1, 2. Ñanyi wakonsha kwituzhikijila mu ano moba?

FWANYIKIZHAI kuba’mba mvula wa kinkunkwila ubena kwiya saka muji pa lwendo. Wafinda kya kuba ne panshi pafita. Ubena kubesha ne kutatauka. Mvula watendeka ne kunoka saka mukyangye kumonapo mwakweyama. Mwakonsha kumvwa bingi bulongo inge mwatana mwakweyama mwauma bulongo!

² Ne mu ano moba byobyo kiji. Bintu mu ntanda bibena kuyatu na kutaminako. Mwakonsha kwishikisha’mba, ‘Ñanyi ukanzhikijila?’ Nyimbi wa Masalamo wanembele’mba: “Nkambila Yehoba namba: ‘Mwi kyami kya kufyamamo kabiji mwi nsakwa yami yakosa, Lesa wami ye naketekela.’” (Salamo 91:2) Yehoba wakonsha kwimuzhikijila mu makatazho o mubena kupitamo lonka luno, kabiji ukemulengela kwikala na luketekelo lwa bintu byawama bikamweka kulutwe.

3. Yehoba wakonsha kwikala byepi kya kufyamamo kyetu?

³ Yehoba wakonsha kwituzhikijila byepi? Witukwasha kuyuka bya kuba na makatazho o tubena kupitamo kabiji aye uji na bulume kukila yense wakonsha kwitwikazha bufinda. Nangwa kya kuba bintu byatama bitumwekela, twafwainwa kushiinwa kuba’mba Yehoba ukafumyapo makatazho onse o tubena kupitamo. Twafwainwa kutwajijila kufwenya kwipi ne Yehoba pa kuba’mba etukwashenga mu bimye byakatazha. Baibolo waamba’mba: “Mwikale mu butemwe bwa Lesa.” (Yuda 21) Pano twakonsha kufwenya byepi kwipi ne Lesa?

4, 5. Yehoba wamwesha byepi byo etutemwa pa muntu pa muntu?

⁴ Pa kuba’mba tufwenye kwipi ne Yehoba, twafwainwa kuyuka’mba witutemwa bingi. Langulukainga pa bintu byonse bitubila Yehoba. Witupa ntanda yawama muji bichi ne banyama. Witupa kajo kawama ne mema atoka a kutoma. Kabiji mu Baibolo, witubula jizhina janji ne byubilo byanji byawama. Kyakila pa byonse, Lesa wamwesheshe byo etutemwa byo atumine mwananji kwiya pano pa ntanda na kwitufwila. (Yoano 3:16) Kitapisho kya kwa Yesu kitulengela kwikala na luketekelo mu bintu biji kulutwe.

⁵ Yehoba wanengezha Bufumu bwa Bumesiasa, kafulumende wa mwiulu ukapwisha buyanji bonse. Buno Bufumu bukalula ino ntanda ke paladisa, bantu mo bakekalanga ku matwi nzoo na lusekelo myaka ne myaka. (Salamo 37:29) Kabiji Yehoba na mambo a kuba’mba witutemwa bingi, witufunjisha bya kwikala bulongo mu ano moba. Wituswisha kulomba kwi aye, kabiji umvwa milombelo yetu kimye kyonse. Yehoba wamwesha kuba’mba witutemwa bingi atweba bonse.

6. Mwakonsha kumusanchila byepi Yehoba pa butemwe bwanji?

⁶ Mwakonsha kumusanchila byepi Yehoba pa butemwe bwanji? Mweshainga kuba’mba mumusanchila pa byo emubila. Kyatamakotu bantu bavula ano moba kechi basanta ne. Byobyo kyajinga ne kimye Yesu kyo ajinga pano pa ntanda. Juba jimo Yesu wabukile banabalume jikumi bajinga na mbumba, bino umotu ye wabwelele na kumusanchila. (Luka 17:12-17) Twafwainwa kwikala nobe uno mwanamulume wabwelele na kusanchila Yesu. Twafwainwa kumusanchilanga Yehoba kimye kyonse.

7. Twafwainwa kutemwa byepi Yehoba?

⁷ Ne atweba twafwainwa kumweshanga byo twatemwa Yehoba. Yesu waambile’mba, baana banji ba bwanga bafwainwa kutemwa Yehoba na muchima yense, na mweo yense ne na maana abo onse. (Tangai Mateo 22:37.) Kino kilumbulula ka?

8, 9. Twakonsha kumwesha byepi byo twatemwa Yehoba?

 ⁸ Kutemwa Yehoba kechi kwafwainwa kwikala kwa pa kanwatu ne. Byo tuba byo bimwesha inge kine twatemwa Yehoba na muchima yense, na mweo yense ne na maana etu onse. (Mateo 7:16-20) Baibolo waamba’mba inge twatemwa Lesa tukakokelanga mikambizho yanji. Nanchi kuba bino kwakatazha nyi? Ine, mambo Yehoba “mikambizho yanji kechi yakatazha ne.”—Tangai 1 Yoano 5:3.

