1, 2. Zo mɛ lengbi ti batangɔ e ndɛ na?

EMU ya: mɔ ndo dɔnɔ ka gegi, ko yá mɛ kpengbani abanda yangɔ. Lɛ ndonzu vu, abanda taimangɔ, bekpa banda gbongɔ, ngu banda ningɔ kpengbani. Mɔ na gingɔ ndo kɔi ti batangɔ na tɛrɛ mɔ. Bɛ mɔ zu na lo mɛ ya mɔ luando ni!

² E ndɛ nga na ya kpale ti ngaso. Kpale ndo ti bo siɔni tingɔ ge lɛ gegi mɛ. Mɔ lengbi ti hũndangɔ tɛrɛ mɔ ya: ʻNdo mɛ mbi lengbi ti batangɔ na tɛrɛ mbi da wa?’ Wakwa tɛ Nzapa kɔi su ya: “Mbi na pangɔ hɛ̃ Yehova ya: ʻMɔ du ndo ti batangɔ na tɛrɛ mbi nga ndo ti kpengbani mɛ mbi bata tɛrɛ mbi ka da, Nzapa tɛ mbi mɛ mbi ndo kpã bɛ mbi ka tɛ lo.’” (Nzembo 91:2) Yehova ndo wamba (vɔrɔ) bɛ e na ya pɛnɔ tɛ e, lo ndo hɛ̃ nga e nzɔ̃ dangɔ bɛ na bi mɛ na gangɔ.

3. Ti nɛngɔ ya Yehova bata e, ye mɛ e li nɛ?

³ Yehova ndo bata e ngasia? Lo lengbi ti zangɔ e ya e gbe bɛ e na ya apɛnɔ bɛse pɛnɔ ni adu ngasia. Lo ɔ azi zu ko ndo gi lingɔ e siɔni na ngunu. Bɛse du ya pɛnɔ asi na e ko, elengbi ti yengɔ ya, Yehova na hãngɔ e na ya pɛnɔ ni na bi mɛ na gangɔ. Ngbangɔ tɛnɛ ya, “ĩ ngbã na ya yengɔ mɛ Nzapa ndoye na ĩ.” (Yudɛ 21) Ti nɛngɔ ya Yehova za e na ya tara ko, ayɔ ya e ngbã bo akwa lo. Wa e li ni ngasia?

4, 5. Yehova ndo fa songo tɛ lo na mbage tɛ e ngasia?

⁴ Ti nɛngɔ ya e ngbã akwa Yehova ko, ta bɛ e li na ni ma ya, lo ndo ye e gba. Da bɛ mɔ na aye zu mɛ lo li hɛ̃  e. Lo hɛ̃ e sese mɛ nzɔ̃ni, asa nga na ale kɛkɛ ndɛ̃́ ndɛ̃́ ndɛ̃́ ti nzɔ̃ni. Lo hɛ̃ e anzɔ̃ tɛ ti tɛngɔ nga na ngu ti nzɔ̃ni ti nyɔ̃ngɔ. Na lége ti Ngbangɔ lo fa e na ili lo nga na aseliye tɛ lo ti nzɔ̃ni. O mɛ aɔ zu, lo fa e na songo tɛ lo na tongɔ Nyi lo Yezo ge lɛ sese, Nyi lo mɛndó lo ye lo gba ya lo kpi na lo tɛ e azi. (Yoanɛ 3:16) Na lége ti kwá tɛ Yezo, e lua nzɔ̃ dangɔ bɛ na bi mɛ na gangɔ.

⁵ Yehova kpã Lo-lengɔ Gbia tɛ Mɛsia, guvɛrnɛma kɔi mɛ Mɛsia na lengɔ Gbia ni. Lo-lengɔ Gbia ni ko ka ndozu na onzingɔ apɛnɔ zu, ni nga na gbĩnyangbingɔ lɛ sese na Paradizo. Ka Paradizo azi zu na dungɔ na dungɔ lɛ ngɛ̃́ ti bwai, na dengɔ bɛ nga na siriri. (Nzembo 37:29) Yehova fa nga ya ni ndo ye e na ndenge mɛ lo fa na e se mɛ elengbi ti dungɔ na dungɔ lɛ ngɛ̃́ ti nzɔ̃ni bandangɔ ndɛ. Lo pa hɛ̃ e ya, e ndo li sambela hɛ̃ ni, wa lo nga dã ti mangɔ sambela ni. Yehova ndo fa songo tɛ lo na mbage tɛ zo kɔi kɔi na popo tɛ e.

