1, 2. Ngokwapi kwatingawana jiviriro?

RANGARIRANYI kuti muri kufamba kunja zibepo recibvunguza. Makore otanga kupsipa, kotanga kurazva, zve mbheni yotanga kupaja. Tevere nvura yotanga kuna. Moringa-ringa kupsaka ndau yo kutizira. Azvidakajisi pamunowana pokufindara here?

² Tiri pa mugariro wakafanana nyamasi. Mugariro wo nyika uri kwenda wecishatisisa. Kangaije mungabvunjisa kuti, ‘Ndingawana kwapi jiviriro?’ Muimbi wo nduyo mu Bhaibheri wakatara kuti: “Bvunjai [Jehovha] kuti: ‘Ndimwi citiziro cangu, rusingo hwangu, Mwari wangu wondinogonda.’” (Nduyo 91:2) Hina, Jehovha angatisujunura mu zvineso zvedu wari, zve wotipekeja vetero inodakajisa kumbejiyo.

3. Tingaitisa kudini kuti Jehovha ave citiziro cedu?

³ Jehovha angatijiviririsa kudini? Iyena angatibesera kuti tihwisane no cineso ciri cese zve iyena anosimba guru kupinda ari wese angaeja kutikhuvaza. Pikija tikaitikihwa ngo ciri cese nyamasi, ngatithembe kuti Jehovha anozocinasirira kumbejiyo. Bhaibheri rinotivangisa kuti: “Vanganyi [kana rambanyi muri] mu rudo hwa Mwari.” (Juda 1:21) Tinodikana kugara phedo na Jehovha kuti tiashire besero rake pa nguva yo zvineso. Asi tingazviitisa kudini?

4, 5. Jehovha anokhombijisa kudini rudo hwake kwatiri?

⁴ Kuti tigare phedo na Jehovha tinodikana kuziva kuti iyena anotida maningi. Rangariranyi zvese zvatakaitihwa ndi Jehovha. Wakatipa pasi pakaseja maningi  zve wopazaja ngo muti no zvinyama zvinodakajisa. Wakatipavo zvokuha zvinonaka no kumwa yakacena kuti timwe. Zve Jehovha anoshandisa Bhaibheri kuti atijijise zina rake no undhu hwake hunoshamaisa. Kupinda zvese izvi, iyena wakakhombija rudo hwake paakatuma Mwana wake, Jesu, kuti aviye kuzopira upenyu kwatiri. (Johani 3:16) Itisu tinovetero yo kumbeji inodakajisa ngo pamusoro po kujipira uku.

⁵ Jehovha wakanasirira Umambo hwa Mesia, utongi hwo kudenga kuti hupeje matambujiko sambi-sambi. Umambo uhu hunozoita kuti pasi pano pave paradhiso zve vandhu vese vanozogara no runyararo mbhera narini. (Nduyo 37:29) Njira imweni Jehovha yaakakhombijira ndiyona rudo hwake kwatiri, ngo yokutijijisa mararamire akanaka. Iyena anotikokazve kuti tiite mukumbiro kwaari, zve iyena nguva jese anocido co kuzwa mukumbiro jedu. Jehovha anokhombija rudo kuna umwe na umwe wedu.

6. Mungaashirisa kudini rudo hwa Jehovha?

⁶ Mungaashirisa kudini rudo hwa Jehovha? Mutatijenyi kuti muri kubonga ngo zvese zvaakamuitira. Zvinosuruvarisa ngo zvokuti, vazinji nyamasi avakwanisi kubonga. Ndizvona zvaiitika Jesu paainga pasi pano. Pa vhaza imweni, Jesu wakarapa gumi ro vandhu vainga no mapere, asi umwe basi ndiyena wakabonga. (Luka 17:12-​17) Tinodikana kuva inga mwanarume wakabongaya Jesu. Tinoda kubonga Jehovha nguva jese.

7. Tinodikana kudisa kudini Jehovha?

⁷ Tinodikana kukhombijiravo rudo hwedu kuna Jehovha. Jesu wakabvunja vajiji vake kuti vaidikana kuda Jehovha no mwoyo wavo wese no mwiha wavo wese, no hwiru hwavo hwese. (Verenganyi Mateu 22:37.) Izvi zvinorevenyi?

8, 9. Tingakhombijisa kudini kuti tinoda Jehovha?

 ⁸ Zvinokwana kunanga basi kuti tinoda Jehovha here? Haiwa. Kudari tecida Jehovha ngo mwoyo wedu wese, mwiha no murangariro, tinozokhombija rudo hwedu kwaari ngo zviito. (Mateu 7:16-​20) Bhaibheri rinojijisa pambhene kuti kudari tecida Mwari, tinozozwira mupango jake. Izvi zvinonesa here? Haiwa, ngo kuti “Mupango [ya Jehovha] airemi.”​—Verenganyi 1 Johani 5:3.

