1, 2. Kuebhi ku tu tena kusanga o kukondama kua kidi lelu?

XINGANEKA kuila, ua mu kuenda mu mukau, kua mu bhanga kitembu kiavulu. O diulu dia mu vunda, kua mu baza ji nzaji, kuma kua mu numina. O nvula i sonoka. U mateka kusota kididi phala kudisueka. Kioso ki u sanga kididi kia kondama, u divua kiambote!

² Kiene kimoxi ué ki tuala lelu. O kuiibha mu ngongo kua mu dibandekesa dingi kala kizuua. Eie nange u dibhuidisa, ‘Kuebhi ku ngi tena kusanga o kukondama kua kidi?’ O Bibidia izuela: ‘Ua kéla kuma: Jihova dilengelu, kimbaka; Nzambi iami, nga dielela kua muéne.’ (Jisálamu 91:2) Sé phata Jihova u tena ku tu kuatekesa ku batula o maka u tuala nau lelu, ni ku tu bhana o kidielelu ku hádia.

3. Kiebhi Jihova kia tena kukala dilengelu dietu?

³ Kiebhi Jihova kia tena ku tu langa? Muéne u tena ku tu kuatekesa ku batula maka oso-oso u tu kala nau, muéne uala ni kutena kua soko muthu uoso-uoso nange u fikisa ku tu bhanga kia iibha ndenge. Né muene se tu fuá mba tu kata, tu tena ku dielela kuila ku hádia ima íii ki ia-nda kala-ku dingi. O Bibidia i tu suínisa: ‘Kala mu henda ia Nzambi.’ (Juda 21) Phala ku tambula o kikuatekesu kia Nzambi mu ithangana ia bhonzo, tua tokala ku zukama kua muéne. Kiebhi-phe ki tu tena kubhanga kiki?

4, 5. Kiebhi Jihova kiene mu londekesa o henda iê ko kuetu?

⁴ Phala kuzukama kua Jihova tua tokala kuijiia kuila muéne ua tu zolo kiavulu. Xinganeka mu ima ioso ia tu bhana Jihova. Muéne ua tu bhana ixi ia iuka iezala ni  ithulu ni iama. Ua tu bhana ué kudia kuambote ni menha. Bhu kaxi ka Bibidia, Jihova ua tu longo o dijina diê ni idifuá iê ia iuka. Mu ima ioso íii, o kima kia beta-o-kota, o kubhana mon’ê phala ku tu bhulula ku ituxi ni kalunga. (Nzuá 3:16) Mukonda dia sata íii, tuala ni kidielelu ku hádia.

⁵ Jihova ua tumbika Unguvulu ku diulu, iu ua solo Kristu kukala Sobha. O Utuminu iú, ua-nda zubha o hadi ioso mu ngongo. O Utuminu ua-nda bhangesa o ixi ku kituka palaízu athu oso a-nda tena kuzediua. (Jisálamu 37:29) Kima kia mukua ki londekesa o henda ia Jihova ko kuetu o ku tu longa ku kala ni muenhu ua zediua lelu. Muéne ué ua mesena kuila tu samba kua muéne, mukonda uala polondo phala kuívua o misambu ietu. Sé phata, Jihova uene mu londekesa o henda iê ku athu oso.

6. Kiebhi ki tu tena kusakidila o henda ia Jihova?

⁶ Kiebhi ki u tena ku sakidila o henda ia Jihova? Londekesa kuila ua sanguluka ni ima ioso ia bhange muéne phala o mbote iê. Saí athu kala ni ukexilu ua kusakidila. Kiki kiene ué kia bhitile kioso Jezú kia kexile mu ixi. Saí Kizuua Jezú ua sakele kuinhi dia mala akexile ni dibhute maji diiala dimoxi ngó dia vutuka phala ku mu sakidila. (Luka 17:12-17) Tua mesena kulondekesa o ukexilu ua diiala ua sakidila Jezú. Tua mesena ku sakidila Jihova izuua ioso.

