1, 2. I ngany udy mwa kwiitulam leeloow?

LANG neey: udy mu njil diifuk dya ciheeh cya mvul mukasakan. Kwiiwul kufufulul. Mikeny yitatang kumunyik ni mazaj matatang kutayik. Mvul utaatang kutoh bikasakan. Ukaakaam cyaab ciibuh kusokotel. Bulekel bwa byoos, uhehet cyaab ciibuh kusokotel. Umvumvw musangal i mwiin weeh!

² I bya mushind aakaabumw ni tut leeloow. Myand yendend yinyanguk teng ni kunyanguk ha bulab. Misang yikwaabw udy mwa kwiiyihanguj neey: “I kweeh kunady mwa kusokotel?” Mumb a misambw uleebel neey: “Mawej udy cisokotel cyaam, uulaalam ni bukash boos, udy Mawej aam, nady muteek mucim aam woos kuwudy.” (Misambw 91:2) Yehow witwaatwaakish kusulakan ni kutakamin kulengel bwa mafuk maciiyiiy.

3. I biny bitudy mwa kulong bwa Yehow kwiitulamey?

³ I mushind kaay udy Yehow wiitulam? Udy mwa kwiitukwanjok bwa kutatameen makab ning ma bicy. Udy ni bukash buvul buhitok muut woos ukaakaam kwiitulongel bibiih. Ning hikal makab mwa kwiitukwaat, twiikal bajaadik neey, mu mafuk miiyiiy kuuhal, Yehow wiiyiiy kwiitondah ni kufulok makab moos. Bibl wiitukakashish ku micim bwa tut kushaal “mu lukat lwa Mawej.” (Yuud 21) Bwa Yehow kwiitukwanjokey mu matet, bikaam tushaal habwiih ni Yehow. Ki i mushind kaay utudy mwa kushaal habwiih ni Yehow?

4, 5. I mushind kaay udy Yehow mwiituleej lukat lwindiy?

⁴ Bwa kushaal habwiih ni Yehow, i bilengel tumvw neey  i mwiitukat menmen. Lang bwa byoos bidyey mwiitulongel. I mwiitwaakish bulab bulengel menmen, i muteekoh nyam ni mitond yilengel menmen. Wiitwaakakish cikwaabw byakudy bisheem ni mwanz mulengel. Ku dyambulwiish dya Bibl, i mwiitulongweesh diijin dindiy ni bikadil bindiy bihit kulengel. Nang-nang, i mwiituleej lukat lwindiy ha kutumey mwaan indiy Yeez ukaciley bikasakan ha bulab, bwa kwiitufwiiley. (Jah 3:16) Ku dyambulwiish dya mulambw oow, tudy ni kutakamin kulengel bwa mafuk maciiyiiy kuuhal.

⁵ Yehow i muteek bukaleng bwa Mesih, mbul-matady mulombol kudy Mesih. Bukaleng oobw, budy mu diiwul, bwiiyiiy kuman makeng moos mu mafuk makeeh oomw, ni bwiiyiiy kufutulul bulab bwa bushaal paradiz. Mu Paradiz, baat boos biiyiiy kushikatomw buyiil, biikal ni musangal ni bashikat ku mat talal. (Misambw 37:29) Yehow wiituleeleej cikwaabw lukat lwindiy ha kwiitulongweesh mushind a kwiikal ni shikacil mulengel. Cikwaabw wiitwambambil bwa kumusambil, ni udy habwiih bwa kwiitukuney mat. Yehow uleeleej baat boos lukat lwindiy hatook.

6. Bikaam ulong biny bwa lukat lwa Yehow?

⁶ Bikaam ulong biny bwa lukat lwa Yehow? Muleej neey wiitaatab byoos bidyey mukulongel. Leel, baat bavul kabiin biitab bwa kumufwiijok. Ki bilongekel ciisang cya Yeez. Dyumw diifuk, wondahil biin nyaw 10, ki teng waakaabumw umufwiijilok. (Luuk 17:12-17) Bikaam tufwaan muut oow.Tudy mwa kwiikal tufwiijok Yehow mafuk moos.

