1, 2. Nkuepi kutudi mua kupetela bukubi lelu?

FUANYIKIJA ne: udi mu njila ne kudi tshipepele tshikole tshia mvula. Diulu didi dituadija kufikuluka, mipenya idi yela ne makubakuba adi atuadija kudila. Mutantshi eu mvula udi utuadija kuloka. Udi ukeba muaba wa kubuela. Udi umvua bimpe paudi upeta ndekelu wa bionso muaba mume wa kusokomena!

² Tudi mu nsombelu wa muomumue lelu. Malu adi enda anyanguka bikole pa buloba. Udi mua kudiebeja ne: ‘Nkuepi kundi mua kupetela bukubi?’ Mufundi wa Misambu wakafunda ne: “Nengambile Yehowa ne: ‘Wewe udi tshinyemenu tshianyi ne muaba wanyi mukolesha wa kusokomena, Nzambi wanyi undi mueyemene.’” (Misambu 91:2) Eyowa, Yehowa udi mua kutupesha disulakana ku ntatu itudi nayi mpindieu, ne udi utupesha ditekemena dilenga bua matuku atshilualua.

3. Mmushindu kayi utudi mua kuvuija Yehowa tshinyemenu tshietu?

³ Mmushindu kayi udi Yehowa mua kutukuba? Udi mua kutuambuluisha bua kutantamena lutatu kayi luonso lutudi nalu, ne udi ne bukole bua bungi kupita muntu kayi yonso udi musue kutuenzela bibi. Nansha bualu bubi buobu butufikile lelu, tuikale bashindike ne: Yehowa nealongolole nsombelu eu mu matuku atshilualua. Bible udi utukankamija ne: “Nudilame mu dinanga dia Nzambi.” (Yuda 21) Tudi ne bua kushala pabuipi ne Yehowa bua atuambuluishe mu bikondo bikole. Kadi ntshinyi tshitudi mua kuenza bua kushala pabuipi nende?

4, 5. Mmushindu kayi udi Yehowa muleje mudiye mutunange?

⁴ Bua tuetu kushala pabuipi ne Yehowa, tudi ne bua kujingulula mudiye mutunange bikole. Ela meji bua malu onso akadi Yehowa mutuenzele. Mmutupeshe buloba bulenga ne mmubuwuje ne mitshi ne bisonsa bimpe ne nyama. Mmutupeshe kabidi biakudia bimpe ne mâyi mimpe. Ku diambuluisha dia Bible, Yehowa mmutulongeshe dîna diende ne ngikadilu yende mimpe. Kupita bionso, mmuleje mudiye mutunange pavuaye mutume Muanende munanga Yezu pa buloba bua kutufuila. (Yone 3:16) Bua mulambu eu, tudi batekemene malu mimpe menemene kumpala eku.

⁵ Yehowa mmuenze Bukalenge bua Masiya, mbulamatadi wa mu diulu wikala ne bua kujikija makenga onso mu katupa kîpi emu. Bukalenge ebu nebuvuije buloba mparadizu muikala muntu yonso mua kusomba mu ditalala ne disanka bua kashidi. (Misambu 37:29) Mushindu mukuabu udi Yehowa muleje mudiye mutunange mpadiye utulongesha mua kuikala ne nsombelu muimpe mpindieu. Udi kabidi utulomba bua tuikale tumusambila, ne udi misangu yonso pabuipi bua kuteleja masambila etu. Yehowa mmuleje patoke mudiye munange yonso wa kutudi.

6. Ntshinyi tshitudi ne bua kuenza bua mudi Yehowa mutunange?

⁶ Ntshinyi tshitudi ne bua kuenza bua mudi Yehowa mutunange? Muleja muudi wanyisha bionso bidiye mukuenzele. Bia dibungama, bantu ba bungi lelu kabena ne dianyisha to. Ke muvuabi kabidi pavua Yezu pa buloba. Dimue dituku, Yezu wakondopa bena nsudi dikumi, kadi anu umue ke uvua mumuele tuasakidila. (Luka 17:12-17) Tudi basue kuikala bu muntu uvua muele Yezu tuasakidila au. Tudi basue kuikala tuela Yehowa tuasakidila misangu yonso.

