1, 2. Ama eco sa ’disi ageyi teza isu ngoa?

MI EGA di nga mi muria amve o’du azi oli akukuru rini ovuzu angiri nisi. Angu ma mile e’do bi ozoo mile ru, dika ovi ma aci e’do angu aza, azini ovi e’do afi. Vutinia, ozoo e’do ’di. Mi e’do pari nda mini mi zizu. Ayiko eco di nga mi fu ngopi ika pari azi onyiru ni isu indrika ru mini ecozu mi zizu!

² Ewu amani sa ’disi ovuzu alenia ri si tro tro ’dile. E’yo wudrikurua ’dia ’diyi di ezaru drile drile. Mi eco di e’yo ega ’dini, ‘Ma nga ta mbaza isu ngoa ya?’ ’Ba Biblia ma alea zaburi sipi ri ’yo ’dini: “Ma nga ’yo Yehova ni ’dini: ‘Mi pari mani ma ta mbazu alenia ri’i, mi kali mani abi be okporuri indi; mi Mungu mani, ma asi mani ’ba mi a’izu.’” (Zaburi 91:2, NW) Adaru, Yehova eco ama onze e’yo ewaru ’diyi ma alea sa ’di ma alea ra, dika eri vini fe ama asi’baza ewu drusi ri ma dria ri ma ovu okporu.

3. Ama eco Yehova ni ’ba pari amani ageyi teza isuzu ri ru ngoniru?

³ Yehova eco amani ta mbaza fe ngoniru? Eri ama aza ko e’yo ewaru amani ovuzu alenia ’diyi ma ti tazu, dika aga vini okpo si ’ba lepi e’yo onzi ’yepi ama rua ’diyi dria ra. E’yo azi onzi ni ka tro i ’ye ama be sa ’di ma alea ra ti, Yehova ni nga e’yo onzi yi ’yepi ’bo ’diyi otu ewu drile ri ma alea ra. Biblia ko ama aza ’dini: “Emi ma mba emi ngulupi ma ta” ale Mungu niri ma alea. (Yuda 21) Amani ecozu azakoma Yehova niri isuzu sa e’yoni ovuzu ewaru ri ma alea, le ama ma ovu Yehova vu inyia. Mi eco di ’dileri ’ye ngoniru?

4, 5. Yehova e’da ima leta amani geri ngosi?

⁴ Mini ecozu ovuzu Yehova vu inyia, le ama ma ni eri ma  leta amani ri ngopi yari ra. Mi ega di nga e’yo afa dria Yehova ni ’ye amani ’diyi ma dria. Fe amani nyaku ndrizaru, gapi tre pati si azini anyapa ndrizaru ’diyi si ri. Fe vini amani nyaka aluzaru nyazaru, azini yi alatararu ri mvuzaru. Biblia ma alea si, Yehova imba vini amani ima ru, azini ima adriza osutaru ’diyi. Agapi dria ra ri, e’da ima leta amani erini ima Mvi erini lele tu, Yesu ma ti epezu nyakua ima idri owizu ama e’yosi. (Yohana 3:16) Erini i owizu ra risi, ama di sa ’disi asi ’baza be, ewu amani drile ’dale ri ni nga ovu kililiru.

⁵ Yehova otu di vini amani Suru Mesiani ri, opi nyaza ’bua ngapi candi nyaza depi dria dria ri. Suru nde ni nga nyaku ’di oja paradisi ru, ’ba ngapi o’api alenia ’diyi nga ovu asianzu si azini ayikosi ’dani ’dani. (Zaburi 37:29) Geri azi Yehova ni amani leta e’dazu ri, erini amani geri ecozu o’azu ewu ’disi idri amani ri ma alea kililiru ndeni ri e’dazu ri i. Eri vini ama a’i izita izizu, dika eri sa dria si ngonde izita amani ’diyi erizu. Yehova e’da ima leta amani alu alu dria ’bo.

6. Le di leta Yehova ni e’da mini ri ma fe mi ma ’ye a’duni?

⁶ Le di leta Yehova ni e’da mini ri ma fe mi ma ’ye a’duni? Le mi ma e’da erini mi ovu awa’difo si afa dria onyiru erini ’ye mini ’diyi si. Te di e’yo candi ru ri, ’ba kakau o’ani erini awa’difo si ku. E’yo ’di ’ye ndra i Yesu ni nga ovuzu nyakua ’dia risi ra. Sa azini alu, Yesu ati ’ba ofu be ’diyi mudri, te eyi ma eselea, alu ri eda dri emuzu awa’difo fezu Yesuni ni. (Luka 17:12-17) Ale o’a agu alu dri edapi awa’difo fezu Yesu ni ’dale. Ale sa driasi o’a Yehova ni awa’difo si.

