۇر 37:29). ەحوبا بىزگە قازىردىڭ وزىندە بارىنشا جاقسى ٶمىر ٴسۇرۋدى ۇيرەتۋ ارقىلى دا سۇيىسپەنشىلىگىن تانىتۋدا. بۇعان قوسا، ول ٴبىزدى وزىنە دۇعا ەتۋگە شاقىرادى. ول دۇعالارىمىزدى تىڭداۋعا قاشاندا دايىن. راسىندا دا، ەحوبانىڭ سۇيىسپەنشىلىگىنە ٵرقايسىسىمىز بولەنىپ جاتىرمىز.
6. ٴسىز ەحوبانىڭ سۇيىسپەنشىلىگىن باعالايتىنىڭىزدى قالاي كورسەتە الاسىز؟
6 ەحوبانىڭ سۇيىسپەنشىلىگىن باعالايتىنىڭىزدى قالاي كورسەتە الاسىز؟ ونىڭ ٴسىز ٷشىن جاساعان بار جاقسىلىعىنا ريزاشىلىق ٴبىلدىرىڭىز. وكىنىشكە قاراي، بۇگىندە كوپ ادام العىستى ۇمىتقان. يسا جەردە بولعان كەزدە دە ادامدار سونداي ەدى. بىردە ول الاپەسپەن اۋىرعان ون كىسىنى ساۋىقتىرعاندا، بىرەۋى عانا كەلىپ راقمەتىن ايتقان (لۇقا 17:12—17). ٴبىز العىس ايتۋدى ۇمىتپاعان وسى ادامعا ۇقساپ، ەحوباعا ٵردايىم راقمەت ايتىپ وتىرعىمىز كەلەدى.
7. ەحوبانى قانشالىقتى جاقسى كورۋىمىز كەرەك؟
7 ەحوبا سىزگە دەگەن سۇيىسپەنشىلىگىن كورسەتكەندەي، ٴسىز دە ونى جاقسى كورەتىنىڭىزدى كورسەتىڭىز. يسا شاكىرتتەرىن ەحوبانى بار جۇرەكپەن، بۇكىل جان-تانمەن، بارلىق اقىل-ويمەن سۇيۋگە شاقىرعان (ماتاي 22:37 وقىڭىز).
8، 9. ەحوبانى جاقسى كورەتىنىمىزدى قالاي كورسەتسەك بولادى؟
8 ەحوبانى جاقسى كورەمىن دەۋ جەتكىلىكتى مە؟ جوق. ەحوبانى بار جۇرەگىمىزبەن، بۇكىل جان-تانىمىزبەن، بارلىق اقىل-ويىمىزبەن جاقسى كورسەك، بۇل ٸس-ارەكەتىمىزدەن كورىنەتىن بولادى (ماتاي 7:16—20). كيەلى كىتاپتا ناقتى ايتىلعانداي، قۇدايدى جاقسى كورەتىن ادام ونىڭ وسيەتتەرىن ورىندايدى. «ال ولاردى ورىنداۋ قيىن ەمەس» (جوحاننىڭ 1-حاتى 5:3 وقىڭىز).
9 ەحوباعا مويىنسۇنساق، ٶمىرىمىز قۋانىش پەن قاناعاتقا تولى بولادى (يشايا 48:17، 18). قازىر قۇدايمەن دوستىعىمىزدى بەرىك ساقتاۋعا نە كومەكتەسەتىنىن قاراستىرايىق.
ەحوباعا جاقىنداي بەرىڭىز
10. نەگە ەحوبا جايلى ٴبىلىم الا بەرۋ كەرەك؟
10 ەحوبامەن قالاي دوس بولعانىڭىزدى ەسكە ٴتۇسىرىڭىزشى. ٴسىز كيەلى كىتاپتى زەرتتەپ، ەحوبانى جاقسىراق تانىپ-ٴبىلدىڭىز. وسىلاي ونىمەن دوس بولدىڭىز. بۇل دوستىقتى وتپەن سالىستىرۋعا بولادى. وت وشپەۋ ٷشىن وتىن سالىپ تۇرۋ قاجەت، سول سياقتى ەحوبامەن دوستىعىڭىز ۇزىلمەس ٷشىن ول جايلى ٴبىلىم الۋدى جالعاستىرا بەرۋىڭىز كەرەك (ناقىل سوزدەر 2:1—5).
