1, 2. Nĩkũ tũũmba gwiciitha naarua?

 ŨTHŨGAANĨRIA ũrĩ njĩrene ntukũ ĩrĩ na kiurutani gĩkĩnene. Matu jakaambia gũtumana, ndweni ikaambia gũtemana, nayo ngorogoro ĩkaambia kũringa. Ntũti mbura ĩkaambia gwĩtĩka. Ũkageria gũcwaa antũ arĩa wiciitha. Ũũmba kwigua uurũki atĩa rĩrĩa wona antũ aeega gũtĩkuura!

² Naarua no u mantũ jakari. Nthĩgũrũ neka ĩgwĩta ĩkĩthũũkaga. Womba gũciũria, ‘Nĩkũ mpũmba gwiciitha?’ Mwandĩki wa Bibiria kĩrĩ Zaburi aandĩkĩre: “Nkauga atiri, untu bwa Mwathani, Niwe kimatuko giakwa, ningi niwe giciitho giakwa kia inya; Murungu wakwa uria mbitikitie.” (Zaburi 91:2) Ĩĩ, Jehova oomba gũtwaa kiurũko kuumania na mathĩĩna jeetũ naarua, na natwejaga wĩrĩgĩĩro bũthongi bwa ĩgiita rĩĩjĩte.

3. Nĩatĩa tũũmba kweethia Jehova kĩmatũko gĩetũ?

³ Nĩatĩa Jehova oomba kwaa giciitho gĩetũ? No atũteethie kũũmbana na thĩĩna o yonthe tũrĩ nayo, na arĩ na inya nkũrũki ya muntũ o wonthe ũũmba kũgeria gũtũthithĩria bũthũũku. Kinya ũntũ bũthũũku bũgatũkarĩkĩra nandĩ, twĩna mma ĩgiita rĩĩjĩte Jehova akathondeka bũrĩa bunthe bũthũũkĩtue. Bibiria ĩtwĩkagĩra inya: “Bwimenyagiire nikenda bukaraga bwendetwe ni Murungu.” (Juda 21) Nĩtũkũbatara gũkara akuĩ na Jehova kenda atũteethia ĩgiitene rĩa mathĩĩna. Ĩndĩ nĩatĩa tũũmba kũthithia ũu?

4, 5. Nĩatĩa Jehova onanĩtie natwendete twinthe?

⁴ Kenda tũkara akuĩ na Jehova, nĩtũkũbatara kũmenya atwendete bũng’ana. Ũthũgaanĩria jarĩa jonthe Jehova atũthithĩrĩtie. Natweete nthĩgũrũ ĩnthongi na amĩũjũria imera na nyomoo irĩ nkanya. Kinya natweete biakũrĩa bigũcema bwega na rũũjĩ rũũtheru rwa kũnyua. Gũkũrũkĩĩra Bibiria, Jehova natũritanĩte riĩtwa rĩawe na nkuma ciawe cia kũrigaria. Nkũrũki ya jonthe, naatwonerie wendo rĩrĩa aatũmĩre Jesũ, Mũtaana waawe ũrĩa endete nthĩgũrũne, akua nĩũntũ bwetũ. (Johana 3:16) Na tontũ bwa kĩgongwana kĩu, tũrĩ na wĩrĩgĩĩro bwa kũrigaria bwa ĩgiita rĩĩjĩte.

⁵ Jehova narũngĩkĩte Ũnene bwa Kĩmesia, thirikarĩ ya ĩgũrũ ĩrĩa ĩkathiria mĩthangĩko yonthe rua. Ũnene bwa Mũrungu bũkaethia nthĩgũrũ paradiso ĩrĩa o muntũ wonthe agatũũra arĩ na thĩĩrĩ na gĩkeno kenya na kenya. (Zaburi 37:29) Njĩra ĩngĩ Jehova atwonetie wendo, nĩ gũtũritana ũrĩa tũũmba gũtũũra na njĩra ĩnjega buru nandĩ. Kinya natwĩraga tũmũrombe na nendaga rĩonthe kũthikĩĩra maromba jeetũ. Jehova nonanĩtie buru natwendete twinthe.

6. Nĩatĩa ũũmba kwonania kinya gwe nwendete Jehova?

⁶ Ũbuĩrĩte kwonia Jehova atĩa nũmwendete? Mwonie ũrĩ na nkaatho tontũ bwa jarĩa jonthe akũthithĩrĩtie. Kĩeba nĩ atĩ, babaingĩ naarua batĩ ncũne. No u kwaarĩ rĩrĩa Jesũ aarĩ nthĩgũrũne. Ĩgiita rĩmwe Jesũ noorerie antũ ĩkũmi baarĩ na mũtigiri, ĩndĩ nĩ ũmwe akĩ wamũcookeerie nkaatho. (Luka 17:12-17) Tũrĩenda gũkara ta ntomũrũme ũu wacookeerie Jesũ nkaatho. Tũrĩenda gũcookagĩria Jehova nkaatho rĩonthe.

