1, 2. Akweyi tulenda sololwela lutaninu o unu?

YINDULA vo mu kangala wina, e tembwa kia ngolo kiyantikidi. E zulu dilombokele. E nsemo ye miandazi miyantikidi. Vana vau e mvula iyantikidi noka. Ovavidi e fulu kia swekamena. Kieleka, vava osolola kio o ntim’aku uvuvama.

² O unu mu vonza kia mpila yayi twina. E mambu mambi ova nza mu wokela kaka mena. Nanga olenda kukiyuvula, ‘Akweyi ndenda sololwela lutaninu?’ Ntozi a nkunga wasoneka vo: “Ivova kwa Yave vo: ‘Ngeye u tininu diame ye swekameno diame, Nzambi ame ona mbundidi e vuvu.’” (Nkunga 91:2) Kieleka, Yave olenda kutuvevola muna mpasi tumonanga owau yo kutuvana vuvu kiasikila kia kusentu.

3. Adieyi tufwete vanga kimana Yave katusadisa?

³ Aweyi o Yave kekututaninanga? Muna kutusadisa mu zizidila konso mpasi tuwanananga zau. Yave osundidi o nkuma lutila konso muntu ona ozolele kutuvanga e mbi. Kana nkutu vo tubwidilu diambu diampasi owau, tuna ye ziku vo Yave okatula e mfwilu mia mpasi zazi kuna sentwala. Bibila kikutukasakesanga vo, ‘twasikila muna zola kwa Nzambi.’ (Yuda 21) Muna tambula lusadisu lwa Yave muna ntangw’a mpasi, tufwete toma kumfinama. Kansi, aweyi tulenda wo vangila?

4, 5. Aweyi Yave kekutusongelanga zola?

⁴ Muna toma finama Yave, tufwete bakula yamu  nkia tezo kekutuzolelanga. Yindula mawonso Yave kevanganga muna wete dieto. Watuvana ntoto una vo fulu kiambote, wazala ye nti miambote ye bulu. Watuvana mpe madia mambote ye maza mavelela tunuanga. Muna Bibila, Yave okutulonganga e nkumbu andi ye fu yandi yambote. Vana ntandu, watusonga o zola kwandi muna fila Yesu wa Mwan’andi anzolwa ova ntoto kavana o moyo andi mu kuma kieto. (Yoane 3:16) Mu kuma kia kimenga kia lukûlu, tuna ye vuvu kiasikila kia kusentu.

⁵ Yave wakubika Kintinu kia Masia, i sia vo, luyalu lwa zulu olu lufokola e mpasi zawonso ke kolo ko. E Kintinu kikitula o ntoto se paradiso, muna wantu awonso bezingila mu luvuvamu ye kiese yakwele mvu. (Nkunga 37:29) E mpila yankaka Yave kekutusongelanga o zola, i kutulonga mpila yambote tulenda zingila owau. Okutulombanga mpe vo twasambanga kwa yandi ye okalanga wakubama mu wá e sambu yeto. Yave osonganga o zola kwandi kwa konso muntu mu yeto.

6. Aweyi olenda songela vo ovutulanga matondo muna zola kwa Yave?

⁶ Aweyi olenda songela vo ovutulanga matondo muna zola kwa Yave? Songa kwa Yave vo oyangalelanga mawonso kevanganga muna wete diaku. Diankenda kikilu vo wantu ayingi o unu ke bena ye fu kia vutula matondo ko. I diau mpe diavangamanga vava Yesu kakala ova ntoto. Lumbu kimosi, Yesu wawuka akwa wazi kumi, kansi mosi kaka wamvutula matondo. (Luka 17:12-17) Tuzolele tanginina muntu ndioyo wavutula matondo kwa Yesu. Lumbu yawonso tufwete vutulanga matondo kwa Yave.

7. Yamu nkia tezo tufwete zolela Yave?

⁷ Tufwete mpe songanga zola kuna kwa Yave. Yesu  wavovesa alongoki andi vo bafwete zola Yave ye nsi a ntim’au wawonso, muna moyo au wawonso ye muna nyindu au wawonso. (Tanga Matai 22:37.) Ediadi aweyi disongele?

8, 9. Aweyi tulenda songela kwa Yave vo zola tukunzolanga?

⁸ Nga ovova kwa nkatu vo Yave tuzolanga diafwana kwandi? Ve. Avo tuzolanga Yave ye nsi a ntim’eto, moyo yo nyindu eto wawonso, tusongela o zola kwaku muna mavangu. (Matai 7:16-20) Bibila kikutulonganga vo avo tuzolanga Nzambi, tulemvokela nkanikinu miandi. Nga ediadi diampasi? Ve, kadi e ‘nkanikinu mia Yave ke miampasi ko.’—Tanga 1 Yoane 5:3.

