1, 2. Аралтышым кушто муын кертына?

ШОНАЛТЫЗА, пуйто те корнышто тӱтан мардежыш логалыда. Кава чот шемемеш, волгенче волгалт колта да кӱдырчӧ кӱдырта. Теве-теве тӱтан йӱр тарвана. Утаралт кодашлан те аралтышым кычалаш тӱҥалыда. Тыгай верым мумеке, те лыпланеда.

² Тачысе илышым тыгаяк тӱтан мардеж дене таҥастараш лиеш. Уло тӱня мучко илыш кажне кечын начаремеш. Очыни, те шонеда: полышым кушто кычал муаш лиеш? Псаломым возышо каласен: «Полшышем мыйын, Аралтышем мыйын, Юмо, Тый улат, мый Тыланет ӱшанем» (Псалом 90:2). Иегова чынжымак мемнан аралтышна, молан манаш гын тудо мыланна йӧсылыкнам сеҥаш полша да ончыкыжым сылне илыш лиеш манын ӱшаным пуа.

3. Иегова мемнан аралтышна лийже манын, мом ыштыман?

³ Илыш корныштына кеч-могай нелылык дене тӱкнена гынат, Иегова мыланна чылажымат чытен лекташ вийым пуа. Тудо кеч-могай тушманна деч ятыр виянрак. Мемнан илышыштына иктаж-могай шучко лийын колта гынат, ме ӱшанен кертына: ончыкыжым Иегова чылажымат тӧрлата.  Библий мемнам кумылаҥда: «Шкендам Юмын йӧратымаштыже кучыза» (Иудан 20, 21). Неле жап годым Иегова деч полышым налашлан, тудын дене эре лишыл лийман. Но кузе тидым ышташ?

4, 5. Иегова мемнам йӧратымыжым кузе ончыкта?

⁴ Иегова дене лишыл кылым йомдараш огыл манын, мыланна эре шарнаш кӱлеш, мыняр чот тудо мемнам йӧрата. Шоналтыза гына, мыняр шуко поро пашам тудо мыланна ыштен, мыняр пӧлекым пуэн: чапле Мландым, ӧрыктарыше кушкыл ден тӱрлӧ янлыкым, шуко тамле кочкышым да яндар вӱдым. Библий гоч Иегова мыланна шке лӱмжым да тӱрлӧ чапле койышыж-влакым почын палдарен. Но эн шергакан пӧлекше — мемнан верч пуымо Эргыже. Юмо шке Эргыжым, Иисус Христосым, мемнан верч колашлан мландыш колтен (Иоаннын 3:16). Иисусын надыржылан кӧра мемнан ончыкылыклан сылне ӱшанна уло.

⁵ Иегова каваште шке правительствыжым шогалтен — Мессиан Кугыжанышым. Вашке тиде Кугыжаныш чыла осалым пытара да уло мландым райыш савыра. Тудын вуйлатымыж годым еҥ-влак тынысыште курымеш илаш тӱҥалыт да пиалан лийыт (Псалом 36:29). Иегова мемнам йӧратымым эше ик семын ончыкта: тудо мемнам эн сай илыш корно дене каяш туныкта, тудлан кумалаш ӱжеш да кумалме мутнам эре колышташ  сӧра. Иегова кажне айдемым йӧратымыжым раш ончыкта.

6. Иеговам йӧратымаш мемнам мом ышташ таратышаш?

⁶ А ме Иегован йӧратымыжлан кузе вашештен кертына? Тудым тауштыза, вет тудо тыланда шуко порым ышта. Чаманаш логалеш, но шукышт таче таум ыштыдыме улыт. Тыгаяк ситуаций Иисус Христос илыме жапыште лийын. Кунам Иисус проказе черан лу пӧръеҥым паремден, иктыже веле тау мутым каласаш пӧртылын (Лукан 17:12—17). Айста Иеговам таушташ нигунамат она мондо!

7. Иеговам кузе йӧраташ кӱлеш?

⁷ Юмо мемнам йӧрата гын, меат тудым йӧратышаш улына. Иеговам уло шӱм, уло чон да уло умылымаш дене йӧраташ кӱлеш манын, Иисус шке тунемшыж-влаклан каласен. (Матфейын 22:37 лудын лекса.) Кузе тидым умылаш?

8, 9. «Мый Иеговам йӧратем» ойлаш гына сита мо? Умылтарыза.

⁸ «Мый Иеговам йӧратем» манын ойлаш гына сита мо? Уке. Ме Иеговам уло шӱм, уло чон, уло умылымаш дене йӧратена гын, тидым паша-влак дене ончыкташ тӱҥалына (Матфейын 7:16—20). Библийыште раш умылтарыме: ме Юмым йӧратена гын, тудын кӱштымашыжым колышташ тӱҥалына. Тидым ышташ неле мо? Уке, вет Иегован «кӱштымыжӧ неле огыл». (1 Иоаннын 5:3 лудын лекса.)

