1, 2. Wapi kisika beto lenda baka lutanunu bubu yayi?

YINDULA ti nge kena kutambula na nganda na yinsi ya mupepe ya ngolo. Dizulu mekuma ndombe, bantiemo kena kulezima, mpe bidumi kena kubula. Na mbala mosi mvula mebanda kunoka. Nge mebanda sosa kisika ya kusuama. Ntangu nge mebaka kisika ya kusuama nge mesepela!

² Bubu yayi mpe luzingu na beto kele mutindu yina. Mambu ya yinza kena kutatamana kubeba. Nge lenda kukiyuvusa: ‘Wapi kisika munu lenda baka lutanunu?’ Nsoniki ya nkunga sonikaka: “Munu ketuba na Yehova: ‘nge kele kitininu na munu mpe kisika na munu ya ngolo ya lutanunu, Nzambi na munu yina munu ketudilaka ntima.’” (Nkunga 91:2) Ya kedika, Yehova lenda pesa beto lusadusu na mambu beto kena kukutana na yau bubu yayi, mpe yandi mepesa beto kivuvu ya mbote na bilumbu kena kuiza.

3. Yinki mutindu beto lenda kumisa Yehova kisika na beto ya kusuamina?

³ Yinki mutindu Yehova lenda tanina beto? Yandi lenda sadisa beto, beto kanga ntima na mambu ya mutindu nionso yina beto kena kukutana bubu yayi. Ata kana diambu mosi ya yimbi mekumina beto bubu yayi, beto lenda tula kivuvu ti Yehova kebongisa mambu nionso na bilumbu kena kuiza. Biblia kena kukindisa beto ti: ’Beno bikana na nzola ya Nzambi.’ (Yude 21) Beto fueti bikana pene-pene na Yehova samu beto baka lusadusu na yandi na ntangu ya mpasi. Kasi yinki mutindu beto lenda sala yau?

4, 5. Yinki mutindu Yehova monisinaka beto nzola na yandi?

⁴ Samu na kubikana pene-pene na Yehova, beto fueti zimbakana ve ti yandi kezolaka beto mingi mpenza. Yindula  mambu nionso yina Yehova mesalaka samu na beto. Yandi pesaka beto ntoto ya kitoko mpe yandi fulusaka yau na bayinti ya kitoko mpe bibulu. Yandi kepesaka beto diaka madia ya mbote mpe maza ya kunua ya mbote. Na nzila ya Biblia, Yehova mezabisa beto nkumbu na yandi mpe bikadulu na yandi ya mbote. Kuluta nionso, yandi monisinaka beto nzola na yandi ntangu yandi tindaka Muana na yandi ya nzola, Yesu, awa na ntoto samu na kupesa luzingu na yandi samu na beto. (Yoane 3:16) Mpe samu na nkayilu yango, beto mebaka kivuvu ya mbote samu na bilumbu kekuiza.

⁵ Yehova metulaka Kimfumu ya Masiya, guvernema mosi ya dizulu yina kemanisa ntama ve bampasi nionso. Kimfumu yango kekumisa ntoto paradiso, kuna muntu nionso kezinga na kiyenge mpe na kiese mvimba-mvimba. (Nkunga 37:29) Mutindu yankaka yina Yehova kemonisinaka beto nzola na yandi kele na kulonga beto mutindu ya kuvuanda na luzingu ya mbote bubu yayi. Yandi kena kulomba beto diaka beto sambila yandi, mpe yandi kele ntangu nionso pene ya kuwa bisambu na beto. Yehova monisaka puelele nzola na yandi na muntu mosi-mosi na beto.

6. Yinki nge fueti sala lokola Yehova kezolaka nge?

⁶ Yinki nge fueti sala lokola Yehova kezolaka nge? Monisa ti nge kevutudilaka yandi matondo samu na mambu nionso yina yandi kesalaka samu na nge. Diambu ya kiadi kele ti, bantu mingi bubu yayi kevuandaka ve na kifu ya kuvutula matondo. Yavuandaka mpe mutindu yina ntangu Yesu vuandaka awa na ntoto. Kilumbu mosi, Yesu belusaka bantu kumi (10) yina vuandaka na kimbevo ya buazi, kasi mosi kuandi na bantu yango vutudilaka Yesu matondo. (Luka 17:12-17) Beto zola vuanda lokola muntu yina vutudilaka Yesu matondo. Beto fueti vutudilaka Yehova matondo ntangu nionso.

