1, 2. Ino nkuli nkweenga twacana lushitilisho munshiku shino?

AMUYEEYE kwaamba ayi mutokweenda munshila lyalo muuwo unene watalika kupuupa. Kwiculu makumbi ashiya mbi, kalumba kabyeka, alimwi mfula yatalika kululuma. Mpeeke mfula yatalika kuloka. Lyalo mwatalika kulangoola kwakuyuba. Ndyemwacana kwakuyuba, mpeeke moyo wakalikana!

² Aswebo munshiku shino tuli mubukaalo mbuli boobu. Shintu pacishi shitooya bubicilaakobo. Mpashi cimwi ciindi mulaliipusha ayi, ‘Ino nkuli nkweenga ndacana lushitilisho?’ Shikulumbaisha wakaamba ayi: “Ndakwaambila Yehova ayi: ‘Ndiwe mupulushi wangu, muli ndiwe moonjuba, Lesa wangu mooncinkite manungo.’” (Kulumbaisha 91:2) Ncakwiila, Yehova inga watucafwa mumapensho esu, alimwi wakatushomesha abuumi bubotu kunembo.

3. Ino nshiinshi nshotweelete kucita kwaamba ayi Yehova atushitilishe?

³ Ino Yehova inga watushitilisha buyani? Inga watucafwa kulwana mapensho ali oonse ngweenga twabaawo, alimwi alicite nkusu kwiinda uli woonse weenga weelesha kutucisa. Nabi kwaamba ayi cibiibi cili coonse catucitikila, tulishomete camoyo woonse kwaamba ayi Yehova alaakushibambulula shoonse kunembo. Baibo ilatuyuminisha ayi: “Amutolelele kuba mulusuno lwakwe Lesa.” (Judi 21) Aboobo na tulisuni kwaamba ayi Yehova anootucafwa ndyetuli mumapensho, tulyeelete kutolelela kuba abushicibusa buyumu anguwe. Ano ino inga twacita buyani ubo?

4, 5. Ino Yehova watondesha buyani ayi alitusuni?

⁴ Kwaamba ayi tutolelele kuba abushicibusa buyumu a Yehova, tulyeelete kushiba mbwaatusuni. Amuyeeye pashintu shoonse Yehova nshaakatucitila. Wakatupa cishi ca panshi cibotu muswite shishango shibotu abuumbi ashinyama. Wakeelikawo ashakulya shibotu amaanshi akunwa. Kwiinda mu Baibo, Yehova watwiisha liina lyakwe amibo yakwe ibotu abuumbi. Kwiinda pa shoonse, wakatondesha lusuno lwakwe kwiinda mukutuma Mwanaakwe ngwaasuni abuumbi Yesu, kusa mukwaaba buumi bwakwe ceebo ca ndiswe. (Joni 3:16) Aboobo tulicite bulindilishi bwa buumi butamaani kunembo ceebo ca mulambu wakwe.

⁵ Yehova wakabika Bwaami bwakwe Mesiya, na mfulumeende yakwiculu yeshi ikamane mapensho oonse conoonobo. Bwaami ubu bulaakulengesha cishi ca panshi kuba paladaiso, ciindi uli woonse ndyeshi akabe muluumuno alusangalalo lwa muyayaya. (Kulumbaisha 37:29) Nshila imwi Yehova mbwaatutondesha lusuno lwakwe nkutwiisha mbweenga twaba abuumi bubotu nabi pacecino ciindi. Alatuyuminisha kubandika anguwe mumupailo, alimwi alilibambite lyoonse kukutika kumipailo yesu. Cakutatoonsha Yehova watondesha ayi soonse alitusuni.