7. I mushind kaay utudy mwa kukat Yehow?

⁷ Bikaam tuleej cikwaabw neey tudy bakat Yehow. Yeez wambiil biiyij bindiy bwa kukatobw Yehow ni ‘mucim aababw woos,’ ‘ni muuy aababw woos,’ ‘ni meej maababw moos.’ (Bal Matewus 22:37.) Byumvumvwiij biny?

8, 9. I mushind kaay utudy mwa kuleej neey tudy bakat Yehow?

 ⁸ I bikumban bwa kuleeb neey tudy bakat Yehow eeny? Waakweeh. Hikal neey tudy bakat Yehow ni “mucim iitut woos,” “ni muuy iitut woos,” “ni meej miitut moos,” biiyiiy kumweekel mu bilong biitut. (Matewus 7:16-20) Bibl uleeleej hatook neey, hikal neey tudy bakat Mawej, twiiyiiy kukooyel ku may mindiy. I bikasakan bwa kukooyel ku may mindiy eeny? Waakweeh, bwaal “may mindiy kamiishoh bend mahit kwiitukasakeen.”​—Bal 1 Jah 5:3.

⁹ Hikaleby neey tukokooyel Yehow, twiiyiiy kwiikal ni musangal mu shikacil iitut. (Yeshaay 48:17, 18) Ki i biny bidy mwa kwiitukwanjok bwa kushaal habwiih ni Yehow?

10. Bwabingany udy mwa kulong bwa kumanyik Yehow?

¹⁰ I mushind kaay uwudy mushaal mulund a Yehow? Mu kulong kwiibuh kwa Bibl, udy mulong bwa kumumanyik, ni bulund bwiibuh nend i bwiiy kukasakan. Ni bulund oobw budy bu mudil. Bwa mudil kutungunukey ni kuteem, bikaam wiikal usosakany kuny. Bya mushind aakaabumw, bwa bulund bwiibuh ni Yehow kukasakanebw, bikaam utungunuk ni kulong bwa kumumanyik.​—Tusumw 2:1-5.

11. Malongweesh ma mu Bibl miiyiiy kukulongel biny?

¹¹ Uw utungunuk ni kulong Bibl, wiiyiiy kulong myand yiikal mwa kuteeng mucim iibuh. Tal cyaakady biiyij babidy ba Yeez biiy kumvw haakadyey mwiibajingunwiin may ma ciprofet ma mu Bibl. Baleebel neey: “Es micim yiitut mund yaakady yihyaan haakadyey wiitwiisambil myand mu njil ni wiitujingunwiin mukand a Mawej!”​—Luuk 24:32.

12, 13. a) I cingany cidy mwa kulongekel lukat lwiitut bwa Mawej? b) Bikaam tulong biny bwa lukat lwiitut bwa Mawej lushaal lukasakan?

¹² Haakady biiyij ba Yeez bumvw mukand a Mawej,  micim yaababw yaakady yihyaan. Umvwiil byeeb musangal aakaabumw hawutangil kumvw myand ya mu Bibl. Kulong kwiibuh i kukukwanjok bwa kumanyik Yehow ni ku mukat. Kulekoh bend lukat lubwiih ool lutaalal eecy lukeeh.​—Matewus 24:12.

¹³ Bwa bulund bwiibuh ni Mawej kukasakanobw, bikaam wiikashishomw. Tungunuk ni kulong myand habitaatal Mawej ni Yeez. Lang mushind kaay uwudy mwa kukooyel biwuloolong mu shikacil iibuh. (Jah 17:3) Hawubabal Bibl ni umulong, iyihanguj neey: “Bwaal oobw buloolongweesh biny habitaatal Yehow? Mu verseh eey, i biny bisaasak bwa ku mukat ni mucim aam woos ni muuy aam woos?”​—1 Timoteh 4:15.

