1, 2. Uzye aekwi kuno tungazana umwakufisama ndakai?

ELENGANYINI ukuti muli pa lwendo. Panono sile, mwalola catandika ukufutika, inkuwa zyatandika ukumyansya, nu kupangalansya sana. Ni mvula yatandika ukutoonya. Lyene mwatandika ukulonda kuno mumauwa. Nanti ciye uli, mungatemwa sana ndi cakuti mwazana pano munguwa!

² Ndakai tukwikala umu nsita itale wakwe cimwi. Ivintu umu nsi yii vikuya vikwipilako sile. Cingalenga mwasakamala muti, ‘Aukwi kuno ningazana umwakufisama?’ Kalemba wa masamu walanzile ati: ‘Ndanena [Yeova] ukuti “Wewe uli cele lyane, muno nkauwa! Wewe Leza wane wino nataila.”’ (Masamu 91:2) Yeova angatwavwa ndi twaya ni ntazi, napya watunena nu kuti vintu vilazipa uku nkoleelo.

3. Tungacita uli pakuti Yeova atucingilila?

³ Uzye Yeova angatucingilila uli? Angatwazwa ukumanya ivyakucita ndi twaya nu wavya, napya wakwata sana amaka ukucila aliwensi angatucuzya. Nanti icipe cingatucitikila ndakai, twataila ukuti Yeova alasisyapo intazi uku nkoleelo. Baibo ikatukomelezya ukuti: “Ikalini mu kutemwa kwakwe Leza.” (Yuda 21) Pakuti Yeova atwavwa lino tuli ni intazi, tulinzile ukwikala umu kutemwa kwakwe. Nomba, tungacita uli vivyo?

4, 5. I nzila ci zimwi zino Yeova walangilamo ukuti watutemwa?

⁴ Pakuti tutwalilile ukupalama kuli Yeova, tulinzile  ukumanya vino watutemwa. Tale elenganyini ivintu wingi vino Yeova watucitila. Watupangila insi isuma, napya wikamo imiti isuma ni vinyama. Napya watupeela ivyakulya ivisuma cuze alino na manzi asuma yano tukamwa. Yeova watupeela na Baibo muno watulondolwela izina lyakwe ni miyele yakwe isuma cuze. Ni caluta pali vyonsi vii, i cakuti Yeova walangizye vino watutemwa lino watumile Yesu Umwana wakwe ukwiza pano nsi kuti aize atufwile. (Yoane 3:16) Pa mulandu wa wila kwene uwo, calenga tukwate utailo wakuti uku nkoleelo vintu vilazipa.

⁵ Yeova wapekanya uteeko wa mwiyulu, kuli kuti Uwene uukatekwa na Mesiya uulafumyapo ukucula konsi. Uwene uu ulalenga insi yonsi ukuya paladaise, muno umuntu wensi alaikala umutende ni nsansa amanda pe. (Masamu 37:29) Yeova akalanga ukuti watutemwa umu nzila na yuze, akatusambilizya vino tungacita pakuti twaya ni nsansa. Akatuneena nu kuti twapepa kuli aliwe, napya waipekanya lyonsi ukuvwa mapepo itu. Yeova walanga paswe ukuti waya nu kutemwa ku yantu yonsi.

6. Uzye mufwile ukucita uli pali vino Yeova wamutemwa?

⁶ Mungacita uli pali vino Yeova wamutemwa? Mwataizya pali vyonsi vino Yeova wamucitila. Icaipa i cakuti ndakai antu aingi yasitaizya. Vikwene avino cali na lino Yesu wali pano nsi. Insita imwi Yesu wapozizye antu ikumi alwile tembwe, nomba wenga sile u wamutaizye. (Luka 17:12-17) Tufwile ukuya wa monsi uwataizye kuli Yesu. Lyonsi kwene tulinzile ukulataizya kuli Yeova.

7. Uzye tufwile ukutemwa Yeova uli?

⁷ Tulinzile nu kulanga ukuti twatemwa Yeova. Yesu wanenyile asambi yakwe ukuti yafwile ukutemwa Yeova ni myenzo yao yonsi, nu umi wao onsi, na mano yao yonsi. (Welengini Mateo 22:37.) Uzye cico calola mwi?

8, 9. Uzye tungalanga uli ukuti twatemwa Yeova?

 ⁸ Uzye ukulanda sile ukuti twatemwa Yeova ala twamutemwa umu cumi? Awe. Ndi cakuti twatemwa Yeova nu mwenzo witu onsi, nu umi witu onsi, na mano itu yonsi, tulaacita ivintu vya kumuzanzya. (Mateo 7:16-20) Baibo ikatusambilizya ningo ningo ukuti ndi twatemwa Leza, tulaumvwila masunde yakwe. Uzye ukucita vivyo kwatala? Awe, pano ‘masunde yakwe Yeova yangupala.’—Welengini 1 Yoane 5:3.

