1, 2. Mapa da nētsē ǁkhaubasa a hōǁkhā?

MÛNANAI re ǂoaxa tsēs ai du ra ǃgauga ǃgûsa. ǀHom-aib ge ra ǃkhae, labab ge ra ǂnau tsî i ge ra ǃguru tsoatsoa. ǁNāpaxū i ge ra ǀapi tsoatsoa. Sâusen du nî ǃkhai-e du ge ra ôa. Matikōse du ǃnorasase nî tsâ ǃgâi tsî ǂnâsa ǃkhai-e du ga hō o!

² Sada tsîn ge ǁkhā mâsib ǃnâ hâ nētsē. ǃHūbaib di mâsib ge ra ǁgaoǂgā. Sadu ge ǀnîsi ra ǂâi, ‘ham-i xa ta nî ǁkhaubahe?’ Elobmîs psalmdi xoa-aob ge ra mî: “ǁNā-i ge ǃKhūb [“Jehovab,” NW] ǃoa ra mî: Ti ǁhaiǁhâts, ti ǁaposa hâǃkhaits, ti Elots.” (Psalmdi 91:2) Î, Jehovab ge a ore da ǁkhā sada di ǃgomsina xu nēsi tsî ǁîb ge ǂoaǂamsa ǃâubasensa hānîǁaeb ǃaroma mā da hâ.

3. Jehovaba mati sada huib ase i ǁkhā?

³ Jehovaba mati a hui da ǁkhā? ǁÎb ge a hui da ǁkhā ǃgomsigu ū da hân hoan ǀkha tsî ǁîb ge kaise a ǀgaisa khoe-i sada ra tsûtsû ǂgao-i xa. Tsū xū-i ga sada ǀkha nēsi ī xawe da ge ǂgomǃgâsiba a ūhâ ǁkhā Jehovab dīhe hâ ǂkhôaba nî dī-unusa hānîǁae. Elobmîs ge ra ǂkhâǃnâ da î da: “Sâusen Elob di ǀnammi ǃnâ.” (Judab 21) Jehovab ǀgūse da ge nî hâ î da ǁîb huiba ǃgomǁaegu ǃnâ hō. Xawe mati da ǁkhāsa nî dī?

4, 5. Jehovaba mati ǁîb ǀnamma hoa da ra ǁgau?

⁴ Jehovab ǀgūse hâs ge nî ǂanǃgâ kai da ǁîb matikōse  a ǀnam da ǃkhaisa. ǂÂi re hoa xūn Jehovab ge dība dan xa. ǁÎb ge îsa ǃhūbaiba ge a mā da tsî ǁîb ge ǃhūbaiba kaise îsa hain tsî xamarin ǀkha ge a ǀoaǀoa. ǁÎb ge kaise ǁkhoaxa ǂûn tsî ǃanu ǁgammi tsîna ge a mā da. Elobmîs ǃnâ-ūb ge Jehovaba ǁîb ǀons xa ra ǁkhāǁkhā da tsî ǁîb di ǂoaǂamsa ǂūgu xas tsîna. Hoa xūn ǂam aib ge ǁîb ti ǀnamǀnamsa ǀGôab Jesuba ge sî ǃhūbaib ǃoa îb ǁîb ûiba sada ǃaroma mā. (Johaneb 3:16) Tsî ǁnā ǁguibas ǃaroma da ge buruxa hānîǁaeba nî ūhâ.

⁵ Jehovab ge Mesiab Gaosiba ge a mā da, ǁnāb ge ǀhomsi ǂhanuba hoa khoesi ǃgomsina nî ǀam kaiba. ǁNā Gaosib ge ǃhūbaiba paradais ǃnâ nî ǀkharaǀkhara, ǁnāban ge hoana ǂkhîb tsî ǃgâiaǂgaob ǃnâ ǀamosib kōse nî hâhâ. (Psalmdi 37:29) ǀNî hâ ǀgaub Jehovab ǁîb ǀnamma ra ǁgau dab ge, ǁîb ge ra ǁkhāǁkhā da mati da nēsi ǃgâi ûiba nî ūhâsa. ǁÎb ge ra ǁkhau da î da ǁîb ǃoa ǀgore tsî ǁîb ge hoaǁae sada di ǀgorede ra ǃgâ. Jehovab ge ǃgāsase ǁîb ǀnamma hoa da ra ǁgau.

