1, 2. Yɛ la d tõe n paam sõngre?

MAMS-Y n ges-y yãmb sẽn na n kẽnd sor zug tɩ saagã niida, n yãgd la a tãsdẽ tɩ sebgã fugd ne pãnga. Saagã wa n tara yãngre, tɩ y zoet n baood zĩig n na n soonde. Yãmb wa n paama zĩ-sõng n soonde, tɩ y sũurã yaa noog wʋsgo.

² Rũndã vɩɩmã wõnda saag sẽn yãngde. Yɛlã tara kengr dũniyã zugu. Tõe tɩ y mi n soka y meng yaa: ‘Yɛ la m tõe n paam sõngre?’ Biiblã pʋgẽ, yɩɩl-gʋlsd a ye ra yeelame: “Mam yeela Sẽn-Ka-Saab yaa: ‘Yãmb yaa mam zĩ-soalgdga, la m pãng zĩiga, yãmb yaa mam Wẽnnaam, mam teega yãmba!’” (Yɩɩn-sõamyã 91:2) Hakɩɩka, a Zeova tõe n yolsa tõnd d zu-loeesã pʋgẽ masã menga. A wilgame meng tɩ beoog na n yɩɩ neere.

3. Bõe la d tõe n maan n paam a Zeova sõngre?

³ Wãn-wãn la a Zeova tõe n sõng-do? Sẽn yaa zu-loɛɛg ning fãa n namsd tõndo, a tõe n sõng-d lame. A tara pãng n yɩɩd ned buud fãa sẽn dat n maan tõnd wẽnga. Baa yel-beed sã n paam-do, d kɩsa sɩd tɩ daar n wat t’a Zeova na n wa ne a tɩɩm. Biiblã sagenda tõnd tɩ d kell n pa Wẽnnaam nonglmã pʋgẽ. (Zʋʋd 21) Sɩd me, d sã n dat n paam t’a Zeova sõng-d toog wakate, d tog n modgame n kell n yɩ a zoa. Wãn-wãna?

4, 5. Bõe la a Zeova maan n wilg t’a nonga tõndo?

⁴ D sã n dat n kell n yɩ a Zeova zoa, d tog n kɩsa sɩd t’a nonga tõnd wʋsgo. Yãmb wee n tags n ges bũmb nins fãa a Zeova sẽn maan n kõ-dã. A naana tẽngã tɩ yaa neere, tɩ tɩɩs la rũms buud toor-toor be a zugu. A leb n kõo tõnd rɩ-nood la koom. Ne Biiblã maasem, a wilga tõnd a yʋʋre, la a sẽn yaa Wẽnnaam ning buudu. Sẽn yɩɩd fãa, a wilgame t’a nonga tõndo, a sẽn tʋm a bi-nongr a Zeezi tẽngã zug t’a wa ki tɩ yɩ maoong tõnd yĩngã. (Zã 3:16) Yaa a Zeezi maoongã n kɩt tɩ d bas d yam tɩ beoog na n yɩɩ neere.

⁵ A Zeova leb n lugla goosneema saasẽ. Yaa Mesi wã Rĩungã sẽn na n wa kɩt tɩ namsgã fãa sa ka la bilfã. Ne Rĩungã maasem, tẽngã na n lebga arzãna, tɩ nebã vɩɩmd ne bãan la sũ-noog wakat sẽn kõn sa. (Yɩɩn-sõamyã 37:29) A Zeova sẽn wilgd tõnd d sẽn tõe n vɩɩmd to-to tɩ d vɩɩmã tall bark masã mengã yaa kaset me t’a nonga tõndo. A leb n kõo tõnd sor tɩ d tõe n pʋʋs-a, t’a kelgdẽ. Sɩd yaa vẽeneg t’a Zeova nonga tõnd ned kam fãa.

6. Bõe la y tõe n maan n wilg Wẽnnaam tɩ yãmb me nong-a lame?

⁶ Bõe la y tõe n maan n wilg Wẽnnaam tɩ yãmb me nong-a lame? Pʋʋsd-y-yã-a barka, n wilg tɩ y sũur nooma ne bũmb nins fãa a sẽn maan n kõ yãmbã. Rũndã-rũndã, neb wʋsg yaa zɩ-beoog rãmb wa a Zeezi wakatẽ nebã. Vugri, a Zeezi sãooga wãoob piiga, la yaa b nin-yend bal n pʋʋs-a barka. (Luk 17:12-17) Tõnd dat n dɩka sẽn pʋʋs-a barkã togs-n-taare. Bɩ d pʋʋsd a Zeova bark wakat fãa.