7. Tũbuĩri kwenda Jehova bũng’ana?

 ⁷ Kinya twĩ nĩtũkũbatara kwonia Jehova nĩtũmwendete. Jesũ eerĩre aritwa baawe no mwanka bende Jehova na nkoro yaao yonthe, na mwoyo jwaao junthe, na mathũgaanio jaao jonthe. (Thooma Mathayo 22:37.) Kũu nĩ kuuga atĩa?

8, 9. Nĩatĩa tũũmba kwonia Jehova nĩtũmwendete?

⁸ Nĩbũng’ani kuuga akĩ nĩtwendete Jehova? Arĩ. Kethĩra nĩtwendete Jehova na nkoro yeetũ yonthe, mwoyo, na mathũgaanio, tũkamwonia nĩtũmwendete gũkũrũkĩĩra mathithio jeetũ. (Mathayo 7:16-20) Bibiria ĩtũritanaga carũrũkũ atĩ kethĩra nĩtwendete Mũrungu, tũkaathĩkĩra mawaatho jaawe. Bũu-rĩ, nĩ bũbũũmũ? Arĩ, tontũ maathana ja Jehova tĩ “jamarito.”—Thooma 1 Johana 5:3.

⁹ Rĩrĩa twathĩkĩra Jehova, nĩtwĩthagĩrwa na ũtũũro bũrĩ na kũgwĩrua na kũng’anĩrwa. (Isaya 48:17, 18) Ĩndĩ nĩmbi ĩgatũteethia gũkara akuĩ na Jehova? Tiga twone.

10. Nĩkĩ ũkũbatara gwĩta na mbere kwiritana bwegiĩ Jehova?

¹⁰ Nĩatĩa waaere mũcoore wa Jehova? Gũkũrũkĩĩra kwiritana Bibiria, nũmenyete Jehova nkũrũki na wakũria ũcoore amwe nawe. Ũcoore bũbũ bũkari ta mwanki ũtĩenda jwora. O ta ũrĩa mwanki jwendaga nkũ kenda jũtĩkoore, nũkũbatara gwĩta na mbere kwiritana bwegiĩ Jehova kenda ũcoore bwenu bwĩta na mbere kũgĩa inya.—Njuno 2:1-5.

11. Nĩatĩa mooritani ja Bibiria jagakũringithia?

¹¹ O ũrĩa ũgeeta na mbere kwiritana Bibiria, ũkamenya mantũ jagakũringithia nkoro mono. Ona ũrĩa aritwa baĩrĩ ba Jesũ baaigĩrue rĩrĩa Jesũ aabataaragĩĩria moororia ja Bibiria. Baaugĩre: “Nkoro cietu gaitigwakanaga riria atwariirie njirene, agitugwurira jaria jaandiki?”—Luka 24:32.

12, 13. (a) Nĩatĩa wendo bwetũ kĩrĩ Mũrungu bũũmba gũkara? (b) Nĩatĩa tũũmba gũtũũria wendo bwetũ kĩrĩ Jehova?

 ¹² O ta ũrĩa nkoro cia aritwa ciaaringithĩrue rĩrĩa baaciũkĩĩrwe nĩ Maandĩko, kwombĩka kinya gwe nĩu waigĩrue rĩrĩa waambĩrĩrie gũciũkĩrwa nĩ Bibiria. Bũu nĩbwagũteetherie kũmenya Jehova na kũmwenda. Ũtĩkwenda wendo bũũ bũgĩa mpio.—Mathayo 24:12.

¹³ Rĩrĩa waa mũcoore wa Mũrungu, nũkũbatara gũciũmia mono kenda ũcoore bwenu bũkara bũriki. No mwanka wĩte na mbere kwiritana bwegiĩ Mũrungu na Jesũ, na kũthũgaanĩria jarĩa ũkwiritana na ũrĩa ũũmba kũjatumĩra ũtũũrone bwaku. (Johana 17:3) Wathooma kana wairitana Bibiria ciũrie: ‘Nĩatĩa ũntũ bũũ bũkũnditana bwegiĩ Jehova? Nĩkĩ mbuĩri kũmwenda na nkoro yaakwa yonthe na mwoyo jwakwa junthe?’—1 Timotheo 4:15.