6. Ino nshiinshi nshomweelete kucita pashintu shoonse Yehova nshaamucitila?

⁶ Ino nciinshi ncomweelete kucita ceebo calusuno Yehova ndwaamutondesha? Amumutondeshe ayi mulalumba pashintu shoonse nshaakamucitila. Bantu baanji munshiku shino tabalumbiwo pashintu Yehova nshaabacitila. Mbocakalinga amuciindi cakwe Yesu. Paciindi cimwi Yesu wakoolesha beshimanata bali likumi, sombi womwibo ngowakesa mukumulumba. (Luka 17:12-17) Tulisuni kuba mbuli musankwa uyo wakaya mukulumba Yesu. Tulyeelete kulumba Yehova lyoonse pashintu shoonse nshaatucitila.

7. Ino Yehova tulyeelete kumusuna buyani?

 ⁷ Aswebo tulyeelete kutondesha ayi tulimusuni Yehova. Yesu wakalwiita bashikwiiya bakwe ayi balyeelete kusuna Yehova amoyo wabo woonse, buumi bwabo boonse alimwi amiyeeyo yabo yoonse. (Amubelenge Mateyo 22:37.) Ino ici cilaambanshi?

8, 9. Ino inga twatondesha buyani ayi tulimusuni Yehova?

⁸ Sa tulyeelete kwaambabo pamulomo ayi tulimusuni Yehova? Sobwe. Na tulisuni Yehova amoyo wesu woonse, buumi bwesu boonse, amiyeeyo yesu yoonse, tulaakutondesha lusuno lwesu kwiinda mumicito yesu. (Mateyo 7:16-20) Baibo ilaamba cakuteenda mweela ayi na tulisuni Lesa, tulaakukonkela milawo yakwe. Sa nciyumu kucita boobo? Sobwe, mukwiinga “milawo yakwe teshi iyumu.”​—Amubelenge 1 Joni 5:3.

⁹ Kunyumfwila Yehova kulatucafwa kuba alusangalalo abuumi bubotu. (Isaya 48:17, 18) Ano ino nciinshi ceshi cikatucaafwe kutolelela kuba abushicibusa buyumu a Yehova? Atubone.

10. Ino nceebonshi mulyeelete kutolelela kwiiya pali Yehova?

¹⁰ Ino nciinshi cakapa kwaamba ayi mube shicibusa wakwe Yehova? Kwiiya Baibo kwakamucafwa kushiba Yehova akuba shicibusa wakwe. Bushicibusa ubu inga twabweelanya a mulilo ngomusuni kwaamba ayi utolelele kunyaka. Bweenka mbuli nkuni mboshiyandika kusonsela kwaamba ayi mulilo utolelele kunyaka, amwebo mulyeelete kutolelela kwiiya pali Yehova kwaamba ayi bushicibusa bwanu butolelele kuyuma.​—Tusimpi 2:1-5.

11. Ino nciinshi ceshi cikacitike na mukatolelele kwiiya Baibo?

¹¹ Ndyemutootolelela kwiiya Baibo, mulaakwiiya shintu sheshi shikamushike pamoyo. Amubone bashikwiiya bakwe Yesu bobilo mbobakalinyumfwa ciindi Yesu ndyaakalinga kubasansulwita bushinshimi bwamu Baibo. Bakaamba ayi:  “Sa maswi akwe taakalinga kuyasa mumoyo ndyaakalinga kutusansulwiita Malembo munshila?”​—Luka 24:32.

12, 13. (a) Ino nciinshi ceenga cacitika kulusuno lwesu pali Yehova? (b) Ino nciinshi ncotweelete kucita kwaamba ayi tutolelele kusuna Yehova?

¹² Bweenka mbuli bashikwiiya bakwe Yesu, amwebo mpashi mwakakondwa abuumbi ndyemwakatalika kunyumfwishisha Malembo. Ici cakamucafwa kushiba Yehova akumusuna. Cakutatoonsha mulisuni kwaamba ayi lusuno ulo lutolelele.​—Mateyo 24:12.

