1, 2. Udat wi go tɔn to fɔ protɛkt wi tide?

IMAJIN se yu de waka na do we ebi ebi briz de blo. Di skay de dak, laytin bigin fɔ flash, ɛn tɛnda bigin fɔ krak. I nɔ tu te ren bigin fɔ kam. Dɔn yu bigin luk fɔ ples fɔ ayd. Yu rili gladi we afta sɔm tɛm yu ebul fɔ fɛn ples we sef ɛn dray!

² Di wɔl tide dɔn tan lɛk ples we big big briz de blo ɛn ebi ebi ren de kam. Tin dɛn de go frɔm bad to wɔs. Yu go de wɔnda, ‘Udat a go tɔn to fɔ protɛkt mi?’ Wan pan di man dɛn we rayt di Sam buk bin rayt se: “Ɛnibɔdi we go to PAPA GƆD [“Jiova,” NW] fɔ mek i kɔba am . . . go tɛl Gɔd se nain de kɔba am ɛn fɛt fɔ am, in na di Gɔd we i de wɔship so i go abop pan am.” (Sam 91:​1, 2) Fɔ tru, Jiova go ɛp wi wit wi prɔblɛm dɛn naw, ɛn i go gi wi wɔndaful op fɔ tumara bambay.

3. Wetin wi fɔ du fɔ mek Jiova ɛp wi?

³ Aw Jiova go protɛkt wi? I go ɛp wi fɔ sɔlv ɛni prɔblɛm we wi gɛt, ɛn i gɛt pawa fa fawe pas ɛnibɔdi we go want fɔ du bad tin to wi. Ivin if bad tin apin to wi naw, wi fɔ biliv se Jiova go sɔlv di prɔblɛm tumara bambay. Di Baybul ɛnkɔrej wi se: “Kɔntinyu fɔ du sɔntin we go mek Gɔd lɛk una.” (Jud In Lɛta 21, NW) Wi nid fɔ kɔntinyu fɔ de nia Jiova fɔ mek i go ɛp wi di tɛm we tin tranga. Bɔt aw wi go du dat?

4, 5. Aw Jiova dɔn sho se i lɛk wi?

⁴ Fɔ lɛ wi kɔntinyu fɔ de nia Jiova, wi nid fɔ no di kayn we aw i lɛk wi. Tink bɔt ɔl wetin Jiova dɔn du fɔ wi. I dɔn gi wi fayn ples fɔ de, ɛn i ful-ɔp di wɔl wit fayn fayn plant ɛn animal dɛn. I dɔn gi wi bak gud tin fɔ it ɛn klin wata fɔ drink. Jiova dɔn yuz di Baybul fɔ tich wi bɔt in nem ɛn in wɔndaful kwaliti dɛn. Apat frɔm dat, i sho se i rili lɛk wi bay we i sɛn in Pikin we na Jizɔs, we i lɛk, na di wɔl fɔ gi in layf fɔ wi. (Jɔn 3:​16) Wi gɛt wɔndaful op fɔ tumara bambay, bikɔs Jiova mek Jizɔs kam sakrifays in layf fɔ wi.

⁵ Jiova dɔn mek in gɔvmɛnt na ɛvin we go mek ɔl di sɔfa we wi de sɔfa dɔn jisnɔ. Di Kiŋdɔm go mek di wɔl bi Paradays, usay ɔlman go de wit kolat ɛn gladi at sote go. (Sam 37:​29) Di ɔda we aw Jiova dɔn sho se i lɛk wi na bay we i de tich wi di bɛst we aw fɔ liv naw. I dɔn invayt wi bak fɔ pre to am, ɛn i rɛdi ɔltɛm fɔ lisin to wi prea dɛn. Jiova dɔn sho klia wan aw i lɛk mɔtalman.

6. Wetin yu fɔ du we go sho se yu lɛk Jiova?

⁶ Wetin yu fɔ du we go sho se yu lɛk Jiova ? Sho se yu gladi fɔ ɔl wetin Jiova dɔn du fɔ yu. I sɔri fɔ no se, bɔku pipul dɛn tide nɔ gɛt tɛnki. Na di sem tin bin apin di tɛm we Jizɔs bin de na di wɔl. Wan de, Jizɔs mɛn tɛn man dɛn we bin gɛt lɛprɔsi, bɔt na wan pan dɛn nɔmɔ bin tɛl am tɛnki. (Lyuk 17:​12-17) Wi want fɔ bi lɛk di man we bin tɛl tɛnki to Jizɔs. Wi want fɔ de tɛl Jiova tɛnki ɔltɛm.