14. Bwabiny diisambil ditukwaakwanjok bwa tulam lukat lwiitut lukasakan bwa Yehow?

¹⁴ Hawudy ni mulund mulengel, nwiisasamb nend diib dyoos. Mu kulong naak, bulund bwiinun bwiiyiiy kukasakan.  Bya mushind aakaabumw, hatwiisasamb ni Yehow diib dyoos mu diisambil, lukat lwiitut nend lukakasakan. (Bal 1 Biin Tesalonik 5:17.) Diisambil i cya bukish cya buseeb buvul cya kudy Taat iitut a mu diiwul. Bikaam twiisamb teng nend ni mucim woos. (Misambw 62:8) Kabiin bikaam twambulul masambil makwaat ku micim, ki bikaam tulangil ha bitudy mwa kuleeb. Bwa lukat lwiitut bwa Yehow kukasakanelw, bikaam tutungunuk ni kulong Bibl ni kumusambil ni mucim woos.

15, 16. Ulaalang bicy bwa mudimw a kudiil baat musah?

¹⁵ Bwa kushaal mulund a Yehow, bikaam twambil bakwaabw myand yitudy biitab. Kwambil bakwaabw myand ya Yehow i dya katook ditam. (Luuk 1:74) I bujit budy Yeez mwaakish biin krist boos. Bikaam tut boos tudiil baat musah mulengel a Bukaleng bwa Mawej. Ukaady mutang kal kulong nook eeny?​—Matewus 24:14; 28:19, 20, NWT.

¹⁶ Bwa mupostol Pool, kuyiij kwaakady bwaal bwa buseeb menmen. Uleebel neey i “bihak.” (2 Biin Korent 4:7, NWT) Kwambil bakwaabw myand ya Yehow ni bidyey mulongolol i mudimw a buseeb buvul uwudy mwa kulong. I mushind a kulongel Yehow mudimw. Wangangat ni buseeb mudimw uwumukakadil. (Ebreh 6:10) Cikwaabw, mudimw a kuyiij utwaatwaal musangal kudy aab bitukukun mat ni kudy uw mwiin. Mu kulongweesh diiy dya Mawej, ukwaakwanjok baat bakwaabw ni uw mwiin bwa kufweej habwiih ni Yehow ni kuhet buumy bwa mwendelel. (Bal 1 Biin Korent 15:58.) Kudyokoh mudimw mukwaabw udy mwa kukwaakish musangal eeny?

17. Bwabingany kudiil baat musah i mudimw a kulong lwang-lwang?

¹⁷ Mudimw a kudiil baat musah i mudimw a kulong lwang-lwang. Bikaam ‘tulongweesh diiy dya Mawej [. . .]  leeb leebulul.’ (2 Timoteh 4:2) Baat i bakat kumvw musah a Bukaleng bwa Mawej. Bibl uleeleeb nook: “Diifuk ditam dya Yehow diiyiiy. Diiyiiy lwang-lwang lweeh.” Bulekel “myand yinaleeleeb yiiyiiy teng kulongek.” (Sefaniyah 1:14; Habakuk 2:3) Mu mafuk makeeh oomw, Yehow wiiyiiy kubutul Bulongolody bwa Sataan. Ki kuuhal kwa Yehow kwiibubutuley, bikaam tudimwiij baat bwa bangat mahangadik bwa kukadilobw Yehow mudimw.

18. Bwabiny bikaam tuhambidil Yehow hamw ni biin krist bakwaabw ba biin-biin?

¹⁸ Yehow i mukat neey tumuhambidil hamw ni biin krist bakwaabw ba biin-biin. Bibl uleeleeb neey: “Tuvulukanganaay bwiitut kukashishangan ku micim bwa kukatangan bilengel ni kulongelangan myand yilengel. Katulekaay bend bwa kutweel mu byaab biitut bitukookongakeen [bisangil] bwa kuhambidil Mawej. Katulongaay bend bu bakwaabw bady ni cilel cya kuleek kukongakeen haakaabumw. Ki, tukashishanganaay mu mabok; es nudy batalok ney diifuk dya Mawej dyady dyend difweejelok habwiih.” (Ebreh 10:24, 25) Bikaam tulong mwiitut moos bwa kutweel mu bisangil byoos. Bwaal bitukwaakwanjok bwiitut kukashishangan ku micim.