7. Mmushindu kayi utudi ne bua kunanga Yehowa?

⁷ Tudi kabidi ne bua kuleja mutudi banange Yehowa. Yezu wakambila bayidi bende ne: badi ne bua kunanga Yehowa  ne muoyo wabu wonso ne anyima wabu yonso ne lungenyi luabu luonso. (Bala Matayi 22:37.) Bidi biumvuija tshinyi?

8, 9. Mmunyi mutudi mua kuleja Yehowa ne: tudi bamunange?

⁸ Kuamba patupu ne: tudi banange Yehowa nkukumbane anyi? Tòo. Tuetu banange Yehowa ne muoyo wetu wonso, anyima wetu yonso, ne lungenyi luetu luonso, netuleje mutudi bamunange ku malu atudi tuenza. (Matayi 7:16-20) Bible udi ulongesha patoke ne: tuetu banange Nzambi, netutumikile mikenji yende. Mbikole bua kuyitumikila anyi? Tòo, bualu ‘mikenji ya Yehowa kayena ne bujitu.’—Bala 1 Yone 5:3.

⁹ Patudi tutumikila Yehowa, tudi tupeta nsombelu muimpe wa disanka. (Yeshaya 48:17, 18) Kadi ntshinyi tshidi mua kutuambuluisha bua kushala pabuipi ne Yehowa? Tumonayi tshiatuambuluisha.

10. Bua tshinyi udi ne bua kutungunuka ne kulonga malu a Yehowa?

¹⁰ Mmunyi muudi mufike ku dikala mulunda wa Yehowa? Ku diambuluisha dia dilonga diebe dia Bible, uvua mufike ku dimanya Yehowa bimpe ne kudia nende bulunda. Bulunda ebu budi anu bu kapia kaudi musue bua katungunuke ne kutema. Anu bu mudi kapia dijinga ne nkunyi bua kutungunuka ne kutema, udi ne bua kutungunuka ne kulonga malu a Yehowa bua bulunda buenu bushale bukole.—Nsumuinu 2:1-5.

11. Malu audi ulonga mu Bible neakuenzele tshinyi?

¹¹ Paudi utungunuka ne kulonga Bible, neulonge malu a bungi alenga muoyo webe bushuwa. Mona muvua bayidi babidi ba Yezu badiumvue pavuaye ubumvuija mêyi a buprofete a mu Bible. Bakamba ne: “Mioyo yetu kayivua itema munda muetu pavuaye wakula netu mu njila, pavuaye utubuluila bimpe Mifundu anyi?”—Luka 24:32.

12, 13. a) Ntshinyi tshidi mua kuenzekela dinanga ditudi banange Nzambi? b) Ntshinyi tshitudi ne bua kuenza bua dinanga ditudi banange Yehowa dishale dikole?

 ¹² Anu bu muvuabi bilenge mioyo ya bayidi ba Yezu pavuabu bumvue Mifundu, uvua mua kuikala mumvue pebe disanka dia muomumue pauvua mutuadije kumvua malu a mu Bible. Bualu ebu buakakuambuluisha bua kumanya Yehowa ne kumunanga. Kulekedi dinanga edi dikepela to.—Matayi 24:12.

¹³ Paudi ulua mulunda wa Nzambi, udi ne bua kuenza muebe muonso bua bulunda buenu bushale bukole. Udi ne bua kutungunuka ne kulonga malu ende ne a Yezu ne kuela meji bua malu audi ulonga au ne muudi mua kuatumikila mu nsombelu webe. (Yone 17:3) Paudi ubala Bible anyi umulonga, diebeja ne: ‘Bualu ebu budi bundongesha tshinyi bua Yehowa Nzambi? Bua tshinyi ndi ne bua kumunanga ne muoyo wanyi wonso ne anyima wanyi yonso?’—1 Timote 4:15.