7. Aw wi fɔ sho se wi rili lɛk Jiova?

 ⁷ Wi nid fɔ sho bak se wi lɛk Jiova. Jizɔs bin tɛl in disaypul dɛn se dɛn fɔ lɛk Jiova wit ɔl dɛn at, ɔl dɛn sol, ɛn ɔl dɛn maynd. (Rid Matyu 22:​37.) Wetin dat min?

8, 9. Aw wi go sho se wi lɛk Jiova?

⁸ Wi nɔ fɔ jɔs tɔk se wi lɛk Jiova. If wi lɛk Jiova wit ɔl wit wi at, sol, ɛn maynd, wi go sho se wi lɛk am bay di tin dɛn we wi de du. (Matyu 7:​16-20) Di Baybul tich klia wan se if wi lɛk Gɔd, wi go obe in lɔ dɛn. Yu tink se na tin we tranga fɔ du? Nɔ, bikɔs “wetin i tɛl wi fɔ du nɔ traŋa fɔ wi.”—Rid Jɔn In Fɔs Lɛta 5:​3.

⁹ We wi obe Jiova, wi go gɛt gladi at ɛn wi go satisfay. (Ayzaya 48:​17, 18) Bɔt wetin go ɛp wi fɔ Kɔntinyu fɔ de nia Jiova? Lɛ wi si.

10. Wetin mek yu fɔ kɔntinyu fɔ lan bɔt Jiova?

¹⁰ Aw yu kam fɔ bi Jiova in padi? We yu bin de stɔdi di Baybul, yu kam fɔ no Jiova mɔ ɛn gɛt tayt padi biznɛs wit am. Dis padi biznɛs tan lɛk faya we yu go want fɔ mek i kɔntinyu fɔ de kech. Jɔs lɛk aw wud de mek faya kech, yu nid fɔ kɔntinyu fɔ de lan bɔt Jiova fɔ mek yu go gɛt tayt padi biznɛs wit am.—Prɔvabs 2:​1-5.

11. Aw di tin dɛn we di Baybul de tich go afɛkt yu?

¹¹ As yu de kɔntinyu fɔ stɔdi di Baybul, yu go lan bɔku tin dɛn we go rili tɔch yu at. Notis aw tu pan Jizɔs in disaypul dɛn bin fil as Jizɔs bin de ɛksplen to dɛn bɔt di tin dɛn we di Baybul bin dɔn tɔk bɔt. Dɛn  bin se: “Nɔto dat mek sɔntin tɔch wi at wɛn i bin de tɔk ɛn wɛn i bin de ɛksplen wetin dɛn rayt na Gɔd in buk, wɛn wi de kam?”—Lyuk 24:​32.

12, 13. (a) Wetin kin apin to di lɔv we wi gɛt fɔ Gɔd? (b) Aw wi go kɔntinyu fɔ lɛk Jiova?

¹² Jɔs lɛk aw di tin dɛn we Jizɔs bin de ɛksplen bin tɔch di disaypul dɛn at we dɛn kam fɔ ɔndastand di skripchɔ dɛn, yu go dɔn fil di sem we as yu bigin fɔ ɔndastand di Baybul. Dis dɔn ɛp yu fɔ no Jiova ɛn lɛk am. Yu nɔ want fɔ mek dis lɔv dɔn.—Matyu 24:​12.

¹³ As yu dɔn bi Gɔd in padi, yu nid fɔ wok tranga wan fɔ mek una padi biznɛs go tayt. Yu fɔ kɔntinyu fɔ lan bɔt Gɔd ɛn Jizɔs ɛn tink bɔt wetin yu de lan ɛn aw yu go du wetin yu de lan. (Jɔn 17:​3) We yu de rid ɔ stɔdi di Baybul, aks yusɛf: ‘Wetin dis de tich mi bɔt  Jiova Gɔd? Wetin mek a fɔ lɛk am wit ɔl mi at ɛn sol?’—Fɔs Lɛta To Timoti 4:​15.