7. Yinki mutindu beto fueti zola Yehova?

⁷ Beto fueti monisa diaka ti beto kezolaka Yehova. Yesu tubaka na banlonguki na yandi ti bafueti zola Yehova na ntima na bau ya mvimba, na muela na bau ya mvimba, mpe na  mabanza na bau nionso. (Tanga Matayo 22:37.) Yinki yazola monisa?

8, 9. Yinki mutindu beto lenda monisa na Yehova ti beto kezolaka yandi?

⁸ Yafueti sukila kaka na kutuba ti beto kezolaka Yehova? Ve. Kana beto kezolaka Yehova na ntima na beto ya mvimba, na muela na beto ya mvimba mpe na mabanza na beto nionso, nzola na beto kemonana na mambu yina beto kesalaka. (Matayo 7:16-20) Biblia kelongaka puelele ti kana beto kezolaka Nzambi, beto kezitisa bansiku na yandi. Yakele mpasi samu na kusala yau? Ve, samu “bansiku [ya Yehova] kele kilo ve.”—Tanga 1 Yoane 5:3.

⁹ Ntangu beto kena kuzitisa Yehova, beto kevuanda na kiese mpe na luzingu ya mbote. (Yezaya 48:17, 18) Kasi yinki kesadisa beto samu beto bikana pene-pene na Yehova? Beto tadila yau.

10. Samu na yinki nge fueti tatamana kulonguka kuzaba Yehova?

¹⁰ Yinki mutindu nge kuminaka nkundi ya Yehova? Na nzila ya ndongokolo na nge ya Biblia, nge kumaka kuzaba Yehova mpe kikundi na nge na yandi kumaka ya ngolo. Kikundi yango kele lokola tiya yina nge fueti tanina samu yatatamana kaka kupela. Mutindu kaka tiya kele na nsatu ya bankuni samu ya tatamana kupela, nge fueti tatamana kulonguka samu kikundi na nge na Yehova tatamana kuvuanda ya ngolo.—Bingana 2:1-5.

11. Yinki mutindu malongi ya Biblia kesimba ntima na nge?

¹¹ Ntangu nge ketatamana kulonguka Biblia, nge kemona mambu yina kesimba mpenza ntima na nge. Tala mutindu banlonguki zole ya Yesu kukimonaka ntangu Yesu vuandaka kusansila bau bambikudulu ya Biblia. Batubaka: ‘Keti bantima na beto vuandaka kupela ve ntangu yandi vuandaka kusolola na beto na nzila, ntangu yandi vuandaka kusasila beto Masonukua mbote mbote?’—Luka 24:32.

12, 13. (a) Yinki lenda kumina nzola na beto samu na Nzambi? (b) Yinki mutindu beto lenda tanina nzola na beto na Yehova ya vuanda ntangu nionso ya ngolo?

 ¹² Mutindu kaka bantima ya banlonguki yina fulukaka na kiese ntangu babakusaka masonukua, yalenda vuanda ti nge diaka nge sepelaka ntangu nge bandaka kubakusa Biblia. Yasadisaka nge, nge zaba Yehova mpe nge zola yandi. Nge kezola ve ti nzola yango yakita.—Matayo 24:12.

¹³ Ntangu nge mekuma nkundi ya Yehova, nge fueti sala ngolo samu kikundi na nge na yandi tatamana kuvuanda ya ngolo. Nge fueti tatamana kulonguka kuzaba yandi mpe Yesu, mpe kuyindula mambu yina nge melonguka mpe mutindu nge lenda sadila yau na luzingu na nge. (Yoane 17:3) Ntangu nge metanga to nge melonguka Biblia, nge fueti kukiyuvusa: ‘Yinki yamelonga munu samu na Yehova Nzambi? Samu na yinki munu fueti zola yandi na ntima na munu ya mvimba mpe na muela na munu ya mvimba?’—1 Timoteo 4:15.

