1, 2. Ngano mu ntangu yi nani lendi tu kengerela?

BANZA’ETI: ku mbazi takwe yende, titembo tia ngolo tie kô. Zulu dilombele mpe dia dita hezima, nzazi ni ya yita bamina mpe mvula ya ngolo yibatikiri mu noka. Dingiri mbuka yi swamina mu tikengerela. Ha manima, wizi ya baka: Ntia mpila nsayi!

² Beto mpe twena ntiana mu musamu wa mpila yo. Misamu ni beba kwa misimbiri mu nza. Kampe mbo tiyulaka: “Ngano kwe ndendi swamina mu tikengerela?” Tisari timosi tia Nzambi tiatsoneka: “Nzololo na tâ kwe Yehova: ‘Nge ni tiswamunu tiani mpe mbuka’ani ya ngolo yikunkengerelaka, Nzambi’ani yi nisilaka vuvu.’” (Mikunga 91:2) Yehova mbombolo na vuvu tia toma katuhanaka mu bungu dia bilumbu bita kwiza.

3. Ngano nti tufweti sa ngatu Yehova katukengerelaka?

³ Ngano Yehova bwe katukengerelaka? Lendi tu bakisa mu telamana misamu miamiansoni mitubwilaka. Yehova yôkele ngolo bô babansoni badingaka mu tu sa bubi. Ni bu sa ti mpasi zituturiri, tulendi ba na vuvu ti mu bilumbu bita kwiza, Yehova mbo kakatula mpasi zeto zazansoni. Bibila ditutindisi mu “tatamana mu bâ mu luzolo lwa Nzambi.” (Yude 21, NWT) Mu baka lubakusu lwa Nzambi mu ntangu ya mpasi tufweti tatamana mu bâ ndiku zandi. Kâ, ngano bwe tulendela?

4, 5. Ngano bwe Yehova katusongelaka luzolo lwandi?

⁴ Mu tatamana mu bâ ndiku ya Yehova, tufweti bakula ti Yandi beto katomono zolo. Banza’eti mio miamiansoni mi kayirikaka mu bungu dia beto. Watuhana mutoto wa toma mpe wafulusa wo mu bibulu na miti mia toma. Yehova bidia bie na luwu lwalwingi na mamba ma mbote katuhanaka. Mu Bibila, mbo katulongesaka nkumbu’andi na bifu biandi bia mbote. Kâ wuyokele mfunu, watusongela luzolo lwandi bu katambika Mwana’andi Yezu wu katomo zolo ha mutoto, ngatu kahana luzingu lwandi mu bungu dia beto. (Za 3:16) Mu nzila ya mukayulu wo, beto twena na vuvu tia toma mu bungu dia bilumbu bita kwiza.

⁵ Yehova watûla Timfumu tia Masiya, guvernema yi twarisa Masiya. Timfumu tio tia ku mazulu, ntamana mbo tikatula mpasi zazansoni mpe mbo tisa ti mutoto wabâ paradi. Ku Paradi, bantu babansoni mbo baba na luzingu lwa mankululu, mbo babâ mu nsayi mpe mu tidzunu. (Mikunga 37:29) Yehova luzolo lwandi mpe katusongelaka bu katubangurilaka mpila yi tubela na luzingu lwa mbote. Yehova mbo katulombaka mpe tamusambilaka mu bungu ti zololo katuwâka ntangu zazansoni. Yehova luzolo lwandi katomo songelaka kwe muntu ni muntu.

6. Ngano bwe fweti hanina mvutu mu luzolo lwa Yehova?

⁶ Ngano bwe fweti hanina mvutu mu luzolo lwa Yehova? Songelaka ti nsayi yi baka naku mu mio miamiansoni mi kasaka mu bungu dia nge. Mu ntangu yi, bantu babingi balembo vutulaka matondo. Wayilama mu ntangu Yezu yikeri ha mutoto. Lumbu timosi, Yezu wawasisa bantu 10 beri na bwazi, kâ mosi kwa wakâla mu mu vuturila matondo. (Like 17:12-17) Tuzololo tabâ ntiana muntu  wuna. Tuzololo tavutulaka matondo kwe Yehova ntangu zazansoni.

7. Ngano ntia mpila tufweti zololo Yehova?

⁷ Tufweti songelaka ti, Yehova Yandi tuzoloko. Yezu watâ kwe milongoki miandi ti, bafweti zolo Yehova “mu mutima’awu wawansoni,” “mu tilundi tiawu tiatiansoni” mpe “mu mabanza mawu mamansoni.” (Tanga Matie 22:37, NWT.) Ngano bwe wuta zolo tâ?

8, 9. Ngano bwe tusongela kwe Yehova ti Yandi tuzololo?