⁹ Kukokela Yehoba kulengela bwikalo kuwama ne kwikala na lusekelo. (Isaya 48:17, 18) Pano ki ka kyakonsha kwitukwasha kufwenya kwipi ne Yehoba? Twayai twisambe pa byakonsha kwitukwasha.

10. Mambo ka o mwafwainwa kutwajijila kufunda pe Yehoba?

¹⁰ Mwaikele byepi balunda ne Yehoba? Kufunda Baibolo ko kwimulengejile kuyuka Yehoba ne kwikala balunda nanji. Bulunda bwenu ne aye buji nobe mujilo ye mwafwainwa kutwajijila na kusonselapo pa kuba’mba atemenga. Mujilo pa kuba’mba atwajijile kutema, mwafwainwa kubikangapo nkunyi, ne anweba pa kuba’mba mukoseshe bulunda bwenu ne Yehoba, mwafwainwa kutwajijila kufunda pe aye.—Byambo bya Maana 2:1-5.

11. Bukine bwa mu Baibolo bwakonsha kwimufika byepi pa machima?

¹¹ Inge mwatwajijila kufunda Baibolo, mukataana bintu bikemufika pa muchima. Mukomvwa byonka bya umvwine baana ba bwanga babiji ba kwa Yesu kimye kyo ebalumbulwijilenga bungauzhi bwa mu Baibolo. Baambile’mba: “Nanchi michima yetu kechi ibalukutenga kimye kyo aji kwisambanga ne atweba mu jishinda, ne byo aji kwitulumbulwilanga Binembelo nenyi?”—Luka 24:32.

12, 13. (a) Ki ka kyakonsha kumweka ku butemwe bwenu bo mwatemwa Lesa? (b) Twakonsha kuba byepi pa kuba’mba tutwajijile kutemwa Yehoba?

¹² Byonkatu byalukuchilenga michima ya baana ba  bwanga byo baumvwishishe bungauzhi bwa mu Binembelo, ne anweba mwafwainwa mwatundaikilwe bingi byo mwatendekele kumvwisha biji mu Baibolo. Kuba bino kwimulengela kumuyuka bulongo Yehoba ne kumutemwa. Kechi mukeba buno butemwe kupwa ne.—Mateo 24:12.

¹³ Inge mwaikala mulunda ne Lesa, mwafwainwa kwibikako kukoseshanga buno bulunda. Mwafwainwa kutwajijila kufunda pe Lesa ne Yesu, ne kulanguluka pa byo mwakonsha kulondela byo mubena kufunda mu bwikalo bwenu. (Yoano 17:3) Inge mubena kutanga nangwa kufunda bya mu Baibolo, mwafwainwa kwishikisha anweba bene amba: ‘Kino kibena kumfunjishapo ka pe Yehoba Lesa? Mambo ka o nafwainwa kumutemenwa na muchima yense ne na mweo yense?’—1 Timoti 4:15.

14. Lulombelo lwakonsha kwitukwasha byepi kutemwa Yehoba?

¹⁴ Inge muji na mulunda nenu ye mwatemwa bingi, mwisamba kimye kyonse kabiji kuba bino kulengela bulunda  bwenu kukosa bingi. Kyo kimotu, kwisamba ne Yehoba mu lulombelo kimye kyonse kulengela kumutemwa bingi. (Tangai 1 Tesalonika 5:17.) Lulombelo ke bupe bwanema bingi bwitupa Shetu wa mwiulu. Twafwainwa kwisambanga nanji kimye kyonse kufuma panshi ya muchima. (Salamo 62:8) Kechi twafwainwa kubwezhangapotu byambo bimo byo twalabijila ne. Twafwainwa kwambanga kufuma panshi ya muchima. Tukamutemwa bingi Yehoba, inge twatwajijila kufunda Baibolo ne kulomba kufuma panshi ya muchima.

15, 16. Mumona byepi mwingilo wa kusapwila?

¹⁵ Pa kuba’mba tutwajijile kufwenya kwipi ne Yehoba, twafwainwa kubulangako bakwetu byo twaitabilamo. Kubulako bakwetu pe Yehoba ke mwingilo wanema bingi. (Luka 1:74) Uno ke mwingilo Yesu ye apele bonse bena Kilishitu bakine. Atweba bonse pa muntu pa muntu twafwainwa kusapwilanga mambo awama a Bufumu bwa Lesa. Nanchi mwatendeka kala kusapwila nyi?—Mateo 24:14; 28:19, 20.

¹⁶ Mutumwa Paulo wanemekele bingi mwingilo wa kusapwila. Kyokyo amutelejile’mba “kya buneme.” (2 Kolinda 4:7) Kubulako bantu biji Yehoba ne byo akeba kuba, ke mwingilo wanema bingi pa mingilo yonse yo mwakonsha kwingila. Yehoba wanemeka bingi uno mwingilo, kabiji wanemeka bingi byo mwingila. (Bahebelu 6:10) Kusapwila kukemulengela anweba ne bemuteleka kufwenya kwipi ne Yehoba ne kukekala na bumi bwa myaka ne myaka. (Tangai 1 Kolinda 15:58.) Nanchi kujipo mwingilo wanema kukila uno nyi?