7. Kiebhi ki tua tokala kuzola Jihova ni muxima uoso?

⁷ Tua tokala ué kulondekesa o henda ietu kua Jihova. Jezú uambela o maxibulu mê kuila ene a tokalele kuzola Jihova ni muxima uâ uoso, muenhu uâ uoso ni kilunji kioso. (Tanga Matesu 22:37.) Kiki ki lombolola ihi?

8, 9. Kiebhi ki tu tena kulondekesa kuila tua zolo Jihova mu kidi?

⁸ O kuila o kuzuela ngó mu kanu kuila tua zolo Jihova,  kuabhu? Kana ngana. Se mu kidi tua zolo Jihova ni muxima uetu uoso, muenhu uoso ni kilunji kioso, o ima i tu bhanga ia-nda londekesa kuila tua mu zolo muene mu kidi. (Matesu 7:16-20) O Bibidia i tu longa kuila, o muthu se ua zolo kiambote Nzambi, o muthu iú ua-nda belesela o ijila ia Nzambi. O kuila kubhonza o kubhanga kiki? Kané, mukonda o ijila ia Nzambi “ki ia bhonzo ku i aluka.”—Tanga 1 Nzuá 5:3.

⁹ Kioso ki tu belesela Jihova, tu sanguluka kiavulu ku muenhu. (Izaia 48:17, 18) Maji ihi ia-nda tu kuatekesa kuzukama kua Jihova? Tu mone.

10. Mukonda diahi eie ua tokala kukolokota kudilonga ia lungu ni Jihova?

¹⁰ Kiebhi ki ua kituka u kamba dia Jihova? Mu kudilonga o Bibidia, eie uijiia kiambote Jihova, ua kituka u kamba dia muéne. O ukamba iú ua difuangana ni túbhia, ku mesena kuila tuene tu jima. O túbhia phala ki tu jime, kubhinga kuta-mu jihuinhi, eie ué ua bhingi kukolokota mu kudilonga ia lungu ni Jihova phala o ukamba uê ni muéne u kolokote.—Jisabhu 2:1-5.

11. Kiebhi ki ua-nda divua mu kudilonga o Bibidia?

¹¹ Kioso ki uia ni kudilonga o Bibidia, ua-nda dilonga ima iavulu ia-nda ku suínisa kiavulu. Talesa kiebhi kia divuile o maxibulu aiadi a Jezú kioso Jezú kia a jimbuluile o ikanenu ia Bibidia. Ene ambele: ‘Manhi kiene o mixima ki ia kexile mu ku tu lema moxi, kia kexi ku tu zuelesa mu njíla, ni ku tu jimbuila o maka mòsoneke mu Mikanda ia Ngana!’—Luka 24:32.

12, 13. (a) Se ki tu dilange ihi i tena kubhita ni henda ietu kua Nzambi? (b) Ihi ia-nda tu kuatekesa phala o henda ietu kua Nzambi ki i zonde?

¹² O mixima ia maxibulu ia sangulukile kiavulu mukonda  dia kutendela kiambote o Mikanda Ikôla, eie ué ua sangulukile kiavulu kioso ki ua mateka kuijiia kiambote o Bibidia. O kuijiia kuku kua ku kuatekesa kuijiia kiambote Jihova ni ku mu zola. Mu kiki, eie ku mesena kuila o henda íii i zonda.—Matesu 24:12.

¹³ Kuma u dikamba dia Nzambi, ua bhingi kubhanga nguzu phala kukolesa o ukamba uê ni muéne. Ua tokala kusuluka mu kudilonga ia lungu ni muéne ni ia lungu ni Jezú. Ua tokala ué kuxinganeka mu ima i ua mu dilonga ni kumona kiebhi ki u tena ku i kumbidila ku muenhu uê. (Nzuá 17:3) Kioso ki ua mu tanga mba kudilonga o Bibidia, dibhuidise: ‘O velusu íii i ngi longa ihi ia lungu ni Jihova? Mukonda diahi nga tokala ku mu zola ni muxima uami ni muenhu uami uoso?’—1 Timote 4:15.

