ជំពូកទី១៩
ចូរនៅជិតព្រះយេហូវ៉ា
១, ២. នៅសព្វថ្ងៃនេះ តើខ្ញុំអាចទទួលការការពារយ៉ាងដូចម្ដេចបាន?
សូមស្រមៃគិតថា នៅថ្ងៃមួយអ្នកកំពុងដើរតាមផ្លូវ ស្រាប់តែឃើញពពកឡើងខ្មៅ ផ្លេកបន្ទោរភ្លឺភ្លែត ឮផ្គរលាន់រំពង។ មិនយូរប៉ុន្មាន ភ្លៀងចាប់ផ្ដើមធ្លាក់យ៉ាងខ្លាំងដូចជាគេហែកមេឃ។ អ្នករត់ត្របាញ់ជើងខំរកកន្លែងជ្រកភ្លៀង។ អ្នកពិតជាធូរស្រាលក្នុងចិត្ដខ្លាំងណាស់ ខណៈដែលអ្នកឃើញមានកន្លែងមួយដែលអាចជ្រកភ្លៀងបានហើយមានសុវត្ថិភាព!
២ នៅសព្វថ្ងៃនេះ យើងក៏មានស្ថានភាពស្រដៀងគ្នាដែរ។ ស្ថានភាពពិភពលោកនេះកាន់តែអាក្រក់ទៅៗ ម៉្លោះហើយអ្នកប្រហែលជាឆ្ងល់ថា ‹តើខ្ញុំអាចទទួលការការពារយ៉ាងដូចម្ដេចបាន?›។ ក្នុងគម្ពីរអ្នកតែងទំនុកតម្កើងបានសរសេរថា៖ «ឯទូលបង្គំ នឹងពោលពីព្រះយេហូវ៉ាថា ទ្រង់ជាទីពឹងពំនាក់ ជាបន្ទាយនៃទូលបង្គំ គឺជាព្រះនៃទូលបង្គំហើយ ទូលបង្គំទុកចិត្ដនឹងទ្រង់»។ (ទំនុកតម្កើង ៩១:២) ពិតមែន ព្រះយេហូវ៉ាអាចជាទីពឹងឬអាចការពារយើងនៅសព្វថ្ងៃនេះ ពេលដែលយើងជួបប្រទះបញ្ហាផ្សេងៗ ហើយលោកក៏ផ្ដល់ឲ្យយើងនូវសេចក្ដីសង្ឃឹមដ៏អស្ចារ្យសម្រាប់អនាគតផងដែរ។
៣. តើតាមរបៀបណាយើងអាចយកព្រះយេហូវ៉ាជាទីពឹង?
៣ តើព្រះយេហូវ៉ាអាចការពារយើងយ៉ាងដូចម្ដេច? លោកអាចជួយយើងឲ្យប្រឈមមុខហើយស៊ូទ្រាំនឹងបញ្ហាណាក៏ដោយដែលយើងមាន។ ម្យ៉ាងទៀត លោកមានឫទ្ធានុភាពខ្លាំងជាងបុគ្គលណាទាំងអស់ដែលប្រហែលជាព្យាយាមធ្វើបាបយើង។ ទោះបីនៅសព្វថ្ងៃនេះយើងរងទុក្ខលំបាកក្ដី យើងអាចជឿប្រាកដថានៅអនាគតព្រះយេហូវ៉ានឹងបំបាត់ចោលស្លាកស្នាមផ្លូវចិត្ដនិងផលវិបាកដែលមកពីទុក្ខលំបាកនោះ។ គម្ពីរលើកទឹកចិត្ដយើងថា៖ «ចូររក្សាខ្លួនជាមនុស្សដែលព្រះស្រឡាញ់»។ (យូដាស ២១) យើងត្រូវនៅជិតព្រះយេហូវ៉ាដើម្បីឲ្យលោកជួយយើងក្នុងអំឡុងគ្រាដ៏ពិបាកនេះ។ ប៉ុន្ដែ តើយើងអាចធ្វើដូច្នោះយ៉ាងដូចម្ដេច?
