1, 2. Kulihi tunahase kuwana mukingo makumbi ano?

ACHISHINGANYEKE uli nakutambuka ungeji, kaha kukasumuka kunaputuka kuhuhwa peho yayinene. Nakushimbula chiku, kwilu kwosena milima kaha kokolo. Miveso hinayiputuka kuvesa, mikalateta hinayiputuka kuvuma, kaha vula yayinene hinayiputuka kunoka. Hinautondatonda kwakuswama. Ocho kuwaha kana nawivwa nge unawane mwakuswama!

² Tuli nakuyoyela mulwola lwalukalu lwakufwana nge elu. Vyuma mukaye vili nakupihilako lika. Oloze unahase kulihulisa ngwove, ‘Kulihi ngunahase kuwana mukingo?’ Muka-kwimba jisamu asonekele ngwenyi: “Nangwamba kuli Yehova ngwami: ‘Ove yove uchinyino wami, yove chihela chami chakukola, yove Kalunga kami uze ngwafwelela.’” (Samu 91:2) Eyo, Yehova nahase kutukafwa nge tuli muukalu oholyapwa kaha nawa atuhana lutalililo lwavyuma vyamwaza vyakulutwe.

3. Vyuma muka twatela kulinga numba Yehova atukinge?

³ Uno Yehova nahase kutukinga ngachilihi? Nahase kutukafwa tumike mukala ukalu tuli nakuhitamo kaha nawa apwa wangolo kuhambakana kala mutu uze mwasaka kutulemeka. Numba nge vyuma vyavipi navitusolokela oholyapwa, oloze twatela kutachikiza ngwetu kulutwe Yehova mwakavifumisako. Ngocho twatela kupandama kuli Yehova numba atukafwe tumike muukalu tuli nakuhitamo. Mbimbiliya yatukolezeza ngwayo: ‘Twamenunga muzangi yaKalunga.’ (WaYuta 21) Uno tunahase kupandama ngachilihi kuli Kalunga?

4, 5. Yehova asolola ngachilihi nge atuzanga?

⁴ Nge natutachikiza ngwetu Yehova atuzanga chikuma,  kaha natupandama kuli ikiye. Achishinganyeke havyuma vyosena vize atulingila Yehova. Atuhana mavu ano twatwamaho nakuhakaho mitondo yakulisezaseza yamwaza natunyama. Atuhana nawa vyakulya viyema vyamwaza, nameya. Yehova atulweza lijina lyenyi navilinga vyenyi vyamwaza kuhichila muMbimbiliya. Kaha nawa atusolwelele zangi yayinene hakututumina Mwanenyi uze azanga chikuma kwiza hano hamavu nakutufwila. (Yowano 3:16) Kufwa chaYesu chatulingisa tupwenga nalutalililo lwamwaza lwakulutwe.

⁵ Yehova atuhana nawa Wangana wauMeshiya uze wapwa fulumende yamwilu, kaha kalinwomu ufumiseko kuyanda chosena. Ou Wangana naukalingisa mavu kupwa palachise, kaha vatu vosena navakatwama mukuunda nakupwa vakuwahilila haya myaka yosena. (Samu 37:29) Yehova atusolwela nawa zangi hakutunangula mwakuyoyela kanawa oholyapwa. Atulweza tulombenga kuli ikiye kaha nawa eji kwivwililanga kukulomba chetu lwola lwosena. Chikupu vene, Yehova asolola hatoma nge atuzanga tuvosena.

6. Vyuma muka watela kulinga mangana wakule kuzangi yaYehova?

⁶ Vyuma muka watela kulinga mangana wakule kuzangi yaYehova? Watela kumusakwilila havyuma vyosena akulingila. Chaluvinda, vatu vavavulu makumbi ano kaveshi kusakwilila Yehova havyuma avalingilako. Omu mukiko valingilenga vatu nahalwola luze Yesu apwile hano hamavu. Lwola lumwe omu Yesu ahindwile vaka-mbumba 10, umwe kaha ikiye amusakwililile. (Luka 17:12-17) Oloze etu twatela kulondezeza uze lunga asakwililile Yesu. Twatela kusakwililanga Yehova lwola lwosena.