14. Mmushindu kayi udi disambila dilama dinanga ditudi banange Yehowa dikole?

 ¹⁴ Wewe muikale ne mulunda muimpe, nudi nuyukila pa tshibidilu ne bualu ebu budi bukolesha bulunda buenu. Bia muomumue, patudi tusambila Yehowa pa tshibidilu, tudi tushala bamunange bikole. (Bala 1 Tesalonike 5:17.) Disambila ndipa dia mushinga mukole dia kudi Tatu wetu wa mu diulu. Tudi ne bua kumusambila misangu yonso ne muoyo mujima. (Misambu 62:8) Katuena ne bua kuambulula masambila makuata ku muoyo to, kadi malu atudi tuamba mu disambila adi ne bua kufumina mu muoyo wetu. Eyowa, tuetu tutungunuka ne kulonga Bible ne tusambila ne muoyo mujima, dinanga ditudi banange Yehowa nedishale anu dikole.

15, 16. Mmushindu kayi uudi umona mudimu wa kuyisha?

¹⁵ Tuetu basue kutungunuka ne kuikala balunda ba Yehowa, tudi kabidi ne bua kuambila bantu bakuabu bua ditabuja dietu. Kuambila bantu bakuabu malu a Yehowa ndiakalenga dinene. (Luka 1:74) Kabidi, mmudimu uvua Yezu mupeshe bena Kristo balelela bonso. Yonso wa kutudi udi ne bua kuyisha lumu luimpe lua Bukalenge bua Nzambi. Ukadi mutuadije kuyisha anyi?—Matayi 24:14; 28:19, 20.

¹⁶ Mupostolo Paulo uvua wangata mudimu wa kuyisha ne mushinga wa bungi menemene; wakawubikila ne: “tshiuma.” (2 Kolinto 4:7) Kuambila bantu bakuabu malu a Yehowa ne tshidiye mulongolole ke mudimu mutambe buimpe uudi mua kuenza. Ngumue wa ku mishindu iudi mua kuenzela Yehowa mudimu, ne Yehowa udi wangata mudimu uudi umuenzela ne mushinga. (Ebelu 6:10) Kuyisha kudi kabidi mua kukuambuluisha wewe ne bantu badi bakuteleja bualu mmushindu wakuambuluisha wewe muine ne bantu bakuabu bua kudia bulunda ne Yehowa ne kupeta muoyo wa tshiendelele. (Bala 1 Kolinto 15:58.) Kudiku mudimu mukuabu udi mua kukupesha disanka dia bungi kupita mudimu eu anyi?

17. Bua tshinyi mudimu wa kuyisha ngua kuenza ne lukasa?

 ¹⁷ Mudimu wa kuyisha mmudimu wa kuenza ne lukasa. Tudi ne bua ‘kuyisha dîyi,’ ne tudi ne bua kudiyisha ‘katuyi tujingakana.’ (2 Timote 4:2) Bantu badi dijinga ne kumvua malu a Bukalenge bua Nzambi. Bible udi wamba ne: “Dituku dinene dia Yehowa didi pabuipi! Didi pabuipi ne didi disemena ne lubilu lukole!” Nshikidilu ‘kakujanguluka nansha!’ (Sefanya 1:14; Habakuka 2:3) Eyowa, mu katupa kîpi emu, Yehowa neabutule bulongolodi bubi bua Satana. Kumpala kua bualu ebu kuenzekabu, tudi ne bua kudimuija bantu bua bangate dipangadika dia kuenzela Yehowa mudimu.