⁸ Ngano wufweni mu tâ ti Yehova Yandi nzololo? Kâni. Tala ti Yandi tuzololo “mu mutima’eto wawansoni,” “mu tilundi tieto tiatiansoni” mpe “mu mabanza meto mamansoni,” mbo tusongela wo mu nsalulu zeto. (Matie 7:16-20) Bibila ditomono tâ ti, tala ti Nzambi Yandi tuzoloko, mbo tutumama mu ntumunu zandi. Ngano musamu wa mpasi wena mu tumamana ntumunu zandi? Kâni. Mu bungu ti “ka zena dema ko.”​—Tanga 1 Za 5:3.

⁹ Tamana tumama kwe Yehova, mbo tuba na luzingu lwa nsayi. (Izaya 48:17, 18) Kâ, nti bitubakisa mu tatamana mu ba ndiku’andi?

10. Mu bungu dia nti fweti tatamana mu longoka mu zaba Yehova?

¹⁰ Ngano bwe wayizi bela ndiku ya Nzambi? Bu takwe longoke Bibila, walongokele mu zaba Yehova mpe, tindiku tiaku na Yandi tiayizi kula. Tindiku tiaku na Yehova tiena ntiana tiya. Ngatu tiya twatatamana mu lema, fweti yika nkuni. Mu mpila yo, ngatu tindiku tiaku na Yehova tiatatamana mu bâ ngolo, fweti tatamana mu longoka mu mu zaba.​—Bingana 2:1-5.

11. Ngano ndongosolo za Bibila bwe zikusaka ku mutima?

¹¹ Bu tatamana mu kwe longoke Bibila, mbo longoka misamu mikusimba mutima. Tala bweri monaka milongoki miole mia Yezu mu ntangu Yezu keri ba  bangurilaka mbikululu za Bibila. Milongoki mina miatâ ti: ‘mutima’eto ka weri â kwe kumi tiya ko bu keri kwe tu zonzele mu nzila, bu keri kwe tu banguriri Matsonoko?’​—Like 24:32.

12, 13. (a) Ngano nti bilendi turila luzolo lweto mu Nzambi? (b) Ngano nti tufweti sa ngatu luzolo lweto mu Nzambi lwatatamana mu bâ ngolo?

¹² Milongoki mia Yezu, bu miabakula Matsonoko, misamu mina miabasimba mitima. Kampe nge mpe nsayi ya mpila yo yaba naku bu wayizi batika mu bakula Bibila. Wayizi zaba Yehova mpe wayizi mu zolo. Kubikandi luzolo lo lwawola peleko lwakota tiozi.​—Matie 24:12.

¹³ Ngatu tindiku tiaku na Nzambi tiatatamana mu bâ ngolo, fweti sarila ngolo zazingi. Tatamana mu longoka ngatu watomo zaba Nzambi na Yezu. Dimbitila mu mpila yi sarila misamu mi talongoka. (Za 17:3) Bu tangaka Bibila peleko bu longokaka dio, tiyulaka: “Ngano musamu wu ndongokele nti wuta kundongesa mu Yehova?  Mu verse zi, nti bita kuntuma mu mu zolo mu mutima’ani wawansoni mpe mu tilundi tiani tiatiansoni?”​—1 Timote 4:15.

14. Ngano bwe lusambulu lutubakisilaka ngatu luzolo lweto mu Yehova lwabâ ngolo?

¹⁴ Bu baka na ndiku ya mutima, mbo mu zonzesaka ntangu zazansoni. Ni mu mpila yo tindiku tieno titatamana mu bâ ngolo. Mpila mosi, bu tuzonzaka ntangu zazansoni na Yehova, luzolo lweto mu Yandi mbo lutatamana mu bâ ngolo. (Tanga 1 Bisi-Tesalonike 5:17.) Lusambulu lwena kabu dia nkatika dia toma dia Tata’eto die ku mazulu. Tufweti mu zonzelaka ntangu zazansoni ku nsi’a mutima. (Mikunga 62:8) Ka tufweti â takarilaka tusambulu tu talongoka ko, kâ tufweti banzaka misamu mi tutâ mu tusambulu. Ngatu luzolo lweto mu Yehova lwatatamana mu bâ ngolo, tufweti tatamana mu longoka Bibila mpe tufweti mu sambilaka ku nsi’a mutima.

15, 16. Ngano bwe bongelaka salu tia samuna?

¹⁵ Mu tatamana mu bâ ndiku ya Nzambi, tufweti mpe zonzelaka timinu tieto kwe bantu bakaka. Zonzela Yehova bwena bweso bwa bunene. (Like 1:74) Dema diena dia hana Yezu kwe Bakristo babansoni. Tufweti samunaka nsangu za mbote za Timfumu tia Nzambi kwe bantu babansoni. Ngano za wabatikiri mu samuna?​—Matie 24:14; 28:19, 20.

¹⁶ Kwe Paulo, salu tia samuna tieri tima tia ntalu. Watâ ti tieri “timvwama.” (2 Bisi-Korente 4:7) Salu tia zonzela Yehova kwe bakaka tiyokele mfunu bisalu biabiansoni bilendi sala. Mpila yena ya sarila Yehova. Mpe Yehova tomono zolo mio mi yirikaka mu bungu dia Yandi. (Bahebre 6:10) Salu tia samuna ndandu tinataka kwe  bantu bakuwâka, na kwe nge beni. Bu kwe samuni, mbo bakisa bantu bakaka batomo pusana kwe Yehova mpe babaka luzingu lwa mankululu (Tanga 1 Bisi-Korente 15:58.) Ngano salu tiakaka tie kô tilendi tomo ku tâ nsayi?

