တၢ်မၤလိ ၁၉
သုးဘူးနသးဆူ ယဟိဝၤယွၤအအိၣ်ထီဘိ
၁, ၂. မုၢ်မဆါတနံၤအံၤ ပဃုထံၣ်န့ၢ် တၢ်အိၣ်သဒၢအလီၢ် ကသ့ဝဲဖဲလဲၣ်.
ဆိကမိၣ်ကွၢ် ကလံၤမုၢ်ဟဲဝဲသတူၢ်ကလာ် ဖဲနဟးလၢကျဲမုၢ်ခိၣ်အခါတက့ၢ်. တဘျီဃီန့ၣ် တၢ်အၢၣ်ခံးထီၣ်ဝဲ, လီဝၢ်ဒံးကပြုၢ်ထီၣ် ဒီးလီသီၣ်ထီၣ်ဝဲလီၤ. တယံာ်ဘၣ်အလီၢ်ခံန့ၣ် မူခိၣ်စူၤလီၤဝဲလီၤ. ဖဲန့ၣ်အဆၢကတီၢ် နကဃုတၢ်လီၢ်တတီၤတီၤလၢ နကအိၣ်သဒၢနသးအဂီၢ်လီၤ. ဖဲနဃုတၢ်အိၣ်သဒၢအလီၢ်ဘၣ်ဝဲအခါ နတၢ်သူၣ်ကိၢ်သးဂီၤ ကဟါမၢ်ကွံာ်ဝဲလီၤ.
၂ မုၢ်မဆါတနံၤအံၤ တၢ်အိၣ်အသးတဖၣ် မၤအသးဒ်န့ၣ်လီၤ. ဟီၣ်ခိၣ်အတၢ်အိၣ်သးတဖၣ် နးထီၣ်ဝဲကွ့ၢ်ကွ့ၢ်လီၤ. လၢတၢ်န့ၣ်အဃိ နကဆိကမိၣ်ဘၣ်လၢ ‘ယဃုတၢ်အိၣ်သဒၢအလီၢ် ကသ့ဝဲဖဲလဲၣ်.’ ပှၤကွဲးထါစံးထီၣ်ပတြၢၤတဂၤ စံးဝဲလၢ– “ယစံးလၢယွၤအဂ့ၢ်အကျိၤန့ၣ် မ့ၢ်ယတၢ်အိၣ်တဒၢအလီၢ်, ဒီးယတိာ်တဖျၢၣ်န့ၣ် မ့ၢ်ယကစၢ်လီၤ. ယကသန့ၤယသးလၢအီၤလီၤ.” (စံးထီၣ်ပတြၢၤ ၉၁:၂) မုၢ်မဆါတနံၤအံၤ ဖဲပထံၣ်ဘၣ် တၢ်ကီတၢ်ခဲအခါ ယဟိဝၤယွၤကဲထီၣ် တၢ်အိၣ်သဒၢအလီၢ်လၢပဂီၢ်သ့ဝဲလီၤ. ဒီးအဝဲဟ့ၣ်ပှၤ တၢ်မုၢ်လၢ်လၢ အလီၤသူၣ်ဖှံသးညီန့ၣ်လီၤ.
၃. ဒ်သိးယဟိဝၤယွၤကကဲထီၣ် ပတၢ်အိၣ်သဒၢအလီၢ်န့ၣ် ပကဘၣ်မၤဒ်လဲၣ်.
၃ ယဟိဝၤယွၤ ဒီသဒၢပှၤသ့လၢကျဲဒ်လဲၣ်. အဝဲကမၤစၢၤပှၤလၢ ပလဲၤခီဖျိ တၢ်ကီတၢ်ခဲကိးမံၤဒဲး ကန့ၢ်ဝဲအဂီၢ်လီၤ. ဒီးကစၢ်ယွၤန့ၣ် အစိအကမီၤဒိၣ်န့ၢ်ဒံး ပှၤလၢအဂုာ်ကျဲးစၢး မၤဘၣ်ဒိဘၣ်ထံးပှၤတဖၣ်န့ၣ်လီၤ. ဆၢကတီၢ်ခဲအံၤဒၣ်လဲာ် တၢ်လၢအကဟဲမၤဘၣ်ဒိပှၤ တမံၤမံၤန့ၣ် ပနာ်သ့သပှၢ်ကတၢၢ်လၢ ခါဆူညါန့ၣ် ယဟိဝၤယွၤမၤဘၣ်ဂီၢ်က့ၤအီၤသ့ဝဲလီၤ. လၢတၢ်န့ၣ်အဃိ လံာ်စီဆှံဟ့ၣ်ဂံၢ်ဟ့ၣ်ဘါပှၤလၢ– “ဟံးဃာ်သုသးလၢ ယွၤအတၢ်အဲၣ်တၢ်ကွံအပူၤ” တက့ၢ်. (ယူဒၤ ၂၁) ဖဲပဘၣ်ကီဘၣ်ခဲအဆၢကတီၢ်န့ၣ် ဒ်သိးပကဒိးန့ၢ်ဘၣ်တၢ်မၤစၢၤအဂီၢ် ပကဘၣ်အိၣ်ဘူးဒီး ယဟိဝၤယွၤလီၤ. ဘၣ်ဆၣ် ပအိၣ်ဘူးဒီးယဟိဝၤယွၤ ကသ့ဒ်လဲၣ်.