6. Songo mɛ Yehova na ni na lo tɛ e ato mɔ ya mɔ li nɛ?

⁶ Songo mɛ Yehova na ni na lo tɛ e, ato mɔ ya mɔ li nɛ? Fa yangondo ya, mɔ ndo ye aye zu mɛ Yehova li na lo tɛ mɔ. Ndɛ na ngoi tɛ e ko, azi gba awa sana, ta ala ndo hɛ̃ mɛrsi na ndo nzɔ̃ ye mɛ ali tɛrɛ ala ma. Se ye mɛndó azi ndo li na ngoi mɛndó Yezo ge lɛ sese la. Lá kɔi ko, lo sarandó awa ndiba 10, kanda bo zo kɔi gɛgɛrɛ la ahɛ̃ lo sia kɔli. (Luka 17:12-17) Adu nzɔ̃ni ya e du nga ma kɔli ko. Ayɔ ya e hɛ̃ Yehova mɛrsi ngoi zu na lo ti anzɔ̃ ye mɛ lo li na lo tɛ e.

7. Elengbi ti yengɔ Yehova na songo ti ngasia?

⁷ Elengbi nga ti fangɔ ya e ndo e ye Yehova. Yezo tɛnɛndó hɛ̃ ava lo ya, ale ala ye Yehova na bɛ la kɔi, [na tɛrɛ la zu, NWT] nga na kɔdɛ tɛ ala zu. (Di Matie 22:37.) Aye tɛnɛngɔ ya nɛ?

8, 9. E fa ngasia ya e ye Yehova nɛ?

 ⁸ Tɛnɛngɔ bo na nyɔ̃ e ya, e ye Yehova alengbi? Ipɔ. Se du ya e ye Yehova na bɛ e kɔi, na tɛrɛ e zu nga na kɔdɛ tɛ e zu ko, e na fangɔ ni na ya kwa tɛ e. (Matie 7:16-20) Ngbangɔ tɛnɛ yangondo ya, se e ye Nzapa ko, e nga na tɔndɔngɔ andia tɛ lo. Tɔndɔngɔ andia tɛ lo adu kpengbani? Ipɔ, ta sanga ma, ta andia tɛ Yehova “adu kpengbani buai na lo tɛ e ma.”​—Di 1 Yoanɛ 5:3.

⁹ Se e tɔndɔ Yehova e na dungɔ na dengɔ bɛ. (Yisaya 48:17, 18) Wa ye mɛ na zangɔ e ya e ngbã akwa lo nɛ?

10. Nda mɛ ale mɔ ngbã lá kwɛ mandangɔ hĩngangɔ Yehova nɛ?

¹⁰ Mɔ tindó kwa Yehova ngasia? Na mandangɔ Ngbangɔ, mɔ manda hĩngangɔ lo, ni la mangbi tɛ mɔ na lo ati kpengbani. Mangbi ni nga ma wá mɛ atinga. Ti nɛngɔ ya wá za kpengbani ko, ayɔ ya ando tinga ni. Kwɛ kɔi, ti nɛngɔ ya mangbi tɛ mɔ na Yehova a ngbã bo kpengbani ko, ale mɔ ngbã lá kwɛ mandangɔ akpale mɛ aba lo.​—Masese 2:1-5.

11. Akpale mɛ mɔ na mandangɔ kaya Ngbangɔ na lingɔ mɔ na nɛ?

¹¹ Na mandangɔ Ngbangɔ, mɔ na mandangɔ aye mɛ na gbɔ̃ngɔ bɛ mɔ. Ba ye mɛ ava Yezo sɛ mandó na ngoi mɛ lo kambisa hɛ̃ ala nda kpale ti ya Ngbangɔ. Ala tɛnɛ ya: “Ngoi mɛ fɛrɛ lo ndotɛnɛ tɛnɛ hɛ̃ e ka lége, lo ndokambisa nga atɛnɛ ti ya buku tɛ Nzapa ko, bɛ e ako fɛrɛ mbu!”​—Luka 24:32.

