1, 2. ¿Kani uelis timopaleuiskej axkan?

XIKONNEMILI ke tionojtokatok uan sepasaj tatileui. Tapepetani, tatitikuini uan peua chikauak kioui. Yejua ika tikontemoua kani tionmopaleuis uan tionmochias maj pano kiouit. Keman tikonajsi kani tionmopaleuis semi kuali tionmomachilia.

² Axkan kemej yeskia no tikpanouaj se taman kemej nejon. Kemej okachi mochiua tein amo kuali, tejuatsin xa tionmotajtania: “¿Kani uelis timopaleuiskej?”. Se akin kijkuiloj Biblia, kijtoj: “Nikiluis Jiova: ‘Tejua tinonepaleuil uan kampa nimomatampauia, noDios, akin iuan nitakuaujtamati’” (Salmo 91:2). Jiova uelis techpaleuis maj tikixnamikikan kuejmolmej tein tikpiaskej axkan, uan techiluia ke satepan uelis tikseliskej miak taman tein kuali.

3. ¿Toni moneki tikchiuaskej komo tiknekij maj Jiova techpaleui?

³ ¿Keniuj techpaleuia oso techmatampauia Jiova? Yejuatsin uelis techpaleuis maj tikixnamikikan tein yeski ouijkayot tein tikpiaskej. Uan no, yejuatsin okachi chikauak ke nochin akin kinekiskej techchiuiliskej tein amo kuali. Uan maski tikpiaskej se ueyi ouijkayot tein amo tikchiayaj, uelis tikyekmatiskej ke Jiova kiixpolos nejon ouijkayot amo uejkaua. Biblia techiluia ke moneki ‘tiksentokaskej itech inetasojtalis Dios’ (Judas 21, TNM). Komo tiknekij maj Jiova techpaleui maj tikixnamikikan ouijkayomej, moneki tiktemoskej nochipa kuali timouikaskej iuan.

4, 5. ¿Keniuj kinextia Jiova ke techtasojta?

⁴ Moneki tikajsikamatiskej ke Jiova semi techtasojta  porin nejon techpaleuis maj tiksentokakan kuali timouikakan iuan. Xikonnemili nochi tein Jiova toka kichiuani. Techmakak nejin taltikpak kampa semi takualtsinkan uan kampa onkak miak kualtsitsin koujmej uan tapialmej. No techmakatok tataman takual tein uelik uan miak at. Uan no, Jiova techmachtia itech Biblia katiyejua itokay uan keniuj tanemilia uan tein kimachilia. Sayoj ke okachi kinextij ke techtasojta keman kiualtitanik Jesús, iKonetsin akin okachi kitasojta, maj toka momikiliki (Juan 3:16). Ika inemilis tein kitemakak, ueli tikchiaj tikseliskej miak tatiochiualismej satepan.

⁵ Jiova kiixtalij iTekiuajyo ne iluikak tein amo uejkaua ika kiixpolos tajyouilis. Nejin Tekiuajyot kichiuas maj nejin taltikpak mochiua se xochital, kampa tinemiskej nochipaya ika yolpakilis uan yolseuilis (Salmo 37:29). Jiova no kinextiani ke techtasojta porin techmachtia keniuj kuali tinemiskej axkan. Uan no, techyoleua maj iuan titajtokan uan nochipa kineki techkakis. Kemej tikitaj, Jiova yekmelauj techtasojta tinochin.

6. ¿Toni moneki tikonchiuas keman tikonita ke Jiova semi mitsontasojta?

⁶ ¿Melauj ke tionmotasojkamati keman tikonita ke Jiova semi mitsonpaleuiani uan ke semi mitsontasojta? Yejua ika moneki tikonnextilis ke tikontasojkamatilia. Sayoj ke itech nejin tonalmej miakej amo motasojkamatij. Uan no ijkon katkaj miakej itech itonaluan Jesús. Se tonal, Jesús kinpajtij majtakti takamej akin kipiayaj lepra, sayoj ke sayoj se kitasojkamatilij (Lucas 17:12-17). Tejuan tiknekij tiyeskij kemej nejon takat uan nochipa tiknextiliskej Jiova ke tiktasojkamatiliaj maj techtasojta.