17. Mu bungu dia nti salu tia samuna tiena salu tifweti kulu salama?

¹⁷ Salu tia samuna tiena salu tifweti kulu salama. Tufweti ‘samuna zu . . . na nguria fuki.’ (2 Timote 4:2) Bantu bafweti wâ nsangu za Timfumu tia Nzambi. Bibila ditele: “Lumbu tia Yehova tia tinene ka tisiri â mala ko. Ka tisiri â mala ko, mpe ni tia tita kwiza mu ntinu.” Nsuka “kayilandila ko.” (Sofoni 1:14; Habakuke 2:3) Ntamana kwa, Yehova mbo kafukisa nza ya Satana. Kâ ntete watula, bantu bafweti toko zaba misamu mitula ngatu basola mu sarila Yehova.

18. Mu bungu dia nti tufweti sambilaka Yehova tintwari na Bakristo bakaka?

¹⁸ Yehova zololo ti tamusambilaka na Bakristo bakaka ba matieleka. Bibila ditele ti: “takipasanakeno beto na beto ngatu tasarila luzolo na nsalulu za mbote, ka tuyambirikandi tukutakanu tweto ntiana bu saka bantu bakaka, kâ tatitindisaka mu tintwari, buna mbo tukwe kele tilumbu tita kwiza.” (Bahebre 10:24, 25, NWT) Tufweti sa miamiansoni mifwanakane mu kwendaka ku tukutakanu. Ku tukutakanu, mbo tutitindisaka mpe mbo tutindisaka bampwaneto.

19. Ngano nti bilendi tubakisa mu zolo mpangi zeto?

¹⁹ Bu tatamana mu kwendaka ku tukutakanu twa Bakristo, mbo sa tindiku na bantu bakubakisa mu sambila Nzambi. Mbo bwabana na mpangi za swaswana basarilaka ngolo zawu mu sambila Nzambi. Kâ, ntiana kwa nge, bantu ba masumu bena mpe misamu milembolo mia delakana mia bayirikaka. Kubama mu ba lemvokelaka. (Tanga Bisi-Kolose 3:13.) Vulu talaka kwa bifu biawu bia  mbote. Bu sila bo, mbo bazolo mpe mbo tomo pusana kwe Yehova.

20, 21. Ngano “luzingu lwa matieleka” ni nti?

²⁰ Yehova zololo ti ndiku zandi zaba na luzingu luyokele bubote. Bibila ditulongese ti, mu bilumbu bita kwiza, luzingu lweto mbo lutomo soba.

²¹ Ka tuvutu â zinga kwa mvula 70 peleko 80 ko. Mbo tuba na luzingu lwa mankululu. Mbo tuba na tikolela tia mbote na tidzunu ku Paradi. Bibila “luzingu lwa matieleka” ditâka lo. Yehova luzingu lo katukanisini. Kâ tufweti sarila ngolo zeto zazansoni mu “tomo [lwa] simbirila” bwawu bu.​—1 Timote 6:12, 19.

22. (a) Ngano bwe tulendi “simbirila luzingu lwa matieleka”? (b) Mu bungu dia nti tulendi lembo bakila luzingu lwa mankululu mu ngolo za beto beni?

²² Ngano bwe tulendi “tomo simbirila luzingu lwa matieleka”? Tufweti ‘sarila mbote’ mpe ‘tafuluka mu nsalulu za mbote.’ (1 Timote 6:18) Wuzololo tâ ti tufweti sarila mio mi tulongokaka mu Bibila. Kâ, ka mu ngolo za beto beni â ko tubakila luzingu lwa matieleka. Ka tulendi â tabaka luzingu lwa mankululu mu beto beni ko. Luzingu lwa matieleka kabu dia Yehova diena, “bweso bu lembolo tu fwanakana” bwena. (Bisi-Rome 5:15, NWT) Tata’eto die ku mazulu tomono zolo mu hana kabu dio kwe bisari biandi.

23. Mu bungu dia nti fweti kulu sa nsobolo?

²³ Tiyulaka: “Ngano mpila’ani ya sambila, Nzambi yitâka nsayi?” Tala ti nsobolo fweti sa mu luzingu lwaku, ni bwawu bu fweti za sa. Tala ti tusariri ngolo zeto mu sarila Yehova mpe tala ti tumusiriri vuvu tieto, Yehova mbo kabâ tiswamunu tieto. Mbo kakengerela bisari  biandi mu bilumbu bia mansukina bia nza ya Satana. Mpe, mbo kasa ti tazinga mankululu ku Paradi, ntiana bu kakanisina wo. Tala ti kululu sa nsobolo, lendi baka luzingu lwa matieleka!