⁹ Patinozwira Jehovha, tinova no upenyu hunodakajisa. (Isaia 48:17, 18) Asi icinyi cinozotibesera kugara phedo na Jehovha? Imanyi tivone.

10. Ngenyi munodikana kuramba mecijija ngo pamusoro pa Jehovha?

¹⁰ Mungaitisa kudini kuti muve shamwari ya Jehovha? Ngo kujija kwenyu Bhaibheri, munganasa kuziva Jehovha zve moita ushamwari hwakanaka nae. Ushamwari uhu, hwakaita inga muriro wamunoda kuti ugare wecibwaka. Inga muriro unoda huni kuti ubwake imwimwi munodikana kujija ngo pamusoro pa Jehovha kuti ushamwari hwenyu nae huvange.​—Mazwi Akangwara 2:​1-5.

11. Jijiso jo Bhaibheri jinozomupsasisa kudini?

¹¹ Pamunoramba mecijija Bhaibheri, munozojija zviro zvinozomupsasa mwoyo kamare. Vonanyi mazwire akava no vajiji vaviri va Jesu, Jesu paakakavadurujira zviporofita zvo Bhaibheri. Ivona vakati: “Mwoyo wedu aucaibwakepi, kani, mu gwanja, powaibuya nesu, ecitidurujira Matahwa?”​—Luka 24:32.

12, 13. (a) Zvicinyi zvingaitika no rudo hwedu kuna Mwari? (b) Tingaitisa kudini kuti rudo hwedu kuna Jehovha hurambe hwakavanga?

¹² Inga kupsasiwa mwoyo kwakaithwa vajiji va Jesu  pavakazwisisa matahwa, kangaije makavavo no cido cakafanana pamakazwisisa Bhaibheri. Izvi zvakamubesera kuziva Jehovha no kumuda. Amubviri kuda kuti rudo uhu hupere.​—Mateu 24:12.

¹³ Zvecivoneka kuti makava shamwari ya Mwari, munodikana kushanda ngo simba kuti murambe muno ushamwari hwakavanga. Munodikana kuramba mecijija ngo pamusoro pa Mwari na Jesu zve mecirangarijisisa ngo pamusoro po zvamuri kujija zve no mashandisire amungazviita mu upenyu hwenyu. (Johani 17:3) Pamunojija Bhaibheri jibvunjisenyi kudari: ‘Izvi zvinondijijisenyi ngo pamusoro pa Jehovha Mwari? Ngenyi ndinodikana kumuda ngo mwoyo wangu wese no mwiha?’​—1 Timoti 4:​15.

14. Mukumbiro unotibeseresa kudini kuti tirambe tino rudo hwakavanga na Jehovha?

¹⁴ Pamunova no shamwari yakanaka, munobhuya nayo nguva jese, zve izvi zvinovangisa ushamwari hwe nyu. Mukufananavo, patinobhuya na Jehovha nguva jese mu mukumbiro, izvi zvinoitisa kuti rudo hwedu nae hurambe hwakavanga. (Verenganyi 1 VaTesalònika 5:17.) Mukumbiro icipo cinodakajisa maningi cinobva kuna Baba vedu vo kudenga. Tinodikana kugara tecibhuya navo ngo mwoyo wese. (Nduyo 62:9) Atidikani kuphinda mukumbiro wakaita ngo kugaravhahwi mumusoro, asi ngatinange zvatinoda kamare. Zvokadi, kudari tikagara tecijija Bhaibheri zve toita mukumbiro ngo mwoyo wese, rudo hwedu na Jehovha hunoramba hwakavanga.

15, 16. Munovona kudini basa ro kucumaera?

¹⁵ Kudari tecida kuramba tiri phedo na Jehovha, tinodikanavo kubvunja vamweni ngo pamusoro po rutendo hwedu. Kubhuya no vamweni ngo pamusoro pa Jehovha rudakajiso hunoshamaisa. (Luka 1:74) Zve mutoro wakapuwa maKristu okadi-kadi ese ndi Jesu. Tese tinodikana kucumaera masoko akanaka o Umamabo. Matanga kuzviita kana kuti amuto?​—Mateu 24:14; 28:19, 20.

¹⁶ Mupostori Pauro waivona kuti basa ro kucumaera raisisira maningi; iyena wakaridaninja kuti “upfumi.” (2 VaKorinto 4:7) Kubvunja vamweni ngo pamusoro pa Jehovha no zvidisiso zvake, ibasa rinosisira maningi ramungaita. Injira yamungashandira ndiyona Jehovha, zve iyena anoreremeja zvamunomuitira. (Vaheberi 6:10) Kucumaera kungabeseravo mese; imwimwi, pomwe no vanomupurutana, ngo kuti munoitisa kuti imwimwi no vamweni mukhwedere phedo na Jehovha zve muwane upenyu ucikaperi. (Verenganyi  1 VaKorinto 15:58.) Pano basa rimweni ringamudakajisa kupinda iri here?