6. Mati du Jehovaba ǀnamma a ǁgau ǃoa ǁkhā?

⁶ Mati du Jehovaba ǀnamma a ǁgau ǃoa ǁkhā? ǁGau bi re ǃgôaǃgâ du ra ǃkhaisa hoa xūn hînab ge dība duna. Xawe ǂgui khoen ge nētsē a ganganoǃnâ. ǁNās tsîn ge ge ama i Jesub ge ǃhūbaib ai hâ i o. ǀGui tsēs aib ge Jesuba disi ǃomamaxa ǁōsa ūhâ khoega ge a ǂuruǂuru xawe ǀgui khoeb ǀguib ge ge gangan bi. (Lukab 17:12-17) Sada tsîn ge Jesuba ge a gangan khoeb khami ra ī ǂgao. Hoaǁae da ge Jehovaba nî gangan.

7. Matikōse da Jehovaba nî ǀnam?

⁷ Sada tsîn ge Jehovaba ǀnamma nî ǁgau. Jesub ge ǁîb ǁkhāǁkhāsabega ge mîba î gu Jehovaba ǁîgu ǂgaob,  ǀoms tsî ǂâis hoas ǀkha ǀnam. (Khomai re Mateub 22:37.) ǁNāsa tae-e ra ǂâibasen?

8, 9. Mati da Jehovaba a ǁgau ǁkhā ǀnam bi da a ǃkhaisa?

⁸ ǂÂu i hâ mîsa Jehovaba da a ǀnam di? Hî-î. Jehovaba da ga ǂgaob, ǀoms tsî ǂâis hoas ǀkha ǀnam o, o da ge ǀnamma sada di dīb ǃnâ-ū nî ǁgau bi. (Mateub 7:16-20) Elobmîs ge ǃgāsase ra mî Eloba da ga ǀnam o, o da ge ǁîb di mîmāde nî ǁnâuǀnam. ǁNāsa ǃgom i a? Hî-î, Jehovab “mîmādi ge ǃgom tama hâ.”—Khomai re 1 Johaneb 5:3.

⁹ Jehovaba da ga ǁnâuǀnam o, o da ge ǃgâi tsî ǂkhîǂkhîsa ûiba nî ūhâ. (Jesajab 48:17, 18) Xawe tae-e nî hui da î da Jehovab ǀgūse hâ? Hā re î da kē.

10. Tae-i ǃaroma du nî aiǃgû Jehovab xa ǁkhāǁkhāsensa?

¹⁰ Mati du go Jehovab ǀhōsa kai? Elobmîsa ôaǃnâs ǃnâ-ū du ge Jehovab xa ǃnāsase go ǁkhāǁkhāsen tsî ǀhōsasisa ǁîb ǀkha go omkhâi. Nē ǀhōsasis ge ǀaes khami ī tsî sadu ge nî khau ǀgarasi. ǀAes ǀaena khaus ǃaroma ǂhâ hâ khami du ge sadu tsîna Jehovab xa nî ǁkhāǁkhāsen ǀgara î du sadu ǀhōsasisa ǀgaisase ǁîb ǀkha ūhâ.—ǂKhoamîdi 2:1-5.

11. Matin Elobmîs ǁkhāǁkhāde a tsâǀkhā du ǁkhā?

¹¹ Elobmîsa du ra ôaǃnâ khami du ge xūna nî ǁkhāǁkhāsen amabes ǃnâ sadu ǂgaoba nî tsâǀkhāna. ǃGaoǃgâ re mati kha ge Jesub di ǀgam ǁkhāǁkhāsabe kha tsâsa Jesub ge Elobmîs kēbode ǁguiǃāba kha o. ǁÎ kha ge ge mî: “Sakhom ǂgaoba kha khauǃnâ khom tamab go hâ i, daob aib goro ǃhoa-ū khom, tsî xoadeb goro ǁguiǃāba khom ǃnubai?”—Lukab 24:32.

12, 13. (a) Tae-e a ī ǁkhā Eloba da ūba hâ ǀnammi ǀkha? (b) Jehovaba da ūba hâ ǀnamma da mati ûitsamase nî ūhâ?

 ¹² ǁKhāǁkhāsabe kha di ǂgaob ge ge tsâǀkhāhe Xoade kha ge ǁnâuǃā ǃkhais ǃaroma. Sadu tsîn ge ǁî kha khami a tsâ ǁkhā Elobmîsa du ga ǁnâuǃā tsoatsoa o. ǁNās ge nî hui du î du Jehovaba ǂan tsî ǀnam. Sadu ge ǁnā ǀnammi nî ǃkhai ǃkhaisa ǂgao tide.—Mateub 24:12.

¹³ Elob ǀhōsa kai du ga ra o, o du ge ǃgarise nî sîsen î du sadu ǀhōsasisa ǀgaisase ūhâ. Aiǃgû du ge nî Jehova Elob tsî Jesub tsîn xa ǁkhāǁkhāsensa tsî du ge ǁkhāǁkhāsen du ra xūna nî ǂâiǃgâ tsî ǁîna du mati sadu ûib ǃnâ a sîsenū ǁkhā ǀgaus tsîna. (Johaneb 17:3) Elobmîsa du ga ra khomai tamas ka io ôaǃnâ o, dîsen re: ‘Nēsa tae-e Jehova Elob xa ra ǁkhāǁkhā te? Tae-i ǃaroma ta  ǁîba ti ǂgaob tsî ǀoms hoas ǀkha nî ǀnam?’—1 Timoteub 4:15.

