1, 2. I kwepi kotubwanya kufyama dyalelo?

LANGA’PO bidi wenda mu dishinda mu difuku didi’ko kimpumpu. Kūlu kubafīta fututu, mapeni abashilula kupena, ne mikungulo nayo keikungula. Kepejije kala, mvula kanoke kinya kikata. Ubakimbe mwa kufyama. Ku mfulo ubatana kifuko kya kufyama’mo kiyampe shē kadi mūmu; bine mutyima ubakutūka!

² Dyalelo netu tudi mu ngikadilo pamo bwa ino. Ngikadilo ya ino ntanda yendanga ibipila’ko. Ubwanya kwiipangula’mba, ‘Le i kwepi kombwanya kufyama?’ Mulembi umo wa mitōto ya mu Bible wālembele amba: “Nkanenanga Yehova amba: ‘Abe wi kinyemeno kyami ne kifuko kyami kikomejibwe, Leza wami onkulupile.’” (Ñimbo ya Mitōto 91:2) Bine, Yehova ubwanya kwitusenga mu makambakano etu dyalelo, kadi i mwitupe lukulupilo lwa kumeso.

3. Le Yehova ukokeja kwikala kinyemeno kyetu namani?

³ Le Yehova witukiñanga namani? Ubwanya kwitukwasha tulwe na makambakano etu, kadi i mukomo bininge kutabuka muntu ye-yense ukimba kwitusanshija. Shi nansha bibi bibetufikila pano, tukulupilei amba Yehova usa kulongolola bintu kumeso’ku. Bible witukankamika’mba: ‘Mwilamei mu buswe bwa Leza.’ (Yude 21) Shi tusaka’mba Yehova etukwashe mu kitatyi kya makambakano, tufwaninwe kwikala nyeke pabwipi nandi. Namani?

4, 5. Le Yehova i mulombole buswe bwandi kotudi namani?

⁴ Pa kwikala nyeke pabwipi na Yehova, tufwaninwe  kuyuka mwaetusanshilwe. Langulukila pa bintu byonso bitulongēle Yehova. I mwitupe ntanda milumbuluke kadi i muyuje’po mityi miyampe ne banyema. I mwitupe byakudya bya musonso ne mema mayampe a kutoma. Yehova i mwitufundije dijina dyandi ne ngikadila yandi milumbuluke mu Bible. Kadi kikatampe mpata, i buswe bwaālombwele pa kutuma Yesu, wandi Mwana muswedibwe pano pa ntanda amba apāne būmi bwandi mwanda wa batwe. (Yoano 3:16) Kadi pa mwanda wa kino kitapwa, tudi na lukulupilo lwa kutendelwa lwa būmi buyampe bwa kumeso.

⁵ Yehova i mutūle’ko Bulopwe bwa Meshiasa, ko kunena’mba umbikalo wa mūlu usa kutalula’ko panopano ponka masusu onso. Buno Bulopwe bukalamuna ntanda ke paladisa, mwine mukekala bantu bonso mu ndoe ne mu nsangaji ya nyeke. (Ñimbo ya Mitōto 37:29) Kadi Yehova i mulombole buswe kotudi na kwitufundija mwa kwikadila biyampe tamba’nka pano. Witwitanga tulombele kwadi, kadi wivwananga nyeke milombelo yetu. Bine Yehova i mulombole patōkelela buswe bwandi ku batwe bonso.

6. Le nobe ukalonga bika pa buswe bukusenswe Yehova?

⁶ Le nobe ukalonga bika pa buswe bukusenswe Yehova? Mulombole amba ufwijanga’ko pa byonso byakulongēle. Ino i kya bulanda, mwanda bavule dyalelo kebafwijanga’kopo. Mo mwādi mwikadile ne bantu ba mu mafuku a Yesu. Difuku dimo, Yesu wābelwile bantu dikumi ba makopo, ino umo’tu kete ye wāmufwijije’ko. (Luka 17:12-17) Batwe tusaka kwikala bwa yewa wāfwijije’ko Yesu. Tufwijei’ko Yehova nyeke.

7. Le tufwaninwe kusanswa Yehova namani?

⁷ Tufwaninwe ne kusanswa Yehova. Yesu wālombwele  bandi bana ba bwanga amba bafwaninwe kusanswa Yehova na mutyima wabo onso, na muya wabo onso, ne na ñeni yabo yonso. (Tanga Mateo 22:37.) Le ko kunena namani?

8, 9. Le tukalombola Yehova namani amba tumusenswe?

⁸ Lelo kunena’tu amba tusenswe Yehova i kubwane? Aa. Shi tusenswe Yehova na mutyima wetu onso, na muya wetu onso, ne na ñeni yetu yonso, nabya buswe bwetu bukamwekela mu bilongwa. (Mateo 7:16-20) Bible witufundija patōkelela’mba, shi tusenswe Yehova, tukakōkela mbila yandi. Le i bikomo? Aa, mwanda ‘mbila ya Yehova keilemangapo.’​—Tanga 1 Yoano 5:3.