7. Uno Yehova twatela kumuzanga ngachilihi?

⁷ Twatela nawa kuzanga Yehova. Yesu alwezele tumbaji twenyi ngwenyi vatela kuzanga Yehova namichima yavo yosena, namyono yavo yosena, navishinganyeka vyavo vyosena. (Tanga Mateu 22:37.) Uno echi chalumbununa ika?

8, 9. Natusolola ngachilihi ngwetu twazanga Yehova?

 ⁸ Uno twatela kuhanjika kaha hakanwa ngwetu twazanga Yehova nyi? Nduma. Kuzanga Yehova namichima yetu yosena, namyono yetu yosena, navishinganyeka vyetu vyosena twatela kuchisolola muvilinga. (Mateu 7:16-20) Mbimbiliya yatulweza ngwayo, nge twazanga Kalunga, kaha natukavangizanga jishimbi jenyi. Uno kulinga ngocho chapwa chachikalu tahi? Nduma, mwomwo ‘jishimbi jaYehova kajapwa nge hichiteliko.’—Tanga WaYowano 1, 5:3.

⁹ Nge natwononokanga Yehova, kaha natupwanga vakuwahilila nakusuuluka mukuyoya. (Isaya 48:17, 18) Uno vyuma muka navitukafwa tupandame kuli Yehova? Tushimutwile vyuma kana.

10. Mwomwo ika watela kutwalaho lika kulinangula vyaYehova?

¹⁰ Uno waputukile ngachilihi kupwa usepa lyaYehova? Kulinangula Mbimbiliya chikiko chinakukafwe utachikize kanawa Yehova nakutunga jino usepa naikiye. Ou usepa wapwa nge kakahya kaze watela kutwalaho lika kusambiza. Ngana muze kakahya kasakiwa kukasambiza numba katwaleho lika kukwata, nayove nawa watela kutwalaho lika kulinangula vyaYehova numba usepa wove naikiye upwenga wakukola.—Vishimo 2:1-5.

11. Uno vyuma naulinangulanga muMbimbiliya navikukafwa ngachilihi?

¹¹ Nge nautwalaho lika kulinangula Mbimbiliya, kaha nautachikiza vyuma vyavivulu vize navikukunyula. Achitale omu tumbaji twaYesu vavali vevwile omu Yesu avalumbunwinyine upolofweto wamuMbimbiliya. Vambile ngwavo: “Uno katwapwanga nakwivwa hyangu kumichima yetuko omu apwanga nakuhanjika kuli etu mujila, nomu apwanga nakutulumbunwina Visoneka nyi?”—Luka 24:32.

12, 13. (a) Vyuma muka vinahase kusoloka kuzangi yetu yakuzanga Kalunga? (b) Vyuma muka navitukafwa tutwaleho lika kuzanga Yehova?

 ¹² Nayove pamo wevwile hyangu kumuchima omu waputukile kwivwishisa Mbimbiliya ngana muze chapwile kuli tumbaji omu vevwishishile Visoneka. Kahechi chinakukafwe utachikize Yehova nakumuzanga. Ngocho kawatela kwechelela eyi zangi yiholeko.—Mateu 24:12.

¹³ Nge unatungu lyehi usepa naKalunga, watela kuzata nangolo mangana usepa kana ukole. Watela kutwalaho lika kulinangula vyaikiye naYesu nakushinganyekanga havyuma uli nakulinangula nomwo unahase kuvizachisa mukuyoya chove. (Yowano 17:3) Omu nautanganga Mbimbiliya chipwe kulinangulayo, watela kulihulisanga ngwove: ‘Uno ou mujimbu uli nakungunangula vyuma muka hali Yehova Kalunga? Mwomwo ika ngwatela kumuzangila namuchima wami wosena, namwono wami wosena?’—WaChimoteu 1, 4:15.