⁹ Ndi cakuti tukuvwila Yeova, tungaaya ni nsansa nu umi usuma cuze. (Ezaya 48:17, 18) Nomba i cani icingatwazwa pakuti tupalame sana kuli Yeova? Lekini tusambilile.

10. U mulandu ci uno mulinzile ukutwalilila ukusambilila pali Yeova?

¹⁰ Cali uli pakuti muye cuza wakwe Yeova? Ukusambilila Baibo kwamwazwa ukumanya sana Yeova nu kulenga muye cuza wakwe. Ucuza uu waya wa moto uno mukulonda kuti utwalilile ukwaka. Wakwe vino umoto ukalondekwa ukulaikilapo inkwi pakuti utwalilile ukwaka, avino na ucuza winu na Yeova, pakuti wakomelako, mufwile ukutwalilila ukusambilila pali aliwe.—Mapinda 2:1-5.

11. Uzye vino Baibo ikasambilizya vilamwazwa uli?

¹¹ Lino mukutwalilila ukusambilila Baibo, mulamanya ivintu ivilalenga muye nu luzango cuze. Lolini vino asambi yaili pa yasambi yakwe Yesu yuvwile lino Yesu wayalondolwelanga masesemo aya muli Baibo. Yalanzile ukuti: “Uzye myenzo itu itali ikupya uku luzango lino wali akulanda naswe mu nzila, nu kutulondolwela Malembelo?”—Luka 24:32.

12, 13. (a) Uzye insita zimwi i cani icingacitika ku kutemwa kuno twatemwa Leza? (b) Uzye tungacita uli pakuti tutwalilile ukutemwa Yeova?

 ¹² Wakwe vino asambi yuvwile ningo lino yuvwikisye Malembelo, namwe kwene mufwile mwayuvwile ansansa lino mwatandike ukuvwikisya ningo Baibo. Kucita vii kwalenzile kuti mumanye Yeova nu kumutemwa. Mutange mulonde ukuti kutemwa kuu kuceepe.—Mateo 24:12.

¹³ Ndi cakuti mwaya yacuza yako Leza, mufwile ukuombesya pakuti ucuza winu utwalilile ukuya ukome lyonsi. Mulinzile ukutwalilila ukusambilila pali Yeova na Yesu, napya mwaelenganyapo pali vino mukusambilila na vino mungaviomvya mu umi winu. (Yoane 17:3) Lyonsi lino mwawelenga Baibo mwayuzya mweineco ukuti: ‘Uzye vii vikunsambilizya cani pali Yeova? U mulandu ci uno mfwile ukumutemwa nu mwenzo wane onsi nu umi wane onsi?’—1 Timoti 4:15.

14. Uzye ipepo likatwavwa uli ukutwalilila ukutemwa Yeova?

 ¹⁴ Ndi cakuti mwakwata cuza musuma, mukalanda nawe lyonsi; ukucita vi kukalenga kuti ucuza winu utwalilile ukukomelako. Naswe kwene ndi tukupepa kuli Yeova lyonsi, tulaamutemelwako sana. (Welengini 1 Tesalonika 5:17.) Ipepo u wila usuma cuze ukufuma kuli Tata witu wa mwiyulu. Tufwile ukulanda lyonsi kuli aliwe nu mwenzo onsi. (Masamu 62:8) Tutafwile ukulalanda ivilivimwi kwene lino tukupepa, nanti kusungila mapepo, lelo tufwile ukulanda ivili mu mwenzo. Ndi cakuti tukusambilila Baibo lyonsi nu kupepa nu mwenzo onsi, cilalenga kuti ukutemwa kuno twatemwa Yeova kukomeleko.

15, 16. Uzye mukalola uli mulimo wa kusimikila?

¹⁵ Cuze cino tufwile ukulacita ndi tukulonda ukupalama sana kuli Yeova, u kunenako yauze pali vino twasambilila pali aliwe. Ukunenako yauze pali Yeova i syuko likulu cuze. (Luka 1:74) Napya Yesu wapeezile mulimo uu ku Ina Klistu yonsi. Swensi kwene tulinzile ukulasimikila ilandwe lisuma ilya Wene Wakwe Leza. Uzye mwatandika mpiti ukuomba mulimo uu?—Mateo 24:14; 28:19, 20.

¹⁶ Umutumwa Paulo walolanga umulimo wa kusimikila ukuti wali ucindame sana; nupya wawamanga akuti i “cuma.” (2 Kolinto 4:7) Ukunenako antu pali Yeova na vino akalonda, aali mulimo ucindamisye uno mungaomba. Pano ndi mukuomba umulimo uu, ala mukuombela Yeova, nupya akataizya pali vino mukamuombela. (Ayebulai 6:10) Nakapya, ukukosoola kungamwazwa nu kwazwa yano yakuvwa kuli mwemwe, pano kungalenga kuti muye ya cuza yako Yeova, napya mungaca muye nu umi wa pe. (Welengini 1 Kolinto 15:58.) Uzye  kwaya umulimo uze ungamulenga ukuya ni nsansa kuluta pali uu?