ចូរប្រព្រឹត្ដតបនឹងសេចក្ដីស្រឡាញ់របស់ព្រះ
៤, ៥. តើព្រះយេហូវ៉ាបានបង្ហាញសេចក្ដីស្រឡាញ់ចំពោះយើងតាមរបៀបណាខ្លះ?
៤ ដើម្បីនៅជិតព្រះយេហូវ៉ា យើងត្រូវយល់អំពីទំហំនៃសេចក្ដីស្រឡាញ់របស់លោកចំពោះយើង។ សូមគិតអំពីអ្វីទាំងអស់ដែលព្រះយេហូវ៉ាបានធ្វើសម្រាប់យើង។ ជាឧទាហរណ៍ លោកផ្ដល់ឲ្យយើងនូវផែនដីដ៏សែនស្អាត ដែលពោរពេញទៅដោយសត្វនិងរុក្ខជាតិដ៏គួរឲ្យពេចពិលរមិលមើល។ បន្ថែមទៅទៀត លោកផ្ដល់ឲ្យយើងនូវទឹកដែលមានផាសុកភាពនិងអាហារដ៏ឈ្ងុយឆ្ងាញ់។ ម្យ៉ាងទៀត តាមរយៈគម្ពីរ ព្រះយេហូវ៉ាបង្រៀនយើងអំពីនាមនិងគុណសម្បត្ដិដ៏អស្ចារ្យរបស់លោក។ សំខាន់បំផុត លោកបានបង្ហាញសេចក្ដីស្រឡាញ់ចំពោះយើង ពេលលោកបានចាត់លោកយេស៊ូដែលជាបុត្រជាទីស្រឡាញ់ឲ្យមកផែនដីដើម្បីលះបង់ជីវិតសម្រាប់យើងទាំងអស់គ្នា។ (យ៉ូហាន ៣:១៦) ដោយសារគ្រឿងបូជាលោះនោះ យើងមានសេចក្ដីសង្ឃឹមដ៏អស្ចារ្យសម្រាប់អនាគត។
៥ ម្យ៉ាងទៀត ព្រះយេហូវ៉ាក៏បានរៀបចំរាជាណាចក្រមេស្ស៊ីដែលជារដ្ឋាភិបាលនៅស្ថានសួគ៌សម្រាប់យើងផងដែរ។ មិនយូរទៀតរាជាណាចក្រនោះនឹងបំបាត់ចោលទុក្ខវេទនាទាំងអស់ ហើយធ្វើឲ្យផែនដីក្លាយជាសួនឧទ្យាន។ នៅពេលនោះ មនុស្សគ្រប់រូបនឹងរស់នៅដោយមានសេចក្ដីសុខសាន្ដនិងសុភមង្គលជារៀងរហូត។ (ទំនុកតម្កើង ៣៧:២៩) វិធីមួយទៀតដែលព្រះយេហូវ៉ាបានបង្ហាញសេចក្ដីស្រឡាញ់ចំពោះយើង គឺដោយបង្រៀនយើងអំពីរបៀបរស់នៅដ៏ល្អបំផុតសម្រាប់គ្រាឥឡូវនេះ។ បន្ថែមទៀត លោកអញ្ជើញយើងឲ្យអធិដ្ឋានទៅលោក ហើយលោកប្រុងប្រៀបស្តាប់សេចក្ដីអធិដ្ឋានរបស់យើងជានិច្ច។ ព្រះយេហូវ៉ាបានបង្ហាញយ៉ាងច្បាស់ថាលោកស្រឡាញ់យើងទាំងអស់គ្នា។
៦. តើយើងគួរប្រព្រឹត្ដតបនឹងសេចក្ដីស្រឡាញ់របស់ព្រះយេហូវ៉ាយ៉ាងដូចម្ដេច?