14. Aw prea kin ɛp wi fɔ kɔntinyu fɔ lɛk Jiova?

¹⁴ We yu gɛt gud padi, yu kin tɔk to am ɔltɛm, ɛn dis kin mek una padi biznɛs tayt mɔ ɛn mɔ. Semweso, we wi tɔk to Jiova ɔltɛm na wi prea, dat de mek wi kɔntinyu fɔ lɛk am mɔ ɛn mɔ. (Rid Fɔs Lɛta Fɔ Tɛsalonayka 5:​17.) Prea na wɔndaful gift frɔm wi Papa we de na ɛvin. Wi fɔ tɔk to am ɔltɛm frɔm wi at. (Sam 62:​8) Wi nɔ fɔ kram wi prea dɛn, bɔt wi fɔ rili min wetin wi de se. Fɔ tru, if wi kɔntinyu fɔ stɔdi di Baybul ɛn pre frɔm wi at, di lɛk we wi lɛk Jiova go kɔntinyu fɔ strɔng mɔ ɛn mɔ.

15, 16. Aw yu si di prichin wok?

¹⁵ If wi want fɔ kɔntinyu fɔ de nia Jiova, wi nid fɔ tɔk to ɔda pipul dɛn bak bɔt wetin wi biliv. Fɔ tɔk to ɔda pipul bɔt Jiova na big big ɔnɔ. Na wok we Jizɔs bin gi to ɔl tru Kristian dɛn. Wi ɔl fɔ prich di gud nyuz bɔt Gɔd in Kiŋdɔm. Yu dɔn ɔlrɛdi du dis?—Matyu 24:​14; 28:​19, 20.

¹⁶ Di apɔsul Pɔl bin no se di prichin wok na wok we rili valyu; i bin se na “jɛntri.” (Sɛkɛn Lɛta Fɔ Kɔrint 4:​7) Fɔ tɛl ɔda pipul dɛn bɔt Jiova ɛn wetin i want fɔ du na wok we rili impɔtant pas ɛni ɔda wok we yu go want fɔ du. Na wan we dis fɔ lɛ yu sav Jiova, ɛn i valyu wetin yu de du fɔ am. (Di Ibru Pipul Dɛn 6:​10) Prichin bak kin bɛnifit yu ɛn di wan dɛn we de lisin to yu bikɔs yu go ɛp dɛn ɛn yusɛf fɔ kɔntinyu fɔ de nia Jiova ɛn fɔ gɛt layf we go de sote go. (Rid  Fɔs Lɛta Fɔ Kɔrint 15:​58.) Ɛni ɔda wok de we go satisfay yu pas di prichin wok?

17. Wetin mek wi nɔ fɔ westɛm fɔ du di prichin wok?

¹⁷ Wi nɔ fɔ westɛm fɔ du di prichin wok. Wi fɔ “tɛl pipul di mɛsej,” ɛn wi fɔ du dat “ɔltɛm.” (Sɛkɛn Lɛta To Timoti 4:​2) Pipul dɛn nid fɔ yɛri bɔt Gɔd in Kiŋdɔm. Di Baybul se: “Di big big de we PAPA GƆD [“Jiova,” NW] de kam dɔn nia ɛn i de kam jisnɔ.” Di tɛm fɔ di ɛnd “nɔ go let!” (Zɛfinaya 1:​14; Abakɔk 2:​3, NW) Fɔ tru, i nɔ go te igen, Jiova go dɔnawe wit Setan in wikɛd wɔl. Bifo dat apin, pipul dɛn nid fɔ yɛri di wɔnin so dat dɛn go disayd fɔ sav Jiova.