7. D nonglmã ne a Zeova tog n taa zĩ-bʋgo?

 ⁷ D nonglmã ne a Zeova wã tog n talla pãng me. A Zeezi yeela a karen-biisã tɩ b tog n nonga a Zeova ne b sũur fãa, ne b sɩɩgã fãa la ne b tagsa wã fãa. (Karm-y Matye 22:37.) Woto rat n yeelame tɩ bõe?

8, 9. Bõe la d tõe n maan n wilg tɩ d nonga a Zeova?

⁸ D sã n yet ne noor bal tɩ d nonga a Zeova, pa sek ye. D sã n nong a Zeova ne d sũur fãa, ne d sɩɩgã fãa la ne d tagsa wã fãa, d na n wilga rẽ ne d tʋʋmã. (Matye 7:16-20) Biiblã yeta vẽeneg tɩ ned sã n nong Wẽnnaam, a na n sakda a noyã. Sakrã yaa toog bɩ? Ayo, bala a “tõodã ka toog ye.”—Karm-y 1 Zã 5:3.

⁹ D sã n sakd a Zeova noyã, d paamda sũ-noogo, tɩ d vɩɩmã me tar barka. (Ezayi 48:17, 18) La bõe n na n sõng-d tɩ d kell n yɩ a Zeova zoa? Bɩ d gom rẽ yelle.

10. Bõe yĩng tɩ y segd n kell n bao n bãng a Zeova?

¹⁰ Bõe la yãmb maan n tõog n lebg a Zeova zoa? Biiblã zãmsg n sõng-y tɩ y bãng a Zeova sõma, n yãk yam n na n lebg a zoa. Yaa wa bugum y sẽn tugli. Y sã n pa rat tɩ bugmã ki, y tog n paasda raado. Woto me, sẽn na yɩl tɩ yãmb ne a Zeova zoodã kell n tall pãnga, rẽnda y modg n bãng-a n paasdẽ.—Yel-bũnã 2:1-5.

11. Wãn-wãn la Biiblã zãmsg tõe n naf yãmba?

¹¹ Yãmb sã n ket n zãmsd Biiblã, y na n bãnga bũmb wʋsgo, hal tɩ y sũur yɩ noogo. Daar a yembre, a Zeezi bilga a karen-biis a yiib Biiblã bãngr-goam võore. B sũy yɩɩ noog wʋsg hal tɩ b yeel yaa: “Bãmb sẽn dag n gomd ne tõnd sorã zug la b bilgd tõnd gʋls-sõamyã, tõnd ka paam sũ-no-kãseng sɩda?”—Luk 24:32.

12, 13. a) Bilg-y tõnd nonglmã ne Wẽnnaam sẽn tõe n wa lebg to-to. b) Bõe la d tõe n maan tɩ d nonglmã ket n paasdẽ?

 ¹² Wala karen-biisã sũy sẽn yɩ noog b sẽn wʋm Biiblã goamã võor sõma wã, tõeeme tɩ yãmb me sẽn wa n sɩng n wʋmd Biiblã goamã võorã, y sũur yɩɩ noog wʋsgo. Sõnga yãmb tɩ y bãng a Zeova la y nong-a wʋsgo. Bɩ y ra bas tɩ nonglmã maag ye.—Matye 24:12.

¹³ Yãmb sẽn paam n lebg Wẽnnaam zoa wã, bɩ y modg tɩ y zoodã pãng paasdẽ. Kell-y n bao-y n bãng-y yẽ ne a Zeezi sõma, n bʋgs y sẽn bãngã zug neere, la y tags n ges y sẽn tõe n tũ to-to. (Zã 17:3) Y sã n wa karemd Biiblã wall y zãmsd-a, bɩ y sok y meng yaa: ‘Bõe la m sẽn bãngã wilgd maam a Zeova zugu? Bõe yĩng tɩ m segd n nong-a ne m sũur fãa la ne m sɩɩgã fãa?’—1 Tɩmote 4:15.