៦ តើយើងគួរប្រព្រឹត្ដតបនឹងសេចក្ដីស្រឡាញ់របស់ព្រះយេហូវ៉ាយ៉ាងដូចម្ដេច? សូមបង្ហាញលោកថាអ្នកមានចិត្ដកតញ្ញូចំពោះអ្វីៗទាំងអស់ដែលលោកបានធ្វើសម្រាប់អ្នក។ ប៉ុន្ដែគួរឲ្យស្តាយណាស់ នៅសព្វថ្ងៃនេះមនុស្សជាច្រើនគ្មានចិត្ដដឹងគុណឡើយ។ ពេលលោកយេស៊ូនៅផែនដី លោកក៏ធ្លាប់ជួបមនុស្សរមិលគុណដែរ។ នៅពេលមួយ លោកយេស៊ូបានធ្វើឲ្យអ្នកកើតឃ្លង់១០នាក់ជាសះស្បើយ ប៉ុន្ដែមានតែម្នាក់ប៉ុណ្ណោះដែលបានអរគុណលោក។ (លូកា ១៧:១២-១៧) យើងច្បាស់ជាចង់ធ្វើដូចបុរសដែលបានអរគុណលោកយេស៊ូ។ យើងពិតជាចង់អរគុណព្រះយេហូវ៉ាជានិច្ច។
៧. តើយើងគួរស្រឡាញ់ព្រះយេហូវ៉ាខ្លាំងដល់កម្រិតណា?
៧ ម្យ៉ាងទៀត យើងត្រូវបង្ហាញសេចក្ដីស្រឡាញ់ចំពោះព្រះយេហូវ៉ា។ លោកយេស៊ូបានប្រាប់ពួកអ្នកកាន់តាមលោកថាពួកគេត្រូវស្រឡាញ់ព្រះយេហូវ៉ាឲ្យអស់ពីដួងចិត្ដ អស់ពីព្រលឹង ហើយអស់ពីសមត្ថភាពរិះគិត។ (សូមអាន ម៉ាថាយ ២២:៣៧) តើនោះមានន័យយ៉ាងណា?
៨, ៩. តើតាមរបៀបណាយើងអាចបង្ហាញព្រះយេហូវ៉ាថាយើងស្រឡាញ់លោក?
៨ បើយើងគ្រាន់តែនិយាយថាយើងស្រឡាញ់ព្រះយេហូវ៉ា តើគ្រប់គ្រាន់ឬទេ? មិនគ្រប់គ្រាន់ទេ។ បើយើងស្រឡាញ់ព្រះយេហូវ៉ាអស់ពីដួងចិត្ដ អស់ពីព្រលឹង និងអស់ពីសមត្ថភាពរិះគិត នោះយើងនឹងបង្ហាញសេចក្ដីស្រឡាញ់ចំពោះលោកតាមរយៈការប្រព្រឹត្ដ។ (ម៉ាថាយ ៧:១៦-២០) គម្ពីរបង្រៀនយ៉ាងច្បាស់ថា បើយើងស្រឡាញ់ព្រះយេហូវ៉ា យើងនឹងធ្វើតាមបញ្ញត្ដិរបស់លោក។ តើការធ្វើដូចនោះពិបាកទេ? មិនពិបាកឡើយ ពីព្រោះ‹បញ្ញត្ដិរបស់ព្រះយេហូវ៉ាមិនមែនជាបន្ទុកធ្ងន់ទេ›។—សូមអាន យ៉ូហានទី១ ៥:៣
៩ ពេលយើងស្តាប់បង្គាប់ព្រះយេហូវ៉ា យើងមានសុភមង្គលនិងមានជីវិតដ៏គាប់ចិត្ដ។ (អេសាយ ៤៨:១៧, ១៨) ប៉ុន្ដែ តើអ្វីនឹងជួយយើងឲ្យនៅជិតស្និទ្ធនឹងព្រះយេហូវ៉ា? សូមយើងពិនិត្យមើលរឿងនេះ។
ចូរបន្ដនៅកាន់តែជិតព្រះយេហូវ៉ា
១០. ហេតុអ្វីអ្នកគួរបន្ដរៀនអំពីព្រះយេហូវ៉ា?