14. ǀGoresa mati sida ǀnammi Jehovaba da ūba hâba ra ǀgaiǀgai?

¹⁴ ǃGâi ǀhōsa-e du ga ra ūhâ o, o du ge tsēs hoasa ǁî-i ǀkha ra ǃhoa, ǁnās ge sadu ǀhōsasisa ra ǀgaiǀgai. ǁNās ǁkhās khami da ga Jehovab ǀkha tsēs hoasa ǀgores ǃnâ-ū ǃhoa o, o da ge ǁîba da ūbâ hâ ǀnamma ǀgaisase ra ūhâ ǀgara. (Khomai re 1 Tesalonikaǁîn 5:17.) ǀGores ge kaise ǃgâi ǀkhaeba sida di ǀhomsi ǁGûba xu. Hoaǁae da ge ǂgaoba xu ǁîb ǀkha nî ǃhoa. (Psalmdi 62:8) Sada di ǀgorede da ge tā nî ǁguiǃgâ xawe da ge nî ǂâibasen mî da ra xūna. Î, aiǃgû du ga ra o Elobmîsa ôaǃnâ tsî ǂgaoba xu ǀgores ǀkha, o da ge Jehovaba da ūbâ hâ ǀnamma nî ǀgaiǀgai.

15, 16. Mati du aoǁnâ sîsen-e ra mû?

¹⁵ Jehovab ǀgūse da ga ra hâ ǂgao o, o da ge khoen ǀkha nî ǃhoa sada di ǂgoms xa. Jehovab xa khoena ǁgambas ge kai aiǂhanuba. (Lukab 1:74) Tsî ǁnās ge ǃereams Jesub ge hoa ama Xristeǁîna māsa. Mâ ǀguiǀguibe khoe-i hoa-i ge ǃgâiǂhôas Elob Gaosib dis xa nî aoǁnâ. Sado nēsa ǀnai dī î du ra?—Mateub 24:14; 28:19, 20.

¹⁶ Apostel Paulub ge ge mî aoǁnâ sîsenni kaise a ǁkhoaxaba bisa tsî ǁî-e “ǁuib” tamas ka io ǃgomǀgausa di ge ǂgai. (2 Korinteǁîn 4:7) Khoena Jehovab tsî ǁîb ǂâibasens xa mîbas ge kaise ǂhâǂhâsa sîsen-e. ǁNā ǀgaub ai du ge Jehovaba ra ǃoaba tsî ǁîb ge ǁnāsa kaise ra ǃgôaǃgâ. (Hebreǁîn 6:10) Aoǁnâ sîsenni ǃnâ ǁhaos ge sadu tsî aoǁnâba du ra khoen tsîna a hui ǁkhā î du  Jehovab ǀgūse hâ tsî ǀamo ûib tsîna hōǁkhā. (Khomai re 1 Korinteǁîn 15:58.) ǀNî hâ sîsen-e hâ-e sado a ǂkhîǂkhî ǁkhā-e?

17. Tae-i ǃaroma i aoǁnâ sîsen-e kaise a ǁgariǁgarisa?

¹⁷ Aoǁnâ sîsenni ge kaise a ǁgariǁgarisa. “Mîsa aoǁnâ” tsî da ge nî “hâhâ ǁîs ǀkha.” (2 Timoteub 4:2) Khoen ge Elob Gaosib xa nî ǁnâu. Elobmîs ge ra mî: “Kaitsēs ǃKhūb [“Jehovab,” NW] dis ge a ǀgū, ǁîs ge a ǀgū tsî kaise a ǃhae.” ǀAms ge “ǃonkhao tide.” (Sefanjab 1:14; Habakuki 2:3) ǃHaeseb ge Jehovaba Satanni eloxoresa ǃhūbaiba nî dīkākā. ǁNās nî īs aiǃân ge khoena nî ǃkhâihe în ǁhûibasen tsî Jehovaba ǃoaba.

18. Tae-i ǃaroma da Jehovaba ama Xristeǁîn ǀkha nî ǀgoreǀî?

¹⁸ Jehovab ge ra ǂhâba î da ǁîba ǀgoreǀî ama Xristeǁîn ǀkha. Elobmîs ge ra mî: “Î da kōǃgâ ǀnammi tsî ǃgâi sîsengu hōhōǃnâgu ǃoa; î da tā sada ǀhûsa ǀûǀkhā, ǀnîn ǁnaetiba ūhâ khami, î da ǁnamagu, î da ǁîsa ǃnāsase dī, tsēs ra ǀgū ǃkhaisa du ra mû xuige.” (Hebreǁîn 10:24, 25) ǁKhā da ân hoana da ge nî dī î da hoa ǀhaode hâǃnâ. ǀHaodi ge ǃēsa ra mā da î da ǂkhâǃnâgu tsî ǀgaiǀgaigu.