17. Ngenyi basa ro kucumaera rinodikana kukasikihwa?

¹⁷ Basa ro kucumaera rinodikana kukasikihwa. Tinodikana ‘kutokotesa izwi,’ zve tinodikana ‘kuvangirira.’ (2 Timoti 4:2) Vandhu vanodikana kuzwa masoko o Umambo hwa Mwari. Bhaibheri rinoti: “Njiku huru ya Jehovha yaa phedo, yaa phedo, inovia ngo kukasika.” Mugumo ‘auzononoki.’ (Sofonia 1:14; Habakuki 2:3) Hina, sambi-sambi, Jehovha anozoparaja nyika yakashata ya Sathana. Izvi zvicito zvaitika, vandhu vanodikana kungwajwa kuti vakhete kushandira Jehovha.

18. Ngenyi tinodikana kunamata Jehovha pamwepo no maKristu okadi-kadi?

¹⁸ Jehovha anoda kuti timunamate pamwepo no maKristu okadi-kadi. Bhaibheri rinoti: “Ngatirindisane umwe no umweni, pa basa ro kudisana no kuita bziro bzakanaka. Ticaxwa kuenda ku musongano wedu, inga bzo vanoroveja kuita vamweni. Kaveta imwimwi vangisananyi mwoyo ngocenyu, meciziva kuti njiku yo kuvia kwa Tenji yaaphedo.” (Vaheberi 10:24, 25) Tinodikana kuita zvatinokwanisa kuti tive pa musongano jese. Musongano jinotipekeja mukana wo kuvangisana.

19. Zvicinyi zvinozomubesera kuti mude hama jenyu no hambzaji jo ciKristu?

¹⁹ Pamunoenda ku musongano, munozowana shamwari jakanaka jinozomubesera kunamata Jehovha. Munozosongana no hama no hambzaji jakasiana-siana vanoita zvavanokwanisa kuti vanamate Jehovha, inga ndimwi. Inga ndimwi, ivona avazivivo kukwana zve vanoshaishavo. Pavanomushaishira, varegererenyivo. (Verenganyi VaKolosi 3:13.) Psakanyi zvakanaka ku hama jenyu no hambzaji jo ciKristu, mukadaro zvinozomubesera kuti muvade zve mukhwedere phedo na Jehovha.

20, 21. Upenyu “hwokadi-kadi” icinyi?

²⁰ Jehovha anoda kuti shamwari jake jese jive no upenyu hwakanaka. Bhaibheri rinotijijisa kuti upenyu hwedu kumbejiyo hunozova hwakasiana kamare no upenyu watinawo nyamasi uno.

²¹ Kumbejiyo, tinozorarama mbhera narini, kuciripi kurarama 70 kana 80 o makore. Tinozobusa upenyu “hucikaperi” mu upenyu hwakakwana, runyararo, no mudakaro mu paradhiso yakaseja. Ndihwona hunodaninjwa ngo Bhaibheri kuti, upenyu “hwokadi-kadi.” Jehovha anogondesa kutipekeja upenyu hwokadi-kadi uhu, asi tinodikana kuita zvese zvatinokwanisa nyamasi uno kuti ‘tihuwane’.​—1 Timoti 6:12, 19.

22. (a) Tingaitisa kudini kuti ‘tizowane upenyu hwokadi-kadi’? (b) Ngenyi ticikasisiri kuwana upenyu ucikaperi?

²² Tingaitisa kudini kuti ‘tizowane upenyu hwokadi-kadi’? Tinodikana kuti ‘tiite zvaushoni’ zve ‘tikhupuke.’ (1 Timoti 6:18) Izvi zvinoreva kuti tinodikana kushandisa zvatinojija mu Bhaibheri. Asi, kuwana kwedu upenyu hwokadi, asipi kuti takangwara maningi. Atisisiri kuwana upenyu hucikaperi. Ici icipo ca Jehovha ku vashandiri vake vakagondeka, zvinovonesa kuti “unyaxa” ucikatifanei. (VaRoma 5:15) Baba vedu vo kudenga vanoda kamare kupekeja cipo ici ku vashandiri vavo vakagondeka.

23. Ngenyi munodikana kukheta ushoni wari uno?

²³ Jibvunjisenyi kudari, ‘Ndiri kunamata Mwari munjira yaanodavira here?’ Kudari mukavona kuti munodikana kuita cinjo iri yese, zviitenyi ngo kukasika. Patinothemba Jehovha zve toita ciri cese catinokwanisa kuti timuzwire, Jehovha anozova citiziro cedu. Iyena anozongwarira vandhu vake vakagondeka pa njiku jo  kupejisira yo nyika yakashata ya Sathana. Perapo Jehovha anozotiita kuti tirarame mu paradhiso mbhera na rini inga cidisiso cake. Hina, mungava no upenyu hwokadi kamare kudari mukakheta ushoni wari uno!