១០ តើតាមរបៀបណាអ្នកអាចក្លាយជាមិត្ដសម្លាញ់របស់ព្រះយេហូវ៉ា? តាមរយៈការរៀនគម្ពីរ អ្នកបានស្គាល់ព្រះយេហូវ៉ាថែមទៀត ហើយបណ្ដុះចំណងមិត្ដភាពជាមួយនឹងលោក។ ចំណងមិត្ដភាពនេះប្រៀបដូចជាភ្នក់ភ្លើងដែលអ្នកចង់ឲ្យនៅឆេះរហូត។ ដូចជាភ្នក់ភ្លើងដែលត្រូវការឧស នោះអ្នកត្រូវបន្ដរៀនអំពីព្រះយេហូវ៉ាដើម្បីរក្សាចំណងមិត្ដភាពរវាងអ្នកនិងលោកឲ្យកាន់តែរឹងមាំ។—សុភាសិត ២:១-៥
ដូចជាភ្នក់ភ្លើងដែលត្រូវការឧសឲ្យឆេះខ្លាំងជានិច្ច នោះអ្នកក៏ត្រូវរក្សាសេចក្ដីស្រឡាញ់រវាងអ្នក និងព្រះយេហូវ៉ាឲ្យនៅរឹងមាំរហូតដែរ
១១. តើតាមរបៀបណាសេចក្ដីបង្រៀនក្នុងគម្ពីរមានឥទ្ធិពលលើចិត្ដរបស់អ្នក?
១១ កាលដែលអ្នកបន្ដរៀនគម្ពីរ អ្នកនឹងរៀនអំពីអ្វីៗដែលមានឥទ្ធិពលយ៉ាងខ្លាំងទៅលើចិត្ដរបស់អ្នក។ សូមកត់សម្គាល់អំពីអារម្មណ៍របស់អ្នកកាន់តាមលោកយេស៊ូពីរនាក់ ក្រោយពីលោកបានពន្យល់ទំនាយក្នុងគម្ពីរប្រាប់ពួកគេ។ ពួកគេនិយាយគ្នាថា៖ «យើងបានរំភើបចិត្ដជាខ្លាំង កាលដែលលោកកំពុងមានប្រសាសន៍មកយើងតាមផ្លូវ ហើយកំពុងពន្យល់បទគម្ពីរយ៉ាងអស់សេចក្ដីឲ្យយើងយល់ មែនទេ?»។—លូកា ២៤:៣២
១២, ១៣. (ក) តើអ្វីអាចកើតឡើងដល់សេចក្ដីស្រឡាញ់របស់យើងចំពោះព្រះ? (ខ) តើយើងអាចធ្វើយ៉ាងណាដើម្បីរក្សាសេចក្ដីស្រឡាញ់របស់យើងចំពោះព្រះយេហូវ៉ាឲ្យនៅរឹងមាំ?
១២ អ្នកកាន់តាមទាំងពីរនាក់នោះបានរំភើបចិត្ដយ៉ាងខ្លាំង ក្រោយពីពួកគេបានយល់អត្ថន័យបទគម្ពីរ។ អ្នកក៏ប្រហែលជាមានអារម្មណ៍រំភើបដូចពួកគេដែរ ក្រោយពីអ្នកបានចាប់ផ្ដើមយល់នូវអ្វីដែលគម្ពីរបង្រៀន។ នេះបានជួយអ្នកឲ្យស្គាល់ព្រះយេហូវ៉ាហើយស្រឡាញ់លោក។ អ្នកមិនចង់ឲ្យសេចក្ដីស្រឡាញ់នេះរសាយទៅឡើយ។—ម៉ាថាយ ២៤:១២
១៣ ពេលអ្នកក្លាយជាសម្លាញ់របស់ព្រះ អ្នកត្រូវខំប្រឹងរក្សាចំណងមិត្ដភាពនេះឲ្យនៅរឹងមាំជានិច្ច។ អ្នកត្រូវបន្ដរៀនអំពីព្រះនិងលោកយេស៊ូ ហើយរំពឹងគិតអំពីអ្វីដែលអ្នកបានរៀននិងអំពីរបៀបដែលអ្នកអាចអនុវត្ដតាមក្នុងជីវិតរបស់អ្នក។ (យ៉ូហាន ១៧:៣) ពេលអ្នកអានឬសិក្សាគម្ពីរ សូមសួរខ្លួនអ្នកថា ‹តើនេះបង្រៀនខ្ញុំអ្វីអំពីព្រះយេហូវ៉ា? ហេតុអ្វីខ្ញុំគួរស្រឡាញ់លោកឲ្យអស់ពីចិត្ដនិងអស់ពីព្រលឹង?›។—ធីម៉ូថេទី១ ៤:១៥
១៤. តើតាមរបៀបណាសេចក្ដីអធិដ្ឋានជួយយើងឲ្យបន្ដស្រឡាញ់ព្រះយេហូវ៉ាកាន់តែខ្លាំង?