14. Wãn to la pʋʋsgã tõe n sõng tõnd tɩ d maneg n nong a Zeova?

 ¹⁴ Yãmb sã n tar y zoa, y na n nong n gomda ne taaba. Rẽ paasda y zoodã pãnga. Woto me, d sã n pʋʋsd a Zeova wakat fãa, na n kɩtame tɩ d maneg n nong-a. (Karm-y 1 Tesalonik-rãmbã 5:17.) D sẽn paam n tõe n pʋʋs a Zeova wã yaa bark menga. Yaa wa kũun a sẽn kõ-do. D segd n pelgda d pʋg n pʋʋsd-a wakat fãa. (Yɩɩn-sõamyã 62:9) D sã n pʋʋsdẽ, pa segd tɩ yaa goam d sẽn dɩk ne zug n togsd n yɩlemdẽ ye. D goamã segd n yita d sũurẽ. Hakɩɩka, d sã n ket n zãmsd Biiblã la d pelgd d pʋg n pʋʋsdẽ, d na n maneg n nonga a Zeova.

15, 16. Yãmb tagsg yaa bõe ne koɛɛgã moonego?

¹⁵ D sã n dat n kell n tall zood sõma ne a Zeova, d segd n togsda neb a taabã d sẽn tẽed bũmb ningã. D sẽn paam n gomd a Zeova yell ne nebã yaa bark meng-menga. Yaa tʋʋmd a Zeezi sẽn kõ kiris-neb hakɩɩkã fãa. Ned fãa segd n moona Wẽnnaam Rĩungã koe-noogã. Yãmb zoe n sɩngame bɩ?—Matye 24:14; 28:19, 20.

¹⁶ Tʋm-tʋmd a Poll ra getame tɩ koɛɛgã mooneg yaa tʋmd sẽn tar yõod wʋsgo. A yeelame tɩ tʋʋmdã yaa wa ‘paoongo.’ (2 Korẽnt-rãmbã 4:7) Paam n gomd a Zeova la a raabã yell ne nebã yaa tʋʋmd sẽn tar yõod n yɩɩd tʋʋmd buudã fãa. Wilgdame tɩ yaa a Zeova la d tũuda. A nanda rẽ hal wʋsgo. (Ebre-rãmbã 6:10) Koɛɛgã mooneg nafda yãmb mengã, la neb nins sẽn kelgdã. Bala sõngda yãmb ne neb a taabã tɩ y paam a Zeova zoodo, n wa paam vɩɩm sẽn kõn sa  wã. (Karm-y 1 Korẽnt-rãmbã 15:58.) Tʋmd a to kae n tõe n kõ-y sũ-noog n ta koɛɛgã mooneg ye.

17. Bõe yĩng tɩ koɛɛgã mooneg yaa tʋʋm-yãgdem?

¹⁷ Koɛɛgã mooneg lebga tʋʋm-yãgdem. Segdame tɩ d ‘moon koɛɛgã,’ la d “wɩng ne togsg wakat fãa.” (2 Tɩmote 4:2) Yaa tɩlɛ tɩ nebã bãng tɩ Wẽnnaam lugla Rĩungu. Biiblã yetame: “Sẽn-Ka-Saab daarã sẽn yaa ra-kãsengã kolgame, a kolgame, la a wata tao-tao!” A “ka na n pa n ka paam pidsg ye.” (Sofoni 1:14; Habakuk 2:3) Sɩd me, ka la bilfu, a Zeova na n sãama a Sʋɩtãan dũniyã. Nand tɩ wakat kãng ta, yaa tɩlɛ tɩ d keoog nebã tɩ b yãk yam n tũ a Zeova.