7. ¿Keniuj moneki tiktasojtaskej Jiova?

⁷ Uan no, moneki tiktasojtaskej Jiova. Jesús kiniluij itatojtokakauan ke monekia kitasojtaskej Jiova ika nochi  ininyolo, ininnemilis uan inintanemilil (xikonixtajtolti Mateo 22:37). ¿Toni kijtosneki nejin?

8, 9. ¿Keniuj tiknextiliaj Jiova ke tiktasojtaj?

⁸ Amo sayoj moneki tikijtoskej ke tiktasojtaj Jiova. Komo tiktasojtaj ika nochi toyolo, tonemilis uan totanemilil, tiknextiskej ika tein tikchiuaj (Mateo 7:16-20). Biblia senkis kijtoua ke komo tiktasojtaj Dios tiktakamatiskej itanauatiluan. ¿Ouij tikchiuaskej nejon? Amo, porin nochi itanauatiluan Jiova amo teouijmaka se kintakamatis (xikonixtajtolti 1 Juan 5:3).

⁹ Keman tiktakamatij Jiova, semi tiyolpakij uan kuali tinemij (Isaías 48:17, 18). Sayoj ke ¿toni techpaleuis maj tiksentokakan kuali timouikakan iuan? Maj tikitakan.

10. ¿Keyej moneki tikonsentokas tikonixmatis Jiova?

¹⁰ ¿Keniuj peuak kuali tionmouika iuan Jiova? Ijkon kemej tionmomachtiaya Biblia, okachi tikonixmatik Jiova uan peuak kuali tionmouika iuan. Nejon kuali uikalis kemej yeskia se tit. Komo amo tiknekij maj seui, moneki tiktatokiliskej. Nejin kijtosneki ke moneki tikonsentokas tikonixmatis Jiova porin nejon mitsonpaleuis xikonsentoka kuali xionmouika iuan (Proverbios 2:1-5).

11. ¿Keniuj mitsonpaleuis tein tionmomachtis itech Biblia?

¹¹ Ijkon kemej tikonsentokas tionmomachtis Biblia, tikonajsikamatis miak taman tein mitsonyolpaktis uan mitsonyololinis. Xikonita keniuj momachilijkej ome imomachtijkauan Jesús keman kinmelauilij tein kijtosnekia seki taman tein uejkaujya moijtojka ke mochiuaskia. Yejuan kijtojkej: “Melau ke semi tiyolpaktiualayaj tech in ojti [...] kuak in Jesús technojnotstiualaya uan techajsikamatiltijtiualaya den [i]Tajtoltsin Dios” (Lucas 24:32).

12, 13. 1) ¿Toni uelis panos ika netasojtalis tein tikpialiaj Dios? 2) ¿Keniuj uelis tiksentokaskej tiktasojtaskej Jiova?

 ¹² Tein Jesús kinmachtij nejon ome itatojtokakauan semi kinyolpaktij uan kinyololinij. Xa tejuatsin no semi tionyolpakik keman peuak tikonajsikamati Biblia. Nejon mitsonpaleuij xikonixmati Jiova uan xikontasojta. Uan tikmatij ke amo tikonneki maj nejon netasojtalis poliui (Mateo 24:12).

¹³ Axkan ke kuali tionmouikaya iuan Dios, moneki tionmochikauas tikonsentokas kuali tionmouikas iuan. Yejua ika, moneki tikonsentokas tikonixmatis Jiova uan Jesús. Uan no, moneki tikonnemilis keniuj uelis tikonchiuas tein tionmomachtia (Juan 17:3). Keman tikonixtajtoltis oso tionmomachtis Biblia, xikonnemili toni mitsonmachtia kemej tanemilia Dios. Ompa xikonnemili keniuj nejon tein tionmomachtij mitsonpaleuis okachi xikontasojta Dios (1 Timoteo 4:15).