១៤ ពេលអ្នកមានមិត្ដភក្ដិល្អ អ្នកនឹងប្រស្រ័យទាក់ទងគាត់ជាទៀងទាត់។ នេះនឹងជួយឲ្យចំណងមិត្ដភាពរបស់អ្នកនិងគាត់នៅជិតស្និទ្ធ។ ស្រដៀងគ្នាដែរ ពេលយើងអធិដ្ឋានទៅព្រះយេហូវ៉ាជាទៀងទាត់ នោះចំណងមិត្ដភាពរវាងយើងនិងព្រះកាន់តែរឹងមាំជានិច្ច។ (សូមអាន ថែស្សាឡូនិចទី១ ៥:១៧) សេចក្ដីអធិដ្ឋានគឺជាអំណោយដ៏ពិសេសពីបិតារបស់យើងដែលនៅស្ថានសួគ៌។ យើងមិនគួរអធិដ្ឋានដោយពោលពាក្យដដែលៗនោះទេ តែយើងគួរជម្រាបលោកយ៉ាងអស់ពីចិត្ដ ហើយយើងគួរខំព្យាយាមធ្វើតាមអ្វីដែលយើងអធិដ្ឋានសុំ។ (ទំនុកតម្កើង ៦២:៨) បើយើងបន្ដសិក្សាគម្ពីរ ហើយអធិដ្ឋានចេញពីចិត្ដ នោះនឹងជួយយើងឲ្យបន្ដស្រឡាញ់ព្រះយេហូវ៉ាកាន់តែខ្លាំង។
ចូរប្រាប់អ្នកឯទៀតអំពីព្រះយេហូវ៉ា
១៥, ១៦. តើអ្នកមានទស្សនៈយ៉ាងណាចំពោះកិច្ចការផ្សព្វផ្សាយ?
១៥ បើយើងចង់នៅជិតព្រះយេហូវ៉ា យើងក៏ត្រូវប្រាប់អ្នកឯទៀតអំពីជំនឿរបស់យើងដែរ។ ការប្រាប់មនុស្សឯទៀតអំពីព្រះយេហូវ៉ាជាឯកសិទ្ធិដ៏អស្ចារ្យមួយ។ (លូកា ១:៧៤) ម្យ៉ាងទៀត នេះជាភារកិច្ចមួយដែលលោកយេស៊ូបានផ្ដល់ឲ្យគ្រិស្ដសាសនិកពិតទាំងអស់។ យើងម្នាក់ៗគួរផ្សព្វផ្សាយដំណឹងល្អអំពីរាជាណាចក្រព្រះ។ តើអ្នកកំពុងធ្វើកិច្ចការនេះឬទេ?—ម៉ាថាយ ២៤:១៤; ២៨:១៩, ២០
១៦ សាវ័កប៉ូលបានចាត់ទុកកិច្ចការផ្សព្វផ្សាយជាកិច្ចការដ៏មានតម្លៃណាស់។ គាត់ហៅកិច្ចការនេះថាជា«ទ្រព្យវិសេស»។ (កូរិនថូសទី២ ៤:៧) ការប្រាប់អ្នកឯទៀតអំពីព្រះយេហូវ៉ានិងគោលបំណងរបស់លោក គឺជាកិច្ចការដ៏សំខាន់បំផុតដែលអ្នកអាចធ្វើបាន។ នេះជារបៀបមួយដែលអ្នកអាចបម្រើព្រះយេហូវ៉ា ហើយលោកឲ្យតម្លៃចំពោះអ្វីដែលអ្នកធ្វើសម្រាប់លោក។ (ហេប្រឺ ៦:១០) ម្យ៉ាងទៀត កិច្ចការផ្សព្វផ្សាយអាចផ្ដល់ប្រយោជន៍ដល់អ្នកនិងមនុស្សដែលស្តាប់អ្នក។ ហេតុអ្វី? ពីព្រោះអ្នកជួយពួកគេនិងជួយខ្លួនអ្នកឲ្យចូលទៅជិតព្រះយេហូវ៉ា ព្រមទាំងទទួលជីវិតដែលគ្មានទីបញ្ចប់។ (សូមអាន កូរិនថូសទី១ ១៥:៥៨) តើមានកិច្ចការណាផ្សេងទៀតដែលអាចនាំឲ្យអ្នកគាប់ចិត្ដជាងនេះឬទេ?