14. Uno kulomba nachitukafwa ngachilihi tuzange chikuma Yehova?

 ¹⁴ Chakutalilaho, nge uli nasepa wamwenemwene, weji kuhanjikanga nenyi lwola lwosena. Kahechi cheji kulingisanga usepa wenu ukole. Chochimwe nawa, kulomba kuli Yehova lwola lwosena cheji kutulingisanga tumuzange chikuma. (Tanga Wavaka-Tesolonyika 1, 5:17.) Kulomba chapwa wana waulemu uze vatuhana kuli Setu wamwilu. Ngocho twatela kuhanjikanga naYehova lwola lwosena kufuma kumichima yetu. (Samu 62:8) Katwatela kuhilukila hilukila mazu wowamwe akulamina mumutwe hakulombako, oloze twatela kulomba kufuma kumichima yetu. Eyo, nge natutwalaho lika kulinangula Mbimbiliya nakulombanga kuli Yehova kufuma kumichima yetu, kaha natumuzanga chikuma.

15, 16. Uno mulimo wakwambulula waumona ngachilihi?

¹⁵ Hakusaka tupandame lika kuli Yehova, twatela kulwezako vakwetu vyuma twafwelela. Chapwa hikutokwa chachinene kulwezako vakwetu vyaYehova. (Luka 1:74) Ou ukiko mulimo ahanyine Yesu vaka-Kulishitu vamuchano vosena vazatenga. Shikaho, tuvosena twatela kwambululanga mujimbu wamwaza Wangana waKalunga. Uno unaputuka lyehi kulinga ngocho tahi?—Mateu 24:14; 28:19, 20.

¹⁶ Kaposetolo Paulu amwene mulimo wakwambulula kupwa waulemu, kaha auvulukile ngwenyi wapwa ‘luheto.’ (Wavaka-Kolinde 2, 4:7) Mulimo wakulwezako vakwenu vyaYehova navyuma ajina wapwa waulemu chikuma. Eyi hijila yimwe nausolwelamo ngwove uli nakuzachila Yehova, kaha Kalunga mwawahilila nge naulinga ngocho. (WavaHepeleu 6:10) Kwambulula chinahase nawa kukunganyalisa ove navaze navakwivwilila. Nachimilingisa muvosena mupandame kuli Yehova nakukapwa nakuyoya chahaya myaka yosena. (Tanga Wavaka-Kolinde 1, 15:58.) Kakweshi mulimo weka uze naukusuulwisa chikuma kuhambakana mulimo kanako.

17. Mwomwo ika twatela kwanguhwisa kwambulula mujimbu wamwaza?

 ¹⁷ Twatela kwanguhwisa kwambulula mujimbu wamwaza. Mbimbiliya yatulweza ngwayo twatela ‘kwambulula mazu nakwanguhwisa.’ (WaChimoteu 2, 4:2) Vatu vatela kutachikiza Wangana waKalunga. Mbimbiliya yamba ngwayo: “Likumbi lyaYehova lyalinene lili hakamwihi. Lili hakamwihi, kaha lili nakwiza washiwashi.” Yamba nawa ngwayo kukuma chakaye “kacheshi kukakotokelako.” (Zefwanyiya 1:14; Hambakuke 2:3) Eyo, kalinwomu Yehova anongese kaye kaSatana kakapi. Shikaho shimbu kanda chuma kana chisoloke, twatela kuhuhumuna vatu mangana vasakule kuzachila Yehova.