12, 13. (a) Ye mɛ lengbi ti singɔ na songo mɛ e na ni ka tɛ Nzapa nɛ? (b) Ye mɛ e li wa songo tɛ e ka tɛ Nzapa ngbã kpengbani nɛ?

¹² Ngoi mɛndó ava Yezo gbɔ̃ nda tɛnɛ ti ya Ngbangɔ ko, ni gbɔ̃ndó bɛ la. Mɔ ka mɔ ma nga dengɔ bɛ ti ngaso na ngoi mɛndó mɔ banda gbɔ̃ngɔ nda atɛnɛ ti ya  Ngbangɔ. Ni za mɔ ya mɔ hĩnga Yehova, mɔ ye nga lo. Ta mɔ zia songo tɛ mɔ ka tɛ Yehova ati dé, bere azu ma.​—Matie 24:12.

¹³ Ti nɛngɔ ya mangbi tɛ mɔ na Nzapa angbã lá kwɛ kpengbani ko, ale mɔ li kpengbani. Ngbã lá kwɛ na mandangɔ aye mɛ aba Yehova na Yezo. Binga li mɔ na se mɛ mɔ kpã aye zu mɛ mɔ ndo manda na kwa. (Yoanɛ 17:3) Ngoi mɛ mɔ ndo di bere mɔ ndo manda Ngbangɔ ko, hũnda tɛrɛ mɔ na ndo olo: ʻYe mɛ tɛnɛ mɛ aha na mbi na lo tɛ Yehova nɛ? Na ya vɛrsɛ mɛ, ye mɛ to mbi ya mbi ye lo na bɛ mbi nga na tɛrɛ mbi zu nɛ?’​—1 Timɔte 4:15.

14. Nda mɛ lingɔ sambela hɛ̃ Yehova adu ye kɔi mɛ alengbi ti zangɔ e ya, songo tɛ e ngbã kpengbani nɛ?

¹⁴ Ngoi mɛ mɔ ndo tɛnɛ tɛnɛ ngoi zu na kwa mɔ ti kpɔ̃ bɛ mɔ ko, ni na lingɔ ya mangbi tɛ ĩ ngbã lá kwɛ  kpengbani. Kwɛ kɔi, ngoi mɛ e ndo e tɛnɛ tɛnɛ hɛ̃ Yehova ngoi zu na lége ti sambela ko, songo tɛ e ka tɛ lo ndo ti kpengbani. (Di 1 Tɛsalionikɛ 5:17.) Lingɔ sambela adu ye ti nzɔ̃ni mɛ To e ti ndozu ahɛ̃ e. Elengbi ti tɛnɛngɔ hɛ̃ lo ngoi zu akpale mɛ kaya bɛ e. (Nzembo 62:8) Ta e diri bo ndo sambela mɛ e gbɔ̃ ka li e ma, kanda e pa hɛ̃ lo sɔngɔ bɛ tɛ e nvɛ̃ni. Ti nɛngɔ ya e du na songo mɛ kpengbani na Yehova bwai, e ngbã lá kwɛ na mandangɔ Ngbangɔ na lingɔ hɛ̃ lo sambela na bɛ e kɔi.

15, 16. Mɔ ndo ba kwa ti fangɔ tɛnɛ ngasia?

¹⁵ Ti nɛngɔ ya e ngbã akwa Yehova ko, ale e tɛnɛ hɛ̃ azi mɛndɛ̃́ loyengɔ tɛ e. Tɛnɛngɔ tɛnɛ tɛ Yehova hɛ̃ngɔ azi mɛndɛ̃́ adu kota ndima. (Luka 1:74) Ni du kumba mɛ Yezo hɛ̃ awakristo zu. Ayɔ ya e zu e fa tɛnɛ ti Lo-lengɔ Gbia tɛ Nzapa. Mɔ banda lingɔ ni wɛ?​—Matie 24:14; 28:19, 20.