14. ¿Keniuj techpaleuia maj tiksentokakan tiktasojtakan Jiova keman iuan titajtouaj?

 ¹⁴ Keman omen semi kuali mouikaj, xa nochipa monojnotsaj. Nejin kichiua maj okachi kuali mouikakan. No ijkon, tiksentokaj tiktasojtaj Jiova keman nochipa iuan titajtouaj (xikonixtajtolti 1 Tesalonicenses 5:17). Se ueyi tatiochiualis maj ueli titajtokan iuan toTajtsin Jiova. Nochipa moneki tikiluiskej tein yekmelauj tikmachiliaj (Salmo 62:8). Maj amo nochipa tikiluijtokan sayoj se taman, ta maj tikiluikan tein tejuan tiknemiliaj uan tikmachiliaj. Tiksentokaskej tiktasojtaskej Jiova komo tiksentokaj timomachtiaj Biblia uan tikiluiaj tein yekmelauj tikmachiliaj.

15, 16. ¿Keniuj tikonita tanojnotsalis?

¹⁵ Komo tiknekij tiksentokaskej kuali timouikaskej iuan Jiova, no moneki tikintapouiskej oksekin tein timomachtianij itech Biblia. Se ueyi tatiochiualis se kintapouis oksekin akoni Jiova (Lucas 1:74). Uan no, nejon se tekit tein Jesús kinnauatij nochin itatojtokakauan maj kichiuakan. Yejua ika tinochin moneki tikteixmatiltiskej tein kuali tein kichiuas iTekiuajyo Dios. ¿Peuakya tikonteixmatiltia? (Mateo 24:14; 28:19, 20.)

¹⁶ Tatitanil Pablo semi kipatiuitaya kiteixmatiltis iTajtol Dios. Kiitaya kemej “se tensa ten tel patio” (2 Corintios 4:7). Tikonteixmatiltis Jiova uan tein kiixtalijtok kichiuas yejua tein okachi moneki tein uelis tikonchiuas. Nejin se taman kemej tikontekitilia Dios, uan yejuatsin semi kipatiuita xikontekitili (Hebreos 6:10). Keman tiontanojnotsa, tikonpaleuia oksekin maj kuali mouikakan iuan Dios uan no mitsonpaleuia okachi kuali xionmouika iuan. Tanojnotsalis no uelis mitsonpaleuis xionnemi nochipaya uan no akin mitsonkakiskej (xikonixtajtolti  1 Corintios 15:58). ¿Tikonnemilia ke onkak okse tekit tein okachi mitsonyolpaktis?

17. ¿Keyej semi moneki se tanojnotsas?

¹⁷ Semi moneki nochipa titanojnotsaskej. Biblia kijtoua: “Xitanojnotsa ika in Tajtoltsin de Dios [...] youalitonal kampa timoajsis” (2 Timoteo 4:2). Nochin moneki kikakiskej tein kuali tein kichiuas iTekiuajyo Dios. Uan no, Biblia kijtoua ke “iueyi tonal Jiova amo uejka yetok” uan ke ijsiujka moualtokijtok. Itamilis nochi tein amo kuali mochiuas ijkon kemej moijtoj (Sofonías 1:14; Habacuc 2:3). Amo uejkaua, Jiova kiixpolos nochi tein amo kuali tein Satanás kiixyekana. Sayoj ke achto, moneki tikinmatiltiskej taltikpakneminij tein panoti uan ijkon uelis kiixtaliskej kitekitiliskej Jiova.

18. ¿Keyej moneki timosentiliskej akin tikchiuaj kemej Cristo?