14. Yinki mutindu kisambu kesadisaka beto samu nzola na beto na Yehova tatamana kuvuanda ya ngolo?

 ¹⁴ Kana nge kele na nkundi mosi ya mbote, beno kesolulaka mbala na mbala, mpe kikundi na beno kekumaka ya ngolo. Mutindu mosi mpe, ntangu beto kesolulaka mbala na mbala na Yehova na nzila ya kisambu, yakesalaka ti nzola na beto samu na yandi kuma ya ngolo. (Tanga 1 Batesalonika 5:17.) Kisambu kele dikabu ya mbote yina Tata na beto ya dizulu mepesaka beto. Beto fueti tubilaka yandi ntangu nionso mambu yina mekatuka na ntima. (Nkunga 62:8) Beto fueti vutukilaka ve kaka bisambu yina beto mekangaka na yintu, kasi beto fueti zabisaka yandi yina beto kele na yau nsatu mpenza. Ya kedika, kana beto kena kutatamana kulonguka Biblia mpe kutubila yandi mambu yina mekatuka na ntima na nzila ya kisambu, nzola na beto samu na Yehova ketatamana kuvuanda ya ngolo.

15, 16. Yinki mutindu nge ketadilaka kisalu ya kusamuna?

¹⁵ Kana beto zola bikana pene-pene na Yehova, beto fueti tubilaka diaka bantu yankaka kiminu na beto. Kuzabisa bantu yankaka mambu metadila Yehova kele diluaku mosi ya mbote mpenza. (Luka 1:74) Mpe yakele kiyekua yina Yesu pesaka na Baklisto nionso ya kedika. Beto nionso fueti samuna nsangu ya mbote ya Kimfumu ya Nzambi. Nge diaka nge kesalaka yau?—Matayo 24:14; 28:19, 20.

¹⁶ Ntumua Paulo vuandaka mona ti kusala kisalu ya kusamuna kele mfunu mingi; yandi bokidilaka yau ‘kimvuama.’ (2 Bakorinto 4:7) Kuzabisa bantu yankaka mambu ya Yehova mpe luzolo na yandi kele kisalu yina melutisa mbote yina nge lenda sala. Yakele mutindu mosi ya kusadila Yehova, mpe kisalu na nge kele na mfunu mingi na meso ya Yehova. (Baebreo 6:10) Kusamuna lenda diaka natina nge mpe bantu yankaka mambote, samu yakesadisa beno, beno pusana pene-pene na Yehova mpe beno kebaka luzingu ya mvula na  mvula. (Tanga 1 Bakorinto 15:58.) Yakele na kisalu yankaka yina lenda pesa nge kiese kuluta kisalu ya kusamuna?

17. Samu na yinki kisalu ya kusamuna fueti salama malu-malu?

¹⁷ Kisalu ya kusamuna kele kisalu yina fueti salama malu-malu. Beto fueti “longa nsangu,” mpe beto fueti ‘sala yau malu-malu.’ (2 Timoteo 4:2) Bantu kele na nsatu ya kuwa nsangu metadila Kimfumu ya Nzambi. Biblia metuba: ‘Kilumbu ya nene ya Yehova kele pene-pene! Yau kele pene-pene mpe yau mefinama nsualu mpenza!’ Nsuka ‘kezingila ve!’ (Sefania 1:14; Habakuki 2:3) Ya kedika, ntama ve, Yehova kebunga yinza yayi ya yimbi ya Satana. Tekila diambu yango yasalama, beto fueti luengisa bantu samu bapona kusadila Yehova.

18. Samu na yinki beto fueti sambilaka Yehova kintuadi na Baklisto yankaka ya kedika?

¹⁸ Yehova zola ti beto sambila yandi kintuadi na Baklisto yankaka ya kedika. Biblia metuba: ‘Beto tudila bayankaka dikebi samu na kupusa bau na kumonisa nzola mpe kusala bisalu ya mbote, beto bika ve kukutakana na balukutakanu, mutindu yau kele kikadulu ya bayankaka, kasi beto pesana lukindusu, mpe beno sala yau diaka mingi kuluta samu beno kena kumona kilumbu kena finama.’ (Baebreo 10:24, 25) Beto fueti sala nionso samu na kuvuanda na balukutakanu nionso. Balukutakanu kepesaka beto diluaku ya kukindasana mpe kupesana ngolo.