⁹ Vava tulemvokelanga Yave, tukalanga ye zingu kiakiese. (Yesaya 48:17, 18) Kansi, nki kikutusadisa mu toma finama Yave? Yambula twazaya.

10. Ekuma ofwete kwamanana longokela mambu ma Yave?

¹⁰ Aweyi wakitukila nkundi a Yave? Muna longoka Bibila, watoma zaya Yave yo vanga yandi kikundi. E kikundi kiaki kina nze tiya tuna ozolele vo twakwamanana lema. O tiya muna kwamanana lema, ofwete kudikilanga e nkuni. Diau dimosi mpe muna siamisa kikundi kiaku yo Yave, ofwete kwamanana longoka mambu ma Yave.—Ngana 2:1-5.

11. Adieyi malongi ma Bibila mevanga kwa ngeye?

¹¹ Ekolo okwamanananga longoka e Bibila, obakula mambu mayingi mesimba o ntim’aku. Badika una alongoki wole a Yesu bamona vava kabasasila ungunza wa Bibila. Bavova vo: “Nga ntima mieto ke miyangalelenge ko wau kamokenenge yeto muna nzila yo toma kutusasila e Sono e?”—Luka 24:32.

12, 13. (a) Adieyi dilenda vangama muna zola kweto kwa Nzambi? (b) Aweyi tulenda kwamanena siamisina o zola kweto muna Yave?

 ¹² Nze una ntima mia alongoki a Yesu miayangalela vava babakula e sono, ngeye mpe nanga i wau wamona vava wayantika bakula e Bibila. Ediadi diasadisa mu zaya Yave yo kunzola. Kansi, o zola kwaku kulenda vola. Kuyambula ko ediadi diavangama.—Matai 24:12.

¹³ Wau vo okitukidi nkundi a Nzambi, ofwete sia e ngolo za kwamanana siamisa kikundi kiaku yo yandi. Ofwete kwamanana longoka mambu ma Nzambi yo Yesu. Badikanga mana olongokanga ye una olenda mo sadila muna zingu kiaku. (Yoane 17:3) Vava otanganga yovo longoka e Bibila, ukiyuvula: ‘Ediadi, adieyi dindongele mu kuma kia Yave wa Nzambi? Ekuma mfwete kunzolela ye nsi a ntima ye moyo ame wawonso?’—1 Timoteo 4:15.

14. Aweyi e sambu kilenda siamisina o zola kweto muna Yave?

 ¹⁴ Avo nkundi una yandi ye omokenanga yandi lumbu yawonso, ediadi dikumikanga kikundi kieno. Diau dimosi mpe vava tumokenanga yo Yave lumbu yawonso muna sambu, tusiamisanga o zola kweto yo yandi. (Tanga 1 Tesalonika 5:17.) E sambu i lukau lwamfunu o Se dieto dia zulu katuvana. Lumbu yawonso tufwete mokenanga yandi muna sambu ye nsi a ntim’eto wawonso. (Nkunga 62:8) Katufwete vutukilanga mvovo ko muna sambu yeto, kansi tufwete zayanga e nsasa ya mana tuvova. Kieleka avo tukwamanene longoka Bibila yo samba ye nsi a ntima wawonso, tusiamisa o zola kweto muna Yave.

15, 16. Aweyi obadikilanga e salu kia umbangi?

¹⁵ Avo tuzolele toma finama Yave, tufwete mpe zayisanga kwa wantu ankaka mana tukwikilanga. O zayisa kwa wantu ankaka mambu ma Yave, lau diampwena kikilu. (Luka 1:74) Yesu wavana e mbebe yayi kwa Akristu awonso akieleka. Konso muntu mu yeto kafwete samunanga e nsangu zambote za Kintinu kia Nzambi. Nga ovanganga wo?—Matai 24:14; 28:19, 20.

¹⁶ Paulu wa ntumwa wabadikilanga e salu kia samuna e nsangu zambote vo kiamfunu kikilu. Wayikila kio vo “lusalu.” (2 Korinto 4:7) O samuna mambu ma Yave ye makani mandi kwa akaka i salu kisundidi o mfunu olenda sala. Eyayi i mpila yambote olenda sadila Yave, oyandi oyangalelanga mana ovanganga mu kuma kiandi. (Ayibere 6:10) E salu kia samuna e nsangu zambote, kilenda sadisa ngeye kibeni ye awana bekuwanga mu finama Yave yo vua moyo a mvu ya mvu kuna sentwala. (Tanga  1 Korinto 15:58.) Nga vena ye salu kiankaka kilenda kutwasila kiese kiayingi avo ke salu kiaki ko?