အဲၣ်ဆၢက့ၤကစၢ်ယွၤ
၄, ၅. ယဟိဝၤယွၤ ပာ်ဖျါထီၣ်အတၢ်အဲၣ် လၢပဖီခိၣ်ဒ်လဲၣ်.
၄ ဒ်သိးပကအိၣ်ဘူးဒီး ယဟိဝၤယွၤအဂီၢ် ပကဘၣ်သ့ၣ်ညါလီၤက့ၤပသးလၢ ယဟိဝၤယွၤ အဲၣ်ပှၤထဲလဲၣ်န့ၣ်လီၤ. ဆိကမိၣ်ထီၣ်က့ၤ တၢ်ခဲလၢာ်လၢ ယဟိဝၤယွၤမၤတ့ၢ်ဝဲ လၢပဂီၢ်တက့ၢ်. ကစၢ်ယွၤတ့လီၤန့ၢ်ပှၤ ဟီၣ်ခိၣ်လၢအဃံလၤဒီး မၤပှဲၤအီၤဒီးတၢ်မုၢ်တၢ်ဘိ ဒီးဆၣ်ဖိကီၢ်ဖိတဖၣ်န့ၣ်လီၤ. အဝဲဟ့ၣ်လီၤပှၤ တၢ်အီၣ်တၢ်အီလၢ အဝံၣ်အဘဲဒီး ထံလၢအကဆှီ လၢပကအီအီၤအဂီၢ်လီၤ. ယဟိဝၤယွၤ သိၣ်လိပှၤလၢအမံၤ ဒီးအတၢ်ဂ့ၤတၢ်ဝါလၢ အဃံအလၤတဖၣ် ခီဖျိလၢ လံာ်စီဆှံန့ၣ်လီၤ. တကးဒံးဘၣ် အဝဲပာ်ဖျါထီၣ် အတၢ်အဲၣ်လၢပဖီခိၣ် ခီဖျိဆှၢလီၤဝဲအဖိခွါ ယ့ၣ်ၡူးဆူဟီၣ်ခိၣ်ချၢ ဒ်သိးအကဟ့ၣ်လုၢ်ထီၣ်အသး လၢပဂီၢ်လီၤ. (ယိၤဟၣ် ၃:၁၆) ခီဖျိလၢ ယ့ၣ်ၡူးအတၢ်ဟ့ၣ်လုၢ်ထီၣ်သးအဃိ ပအိၣ်ဒီးတၢ်မုၢ်လၢ်လၢ ခါဆူညါအဂီၢ်လီၤ.
၅ ယဟိဝၤယွၤ ဒုးအိၣ်ထီၣ်ဝဲမ့းၡံအၤ အဘီအမုၢ်လၢအမ့ၢ် မူခိၣ်အတၢ်ပၢတၢ်ပြးလီၤ. ဒီးတယံာ်လၢၤဘၣ်န့ၣ် ဘီမုၢ်အံၤကမၤကတၢၢ်ကွံာ် တၢ်အၢတၢ်သီခဲလၢာ်ဒီး ကမၤကဲထီၣ်က့ၤဟီၣ်ခိၣ် လၢပၤရဒံစူးန့ၣ်လီၤ. လၢဟီၣ်ခိၣ်ပၤရဒံစူးအပူၤန့ၣ် ပှၤကိးဂၤဒဲးကအိၣ်ဒီး တၢ်မုာ်တၢ်ခုၣ်ဒီး တၢ်သူၣ်ဖှံသးညီ တဘိယူၢ်ဃီလီၤ. (စံးထီၣ်ပတြၢၤ ၃၇:၂၉) ခဲအံၤ ကျဲအဂၤတဘိလၢ ယဟိဝၤယွၤ ပာ်ဖျါထီၣ်အတၢ်အဲၣ် လၢပဖီခိၣ်န့ၣ် မ့ၢ်ဝဲအသိၣ်လိပှၤ ဒ်သိးပကအိၣ်မူဘၣ်လၢ အဂ့ၤကတၢၢ် လၢဆၢကတီၢ်ခဲအံၤန့ၣ်လီၤ. အဝဲကွဲမုာ်ပှၤလၢ ပကဃ့ဘါထုကဖၣ်တၢ်ဆူအအိၣ် ဒီးအဝဲသးအိၣ်ဒိကနၣ် ပတၢ်ထုကဖၣ်ထီဘိလီၤ. ခီဖျိလၢ တၢ်ဂ့ၢ်သ့ၣ်တဖၣ်အံၤအဃိ ပသ့ၣ်ညါဘၣ်လၢ ယဟိဝၤယွၤပာ်ဖျါထီၣ် အတၢ်အဲၣ်လၢ ပဝဲဒၣ်တဂၤစုာ်စုာ်အဖီခိၣ်လီၤ.
၆. ခီဖျိလၢ ယဟိဝၤယွၤပာ်ဖျါထီၣ် တၢ်အဲၣ်လၢနဖီခိၣ်အဃိ နကြၢးမၤဆၢက့ၤဒ်လဲၣ်.