¹⁶ Fangɔ tɛnɛ adundó ye kɔi mɛ ngbondoni ka tɛ toma Polo. Lo tɛnɛ ya adu nga ma “ngbondo nwa.” (2 Kɔrinto 4:7) Tɛnɛngɔ tɛnɛ tɛ Yehova nga na dangɔ bɛ tɛ lo hɛ̃ azi mɛndɛ̃́ adu kwa kɔi mɛ ngbondoni mɛ mɔ lengbi ti lingɔ. Adu kɔi ti kwa mɛ e ndo e li hɛ̃ Yehova. Lo ndo hũ kwa mɛ mɔ ndo li hɛ̃ lo ya adu ngbondoni. (Aebreo 6:10) Kwa ti fangɔ tɛnɛ adu nzɔ̃ni na lo tɛ mɔ, nga na lo tɛ azi ko la na mangɔ mɔ, ta sanga ma, ni ndo za mɔ na ala ya, ĩ du na mangbi ti nzɔ̃ni na Yehova wa ĩ lua dungɔ lɛ ngɛ̃́ ti kaka. (Di 1 Kɔrinto 15:58.) Kwa mɛndɛ̃́ mɛ lengbi ti hɛ̃ngɔ mɔ dengɔ bɛ mabere kwa ti fangɔ tɛnɛ nɛ?

17. Nda mɛ kwa ti fangɔ tɛnɛ adu kwa mɛ ayɔ ya e li ni iɔ iɔ nɛ?

 ¹⁷ Kwa ti fangɔ tɛnɛ adu kwa mɛ ayɔ ya e li ni iɔ iɔ. Ayɔ ya mɔ “pa bo tɛnɛ tɛ Nzapa ko mɔ pa ni mɔ diri ndoni.” (2 Timɔte 4:2) Ayɔ ya azi ma tɛnɛ mɛ aba Lo-lengɔ Gbia tɛ Nzapa. Ngbangɔ tɛnɛ ya: “Kota bi tɛ Yehova dɛ dã, ni ndo ga na kpɛ nvɛ̃ni.” Ta ndangba bi “na gangɔ na pɛ ngoi ma.” (Sefania 1:14; Habakuku 2:3) Angbã dã Yehova gbɛ̃ lɛ gegi mɛ tɛ Satana. Kanda ayɔ ya, e tɛnɛ hɛ̃ azi uzu ti nɛngɔ ya ala nvɛ̃ni pɔna lingɔ kwa hɛ̃ Yehova.

18. Nda mɛ ayɔ ya, e vɔrɔ Yehova ndoni kɔi na abɛta awakristo mɛndɛ̃́ nɛ?

¹⁸ Yehova ye ya e vɔrɔ ni ndoni kɔi na abɛta awakristo mɛndɛ̃́. Ngbangɔ tɛnɛ ya: “Ale e ndodu na kpengba lɛ na popo tɛ e ya, e tinga wá na gbɛ afɔ̃ e ya, e na ala e yengbi aɔ ti uzu, ko e li nga anzɔ̃ kwa. Ale ta e awakristo e dɔ nɔngɔ bombi tɛ e ezia ma. Ambanga azi adɔ nɔngɔ bombi azia, ko ta e li nga ma se tɛ ala ma. Kanda ale e ndosangbi nguru bɛ e, ko ale e ndosa nguru ni ndoni ndoni, na lo mɛ ya, ĩ hũ ka lɛ ĩ ya, lá ti diringɔ tɛ Gbia Yezo adoli.” (Aebreo 10:24, 25) Elengbi ti lingɔ zu mɛ elengbi, ti nɛngɔ ya e gwe abombi zu. Bombi ndo za e ya, e sangbi ngunu bɛ e.