7. Le leta amani Yehova ni lezu ri ma ovu ngopi?

⁷ Le vini ama ma e’da leta Yehovani indi. Yesu ’yo ndra ’ba ima vuti bipi ’diyi ni, le eyi ma le Yehova ni yi ma asi  driasi, orindi driasi, azini yi ma ondua driasi. (Mi la Matayo 22:37.) E’yo erini ’yo ’da ma efi ngoni?

8, 9. Ama eco e’da Yehova ni kini ale eri ra ri ngoniru?

⁸ ’Yozu tisi ale Yehova ni ra ’dini ri ca ra ya? Yo, ’da cani ku. Aka Yehova ni le ama asi driasi, orindi driasi, azini ondua amani driasi, ama nga leta amani eri lezu ri e’da ’yeta amani ’ye ’diyi si. (Matayo 7:16-20) Biblia imba amani nditiri kini aka Mungu ni le ra, ama azita erini ’diyi ma vuti obi ra. ’Dileri ’yezu ri afa azi amani ewaru ni ya? Yo, ovuni ewaru ku, a’dusiku azita Yehovani ’diyi “ovuni nzizaru ku.”​—Mi la 1 Yohana 5:3.

⁹ Aka Yehova ma ti eri ra, ama nga o’a ayikosi, dika idri amani rini ovu efi si. (Isaya 48:17, 18) A’du eco di ama aza ko awizu Yehova vu inyia ni? Ama ma ne di nga.

10. Le mi ma mu drile e’yo onizu Yehova ma dria a’dusi?

¹⁰ Mi eco eca Yehova ma agyiru ngoniru? Biblia oniza mini ri ma alea, mi di nga e’yo oni Yehova ma dria angiri, dika mi ma agyi eri be rini di nga eca okporu. Le mi ma mba agyi ’di ma ta ekile mini fezu aci ma ve drile drile ri le. Ekile aci ni eja lezu ci ecozu dizu drile drile ri le, le vini ama ma mu drile e’yo onizu Yehova ma dria ecozu agyi amani eri be ri ma ta mbazu okporu.​—E’yo O’beza 2:1-5.

11. E’yo Biblia ni imbari eco a’du ’ye?

¹¹ Ika mu drile e’yo Biblia ma alea diyi onizu, mi nga e’yo azi ngapi mi asi elopi saaru ’diyi oni. Mi ma ne nga ’ba Yesu ma vuti bipi ’diyi ma azi iri ’diyi o’aki ndra ngoni sa Yesu ni eyini e’yo ondriza azi Biblia ma alea ’diyi ecezu ria. E’yo eyini omvi ri ’dini: “Ama asi veni te ama alia erini e’yo ’yoria ama tia geria, erini E’yo Siza ma efi eceria ama dri ku ya?”​—Luka 24:32.

12, 13. (a) Afa ecopi i ’yepi ama leta amani Mungu ni lezuri be ra ri a’duni? (b) Ama eco fe ama leta amani Yehova ni lezu ri ma zo drile drile ngoniru?

 ¹² E’yo mini oni Biblia ma alea ’diyi eco mini ava fe, tro tro E’yo Siza vazu rini ndra ’ba Yesu ma vuti bipi ’dayi ma asi elozu rile. E’yo mini onile ri ko mi aza Yehova ni nizu, azini eri lezu. Mi econi nga le mi ma leta ’dini ambizu ku.​—Matayo 24:12.

¹³ Ika eca Mungu ma agyiru ’bo, le di mi ma nga azi okposi agyi nde ma ta mbazu. Le mi ma mu drile e’yo onizu eri ma dria, azini Yesu ma dria, mi ma dro asisile e’yo mini onile ’diyi ma dria, dika le di vini mi ma ’ye e’yo mini onile ’bo ’diyi ’yeta si. (Yohana 17:3) Mini Biblia laria kaniku e’yo alenia ri oniria, mi ma zi mi ngulupi ’dini: ‘E’yo mani oni ’di imba ma Yehova Mungu ma dria ngoni? Le ma le eri ma asi driasi, azini ma orindi driasi a’dusi?’​—1 Timoteo 4:15.