وت وشپەۋ ٷشىن وتىن قاجەت ەكەنىندەي، ەحوباعا دەگەن سۇيىسپەنشىلىگىمىز جالىنداپ تۇرۋ ٷشىن ٴبىلىم الا بەرۋ كەرەك
11. كيەلى كىتاپتى زەرتتەي بەرگەنىڭىز سىزگە قالاي اسەر ەتەدى؟
11 كيەلى كىتاپتى ۇزبەي زەرتتەي بەرسەڭىز، جاڭا جايتتاردى بىلەسىز. سول كەزدە جۇرەگىڭىز تەبىرەنبەي قويمايدى. بىردە يسا ەكى شاكىرتىنە كيەلى كىتاپتاعى پايعامبارلىقتاردىڭ ٴمانىن ٴتۇسىندىرىپ بەرگەن. سول كەزدە ولاردىڭ نە سەزىنگەنىنە نازار اۋدارىڭىزشى. ولار: «ول جولشىباي بىزبەن سويلەسىپ، جازبالاردىڭ ٴمانىن تولىعىمەن اشىپ بەرگەندە، جۇرەگىمىز جالىنداپ كەتكەن جوق پا ەدى؟»— دەسكەن (لۇقا 24:32).
12، 13. ا) قۇدايعا دەگەن سۇيىسپەنشىلىگىمىزگە قانداي قاۋىپ ٴتونۋى مۇمكىن؟ ٵ) ەحوباعا دەگەن سۇيىسپەنشىلىگىمىز جالىنداي بەرۋ ٷشىن نە ىستەۋ قاجەت؟
12 كيەلى كىتاپتى وقي باستاعاندا، الگى ەكى شاكىرت سياقتى، ٴسىزدىڭ دە جۇرەگىڭىز جالىنداپ كەتكەن شىعار. وسىنىڭ ارقاسىندا ەحوبا تۋرالى ٴبىلىم الۋعا تالپىنىپ، ونى جاقسى كورە ٴتۇستىڭىز. ەندى وسى سۇيىسپەنشىلىكتى سۋىتىپ العىڭىز كەلمەسى انىق (ماتاي 24:12).
13 قۇدايمەن دوستىعىڭىز بەرىك بولىپ قالسىن دەسەڭىز، كوپ كۇش سالىڭىز. قۇداي مەن يسا تۋرالى كوبىرەك ٴبىلىم الا بەرىڭىز (جوحان 17:3). سونىمەن قاتار بىلگەندەرىڭىز جايىندا جانە ولاردى ومىرىڭىزدە قالاي قولدانۋعا بولاتىنى جايىندا ويلانىڭىز. كيەلى كىتاپتى وقىعاندا، «بۇدان ەحوبا قۇداي تۋرالى نە بىلۋگە بولادى؟ ونى بار جۇرەگىممەن، جان-تانىممەن جاقسى كورۋىمە تاعى قانداي سەبەپ بار؟» دەپ وي جۇگىرتىڭىز (تىموتەگە 1-حات 4:15).
14. دۇعا ەحوباعا دەگەن سۇيىسپەنشىلىگىمىزدى قالاي ارتتىرادى؟
14 ەگەر ادام جان دوسىمەن ٴجيى سىرلاسىپ تۇرسا، دوستىقتارى بەرىك بولا تۇسەدى. سول سياقتى ەحوبامەن دە ٴجيى سويلەسىپ تۇرساق، وعان دەگەن سۇيىسپەنشىلىگىمىز ارتادى (سالونيكالىقتارعا 1-حات 5:17 وقىڭىز). دۇعا — كوكتەگى اكەمىزدىڭ بەرگەن كەرەمەت سيى. وعان دۇعا ەتكەندە، ىشىمىزدەگىنى اقتارايىق (ٴزابۇر 62:8). ويىمىزدا جاتتالىپ قالعان سوزدەردى قايتالاماي، دۇعانى شىن جۇرەكتەن ايتايىق. كيەلى كىتاپتى ٵرى قاراي دا وقىپ-زەرتتەپ، ەحوباعا ٴجيى دۇعا ايتساق، وعان دەگەن سۇيىسپەنشىلىگىمىز جالىنداي تۇسەدى.
باسقالارعا ەحوبا تۋرالى ايتۋ
15، 16. ۋاعىز ٸسى قانشالىقتى ماڭىزدى دەپ ويلايسىز؟
15 ەحوبامەن دوس بولىپ قالعىمىز كەلسە، كيەلى كىتاپتان بىلگەنىمىز جايىندا باسقالارعا دا ايتقانىمىز دۇرىس. باسقا ادامدارعا ەحوبا جايلى ايتۋ — ۇلكەن مارتەبە (لۇقا 1:74، 75). سونداي-اق بۇل — يسانىڭ بارلىق ماسىحشىلەرگە بەرگەن تاپسىرماسى. سوندىقتان ٴبارىمىز قۇداي پاتشالىعى تۋرالى ۋاعىزدايمىز. ٴسىز سولاي ەتىپ ٴجۇرسىز بە؟ (ماتاي 24:14؛ 28:19، 20).