၆ ခီဖျိလၢ ယဟိဝၤယွၤပာ်ဖျါထီၣ် တၢ်အဲၣ်လၢနဖီခိၣ်အဃိ နကြၢးမၤတၢ်မနုၤလဲၣ်. မ့ၢ်လၢအဝဲဟ့ၣ်ပှၤ တၢ်အါမးအဃိ ပကြၢးစံးဘျုးစံးဖှိၣ်က့ၤအီၤလီၤ. မုၢ်မဆါတနံၤအံၤ ပှၤအါဂၤန့ၣ် တသ့ၣ်ညါဆၢက့ၤ တၢ်အဘျုးအဖှိၣ်လၢၤဘၣ်. ဖဲယ့ၣ်ၡူးအိၣ်လၢ ဟီၣ်ခိၣ်ချၢအဆၢကတီၢ် ပှၤအါတက့ၢ်န့ၣ် အတၢ်ပာ်သးအိၣ်ဒ်န့ၣ်လီၤ. ဘၣ်တဘျီန့ၣ် ယ့ၣ်ၡူးမၤဘျါက့ၤဝဲ ပှၤအဂၤတဆံလၢ အအိၣ်ဒီးတၢ်ဆါအၢန့ၣ်လီၤ. ဘၣ်ဆၣ်သနာ်က့ ပှၤလၢအစံးဘျုးစံးဖှိၣ်က့ၤယ့ၣ်ၡူးန့ၣ် အိၣ်ထဲတဂၤဧိၤလီၤ. (လူၤကၣ် ၁၇:၁၂-၁၇) လၢတၢ်န့ၣ်အဃိ ပအဲၣ်ဒိးလီၤဂာ်ဒီး ပှၤတဂၤလၢအစံးဘျုးစံးဖှိၣ်က့ၤ ယ့ၣ်ၡူးန့ၣ်လီၤ. ထီဘိန့ၣ် ပအဲၣ်ဒိးစံးဘျုး ယဟိဝၤယွၤလီၤ.
၇. ပကဘၣ်အဲၣ်ဆၢက့ၤ ယဟိဝၤယွၤ လၢကျဲဒ်လဲၣ်.
မးသဲ ၂၂:၃၇ တက့ၢ်.) တၢ်အံၤအခီပညီ မ့ၢ်ဒ်လဲၣ်.
၇ ပကဘၣ်ပာ်ဖျါထီၣ် တၢ်အဲၣ်လၢယဟိဝၤယွၤ အဖီခိၣ်စ့ၢ်ကီးလီၤ. ယ့ၣ်ၡူးသိၣ်လိ အပျဲၢ်အဘီၣ်သ့ၣ်တဖၣ်လၢ အဝဲသ့ၣ်ကဘၣ်အဲၣ် ယဟိဝၤယွၤလၢ အသူၣ်ကံၢ်သးလဲ, လၢအသးဒီဖျၢၣ် ဒီးတုၤအတၢ်ကူၣ်တၢ်ဆးလၢာ်တစုလီၤ. (ဖး၈, ၉. ပအဲၣ်ယဟိဝၤယွၤန့ၣ် ပပာ်ဖျါထီၣ်အီၤသ့လၢ ကျဲဒ်လဲၣ်.
၈ ထဲပစံးလၢ ပအဲၣ်ယွၤန့ၣ် လၢပှဲၤလံဧါ. တလၢပှဲၤဒံးဘၣ်. ပမ့ၢ်အဲၣ်ယဟိဝၤယွၤလၢ ပသူၣ်ကံၢ်သးလဲ, ပသးဒီဖျၢၣ် ဒီးတုၤပတၢ်ကူၣ်တၢ်ဆးလၢာ်တစုန့ၣ် ပကဘၣ်ပာ်ဖျါထီၣ်လၢ ပတၢ်မၤန့ၣ်လီၤ. (မးသဲ ၇:၁၆-၂၀) လံာ်စီဆှံသိၣ်လိဝဲ လီၤတံၢ်လီၤဆဲးလၢ ပမ့ၢ်အဲၣ်ကစၢ်ယွၤန့ၣ် ပကဒိကနၣ် အတၢ်မၤလိာ်တဖၣ်လီၤ. လၢနကမၤဒ်န့ၣ်အဂီၢ် မ့ၢ်အကီအခဲစ့ၢ်ကီးဧါ. တကီဘၣ်. မ့ၢ်လၢယဟိဝၤယွၤ “အတၢ်မၤလိာ်န့ၣ် တကီတခဲဘၣ်” အဃိလီၤ.—ဖး ၁ ယိၤဟၣ် ၅:၃ တက့ၢ်.
၉ ဖဲပဒိကနၣ် ယဟိဝၤယွၤအကလုၢ်န့ၣ် ပတၢ်အိၣ်မူ ကပှဲၤဒီးတၢ်သူၣ်မံသးမုာ် ဒီးတၢ်သူၣ်ဖှံသးညီလီၤ. (ယၡါယၤ ၄၈:၁၇, ၁၈) ဘၣ်ဆၣ် ဒ်သိးပကအိၣ်ဘူးဒီး ယဟိဝၤယွၤထီဘိအဂီၢ် တၢ်မနုၤကမၤစၢၤပှၤလဲၣ်. ပကတဲသကိး ဘၣ်ဃးဒီး တၢ်ဂ့ၢ်တခါအံၤလီၤ.
သုးဘူးနသးဆူ ယဟိဝၤယွၤအအိၣ်ထီဘိ
၁၀. ဘၣ်မနုၤအဃိ ပကြၢးဆဲးမၤလိ ယဟိဝၤယွၤအဂ့ၢ် ထီဘိလဲၣ်.