14. Izita ni ama aza ko ama leta Yehova niri ni awizu okporu ngoniru?

 ¹⁴ Ika mi agyi azi le saaru, mi e’yo nze eri be sa driasi, agyi emini eribe ri ma ovu ani okporu beni. Geri alu ’dile risi, aka e’yo nze Yehova be izita ma aleasi sa dria si ra, eri nga fe ama leta amani eri lezu ri ni awizu okporu. (Mi la 1 ’Ba Tesalonikia ’Diyi 5:17.) Izita eri feta azi onyiru tu ama Ata buari ni fele amani ri i. Le sa dria si ama ma nze e’yo erini engazu ama asia. (Zaburi 62:8) Le ama ma mba izita azi ma ta ama omia, ama di ani izita nde izi engazu ama omia beni ’dini ku, te izita amani ri ma ovu e’yo ama asia, amani le nze Mungu ni asi adasi ri i. Adaru, aka mu drile Biblia onizu, azini izizu engazu ama asia, ama nga fe ama leta amani Yehova ni lezu ri ni awizu okporu.

15, 16. Le geri mini e’yo oluza nezu ri ma ovu ngoni?

¹⁵ Aka le awi Yehova vu inyia ra, le vini ama ma nze e’yo ’ba azi ’diyi ni a’ita amani ri ma dria. E’yo nzezu ’ba azi ’diyi ni Yehova ma dria ri drileba azi amboru ni. (Luka 1:74) ’Di vini azi Yesu ni ndra fe ’ba dria ovupi Kristianiru ’diyi ni ri i. Le ama alu alu dria ma olu e’yo baru Suru Munguni ri ma dria ri ra. Mi e’do ’dileri ’ye ’bo ya?​—Matayo 24:14; 28:19, 20.

¹⁶ Azi e’yo oluzu ri ndra ’ba ti pele Paulo ni afa azi orodriru ni; omve azi nde “afa aje amboru” be ri i. (2 ’Ba Korintoa ’Diyi 4:7) Mini ’ba azi ’diyi ni e’yo oluzu Yehova ma dria azini asisile eri ni ri ma dria ri azi orodriru ndeni mini eco nga ri i. ’Di geri azi mini ecozu azi ngazu Yehova ni ri i, dika eri azi mini nga ini ri ma orodri ne ra. (’Ba Ebraniani 6:10) E’yo mini olu rini nga vini orodri eji mini, azini ’ba e’yo nde eripi ra ’diyi ni a’dusiku mi nga mi ngulupi ma aza ko ’ba azi diyi pie ecazu Yehova ma agyiru, azini idri ’dani  ’dani ri isuzu. (Mi la 1 ’Ba Korintoa ’Diyi 15:58.) Azi ecopi mini ayiko fepi ’di ma drilea ni ci ya?

17. Le ’ba ma nga azi e’yo oluza niri mbeleru a’dusi?

¹⁷ Le ’ba ma nga azi e’yo oluzu ri mbeleru. Le ama ma “olu e’yo,” dika le ama ma ‘olu e’yo nde mbeleru.’ (2 Timoteo 4:2) Le ’ba yi ma eri e’yo Suru Munguni ri ma dria ri ra. Biblia ’yo ’dini: “O’du amboru Yehovaniri ovu inyia, eri ovu inyia, eri emu mbelembele tu!” O’du asiza niri ‘ngani sa eza ku!’ (Zefania 1:14; Habakuki 2:3) Adaru, sa Yehova ni wudrikuru Satani ni ’di ma dri jazu ri ace di were. De nga e’yo ’da ’yeni i ku, le ’ba ma li ’ba yi ma bilendu ra, eyini ecozu pezu Yehova ni inzizu beni.

18. Le ama ma inzi Yehova ni Kristiani ada ’diyi pie tualu a’dusi?

¹⁸ Yehova le ama ma fe ini inzita Kristiani ada ’diyi pie tualu. Biblia ’yo ’dini: “Ama alu alu ma dro asisile ama agyi ma e’yo dria, fezu leta pini zozu azi onyiru ’diyi be; ama ma ku okuza amani ama okuzu tualuri ja ku ’ba azinini kulerile, ama asi omizu ama eselia ama agyi be; emi ma ’ye ’dini agara emini ndrele o’du nderi eca ogogorisi.” (’Ba Ebraniani 10:24, 25) Le ama ma ’ba okpo asi dria si acizu okuta amani ’diyi ma alea dria. Okuta ’diyi amani drileba fe amani ecozu okpo fezu azini asi omiza fezu ama eselea.