16 ەلشى پاۋىل ىزگى حاباردى ۋاعىزداۋ ٸسىن جوعارى باعالاپ، ونى «قازىناعا» تەڭەگەن (قورىنتتىقتارعا 2-حات 4:7). بۇگىندە وزگەلەرگە ەحوبا تۋرالى جانە ونىڭ ادامزاتقا قاتىستى ماقساتى تۋرالى ايتۋدان ارتىق ماڭىزدى ٸس جوق. وسى ٸستى اتقارۋ ارقىلى ەحوباعا قىزمەت ەتەتىنىڭىزدى كورسەتەسىز. بۇل ەڭبەگىڭىز ول ٷشىن وتە قۇندى (ەۆرەيلەرگە 6:10). سونىمەن قاتار ۋاعىز ٸسى ٶزىڭىز ٷشىن دە، ٴسىزدى تىڭدايتىن ادامدار ٷشىن دە پايدالى. سونىڭ ارقاسىندا ٴسىز دە، ولار دا ەحوباعا جاقىنداي تۇسەسىزدەر جانە ماڭگىلىك ومىرگە يە بولاسىزدار (قورىنتتىقتارعا 1-حات 15:58 وقىڭىز). بۇدان ارتىق قاناعات سيلايتىن تاعى قانداي ٸس بولۋى مۇمكىن؟!
17. ۋاعىز ٸسى نەلىكتەن شۇعىل ٸس بولىپ تابىلادى؟
17 ۋاعىز ٸسى — وتە شۇعىل ٸس. كيەلى كىتاپتا: «قۇداي ٴسوزىن ۋاعىزدا،.. مۇنى كەيىنگە قالدىرماي اتقار»،— دەلىنگەن (تىموتەگە 2-حات 4:2). ادامدار قۇداي پاتشالىعى تۋرالى ەستۋ كەرەك. ويتكەنى «ەحوبانىڭ ۇلى كۇنى جاقىن! ول كۇن جاقىن، تەز جاقىنداپ كەلەدى!» ول «ەش كەشىكپەيدى!» (سافونيا 1:14؛ اباقۇق 2:3). ٴيا، وتە جاقىن ارادا ەحوبا شايتاننىڭ بيلىگىندەگى دۇنيەنى جويادى. بۇل كەز كەلگەنشە ادامداردى ەسكەرتىپ، ولاردى ەحوباعا قىزمەت ەتۋگە شاقىرۋ كەرەك.
18. ەحوباعا نەگە شىنايى ماسىحشىلەرمەن بىرگە عيبادات ەتۋىمىز كەرەك؟
18 ەحوبا ٴبىزدىڭ شىنايى ماسىحشىلەرمەن بىرگە عيبادات ەتكەنىمىزدى قالايدى. كيەلى كىتاپتان بىلاي دەپ وقيمىز: «سۇيىسپەنشىلىككە جانە يگى ىستەرگە تالپىندىرۋ ٷشىن، ٴبىر-بىرىمىزگە كوڭىل بولەيىك. كەيبىرەۋلەر سياقتى جينالىستارعا بارماي قالۋدى ادەتكە اينالدىرمايىق، قايتا، ٴبىر-ٴبىرىمىزدى جىگەرلەندىرە بەرەيىك. سول كۇننىڭ جاقىن قالعانىن بىلگەندىكتەن، بۇلاردى بۇرىنعىدان دا كوبىرەك ىستەيىك» (ەۆرەيلەرگە 10:24، 25). ٴبىز قاۋىم كەزدەسۋلەرىنىڭ ەشبىرىن قالدىرماۋىمىز كەرەك. سەبەبى ول جەردە ٴبىر-بىرىمىزگە جىگەر بەرىپ، كۇش-قۋاتقا يە بولامىز.
19. باۋىرلاستاردى جاقسى كورۋگە نە كومەكتەسەدى؟
19 قاۋىمعا بارىپ تۇرساڭىز، ەحوباعا قىزمەت ەتۋىڭىزگە كومەكتەسەتىن جاقسى دوستار تاباسىز. ٵرتۇرلى ورتادان شىققان بۇل باۋىرلاستار ٴسىز سياقتى ەحوباعا جان-تانىمەن قىزمەت ەتۋگە تىرىسادى. ٴبىراق ولار دا كەمەلسىز بولعاندىقتان، قاتەلىكتەر جاسايدى. سونداي كەزدەرى كەشىرۋگە دايىن بولىڭىز (قولوستىقتارعا 3:13 وقىڭىز). ٵردايىم باۋىرلاستاردىڭ جاقسى جاقتارىنا نازار اۋدارىڭىز. سوندا ولاردى ٵرى قاراي دا جاقسى كورەسىز، ەحوبامەن دوستىعىڭىز دا نىعايا تۇسەدى.