១៧. ហេតុអ្វីកិច្ចការផ្សព្វផ្សាយត្រូវធ្វើឡើងជាបន្ទាន់?
១៧ កិច្ចការផ្សព្វផ្សាយជាកិច្ចការដែលត្រូវធ្វើជាបន្ទាន់។ យើងគួរ«ប្រកាសបណ្ដាំរបស់ព្រះ» ហើយយើងគួរ«ប្រកាសជាបន្ទាន់»។ (ធីម៉ូថេទី២ ៤:២) មនុស្សត្រូវឮអំពីរាជាណាចក្ររបស់ព្រះ។ គម្ពីរចែងថា៖ «ថ្ងៃដ៏ធំរបស់ព្រះយេហូវ៉ាជិតមកដល់ គឺបានមកជិតហើយ ក៏ប្រញឹកណាស់ដែរ» ហើយទីបញ្ចប់«នឹងមកជាពិត ឥតរារង់ឡើយ!»។ (សេផានា ១:១៤; ហាបាគុក ២:៣) ពិតណាស់មិនយូរទៀតទេ ព្រះយេហូវ៉ានឹងបំផ្លាញចោលពិភពលោកដ៏ទុច្ចរិតរបស់សាថាន។ មុនដែលលោកធ្វើដូច្នេះ មនុស្សត្រូវទទួលការព្រមានជាមុនសិន ដើម្បីពួកគេអាចសម្រេចចិត្ដបម្រើព្រះយេហូវ៉ា។
១៨. ហេតុអ្វីយើងគួរគោរពប្រណិប័តន៍ព្រះយេហូវ៉ាជាមួយនឹងគ្រិស្ដសាសនិកពិតឯទៀត?
១៨ ព្រះយេហូវ៉ាចង់ឲ្យយើងគោរពប្រណិប័តន៍លោកជាមួយនឹងគ្រិស្ដសាសនិកពិតឯទៀត។ គម្ពីរចែងថា៖ «ចូរយើងគិតអំពីគ្នាទៅវិញទៅមក ដើម្បីបំផុសទឹកចិត្ដឲ្យមានសេចក្ដីស្រឡាញ់និងការប្រព្រឹត្ដដែលល្អប្រសើរ មិនមែនដោយគេចវេះពីការប្រជុំគ្នា ដូចអ្នកខ្លះមានទម្លាប់គេចវេះនោះទេ ប៉ុន្ដែដោយលើកទឹកចិត្ដគ្នាទៅវិញទៅមក ហើយធ្វើដូច្នេះកាន់តែខ្លាំងឡើងពេលដែលអ្នករាល់គ្នាឃើញថ្ងៃនោះកាន់តែខិតចូលមកដល់»។ (ហេប្រឺ ១០:២៤, ២៥) យើងគួរខំព្យាយាមអស់ពីសមត្ថភាពដើម្បីចូលរួមកិច្ចប្រជុំទាំងអស់។ កិច្ចប្រជុំផ្ដល់ឱកាសឲ្យយើងលើកទឹកចិត្ដគ្នានិងពង្រឹងជំនឿគ្នាទៅវិញទៅមក។
១៩. តើអ្វីអាចជួយយើងឲ្យស្រឡាញ់បងប្អូនរួមជំនឿ?