၁၀ နကဲထီၣ်ယဟိဝၤယွၤ အတံၤသကိးသ့လၢ ကျဲဒ်လဲၣ်. ခီဖျိလၢ နမၤလိလံာ်စီဆှံအဃိ နသ့ၣ်ညါအါထီၣ် ယဟိဝၤယွၤအဂ့ၢ်ဒီး နတၢ်ရ့လိာ်သးဒီးအီၤ ဂၢၢ်ကျၢၤထီၣ်ဝဲလီၤ. တၢ်ရ့လိာ်သးအံၤ ကဘၣ်လီၤဂာ်ဒ်သိးဒီး မ့ၣ်အူလၢအတလီၤပံာ်ကွံာ် နီတဘျီန့ၣ်လီၤ. ဒ်မ့ၣ်အူလိၣ်ဘၣ်ဝဲသ့ၣ်မုၣ် လၢဆဲးကဲၤဝဲကသ့အဂီၢ်အသိး ပကဘၣ်ဆဲးမၤလိယဟိဝၤယွၤအဂ့ၢ်ထီဘိ ဒ်သိးပတၢ်ရ့လိာ်သးဒီးအီၤကဂၢၢ်ကျၢၤဝဲ ဆူညါအဂီၢ်လီၤ. —ကတိၤဒိ ၂:၁-၅.
ဒ်မ့ၣ်အူအသိး ပတၢ်အဲၣ်ယဟိဝၤယွၤလိၣ်ဘၣ်ဝဲ သ့ၣ်မုၣ်ထီဘိန့ၣ်လီၤ
၁၁. ဒ်နမၤလိအါထီၣ် လံာ်စီဆှံအတၢ်သိၣ်လိတဖၣ်အသိး နသးကမၤအသးဒ်လဲၣ်.
၁၁ ဒ်နမၤလိအါထီၣ် လံာ်စီဆှံအသိး တၢ်လၢနမၤလိဘၣ်အီၤတဖၣ်န့ၣ် ကထိၣ်ဟူးထိၣ်ဂဲၤထီၣ်နသးလီၤ. ဖဲယ့ၣ်ၡူးတဲနၢ်ပၢၢ် အပျဲၢ်အဘီၣ်ခံဂၤလၢ ဝံအတၢ်စံးပာ်ဟဲလၢထီၣ်ပှဲၤထီၣ်ဝဲ အဂ့ၢ်အခါ အဝဲသ့ၣ်အသးမၤအသးဒ်လဲၣ်. အဝဲသ့ၣ်စံးဝဲလၢ– “အဝဲဒၣ်လူၤကၣ် ၂၄:၃၂.
ကတိၤတၢ်ဒီးပှၤလၢကျဲဒီး, ဒုးနဲၣ်တၢ်ကွဲးအသးအဂ့ၢ်အပီၢ်ဒီး, ပသးဂဲၤဆူၣ်ထီၣ်လၢပပူၤ တမ့ၢ်ဘၣ်ဧါ.”—၁၂, ၁၃. (က) ပမ့ၢ်တပလီၢ်ပသးန့ၣ် ပတၢ်အဲၣ်ကစၢ်ယွၤ ကဲထီၣ်အသးသ့ဒ်လဲၣ်. (ခ) ပတၢ်အဲၣ်ယဟိဝၤယွၤ ကဂၢၢ်ကျၢၤဝဲထီဘိအဂီၢ် ပကဘၣ်မၤဒ်လဲၣ်.
၁၂ ဖဲယ့ၣ်ၡူးအပျဲၢ်အဘီၣ်တဖၣ် နၢ်ပၢၢ်ထီၣ်လံာ်စီဆှံအဆၢတဖၣ်အခါန့ၣ် အဝဲသ့ၣ်အသးဆူၣ်ထီၣ်ဝဲလီၤ. နၤစ့ၢ်ကီး ဖဲနနၢ်ပၢၢ်ထီၣ် လံာ်စီဆှံအဆၢကတီၢ်န့ၣ် နသးကဆူၣ်ထီၣ်ဒ်သိးဒီး ယ့ၣ်ၡူးအပျဲၢ်အဘီၣ်လၢညါတဖၣ်န့ၣ်လီၤ. တကးဒံးဘၣ် နတၢ်နၢ်ပၢၢ်ထီၣ် လံာ်စီဆှံန့ၣ် ကမၤစၢၤနၤလၢ နကသ့ၣ်ညါထီၣ်ယဟိဝၤယွၤ ဒီးအဲၣ်အီၤအဂီၢ်လီၤ. နတအဲၣ်ဒိးလၢ နတၢ်အဲၣ်ယဟိဝၤယွၤအံၤ ကခုၣ်လီၤဝဲဘၣ်.—မးသဲ ၂၄:၁၂.