¹³ Na mwababo shicibusa wakwe Lesa, mulyeelete kusebensa cankusu kwaamba ayi mutolelele kuba abushicibusa buyumu anguwe. Mulyeelete kutolelela kwiiya pali nguwe a Yesu akuyeyawo pamakani ngomutokwiiya akubona mbweenga mwaasebensesha mubuumi bwanu. (Joni 17:3) Na mwabelenga Baibo nabi kwiiya, amuliipushe ayi: ‘Ino makani aya atonjiisha nshi pali Yehova Lesa? Ino nceebonshi ndyeelete kusuna Yehova amoyo wangu woonse abuumi bwangu boonse?’​—1 Timoti 4:15.

14. Ino mupailo ulatucafwa buyani kuyumya bushicibusa bwesu a Yehova?

 ¹⁴ Na mulicite shicibusa ngomusuni, mulabandikaakwe lyoonse, alimwi ici cilapa kwaamba ayi bushicibusa bwanu butolelele kuyuma. Ubo mbocibete abushicibusa bwesu a Yehova, na katubandika anguwe lyoonse kwiinda mumupailo, bushicibusa bwesu bulaakuyuma. (Amubelenge 1 Bene Tesalonika 5:17.) Mupailo ncipo cibotu abuumbi kuswa kuli Ishiwesu wakwiculu. Tulyeelete kubandika anguwe lyoonse kuswa panshi lya moyo. (Kulumbaisha 62:8) Tatweelete kupaila mipailo yakwiibalukabo mumutwi, sombi tulyeelete kwaamba shili mumoyo wesu. Ncakwiila, na twatolelela kwiiya Baibo akupaila camoyo woonse, tulaakuba abushicibusa buyumu a Yehova.

15, 16. Ino incito yakushimikila mulaibona buyani?

¹⁵ Na tulisuni kutolelela kuba abushicibusa buyumu a Yehova, tulyeelete kushimikilaako bamwi nshotushoma. Kushimikila bamwi pali Yehova ncoolwe cibotu abuumbi. (Luka 1:74) Alimwi ngo mukuli Yesu ngwaakapa Mwineklistu wancine uli woonse. Soonse tulyeelete kushimikila makani abotu aBwaami bwakwe Lesa. Sa mwakatalika kale kucita boobo?​—Mateyo 24:14; 28:19, 20.

¹⁶ Mutumwi Paulo wakabona ncito yakushimikila kuba cintu cicindeme abuumbi; wakalinga kuyiita ayi “bubile.” (2 Bene Kolinto 4:7) Kulwiitaako bamwi pali Yehova akuyanda kwakwe njencito iyandika abuumbi njeenga mwasebensaako. Njenshila yomwi njeenga mwasebensela Yehova, alimwi alalumba abuumbi. (Bene Ebulu 6:10) Kushimikila inga kwamucafwa abaabo batoomukutika kusena pafwiifwi a Yehova akutambula buumi butamaani. (Amubelenge 1 Bene Kolinto 15:58.) Sa kuliwo ncito imwi yeenga yamupa lusangalalo lwancinencine kwiinda ncito iyi?

17. Ino nceebonshi incito yakushimikila ilyeelete kucitwa cakufwambaana?

 ¹⁷ Incito yakushimikila ilyeelete kucitwa cakufwambaana. Tulyeelete “kushimikila maswi,” alimwi tulyeelete kucita boobo “cakulyaaba.” (2 Timoti 4:2) Bantu balyeelete kunyumfwa makani a Bwaami bwakwe Lesa. Baibo ilaamba ayi: “Bushiku bunene bwakwe Yehova buli pafwiifwi! Buli pafwiifwi alimwi butoosa cakufwambaana abuumbi!” Mamanino “teshi akacelwewo!” (Sefaniya 1:14; Abakuku 2:3) Ncakwiila, conoonobo, Yehova alaakunyonyoola cishi cibiibi cakwe Satana ici. Ano mamanino kaatana kushika, bantu balyeelete kucenjeshekwa kwaamba ayi basale kusebensela Yehova.