18. Wetin mek wi fɔ wɔship Jiova wit ɔda tru Kristian dɛn?

¹⁸ Jiova want mek wi wɔship am wit ɔda pipul dɛn we na tru Kristian dɛn. Di Baybul se: “Una lɛ wi tink aw wi go ɛp wisɛf mek wi go lɛk wi kɔmpin dɛn ɛn du gud to dɛn. Una lɛ wi nɔ tap fɔ de mit, lɛ wi nɔ fala dɛn pipul we nɔ de gri fɔ go mitin. Bɔt una lɛ wi de kɔrej wi kɔmpin dɛn, mɔ igen we wi no se di De we wi Masta go kam bak de kam jisnɔ.” (Di Ibru Pipul Dɛn 10:​24, 25) Wi fɔ du wi bɛst fɔ de atɛnd ɔl di mitin dɛn. Di mitin dɛn de gi wi di chans fɔ ɛnkɔrej wisɛf fɔ tinap tranga wan.

19. Wetin go ɛp wi fɔ lɛk wi Kristian brɔda ɛn sista dɛn?

¹⁹ We yu de atɛnd di mitin dɛn, yu go fɛn gud padi dɛn we go ɛp yu fɔ wɔship Jiova. Yu go mit difrɛn brɔda ɛn sista dɛn we de du dɛn bɛst lɛk yu fɔ wɔship am. Dɛn sɛf nɔ pafɛkt jɔs lɛk yu, ɛn dɛn kin mek mistek. We dɛn mek mistek, yu fɔ rɛdi fɔ fɔgiv dɛn. (Rid Lɛta Fɔ Kɔlɔse 3:​13.) Go de tink ɔltɛm bɔt di gud kwaliti dɛn we yu Kristian brɔda ɛn sista dɛn  gɛt, we yu du so, dat go ɛp yu fɔ lɛk dɛn ɛn kam nia Jiova mɔ ɛn mɔ.

20, 21. Wetin na “di tru layf”?

²⁰ Jiova want ɔl in padi dɛn fɔ gɛt di bɛst layf. Di Baybul tich se di layf we wi go gɛt tumara bambay go difrɛn fa fawe frɔm di layf we wi gɛt tide.

²¹ Tumara bambay, wi go liv sote go, nɔto fɔ jɔs 70 ɔ 80 ia nɔmɔ. Wi go ɛnjɔy “layf we go de sote go” wit wɛlbɔdi, kɔl at, ɛn gladi at na paradays. Na dat di Baybul kɔl “di tru layf.” Jiova dɔn prɔmis fɔ gi wi dis tru layf, bɔt wi fɔ du ɔl wetin wi ebul naw fɔ “fɛt” fɔ gɛt am.—Fɔs Lɛta To Timoti 6:​12, 19.

22. (a) Aw wi go “gɛt da layf we na di tru layf”? (b) Wetin mek wi nɔ go ebul fɔ wok fɔ gɛt da layf we go de sote go?

²² Aw wi go ‘gɛt da layf we na di tru layf’? Wi fɔ du “wetin gud” ɛn wi fɔ “du fayn tin dɛn.” (Fɔs Lɛta To Timoti 6:​18, NW) Dis min se wi nid fɔ de du wetin wi de lan frɔm di Baybul. Bɔt nɔto di tin dɛn we wi de du go mek wi gɛt di tru layf. Wi nɔ go ɛva ebul fɔ wok fɔ gɛt da layf we go de soto go. Na fri gift we Jiova Gɔd de gi to in savant dɛn we fetful, dis na ɛgzampul bɔt “di lɛk we Gɔd lɛk wi we wi nɔ fit fɔ gɛt.” (Lɛta Fɔ Rom 5:​15) Wi Papa we de na ɛvin rili want fɔ gi in savant dɛn we fetful dis gift.

23. Wetin mek na naw yu nid fɔ disayd fɔ du di rayt tin dɛn?

²³ Aks yusɛf, ‘A de wɔship Gɔd di we aw i want?’ If yu notis se yu nid fɔ mek sɔm chenj, na fɔ du dat naw. We wi abop pan Jiova ɛn du ɔl wetin wi ebul fɔ obe am, Jiova go protɛkt wi. I go protɛkt in fetful  pipul dɛn insay dis las dez na Setan in wikɛd wɔl. Dɔn Jiova go mek shɔ se wi liv na Paradays sote go, jɔs lɛk aw i dɔn prɔmis. Fɔ tru, yu go gɛt di tru layf if yu disayd fɔ du di rayt tin dɛn naw!