18. Bua tshinyi tudi ne bua kutendelela Yehowa pamue ne bena Kristo balelela bakuabu?

¹⁸ Yehowa mmusue bua tumutendelele pamue ne bena Kristo balelela bakuabu. Bible udi wamba ne: “Tuelelanganayi kabidi meji bua kusakangana ku dinanga ne ku bienzedi bimpe, katuyi tulekela kudisangisha kuetu pamue, bu mudi tshilele tshia bakuabu, kadi tuikale tukankamijangana, ne tuenze nunku nangananga bu munudi numona dituku dienda disemena pabuipi.” (Ebelu 10:24, 25) Tudi ne bua kuenza muetu muonso bua kubuela mu bisangilu bionso. Bisangilu bidi bitupetesha mpunga wa kukankamijangana ne kukoleshangana.

19. Ntshinyi tshidi mua kutuambuluisha bua kunanga bena Kristo netu?

¹⁹ Paudi ubuela mu bisangilu, neupete balunda bimpe bakuambuluisha bua kutendelela Yehowa. Neutuilangane ne bana betu ba balume ne ba bakaji bashilashilangane badi benza muabu muonso bua kumutendelela anu muudi pebe wenza. Bualu bukuabu, mbapange bupuangane ne batu benza bilema anu bu wewe. Bobu benze bilema, ikala mudiakaje bua kubafuila luse. (Bala Kolosayi 3:13.) Ikala misangu yonso wimanyina pa ngikadilu mimpe ya bena Kristo nebe, bualu kuenza nunku nekukuambuluishe bua kubananga ne kukolesha bulunda buebe ne Yehowa.

20, 21. “Muoyo wa bushuwa” ntshinyi?

²⁰ Yehowa mmusue bua balunda bende bonso bikale ne nsombelu muimpe. Bible udi utulongesha ne: nsombelu wetu wa matuku atshilualua neikale mushilangane bikole menemene ne utudi nende mpindieu.

²¹ Mu matuku atshilualua netuikale ne muoyo kashidi, katuyi tulala anu bidimu 70 anyi 80 to. Netuikale ne “muoyo wa tshiendelele,” ne makanda a mubidi tumatuma, ne ditalala, ne disanka mu mparadizu mulenga. Ke tshidi Bible ubikila ne: “Muoyo wa bushuwa.” Yehowa mmulaye bua kutupesha muoyo wa bushuwa eu, kadi tudi ne bua kuenza muetu muonso mpindieu bua ‘kuwukuata bikole.’—1 Timote 6:12, 19.

22. a) Tudi ne bua kuenza tshinyi bua “kukuata muoyo wa bushuwa bikole”? b) Bua tshinyi katuena bakumbanyine muoyo wa tshiendelele?

²² Tudi ne bua kuenza tshinyi bua “kukuata muoyo wa bushuwa bikole”? Tudi ne bua ‘kuenza malu mimpe’ ne ‘kuikala babanji mu midimu mimpe.’ (1 Timote 6:18) Bidi bileja ne: tudi ne bua kutumikila malu atudi tulonga mu Bible. Kadi katuena tupeta muoyo wa bushuwa ku madikolela etu nkayetu to. Mu bulelela, katuena bakumbanyine muoyo wa tshiendelele to. Ndipa dia tshianana didi Yehowa upesha bena mudimu bende ba lulamatu, umue mushindu wa kuleja “ngasa” wende. (Lomo 5:15) Tatu wetu wa mu diulu mmusue bushuwa kupesha bena mudimu bende ba lulamatu dipa edi.

23. Bua tshinyi udi ne bua kuangata mapangadika mimpe mpindieu?

²³ Diebeja ne: ‘Ndi ntendelela Nzambi mu mushindu udiye wanyisha anyi?’ Wewe mumone ne: udi ne bua kuenza amue mashintuluka, udi ne bua kuenza ne lukasa. Patudi tueyemena Yehowa ne tuenza muetu muonso bua kumutumikila, Yehowa udi ulua tshinyemenu tshietu. Neakube  bantu bende badi ne lulamatu mu matuku a ku nshikidilu kua bulongolodi bubi bua Satana. Pashishe Yehowa neenze bua tuikale ne muoyo kashidi mu Mparadizu anu bu mudiye mulaye. Eyowa, udi mua kupeta muoyo wa bushuwa wewe wangata mapangadika mimpe mpindieu.