19. Yinki lenda sadisa beto samu beto zola bampangi na beto Baklisto?

¹⁹ Ntangu nge kekutakana na balukutakanu, nge kebaka bankundi ya mbote yina kesadisa nge na kusambila Nzambi. Nge kekutana na bampangi ya mutindu na mutindu ya babakala mpe banketo, bayina kesalaka nionso lokola nge samu na kusambila Nzambi. Mpe bakele bantu ya kukondua kulunga mpe bakesalaka banzimbakana lokola nge. Kana bamesala nzimbakana, vuanda pene ya kulemvukila bau. (Tanga Bakolosai 3:13.) Tadilaka ntangu nionso bikadulu ya mbote ya bampangi na nge Baklisto, mpe yau nde kesadisa nge, nge zola bau mpe nge pusana pene-pene na Yehova.

20, 21. Yinki yina ‘luzingu ya kedika’?

²⁰ Yehova zola ti bankundi na yandi nionso vuanda na luzingu ya mbote. Biblia kelongaka beto ti luzingu na beto na bilumbu kekuiza kevuanda ya kusuasana mpenza na luzingu na beto ya bubu yayi.

²¹ Na bilumbu kekuiza, beto kezinga mvula na mvula, kasi yakevuanda kaka ve mua luzingu ya 70 to 80 ya bamvula. Beto kesepela kuzinga “mvula na mvula” na mavimpi ya kulunga, kiyenge, mpe kiese na kati ya paradiso mosi ya kitoko. Yau yina nde Biblia kebokidilaka ‘luzingu ya kedika.’ Yehova mepesa beto kivuvu ya luzingu ya kedika, kasi beto fueti sala nionso yina beto lenda bubu yayi samu beto “simba ngolo” luzingu yango.—1 Timoteo 6:12, 19.

22. (a) Yinki mutindu nge lenda ‘simba ngolo luzingu ya kedika’? (b) Samu na yinki beto lenda nunga ve kubaka luzingu ya mvula na mvula na ngolo ya beto mosi?

²² Yinki mutindu beto lenda ‘simba ngolo luzingu ya kedika’? Beto fueti ‘sala mambu ya mbote’ mpe ’kuvuanda bamvuama ya bisalu ya mbote.’ (1 Timoteo 6:18) Yazola monisa ti beto sadila mambu yina beto kena kulonguka na Biblia. Kasi, beto kebaka ve luzingu ya kedika kaka na ngolo na beto mosi. Beto lenda nunga ve kubaka luzingu ya mvula na mvula na ngolo ya beto mosi. Yakele dikabu ya ofele ya Yehova yina yandi kepesaka na bisadi na yandi ya kukuikama, yakele mutindu mosi ya kumonisa “ntima ya mbote [na yandi] ya nene.” (Baroma 5:15) Tata na beto ya dizulu zola pesa na bisadi na yandi ya kukuikama dikabu yango.

23. Samu na yinki nge fueti pona kusala mambu ya mbote banda bubu yayi?

²³ Nge kukiyuvusa: ‘Munu kesambilaka Nzambi na mutindu yina yandi kendimaka?’ Kana nge memona ti nge fueti sala bansobolo yankaka na luzingu na nge, sala yau kukondua kuvingila. Ntangu beto kena kutudila Yehova ntima na beto, mpe beto kena kusala nionso yina beto lenda samu na kuzitisa yandi, Yehova kevuanda kisika na beto ya kutinina. Yandi  ketanina bisadi na yandi ya kukuikama na yinza yayi ya yimbi ya Satana. Na manima, Yehova kesala ti beto vuanda na Paradiso mvimba-mvimba, mutindu kaka yandi pesaka nsilulu. Ya kedika, nge lenda baka luzingu ya kedika kana nge kena kupona kusala mambu ya mbote banda bubu yayi!