១៩ ពេលអ្នកចូលរួមកិច្ចប្រជុំ អ្នកនឹងរកឃើញមិត្ដភក្ដិល្អដែលជួយអ្នកឲ្យគោរពប្រណិប័តន៍ព្រះយេហូវ៉ា។ អ្នកនឹងជួបបងប្អូនជាច្រើនដែលខំធ្វើអស់ពីសមត្ថភាពដើម្បីបម្រើព្រះយេហូវ៉ាដូចអ្នកដែរ។ ពួកគាត់ក៏ជាមនុស្សមិនល្អឥតខ្ចោះ ហើយចេះធ្វើខុសដូចអ្នកដែរ។ ពេលពួកគាត់ធ្វើខុស សូមចេះអភ័យទោសឲ្យពួកគាត់។ (សូមអាន កូឡុស ៣:១៣) សូមផ្ដោតអារម្មណ៍ទៅលើលក្ខណៈល្អរបស់បងប្អូនរួមជំនឿជានិច្ច។ បើអ្នកធ្វើដូច្នេះ អ្នកនឹងស្រឡាញ់ពួកគាត់ហើយចូលកាន់តែជិតព្រះយេហូវ៉ា។
ជីវិតដ៏ពិតប្រាកដ
២០, ២១. តើ«ជីវិតដ៏ពិតប្រាកដ»ជាជីវិតបែបណា?
២០ ព្រះយេហូវ៉ាចង់ឲ្យមិត្ដសម្លាញ់ទាំងអស់របស់លោកមានជីវិតដ៏ល្អបំផុត។ គម្ពីរបង្រៀនយើងថាជីវិតរបស់យើងនៅអនាគតនឹងខុសគ្នាស្រឡះពីជីវិតនៅសព្វថ្ងៃនេះ។
ព្រះយេហូវ៉ាចង់ឲ្យអ្នកទទួល«ជីវិតដ៏ពិតប្រាកដ»។ តើអ្នកនឹងខំឲ្យបានជីវិតបែបនោះឬទេ?
២១ នៅអនាគត យើងនឹងរស់ជារៀងរហូត មិនគ្រាន់តែរស់ត្រឹមអាយុ៧០ឆ្នាំឬ៨០ឆ្នាំប៉ុណ្ណោះទេ។ យើងនឹងមាន«ជីវិតដែលគ្មានទីបញ្ចប់» មានសុខភាពល្អឥតខ្ចោះ មានសេចក្ដីសុខសាន្ដ និងសប្បាយរីករាយនៅផែនដីដែលជាសួនឧទ្យាន។ នេះជាអ្វីដែលគម្ពីរហៅថា«ជីវិតដ៏ពិតប្រាកដ»។ ព្រះយេហូវ៉ាសន្យាផ្ដល់ឲ្យយើងនូវជីវិតដ៏ពិតប្រាកដនេះ ប៉ុន្ដែយើងត្រូវខំប្រឹងយ៉ាងខ្លាំងនៅឥឡូវនេះដើម្បី«ចាប់ឲ្យជាប់នូវជីវិត»ដូចនោះ។—ធីម៉ូថេទី១ ៦:១២, ១៩
២២. (ក) តើតាមរបៀបណាយើងអាច«ចាប់យ៉ាងជាប់នូវជីវិតដ៏ពិតប្រាកដ»? (ខ) ហេតុអ្វីយើងមិនអាចទទួលអំណោយនេះតាមរយៈសមត្ថភាពរបស់យើង?