17. Mambo ka o twafwainwa kutelapo muchima kwingila mwingilo wa kusapwila?

¹⁷ Mwingilo wa kusapwila wanema bingi. Twafwainwa ‘kusapwilanga mambo a Lesa na mukoyo.’ (2 Timoti 4:2) Bantu bafwainwa kuyuka Bufumu bwa Lesa. Baibolo  waamba’mba: “Juba jikatampe ja Yehoba jijitu pepi! Jijitu pepi kabiji jibena kupelawizha bingi kwiya!” Mpelo ‘kechi ikakelwa’ kwiya ne. (Zefwaniya 1:14; Habakuka 2:3) Katatakatu Yehoba akonaune ino ntanda yatama ibena kulamwa ne Satana. Saka akyangye kuba bino, bantu bafwainwa kwibajimunako pa kuba’mba basalepo kwingijila Yehoba.

18. Mambo ka o twafwainwa kupopwelanga Yehoba na bakwetu bena Kilishitu bakine?

¹⁸ Yehoba ukeba’mba tumupopwelenga na bakwetu bena Kilishitu bakine. Baibolo waamba’mba: “Twayai twitenga muchima atwe bene na bene kuba’mba twitundaikenga kwitemwa atwe bene na bene ne kuba mingilo yawama, kabiji kange tuleke kupwila pamo byonka byuba bantu bamo ne, bino twitundaikenga atwe bene na bene, ne kwibikishakotu byo mubena kumona aja juba saka jifwenya pepi.” (Bahebelu 10:24, 25) Twafwainwa kuyanga na kupwila kimye kyonse. Pa kuno kupwila twitundaika ne kwikosesha atweba bene na bene.

19. Ki ka kyakonsha kwitukwasha kutemwa balongo ne banyenga bena Kilishitu?

¹⁹ Inge twaya na kupwila, twikala pamo na balunda netu bawama betukwasha kwingijila Yehoba. Mukapwanañananga na balongo ne banyenga babena kwibikako kwingijila Lesa. Nabo batamisha mambo bambulwakulumbuluka byonkatu byo muji. Inge bemutamisha mwafwainwa kwibalekelako mambo. (Tangai Kolose 3:13.) Mwafwainwa kutatu muchima pa bintu byawama byuba balongo ne banyenga bena Kilishitu. Kuba bino kukemulengela kwibatemwa bingi kabiji kukakosesha bulunda bwenu ne Yehoba.

20, 21. “Bumi bwa kine kine” bo bu ka?

²⁰ Yehoba ukeba balunda nanji bonse kwikala bulongo.  Baibolo waamba’mba, kulutwe na lwendo tukekalanga bingi bulongo, kechi tukekalanga byonka byo tubena kwikala mu ano moba ne.

²¹ Tukekalanga myaka ne myaka. Kechi tukekalangatu myaka 70 nangwa 80 ne. Tukekalanga “myaka ne myaka” na butuntulu bwa mubiji bwawama, ku matwi nzoo ne na lusekelo mu paladisa, mu ntanda yanengela. Buno bo bumi Baibolo bo itela’mba, “bumi bwa kine kine.” Yehoba walaya kwitupa bumi bwa kine kine, pano bino twafwainwa ‘kwibukwachisha.’—1 Timoti 6:12, 19.

22. (a) Twakonsha ‘kukwachisha byepi ku bumi bwa kine kine’? (b) Nanchi twakonsha kwingijila bumi bwa myaka ne myaka nyi?

²² Twakonsha kuba byepi pa kuba’mba ‘tukwachisha ku bumi bwa kine kine’? Twafwainwa ‘kubanga byawama’ ne kwikala “banonshi ba mingilo yawama.” (1 Timoti 6:18) Kino kilumbulula’mba twafwainwa kulondelanga byo tufunda mu Baibolo mu bwikalo bwetu. Nangwa byonkabyo, kechi tukekala na bumi bwa kine kine na mambo a kwibikako kwetu ne. Kafwako wakonsha kwingijila bumi bwa myaka ne myaka ne. Ke bupe Yehoba bo akapa bapopweshi banji bakishinka na mambo a ‘lusa lwanji lukatampe.’ (Loma 5:15) Shetu wa mwiulu ubena kukebesha bingi kupa bapopweshi banji bakishinka bumi bwa kine kine.

23. Mambo ka o mwafwainwa kufuukwilanga bintu bulongo lonka luno?

²³ Ishikishai anweba bene amba: ‘Nanchi mpopwela Lesa kwesakana na byo akeba ku mupopwela nyi?’ Inge mwamona’mba kujipo bimo byo mwafwainwa kuleka, bilekai. Inge twaketekela Yehoba na muchima yense ne kumukokela mu byonse byo tuba, Yehoba popo akekala kya kufyamamo kyetu. Ukalama bapopweshi banji bakishinka mu moba a kupelako a ntanda ibi ibena kulamwa ne Satana. Kabiji Yehoba ukamona kuba’mba twaikala mu  Paladisa myaka ne myaka, byonka byo alayile. Kya kine, inge ke mufuukule bintu bulongo mu bwikalo lonka luno, mukekala na bumi bwa kine kine.