19. Ye mɛ na zangɔ mɔ ya, mɔ ye ayata mɔ ti kɔli na ti wali nɛ?

¹⁹ Na gwengɔ bombi tɛ Atɛmwɛ tɛ Yehova, mɔ na luangɔ akwa mɛ na zangɔ mɔ ya, mɔ vɔrɔ Yehova. Mɔ na tengbingɔ na ayata kɔli na ayata wali, mɛ ala ndo li kpengbani ti vɔrɔngɔ Nzapa mabere mɔ. Ala ndo yu nga ndo, ala nga azi ti zangangɔ lengbingɔ mabere mɔ. Du dã ti kangɔ lɛ mɔ na ndo asiɔ kpale tɛ ala. (Di Kɔlɔsɛ 3:13.) Kpã bo lɛ mɔ na ndo anzɔ̃ liye tɛ ala. Ni na zangɔ mɔ ya, mɔ ye ala gba, wa mɔ hi tɛrɛ mɔ dã na Yehova.

20, 21. “Bɛta du” adu nɛ?

²⁰ Yehova ye ya, akwa ni adu na nzɔ̃ du nvɛ̃ni. Ngbangɔ ndo ha na e ya, na bi mɛ na gangɔ ko, dungɔ lɛ ngɛ̃́ tɛ e na dungɔ nzɔ̃ni ɔngɔ olo e na ni ndɛ.

²¹ Na bi mɛ na gangɔ, e na dungɔ na dungɔ lɛ ngɛ̃́ ti bwai na bwai, kanda ta bo na pɛ bulu 70 bere 80 gɛgɛrɛ ma. E na luangɔ “dungɔ lɛ ngɛ̃́ ti bwai na bwai.” E na dungɔ na sãte ti nzɔ̃ni nga na siriri ka Paradizo. Ngbangɔ ndo ili dungɔ lɛ ngɛ̃́ ni ya “bɛta du.” Yehova ko kapa ti hɛ̃ngɔ mɔ du ni. Kanda ale mɔ li kpengbani ti nɛngɔ ya mɔ ʻgbɔ̃ du ti kaka ko, mɔ bata ni’ banda ndɛ.​—1 Timɔte 6:12, 19.

22. (a) Mɔ “gbɔ̃ du ti kaka ko, mɔ bata ni” ngasia? (b) Na lo nɛ la ta zo kɔi lengbi ti vɔ̃ngɔ dungɔ lɛ ngɛ̃́ na falanga ma nɛ?

²² Mɔ “gbɔ̃ du ti kaka ko, mɔ bata ni” ngasia? Mɔ lengbi ti lingɔ “nzɔ̃ kwa” nga na “kangɔ ye.” (1 Timɔte 6:18) Ni ye tɛnɛngɔ ya, mɔ kpã aye mɛ mɔ ndo manda kaya Ngbangɔ na kwa. Kanda ta na ngunu tɛ mɔ nvɛ̃ni la mɔ na luangɔ dungɔ lɛ ngɛ̃́ ti kaka ma. Ta zo kɔi lengbi ti vɔ̃ngɔ dungɔ lɛ ngɛ̃́ na falanga ma. Ni du ye mɛ Yehova hɛ̃ e gɛgɛrɛ, ni du “nzɔ̃ bɛ tɛ Nzapa.” (Roma 5:15) To e mɛ ka ndozu na gwɛ̃ ti hɛ̃ngɔ ni hɛ̃ awakwa tɛ lo.

23. Nda mɛ adu nzɔ̃ni ya, mɔ sara vɔrɔngɔ Nzapa banda ndɛ nɛ?

²³ Hũnda tɛrɛ mɔ na ndo olo: ʻMbi ndo vɔrɔ Nzapa na se mɛ bɛ lo ye na ni?’ Se du ya mɔ hũ nzɔ̃ni ti gbinyangbingɔ aseliye tɛ mɔ ko, li ni na olo. Se e kpã bɛ e ka tɛ Yehova wa e li zu mɛ elengbi e li ti nɛngɔ ya e tɔndɔ lo ko, lo na dungɔ kpengba ndo mɛ e bata na tɛrɛ e. Lo na batangɔ ava lo na ndangba bi mɛ siɔni ge lɛ  gegi mɛ tɛ Satana. Yehova na lingɔ ya e du bwai na bwai ka Paradizo se mɛndó lo ko kapa ni. Mɔ lengbi ti dungɔ na dungɔ lɛ ngɛ̃́ ti nzɔ̃ni se mɔ ye vɔrɔngɔ Nzapa banda ndɛ!