២២ តើតាមរបៀបណាយើងអាច«ចាប់យ៉ាងជាប់នូវជីវិតដ៏ពិតប្រាកដ»? យើងត្រូវ«ព្យាយាមធ្វើអំពើល្អ» ហើយ«ធ្វើជាអ្នកមានខាងការល្អប្រសើរ»។ (ធីម៉ូថេទី១ ៦:១៨) នេះមានន័យថាយើងត្រូវធ្វើតាមអ្វីដែលយើងរៀនពីគម្ពីរ។ ទោះជាយ៉ាងនេះក្ដី យើងមិនអាចទទួលអំណោយនេះតាមរយៈសមត្ថភាពរបស់យើងទេ។ តាមពិត ជីវិតដ៏ពិតប្រាកដជាអំណោយដែលព្រះយេហូវ៉ាឲ្យដល់អ្នកបម្រើស្មោះត្រង់របស់លោក ហើយនេះជា«គុណដ៏វិសេសលើសលប់»មួយពីលោក។ (រ៉ូម ៥:១៥) បិតានៅស្ថានសួគ៌ពិតជាចង់ឲ្យអំណោយនេះដល់អ្នកបម្រើស្មោះត្រង់របស់លោកខ្លាំងណាស់។
២៣. ហេតុអ្វីអ្នកត្រូវធ្វើការសម្រេចចិត្ដត្រឹមត្រូវនៅឥឡូវនេះ?
២៣ សូមសួរខ្លួនអ្នកថា ‹តើខ្ញុំកំពុងគោរពប្រណិប័តន៍ព្រះតាមរបៀបដែលលោកពេញចិត្ដឬទេ?›។ បើអ្នកឃើញថាអ្នកត្រូវធ្វើការកែប្រែខ្លះ អ្នកគួរធ្វើដូច្នេះភ្លាម។ ពេលយើងទុកចិត្ដព្រះយេហូវ៉ាហើយខំធ្វើអស់ពីសមត្ថភាពដើម្បីស្តាប់បង្គាប់លោក នោះលោកនឹងទៅជាទីពឹងជ្រករបស់យើង។ លោកនឹងការពាររាស្ដ្រស្មោះត្រង់របស់លោកក្នុងអំឡុងគ្រាចុងក្រោយបង្អស់នៃពិភពលោកដ៏ទុច្ចរិតរបស់សាថាន។ បន្ទាប់មក ព្រះយេហូវ៉ានឹងធ្វើឲ្យប្រាកដថាយើងរស់នៅក្នុងសួនឧទ្យានជារៀងរហូត តាមសេចក្ដីសន្យារបស់លោក។ ពិតណាស់ អ្នកអាចទទួលជីវិតដ៏ពិតប្រាកដបាន បើអ្នកធ្វើការសម្រេចចិត្ដត្រឹមត្រូវនៅឥឡូវនេះ!
លោកអ្នកក៏ប្រហែលជាចូលចិត្តដែរ
សៀវភៅផ្សេងៗ
ចូរចូលទៅជិតព្រះយេហូវ៉ា
ព្រះអញ្ជើញលោកអ្នកឲ្យចូលទៅជិតទ្រង់។ សៀវភៅនេះនឹងជួយបង្ហាញលោកអ្នកពីព្រះគម្ពីរនូវរបៀបដែលលោកអ្នកចូលទៅជិតព្រះ។
ទស្សនាវដ្ដី
ចូរទទួលបានជោគជ័យពិតប្រាកដក្នុងជីវិត
ទស្សនៈពីមនុស្សស្រករប្អូន
ខេមរិនបានរកឃើញជីវិតដ៏មានន័យខ្លឹមសារបំផុត
តើប្អូនចង់មានជីវិតដែលមានន័យខ្លឹមសារឬទេ? សូមស្ដាប់ប្អូនស្រីខេមរិនរៀបរាប់នូវរបៀបដែលនាងបានរកឃើញជីវិតដ៏គាប់ចិត្តនៅកន្លែងដែលនាងមិននឹកស្មាន។