19. Tae-e a hui da ǁkhā î da sada di Xristeǁî ǃgâsana ǀnam?

¹⁹ ǀHaode du ga hâǃnâ o, o du ge ǃgâi ǀhōsana a hōǁkhā hui du ǁkhāna î du Jehovaba ǀgoreǀî. Sadu ge ǃkharagagu ǃgâsana nî hō, sadu khami īna, ǁîn ge ǁkhān ân hoana ra dī în ǁÎba ǀgoreǀî. Tsî sadu khamin ge dīǀoaǀoasa kurusa ūhâ tama tsî ra dīsā. Dīsān ga ra o, ǀûba re. (Khomai re Koloseǁîn 3:13.) Hoaǁae sadu Xristeǁî ǃgâsan di ǃgâi ǂūgu ai sadu ǂâisa mâi re, ǁnās ge nî hui du ǁîna ǀnamsa tsî Jehovab ǀgūse hâsa.

20, 21. ‘ǀAmo ûiba’ a tae?

²⁰ Jehovab ge ǁîb ǀhōsan hoana ǃgâi ûib ǀguiba ra ǁkhoreba. Elobmîs ge ra ǁkhāǁkhā da sada ûib hoaragase nî ǀkharasa hānîǁaeb ǃnâ nēsib īs xa.

²¹ Hānîǁaeb ǃnâ da ge ǀamosib kōse nî ûi, 70 tamas ka 80 kurigu ǀguigu ose. ǁKhoaxa “ǀamo ûiba” da ge nî ūhâ dīǀoaǀoasa ǂurusib ǃnâ tsî da ge kaise nî ǃgâiaǂgao îsa paradais ǃhūbaib ai. Elobmîs ge ǁnāba “ǀamo ûib” di ra ǂgai. Jehovab ge ge mîmâi ǁîb nî ǁnā ûiba mā da ǃkhaisa xawe da ge ǁkhā da ân hoana nî dī î da nēsi ǁnā ûib ai “ǃkhōǀgaipe.”—1 Timoteub 6:12, 19.

22. (a) Mati da “ǀamo ûiba ǃkhōǀgaipe” ǁkhā? (b) Tae-i ǃaroma i ǀamo ûiba hōsa sada xu hâ tama?

²² Mati da “ǀamo ûiba ǃkhōǀgaipe” ǁkhā? “ǃGâidī” tsî da ge “ǃgâidīgu ǃnâ ǃkhū” hâse nî hâ. (1 Timoteub 6:18) Nēs ge ra ǂâibasen î da Elobmîs ǃnâ da ra ǁkhāǁkhāsen xūna ûiǂui. ǀAmo ûib ge sada di ǁgūtsâde xu ǀgui hâ tama hâ. Tātsēs tsîna da ge ǀamo ûiba hōsa ǃoaǂui tama. Marioǃnâ ǀkhaeb Jehovab ta ǁîb di ǃoaba-aona māb ge aiǁgause ǁîb “ǀkhommi” ǃnâ-ū. (Romeǁîn 5:15) Sada ǀhomsi ǁGûb ge amabes ǃnâ nē ǀkhaeba ǁîb di ǂgomǂgomsa ǃoaba-aona ra mā ǂgao.

23. Tae-i ǃaroma du ǂhanu mîǁguiga nēsi nî dī?

²³ Dîsen re aitsma, ‘Eloba ta ra ǀgoreǀî ǁîb ta mā-am ǀgaub ai?’ ǂAnǂui du ga ra o, ǀkharaǀkharana sadu ûib ǃnâ du nî dīsa, o du ge nēsi ǁnāsa nî dī. ǁKhā da a xūn hoana da ge nî dī î da Jehovaba ǁnâuǀnam tsî ǁîb ai ǂgomaiǂnûi, ob ge Jehovaba nî sada sâu ǃkhai kai. ǁÎb ge ǁîb di ǂgomǂgomsa khoena nî sâu nē ǀuniga tsēdi Satanni eloxoresa ǃhūbaib ǃnâ. ǁNāpaxūb ge  Jehovaba nî dī î da ǀamose Paradais ǃhūbaib ǃnâ hâ, ǁîb ge mîmâi khami. Sadu tsîn ge ama ûiba a hōǁkhā ǂhanu mîǁguiga du ga nēsi dī o!