شىنايى ٶمىر
20، 21. «شىنايى ٶمىر» دەگەن نە؟
20 ەحوبا ٶز دوستارىنىڭ تاماشا ٶمىر سۇرگەنىن قالايدى. كيەلى كىتاپتا بولاشاقتا ٶمىرىمىز قازىرگىدەن مۇلدەم باسقاشا بولاتىنى ايتىلعان.
ەحوبا سىزدىڭ «شىنايى ٶمىر» سۇرگەنىڭىزدى قالايدى. ال ٴسىز شە؟
21 ٴبىز جۇماق ورناعان جەر بەتىندە 70 نە 80 جاس قانا ەمەس، ماڭگى جاسايتىن بولامىز. دەنساۋلىعىمىز مىقتى بولادى. بەيبىت تە باقىتتى كۇن كەشەمىز. مۇنداي ٶمىر كيەلى كىتاپتا «شىنايى ٶمىر» دەپ اتالادى. ەحوبا بىزگە وسى ٶمىردى ۋادە ەتىپ وتىر. ٴبىراق ٴبىز دە ٶز تاراپىمىزدان كۇش سالۋىمىز كەرەك، ياعني «شىنايى ٶمىردى بەرىك ۇستانۋىمىز» قاجەت (تىموتەگە 1-حات 6:12، 19).
22. ا) شىنايى ٶمىردى قالاي بەرىك ۇستانا الامىز؟ ٵ) ماڭگىلىك ٶمىر نەنىڭ ارقاسىندا عانا مۇمكىن؟
22 شىنايى ٶمىردى قالاي بەرىك ۇستانا الامىز؟ «جاقسىلىق جاساپ»، «يگى ىستەرگە باي» بولۋ ارقىلى (تىموتەگە 1-حات 6:18). بۇل كيەلى كىتاپتان بىلگەندەرىمىزدى ومىردە قولدانۋدى بىلدىرەدى. دەگەنمەن ٴبىز شىنايى ومىرگە وزدىگىمىزدەن لايىق بولا المايمىز. بۇل ومىرگە ٴبىز قۇدايدىڭ راقىمىنىڭ ارقاسىندا عانا يە بولا الامىز. ٴيا، شىنايى ٶمىر — ەحوبانىڭ ٶز ادال قىزمەتشىلەرىنە بەرەتىن سيى (ريمدىكتەرگە 5:15). كوكتەگى اكەمىز بىزگە وسى سيدى بەرۋگە اسىق.
23. نەگە قازىردەن دۇرىس تاڭداۋ جاساعان ماڭىزدى؟
23 «مەن قۇدايعا ۇنامدى جولمەن عيبادات ەتىپ ٴجۇرمىن بە؟» دەپ ويلانىپ كورىڭىز. قانداي دا ٴبىر وزگەرىستەر جاساۋ كەرەكتىگىن تۇسىنسەڭىز، كىدىرمەستەن ارەكەت ەتىڭىز. ەحوباعا ارقا سۇيەپ، بارىنشا مويىنسۇنۋعا تىرىسساڭىز، ەحوبا ٴسىز ٷشىن پانا بولادى. ول شايتاننىڭ زۇلىم دۇنيەسىنىڭ اقىرى تاياعان ۋاقىتتا وزىنىڭ ادال قىزمەتشىلەرىن قورعايدى. سوسىن، ٶزى ۋادە ەتكەندەي، بىزگە ماڭگى ٶمىر سيلايدى. ەندەشە شىنايى ومىرگە يە بولۋ ٷشىن قازىردەن دۇرىس تاڭداۋ جاساڭىز!
قىزىقتى بولار مالىمەتتەر
كىتاپتار مەن كىتاپشالار
ەحوباعا جاقىندا
قۇداي ٴسىزدىڭ وعان جاقىنداعانىڭىزدى قالايدى. ال وسى كىتاپ سىزگە قۇدايعا قالاي جاقىنداي الاتىنىڭىزدى كيەلى كىتاپتان كورسەتىپ بەرەدى.
قۇرداستارىڭ نە دەيدى؟
كامەرون ەڭ جاقسى ٶمىر جولىن تاڭدادى
ٶمىرىڭىزدىڭ قۋانىشقا تولى بولعانىن قالايسىز با؟ كامەرون ەسىمدى جاس قىزدىڭ بەيتانىس جەردە قالاي كوپ قۋانىشقا كەنەلگەنى جايلى بەينەروليكتى كورىڭىز.