⁹ Shi tukōkele Yehova, tukekala na būmi bwa nsangaji ne kuloelelwa. (Isaya 48:17, 18) Ino le i bika biketukwasha twikale nyeke pabwipi na Yehova? Tutalei.

10. Mwanda waka ufwaninwe kwendelela kwifunda myanda ya Yehova?

¹⁰ Lelo i muswelo’ka owapwene na Yehova? I kupityila ku kwifunda Bible kowayukile Yehova senene ne kupwana nandi. Kino kipwano kidi pamo bwa mudilo ofwaninwe kulama nyeke utēma. Bilomba kusonshila nkuni pa kulama mudilo, ne pa kulama kipwano kikomo na Yehova napo mo monka, bilomba kwifunda nyeke myanda yandi.​—Nkindi 2:1-5.

11. Le byowifunda mu Bible bikakulengeja wiivwane namani?

¹¹ Poenda wifunda Bible, ukayuka myanda ikatenga bininge mutyima obe. Tala mwēivwanine bana ba bwanga babidi ba Yesu paēbashintulwidile bupolofeto bwa mu Bible. Bānenene amba: “Le mityima yetu keyadipo itēma mudilo munda mwetu paadi wisamba netu mwishinda, paadi witupūtwila ne pa mfulo Bisonekwa?”​—Luka 24:32.

12, 13. (a) Le buswe botusenswe Leza bubwanya kwikala namani? (b) I muswelo’ka otubwanya kulama nyeke buswe botusenswe Yehova?

 ¹² Monka mwātengēlwe mityima ya bano bana ba bwanga kitatyi kyobāivwanije Bisonekwa, padi ye moweivwanine nobe powashilwile kwivwanija Bible. Kino kyakukweshe uyuke Yehova ne kumusanswa. Kusakilepo buno buswe butalale.​—Mateo 24:12.

¹³ Byokodi mulunda na Leza, bikulomba kulonga bukomo bwa kukomeja nyeke kipwano kyobe. Ufwaninwe kwifunda nyeke myanda yandi ne myanda ya Yesu ne kulangulukila pa byowifunda ne pa muswelo obwanya kwibingidija mu būmi bobe. (Yoano 17:3) Potanga Bible ne kwifunda’ye, wiipangule amba: ‘Le ino myanda ibamfundija bika padi Yehova Leza? Mwanda waka mfwaninwe kumusanswa na mutyima wami onso ne na muya wami onso?’​—1 Temote 4:15.

14. Lelo milombelo itukwashanga namani tulame buswe botusenswe Yehova?

 ¹⁴ Shi udi na mulunda wa pa mutyima, wisambanga nandi kitatyi ne kitatyi, kadi kino kikomejanga kipwano kyenu. Muswelo umo onka, shi twisamba na Yehova kitatyi ne kitatyi mu milombelo, tukalama nyeke buswe botumusenswe. (Tanga 1 Tesalonika 5:17.) Milombelo i kyabuntu kilēme kadi kiyampe kitupele Tata wetu wa mūlu. Tufwaninwe kwisamba nandi nyeke na mutyima umo. (Ñimbo ya Mitōto 62:8) Ketufwaninwepo kukwatyila milombelo yetu ku mutwe. Bine, shi twifunde nyeke Bible ne kulombela na mutyima umo, tukalama nyeke buswe botusenswe Yehova.

15, 16. Le umonanga namani mwingilo wa busapudi?

¹⁵ Shi tusaka kwikala nyeke pabwipi na Yehova, tufwaninwe kusapwila bantu bakwabo byobya byotukulupile. Kusapwila bantu bakwabo myanda ya Yehova i dyese dikatampe. (Luka 1:74) Kadi kusapula i kiselwa kyāpēne Yesu ku bene Kidishitu bonso ba bine. Batwe bonso tufwaninwe kusapula myanda miyampe ya Bulopwe bwa Leza. Lelo kodi mushilule kala kusapula?​—Mateo 24:14; 28:19, 20.

¹⁶ Mutumibwa Polo wādi umwene amba mwingilo wa busapudi i mulēme nakampata; wēwityile bu “kyabulēme.” (2 Kodinda 4:7) Kusapwila bantu myanda ya Yehova ne mpango yandi i mwingilo wa mvubu mpata ofwaninwe kwingila. I muswelo umo okokeja kwingidila Yehova, kadi nandi umwene na mvubu byobya byomulongela. (Bahebelu 6:10) Shi usapula, ubwanya kumwena’mo abe ne boba bakwivwana, mwanda ukwashanga bantu bakwabo ne abe mwine mufwene kudi Yehova ne kukamona būmi bwa nyeke. (Tanga 1 Kodinda 15:58.) Lelo kudi mwingilo mukwabo ubwanya kukuletela nsangaji mu būmi pamo bwa uno?