18. Mwomwo ika twatela kulemesela Yehova hamwe navakwetu vaka-Kulishitu vamuchano?

¹⁸ Yehova asaka tumulemeselenga hamwe navakwetu vaka-Kulishitu vamuchano. Mbimbiliya yamba ngwayo: “Tulihakenunga michima navakwetu mangana tulikolezeze tusolole zangi navilinga vyamwenemwene. Kaha kanda natusuvilila kulikungulwila hamweko, nganomu vatu vamwe vatwama nachijililo kana, oloze tulikolezezenunga navakwetu, chikumanyi omu munamono ngwenu likumbi kana linapandama kwakamwihi.” (WavaHepeleu 10:24, 25) Ngocho twatela kufwila kuyanga kukukunguluka chosena. Kupwanga kukukunguluka cheji kutulingisanga tulikolezeze nakulijikijisa navakwetu.

19. Vyuma muka navitukafwa tuzange vandumbwetu?

¹⁹ Nge nauyanga kukukunguluka, naukawanako masepa vamwenemwene vaze navakukafwa ulemese Yehova. Mukawana vandumbwetu vakulisezaseza vaze vafwila kulemesa Yehova ngana mwayove. Navakiko kavakupukako kaha nawa veji kulimbenjanga. Ngocho nge vanakwivwisa kupihya, kaha watela kuvakonekela. (Tanga Wavaka-Kolose 3:13.) Watela kutalanga kaha havilinga vyavo vyamwaza lwola lwosena. Nge naulinganga ngocho, kaha nauvazanga nakupandama chikuma kuli Yehova.

20, 21. Uno ‘kuyoya chamwenemwene’ chikiko chika?

²⁰ Yehova asaka masepa jenyi vosena vapwenga nakuyoya chamwenemwene. Mbimbiliya yatunangula ngwayo kuyoya chetu nachikawaha kulutwe kuhambakanomu chili makumbi ano.

²¹ Kulutwe natukayoya haya myaka yosena, keshi myaka 70 chipwe 80 kahako. Natukalivwisa kuwaha ‘kuyoya chahaya myaka yosena’ chakuzeneka misongo kaha nawa natukatwamanga mukuunda nakuwahilila mupalachise. Kuyoya kana vachivuluka muMbimbiliya ngwavo ‘kuyoya chamwenemwene.’ Yehova atushika kukatuhana kuyoya kana. Oloze twatela kuzata nangolo oholyapwa mangana ‘tulinjilile’ kukuyoya kana.—WaChimoteu 1, 6:12, 19.

22. (a) Uno tunahase ngachilihi “kulinjilila kukuyoya chamwenemwene”? (b) Mwomwo ika kuyoya chahaya myaka yosena kachapendamina hakukilikita chetuko?

²² Uno tunahase ngachilihi “kulinjilila kukuyoya chamwenemwene”? Twatela ‘kulinganga mwamwaza’ nakupwa “navilinga vyamwenemwene vyavivulu.” (WaChimoteu 1, 6:18) Echi chalumbununa nge twatela kukavangizanga vyuma tweji kulinangulanga muMbimbiliya. Chipwe ngocho, echi kuyoya chamwenemwene navakatuhana kachapendamina hakukilikita chetuko. Chapwa wana wakanyombo uze Yehova mwakahana vangamba jenyi vakushishika mwomwo ‘yalikoji lyenyi lyalinene.’ (Wavaka-Loma 5:15) Eyo, Setu wamwilu asaka chikupu kuhana vangamba jenyi vakushishika wana kana.

23. Mwomwo ika watela kulingilanga vyuma vyamwaza oholyapwa?

²³ Lihulise ngwove, ‘Uno nguli nakulemesa Kalunga mujila yize asaka tahi?’ Nge unamono ngwove kuli vyuma vimwe watela kwalumunako mukuyoya chove, kaha watela kulinga ngocho chakuzeneka kulangisa. Nge natupendamina hali Yehova nakumwononoka, kaha mwapwa uchinyino  wetu. Mwatukinga mumakumbi ano akukuminyina akaye kano kakapi kaSatana. Kaha kulutwe mwakatwingisa muPalachise muze natukatwama haya myaka yosena nge muze atushika. Eyo, nge naulinganga vyuma vyamwaza oholyapwa, kaha naukapwa nakuyoya chamwenemwene.