18. Ino nceebonshi tulyeelete kucanika kumabungano pomwi aBeneklistu bancine?

¹⁸ Yehova alisuni ayi tunoomupaila pantu pomwi a Beneklistu bancine. Baibo ilaamba ayi: “Katubikilana maano kwaamba ayi tuyuminishanye kutondesha lusuno akucita ncito shibotu, tutacileeki kubungana pomwi, bweenka mbuli bamwi mbobacita, sombi katuyuminishanya, alimwi akutolelela kucita boobo bunene bunene mbotutoobona bushiku ndyebutoosa cisena.” (Bene Ebulu 10:24, 25) Tulyeelete kucita nsheenga twacikonsha kwaamba ayi tunoocanika kumabungano. Mabungano alatupa coolwe cakuyuminishanya.

19. Ino nciinshi ceenga catucafwa kusuna bamakwesu abenankashi?

¹⁹ Kucanika kumabungano kulaakumucafwa kucana beshicibusa babotu beshi bakamucaafwe kulambila Yehova. Mulaakucana bamakwesu abenankashi bapusene pusene abo batoocita nsheenga bacikonsha kupaila Lesa bweenka mbuli ndimwe. Alimwi abalo tabasalalite aboobo balalubisha. Na bakamukalashe amube balibambite kubalekelela. (Amubelenge Bene Kolose 3:13.) Lyoonse amubikile maano pamibo ibotu ya bamakwesu abenankashi, mukwiinga kucita  boobo kulaakumucafwa kubasuna akuyumya bushicibusa bwanu a Yehova.

20, 21. Ino “buumi bwancinencine” cilaambanshi?

²⁰ Yehova alisuni kwaamba ayi beshicibusa bakwe boonse banokala kabotu. Baibo ilatwiisha ayi buumi bwesu kunembo bulaakuba bupusene abuumbi aboobu mbotucite pacecino ciindi.

²¹ Mucishi cipya, tulaakuba abuumi bwamuyayaya, kuteshibo myaaka 70 na 80 sobwe. Sombi tulaakusangalala a “buumi butamaani”, mupaladaiso, umo mweshi tukekale muluumuno, alusangalalo. Ubo mbo buumi Baibo mboyaamba ayi “buumi bwancinencine.” Yehova watushomesha ayi alaakutupa buumi ubu, sombi tulyeelete kucita shoonse nsheenga twacikonsha kwaamba ayi ‘tubucatishe’.​—1 Timoti 6:12, 19.

22. (a) Ino inga “twabucatisha buyani buumi bwancinencine”? (b) Ino nceebonshi inga tatucani buumi butamaani kwiinda mukubusebensela?

²² Ino inga ‘twabucatisha buyani buumi bwancinencine’? Tulyeelete ‘kucita shibotu’ ‘akuba babile mumicito ibotu.’ (1 Timoti 6:18) Nkokwaamba ayi tulyeelete kukonkela nshetwiiya kuswa mu Baibo. Nacibi boobo, buumi butamaani inga tatubucaani munkusu shesu. Tatukoonshi kucana buumi butamaani kwiinda mukubusebensela. Ncipo cakutalipila Yehova ncaapa basebenshi bakwe bashomeka, ncitondesho ca ‘luse lwakwe.’ (Bene Loma 5:15) Ishiwesu wakwiculu alisuni abuumbi kupa basebenshi bakwe bashomeka cipo ici.

23. Ino nceebonshi mulyeelete kusala kabotu pacecino ciindi?

²³ Amuliipushe ayi, ‘Sa ntoopaila Lesa munshila njaasuminisha?’ Na mwacana ayi mulyeelete kwaalula shimwi, amucite boobo cakufwambaana. Na twashoma muli Yehova akucita shoonse nsheenga twacikonsha kumunyumfwila, Yehova alaakuba lushitilisho lwesu. Alaakushitilisha  basebenshi bakwe bashomeka munshiku shamamanino acishi cibiibi cakwe Satana. Lyalo Yehova alaakutupa buumi butamaani mu Paladaiso, kweelana ambwaakashomesha. Ncakwiila, inga mwaba abuumi bwancinencine na mwasala kabotu pacecino ciindi!