⁹ Иеговам колыштына гын, илышна пиалан  лиеш (Исаия 48:17, 18). Иегова дене эре йолташ лияш мо полша? Айста пален налына.

10. Иегова нерген палымашым умбакыжат налаш молан кӱлеш?

¹⁰ Кузе те Иегова дене йолташ лийында? Те Библийым шымлен, Юмо нерген шукырак палымашым налында, да тыге тендан Иегова дене йолташ лияш кумылда лектын. Юмо дене лишыл кыл кучымашым тул дене таҥастараш лиеш. Тул йӱлен ынже пыте манын, тушко пуым эре кышкаш кӱлеш. Тиде тул семын Иегова дене лишыл кыл кучымашда ынже йом манын, Иегова нерген палымашым умбакыжат налза (Притчи 2:1—5).

11. Библийысе чын-влак тендан могай шижмашым тарваташ тӱҥалыт?

¹¹ Мутат уке, библийысе чын-влак тендан шӱмдам тарваташ тӱҥалыт. Икана Иисус кок тунемшыжлан шке нерген ончылгоч каласымашым умылтарен, да нуно пеш йывыртеныт. Тидын нерген нуно вара каласеныт: «Мыланна корнышто ойлымыжо, Возымашым умылтарымыже годым шӱмна ыш йӱлӧ мо?» (Лукан 24:32).

12, 13. а) Юмым йӧратымашда дене мо лийын кертеш? б) Юмым йӧратымаш ынже йӱкшӧ манын, мом ыштыман?

¹² Иисусын тунемшыж-влакын шӱмыштым мо тынар чот тарватен? Нуно Возымаш гыч икмыняр шонымашым умыленыт да йывыртеныт. Библийым умылаш тӱҥалын, теат кугу куанымашым налында, докан. Тиде тыланда Иеговам сайрак палаш  да тудым йӧраташ полшен. Но Юмым йӧратымаш йӱкшен кертеш, тидлан лияш ида пу (Матфейын 24:12).

¹³ Те Юмын йолташыже уже улыда гынат, тудын дене кыл кучымашым умбакыжат пеҥгыдемдаш кӱлеш. Юмо да Иисус Христос нерген палымашым умбакыжат налза. Тыгак пален налмыда негызеш шонкалыза да палымашым илышыш пуртыза (Иоаннын 17:3). Библийым шымлымыда але лудмыда годым шке дечын йодса: «Иегова нерген мый мом пален налынам? Молан мый Иеговам уло шӱмем, уло чонем дене йӧратышаш улам?» (1 Тимофейлан 4:15).

14. Кумалме мут Иеговам йӧратыме дене кузе кылдалтын?

¹⁴ Лишыл йолташ-влакым кузе палаш лиеш?  Тыгай йолташ-влак шуко жапым икте-весе дене мутланен эртарат. Тидлан кӧра нуно эше лишылрак лийыт. Теат, Иеговалан кумалын, тудын дене эре мутланеда гын, тудын деке лишылрак лийыда. (1 Фессалоникысе-влаклан 5:17 лудын лекса.) Кумалме мут — тиде пылпомышсо Ачана деч пуымо сылне пӧлек. Кумалме мутна шӱм гыч лекшаш (Псалом 61:9). Кумалме мутым уэш-пачаш ойлаш да почеламут семын тунемаш огеш кӱл. Уло чон дене кумалза. Тугеже, Иеговам йӧратымашда вияҥже манын, умбакыжат Библийым шымлыза да кумалме годым шӱмыштыда мо улмым почын ойлыза.

15, 16. Таныклымаш паша шотышто тендан ончалтышда могай?

¹⁵ Иегова дене эре лишыл лияш манын, тудын нерген весе-влаклан каласкалаш кӱлешан. Тиде пашам шуктымаш — пеш кугу чап (Лукан 1:73—75). Адакшым тиде пашам шукташ Христос кажне тунемшыжлан кӱштен. Ме чыланат Юмын Кугыжаныш нерген поро уверым каласкалышаш улына. А те тидым ыштеда? (Матфейын 24:14; 28:19, 20).

¹⁶ Апостол Павел поро уверым каласкалаш йӧным чот аклен. Тиде пашам тудо «поянлыклан» шотлен (2 Коринфян-влаклан 4:7). Иегова да тудын шонен пыштымашыже нерген каласкалымаш — мемнан жапыште эн кӱлешан паша. Тиде пашам шуктен, ме Иеговалан служитлена.  Тиде шотышто мемнан тыршымынам Иегова чот акла (Еврей-влаклан 6:10). Таныклымаш пашаште тыршымаш тыланда гына огыл, но чылаштланат, кӧ тендам колыштеш, пайдам конда: нуно тендан семын Иегова дене лишыл йолташ лийын кертыт да курымашлык илышым пӧлек семын налыт. (1 Коринфян-влаклан 15:58 лудын лекса.) Кугыжаныш нерген таныклымаш — чынжымак куаным кондышо паша!