17. U mulandu ci uno umulimo wa kusimikila upamvizye sana?

¹⁷ Mulimo wa kukosoola uupamvye sana. Tufwile ‘ukukosoola ilandwe,’ napya tufwile ‘ukukomaila penepo.’ (2 Timoti 4:2) Antu yalinzile ukusambilila pa Wene Wakwe Leza. Baibo ikalanda ukuti: “Uwanda ukulu wakwe [Yeova] uli mupipi, watiupalama, ala pasi pakukalauka ukufika!” Nupya, “wene ulafikiliziwa ukwaula kucelwa!” (Zefaniya 1:14; Habakuku 2:3) Likwene sile Yeova wasya aca onone antu aipe. Lino uwononesi utatala wiza, antu yafwile ukucelulwa pakuti yangasoolola ukuombela Yeova.

18. U mulandu ci uno tulinzile ukupepela Yeova pamwi na Ina Klistu yanji?

¹⁸ Yeova akaalonda ukuti twamupepa pamwi na ina Klistu yanji acumi. Baibo ikati: “Lekini twasakamalana nu kwazwana nu kutemwa ukucita visuma. Tutata kukongana pamwi, ndi vino yamwi yakucita. Lelo lekini twakomelezyanya, nu kuluta, pano mwati mulola ukuti wanda wa Mwene ukupalama pipi.” (Ayebulai 10:24, 25) Tufwile twaezya na maka yonsi ukulalongana lyonsi. Ukulongana kukalenga twaya ni syuko lya kukomelezyanya na ya kapepa yanji.

19. I cani cingatwazwa ukutemwa aina na ya nkazi?

¹⁹ Ndi cakuti mukulongana, mulazana ivyuza visuma ivilaamwazwa ukupepa Yeova. Mulazana aina na yankazi apusane-pusane, aika sana mano ku kupepa Yeova. Lelo nayo kwene yatamalilika wakwe vino namwe kwene mutamalilika, napya yakaluvyanya. Fwandi nga yamuluvyanya, mwayelela. (Welengini Kolose 3:13.) Lyonsi mwaika sana mano ukulola ivisuma vino aina na ya nkazi yakacita, pano ndi mukucita vivyo, cilalenga kuti mupalame sana kuli Yeova.

20, 21. Uzye “umi wa pe uwa cumi” kuli kutuuli?

²⁰ Yeova akalonda yacuza yakwe yonsi ukuya nu umi usuma sana. Baibo ikasambilizya ukuti uku nkoleelo tulaya nu umi usuma sana ukuluta uno twaya nao ndakai.

²¹ Umu mpanga ipya tutalaikala sile imyaka 70 nanti 80, lelo tulaikala manda pe. Tulaipakizya ukwikala “umi wape,” tulaya nu umi umalilike napya usuma, tulaikala umutende alino ni nsansa umu paladaise. Uu ali umi uno Baibo ika-ama ukuti “umi wa pe uwa cumi.” Yeova walaya ukutupeela umi wa pe uwa cumi, lelo tufwile ukuombesya likwene pakuti ‘tulonke’ umi kwene uu.—1 Timoti 6:12, 19.

22. (a) Uzye tungacita uli pakuti ‘tulonke umi wa pe uwa cumi’? (b) U mulandu ci uno tutange tukalile umi wa pe?

²² Uzye tungacita uli pakuti ‘tulonke umi wa pe uwa cumi’? Tufwile ‘ukucita ivisuma’ nu “kuya akama mu milimo isuma.” (1 Timoti 6:18) Cii cikupiliula kuti tufwile ukulacita vino tukusambilila muli Baibo. Lelo kwene tutange tuye nu umi wa pe uwa cumi ku maka itu. Tutange tukale umi wa pe. Umi u wila sile ukufuma kuli Yeova pa mulandu ni “cikuku” cino wakwatila aomvi yakwe acisinka. (Loma 5:15) Cumicumi Tata witu wa mwiyulu akalondesya ukupeela uwila uu ku yaomvi yakwe aakamuombela umu cumi.

23. U mulandu ci uno mulinzile ukusoolola ningo ivyakucita likwene?

²³ Mulinzile ukuyuzya mweineco muti, ‘Uzye nkapepa Leza kulingana na vino akalonda ukuti namupepa?’ Ndi cakuti mwazana kuti mulinzile ukwaluka muli vimwi, mukwai mutalema nu kwi sote ukucita vivyo. Ndi tukwezya na maka itu ukuvwila Yeova nu kumutaila, nawe alatucingilila. Alatwalilila ukucingilila aomvi yakwe acisinka mu manda yaa akusyalikizya umu nsi ii iipe yakwe  Satana. Lyene Yeova alatwingizya umu paladaise muno tulikala manda pe kulingana na vino watulaya. Kwaula nu kutwisika mulaya nu umi wa pe uwa cumi ndi cakuti mwasoolola ningo vyakucita likwene!