19. Afa ecopi ama aza kopi leta e’dazu ama adripi azini amvupi Kristiani ru ’diyi ni ri a’duni?

¹⁹ Ika emu okuta ma alea ra, mi nga agyi ecopi mi aza kopi Yehova ni inzizu ’diyi isu. Mi nga dri fu adripi azini amvupi ndu ndu okpo ’bapi asi driasi inzita fezu Yehova ni, tro tro mini ’yeleri le ’diyi pie. Tro tro mi le, eyi vini okpo ako pie, dika eyi sa azini si e’yo eza indi. E’yi ma azi ka e’yo ’ye mi rua onzi ra, le mi ovu ngonde eyi truzu. (Mi la ’Ba Kolosaia ’Diyi 3:13.) Le sa dria si mi ma ’ba asi adripi azini amvupi Kristiani ru ’diyi ma adriza onyiru ’diyi onezu i, a’dusiku ’dileri ’yezu ri ni nga mi aza ko eyini leta e’dazu, azini esizoru Yehova vu inyia.

20, 21. “Idri ada” ri idri ngole ri i?

²⁰ Yehova le ’ba dria ovupi ima agyiru ’diyi ma o’a idri onyiru ndeni ri ma alea. Biblia ece amani kini idri amani ngazu o’azu alenia ewu drusi ri ma alea rini nga esele co idri amani ovuzu alenia sa ’disi ri be ra.

²¹ Ewu drusi ri ma alea, ama econi lu nga o’a eli 70 kaniku 80 ’dini ku, te ama nga o’a ’dani ’dani. Ama nga ayiko “idri ’dani ’dani” ri niri isu rua alaru si, asianzu si, azini ayikosi nyaku paradisi ru ri ma alea. ’Di di bani afa Biblia ni omve “idri ada” ri i. Yehova ’yo amani kini ama di nga o’a idri adari ma alea. Te di le ama ma nga azi asi driasi ecozu idri nderi ‘bizu kirikiri’ beni.​—1 Timoteo 6:12, 19.

22. (a) Afa ecopi ama aza kopi “idri ada ovupi ndi ndiri” ri bizu kiri kiri ri a’duni? (b) Ama econi idri ’dani ’dani ri isu okpo amani risi ku a’dusi?

²² Afa ecopi ama aza kopi “idri ada ovupi ndi ndiri” bizu kiri kiri ri a’duni? Le ama ma ’ye e’yo “onyiru” ’diyi azini ama ma ga ’yeta “lonyiru kakau ’diyi” si tre. (1 Timoteo 6:18) Efini si le mi ma ’ye e’yo mini oni engazu Biblia ma alea ’diyi ’yeta si. Te di, ama econi idri adari isu okpo amani ’ba ama ngulupi siri si ku. Ama econi idri ’dani ’dani ri isu okpo amani risi ku. ’Di feta Yehova ni fe amani ati’bo erini asi ada be ’diyi ni aje kokoru ri i, eceta erini amani ‘yiki aleru ri’ e’dazu ri i. (’Ba Rumia ’Diyi 5:15) Ata amani ovupi ’bua ri le feta ndrizaru ’di fe ati’bo erini asi ada be ’diyi ni asi adasi.

23. Le mi ma pe peta kililiru ri sa ’disi a’dusi?

²³ Mi ma zi di nga mi ngulupi ’dini, ‘Ma ’di adaru Mungu ni inzi geri erini lele ra risi ya?’ Ika isu le mi ma ’ye ojata azi yi idri mini ri ma alea ra, le mi ma ’ye ojata nde coti coti. Aka ama ati Yehova ma rua azini aka e’yo erini ece amani ’diyi ma vuti obi dria ra, eri nga ovu amani pari amani ageyi teza isuzu ri ru. Eri nga ’ba ini asi ada be ’diyi ma  ageyi te ewu asizu, wudrikuru Satani ni onzi ’dini ngazu dri jazu ri ma alea si. Vutinia, Yehova ni nga fe ama ma o’a paradisia tro tro erini e’yoni azile amani ri le. Adaru, ama nga idri adari isu ra aka peta kilililru ri pe sa ’disi ra ria!