14. Nĩatĩa maromba jateethagia wendo bwetũ kĩrĩ Jehova bũkara bũriki?

 ¹⁴ Ũkeethĩrwa ũrĩ na mũcoore wa akuĩ, waragia nawe jamaingĩ, na bũũ bũtũmaga ũcoore bwenu bũkara bũrĩ na inya. O ta ũu, rĩrĩa twaragia na Jehova rĩonthe gũkũrũkĩĩra maromba, gũtũmaga wendo bwetũ kĩrĩ we bũkara bũriki. (Thooma 1 Athesalonike 5:17.) Maromba nĩ kiewa gĩa kũrigaria kuuma kĩrĩ Baaba weetũ wa ĩgũrũ. Nĩtũbuĩri kwaria nawe rĩonthe kuuma nkorone cietũ. (Zaburi 62:8) Tũtĩbuĩrĩte gũcookera maromba jarĩa twĩkĩte mũtwe, ĩndĩ tũbuĩrĩte kwĩthĩrwa na mma na jarĩa tũkuuga. Kethĩra tũgeeta na mbere kwiritana Bibiria na kũromba kuuma nkorone, wendo bwetũ kĩrĩ Jehova bũgakara bũriki.

15, 16. Nĩatĩa wonaga ngũgĩ ya gũtũmĩĩria ĩkari?

¹⁵ Kethĩra nĩtũkwenda gũkara akuĩ na Jehova, kinya nĩtũkũbatara kwaria na bangĩ bwegiĩ jarĩa twĩtĩkĩtie. Kwaria na bangĩ bwegiĩ Jehova nĩ wendeeri bũũthongi. Na nĩ ngũgĩ ĩrĩa Jesũ aaere Akristũ bonthe ba mma. O ũmwe kĩrĩ twĩ nabuĩrĩte gũtũmĩĩria nkuma ĩnjega ya Ũnene bwa Mũrungu. Nĩ wambĩrĩrĩtie kũthithia u?—Mathayo 24:14; 28:19, 20.

¹⁶ Mũtũmwa Paũlo noonaga ngũgĩ ya gũtũmĩĩria ĩrĩ ya gĩtũmi mono; aamĩĩtĩre ũntũ “buri bata.” (2 Akorintho 4:7) Kwĩra bangĩ bwegiĩ Jehova na mworoto jwawe nĩyo ngũgĩ ya bata nkũrũki ũũmba kũthithia. Nĩ njĩra ya gũtumĩkĩra Jehova, na atĩonaga bũrĩa ũkũmũthithĩria bũrĩ bwa ũtheri. (Ahibirania 6:10) Gũtũmĩĩria kinya no gũkũgune amwe na barĩa bagũkũthikĩĩra tontũ ũteethagia bangĩ, na ũgaiteethia gũkuĩĩria Jehova na kwona mwoyo jwa kenya na kenya. (Thooma 1 Akorintho 15:58.) Kũrĩ ngũgĩ ĩngĩ yũũmba gũkwaa kũng’anĩrwa nkũrũki?

17. Nĩkĩ ngũgĩ ya gũtũmĩĩria ĩkũbatara kũthithua na mpwĩ?

 ¹⁷ Ngũgĩ ya gũtũmĩĩria ĩrĩenda ĩthithua na mpwĩ. Nĩtũbuĩri ‘gutumiiria ruteto,’ na tũbuĩri kũthithia ũu “na wiru.” (2 Timotheo 4:2) Antũ nĩbakũbatara kwigua bwegiĩ Ũnene bwa Mũrungu. Bibiria yugaga: “Ntuku iu inene ya Mwathani iri akui, ithengerete nayo itigakarakara.” Mũthiro ‘juticererwa.’ (Zefania 1:14; Habakuku 2:3) Rua mono Jehova akenyangia nthĩgũrũ ĩjĩ ĩnthũũku ya Shaitani. Mbere ya bũu bũkarĩka, antũ nĩbabuĩri kwĩrwa nĩkenda bathithia ĩtua rĩa gũtumĩkĩra Jehova.

18. Nĩkĩ tũbuĩrĩte kũthaathayia Jehova amwe na Akristũ bangĩ?

¹⁸ Jehova arĩenda tũmũthaathayia amwe na Akristũ bangĩ ba mma. Bibiria yugaga: “Na tuciurageni mantu jetu, tukiumanagiiria, tukiendaga antu, tukithithagia mantu jaria jaagirite; na tugatigeni gutirimanaga amwe, ta uria antu bamwe batigite gutirimanaga, indi ni kaba twonanagiirie, na mono ni untu bwa uria bukwona ati ntuku iu ikuthengeera.” (Ahibirania 10:24, 25) Tũbuĩrĩte gũciũmia buru kwĩthĩrwa-o mĩcemanione yonthe. Mĩcemanio ĩtwejaga kaanya ga gwĩkanĩra inya na kũũmanĩĩria.