17. Таныклымаш пашам молан жапым шуйкалыде шукташ кӱлеш?

¹⁷ Юмо деч уверым жапым шуйкалыде шаркалаш кӱлеш. Библийыште каласыме: «Юмын шомакым увертаре, келшыше жапыштат, келшыдыме жапыштат» (2 Тимофейлан 4:2). Молан Юмын Кугыжаныш нерген поро уверым жапым шуйкалыде каласкалаш кӱлеш? Библийыште возымо: «Иегован кугу кечыже лишне. Тиде кече лишне да чот вашка». Тудо «вараш ок код» (Софония 1:14; Аввакум 2:3). Пеш вашке Иегова Сатанан осал тӱняжым пытара. Тиде жап толмешке, калыклан шижтараш кӱлеш, але нунат Иегован йолташыже лияш келшат.

18. Чын христиан-влакын вашлиймашышкышт молан кошташ кӱлеш?

¹⁸ Иегова тудлан шкетын огыл, а моло чын христиан-влак дене пырля кумалаш йодеш. Библийыште ойлалтеш: «Йӧратымаш да поро пашалан икте-весынам кузе кумылаҥдаш манын, икте-весына верч тыршышаш улына. Южыштын семын  шкенан... погынымашкына коштмым чарнышаш огынал, а икте-весым кумылаҥдышаш, жап эртыме семын тидым эшеат утларак ыштышаш улына, вет тиде кече лишеммым те ужыда» (Еврей-влаклан 10:24, 25). Вашлиймашыш эре кошташ манын, уло вийым пыштыман. Лач тушто ме икте-весынам кумылаҥден да пеҥгыдемден кертына.

19. Иза-ака-влакым йӧраташ мыланна мо полша?

¹⁹ Вашлиймашыш коштын, те сай йолташ-влакым муыда. Нуно тыланда Иегова деке лишемаш полшаш тӱҥалыт. Те тӱрлӧ иза-ака-влак дене, кудышт тендан гаяк Иеговалан уло кумылын служитлат, палыме лийыда. Нунат языкан улыт да йоҥылышым ыштен кертыт, сандене титакыштым кудалташ ямде лийза. (Ефесян-влаклан 4:32 лудын лекса.) Иза-ака-влакын ситыдымашыштым огыл, а нунын сай койышыштым эре ужаш тыршыза. Тунам тыланда нуным йӧраташ куштылгырак лиеш да те Иегова деке эше чотрак лишемыда.

20, 21. Мо тыгай «чын илыш»?

²⁰ Иегова шке йолташыж-влаклан пиалым тылана. Библийын туныктымыж дене келшышын, ончыкыжым илыш тачысе гай огеш лий.

²¹ Юмын сӧрымыжӧ почеш ме 70—80 ий огыл, а курымеш илаш тӱҥалына. Сылне райыште мемнан сай тазалыкна лиеш. Ме нигӧ деч лӱдаш огына тӱҥал. Ме чынжымак пиалан лийына! Лач  тыгай илышым Библийыште «чын илыш» манме. Иегова мыланна тыгай илышым пӧлеклаш сӧра, но тидлан ик условийым шуктыман — чын илышым «пеҥгыдын кучаш» кӱлеш (1 Тимофейлан 6:12, 19, УТ).

22. а) «Чын илышым пеҥгыдын кучо» манме мом ончыкта? б) Курымашлык илышым сулен налаш лиеш мо? Умылтарыза.

²² «Чын илышым пеҥгыдын кучо» манмыже мом ончыкта? Мыланна кӱлеш порым ышташ да порым ыштымаште поян лияш (1 Тимофейлан 6:18). Вес семынже, Библий гыч пален налмынам илышыш пурташ кӱлеш. Но чын — курымашлык — илышым сулен налаш ок лий. Тиде Иегова деч пӧлек. Тиде пӧлекым Юмо шке порылыкшылан кӧра пуа (Римлян-влаклан 5:15). Пеҥгыдын ӱшаныза: пылпомышсо Ачана шке ӱшанле служитлышыже-влаклан курымашлык илышым чынжымак пӧлеклаш шона.

23. Молан тыланда кызытак Юмылан служитлаш тӱҥалаш кӱлеш?

²³ Шке дечын йодса: «Мый Иегова Юмылан тудын эрыкше дене келшышын служитлем мо?» Тыланда иктаж-мом вашталташ кӱлеш манын шижыда гын, жапым шуйкалыде тидым ыштыза. Иегова тендам тунам веле аралаш тӱҥалеш, кунам те тудым колышташ тӱҥалыда да тудлан чыла шотыштат ӱшанеда. Сатанан осал тӱнян пытартыш кечылаштыже Иегова шке ӱшанле служитлышыже-влакым аралаш тӱҥалеш, а варажым сӧрымыжӧ почеш нунылан курымашлык  илышым райыште пӧлекла. Юмылан служитлаш кызытак тӱҥалыда гын, теат чын илышым налын кертыда!