17. Ekuma salu kia umbangi kifwete sadilwa mu nzaki?

¹⁷ E salu kia umbangi kifwete salwa mu nzaki. Tufwete “samuna e diambu” ye tufwete wo vangila mu “nzaki.” (2 Timoteo 4:2) O wantu bafwete wá nsangu za Kintinu kia Nzambi. Bibila kivovanga vo: “E lumbu kia Yave kifinamene! Kifinamene, mu nzaki kikwizilanga!” E mbaninu “ke isala manima ko!” (Sefaniya 1:14; Kabakuke 2:3) Elo, ke kolo ko Yave ofwasa e nza yambi ya Satana. Vitila diambu diadi diavangama, o wantu bafwete lukiswa kimana basola sadila Yave.

18. Ekuma tufwete sambila Yave kumosi ye Akristu akieleka?

¹⁸ Yave ozolele vo twansambila kumosi ye Akristu akieleka. Bibila kivovanga vo: “Yambula twayinduziananga kimana twasikamesa o zola ye mavangu mambote kwa muntu yo nkwandi, ke tuyambula kutakana ko, nze i fu kia ankaka, kansi tukasakesanga muntu yo nkwandi, yo siamanana wo vanga, musungula wau tumwene vo e lumbu mu finama kaka kina.” (Ayibere 10:24, 25) Tufwete sianga e ngolo twakalanga muna tukutakanu twawonso. O tukutakanu tukutuvananga e lau dia kasakesa yo kumika muntu yo nkwandi.

19. Nki kilenda kutusadisa mu zola mpangi zeto?

¹⁹ Vava okwenda muna lukutakanu, owanana ye akundi ambote ana bekusadisa mu sambila Yave. Owanana ye ampangi ana bevanganga mawonso mu sambila Yave nze ngeye. Oyau wantu alembi lunga nze ngeye, bevanganga mpe vilwa. Muna kuma kiaki, avo bavangidi diambu diambi, kala wakubama muna kubaloloka. (Tanga Kolosai 3:13.) Ntangwa zawonso, sianga e sungididi muna fu yambote ya mpangi zaku Akristu. O vanga wo dikusadisa mu kubazola yo toma finama Yave.

20, 21. Nki i “moyo una vo moyo kikilu”?

²⁰ Yave ozolele vo akundi andi awonso bakala ye zingu kiambote. Bibila kikutulonganga vo e zingu kieto kuna sentu kiaswaswana kikilu kikala ye zingu kia unu.

²¹ Kuna sentu tuzinga yakwele mvu, ke mvu 70 kaka ko ngatu 80. Tuyangalela vua “moyo a mvu ya mvu” yo vimpi walunga, luvuvamu yo kala ye kiese muna paradiso. Bibila kiyikilanga wo vo “moyo kikilu.” Yave osianga nsilu wa kutuvana moyo wina vo moyo kikilu, kansi tufwete vanga mawonso tulenda mu ‘simbinina’ wo.—1 Timoteo 6:12, 19.

22. (a) Aweyi tulenda ‘simbinina moyo una vo moyo kikilu’? (b) Ekuma ke tulendi vuila moyo a mvu ya mvu mu ngolo za yeto kibeni ko?

²² Aweyi tulenda ‘simbinina moyo una vo moyo kikilu’? Muna ‘vanganga wete’ yo ‘vuamina muna mavangu mambote.’ (1 Timoteo 6:18) Ediadi disongele vo tufwete sadilanga mana tulongokanga muna Bibila. Kansi, moyo a mvu ya mvu ke tulendi wo vuila mu ngolo za yeto kibeni ko. Una se lukau lwa ngovo Yave kevana kwa selo yandi yakwikizi muna “nkenda zandi.” (Roma 5:15) O Se dieto kuna zulu, ozolele kieleka vana lukau lwalu kwa selo yandi yakwikizi.

23. Ekuma ofwete bakila nzengo zambote owau?

²³ Ukiyuvula: ‘Nga isambilanga Nzambi mu mpila ikunyangidikanga?’ Avo vena ye diambu ofwete singika, singika dio owau. Avo tuvangidi mawonso tulenda mu lemvokela Yave yo kumbunda e vuvu, Yave okala se tininu dieto. Otanina e selo yandi ya kwikizi mu lumbu yayi yambaninu ya nza yambi ya Satana. I bosi, Yave ovanga mawonso kimana twazingila muna Paradiso yakwele  mvu nze una kasia o nsilu. Muna kuma kiaki, olenda vua moyo una vo moyo kikilu avo obakidi e nzengo zambote owau.