19. I biny bidy mwa kukukwanjok bwa kukat biin kweet baan-balum ni baan-bakaj?

¹⁹ Hawutweetweel mu bisangil bya biin krist, wiiyiiy kuhetomw balund biikal mwa kukukwanjok bwa kuhambidil Yehow. Wiiyiiy kuhetangan ni biin kweet baan balum ni baan bakaj bashil-shilangan baloolong mwaabab moos bwa kumuhambidil an bu uw. Kabiin bawaakan ni baloolong bilem an bu uw. Nook, iikal habwiih bwa kwiibafwiil lus. (Bal Kolos 3:13.) Imanyin teng ha bikadil byaabab bilengel. Kulong nook kwiiyiiy kukukwanjok bwa kwiibakat ni wiiyiiy kushaal cikwaabw habwiih ni Yehow.

20, 21. “Buumy bwa biin-biin” i biny?

²⁰ Yehow i mukat neey balund bindiy biikal ni shikacil mulengel. Bibl wiituloolongweesh neey, shikacil iitut a mafuk maciiyiiy kuuhal wiikakal mushilangan ni utudy nend leeloow.

²¹ Katwiin twiikal ni buumy teng bwa mivw 70 eecy 80. Twiiyiiy kuhet “buumy bwa mwendelel.” Twiiyiiy kwiikal ni makand ma nyeet mawaakan ni twiiyiiy kushikat talal mu paradiz. Bibl ubiibikan bwiin buumy oobw neey “buumy bwa biin-biin.” Yehow i mwiitulay bwa kwiitwaakishebw. Ki bikaam tulong mwiitut moos bwa ‘kwiibuhet’ teng kaabaak.​—1 Timoteh 6:12, 19.

22. a) I mushind kaay utudy mwa “kuhet buumy bwa biin-biin”? b) Bwabiny katwiin bakumbanyin buumy bwa mwendelel?

²² Tudy mwa “kuhet buumy bwa biin-biin” bicy? Bikaam ‘tulong myand yilengel’ ni ‘twiikal ba het ku kukal kwa midimw yilengel.’ (1 Timoteh 6:18) I bwiin kuleeb neey: bikaam twiikal tulong myand yituloolong mu Bibl. Kakwiin ku makand miitut kutudy mwa kuhetel buumy bwa biin-biin. Katwiish bakumbanyin buumy bwa mwendelel. Buumy bwa mwendelel i cya bukish cya kudy Yehow cidyey waakish biin mudimw bindiy bya biituh, i yiy mushind udyey mwiituleej “bukish” bwindiy. (Biin Rom 5:15) Taat iitut a mu diiwul, i mukat kwaakish baat bindiy cya bukish eecy.

23. Bwabiny udy mwa kwangat mahangadik malengel teng kaabaak?

²³ Iyihangujaak neey: ‘Nahahambidil Mawej mu mushind umusasangeej eeny?’ Uw mutal neey bikaam walaabul myand mu shikacil iibuh, long teng kaabaak. Tut balong mwiitut moos bwa kukooyel Yehow ni tut bamutekel micim, wiikakal ciisokotel ciitut. Wiiyiiy kulaam biin mudimw bindiy ku mafuk ma bulekel ma bulongolody bwa  Satan. Hanyim, wiiyiiy kulong bwa tuhet buumy buyiil mu paradiz, teng mudyey mulayey aamw. Udy mwa kuhet buumy bwa biin-biin, uw mwangat mahangadik malengel teng kaabaak!