14. Kiebhi o kusamba ku kolesa o henda ietu kua Jihova?

¹⁴ O makamba a kazola, a dikunda izuua ioso, kiki ki  bhangesa o ukamba uâ kukolokota. Kiene kimoxi ué, kioso ki tu samba izuua ioso, o henda ietu kua muéne i kuata dingi nguzu. (Tanga 1 Tesalonika 5:17.) O musambu ujitu ua dikota ua tu bhana Tat’etu ia diulu, Jihova. Kima kiambote kuzuela-né ni muxima uoso. (Jisálamu 62:8) Ki tu tokala kubhitulula o misambu kana, maji tua tokala kuzuela o ima ia tu kala ku muxima, o ima i tua-ndala. Kienhiki, se tu suluka mu kudilonga o Bibidia ni kusamba ni muxima uoso, o henda ietu kua Jihova ia-nda kolokota.

15, 16. Kiebhi ki u divua mu kuboka o njimbu iambote ia Nzambi?

¹⁵ Se tua mesena ué kukolokota mu ukamba uetu ni Jihova, tua tokala kutangela akuetu o ima i tua mu dilonga. O kutangela akuetu o mak’â Jihova, ujitu ua dikota ua tu bhana Nzambi. (Luka 1:74) Jezú ua bhana o kikalakalu kiki ku Jikidistá joso ja kidi. Kala muthu mu dietu, ua tokala kuboka o njimbu iambote ia Utuminu ua Nzambi. O kuila ua mu bhanga kiá kiki?—Matesu 24:14; 28:19, 20.

¹⁶ O poxolo Phaulu ua bhanene valolo ia dikota mu kikalakalu kia kuboka, muéne ua sokesa o kikalakalu kiki ni “umvuama.” (2 Kolindo 4:7) O kutangela akuetu ia lungu ni Jihova ni ikanenu iê, kiene o kikalakalu kia beta-o-kota ki tua tokala o kubhanga. Mu kubhanga o kikalakalu kiki, eie ua mu sidivila Jihova, muéne nuka ua-nda jimba o sidivisu i ua mu bhanga. (Jihebeleu 6:10) O kuboka kukuatekesa kikale eie ni akuenu a mu kuívua, mukonda mu kubhanga kiki eie ua mu dikuatekesa ni kukuatekesa ué akuenu kukituka makamba a kazola a Nzambi, o ku hádia mua-nda tambula o muenhu ua kalela-ku. (Tanga 1 Kolindo 15:58.) Sé-ku dingi kikalakalu kia mukuá ki tena ku  bhana kisangusangu kia dikota kála o kuboka o njimbu ia Nzambi!

17. Mukonda diahi tua tokala kuboka ni lusolo luoso?

¹⁷ O kuboka kikalakalu kia lusolo. Tua tokala “kutanga o maka,” mba o njimbu iambote ni lusolo luoso. (2 Timote 4:2) O athu a bhingi kuívua o njimbu iambote ia Utuminu ua Nzambi. O Bibidia iamba: ‘Kizuua kionéne kia Jihova kia zukama; kia-nda kuiza muene lusolo!’ O dizubhilu ki dia-nda “ku kokoloka, kana.” (Sofoniia 1:14; Habakuke 2:3) Kua kambe ngó kathangana, Jihova ua-nda buika o mundu iú ua iibha ua Satanaji. Maji ande dia Nzambi kubhanga kiki, o athu a bhingi ku a dimuna n’a tene kusola kusidivila Jihova.