17. Mwanda waka mwingilo wa busapudi i wa kwingila bukidibukidi?

 ¹⁷ Mwingilo wa busapudi i wa kwingila bukidibukidi. Tufwaninwe ‘kusapula kinenwa,’ ne ‘kupyasakena’mo.’ (2 Temote 4:2) Bantu basakilwa kwivwana musapu wa Bulopwe bwa Leza. Bible unena’mba: “Difuku dikatampe dya Yehova dibafwena! Dibafwena kadi difwenanga lubilo!” Mfulo ‘keisapo kwija!’ (Zefenia 1:14; Habakuka 2:3) Bine, panopano ponka Yehova usa konakanya ntanda mibi ya Satana. Kumeso kwa kwiyonakanya, bantu bafwaninwe kudyumunwa mwanda wa batonge shi basaka kwingidila Yehova.

18. Mwanda waka tufwaninwe kutōta Yehova pamo na bene Kidishitu ba bine?

¹⁸ Yehova usakanga tumutōte pamo na bene Kidishitu ba bine. Bible unena’mba: “Twitei mityima batwe bene na bene mwanda wa kwikankamikila ku buswe ne ku mingilo milumbuluke, ne kuleka’byo kwibungila pamo kwetu mpika, na mwaibidila bamobamo, ino twikankamikei batwe bene na bene, nakampata pano pomwamona difuku dibafwena po pene.” (Bahebelu 10:24, 25) Tufwaninwe kulonga bukomo bwetu bonso bwa kutanwa ku kupwila konso. Kupwila kwitupanga mukenga wa kwikankamika ne kwikomeja batwe bene na bene.

19. I bika bibwanya kwitukwasha tusanswe batutu ne bakaka bene Kidishitu?

¹⁹ Shi utanwa ku kupwila, ukatana’ko balunda bayampe bakakukwasha utōte Yehova. Ukatana’ko batutu ne bakaka beshileshile, balonga bukomo bwa kutōta Yehova pamo bwa abe. Nabo i ba kubulwa kubwaninina pamo bwa abe, kadi baloñanga ne bilubo. Shi abakulubila, ikala na mutyima wa kwibalekela. (Tanga Kolose 3:13.) Tá nyeke mutyima ku ngikadila miyampe ya batutu ne bakaka bene Kidishitu. Kulonga namino kukakukwasha wibasanswe ne kufwena nyeke pabwipi na Yehova.

20, 21. Lelo “būmi bwinebwine” i būmi’ka?

²⁰ Yehova usakanga balunda nandi bonso bakamone būmi bulumbuluke. Bible witufundija’mba būmi bwa kumeso bukekala bwishile bininge na buno botudi nabo dyalelo.

²¹ Mu mafuku a kumeso, tukekala na būmi bwa nyeke ne nyeke, ke būmipo bwa myaka 70 nansha 80, aa. Tukasangela “būmi bwa nyeke” ne bukomo bwa ngitu bubwaninine, mu ndoe, ne nsangaji mu paladisa milumbuluke. Buno ye abo butela Bible bu “būmi bwinebwine.” Yehova i mulaye kwitupa buno būmi bwinebwine. Inoko tufwaninwe kulonga bukomo bwetu bonso bwa ‘kwibukwatyija pototo’ tamba’nka pano.​—1 Temote 6:12, 19.

22. (a) Le i muswelo’ka otubwanya ‘kukwatyija pototo būmi bwinebwine’? (b) Mwanda waka ketubwanyapo kupota būmi bwa nyeke?

²² Le i muswelo’ka otubwanya ‘kukwatyija pototo būmi bwinebwine’? Tufwaninwe kulonga “biyampe” ne kwikala “bampeta mu mingilo milumbuluke.” (1 Temote 6:18) Kino kishintulula’mba tufwaninwe kwingidija byobya byotwifunda mu Bible. Inoko, būmi bwinebwine ketukebumonepo pa bukomo bwa batwe bene. Ketubwanyapo kupota būmi bwa nyeke. I kyabuntu kya ku bitupu kipēne Yehova ku bengidi bandi ba kikōkeji, i “kanye ka ku buntu bitupu.” (Loma 5:15) Tata wetu wa mūlu usakanga bine kupa bengidi bandi ba kikōkeji kino kyabuntu.

23. Mwanda waka ufwaninwe kutonga butongi buyampe tamba’nka pano?

²³ Wiipangule amba, ‘Le ntōtanga Leza mwasakila?’ Shi ubamone amba kudi bikulomba kushinta, nankyo shinta bukidibukidi. Shi tukulupile mudi Yehova ne kulonga bukomo bwetu bonso mwanda wa kumukōkela, nabya Yehova ukekala kinyemeno kyetu. Ukapandija  bantu bandi ba kikōkeji pakafula ino ntanda mibi ya Satana. Ebiya Yehova uketwikadija nyeke ne nyeke mu Paladisa, monka mwaetulaile’kyo. Bine, ubwanya kukekala na būmi bwinebwine shi utonge butongi buyampe dyalelo!