၁၃ ဖဲနကဲထီၣ်ကစၢ်ယွၤ အတံၤသကိးအခါ နကဘၣ်ဂုာ်ကျဲးစၢးဒ်သိး နတၢ်ရ့လိာ်သးဒီးအီၤ ကဂၢၢ်ကျၢၤထီၣ်ဝဲအဂီၢ်လီၤ. နကဘၣ်မၤလိအါထီၣ် ကစၢ်ယွၤဒီးယ့ၣ်ၡူးအဂ့ၢ်ထီဘိ ဒီးဆိကမိၣ်ထံ တၢ်လၢနမၤလိဘၣ်အီၤတဖၣ် ဒ်သိးနမၤပိာ်ထွဲအီၤလၢ နတၢ်အိၣ်မူပူၤ ကသ့ဝဲအဂီၢ်လီၤ. (ယိၤဟၣ် ၁၇:၃) ဖဲနဖးဒီး မၤလိလံာ်စီဆှံအခါ သံကွၢ်လီၤက့ၤနသးလၢ ‘တၢ်အံၤသိၣ်လိယၤ ဘၣ်ဃးဒီးယဟိဝၤယွၤအဂ့ၢ် ဒ်လဲၣ်, ဘၣ်မနုၤအဃိ ယကြၢးအဲၣ်အီၤလၢ ယသူၣ်ကံၢ်သးလဲ ဒီးလၢယသးဒီဖျၢၣ်ညါလဲၣ်.’—၁ တံၤမသ့း ၄:၁၅.
၁၄. ပတၢ်အဲၣ်ယဟိဝၤယွၤ ကဂၢၢ်ကျၢၤထီၣ်အဂီၢ် တၢ်ထုကဖၣ်မၤစၢၤပှၤလၢ ကျဲဒ်လဲၣ်.
၁၄ နမ့ၢ်အိၣ်ဒီး တံၤသကိးလၢအဂ့ၤတဂၤန့ၣ် နကကတိၤတၢ်ဒီးအီၤ ဘၣ်ဆၢဘၣ်ကတီၢ်လီၤ. ခီဖျိလၢ နမၤဒ်န့ၣ်အဃိ နတၢ်ရ့လိာ်သးဒီးအီၤ ကဂၢၢ်ကျၢၤဝဲလီၤ. ဒ်န့ၣ်အသိး ပမ့ၢ်ကတိၤတၢ်ဒီး ယဟိဝၤယွၤလၢတၢ်ထုကဖၣ်အပူၤ ဘၣ်ဆၢဘၣ်ကတီၢ်န့ၣ် ပတၢ်အဲၣ်အီၤ ကဂၢၢ်ကျၢၤထီၣ်ဝဲလီၤ. (ဖး ၁ သ့းစၤလနံ ၅:၁၇ တက့ၢ်.) တၢ်ဘါထုကဖၣ်န့ၣ် မ့ၢ်တၢ်ဟ့ၣ်အဂ့ၤတခါလၢ အဟဲလၢပပၢ်အိၣ်လၢမူခိၣ် အအိၣ်န့ၣ်လီၤ. ထီဘိန့ၣ် ပကြၢးကတိၤတၢ်ဒီးအီၤ လၢပသးဒီဖျၢၣ်လီၤ. (စံးထီၣ်ပတြၢၤ ၆၂:၈) ပတကြၢးတိၢ်ရူး တၢ်ထုကဖၣ်အဖျၢၣ်လၢ ပကကတိၤတၢ်ဒီး ကစၢ်ယွၤအဂီၢ်ဘၣ်. လၢတၢ်န့ၣ်အလီၢ် ပကြၢးကတိၤတၢ်ဒီး ကစၢ်ယွၤလၢ တၢ်သူၣ်အိၣ်သးအိၣ်နီၢ်နီၢ်အပူၤလီၤ. ပမ့ၢ်မၤလိလံာ်စီဆှံဒီး ဘါထုကဖၣ်ဆူအအိၣ် လၢပသးဒီဖျၢၣ်န့ၣ် ပတၢ်အဲၣ်ယဟိဝၤယွၤ ကဂၢၢ်ကျၢၤဝဲထီဘိလီၤ.
တဲဘၣ်ပှၤဂၤလၢ ယဟိဝၤယွၤအဂ့ၢ်
၁၅, ၁၆. တၢ်စံၣ်တဲၤတဲလီၤ တၢ်ဖံးတၢ်မၤန့ၣ် နထံၣ်အီၤဒ်လဲၣ်.
၁၅ ပမ့ၢ်အဲၣ်ဒိးအိၣ်ဘူးဒီး ယဟိဝၤယွၤထီဘိန့ၣ် ပကဘၣ်တဲဘၣ်ပှၤဂၤလၢ ပတၢ်စူၢ်တၢ်နာ်အဂ့ၢ်လီၤ. ပတဲဘၣ်ပှၤဂၤလၢ ယဟိဝၤယွၤအဂ့ၢ်န့ၣ် မ့ၢ်တၢ်ခွဲးတၢ်ယာ်လၢ အဂ့ၤတခါလီၤ. (ဖံလံးပံၤ ၁:၁၄) တကးဒံးဘၣ် တၢ်အံၤမ့ၢ်မူဒါလၢ ယ့ၣ်ၡူးဟ့ၣ်လီၤဝဲ ခရံာ်ဖိလၢအမ့ၢ်အတီတဖၣ်န့ၣ်လီၤ. လၢတၢ်န့ၣ်အဃိ ပဝဲကိးဂၤဒဲးန့ၣ် ပကြၢးစံၣ်တဲၤတဲလီၤ ယွၤအဘီအမုၢ် တၢ်သးခုကစီၣ်လီၤ. မ့ၢ်နမၤဒ်န့ၣ်လံဧါ.—မးသဲ ၂၄:၁၄; မးသဲ ၂၈:၁၉, ၂၀.