19. Nĩmbi yũũmba gũtũteethia kwenda ataana na aarĩ ba baaba beetũ Akristũ?

¹⁹ Weta mĩcemanione, ũkagĩa acoore babeega barĩa bagagũteethia kũthaathayia Jehova. Ũgacemania na ataana na aarĩ ba baaba mwanya mwanya, barĩa o ta ũũgwe bagũciũmia buru kũmũthaathayia. Na o ta ũũgwe, tĩ baboojũru na nĩbaatagia. Baatia, ĩthĩrwa na wendi bwa kũbarekera. (Thooma Akolosai 3:13.) Rĩonthe ciũmie kwona nkuma injega cia ataana na aarĩ ba baaba baaku Akristũ, tontũ kũthithia ũu gũgagũteethia kũbeenda na gũkuĩĩria Jehova nkũrũki.

20, 21. ‘Mwoyo juria juri jwa mma’ nĩmbi?

²⁰ Jehova arĩenda acoore baawe bonthe beethĩrwa na ũtũũro bũbwega ũrĩa kũũmbĩka. Bibiria ĩtũritanaga ĩgiita rĩĩjĩte ũtũũro bwetũ bũkethĩrwa bũrĩ mwanya buru na bwa nandĩ.

²¹ Ĩgiita rĩĩjĩte tũgatũũra kenya na kenya, tĩ mĩaka 70 kana 80 akĩ. Tũkagwĩrĩrua “mwoyo juria jutikorothira” tũrĩ na ũgima bũbũũjũru, thĩĩrĩ, na gĩkeno ndeene ya paradiso ĩnthongi. Jũu nĩjũ Bibiria ĩĩtaga ‘mwoyo juria juri jwa mma’ Jehova nekĩte wĩrane gũtwaa mwoyo jũu jwa mma, ĩndĩ no mwanka tũthithie bũrĩa bunthe tũkũũmba nandĩ, kenda ‘tujugwata’ tũjũrikĩtie.—1 Timotheo 6:12, 19.

22. (a) Nĩatĩa tũũmba kwona ‘mwoyo juria juri jwa mma?’ (b) Nĩkĩ tũtĩũmba kũrĩwa na mwoyo jwa kenya na kenya?

²² Nĩatĩa tũũmba kwona ‘mwoyo juria juri jwa mma?’ No mwanka ‘tuthithanagirie bwega.’ (1 Timotheo 6:18) Kũu nĩ kuuga nĩtũkũbatara kũthithia kũringana na jarĩa tũkwiritana Bibiriene. Ĩndĩ mwoyo jũrĩa jũrĩ jwa mma jũtĩkwĩrĩgĩĩra gũciũmia gwetũ twingwa. Tũtĩũmba kũrĩwa na mwoyo jwa kenya na kenya. Nĩ kĩewa gĩtĩna marĩi kĩrĩa Jehova aaete atũmĩkĩri baawe etĩkua, kĩrĩ ngerekano yaawe ya kwonania “utugi” bwawe bũrĩa tũtĩng’ani kwonua. (Aroma 5:15) Baaba weetũ wa ĩgũrũ nakwenda mono kwaa atumĩkĩri baawe etĩkua kĩewa gĩkĩ.

23. Nĩkĩ ũkũbatara kũthithia matua jarĩa jagĩrĩte nandĩ?

²³ Ciũrie, ‘Nĩnkũthaathayia Mũrungu na njĩra ĩrĩa agwĩtĩkĩĩria?’ Ũkeeja kwona nũkũbatara kũthithia mogarũrũku jamwe, nũbuĩri kũthithia u o rĩo. Twerĩgĩĩra Jehova na twathithia jarĩa jonthe tũkũũmba kenda tũmwathĩkĩra, Jehova akaa kĩmatũko gĩetũ. Agakaria antũ baawe etĩkua ĩgiitene rĩa ntukũ cia mũthia jwa nthĩgũrũ  ĩnthũũku ya Shaitani. Rĩu Jehova agatigĩĩra tũgũtũũra Paradiso kenya, o ta ũrĩa eranĩte. Nĩ mma, womba kũgĩa mwoyo jũrĩa jũrĩ jwa mma kethĩra ũkathithia matua jarĩa jagĩrĩte nandĩ!