18. Mukonda diahi tua tokala kubheza Jihova kumoxi ni jiphange jetu mu kilunga?

¹⁸ Jihova ua-ndala kuila tu mu bheza kumoxi ni akuetu mu kilunga. O Bibidia iamba: ‘Tu di xinganekienu mudietu, tu di suinise mu ku dizola, ni kubhanga o mbote. Kana kufula ku di bhongolola jinga, uila amoxi ki ene kufula, maji tu di longesa mudietu. Uila kiki, tu di suinisienu mudietu, kota-kota dingi kioso ki mu mona o Kizuua kia Ngana Jihova kí zukama.’ (Jihebeleu 10:24, 25) Tua tokala kubhanga ioso phala ki tu fonge mu iônge. O iônge i tu bhana kithangana kia kudisuínisa ni jiphange jetu.

19. Ihi ia-nda tu kuatekesa kuzola o jiphange jetu mu kilunga?

¹⁹ Mu kuia mu iônge, eie ua-nda tena kukala ni makamba ambote a-nda ku kuatekesa kubheza kiambote Jihova. Ua-nda kuijiia jiphange javulu, mala ni ahatu, a mu bhanga uá nguzu phala kubheza muéne. Ene uá akua ituxi, a lueza uá kála eie. Ene se a tondala, a loloke. (Tanga Kolose 3:13.) Di kuatenene mu ifua iambote iala na-iu o jiphange jê, kubhanga kiki kua-nda ku kuatekesa ku a zola ni ku kolokotesa o ukamba uê ni Jihova.

20, 21. “O muenhu ua kidi” ihi?

²⁰ Jihova ua-ndala kuila o makamba mê oso a sanguluka ku muenhu. O Bibidia i tu tangela kuila ku hádia tua-nda kala ni muenhu uambote.

²¹ Ki tua-nda tenesa ngó 70 mba 80 a mivu kana, tua-nda kalela-ku ku muenhu. Tua-nda kala ni ‘muenhu ki ua bhua’ ni sauidi iambote, kutululuka ni kuzediua mu palaízu. O Bibidia i xana o muenhu iú, “muenhu ua kidi.” Jihova ua tu kanena ku tu bhana o muenhu iú ua kidi, maji tua tokala kubhanga ioso phala ‘kunaminina’ o muenhu uenhú.—1 Timote 6:12, 19.

22. (a) Kiebhi ki tu tena ‘kunaminina o muenhu ki ua bhua?’ (b) Mukonda diahi ki tu tena kunganhala o muenhu ua kalela-ku mu nguzu ietu?

²² Kiebhi ki tu tena ‘kunaminina o muenhu ki ua bhua?’ Tua tokala ‘kubhanga jinga o mbote’ ni ‘kukala ni umvuama ua ikalakalu ia fuama.’ (1 Timote 6:18) Kiki kilombolola kuila tua tokala kukumbidila o ima i tua mu dilonga mu Bibidia. Maji o muenhu ua kidi ki tua-nda u tambula mukonda dia nguzu ietu kana. Se mu nguzu ietu ngó hinu nuka tueji nganhala o muenhu ua kalela-ku. Iú ujitu ua bhana Jihova ku jiselevende jê ja fiiele phala kulondekesa ‘o henda iê ko kuetu.’ (Loma 5:15) O Tat’etu ia diulu, mu kidi ua mesena kubhana ku jiselevende jê o ujitu iú.

23. Mukonda diahi ua tokala kusola kusidivila Jihova lelu?

²³ Dibhuidise, ‘O kuila nga mu bheza Nzambi mu ukexilu ua tokala?’ Se u mona kuila ua bhingi kulungulula o muenhu uê, bhanga-kiu kindala. Kioso ki tu bhanga nguzu phala kubelesela Jihova ni ku mu dielela, Jihova ua-nda kala dilengelu dietu. Muéne ua-nda langa o jiselevende jê ja fiiele mu izuua íii isukidila-ku ia mundu ua Satanaji.  Hádia Jihova ua-nda bhangesa kuila etu oso tu kala mu Palaízu ia tu kanena. Mu kidi, eie u tena kutambula o muenhu ua kidi, se u sola kusidivila Jihova!