၁၆ တၢ်မၢဖိပီလူး ပာ်လုၢ်ပာ်ပှ့ၤဝဲ တၢ်စံၣ်တဲၤတဲလီၤတၢ်မၤဒိၣ်မးလီၤ. လၢတၢ်န့ၣ်အဃိ အဝဲကိးဝဲတၢ်မၤအံၤလၢ “တၢ်လုၢ်ဒိၣ်ပှ့ၤဒိၣ်” န့ၣ်လီၤ. (၂ ကရံၣ်သူး ၄:၇) တၢ်သးခုကစီၣ်တၢ်မၤန့ၣ် မ့ၢ်တၢ်ခွဲးတၢ်ယာ်လၢ နကတဲဘၣ်ပှၤဂၤလၢ ယဟိဝၤယွၤဒီး အတၢ်တိာ်ပာ်အဂ့ၢ်န့ၣ်လီၤ. တၢ်အံၤမ့ၢ်တၢ်မၤလၢအရ့ဒိၣ်ကတၢၢ် လၢနမၤအီၤသ့န့ၣ်လီၤ. တၢ်မၤအံၤမ့ၢ်စ့ၢ်ကီး ကျဲတဘိလၢ နကမၤကစၢ်ယွၤ အတၢ်ဘၣ်သးန့ၣ်လီၤ. ဒီးနတၢ်ဂုာ်ကျဲးစၢးလၢ တၢ်စံၣ်တဲၤတဲလီၤတၢ်မၤအပူၤန့ၣ် ကစၢ်ယွၤပာ်လုၢ်ပာ်ပှ့ၤဝဲဒိၣ်မးလီၤ. (ဧ့ၤဘြံၤ ၆:၁၀) တၢ်စံၣ်တဲၤတဲလီၤတၢ်မၤန့ၣ် ကမၤစၢၤနၤဒီး ပှၤဒိကနၣ်တၢ်ဖိ တဖၣ် ဒ်သိးကဘူးထီၣ်ဒီးယဟိဝၤယွၤ ဒီးဒိးန့ၢ်ဘၣ်တၢ်မူလီၤထူလီၤယိာ်အဂီၢ်လီၤ. (ဖး ၁ ကရံၣ်သူး ၁၅:၅၈ တက့ၢ်.) တၢ်ဖံးတၢ်မၤအဂၤလၢ ကဟ့ၣ်နၤတၢ်သူၣ်မံသးမုာ် ဒ်အံၤန့ၣ် တအိၣ်နီတခါဘၣ်.
၁၇. ဘၣ်မနုၤအဃိ တၢ်စံၣ်တဲၤတဲလီၤတၢ်မၤန့ၣ် မ့ၢ်တၢ်လၢအရ့ဒိၣ်ဝဲလဲၣ်.
၁၇ တၢ်စံၣ်တဲၤတဲလီၤတၢ်မၤန့ၣ် မ့ၢ်တၢ်လၢအရ့ဒိၣ်ဝဲဒိၣ်မးလီၤ. ပကြၢး “စံၣ်တဲၤတဲလီၤတၢ်သးခုကစီၣ်” ဒီးပကြၢး “ဂုာ်လိာ်တဲဖျါထီၣ်အီၤ” လီၤ. (၂ တံၤမသ့း ၄:၂, ခ့ခါစှီၤကျိာ်) ပှၤဟီၣ်ခိၣ်ဖိတဖၣ် ကဘၣ်နၢ်ဟူဘၣ်ဝဲ ယွၤအဘီအမုၢ်အဂ့ၢ်လီၤ. လံာ်စီဆှံစံးဝဲလၢ– “ယွၤအမုၢ်နံၤဖးဒိၣ်တနံၤ အိၣ်ဘူးထီၣ်လံ, အိၣ်ဘူးထီၣ်လံ, ဒီးဟဲဝဲချ့ချ့လီၤ.” တၢ်အကတၢၢ်န့ၣ် “တသုးနံၤသုးသီဘၣ်.” (စဖါနယၤ ၁:၁၄; ဃဘးကူာ် ၂:၃) တယံာ်လၢၤဘၣ်န့ၣ် ယဟိဝၤယွၤကမၤကတၢၢ်ကွံာ် မုၣ်ကီၤလံၢ်အတၢ်ရဲၣ်တၢ်ကျဲၤလီၤ. တချုးလၢ တၢ်သ့ၣ်တဖၣ်အံၤ ဟဲကဲထီၣ်အသးန့ၣ် ပကဘၣ်ဟ့ၣ်ပလီၢ် ပှၤဟီၣ်ခိၣ်ဖိဒ်သိး အဝဲသ့ၣ်ကမၤ တၢ်ဘၣ်ယွၤအသးအဂီၢ်လီၤ.
၁၈. ဘၣ်မနုၤအဃိ ပကြၢးဘူၣ်ထီၣ်ဘါထီၣ် ယဟိဝၤယွၤဃုာ်ဒီး ခရံာ်ဖိလၢအမ့ၢ်အတီတဖၣ်လဲၣ်.