¹⁸ Jiova kineki maj akin yekmelauj tikchiuaj kemej Cristo timosentilikan uan maj tikueyichiuakan. Biblia kijtoua: “Ma tiktemolijtiyakan de keniu timopaleuijtiyaske se uan okse uan de keniu timotasojtatiyaske se uan okse uan de keniu tikchiutiyaske in kuali tachiualisme. Uan sekin tokniuan amo mosentilijtinemij para kimouistiliske Dios pero ma amo ijkon ma tikchiutinemikan tejuan. Ta, [...] ma timopaleuijtiyakan se uan okse ika ne yolmajxitilis porin tikitaj ke kachi motokijtiuits ya ne tonal” (Hebreos 10:24, 25). Moneki timochikauaskej tiyaskej nochi nechikolmej. Itech nejon nechikolmej, uelis timosenyolchikauaskej iniuan oksekin.

19. ¿Toni techpaleuis maj tikintasojtakan tokniuan?

¹⁹ Itech nechikolmej, tikonajsis akin kuali iniuan tionmouikas. Yejuan mitsonpaleuiskej xikontekitili Jiova. Tikonixmatis miakej tokniuan akin no mochikauaj kitekitiliskej Jiova. Sayoj ke, ijkon kemej tejuatsin, yejuan no tajtakolejkej uan kipiaj nepololmej. Keman kichiuaskej  teisa tein mitsonyolkokos, xikontapojpolui (xikonixtajtolti Efesios 4:32). Nochipa xikonita tein kuali tein kichiuaj tokniuan porin nejon mitsonpaleuis xikontasojta. No mitsonpaleuis okachi kuali xionmouika iuan Jiova.

20, 21. ¿Toni “ten melau nemilis”?

²⁰ Jiova kineki maj nochin akin kuali iniuan mouika kuali nemikan. Biblia tamachtia ke satepan amo tinemiskejok kemej tinemij axkan.

²¹ Satepan tinemiskej nochipaya, uan amo sayoj 70 oso 80 xiujmej. Tinemiskej nochipaya itech se kualtsin xochital, kampa amo keman tikokolispeuaskej, kampa tinemiskej ika yolseuilis uan tiyolpakiskej. Yejua nejon tein itech Biblia moixmati kemej “ten melau nemilis” tein Jiova kijtoua ke techmakas. Sayoj ke tejuan moneki timochikauaskej axkan uan ijkon uelis tikseliskej (1 Timoteo 6:12, 19).

22. 1) ¿Keniuj uelis tikpiaskej “ten melau nemilis”? 2) ¿Keyej “ten melau nemilis” amo se taman tein uelis timotaniliskej porin timochikauaj?

²² ¿Keniuj uelis tikpiaskej “ten melau nemilis”? Moneki tikchiuaskej “nochi ten kuali” (1 Timoteo 6:18). Nejin kijtosneki ke moneki tikchiuaskej tein timomachtiaj itech Biblia. Sayoj ke “ten melau nemilis” amo se taman tein uelis timotaniliskej porin timochikauaj, ta nejon se taman tein Jiova kintayokolia itekitikauan akin kitakamatij tein ika kinnextilia “iueyiteiknelilis” (Romanos 5:15). Totajtsin Jiova yekmelauj kineki kichiuas maj nochin itekitikauan nemikan nochipaya.

23. ¿Keyej moneki tikonchiuas axkan tein Dios kiyolpaktia?

²³ Uelis tionmotajtanis: “¿Nikueyichiua Dios kemej yejuatsin kineki?”. Komo tikonita ke moneki tikonpatas seki taman, niman xikonchiua. Keman titakuaujtamatij iuan Jiova uan timochikauaj tiktakamatiskej, yejuatsin mochiua tonepaleuil. Jiova kinpaleuis itech nejin  itamian tonalmej itekitikauan akin kitakamatij. Uan satepan kichiuas maj tinemikan nochipaya itech Xochital, ijkon kemej kijtoj. Komo axkan tikonchiua tein kiyolpaktia, uelis tionnemis nochipaya.