18. Bõe yĩng tɩ d segd n naag kiris-neb hakɩɩkã n maan a Zeova raabã?

¹⁸ A Zeova ratame tɩ d naag kiris-neb hakɩɩkã n maan a raabã. Biiblã yetame: “Bɩ d ges taab yelle, tɩ d tõe n nek taab ratem tɩ nong taaba la maan tʋʋm-sõamyã. Bɩ d da bas d wẽnd-doogã wa neb kẽer sẽn minim n maandẽ wã ye. Bɩ d sagl taaba, n sagl taab n yɩɩda, yãmb sẽn ne tɩ daarã kolgdame wã yĩnga.” (Ebre-rãmbã 10:24, 25) D fãa segd n modgame n kẽnd tigissã n pa vaandẽ ye. Tigissã sasa, d paamd n kenga taab raoodo.

19. Bõe n na n sõng tõnd tɩ d nong d tẽed-n-taasã?

¹⁹ Tigissã zĩigẽ, y paamda zo-sõma sẽn na n sõng yãmb tɩ y bãng n tũ a Zeova. Y na n yãame tɩ neb buud toor-toore, pagb la rapa, n maand b sẽn tõe fãa wa yãmba, n tũud a Zeova. Bãmb me yaa neb sẽn pa zems zãnga, n mi n kongdẽ. B sã n wa konge, bɩ y sak n kõ-b sugri. (Karm-y Koloos-rãmbã 3:13.) Get-y y tẽed-n-taasã zʋg-sõma wã n yɩɩda, tɩ rẽ na n sõng-y  lame tɩ y nong-ba, la y kell n tall zood sõma ne a Zeova.

20, 21. Bõe la b sẽn boond tɩ “vɩɩm hakɩɩkã”?

²⁰ A Zeova ratame tɩ yẽ zo-rãmbã fãa vɩɩm tall barka. Biiblã wilgdame tɩ ka la bilfu, vɩɩmã pa na n le yɩ wa rũndã-rũndã wã ye.

²¹ D pa na n vɩɩmd yʋʋm 70 bɩ 80 bal ye. D na n paama “vɩɩm sẽn kõn sa” arzãnã pʋgẽ, n tar keelem la sũ-noogo, tɩ d yam gãe bãane. Yaa rẽ la Biiblã sẽn boond tɩ “vɩɩm hakɩɩkã” a Zeova sẽn pʋlem t’a na n kõ-d lame wã. La d segd n maana d sẽn tõe fãa masã menga, n wa ‘paam tɩ yɩ d pʋɩɩre.’—1 Tɩmote 6:12, 19.

22. a) Bõe la d tõe n maan n wa ‘paam vɩɩm hakɩɩkã tɩ yɩ d pʋɩɩre’? b) Bõe yĩng tɩ vɩɩm hakɩɩkã paoong pa be ne tõnd mengã modgre?

²² Bõe la d tõe n maan n wa ‘paam vɩɩm hakɩɩkã tɩ yɩ d pʋɩɩre’? D “maan neere,” n yɩ neb sẽn “maand tʋʋm-sõamy wʋsgo.” (1 Tɩmote 6:18) Woto rat n yeelame tɩ d segd n tũu bũmb ning d sẽn zãmsd Biiblã pʋgẽ wã. La vɩɩm hakɩɩkã paoong pa be ne tõnd mengã modgr ye. Pa d tʋʋm-sõma wã yĩng n kɩt tɩ d segd ne rẽ ye. Yaa bark sẽn yit a Zeova nengẽ. (Rom-dãmbã 5:15) Sɩd me, a Zeova sẽn yaa d saasẽ Ba wã ratame n kõ wẽn-sakdbã fãa vɩɩm hakɩɩkã.

23. Bõe yĩng tɩ yaa tɩlɛ tɩ y bãng n yãk yam-sõng masã menga?

²³ Sok-y y meng yaa: ‘Mam tũuda Wẽnnaam wa a sẽn datã bɩ?’ Sã n mik tɩ y segd n toeema bũmb kẽere, bɩ y maan tao-tao. D sã n teeg a Zeova la d maan d sẽn tõe fãa n sak-a, a na n yɩɩ d soondg zĩiga. A Sʋɩtãan  dũniyã sãoong sasa, a Zeova na n fãaga sẽn sakd-b yẽ wã. Rẽ poore, wa a sẽn pʋlmã, tẽngã na n lebga arzãna, tɩ d vɩɩmd wakat sẽn kõn sa. Y sã n bãng n yãk yam-sõng masã mengã, y na n wa paama vɩɩm hakɩɩkã.