၁၈ ယဟိဝၤယွၤ ဘၣ်အသးလၢပကဘူၣ်ထီၣ်ဘါထီၣ်အီၤ ဃုာ်ဒီးခရံာ်ဖိလၢ အမ့ၢ်အတီတဖၣ်လီၤ. လံာ်စီဆှံစံးဝဲလၢ– “မ်ပကွၢ်လိာ်ပသး တဂၤဒီးတဂၤ, ဒ်သိးပကသဆၣ်ထီၣ်လိာ်ပခံဆူ တၢ်အဲၣ်တၢ်ကွံ, ဒီးတၢ်မၤဂ့ၤတၢ်န့ၣ်တက့ၢ်. ဟးဆှဲးပတၢ်အိၣ်ဖှိၣ်ရိဖှိၣ်, ဒ်ပှၤတနီၤနီၤ အလုၢ်အလၢ်အသိးန့ၣ်တဂ့ၤ, ပသဆၣ်ထီၣ်လိာ်ပခံဒီး, ပထံၣ်အမုၢ်တနံၤ ဒံးဘူးထီၣ်ဒီး, မ်ပသဆၣ်ထီၣ်လိာ်ပခံ ဒံးအါထီၣ်တက့ၢ်.” (ဧ့ၤဘြံၤ ၁၀:၂၄, ၂၅) ပကဘၣ်ဂုာ်ကျဲးစၢး လဲၤထီၣ်တၢ်အိၣ်ဖှိၣ်ရိဖှိၣ် ကိးဘျီဒဲးလီၤ. တၢ်အိၣ်ဖှိၣ်ရိဖှိၣ်န့ၣ် မ့ၢ်တၢ်ခွဲးတၢ်ယာ်တခါလၢ ပကဟ့ၣ်ဂံၢ်ဟ့ၣ်ဘါလိာ်ပသးတဂၤဒီးတဂၤလီၤ.
၁၉. ဒ်သိးပကအဲၣ် ပဒီပုၢ်ဝဲၢ်မုၣ်ဒီပုၢ်ဝဲၢ်ခွါအဂီၢ် တၢ်မနုၤကမၤစၢၤပှၤလဲၣ်.
၁၉ ဖဲနလဲၤထီၣ် တၢ်အိၣ်ဖှိၣ်ရိဖှိၣ်န့ၣ် နကထံၣ်န့ၢ်တံၤသကိးအဂ့ၤတဖၣ်လၢ ကမၤစၢၤနၤဒ်သိး နကဘူၣ်ထီၣ်ဘါထီၣ် ယဟိဝၤယွၤအဂီၢ်လီၤ. နကထံၣ်ဘၣ် ဒီပုၢ်ဝဲၢ်မုၣ်ဒီပုၢ်ဝဲၢ်ခွါ အကလုာ်ကလုာ်လၢ အဂုာ်ကျဲးစၢး မၤတၢ်ဘၣ်ယဟိဝၤယွၤအသး လၢအဂ့ၤကတၢၢ် ဒ်သိးဒီးနၤလီၤ. အဝဲသ့ၣ်တဖၣ်န့ၣ် တလၢတပှဲၤဒီး မၤဘၣ်တၢ်ကမၣ် သ့ဝဲလီၤ. ဖဲအဝဲသ့ၣ် မၤကမၣ်ဘၣ်နၤအခါန့ၣ် ပျၢ်အတၢ်ကမၣ်တက့ၢ်. (ဖး ကလီးစဲ ၃:၁၃ တက့ၢ်.) ထီဘိန့ၣ် သးစၢၢ်ဆၢလၢ နဒီပုၢ်ဝဲၢ်အတၢ်ဂ့ၤတၢ်ဝါတဖၣ် တက့ၢ်. နမ့ၢ်မၤဒ်န့ၣ်န့ၣ် ကကဲထီၣ်တၢ်မၤစၢၤဒ်သိးနကအဲၣ်ဘၣ်အဝဲသ့ၣ် ဒီးနကဘူးထီၣ်ဒီး ယဟိဝၤယွၤလီၤ.
တၢ်အိၣ်မူနီၢ်နီၢ်
၂၀, ၂၁. “တၢ်မူနီၢ်နီၢ်” န့ၣ်မ့ၢ်တၢ်မနုၤလဲၣ်.
၂၀ ယဟိဝၤယွၤအဲၣ်ဒိးလၢ အတံၤသကိးတဖၣ် ကအိၣ်မူဘၣ်လၢ အဂ့ၤကတၢၢ်လီၤ. လံာ်စီဆှံသိၣ်လိပှၤလၢ ပတၢ်အိၣ်မူလၢ ခါဆူညါန့ၣ် ကလီၤဆီန့ၢ်ဒံး ပတၢ်အိၣ်မူလၢ မုၢ်မဆါတနံၤအံၤလီၤ.
ယဟိဝၤယွၤ ဘၣ်အသးလၢ နကဒိးန့ၢ်ဘၣ် “တၢ်မူနီၢ်နီၢ်” လီၤ. နကမၤဒ်လဲၣ်.
၂၁ ခါဆူညါန့ၣ် တမ့ၢ်ထဲပကအိၣ်မူဘၣ်အနံၣ် ၇၀, ၈၀ ဘၣ်. ပကအိၣ်မူဘၣ် လီၤထူလီၤယိာ်လီၤ. တကးဒံးဘၣ် ပကဒိးန့ၢ်ဘၣ် “တၢ်မူအထူအယိာ်” ဃုာ်ဒီးတၢ်အိၣ်ဆူၣ်အိၣ်ချ့လၢအဂ့ၤ, တၢ်မုာ်တၢ်ခုၣ် ဒီးတၢ်သူၣ်ဖှံသးညီလၢ ပၤရဒံစူးအပူၤလီၤ. တၢ်အဝဲအံၤ လံာ်စီဆှံကိးဝဲလၢ “တၢ်မူနီၢ်နီၢ်” န့ၣ်လီၤ. ယဟိဝၤယွၤ အၢၣ်လီၤပှၤလၢ အဝဲကဟ့ၣ်ပှၤ တၢ်မူနီၢ်နီၢ် ဘၣ်ဆၣ် ပကဘၣ်ကျဲးစၢး “ဂုာ်ဟံးန့ၢ်” အီၤလီၤ.—၁ တံၤမသ့း ၆:၁၂, ၁၉, ခ့ခါစှီၤကျိာ်.
၂၂. (က) ပ “ဂုာ်ဟံးန့ၢ်” တၢ်မူနီၢ်နီၢ်ကသ့ဒ်လဲၣ်. (ခ) ဘၣ်မနုၤအဃိ ပဒိးန့ၢ်ဘၣ် တၢ်မူအထူအယိာ် ခီဖျိလၢပနီၢ်ကစၢ်အတၢ်ဂုာ်ကျဲးစၢးအဃိ တသ့ဝဲန့ၣ်လဲၣ်.
၂၂ ပ “ဂုာ်ဟံးန့ၢ်” တၢ်မူနီၢ်နီၢ်ကသ့ဒ်လဲၣ်. ပကဘၣ် “မၤဂ့ၤတၢ်” ဒီး “ထူးထီၣ်တီၤထီၣ်လၢ တၢ်မၤဂ့ၤတဖၣ်” လီၤ. (၁ တံၤမသ့း ၆:၁၈) တၢ်အံၤအခီပညီမ့ၢ်ဝဲ ပကဘၣ်အိၣ်မူလူၤပိာ်ထွဲ တၢ်လၢပမၤလိဘၣ်လၢ လံာ်စီဆှံအပူၤန့ၣ်လီၤ. ဘၣ်ဆၣ် ပဒိးန့ၢ်ဘၣ် တၢ်မူနီၢ်နီၢ်ခီဖျိလၢ ပနီၢ်ကစၢ်အတၢ်ဂုာ်ကျဲးစၢးအဃိ တသ့ဘၣ်. တၢ်မူအထူအယိာ်န့ၣ် မ့ၢ်တၢ်ဟ့ၣ်ကလီတခါလၢ ယဟိဝၤယွၤ ဟ့ၣ်လီၤအခ့အပှၤတဖၣ် ခီဖျိလၢအ “တၢ်ဘျုးတၢ်ဖှိၣ်” အဃိန့ၣ်လီၤ. (ရိမ့ၤ ၅:၁၅, ခ့ခါစှီၤကျိာ်) ပပၢ်အိၣ်လၢမူခိၣ်န့ၣ် သးအိၣ်ဟ့ၣ်လီၤဝဲ အခ့အပှၤလၢအတီအလိၤတဖၣ် လၢတၢ်ဟ့ၣ်တခါအံၤလီၤ.
၂၃. ခဲအံၤန့ၣ် ဘၣ်မနုၤအဃိ အရ့ဒိၣ်လၢနကဆၢတဲာ်တၢ်လၢအဘၣ်လဲၣ်.
၂၃ သံကွၢ်လီၤက့ၤနသးလၢ ‘မ့ၢ်ယဘူၣ်ထီၣ်ဘါထီၣ် ကစၢ်ယွၤဒ် တၢ်ဘၣ်အသးအသိးဧါ.’ နမ့ၢ်သ့ၣ်ညါလီၤနသးလၢ နကဘၣ်ဆီတလဲ နသကဲာ်ပဝးတမံၤမံၤန့ၣ် နကြၢးဆီတလဲအီၤခဲအံၤလီၤ. ပမ့ၢ်ဂုာ်ကျဲးစၢး အဂ့ၤကတၢၢ်လၢ ပကဒိကနၣ် ယဟိဝၤယွၤအကလုၢ်ဒီး ဒိးသန့ၤပသးလၢအီၤန့ၣ် ကစၢ်ကကဲထီၣ်ပတၢ်အိၣ်သဒၢအလီၢ်လီၤ.
ဖဲမုၢ်နံၤခံကတၢၢ်အတီၢ်ပူၤအံၤ အဝဲကဒီသဒၢ အခ့အပှၤလၢ အတီအလိၤတဖၣ်လီၤ. ယဟိဝၤယွၤ ကမၤစၢၤပှၤသပှၢ်ကတၢၢ် လၢပကအိၣ်မူဘၣ် လီၤထူလီၤယိာ်ဒ်အဝဲ အၢၣ်လီၤတ့ၢ်ပှၤအသိးန့ၣ်လီၤ. ခဲအံၤ နမ့ၢ်ဆၢတဲာ်တၢ် လၢအဘၣ်န့ၣ် နကဒိးန့ၢ်ဘၣ် တၢ်မူနီၢ်နီၢ်လီၤ.